% Text title : rAmakarNAmRRitam % File name : rAmakarNAmRRitam.itx % Category : raama % Location : doc\_raama % Proofread by : PSA Easwaran psawaswaran at gmail.com % Latest update : March 10, 2018 % Send corrections to : sanskrit at cheerful dot c om % % This text is prepared by volunteers and is to be used for personal study % and research. The file is not to be copied or reposted for promotion of % any website or individuals or for commercial purpose without permission. % Please help to maintain respect for volunteer spirit. % \documentstyle[11pt,multicol,itrans]{article} #include=ijag.inc #endwordvowel=.h \portraitwide \parindent=100pt \let\usedvng=\Largedvng % for 1 column \pagenumbering{itrans} \def\engtitle#1{\hrule\medskip\centerline{\LARGE #1}} \def\itxtitle#1{\medskip\centerline{\LARGEdvng #1}\medskip\hrule} \def\endtitles{\medskip\obeyspaceslines} %% \begin{document} \engtitle{.. Shrirama Karnamritam ..}## \itxtitle{.. shrIrAmakarNAmR^itam ..}##\endtitles ## shrIrAmAya namaH \section{prathamAshvAsaH} shrIrAmaM trijagadguruM suravaraM sItAmanonAyakaM shyAmA~NgaM shashikoTima~njuvadanaM vakShollasatkaustubham | saumyaM satvaguNottamaM susarayUtIre vasantaM prabhuM trAtAraM sakalArthasiddhisahitaM vande raghUNAM patim || 1|| shrIrAghavaM dasharathAtmajamaprameyaM sItApatiM raghuvarAnvayaratnadIpam | AjAnubAhumaravindadalAyatAkShaM rAmaM nishAcharavinAshakaraM namAmi || 2|| shrIrAmaM balavairinIlachikuraM smerAnanaM shyAmalaM karNAntAyatalochanaM suravaraM kAruNyapAthonidhim | shoNAmbhoruhapAdapallavayugaM kShoNItanUjAyutaM rAjatkuNDalagaNDabhAgayugalaM rAmaM sadA.ahaM bhaje || 3|| shrIrAmaM jagadekavIramamalaM sItAmanora~njanaM kausalyAvaranandanaM raghupatiM kAkutsthavaMshodbhavam | lokAnAmabhirAmama~NgaladhanavyApArapArAyaNaM vande.ahaM janaghorapApanikaradhvaMsaM vibhuM rAghavam || 4|| shrIrAmaM jagadIshvaraM janakajAjAniM janAnandanaM jantUnAM janakaM janArtiharaNaM lokeshvaraM shAshvatam | jAbAlAdimunIshvaraiH parivR^itaM jAjjvalyamAnaM sadA ja~NghAlaM jamadagnisUnuharaNaM jAtAnukampaM bhaje || 5|| shrIrAmo raghunAyako raghuvaro rAjIvanetrA~nchito rAjendro raghupu~Ngavo raghukulottaMso raghUNAM patiH | rAmo rAkShasanAshano.amitabalo rAkendupUrNAnano rAjatki~NkiNika~NkaNA~Nkitakaro rAmassadA pAtu naH || 6|| shrIrAmachandra karuNAkara rAghAvendra rAjendrachandra raghuvaMshasamudrachandra | sugrIvanetrayugalotpalapUrNachandra sItAmanaHkumudachandra namo namaste || 7|| shrIrAmaM karuNAkaraM guNanidhiM sItApatiM shAshvataM pArAvAragabhIramabjanayanaM prAvR^iD (bhrAjad) ghanashyAmalam | vIrashreShThamanAmayaM vijayinaM vishvaprakAshAtmakaM ghorAriprakarAdhikapraharaNaM kodaNDarAmaM bhaje || 8|| shrIrAmachandreti salakShmaNeti nIlotpalashyAmalakomaleti | AkroshatAmastvadhunaiva jihvA sItApate rAghava rAghaveti || 9|| shrIrAmachandre ramatAM mano me ramA~NgavAme vipadAM virAme | jitArirAme praNatArirAme guNAbhirAme bhuvanaikarAme || 10|| shrIrAmachandra raghupu~Ngava rAjavarya rAjendrarAja suranAyaka rAghavesha | rAjAdhirAja raghunandana rAmabhadra dAso.asmyahaM cha bhavataH sharaNAgato.asmi || 11|| shrIrAmaM sarasIruhAkShamamalaM dUrvA~NkurashyAmalaM vidyutkoTinibhaprabhAmbaradharaM vIrAsanAdhiShThitam | vAmA~Nkopari saMsthitAM janakajAmAli~Ngya tAM bAhunA tattvaM chAparapANinA munigaNAnAj~nApayantaM bhaje || 12|| shrIrAmaH sakaleshvaro mama pitA mAtA cha sItA mama bhrAtA.ajashcha sakhA prabha~njanasutaH patnI viraktiH priyA | vishvAmitravibhIShaNaprabhR^itayo mitrANi bodhaH suto bhaktiH shrIharisa~NgatA ratisukhaM vaikuNThamasmatpadam || 13|| shrIrAmAmalapuNDArIkanayana shrIrAma sItApate govindAchyuta nandanandana mukundAnanda dAmodara | viShNo rAghava vAsudeva nR^ihare devaughachUDAmaNe saMsArArNavakarNadhAraka hare kR^iShNAya tubhyaM namaH || 14|| rAmaM lakShmaNapUrvajaM raghuvaraM sItApatiM sundaraM kAkutsthaM karuNAkaraM guNanidhiM viprapriyaM dhArmikam | rAjatkuNDalamaNDitAnanaruchiM rAtri~ncharadhvaMsinaM shampAkoTisamAnakAntivilasanmAyAmR^igaghnaM bhaje || 15|| rAmaM ratnakirITakuNDaladharaM keyUrahArAnvitaM sItAla~NkR^itavAmabhAgamamalaM siMhAsanasthaM prabhum | sugrIvAdisamastavAnaranutaM saMsevyamAnaM sadA vishvAmitraparAsharAdimunibhiH saMstUyamAnaM bhaje || 16|| rAmaH sItAsameto nivasatu hR^idaye sAnujaM rAmamIDe rAmeNa kShINapApastrividhamapi kR^itaM karma rAmAya dadyAm | rAmAdanyaM na jAne na hi kimapi mahArAmanAmnaH samAnaM rAme pashyAmi vishvaM bhuvanamanudinaM pAhi mAM vIrarAma || 17|| rAmaM rAjashikhAmaNiM raghupatiM devAridarpApahaM lokAnAM hitakAriNaM guNanidhiM kAruNyapuNyodayam | muktAvidrumaratnashobhitatanuM saundaryahastAmbujaM kausalyAtanayaM bhajAmi satataM shrejAnakInAyakam || 18|| rAmaM vIrAsanasthaM hR^idayagatakaroda~nchitaj~nAnamudraM jAnunyAsaktahastaM kShitivaratanayAbhUShitaM vAmabhAge | ShaTkoNe vyAharantaM pavanasutayutaM mAnase mAnayantaM sugrIve sevyamAne dR^iDhasharadhanuShA dakShiNe lakShmaNena || 19|| rAmaM saumitrimitraM raghupatimamalaM rAmachandraM rameshaM ramyaM shrIrAghaveshaM shubhalalitamukhaM shuddhasattvaM suvIram | sItAsaundaryapAtraM suramunivinutaM nIlamindIvarAbhaM vande vandArupAlaM rajanicharaharaM ramyakodaNDarAmam || 20|| rAmaM chandanashItalaM kShitisutAmohAkaraM