% Text title            : Bhadradrirama Shatakam
% File name             : bhadrAdrirAmashatakam.itx
% Category              : raama, shataka
% Location              : doc\_raama
% Author                : Kavimani Subrahmanyashastri
% Proofread by          : Aruna Narayanan
% Description/comments  : Ramastutimanjari page 445
% Latest update         : June 3, 2023
% Send corrections to   : Sanskrit@cheerful.com
%
% This text is prepared by volunteers and is to be used for personal study 
% and research. The file is not to be copied or reposted for promotion of 
% any website or individuals or for commercial purpose without permission. 
% Please help to maintain respect for volunteer spirit.
%
\documentstyle[11pt,multicol,itrans]{article}
#include=ijag.inc
#endwordvowel=.h
\portraitwide
\parindent=100pt                
\let\usedvng=\Largedvng      % for 1 column     
\pagenumbering{itrans} 
\def\engtitle#1{\hrule\medskip\centerline{\LARGE #1}}
\def\itxtitle#1{\medskip\centerline{\LARGEdvng #1}\medskip\hrule}
\def\endtitles{\medskip\obeyspaceslines}
%%
\begin{document}
\engtitle{.. Bhadradrirama Shatakam ..}##
\itxtitle{.. bhadrAdrirAmashatakam ..}##\endtitles ##
shrIrAmAya namaH |
(kavimaNi subrahmaNyashAstrirachitaM)
bhadraM bhadrAdrivAsI dishatu raghupatirbhAvito mAnasena
       dhyAto bud.hdhyA cha shIrShNA padanalinanataH ki~ncha vAchA stutashcha |
yasyA~Nghrau vandamAnAnamarapatimukhAnvIkShya nantuM gatAnAM
       smerAsyAbjekShaNena pratidishati mudaM mAnavAnAM vilambaH || 1||
vAchaH sarvA nivR^ittA iti saha manasA budhyate vedavAkyaiH
       brahmAdyA apyashaktAstava mahimaguNaprastutAvityavaimi |
itthaM bhUte.api vastunyatimalinamatiH stotumichChAmi yattvAM
       chApalyaM tatra heturbhava sahanaparo rAma bhadrAdrinAtha || 2||
dhAnuShkAgresaratvaM dharaNipatishatAsevya pAdAmbujatvaM
       vistIrNaishvaryakatvaM vipulatarayashaH shveta lokAvalitvam |
bhAsantAM te kimetairmama dharaNisutArAma kashchidguNo mAM
       kAruNyAbdhitvarUpaH kalayati vivashaM bhadrashailesha dAsam || 3||
dR^ishyA kodaNDalIlA dashamukhashirasAM khaNDane.anekakR^itvaH
       kAkasyaindreshcha mantau niravadhikR^ipA.alubdhatA rAjyadAne |
yAtrAdAne cha vAdAnyakaM, anilasute bhR^ityavAtsalyamagryaM
       nirvyAjaH premabhAro mayi cha, tava vibho rAma bhadrAdrinAtha || 4||
yaH kR^itvA toyarAshiM nijachulakagataM prArthito.apAtsuraughaiH
       yasyAj~nAM pAlayan san na bhayabhR^itamanA vardhate vindhyashailaH |
yadvAchA sarpatA.abhUnnahuShasurapateH so.apyagastyo munIndraH
       prAvochatpAvanaM tvAM mama hara duritaM bhadrashailesha tasmAt || 5||
kArAyAM dvAdashAbdAn janani janakaje yAtanAmAptavantaM
       nirmApyAlayaM vo maNigaNakhachitairbhUShaNaiH sArdhameva |
bhaktaM shrIrAmadAsaM tava mR^idulagirA rakShati sma priyaste
       bhadrAdrIshapriye mAM kathamavatu vinA tvadgirA rAghavaH saH || 6||
kurvANaH krUrakarmANyapi samupagatastvAM tu daivAdyadi syAt
       tvaddattAM prApya shikShAM prathamamatha naraH prApnuyAdIpsitAni |
duShTau duShkarmaniShThau kila vipinacharau yatkabandho virAdhaH
       hastachChedaM tvadAptau svapadamatha gatau bhadrashailAdhinetaH || 7||
tvatprAptiM bhedashUnyAM shrutishikharagiro muktishabdArthamAhuH
       niHsImAnandarUpAmahamiha na vR^iNe tAM tu bhadrAdrinAtha |
dUrvAshyAmAvabhAsaM smitalasitamukhaM sAnujaM sItayetaM
       bibhrANaM chApabANau nayanapathi dadhajjanmakoTIrnaye tvAm || 8||
