% Text title            : Shri Ramarangidevacharyanirmitam Mumukshasarvasvam
% File name             : mumukShasarvasvaMrAmarangidevAchArya.itx
% Category              : raama, rAmAnanda
% Location              : doc\_raama
% Author                : rAmaraNgidevAchArya
% Transliterated by     : Mrityunjay Pandey
% Proofread by          : Mrityunjay Pandey
% Description/comments  : From Chatuh Sampradaya Dig-Darshanm
% Latest update         : December 3, 2023
% Send corrections to   : sanskrit at cheerful dot c om
%
% This text is prepared by volunteers and is to be used for personal study 
% and research. The file is not to be copied or reposted for promotion of 
% any website or individuals or for commercial purpose without permission. 
% Please help to maintain respect for volunteer spirit.
%
\documentstyle[11pt,multicol,itrans]{article}
#include=ijag.inc
#endwordvowel=.h
\portraitwide
\parindent=100pt                
\let\usedvng=\Largedvng      % for 1 column     
\pagenumbering{itrans} 
\def\engtitle#1{\hrule\medskip\centerline{\LARGE #1}}
\def\itxtitle#1{\medskip\centerline{\LARGEdvng #1}\medskip\hrule}
\def\endtitles{\medskip\obeyspaceslines}
%%
\begin{document}
\engtitle{.. Shri Ramarangidevacharyanirmitam Mumukshasarvasvam ..}##
\itxtitle{.. shrIrAmara~NgidevAchAryanirmitaM mumukShasarvasvaM ..}##\endtitles ##
kurve mumukShusarvasvaM nattvA cha brahma rAghavam |
TIlAchAryaM cha shrIrAmAnandAchAryaM tathA gurum || 1||
rakShati rakShito dharmo rakShaNIyastatashcha saH |
vakShyamANaguNAnAM cha rakShaNAd rakShyate hi saH || 2||
manasA karmaNA vAchA hiMsA kAryAna kasyachit |
satyaM hitaM priyaM vAchyamahantAM mamatAM tyajet || 3||
nyAyArjitadhaneneha santoShTavyaM cha sarvadA |
paradravyaspR^ihA naiva karttavyA puruSheNa hi || 4||
prasannachetasA kAryaM yaj~nodAnaM tapastathA |
aprashastaM parityAjyaM prashastaM chAcharennaraH || 5||
upakAryA janA nityaM nApakAryAH kadAchana |
asUyA naiva karttavyA kasyachit puruShasya hi || 6||
jAtyAshrayanimittaishcha duShTamannaM hi varjayet |
kusa~NgatiM vihAyeha kuryAt satsa~NgatiM sadA || 7||
anyadharmamanAshritya svadharme nishchalo bhavet |
antarbahishcha saMshuddhaH sarvathA hi bhavennaraH || 8||
asatyaM na jano brUyAchchauryaM kAryaM na karhichit |
viraktasya tu gArhasthye prAyashchittaM na vidyate || 9||
duHkhade cha manuShye.api krodhaH kAryo na karhichit |
sarvadA sarvabhUteShu dayAM kurvanti sAdhavaH || 10||
archanIyau jagaddhetU sItArAmau pareshvarau |
vandyau sukIrttanIyau cha chintanIyau hi mAnavaiH || 11||
svAchAryo vaiShNavAshchAtra sevanIyAH prayatnataH |
suchintyAH paThanIyAshcha prabandhAH sAmpradAyikAH || 12||
sItArAmastutiH kAryA prAtaH sAyaM visheShataH |
vR^iddhAnAM vandanaM kAryamAyurvidyAyAshaHpradam || 13||
karttavyaM janmasAphalyaM shrIsItArAmabhaktitaH |
vishiShTAdvaitasiddhAnto mantavyo vaidikaH sadA || 14||
bhaktyaiva labhyate muktirbhaktirj~nAnAt prajAyate |
chidachidIshatattvAnAmAchAryAjj~nAnamarjayeta || 15||
chidarthastatra jIvAtmA j~nAtA chANurmato budhaiH |
j~nAnena dharmabhUtena vyAptaH so.akhilavarmaNi || 16||
tata eva sa pAdAdau vetti sarvaM sukhAdikam |
jIvAtmano vibhutve tu gatyAgatyorasambhavaH || 17||
madhyamaparimANatve tvanityatvaM ghaTAdivat |
akR^itAbhyAgamashchAtha kR^itanAshastadA punaH || 18||
sukhiduHkhipratItibhyAM jIvA bhinnA mitho matAH |
aNutvAdeva chAtmAno brahmabhinnA matA budhaiH || 19||
IshvarAdhInakarttAro jIvAtmAnaH prakIrtitAH |