shrIkaraM vaidehInayanAravindamihiraM sampUrNachandrAnanam | rAjAnaM karuNAsametanayanaM sItAmanaHsyandanaM sItAdarpaNachArugaNDalalitaM vande sadA rAghavam || 21|| rAmaM shyAmAbhirAmaM ravishashinayanaM koTisUryaprakAshaM divyaM divyAstrapANiM sharamukhasharadhiM chArukodaNDahastam | kAlaM kAlAgnirudraM ripukuladahanaM vighnavichChedadakShaM bhImaM bhImATTahAsaM sakalabhayaharaM rAmachandraM bhaje.aham || 22|| rAmachandracharitaM kathAmR^itaM lakShmaNAgrajaguNAnukIrtanam | rAghavesha tava pAdasevanaM sambhAvantu mama janmajanmani || 23|| rAmo matkuladaivataM sakaruNaM rAmaM bhaje sAdaraM rAmeNAkhilaghorapAparahito rAmAya tasmai namaH | rAmAnnAsti jagattrayaikasulabho rAmasya dAso.asmyahaM rAme prItiratIva me kulaguro shrIrAma rakShasva mAm || 24|| shrIrAmachandra tava kIrtisuradrumasya tArAgaNassumanasaH phalamindubimbam | mUlaM mahAphaNipadaM gaganaM cha madhyaM sarvA disho bhuvanamaNDalamAlavAlam || 25|| vaidehIM muditAbhijAtapulakAM gADhaM samAli~Ngayan vAmena stanachUchukaM pulakitaM vAmaM kareNa spR^ishan | tattvaM dakShiNapANinA kalitayA chinmudrayA bodhayan rAmo mArutisevitaH smaratu mAM sAmrAjyasiMhAsane || 26|| vAmA~NkasthitajAnakIM parila(ra)satkodaNDadaNDaM kare chakraM chordhvakareNa bAhuyugale sha~NkhaM sharaM dakShiNe | vibhrANaM jalajAtapatranayanaM bhadrAdrimUrdhni sthitaM keyUrAdivibhUShitaM raghupatiM rAmaM bhaje shyAmalam || 27|| vAme bhUmisutA purastu hanumAnpashchAtsumitrAsutaH shatrughno bharatashcha pArshvadalayorvAyvAdikoNeShvapi | sugrIvashcha vibhIShaNashcha yuvarAT tArAsuto jAmbavAn madhye nIlasorajakomalaruchiM rAmaM bhaje shyAmalam || 28|| vaidehIsahitaM suradrumatale haime mahAmaNDape madhyepuShpakamAsane maNimaye vIrAsane susthitam | agre vAchayati prabha~njanasute tattvaM munibhyaH paraM vyAkhyAntaM bharatAdibhiH parivR^itaM rAmaM bhaje shyAmalam || 29|| vaidehIM parirabhya jAtapulakAM lajjAvatIM susmitAM kA~nchInUpurahAraka~NkaNalasatkarNAvataMsojjvalAm | kastUrIghanasAracharchitakuchAM chandrAnanAM shyAmalaM kandarpAdhikasundaraM raghupatiM shrIrAmachandraM bhaje || 30|| vaidehIramaNaM vibhIShaNavibhuM viShNusvarUpaM hariM vishvotpattivipattipoShaNakaraM vidyAdharairarchitam | vairidhvaMsakaraM viri~nchijanakaM vishvAtmakaM vyApakaM vyAsA~NgIrasanAradAdivinutaM vandAmahe rAghavam || 31|| maithilyA nagare vivAhasamaye kalyANavedyantare sAmante vimalenduratnakhachite pIThe vasantau shubhe | shR^iNvantau nigamArthavedividuShAmAshIrgiro rAjitau pAyAstAM suvadhUvarau raghupatI shrIjAnakIrAghavau || 32|| asitakamalabhAsA bhAsayantaM trilokaM dasharathakuladIpaM daivatAmbhojabhAnum | dinakarakulabAlaM divyakodaNDapANiM kanakakhachitaratnAla~NkR^itaM rAmamIDe || 33|| susnigdhaM nIlakeshaM sphuTamadhuramukhaM sundarabhrUlalATaM dIrghAkShaM chArunAsApuTamamalamaNishreNikAdantapa~Nktim | vimboShThaM kambukaNThaM kaThinataramahoraskamAjAnubAhuM muShTigrAhyAvalagnaM pR^ithujaghanamudAroruja~NghA~NghrimIDe || 34|| vandAmahe maheshAnachaNDakodaNDakhaNDanam | jAnakIhR^idayAnandachandanaM raghunandanam || 35|| jAnAti rAma tava nAmaruchiM mahesho jAnAti gautamasatI charaNaprabhAvam | jAnAti dorbalaparAkramamIshachApo jAnAtyamoghapaTubANagatiM payodhiH || 36|| divyasyandanamadhyagaM raNaraNachchApAnvitaM bhIShaNaM kAlAgnipratimAnabANakalitaM ghorAstratUNIdvayam | sugrIvA~NgadarAvaNAnujamarutputrAdisaMsevitaM rAmaM rAkShasavIrakoTiharaNaM raktAmbujAkShaM bhaje || 37|| brahmAdyAmarasiddhajanmabhavanaM yannAbhipa~NkeruhaM shrInirvANaniketanaM yadudaraM lokaikashayyAgR^iham | yadvakShaH kamalAvilAsabhavanaM yannAma mantraM satAM vAsAgAramakhaNDamaNDalanidhiH pAyAtsa vo rAghAvaH || 38|| shR^i~NgAraM kShitinandinIviharaNe vIraM dhanurbha~njane kAruNyaM balibha~njane.adbhutarasaM sindhau giristhApane | hAsyaM shUrpaNakhAmukhe bhayavahe bIbhAtsamAnyAmukhe raudraM rAvaNamardane munijane shAntaM vapuH pAtu naH || 39|| mAtA rAmo matpitA rAmachandro bhrAtA rAmo matsakhA rAghaveshaH | sarvasvaM me rAmachandro dayAluH nAnyaM daivaM naiva jAne na jAne || 40|| mUle kalpadrumasyAkhilamaNivilasadratnasiMhAsanasthaM kodaNDadvandvabANairlalitakarayugenArpitaM lakShmaNena | vAmA~NkanyastasItaM bharatadhR^itamahAmauktikachChatrakAntiM shatrughnaM chAmarAbhyAM vilasitamanishaM rAmachandraM bhaje.aham || 41|| vAme kodaNDadaNDaM nijakarakamale dakShiNe bANamekaM pashchAdbhAge cha nityaM dadhadabhimataM sAchitUNIrabhAram | vAme.avAme lasadbhyAM saha militatanuM jAnakIlakShmaNAbhyAM rAmaM shyAmaM bhaje.ahaM praNatajanamanaHkhedavichChedadakSham || 42|| AmbhodharashyAmalamambujAkShaM dhanurdharaM vIrajaTAkalApam | pArshvadvaye lakShmaNamaithilIbhyAM niShevyamANaM praNamAmi rAmam || 43|| kodaNDadIkShAgurumaprameyaM salakShmaNaM dAsharathiM dayAlum | AjAnubAhuM jagadekavIraM anAthanAthaM raghunAthamIDe || 44|| karpUrA~NgavilepanaM raghuvaraM rAjIvanetraM prabhuM kastUrInikarAkR^itiM kharadhR^itipradhvaMsinaM shrIharim | kandarpAyutakoTisundaratanuM kAmArisevyaM guruM kAntAkAmadamaprameyamamalaM sItAsametaM bhaje || 45|| nIlAbda(bja) vR^indasadR^ishaM paripUrNadehaM dikpAlakAdisurasevitapAdapadmam | pItAmbaraM kanakakuNDalashobhitA~NgaM sItApatiM raghupatiM satataM bhajAmi || 46|| bhargabrahmasurendramukhyadivijaprA~nchatkirITAgrasaM