labdhvA puNyairagaNyairiha manujajaniM durlabhAM bha~NgahInAM
       nAdhastAdgantumIhe yadapi kushalatA nAsti chordhvaM prayAtum |
kurve karmANi kintu prasabhamabhipatetpUruSho yairadhastAt
       UrdhvaM tvaM prApayermAM tava padamatulaM deva bhadrAdrinAtha || 9||
bANaste pUjito me dalayatu ShaDarIn bAdhamAnAnajasraM
       chApaste nAshayenme sakalamapi mahApAtakAnAM samUham |
pAdaste pAdukAyA iva mahitataraM sthAnamIshArpayenme
       kAyaste kAmadogdhA nayanapathagato bhAtu bhadrAdrinAtha || 10||
lAvaNyAnAM nidhAnaM suranarajanatA tApanirmokShahetuH
       kalpAgo mArgaNAnAM kalikaluShadR^ishAM svargamArgapradIpaH |
bhadrAdrau netrabhAjAM amR^itarasalasachChuddhasiddhA~njanashrIH
       Aste sItAdR^igIkShAdviguNita vilasatkAlimA kAlameghaH || 11||
uchChettA saMshayAnAM shrutishikharagirAmarthanirNAyakatve
       shA(sha)strAbhyAsasya kAle.apyabhigata vinuvadvR^iddhalokasya nityam |
shAstrANAmarthajAtapravachanapaTudhIrjanmabhUmiH kalAnAM
       bhadrAdrau bhAti kashchidbhavagahanachara shrAntavishrAnti vR^ikShaH || 12||
satvodrekaprakAshaH sharaNamabhiyatAM prANinAM tAmasAnAM
       ArdrAgaskAriNAM no hR^idayagatamahAnugrahAvedako.ayam |
chetaHkalhAracha~nchadvikasanakaraNe chandrikA bhUsutAyAH
       bhadrAdrIshasya hArdaM vyapanayatu tamaH sundaro mandahAsaH || 13||
sItAnetrAntavIkShA.asitaruchishabalashchauShTharAgAnuviddhaH
       keyUra svarNakAntivyatikara subhago rAma te mandahAsaH |
aindreShvAsasya sha~NkAM vitarati satataM pashyatAM lochanAnAM
       yuktaM bhadrAdrinAtha tvamapi jaladharabhrAntidAyI vibhAsi || 14||
netrAhlAda pravINo nijatanumahasA santataM lakShmaNeto
       nityaM sanmArgagAmI sakalamapi haraMstApamatyantashuddhaH |
Alokenaiva dUrAdapi dR^iDhatamasAM Chedane sampravR^itto
       bhadrAdrau kinnu rAtri~ncharanidhanaparo bhAsate rAmachandraH || 15||
chitraM bhadrAchalendo tava kila charitaM varNyatAM kairvachobhiH
       sItAyA viprayoge karuNakaraNatA prasphuTA te vilApaiH |
tyaktvA tAmeva devIM purajanavachasA garbhiNIM kAnanAnte
       dhIro.abhUH pAlayankShmAM makhakaraNaparo vatsarANAM sahasram || 16||
kvAhaM mAndyaikabhUmiH kvacha raghutilako vidvadIDyA~NghripadmaH
       stotrAyAthApi tasya prasarati hR^idayaM vAryamANaM mayApi |
modenAthApi nUnaM raghukulavR^iShabho bhadrashailAgravAsI
       stambhArohaprayatnaM hasati kila shishuM vIkShya nandanpitA hi || 17||
shR^iNvanto vA paThantastava charitavaraM hanta vAlmIkibaddhaM
       bhaktA AnandabAShpAkulanayana yugAH ki~ncha romA~nchavantaH |
yatrAsIraMstato mAmapi naya bhagavanbhadra bhadrAchalesha
       prApsyAmyuttIrya mohAmbudhimatha bhavatastejaseddhaM padaM tat || 18||
aishvaryaM dhanalAbhamapyadhikatAM sveShu prashaMsAvahAM
       arthibhyo.arpaNamanna vastradhana sadvidyAdikAnAmapi |
ye vA~nChanti ta ekadApi manujA godAvarImajjanAH
       bhadrAdrIshvarapAdapadmayugalInamrA bhavantu kShaNam || 19||
bho lokAH shR^iNutedamalpadhiShaNenApyuktamalpaM vacho
       vaiduShyaM kavitAM dhanaM nipuNatAM yachchetaratkIrtikR^it |
rAmaH sveShu parIkShate na kuhachidbhaktiM paraM pashyati
       kShemArthaM tadupeta bhadradharaNIbhR^innAthadR^iShTeH padam || 20||
rAmo rAma itIva sarvajanatAsa~NghuShyamANe vibhau
       aj~nAnAdiva te kathAM suramuniM paprachCha valmIkabhUH |
tena j~nAtamidaM tavottamakathA vaktrAdgR^ihItA guroH
       muktyai syAdapi bhuktaye tanubhR^itAM bhadrAdrinAtha prabho || 21||