dehendriyAdito bhinnA jIvA nityA matAsridhA || 20||
svakarmaphalabhoktArastatra baddhA hi sammatAH |
ChinnabandhAstathA bhaktayA muktAH shrIrAmaki~NkarAH || 21||
sarvadA karmabhirmuktA nityA hanumadAdayaH |
brahmadehAH shrutau jIvAsteShAM hi brahmatA na tat || 22||
achidachetanaM tattvaM chaturdhA.abhihitaM cha tat |
kAlaH prakR^ititattvaM cha shuddhasattvaM tathA matiH || 23||
brahmadeho vibhuH kAlaH satvAdiguNavarjitaH |
kAlAdhInaM jagat kAlaH sarvAdhAro jaDastathA || 24||
prakR^itirjaDatattvaM hi sattvAditriguNAshrayaH |
nityA chAchChAdikA sA hi jIvabrahmasvarUpayoH || 25||
sAmye svasya guNAnAM sA samavikArakAriNI |
vaiShamye tvIshasa~NkalpAd viShamasR^iShTisarjikA || 26||
mahA.Nshcha prakR^iterAdyo vikArasrividhaH smR^itaH |
aha~NkArAsrayastasya vikArAH sAtvikAdayaH || 27||
sAtvikAt khalvaha~NkArAjjAtAni tvindriyANi cha |
matAni mana AdIni j~nAnendriyANi tatra ShaT || 28||
karmendriyANi vidvadbhirvAgAdIni matAni hi |
sahakArI matashchAthAha~NkAro rAjasaH kila || 29||
shabdatanmAtrakaM jAtamaha~NkArAchcha tAmasAt |
tato vyoma tato jAtaM tanmAtraM sparshanAmakam || 30||
sparshatanmAtrato jAtaM bhUtaM hi vAyusa.nj~nakam |
jAtaM cha vAyubhUtAddhi tanmAtraM rUpasa.nj~nakam || 31||
rUpatanmAtratastejastatastanmAtrakaM rasaH |
rasAdApastato gandhastasmAd bhUmirajAyata || 32||
bhUtaguNAshcha shabdAdyA indriyaviShayA matAH |
tAn visR^ijya guroH shaktaM charaNaM sharaNaM brajet || 33||
shrIrAmasharachApAbhyAma~NkanaM bhujamUlayoH |
vidheyastApasaMskAro guruNA pApanAshakaH || 34||
shrIrAmapAdapadmAbhaM shrIyutaM rAmatoShakam |
kAryaM dvAdashasa~NkhyAkamUrdhvapuNDraM hi muktidam || 35||
rAmadAsyaparaM ramyaM pavitraM chAghanAshakam |
shiShyasya nAma karttavyaM guruNA muktidAyakam || 36||
grIvAyAM guruNA datte mokShAnandapradAyike |
tulasImAlike puNye dhAraNIye mumukShuNA || 37||
sadrahasyadvayenAtha rAmamantrasya dIkShayA |
guruH shiShyaM prapannaM hi tArayed bhavavAridheH || 38||
bhaktyA karmavinAshe hi dehaM tyaktvA.archirAdinA |
nityadhAmani samprApte sAyujyaM labhyate naraiH || 39||
shuddhasatvAshrayo dravyaM shuddhasatvaM prakIrttitam |
nityadhAmAdayaH shabdAH paryAyAstasya sammatAH || 40||
tat parAgajaDaM bodhyaM na kAlastatra vai prabhuH |
nityamukteshvarAdestad bhogyadehAdikaM matam || 41||
j~nAnamarthaprakAshastad dharmo jIveshadharmiNoH |
prabhAvat svaprakAshaM cha vibhu nityaM parAgatha || 42||
IshvarastvavatArI hi sarveShAM cha niyAmakaH |
sachchidAnandarUpaH sa nityaH sarvasharIrakaH || 43||
vibhushcha doShashUnyashcha kalyANaguNasAgaraH |
rAmabrahmAdivAchyashcha jagajjanmAdikAraNam || 44||
sarvArAdhyashcha sarvaj~naH sarvashaktishcha sarvadaH |
bhaktyA tathA prapattyA cha jIvAnAM muktidAyakaH || 45||
upAdAnaM nimittaM cha jagato vedaveditaH |
bhagavAnavyayaH sAkShI vibhUtidvayanAyakaH || 46||
paro vyUhastathA.antaHstho vibhavo.archAvatArakaH |
iti pa~nchavidhaH proktaH sItAnAthaH pareshvaraH || 47||
vAsudevAdayo vyUhA sAketasthaH paraH smR^itaH |
vyApto.antasthashcha sarvAtmA yogidhyeyashcha rAghavaH || 48||
matsyakUrmAdirUpashcha vibhavo jAnakIpatiH |
bhakteShTamUrtirUpo hi rAmashchArchA.avatArakaH || 49||
bhAgIrathyAshiShyashrIrAmara~Ngivinirmitam |
bhUyAnmumukShusarvasvaM mumukShUNAM hitAvaham || 50||

iti shrIrAmara~NgidevAchAryanirmitaM mumukShasarvasvaM sampUrNam |
##
Encoded and proofread by Mrityunjay Pandey

\medskip\hrule\obeylines

Please send corrections to sanskrit@cheerful.com
Last updated \today
https://sanskritdocuments.org

\end{document}