sargAnekamaNiprabhAkarasahasrAbhaM padAmbhoruhe | durgAsantatasaMstutA~NghrikamalaM durvArakodANDinaM ga~NgAsaMsphuTamaulimAnasaharaM kalyANarAmaM bhaje || 47|| agre prA~njalimA~njaneyamanishaM vIraM cha tArAsutaM pArshve pa~NktimukhAnujaM parisare sugrIvamagrAsane | pashchAllakShmaNamantike janakajAM madhye sthitaM rAghavaM chintAtUlikayA likhanti sudhiyashchitteShu pItAmbaram || 48|| kShIrAmbhonidhimadhyavartini site dvIpe suvarNAchale ratnollAsitakalpabhUruhatale jAmbUnade maNDape | tejobhrAjitavedike suruchire mANikyasiMhAsane hemAmbhoruhakarNikoparitale vIrAsanasthaM bhaje || 49|| daurdaNDaikakamaNDalIkR^itamahAkodaNDachaNDAshugaiH nirghAtai ravikoTitulyanishitairbrahmAdimukhyastutaiH | sugrIvAdisamastavAnaravarAnAj~nApayantaM girA tattvaM tADaya tADayetyanupadaM shrIrAmachandraM bhaje || 50|| bhUkampaM janayannabho vidalayannambhonidhiM kShobhayan daiteyAMshcha vimardayan girivarAn bhindan dishaH pUrayan | vaidehImapi modayan sakalagIrvANAn shiraH kampayan kalyANo raghurAmabANavilasatkodaNDachaNDadhvaniH || 51|| vimalakamalanetraM visphurannIlagAtraM tapanakulapavitraM dAnavadhvAntamitram | bhuvanashubhacharitraM bhUmiputrIkalatraM dasharathavaraputraM naumi rAmAkhyamitram || 52|| jananI jAnakI sAkShAjjanako raghunandanaH | lakShmaNo mitramasmAkaM ko vichAraH kuto bhayam || janako rAmachandro me jananI janakAtmajA | hanumatpramukhAssarve harayo mama bAndhavAH || 53|| jagati vishadamantraM jAnakIprANamantraM vibudhavinutamantraM vishvavikhyAtamantram | dasharathasutamantraM daityasaMhAramantraM raghupatinijamantraM rAmarAmeti mantram || 54|| sItAyA dakShiNe pArshve lakShmaNasya cha pArshvataH | tanmadhye rAghavaM vande dhanurbANadharaM harim || 55|| chandropamaM malayachandanacharchitA~NgaM mandArapuShpabharapUjitapAdapadmam | brahmendravandyamanishaM munivR^indasevyaM vande.aravindanayanaM raghurAmachandram || 56|| brahmAmR^itAnandaphalapradAyinaM vedAntavij~nAnasugandhapuShpitam | sItAshubhA~NgAchitabAhushAkhinam shrIrAmakalpadrumamAshrayAmaH || 57|| kanakanikaShabhAsA sItayAli~NgitA~Ngo navakuvalayadhAmashyAmavarNo.abhirAmaH | abhinavayutavidyunnandito meghaShaNDaH shamayatu mama tApaM sarvadA rAmachandraH || 58|| alaM shAstrAbhyAsairalamasakR^idAmnAyapaThanaiH alaM tIrthasnAnairalamakhIlayAgavratajapaiH | alaM yogAbhyAsairalamapi mahApAtakadhiyA yadasmAkaM rAmasmaraNamahimA sA vijayate || 59|| sItAmanomAnasarAjahaMsa saMsArasantApahara kShamAlo | shrIrAma daityAntaka shAntarUpa shrItArakabrahma namo namaste || 60|| kadA vA sAkete vimalasarayUtIrapuline samAsInaH shrImadraghupatipadAbje hR^idi bhajan | aye rAma svAmin janakatanayAvallabha vibho prasIdeti kroshannimiShamiva neShyAmi divasAn || 61|| kadA vA sAkete taruNatulasIkAnanavane niviShTaM taM pashyan suruchiravishAlordhvatilakam | aye sItAnAtha smR^itijanapate dAnavajayin prasIdeti kroshannimiShamiva neShyAmi divasAn || 62|| kadA vA sAketi maNikhachitasiMhAsanatale samAsInaM rAmaM janakatanayAli~Ngitatanum | aye sItArAma truTitaharadhanvin rAghupate prasIdeti kroshannimiShamiva neShyAmi divasAn || 63|| mArge mArge shAkhinAM ratnavedI vedyAM vedyAM kinnarIvR^indagItam | gIte gIte ja~njulAlApagoShThI goShThaM goShThaM tvatkathA rAmachandra || 64|| vR^ikShe vR^ikShe vIkShitAH pakShisa~NghAH sa~Nghe sa~Nghe ma~njulAmodavAkyam | vAkye vAkye ma~njulAlApagoShThI goShThyAM goShThyAM tvatkathA rAmachandra || 65|| shvetapuShpakamAruhya sItayA saha rAghava | sugrIvAdibhavadbhaktairmanomadhye ramasva me || 66|| dorbhiH khaDgaM trishUlaM DamarumasidhanushchArubANaM kuThAraM sha~NkhaM chakraM cha kheTaM halamusalagadAbhiNDApAlaM cha pAsham | vidyudvahnI cha muShTiM tvabhayavarakaraM bibhrataM shubhravarNaM vande rAmaM trinetraM sakalaripukulaM mardayantaM pratApaiH || 67|| duritatimirachandro duShTaka~njAtachandraH surakuvalayachandraH sUryavaMshAbdhichandraH | svajananivahachandraH shatrurAjIvachandraH praNatakumudachandraH pAtu mAM rAmachandraH || 68|| kalyANadaM kaushikayaj~napAlaM kalAnidhiM kA~nchanashailadhIram | ka~njAtanetraM karuNAsamudraM kAkutstharAmaM kalayAma chitte || 69|| vAlmIkismR^itimandareNa mathitassItAramAsambhavaH sugrIvAmarabhUruho.a~NgadagajaH saumitrichandrodayaH | vAtotpannamaNirvibhIShaNasudhaH paulastyahAlAhalaH | shrIrAmAyaNadugdhavArdhiramalo bhUyAtsukhashreyase || 70|| raghunandana eva daivataM no raghuvaMshodbhava eva daivataM naH | bharatAgraja eva daivataM no bhagavAn rAghava eva daivataM naH || 71|| utphullAmalakomalotpaladalashyAmAya rAmAmana\- shchandrAya prashamAya nirmalaguNArAmAya rAmAtmane | dhyAnArUDhamunIndramAnasasarohaMsAya saMsAravi\- dhvaMsAyAdbhutatejase raghukulottaMsAya puMse namaH || 72|| rAjIvAyatalochanaM raghuvaraM nIlotapalashyAmalaM mandArA~nchitamaNDape sulalite saurvarNake puShpake | AsthAne navaratnarAjikhachite siMhAsane saMsthitaM sItAlakShmaNalokapAlasahitaM vande munIndrAspadam || 73|| vallIpravAlanavapallavapAdapadmaM ka~njekShaNaM jalajanIlasaroruhAbham | sImantinInayanamohanamUlamantraM rAmaM namAmi munimAnasarAjahaMsam || 74|| alaM vivAdena na mAnuSho.ayaM rAmAtmanA rAkShasamardanAya | bhuja~NgashayyAM parimuchya sAkShAnnArAyaNo bhUtalamAjagAma || 75|| lokatrANAnukArI dashavadanashiraHpa~NktivichChedakArI