haMsaM tvAmavayanti shAstranipuNAH sanmAnase sa~nchara\-
       syevaM chettava pakShapAtamuchitaM manye mahIpeshvara |
tasya sthAnamamuM janaM kalayituM kvAkShepakartA.asti te
       bhadrAdrIshvara bhAvayAsya samayaM sajjo.asmyahaM sarvadA || 22||
yadbrahmAhurapANipAdaM amano niShkarNachakShurmahat
       taddraShTuM kathamIshmahe kathamaho nantuM samIhAmahe |
ityAlochya viShIdatAM tanumatAM kShemAya rAmAtmanA
       tadbhadrAchala sImni rAjatitarAM sarvAnpumarthAn dadat || 23||
vA~Nme nirguNa mAnuShastutihatA cheto hataM chintayA
       hasto.ayaM mama durjanArpitadhanAdAnena nityaM hataH |
puShTaM duShTaparAnnatashcha jaTharaM sa tvaM prasIdeH kathaM
       nirvyAjAM pratipAlaye tava kR^ipAM bhadrAdrinAtha prabho || 24||
mAyA tvAM janayatyajaM vidadhatI nAmAni te sAdaraM
       brahmA viShNurumApatI raghupatiH kR^iShNashcha kalkIti cha |
mattrANAya niyojayedyadi tadA kuryAshcha madrakShaNaM
       shrIbhadrAdrivibho madIyaduritaiH sA naivamAdhAd dhruvam || 25||
kalyANaM kamalApateH kalayatAtkamro.avatAraH sa no
       yaH ka~NkAya cha yoginAmasulabhaM sthAnaM svayaM prAdadAt |
gatvA.anyaM puruShaM dhiyA munivadhUM bhraShTAM punAti sma yo
       yo vA dakShiNadeshajAnsukhayituM bhadrAchale tiShThati || 26||
kalpadruH kavitAjuShAM kulagururvidyepsayA shrAmyatAM
       bhArUpaH praNatAntarasthatamasAM bhogyaM paraM yoginAm |
kAlaH kauNapasantateshcha karuNA mUrtA mahAgasvinAM
       bhadraM dAtumanargalaM vijayate bhadrAchale ko.api naH || 27||
yasyA~NghreH sakR^idarpaNAdraghukulakShmapAla siMhAsanaM
       prAptaM pAdukayA.api rAkShasapatiH kIshAdhipashcha svayam |
AstAM premabhareNa nunnamanasau sachchAmaragrAhiNau
       yasyAsau mama sevyatAmadhigato bhadrAchalasyopari || 28||
chApo yasya tanoti pAtakatateH setau kR^itAgraH kShatiM
       bANo yasya kapIshabhAvamadadAtputrAya bhAsAM nidheH |
vIkShA yasya cha pApino.api bhavati svarlokaniHshreNikA
       so.ayaM vA~NmanasAtigAmi mahimA jAgarti bhadrAchale || 29||
yadvIkShA sharabha~NganAmakamuneH vaidhAtpadAt jyAyasI
       yatsevA yuvarAjatAkhyapadataH shlAghyA sumitrAbhuvaH |
yachchAritrakathAshrutirhanumato vaikuNThavAsAdhikA
       tAstisro.api cha bhadrashaila shikhare labhyAH svato dehinAm || 30||
yaM vakShaHsthalamAsthitA.api kamalA no tatvato jAnatI
       tasyAnugrahamIpsatIva padayoH sevAM sadA kurvatI |
so.ayaM rAmavapuH prakAshitamahAtattvaH svayaM brahmaNA
       mUDhAnugrahakA~NkShayA vilasati shrIbhadrashailopari || 31||
a~NgAbhAjita toyadAya bhajatAM bha~NgAvahAya dviShAM
       ga~NgApAvanatApradAya mahijAsa~NgAdhikAnandine |
pi~NgAkSheshasakhAya me natishataM ra~NgAdhirAjArchine
       tu~NgAtyujjvalabhadrashailavilasachChR^i~NgAgrabhUvAsine || 32||
yAche tvAM raghunAtha ki~nchana na te dattena tena kShatiH
       sArathyaM dadate tvadarthamayate bhaktiM sumantrAya te |
yadrUpaM samadarshayaH karuNayA prasthAsyamAno vanaM
       tattejomayamIkShituM mama mano bhadrAchaleshechChati || 33||
kAruNyAmR^itavarShuko janakajAvidyullatAsa~NgavAn
       santApaM shamayan svamAshritavatAM shyAmAbhirAmAkR^itiH |
nityaM satpathamAshrito janatayA samprArthyasandarshanaH
       bhadrorvIdharamAshrito vijayate rAmAbhidhAno ghanaH || 34||
cheto me viShayeShu sa~ncharati na prahvo.asmi te pAdayoH
       sadbhiH sAdhu samAgamo na kuhachit shraddhA cha no karmaNi |
saMsArAmbunidhiM tarItumanasaH kiM vA.asti me sAdhanaM
