shrI rAmachandrAShTakam

 श्री रामचन्द्राष्टकम् 
श्रीरामचन्द्र भगवन् करुणाम्बुराशे
      श्रीराघवेन्द्र परिपावनचारुमूर्ते ।
मारोपमाङ्ग शरणप्रद रावणारे
      संरक्ष मां शुभद मान्यमते महात्मन् ॥ १॥

सीतापते दशरथात्मज धर्मसिन्धो
      दीप्ताकृते परशुराममदान्त्यहेतो ।
वातात्मजादि कपिवीर सुपूज्यमूर्ते
      प्रीत्या प्रसीद कुशलवप्रियतात वत्सी ॥ २॥

भाग्यप्रदं भरतसोदरमप्रमेयं
      सुग्रीवसख्यमजितं कनकाम्बराढ्यम् ।
भर्ग्गेन्दुनेत्रमतिमोहनदिव्यरूपं
      त्यागोज्ज्वलं भज दिवाकरवंशरत्नम् ॥ ३॥

तारेशबिम्बवदनं सरसीरुहाक्षं
      तारेशमोक्षदमुदारमतिं सुभद्रम् ।
मारीचदानवहरं सजलाभ्रवर्ण्णं
      वीर्याम्बुधिं भयहरं कलयामि रामम् ॥ ४॥

क्षत्रियवंशतिलकाम्बुजनाभ जेता
      शत्रुघ्नसोदर विभो महनीयकीर्ते ।
धात्रीपते शिवद पालय सर्वथा मां
      रात्रिञ्चरप्रशमनाश्रितकल्पशाखी ॥ ५॥

भूमीसुताहृदयपङ्कजवासमार्यं
      भूमीसुरालिविनुतं रघुवंशदीपम् ।
सौम्यं प्रसिद्धचरितं परिशोभिताङ्गं
      सुस्मेरवक्त्रकमलं कलये धरेशम् ॥ ६॥

मोदप्रदं सुकृतवारिनिधिं प्रसन्नं
      श्रीदायकं शुभकरं मुनिवृन्दवन्द्यम् ।
हृद्यं विभीषणनुतं करुणार्द्रनेत्रं
      पादारविन्दयुगलं तव नौमि रामम् ॥ ७॥

भूपाल शैवधनुखण्डन ताटकारे
      सम्पूज्यपन्नगधरप्रिय देहि भक्तिम् ।
चापास्त्रहस्तमहिताशय दिव्यमूर्ते
      मां पाहि भासुर सदा कुरु मङ्गलं मे! ॥ ८॥

श्रीरामचन्द्राय नमः ।

इति डाॅ ई.जि. जनार्द्दनन् पोट्टिविरचितं
          श्रीरामचन्द्राष्टकं सम्पूर्णम् ।


Composed by E. G. Janarddanan Potti