la~NkAla~NkArahArI bhR^igutanayamanassarvagarvApahArI | sItAsImantakArI maNimayamukuTo divyakodaNDadhArI shrIrAmaH pApahArI shamayatu duritaM bhUmibhArApahArI || 76|| brahmAdiyogamunipUjitasiddhamantraM dAridryaduHkhabhavarogavinAshamantram | saMsArasAgarasamuttaraNaikamantram | vande mahAbhayaharaM raghurAmamantram || 77|| shatruchChedaikamantraM sarasamupaniShadvAkyasampUjyamantraM saMsArottAramantraM samuchitasamaye sa~NganirvANamantram | sarvaishvaryaikamantraM vyasanabhujagasandaShTasantrANamantraM jihvAshrIrAmamantraM japatu japatu me janmasAphalya mantram || 78|| AkarNamArUDhadhanurguNADhyaM brahmAstramuNDIkR^itarAkShasendram | rathAdhirUDhaM raNara~NgadhIraM rAmaM bhaje raktasaroruhAkSham || 79|| etau tau dashakaNThakaNThakadalIkAntArakAntichChidau vaidehIkuchakumbhaku~NkumarajaH pa~NkAruNAla~NkR^itau | vishvatrANanidAnasAdhusarasaprArambhayUpau bhujau deyAstAmuruvikramau raghupateH shreyAMsi bhUyAMsi naH || 80|| vAmA~Nkopari saMsthitAvanisutAmAmuktabhUShojjvalAM pashyantaM paripUrNachandravadanaM bhrAjatkirITojjvalam | AsInaM navaratnarAjikhachite siMhAsane rAghavaM sugrIvA~NgadalakShmaNAnilasutairAsevyamAnaM bhaje || 81|| jAnakyAH kamalAmalA~njalipuTe yAH padmarAgAyitAH nyastA rAghavamastake tu vilasatkundaprasUnAyitAH | srastAH shyAmalakAyakAntikalitAH yA indranIlAyitAH muktAstAshshubhadA bhavantu bhavatAM shrIrAmavaivAhikAH || 82|| nityaM shrIrAmamantraM nirupamamadhikaM nItisuj~nAnamantraM satyaM shrIrAmamantraM sadamalahR^idaye sarvadA.a.arogyamantram | stutyaM shrIrAmamantraM sulalitasumanaH saukhyasaubhAgyamantraM paThyaM shrIrAmamantraM pavanajavaradaM pAtu mAM rAmamantram || 83|| vyAmohaprashamauShadhaM munimanovR^ittipravR^ittyauShadhaM daityonmUlakarauShadhaM bhavabhayapradhvaMsanaikauShadham | bhaktAnandakarauShadhaM tribhuvane sa~njIvanaikauShadhaM shreyaH prAptikarauShadhaM piba manaH shrIrAmamanAmauShadham || 84|| dhyAyetprAtaH sureshaM ravikulatilakaM ra~njitAnantalokaM bAlaM bAlAruNAkShaM bhavamukhavinutaM bhAvagamyaM bhavaghnam | dIpyantaM svarNaklR^iptairmaNigaNanikarairbhUShaNairujjvalA~NgaM kausalyAdehajAtaM mama hR^idayagataM rAmamIShatsmitAsyam || 85|| madhyAhne rAmachandraM maNigaNalalitaM mandahAsAvalokaM mArtANDAnekabhAsaM marakatanikarAkAramAnandamUrtim | sItAvAmA~NkasaMsthaM sarasijanayanaM pItavAso vasAnaM vande.ahaM vAsudevaM varasharadhanuShaM mAnase me vibhAntam || 86|| dhyAyedrAmaM sudhAMshuM natasakalabhavAraNyatApaprahAraM shyAmaM shAntaM surendraM suramunivinutaM koTisUryaprakAsham | sItAsaumitrisevyaM suranarasugamaM divyasiMhAsanasthaM sAyAhne rAmachandraM smitaruchiramukhaM sarvadA me prasannam || 87|| keyUrA~Ngadaka~NkaNairmaNigaNairvai rochamAnaM sadA rAkAparvaNi chandrakoTisadR^ishaM ChatreNa vai rAjitam | hemastambhasahasraShoDashayute madhye mahAmaNDape deveshaM bharatAdibhiH parivR^itaM rAmaM bhaje shyAmalam || 88|| vihAya kodaNDamimaM muhUrtaM gR^ihANa pANau maNichAruveNum | mAyUrabarhaM cha nijottamA~Nge sItApate rAghava rAmachandra || 89|| shuddhAnte mAtR^imadhye dasharathapurataH sa~ncharantaM paraM taM kA~nchIdAmAnuviddhaM pratimaNivilasatki~NkiNInikvaNA~Ngam | phAle muktAlalAmaM padayuganinadannUparaM chAruhAsaM bAlaM rAmaM bhaje.ahaM praNatajanamanaHkhedavichChedadakSham || 90|| sampUrNachandravadanaM sarasIruhAkShaM mANikyakuNDaladharaM mukuTAbhirAmam | chAmpeyagauravasanaM sharachApahastaM shrIrAmachandramanishaM manasA smarAmi || 90|| indranIlamaNisannibhadehaM vandyamAnamasakR^inmunivR^indaiH | lambamAnatulasIvanamAlaM chintayAmi satataM raghuvIram || 92|| rAmachandra dayAsAndra raghuvIra nR^ipottama | lochanAbhyAM kR^ipApUrapUrNAbhyAM mAM vilokaya || 93|| sameti varNadvayamAdareNa sadA smaran muktimupaiti jantuH | kalau yuge kalmaShamAnasAnAmanyatra dharme khalu nAdhikArah || 94|| bhaktapriyaM bhaktasamAdhigamyaM chintAharaM chintitakAmadhenum | sUryendukoTidyutibhAsvaraM taM rAmaM bhaje rAghavarAmachandram || 95|| sakalabhuvanaratnaM sarvashAstrArtharatnaM samaravijayaratnaM sachchidAnandaratnam | dashamukhahararatnaM dAnavArAtiratnaM raghukulanR^iparatnaM pAtu mAM rAmaratnam || 96|| mAtuH pArshve charantaM maNimayashayane ma~njubhUShA~nchitA~NgaM mandaM mandaM pibantaM mukulitanayanaM stanyamanyastanAgram | a~NgulyagraiH spR^ishantaM sukhaparavashayA susmitAli~NgitA~NgaM gADhaM gADhaM jananyA kalayatu hR^idayaM mAmakaM rAmabAlam || 97|| rAmAbhirAmaM nayanAbhirAmaM vAchAbhirAmaM vadanAbhirAmam | sarvAbhirAmaM cha sadAbhirAmaM vande sadA dAsharathiM cha rAmam || 98|| jaya jaya raghurAma shrImukhAmbhojabhAno jaya jaya raghuvIra shrImadambhojanetra | jaya jaya raghunAtha shrIkarAbhyarchitA~Nghne jaya jaya raghuvarya shrIsha kAruNyasindho || 99|| jaya jaya varasha~NkhashrIgadAchakradhArin jaya jaya nijadAsaprApyadurlabhyakAma | tribhuvanamaya sarvaprANibhAvaj~na viShNo sharaNamupagato.ahaM sarvadA tvAM sharaNyam || 100|| ikShvAkunandanaM sugrIvapUjitaM trailo kyarakShakaM satyasandhaM sadA | rAghavaM raghupatiM rAjIvalochanaM rAmachandraM bhaje rAghavendraM bhaje || vedavedye pare puMsi jAte dasharathAtmaje | vedaH prAchetasAdAsIt sAkShAdrAmAyaNAtmanA || 101|| shrIrAmetyekadA vaktuM mano yasya pravartate | vaikuNThavAsinastasya kulamekottaraM shatam || 