       bhadrAdrIshvara te vinA.adya shabarImokShapradAtaH kR^ipAm || 35||
shreyaH pakShmalayanti sUktiShu sudhAM si~nchanti rAj~nAM sabhA\-
       svAtanvanti jayaM samaM budhagaNairvidyAvivAdeShvapi |
Aki~nchanyamapAnudanti hR^idayaM kurvantyaho nirmalaM
       bhadrAdrIshvara rAmabhadra karuNAphullatkaTAkShA~NkurAH || 36||
chA~nchalyaM parihartumabdhipayaso nAtheshiShe svechChayA
       cheto me chapalaM vidhAtumachalaM shakte na kiM tvatpade |
IshastvaM varabhadrashailanilaya sthANordhanurbha~njane
       matkarmA~NkuramIshvaro dalayituM kiM neti vij~nApaye || 37||
sevyastvaM shrutishIrShavArdhitalagairnityaM munInAM gaNaiH
       mUDheShu prathamAsanaM prathayatA sevyo mayA.api svayam |
nAnAnandamayaM svadhAma nayase mAmapyasandehato
       yuktaM kiM nu budhAbudhau samatayA bhadrAdrinAthekShase || 38||
kIrtyarthaM na tu bhaktito raghupate gumbhanti ye tvatkathAM
       vAchA mAkShikadhuryayA tava kR^ipApAtratvamAyAnti te |
jihvAchApalato rasAyanavaraM ye bhu~njate te.api kiM
       nArogyaM mahadApnuvanti bhuvane bhadrAchalesha prabho || 39||
tvadbANena nimajjito jalanidhau mArIchanAmA.asharaH
       pashyan rAmamayaM jaganmunitatIrbhIterbharAdatyagAt |
pApo.amUM gatimAnashe yadi tavAdhAyAparAdhaM paraM
       kiM vAchyaM varabhadrashailanilaya tvatpAdapadmArchiShu || 40||
rAma tvatpadapadmayornakharuchirhArdaM tamo me haret
       udbhUtA charaNAmbujAttava purA srotasvinI dyosadAm |
soDhvA te jaladhiprayukta sharasaMsaktAgnitApaM paraM
       patyarthaM sharaNAgateva lasati shrIbhadrashailesha yA || 41||
kR^itvA.a.agAMsi bahUnyapi pratidinaM tvatto bhayaM nApnuyAM
       kR^itvA.a.ago vadhadaNDanaM sa balibhuk kiM na tvayA rakShitaH |
tvAM yAtaH sharaNaM tathA.ahamapi kiM tvAM rakShakaM nAptavAn
       bhadrAdrIshvara varSha mayyapi kR^ipApUrNAn kaTAkShA~NkurAn || 42||
kurvankarma madarthameShyati tataH siddhiM bhavAnityamuM
       pArthAyArthamupAdisho na khalu tadvAkyaM mR^iShA.avochathAH |
dhutvA rAvaNamAharantamavanIputrIM rathAtpAtayan
       pakShachChedamavApya bhadragirirAT ! gR^idhraH padaM te.agamat || 43||
mAhAtmyaM tava vedituM raghupate nAlaM viri~nchAdayo
       vAlmIkistadavettavaiva kR^ipayA leshasya leshAtmanA |
satyevaM tava vaibhavaM bhuvi kaviH ko varNayetkR^itsnashaH
       tvaddattAM kavitAM tavaiva padayorbhadrAchaleshArpaye || 44||
vIkShA te raghunAtha hanta shabarImokShAya sa~Nkalpate
       vIryaM sha~NkarachApabha~njanakR^ite prauDhiM samAlambate |
krodho rAkShasarATshirodashashatIM bhUmau kShipatya~njasA
       shrIbhadrAchalanAtha te stutividhau ke vA varAkA vayam || 45||
kiM te me varivasyayA vihitayA nUnaM na mAmIkShase
       rakShovAnaranAyakAvabhavatAM te chAmaragrAhiNau |
dAsaste nayane girerapi mahAdakSho hanUmAnabhUt
       sarvorvIpatitAM svayaM cha vahase bhadrAdrinAtha prabho || 46||
bhadrAdrIsha taveDitAni charitAnyatyadbhutAni prabho
       pAShANaplavanaM tR^iNasya cha tathA brahmAstratApAdanam |
strItvaprApaNamashmanashcha dhanuShaH shambhostathA bha~njanaM
       dR^ishyante kva nu nAma ka~NkashabarImokShapradAnaM tathA || 47||
kopaste vishadaH payodhipayasAM kvAthakriyAdAnataH
       shaktiste parameshabAhuvidhR^iteShvAsadvidhAbha~njanAt |
prItiste cha rajastamotigapadAdeshAttirashchastathA
       vAtsalyaM mama bhadrabhUdharapate nirhetukaM rakShaNAt || 48||
gAdhAbhiH svakapolakalpita padonniShyandi mAdhvIrasA\-
       svAdAnandita sajjanAbhiranishaM gAyanti hi tvAM budhAH |
jIvanmuktatayA sthitA api cha te yadyevamarhattamAH
       joShaM bhAvamavApnuyAM kathamahaM bhadrAdrinAtha prabho || 49||
kalyANaM kalayasva me kalimalaM saMsaktamunmUlaya
       bhrAntiM vAraya bhogajAlajasukhe kAmAdikAnsaMhara |
chittaM nirmalaya pramohabharitaM svAtmAnamAdarshaya
       klAntaM mAM bhavadAvataH shishiraya shrIbhadrashaileshvara || 50||
chandro.abhUnmanasastaveti vachanaM vakti shrutiH so.apyasau
       AhlAdaM vitanoti shItalaruchiH sanmArgagAmI sadA |
kAryaM kAraNato guNAn labhata ityAhurmanaste tathA
       bhadrAdrIshvara tAnguNAMstava samAn sa~NkrAmayAsmAsvapi || 51||
duShTasyApi vinindato.api dayase tvaM vAlinaH sma sphuTaM
       bhAryAhartari rAvaNe yudhi jite na ghnangR^ihaM praiShayaH |
sItAvakShasi dAraNaM kR^itavataH kAkasya rakShAmadhAH
       bhadrAdrIshvara mAM paraM duritinaM tvaM shikShase pratyaham || 52||
vanditvA tava pAdapadmayugalaM vandeya nAnyaM kvachit
       prArthya tvaM svamabhIpsitaM na cha paraM tatprArthayeyaM punaH |
evaM chetkriyate yasho.akaluShitaM syAtte mamaitatpriyaM
       bhAvaM taM mama pAlayasva dayayA bhadrAchalAdhIshvara || 53||
ga~NgAyA api chottare janapade janmAptavAn svechChayA
       pAtuM dakShiNadeshajAnapi janAn sandarshanAnugrahaiH |
nunnastvaM dayayA.atipuNyataTinI godAvarIrodhasi
       prApto bhadragiriM raghUttama vibho rakSha~njanAn mAdR^ishAn || 54||
kalpadrurmadhupAshritastR^iNamukhI sA kAmadhenuH shrutA
       chintAmaNyabhidho maNishcha kaThinaH ki~ncha sthitAste divi |
satsevyo vijayI raNe sadayahR^idbhadrAchale bhUtale
       nirdoSho raghunandano vijayate devo vadAnyottamaH || 55||
kayA.adya vidhayA bruve kaliyugasya doShaM janAH
       kShipanti bahu vatsarAn kShaNamivArasairbhAShaNaiH |
aruntudanarastutIrvidadhate sadA paNDitAH
       smaranti na kadAchana svapanato.api bhadrAchalam || 56||
vichitrataravedikaM vimalahemataH kalpitaM
       vimAnavaramagrato.asya cha sudarshanaM kA~nchanam |
pradakShiNapathaM budhaiH paThitadivyarAmAyaNaM
       prapashyata varAlaye raghuvarasya bhadrAchale || 57||
karIndrakarabAhave karadhR^itAshugAseShave
       prashastaguNa sindhave praNatajanminAM bandhave |
kalIritatamomuShe kalitapuNyahR^ijjagmuShe
       namAMsi cha samarpaye nagaritorubhadrAdraye || 58||
munIndravaramohane muShitachakShuShIkShAvatAM
       videhatanayAdR^ishorvirachitAmR^itAgryA~njane |
svasurnishicharaprabhoH smarasharArtisandAyake
       sharIramahasi prabhorvishati hR^ittu bhadrAchale || 59||
charAcharavidhAyinIM charaNanamradhIdAyinIM
       kavistutirasAdinIM karuNayA.a.artasaMrakShiNIm |
dilIpakulanandinIM diviShadArtisaMhAriNIM
       bhajAmi paradevatAM bhavanitorubhadrAchalAm || 60||
atItabhavasa~nchitairagaNitaishcha puNyavrajaiH
       avApya raghunAyake.abhyadhikabhaktimadvaitinIm |
tayA jigamiShetpadaM sukhamayaM janashchettadA
       prayAtu budhasa~NkulaM prabhusanAthabhadrAchalam || 61||
kaliH kalayate balAtkaluShachittasaMvAsanaM
       prabho ShaDarayo manaH prAchayanti vAsogR^iham |
bibhemi cha yamAdahaM bata tavApi dAso bhavan
       ato.atra tava dR^iShTaye vasatimemi bhadrAchale || 62||
yasyaivAkhyA maraNasamaye muktaye dehabhAjAM
       vArANasyAM madanaripuNA prochyate karNamUle |
yasyaivAj~nA jalanidhijalastambhanaprauDhirAsIt
       so.ayaM bhadrAchalashikharagaH shoShayechChokamohau || 63||