102|| rAshabdochchAramAtreNa mukhAnniryAnti pAtakAH | punaH praveshabhItyA cha makArastu kapATavat || 103|| shrIrAmAyaNamAdikAvyamR^iShiNA vAlmIkinA nirmitaM vedAntArthavishAradairanudinaM stutyaM surairarchitam | shretRRINAmaghanAshanaM suratarostulyaM tu muktipradaM ye shR^iNvanti paThanti rAmacharitaM te yAnti viShNoH padam || 104|| \section{dvitIyAshvAsaH} shrIrAmaM janakakShitIshvarasutAvaktrAmbujAhAriNaM shrImadbhAnukulAbdhikaustubhamaNiM shrIratnavakShaHsthalam | shrIkaNThAdyamaraugharatna mukuTAla~NkArapAdAmbujaM shrIvatsojjvalamindranIlasadR^ishaM shrIrAmachandraM bhaje || 1|| shrIra~NgeshapadAbjalagnahR^idayaM shrIsha~NkhachakrAnvitaM shrImannirjarapAdapasphuTapadaM shrIsiMhapIThasthitam | shrIvaikuNThasahasramastakalasadbhogAsane shAyinaM shrIbhUmIsutayA yutaM shritanidhiM shrIrAmamUrtiM bhaje || 2|| AnandakandamaruNAdharamambujAkShaM ApItavastramatasIkusumojjvalA~Ngam | akShAntavarNamakala~NkamameyamAdyaM sItApatiM raghupatiM sharaNAgato.asmi || 3|| sAkete navaratnapa~Nktikhachite chitradhvajAla~NkR^ite vAme svarNamaye dalAShTalalite padme vimAnottame | AsInaM bharatAdisodarajanaiH shAkhAmR^igaiH kinnaraiH dikpAlairmunipu~NgavainR^ipagaNaiH saMsevyamAnaM bhaje || varAbhayaM divyarathA~Ngasha~NkhaM sakaustubhaM veShTitapItavastram | kirITahArA~NgadakuNDalA~NgaM shrIvatsachihnaM shirasA namAmi || 6|| digambaraM ki~NkiNimekhalojjvalaM lalATaparyantavilambitAlakam | kaladvachaskaM kamanIyanUpuraM taM bAlarAmaM shirasA namAmi || 7|| mandAramUle maNipIThasaMsthaM sudhAplutaM divyavirATsvarUpam | sabindunAdAntakalAntaturyamUrtiM bhaje.ahaM raghuvaMsharatnam || 8|| anarghyamANikyavirAjamAnashrIpAdukAla~NkR^itashobhanAbhyAm | asheShavR^indArakavanditAbhyAM namo namo rAmapadAmbujAbhyAm || 9|| dhvajAmbujachChatrarathA~Ngasha~Nkha dambholipAshA~Nkushamatsyachihnam | brahmendradevAdikirITakoTisa~NgharShipAdAmbujayugmamIDe || 10|| lalATadeshojjvalabAlabhUShaNaM satANDavaM vyAghranakhA~Nkakandharam | digambaraM shobhitabarbarAlakaM shrIbAlarAmaM shirasA namAmi || 11|| shatAShTadivyasthalamUrtivanditaM shatakratubrahmamarudgaNArchitam | shashA~NkavaishvAnarabhAnumaNDala\- sthitaM bhaje.ahaM raghuvaMshavardhanam || 12|| karNAntavishrAntadhanurguNA~NkaM kalambalakShIkR^itarAkShaseshvaram | vR^iddhashravaH syandanamadhyasaMsthaM rUkShekShaNaM rAmamahaM namAmi || sutrAma nIlotpala nIlameghashrInirjitA~NgaM sutayA dharaNyAH | yuktaM surendrAvanamAnasaM taM rAmaM bhaje rAkShasavaMshanAsham || rAkAchandranibhAnanaM ratipatidveShipriyaM rAkShasA\- dhIshagrIvavibhedanasphuTapaTuprakhyAtabANojjvalam | ratnAla~NkR^itapAdukA~nchitapadAmbhojaM ramAvallabhaM rAgadveShavihInachittasulabhaM rAmaM bhaje tArakam || 15|| AlolasphuTaratnakuNDaladharaM chAvismitAla~NkR^itaM AdhArAdikachakramaNDalagataM chAvismitAla~NkR^itam | AvirbhUtakR^ipAtara~NgajaladhiM chAkShAntavarNAshrayaM ApannArtinidAghameghasamabhaM rAmaM bhaje tArakam || sAketAntaratAramaNDapamahAmANikyasiMhAsane tanmadhye.aShTadalAmbuje sphuTatare chitkarNike saMsthitam | saumitryambujamitrasUnubharatashrIvAyuputrairvR^itaM mudrAla~NkR^itApANisArasamajaM rAmaM bhaje tArakam || 17|| virAjamAnojjvalapItavAsaM vishAlavakShaHsthalakaustubhashriyam | bhaje kirITA~NgadaratnakuNDalaM namastulasyA.amalamAlayA.a~Nkitam || 18|| mUlAdiShaTsarasijAnta sahasrapadma\- patrAntarAlinilayaM bhavabandhanAsham | nAdAntachandragalitAmR^itasiktarUpaM nAdAntanAdamahimAspadarAmamIDe || 19|| vande varapradamahAvaradAnagarvala~NkAdhinAthakulaparvatanAshavajram | taM rAvaNAnujamarutsutabhAnusUnudikpAlasodaragaNaiH parisevyamAnam || 20|| aj~nAnagADhatimirApahabhAnumurtiM AraktachArunayanAmbujamAdibIjam | ambhodhimadhyavaTapatrashayAnamAdi\- madhyAntashUnyamakhilAspadarAmachandram || 21|| sudhAsamudrAntavirAjamAnadvIpe site chandanapArijAte | mahAsane pannagatalpamadhye niShaNNamIDe raghuvaMsharatnam || 22|| smitAnanaM padmadalAyatekShaNaM vinIlamANikyajitA~Ngashobhitam | jaTAkirITaM sharachApalA~nChanaM namAmyahaM bhAnukulAbdhikaustubham || 23|| prasUnabANA~NkitamikShuchApaM chakrAbjapAshA~NkushavaMshanAlam | dharaM karairaShTabhirarkavarNaM shrIkR^iShNarUpaM praNamAmi rAmam || 24|| bAhUrupAdodaravaktralochanaM dIptaprachaNDAnaladurnirIkShyam | asheShavR^indArakanAgagocharaM bhajAmi te rAghava vishvarUpam || 25|| sahasranetrAnanapAdabAhumanantavIryaM ravikoTitulyam | srakchandanAla~NkR^itadivyadehaM bhajAmyahaM te harivishvarUpam || 26|| kadambakodaNDagadAbjasaMyutaM daMShTrAkarAlA~Nkadhana~njayAnanam | pItAMshukaM svarNakirITakuNDalaM bhajAmi te rAghava vishvarUpam || 27|| kodaNDamikShujanitasmarapa~nchabANaM sha~NkhaM rathAvayavama~NkushapAshaveNum | hastAShTake navamaNidyutimudvahantaM pradyumnakR^iShNamanishaM bhaja rAmachandram || sItAlokanatatparaM maNinidhiM vyAkhyAnamudrA~nchitaM vAme jAnuni lambahastamanishaM vIrAsane saMsthitam | mUle kalpataroranAdimunibhirbrahmAdibhiH sevitaM muktAhArakirITakuNDaladharaM mUrdhAbhiShiktaM bhaje || yadrUpamAnandakaraM munInAM yadbANamAkhaNDalashatrunAshanam | yaddaivataM sarvajanAntarasthaM tatsarvarUpaM raghunAthamIDe || nAdaM nAdavilInachittapavanaM nAdAntatattvapriyaM nAmAkAravivarjitaM navaghanashyAmA~NganAdapriyam | nAdAmbhojamarandamattavilasadbhR^i~NgaM nadAntasthitaM