AshApAshAbhihatamanasAmAmayaiH pIDitAnAM
       j~nAtuM shaktyA virahitadhiyAM brahma vedAntavedyam |
prAptuM yAvattanu sukhamalaM kA~NkShatAM muktimante
       kA vA.astyanyA gatiriha vinA bhadrashailAdhinAtham || 64||
janma prAptaM dhanapatigR^ihe lokamAnye tataH kiM
       vidyA labdhA vinayamahitA vishvahR^idyA tataH kim |
vIryodreko bhavati vijayaprAptihetustataH kiM
       saukhyaM labhyaM tviha cha parato bhadrashailAdhinetuH || 65||
mR^ityormR^ityuM satatamayatAM jAtito j~nAnato vA\-
       .ajAnAnAM nijamavaratAdoShamapyutsukAnAm |
prAptuM lokAnatha cha punarAvR^ittishUnyAnsukhArthaM
       bhadrorvIdhre lasati shabarImokShadaH ko.api devaH || 66||
sadvA.asadvA kavayati kaviH ki~nchidAdhAya chitte
       kShudrairarthaiH saphalayati tAM vAchamalpairabuddhiH |
vAlmIkiste charitamabhidhAyaiva vaidheShu loke\-
       ShvadyApyAste sukhamanubhavan rAma bhadrAdrinAtha || 67||
yasyA lAbhAjjanakanR^ipatervR^iddhirAsIdanalpA
       yasyAH krodho na bhavati mahAmantukR^idrAkShasIShu |
saivAnanyA yadi janakajArUpiNI padmagehA
       kiM tvAM na syAtsukhamupayatAM taM cha bhadrAdrinAtha || 68||
naShTaM kiM te bhavati nayanAnandimUrte vadAdau
       magnonmagnaM bhavajalanidhau bhAvanAshUnyabuddhim |
kAmakrodhAdyabhidhamakaraistudyamAnaM samantAt
       mAM mA bhaiShIriti vadasi chedbhadrashailesha vAchA || 69||
deho bhAsvAMstava sitaruchI rAma te mandahAsaH
       lokArtInAM shamakara vibho lohito lochanAntaH |
bhAvaH saumyo gururapi kR^ipA vidvadarchyaH kavistvaM
       mando roShaH shirasi cha tamo bhAsi bhadrAdriketuH || 70||
sAraM vedAgamagatagirAM sArasAsUyi netraM
       bhAraM pAdapraNatajanatAbhUtirUpaM vahantam |
pAraM dUraM bhavajalanidheH prApayantaM prapannAn
       vAraM vAraM virachitanatirnaumi bhadrAchalesham || 71||
godAvaryAH salilashishiraiH sevyamAnaM samIraiH
       godAnAnAmayutajaphalaM sevinAM sandishantam |
gopAyantaM charaNapatitAn nArakAd ghorarUpAt
       gopatyudyatsukulatilakaM naumi bhadrAchalesham || 72||
karmArAdhyaM sakalajagatAM sAdhakaM kA~NkShitAnAM
       kAvyArambhe kavipariShadA svIkR^itaM nAyakatve |
uchChettAraM sakalavipadAmunmukhaM shrIpradAne
       bhadrAdrIsha shrayatu katamaM tvAM vinA.ayaM vivekI || 73||
premAveshastvayi samabhavaddhanta vAlmIkivAkyaiH
       no shakyo.ayaM vyapagamayituM vA~NmukhairnAstikAnAm |
duHkhaM vA syAtsukhamapi cha vA tena sarvaM saho.ahaM
       bhadrAdrIsha tvayi sukhamiyAM rAma vinyasya bhAram || 74||
bhadrAdrIsha prabhuvara na te rakShakaH shikShako vA
       pApiShThaM mAmapi yadi karoShyAtmadAsaM kShatiH kA |
bhrAtR^idrohidvayamapi kR^itaM rAjyadAnaikapAtraM
       duShprApaM yattridashabhuvanaM tatkabandhena jagme || 75||
marakatamaNishyAmA kAmArpaNodyatamAnasA
       satatakaruNAsAra shrImatkaTAkSha chamatkR^itA |
sukR^itijanatAsevyA stavyA sudhAmayavAgjharI\-
       vitaraNachaNA bhadrAdristhA vibhAti hi devatA || 76||
aruNacharaNairAtAmrAkShairapuNyasudurlabhaiH
       vinatabharaNairvishvAtItaiH viyatsamavaibhavaiH |
dasharathatapaHpu~naiH dInAvanaikadhurandharaiH
       bharatavinatairbhadrAdristhaiH bhaje paratantratAm || 77||
malinamalinaM mandapraj~naM madIyamano.adhunA
       vimalavimalAM buddhiM prAptairvimR^ishya vimR^ishya cha |
shrutishikharagaM tvatkaM tattvaM chireNa cha gR^ihyate
       kathamahamiyAM bhadrAdrIsha tvadIyakR^ipArasam || 78||
shrutishirasi me nAsti praj~nA shraye na sataH kvachit