nAdAntadhruvamaNDalAbjaruchiraM rAmaM bhaje tArakam || 31|| nAnAbhUtahR^idabjapadmanilayaM nAmojjvalAbhUShaNaM nAmastotrapavitritatribhuvanaM nArAyaNAShTAkSharam | nAdAntendugalatsudhAplutatanuM nAnAtmachinmAtrakaM nAnAkoTiyugAntabhAnusadR^ishaM rAmaM bhaje tArakam || 32|| khashyAmaM khagavAhanaM khagaripuM khAdyAdibhUtAtmakaM khAtItaM khagamaM khatatparapadaM khadyotakoTyujjvalam | khAvAchyaM khagaketanaM khagamanaM kharvATashR^i~NgAlayaM khArAryaM cha kharandhrapIThanilayaM rAmaM bhaje tArakam || 33|| vedyaM vedaguruM viri~nchijanakaM vedAntamUrtisphurad vedaM vedakalApamUlamahimAdhArAntakandA~Nkuram | vedIshR^i~NgasamAnasheShashayanaM vedAntavedAtmikaM vedArAdhitapAdapa~NkajamahaM rAmaM bhaje tArakam || 34|| mUlAdhAradhana~njayasphuTapaTujvAlAsamAli~NgitaM mUrdhanyAntashashA~NkamaNDalagataM kShIrAbhiShekapriyam | muktAshobhitamaulibhirmunivarairArAdhitaM bhAvaye prakhyAtaistiraguNairjanAdhipagaNaiH shAkhAmR^igaiH sevitam || 35|| tArAkAravimAnamadhyanilayaM tattvatrayArAdhitaM tattvAdhIshvarayoganirguNamahAsiddhaiH samArAdhitam | tatsa~NgaM taruNendushekharasakhaM tArAtrayAntargataM taptasvarNakirITakuNDalayugaM rAmaM bhaje tArakam || 36|| tAraM tArakamaNDaloparilasajjyotiH sphurattArakA\- tItaM tattvamasItivAkyamahimAdhAraM taDitsannibham | tattvaj~nAnapavitritatribhuvanaM tArAsanAntargataM tArAntadhruvamaNDalAbjaruchiraM rAmaM bhaje tArakam || 37|| kastUrIghanasAraku~NkumalasachChrIchandanAla~NkR^itaM kandarpAdhikasundaraM ghananibhaM kAkutsthavaMshadhvajam | kalyANAmbaraveShTitaM kamalayA yuktaM kalAvallabhaM kalyANAchalakArmukapriyasakhaM kalyANarAmaM bhaje || 38|| majjIvaM madanugrahaM madadhipaM madbhAvanaM matsakhaM mattAtaM mama sadguruM mohAndhavichChedanam | matpuNyaM madanekabAndhavajanaM majjIvanaM mannidhiM matsiddhiM mama sarvakarmasukR^itaM rAmaM bhaje tArakam || 39|| nityaM nIrajalochanaM nirupamaM nIvArashUkopamaM nirbhedAnubhavaM nirantaraguNaM nIlA~NgarAgojjvalam | niShpApaM nigamAgamArchitapadaM nityAtmakaM nirmalaM niShpuNyaM nikhilaM nira~njanapadaM rAmaM bhaje tArakam || 40|| dhyAye tvAM hR^idayAmbuje raghupatiM vij~nAnadIpA~NkuraM haMsohaMsaparamparAdimahimAdhAraM jaganmohanam | hastAmbhojagadAbjachakramatulaM pItAmbaraM kaustubhaM shrIvatsaM puruShottamaM maNinibhaM rAmaM bhaje tArakam || 41|| satyaM j~nAnamanantamachyutamajaM chAvyAkR^itaM tatparaM kUTasthAdisamastasAkShimanaghaM sAkShAdvirATtattvadam | vedyaM vishvamayasvalInabhuvanasvArAjyasaukhyapradaM pUrNaM pUrNataraM purANapuruShaM rAmaM bhaje tArakam || 42|| rAmaM rAkShasavaMshanAshanakaraM rAkendubimbAnanaM rakSho.ariM raghuvaMshavardhanakaraM raktAdharaM rAghavam | rAdhAdyA(yogIndrA)tmanivAsinaM ravinibhaM ramyaM ramAnAyakaM randhrAntargatasheShashAyinamahaM rAmaM bhaje tArakam || 43|| tArAkAraM nikhilanilayaM tattvamasyAdilakShyaM shabdAvAchyaM triguNarahitaM vyomama~NguShThamAtram | nirvANAkhyaM suguNamaguNaM vyomarandhrAntarasthaM sauShumnAntaH praNavasahitaM rAmachandraM bhaje.aham || 44|| muktermUlaM munivarahR^idAnandakandaM mukundaM kUTasthAkhyaM sakalavaradaM sarvachaitanyarUpam | nAdAtItaM kamalanilayaM nAdanAdAntatattvaM nAdAtItaM prakR^itirahitaM rAmachandraM bhaje.aham || 45|| nijAnandAkAraM nigamaturagArAdhitapadaM parabrahmAnandaM paramapadayugaM pApaharaNam | kR^ipApArAvAraM paramapuruShaM padmanilayaM bhaje rAmaM shyAmaM prakR^itirahitaM nirguNamaham || 46|| shrImadvaikuNThanAthaM suramunimukuTajyotiShaM svarNapIThaM nIlA~NgaM chandravaktraM maNimayamukuTaM bANakodaNDahastam | padmAkShaM pApanAshaM praNavamayamahAratnasiMhAsanasthaM shrIsItAvAmabhAgaM shritajanavaradaM rAmachandraM bhaje.aham || 47|| sAkete maNimaNDape surataruprAnte vimAnAntare padme chAShTadalojjvale nutamahAsaudhe sudhApA(mA)nvite | sakhye sUryajarAvaNAnujamarutputrAnujaiH sevitaM madhye vAsavanIlakomalanibhaM rAmaM bhaje tArakam || 48|| hR^idayakuharamadhye dyotitaM mantrasAraM nigamama(ni)yamagamyaM vedashAstrairachintyam | hariharavidhivandyaM haMsamantrAntarasthaM dasharathasutamIDe daivataM devatAnAm || devendranIlanavameghavinirjitA~NgaM pUrNendubimbavadanaM sharachApahastam | sItAsametamanishaM sharaNaM sharaNyaM cheto madIyamabhivA~nChati rAmachandram || 50|| otaprotasamastavastunichayaM chau~NkArabIjAkSharaM o~NkAraprakR^itiM ShaDakSharahitaM chau~NkArakandA~Nkuram | o~NkArasphuTabhUrbhuvaH suva(pa)ridhiM chaughatrayArAdhitaM o~NkArojjvalasiMhapIThanilayaM rAmaM bhaje tArakam || 51|| sAkete dhavale suradrumattale saudhe vimAnAntare AdikShAntasamastavarNakamale divye mR^igendrAsane | o~NkArojjvalakarNike surasarinmadhye sadevAntare vyastaM vyAsamunIshvArAdyabhinutaM rAmaM bhaje tArakam || 52|| kodaNDadIkShAgurumAdimUlaM guNAshrayaM chandanaku~NkumA~Nkam | salakShmaNaM sarvajanAntarasthaM parAtparaM rAmamahaM namAmi || 53|| mUlAdhArasaroruhe hutavahasthAne trikoNAntare kande kuNDalikAsuShuptipaTalIvAsAntavarNAshraye | bAlArkapratimaM su(va)rAbhayakaraM pAshA~NkushAla~NkR^itaM bhUtattvAshrayamAdipUruShamajaM rAmaM bhaje tArakam || 54|| svAdhiShThAnasaroruhe pravilasadvAlAntavarNAshrayaM brahmagranthimahonnate karatale shrIkuNDikAmAlikAm | pIThe ratnanibhaM varAbhayakaraM vANIyutaM bibhrataM sarvaM sarvagamindirAsahacharaM rAmaM bhaje tArakam || 55|| DAphAntyAkSharapa~Nkaje dashadale mANikyasampUrite viShNugranthimaye varAbhayakaraM chAsha~NkhachakrAnvitam | mArtANDadyuti ma~njunAbhamatulaM pItAmbaraM kaustubhaM sarvaM sarvagamindirAsahacharaM rAmaM bhaje tArakam || 56|| hR^itpadme vilayArkakoTisadR^ishaM kaNThAntavarNojjvale prANAntapraNavAntare cha vilasadvodhArNapIThAntare | sUrye haMsamaye sadAshivapadaM kodaNDadIkShAguru vAsAmokSha ramAsametamanishaM rAmaM bhaje tArakam || 57|| sAkShAtShoDasha divyapatrakamale jIvAtmasaMsthApite rudragranthimaye manonmanipathe jAlandhrapIThAntare | shubhrajyotimayaM sharIrasahitaM saMsthaM sudhAshItalaM shabdabrahmanivAsabhUtavadanaM rAmaM bhaje tArakam || 58|| bhrUmadhye nigamAgamojjvalapade chandre trimArgAntare nirdvandve nikhilArthatattvavilasatsUkShme suShumnonmukhe | AsInaM pralayArkabhAsurapadaM jyotiH svarUpAtmakaM karNAnA~nchitamokShalakShmisahitaM rAmaM bhaje tArakam || 59|| shIrShAmbhoruhakarNike nirupame shrIShoDashAnte shashi\- prakhyAtAmR^itavArdhivIchilaharInirvANapIThAntare | shabdabrahmaparaM charAcharaguruM tejaH paraM shAshvataM satyAsatyamagocharaM hR^idi sadA sItAsametaM bhaje || sAkete ravikoTisannibhamahAharmye susiMhAsane nAnAratnavinirmite munijanAkIrNe sadAnandane | devAdhIshvarapa~Nkaje nivAsitaM vAmA~NkasItojjvalaM devendropalanIlakomalanibhaM rAmaM bhaje tArakam || 60|| sAkete nagare samastasukhade harmyendukoTidyute nakShatragrahapa~Nktilagnashikhare chAntaryapa~Nkeruhe | vAlmIkAtriparAsharAdimunibhiH saMsevyamAnaM sthitaM sItAla~NkR^itavAmabhAgamanishaM rAmaM bhaje tArakam || 61|| vande rAmamanAdipUruShamajaM vande ramAnAyakam | vande hArakirITakuNDaladharaM devendranIladyutim | vande chApakadambakojjvalakaraM vande jaganma~NgalaM vande pa~NktirathAtmajaM mama guruM vande sadA rAghavam || 62|| vande shaunakagautamAdyabhinutaM vande ghanashyAmalaM vande tArakapIThamadhyanilayaM vande jagannAyakam | vande bhaktajanaughadevaviTapaM vande dhanurvallabhaM vande tattvamasIti vAkyajanakaM vande sadA rAghavam || 63|| vande sUryashashA~NkalochanayugaM vande jagatpAvanaM vande patrasahasrapadmanilayaM vande purAripriyam | vande rAkShasavaMshanAshanakaraM vande sudhAshItalaM vande devakapIndrakoTivinutaM vande sadA rAghavam || 64|| vande sAdaragarvabha~NgavishikhaM vande jagajjIvanaM vande kaushikayAgarakShaNakaraM vande guruNAM gurum | vande bANasharAsanojjvalakaraM vande jaTAvalkalaM vande lakShmaNabhUmijAnvitakaraM vande sadA rAghavam || 65|| vande pANDurapuNDarIkanayanaM pUrNemdubimbAnanaM vande kambugalaM karabhjayugalaM vande lalAmojjvalam | vande pItadukUlamambudanibhaM vande jaganmohanaM vande kAraNamAnuShojjvalatanuM vande sadA rAghavam || 66|| vande nIlasarojakomalaruchiM vande jagadvanditaM vande sUryakulAbdhikaustubhamaNiM vande surArAdhitam | vande pAtakapa~nchakapraharaNaM vande jagatkAraNam vande viMshatipa~nchatattvarahitaM vande sadA rAghavam || 67|| vande sAdhakavargakalpakataruM vande trimUrtyAtmakaM vande nAdalayAntakasthalagataM vande trivarNAtmakam | vande rAgavihInachittasulabhaM vande sabhAnAyakaM vande pUrNadayAmR^itArNavamahaM vande sadA rAghavam || 68|| vande sAttivakatattvamudritatanuM vande sudhAdAyakaM vande chAruchaturbhujaM maNinibhaM vande ShaDadhva(bja)sthitam | vande brahmapipIlikAdinilayaM vande virADvigrahaM vande pannagatalpashAyinamahaM vande sadA rAghavam || 69|| ayodhyApuramaNDape sphuritasiMhapIThe sthitaM vasiShThamunigautamairbhR^igushukAdisaMsevitam | dineshasutarAvaNAnujasahodarAdyAvR^itaM bhajAmi raghunandanaM praNavabIjasArAtmakam || 70|| vilolamaNimaNDalaM vimalachandravimbAnanaM vikhaNDitadashAnanaM vitatachApabANojjvalam | vimohitajagattrayaM vikachapadmapatrekShaNaM vibhIShaNasurakShitaM vijayarAmamIDe harim || 71|| chalatkanakakuNDalollasitadivyagaNDasthalaM charAcharajaganmayaM charaNapadmaga~NgAshrayam | chaturvidhaphalapradaM charamapITha madhyasthitaM chidaMshamakhilAspadaM dasharathAtmajaM chintaye || 72|| sanandanamunipriyaM sakalavarNavedAtmakaM samastanigamAgamasphuritatattvasiMhAsanam | sahasranayanAbjajAdyamaravR^indasaMsevitaM samaShTipuravallabhaM dasharathAtmajaM chintaye || 73|| anarghyamaNipUrakollasitadivyatejaH paraM anAhatasaroruhasphuritahaMsanAdAnvitam | anantadalapa~NkajaM sphuTamR^igA~NkabimbAmR^itA\- plutA~NgamakhilAspadaM dasharathAtmajaM chintaye || 74|| jAgratsvapnasuShuptikAlavilasattattvAtmachinmAtrakaM chaitanyAtmakamAdipAparahitaM bhUmyAdi tanmAtrakam | shAmbhavyAdisamastayogakulakaM sa~NkhyAditattvAtparaM shabdAvAchyamahaM namAmi satataM vyutpattinAshAtparam || 75|| dhyAye tvAM navavidrumasphuTatanuM barhAlasanmechakaM nAsAra~njitamauktikaM parilasatpItAmbaraM kaustubham | veNUkamburathA~NgapAshaparighaprAsekShuchApAshugaM shrIrAmaM navamanmathAdhipamahaM ShaTkoNachakrasthitam || 76|| sAkete nagare samastamahimAdhAre jaganmohanaM ratnastambhasahasramaNDapamahAsiMhAsane sAmbuje | vishvAmitravasiShThagautamashukavyAsAdibhirmaunibhiH dhyeyaM lakShmaNalokapAlasahitaM sItAsametaM bhaje || 77|| ekAnte kamale jale vikasite chandrIkR^itasthApite sthAne tArakamaNDape tanubilavyApte sudhAmaNDape | abjArkAnilamaNDalopari mahAshrIShoDashAnte sadA nAdAnte janakAtmajAnvitamahaM rAmaM bhaje tArakam || 78|| sAkete maNimaNDape surataruprAnte.aShTavarNollasat