       vihitacharaNaM tyaktvA nityaM niShiddhamupAshraye |
tadapi dhiShaNA mukteH prAptAvatIva samutsukA
       sati manasi me bhadrAdrIshe kimasti hi durlabham || 79||
nagaramaTavIM kartuM netaH puraM cha mahAvanaM
       tava vanagatau pauro lokastadA yatate sma hi |
tadabhilaShitaM tairno labdhaM tavaiva hi va~nchanAt
       iti kila kR^ipAnunno bhadrAchalaM nagaraM vyadhAH || 80||
pariharatu me pANidvandve sharAsasharA~NkitA
       paramapuruShAbhikhyA pApaM purAtanadevatA |
munivitatayo nAyodhyAyAM na vA parame pade
       vihitaratayo bhadrAdrau yAmushanti niShevitum || 81||
kamalanayane kAruNyAbdhau kapAlikR^itAdare
       vidhinutapade vishvAtIte vipattitamoravau |
bhavabhayamahAbhArAkrAntAshayasya bhR^ishAdhino
       bhavatu hR^idayaM bhadrAdrIshe mamAnishamarpitam || 82||
kalitabhuvanaiH kAlAvashyaiH karAttasharAsanaiH
       kavikulagirAM bhAgyairbhogyaiH kadApyakR^itainasAm |
janakatanayAnetrAnandairjagattrayapAvanaiH
       bhavaharapadairbhadrAdristhairbhavAni surakShitaH || 83||
ayodhyAM gatvA tvAmavanitanayAvallabha vibho
       na sandraShTuM shaktA iti kila vayaM mAnasatale |
matiM godAvaryAM mahitasarayUrityavikalAM
       prayAmo bhadrAdriM gR^ihamiti cha sAketanilayam || 84||
kR^itaghnatvAdInAM svakR^itaduritAnAM phalatayA
       bhave.asmindAridryaM bharatanutapAdAnubhavatAm |
idAnIM tvatpAdAnatiparadhiyAM janmamaraNe
       vinighnan bhadrAdrau vasasi dadase chAdhikadhanam || 85||
kavIndrANAM vAchaM mukulayati te dAnamahimA
       gR^ihItvA ShaDlakShImitakanakaniShkANi rajanau |
vitIrya svaM dAsaM yavananR^ipatermochitavataH
       kR^ipAsindho bhadrAchalakR^itagR^ihapremanilaya || 86||
dhunAnaM bhaktAnAM duritanikurumbaM shubhadR^ishA
       kriyANAM kartR^INAM phalamuchitarUpaM cha dadatam |
kalAnAmAsthAnaM kalitasukR^itAnAM cha sulabhaM
       bhayaM tyaktvA chittaM bhajati mama bhadrAchalapatim || 87||
sphurantyAM shampAyAM sajalajaladaM tvAM kila viduH
       latAyAM sauvarNyAM marakatamaNiM prAhurapare |
vadantyanye santaH kanakakamalasthaM pR^ithumaliM
       mahIjAshliShTaM tvAM manukulaja bhadrAchalapate || 88||
yadIyAnAM nAmnAM shatamadhikamaShTAbhiratulaM
       maheshaH sharvANyai shrutinichayasAraM kila purA |
upAdikShadyasyApyupaniShadi gUDhaM cha charitaM
       sa bhAti shrIbhadrAchalashikharadIpo raghupatiH || 89||
shayAnaM shayyAyAM tarudalakR^itAyAM raghupate
       vilokya tvAM vidvAnapi kushikajo brahmakR^itadhIH |
prasUtA kausalyA sutavaramiha prAha munirAT
       namastasmai bhadrAchalanilaya te dehamahase || 90||
prasAdaste prAptuM na sukara iti prAhuradhiyaH
       sukhaM prApto yasmAdarisahabhuvA.api drutamayam |
ahaM tu tvatpAdaikasharaNamito.api svaduritaiH
       alabdhvA taM sIdAmyatikaruNa bhadrAdrinilaya || 91||
jaTAlastvaM pAde tava nipatito.abhUnmakuTabhR^it
       vane.avAtsIrnityaM tava parijanaH saudhanilayaH |
priyAhInastvaM te ramayati vadhUH ko.api kR^ipayA\-
       .apyasaktastvaM bhogAndishasi namatAM bhadragirirAT || 92||
tapobhiryogairvA taraNikulaketo katichana
       prasAdya tvachchittaM vidhibhuvanamIpsanti vibudhAH |
ahaM tu tvadvaktrAmbujasatatavIkShAsukhakR^ite
       vaseyaM bhadrAdrau satanuratanurvA kuru tathA || 93||
vidhIndrAdyarchyebhyo vividhasukhadebhyaH praNamatAM
       punAnebhyaH patnIM padanayanaviprasya patitAm |
dadadbhyo dArubhyAM dharaNipadasiMhAsanapadaM
       namaH stAdbhadrAdrIshvarapadarajobhyaH pratidinam || 94||
kadA vA bhadrAdrau taduditavane vA.asya cha taTe
       naratvaM kITatvaM mR^igavihagatAM vA samupayan |
raghUNAmIshAnaM paricharitumArAdabhiyatAM
       padodbhUtAn pAMsUn shirasi kalayannirvR^itimiyAm || 95||
kadA vA bhadrorvIdharanikaTadeshe puravare
       pratolIShu bhrAmyatsakalajana sAdhAraNatayA |
sthitaM sItArAmetyanishamapi shabdaM nishamayan
       kR^itArthatvaM sR^iShTeH shravaNayugalasyApi tanuyAm || 96||
kadA vA bhadrAdrau karaNanivahaM sAdhu yamayan
       suShumnAnADItaH sravadamR^itadhArAplutatale |
hR^idambhoje rAmaM sharasharadhibANAsanadharaM
       na jAnIyAM dhyAyan gatamapi sahasraM cha sharadAm || 97||
kadA brahmakShatraM raghuvara tavAnnaM shrutamataH
       kR^ipAM kuryAM bhojye kathamiti matiM sAdhu vijahat |
agastyaM matvA mAmapi sharabha~NgaM vApyava vibho
       vaseyaM bhadrAdrAviti kila vadan rAmamanisham || 98||
kadA godAvaryA atishayitashaityAtsukhakare
       nimajjyaughe kR^itvA niyamamatha bhadrAdrinilayaH |
hR^idi dhyAyanmUrtiM jaladajayinIM kAmapi parAM
       pipAsAkShudbAdhAmahamanadhiyan nirvR^itimiyAm || 99||
kadA vA vedAnAM hR^idayamiti brahmAkSharamiti
       smarArAteragre dasharathamahIpAlagaditam |
chiraM chitte kurvan raghukulasarinnAyakamaNiM
       vaseyaM bhadrAdrAvanavaratamAnandabharitaH || 100||
kadA bhadrAdrau sadgaNamukharitAM rAghavakathAM
       raghUttaMsAvAsaM parita R^iShibhishchAdR^itatarAm |
drutasvAntaH shR^iNvan viShayasukhamAdhUya sakalaM
       visheyaM kausalyAsucharitaphale tanmayatayA || 101||
kadA garbhAgAre kanakamayabhittyA vilasite
       vasantaM bhadrAdrau janakatanayAlakShmaNayutam |
sphurattejaH pu~njAntaritamiva bimbaM dinarucheH
       anakShispando.ahaM chiramanubhaveyaM sukhaparaH || 102||
kadA bhadrAdrIshoparimaNivimAnAgranilayaM
       sphurachchakraM tejomayakanakaklR^iptaM sphuTaruchi |
prapashyan sandhyAyAM dinakarakarAkrAntisubhagaM
       mahAnetrAnandaM chiramanubhaveyaM paravashaH || 103||
kadA me mohAbdhAvanishamapi magnasya sudR^iDhaM
       tadIyaiH kAmAdyAhvayamupagatairbha~NganichayaiH |
chalatvaM nItasya prasR^imarabhiyo duHkhamadhikaM
       haredbhadrAdrIsho ghaTabhavamunIndrastutapadaH || 104||
savye pANau sharAsaM dadhadabhayakare sAyakaM chApasavye
       meghashyAmaM kirITA~NgadakaTakamukhairbhUShaNairbhUShitA~Ngam |
sItAsaumitrisevyaM smitalasitamukhaM pAdamUlA~njaneyaM
       kAruNyasyandyapA~NgaM kimapi hR^idi maho bhAtu bhadrAdrivAsam || 105||
vedAshchedabdhighoShA manumukhayaminAM sUktayo lIlayoktAH
       AchAryA bhrAntihetu pralapanamukharAH sha~NkarAdyA mahAntaH |
karmAnuShThAnamAryaiH kR^itamakhilamidaM DambhamAtraM yadi syAt
       svAmin bhadrAchalesha stutiriyamaphalA tvAM prati syAttadAnIm || 106||

iti shrIcholadeshabhUShaNAyamAna shrIkumbhaghoNakShetraparisaravarti
vala~NgaimAn grAmAbhijanasya paNDitamaNDalIpariShTUyamAnavaiduShyashrI
kR^iShNasUritanUjanmanaH, lakShmyambAgarbhashuktimuktAphalasya, viShNu\-
purAbhijanAnAM shAstraratnAkarabirudabhAjAM paNDitamUrdhanyatAmupagatAnAM
nyAyavedAnta shAstrapAradR^ishvanAM shrI svAmishAstriNAM karuNAkaTAkSha
samAsAditavidyAvaishadyasya kavimaNibirudA~Nkitasya subrahmaNya\-
shAstriNaH kR^itiShu bhadrAdrirAmashatakaM samAptimagamat |

##
Proofread by Aruna Narayanan

\medskip\hrule\obeylines

Please send corrections to sanskrit at cheerful dot c om
Last updated \today
https://sanskritdocuments.org

\end{document}