patre tArakakarNike pravilasatkalpaprasUnA~nchite | padme vedachatuShkamaNDalasite nAdAntashayyAtale taM seve dhruvamaNDalenduvigalatpIyUShadhArAplu(mR^i)tam || 79|| dhyAye tvAM ravimaNDalendudhavale padme niShaNNaM hariM svarNAbhaM karasha~NkhachakralalitaM pItAmbaraM kausutbham | svarNashmashrunakhAlakaM lalanayA yuktaM kirITA~NgadaM hArAla~NkR^itavakShasaM padayugaM shrIpAdukAla~NkR^itam || 80|| vasantAkSharAkhye chatuH patrapadme trikoNAntakaNThe dharAtattvayukte | varAbhItipAshA~NkushaM vidrumAbhaM gajAshve niShaNNaM bhaje rAmachandram || 81|| valAntAkSharAbhyAM cha ShaTpatrapadme lasattoyatattve varAbhItihaste | mahAkuNDikAM chAkShamAlAM vahantaM chaturvaktrarUpaM bhaje rAmachandram || 82|| DaphAntAkSharAbhyAM maNivrAtapUre rathA~NgAbjahastaM mahendropalA~Ngam | lasadvahnittvaM niShaNNaM gadA~NkaM mahAviShNurUpaM bhaje rAmachandram || 83|| kaThAntAkSharAkhye jagatprANatattve varAbhItihastaM trishUlaM dadhAnam | umAnAthamabjArikhaNDojjvalA~NkaM smarArisvarUpaM bhaje rAmachandram || 84|| vishuddhAkhyapadme nabhastattvaramye arUpaM nirUpaM samasteShuvAsam | vishiShTaM manogamyamekaM tvanAdiM bhaje jIvajIvAtmarAmaM cha rAmam || 85|| dvipatrAbjamadhye manastattvagamye jagatkAraNaM jyotirAnandarUpam | lasadbhAvaviShNuM manobhAvadIpaM parAtmasvarUpaM bhaje rAmachandram || 86|| sadAnandadeve sahasrArapadme galachchandrapIyUShadhArAvR^itAnte | sthitaM rAmamUrtiM niSheve niSheve\- .anyadaivaM na seve na seve na seve || 87|| sudhAbjAsitadvIpamadhye vimAne suparvANavR^ikShojjvale sheShatalpe | niShaNNaM ramA~NkaM niSheve niSheve\- .anyadaivaM na seve na seve na seve || 88|| chidaMshaM sadAnandamAnandakandaM suShumnAkhyarandhrAntarAlaM cha haMsam | sachakraM sasha~NkhaM sapItAmbarA~NkaM paraM chAnyadaivaM na jAne na jAne || 89|| suparvANavR^ikShojjvalasvarNapIThe vanaukAdibhirmaunibhiH sevyamAnam | sthitaM puShpavR^iShTyA.a.avR^itaM rAmamUrtiM sadA bhUmijAyuktamIDe hR^idante || 90|| kare divyachakraM pare chArusha~NkhaM gale tArahAraM lalATe lalAmam | bhuja~Nge niShaNNaM parAnandarUpaM sadA bhUmijAyuktamIDe hR^idante || 91|| chaturvedakUTollasatkAraNAkhye sphuraddivyavaimAnike bhogitalpe | parandhAmamUrtiM niShaNNaM niSheve\- .anyadaivaM na seve na seve na seve || 92|| lasaddivyasheShAchale yogapIThe sadAnandavaimAnike mAsahAyam | munInAM hR^idAnandamo~NkAragamyaM sadA bhUmijAyuktamIDe hR^idante || 93|| manaHsthaM mano.antaHsthamAdyantarUpaM mahAchintavarjaM cha madhyasthamIsham | manobuddhyaha~NkArachittAdisAkShiM parasvaprakAshaM bhaje rAmachandram || 94|| parAnandavastusvarUpAdi sAkShiM parabrahmagamyaM paraM jyotimUrtim | parAshaktimitrApriyArAdhitA~NghriM parandhAmarUpaM bhaje rAmachandram || 95|| paraM pavitraM paravAsudevaM parAtparaM taM parameshvarAkhyam | guNatrayArAdhitamUlakanda\- mAdityavarNaM tamasaH parastAt || 96|| sAkete gurugandhadhUpaniviDe mANIkyadIpAnvite kastUrIghanasAraku~NkumarasaprAchuryasArojjvale | nAnApuShpavitAna pa~Nktiruchire sauvarNasiMhAsane vAsaM manmathamanmathaM maNinibhaM rAma bhaje tArakam || 97|| bha~Ngottu~NgamayAmR^itAbdhilaharImadhye virADvigrahe dvIpe nirjarapAdapaiH parivR^ite karpUradIpojjvale | o~NkArAntaramandire maNimaye sheShAntarAshAyinaM lakShmIyuktamasArachitsukhapadaM rAmaM bhaje tArakam || 98|| vaikuNThe nagare suradrumatale svAnandavaprAntare nAnAratnavinirmitAsphuTapaTuprAkArasaMveShTite | saudhendUpalasheShatalpalalite nIlotpalAchChAdite parya~Nke shayinaM ramAdisahitaM rAmaM bhaje tArakam || 99|| vaikUNThe puTabhedane maNimayaprAntendusiMhAsane akShAntAntasaroruhe shashigalatpIyUShavAryantare | chandrArkAnalabhAnumaNDalayute sheShAhitalpAntare vAsaM vAsavanIlakomalanibhaM rAmaM bhaje tArakam || 100|| kShIrAbdhau shashisha~NkhamauktikalasaddvIpe sudharmAntare bindau sArdhakalAnvite parilasannAgAntare saMsthitam | koTIrA~NgadahArakuNDalamaNigraiveyahArojjvalaM shrIvatsA~nchitamindranIlasadR^ishaM rAmaM bhaje tArakam || 101|| sAkete.analachandrabhAnuvilasattachchakrabindusthitaM bAlArkadyutibhAsuraM karatale pAshA~Nkushau bibhratam | bANaM chApayutaM vishAlanayanaM smerAnanAmbhoruhaM strIpuMrUpadharaM vilAsasadanaM rAmaM bhaje tArakam || 102|| ardhaM raktavadardhanIlaruchiraM ardhenduchUDArchitaM ardhaM ratnakIrITakuNDaladharaM tATa~NkamardhaM dhanuH | sha~NkhaM chakragadAbjasaMyutakaraM dhyeyaM sadA vaiShNavaM pAshaM chA~NkushabANasandhR^itakaraM rAmaM bhaje tArakam || 103|| sahasrapatrAmbujakarNikAntarjyotiH prakAshaM paramAdimUlam | tejomayaM janmajarAvihInaM shrIrAghavaM nityamahannamAmi || 104|| sakalabhuvanaratnaM sachchidAnandaratnaM sakalahR^idayaratnaM sUryabimbAntaratnam | vimalasukR^itaratnaM vedavedAntarantaM puraharajaparatnaM pAtu mAM rAmaratnam || 105|| ikShvAkuvaMshArNavajAtaratnaM sItA~NganAyauvanabhAgyaratnam | vaikuNTharatnaM janabhAgyaratnaM shrIrAmaratnaM shirasA namAmi || 106|| nigamashishiraratnaM nirmalAnandaratnaM nirupamaguNaratnaM nAdanAdAntaratnam | dasharathakularatnaM dvAdashAntastharatnaM pashupatijaparatnaM pAtu mAM rAmaratnam || 107|| shatamakhanutaratnaM ShoDashAntastharantaM munijanajaparatnaM mukhyavaikuNTharatnam | nirupamaguNaratnaM nIrajAntastharatnaM paramapadaviratnaM pAtu mAM rAmaratnam || 108|| sakalasukR^itaratnaM satyavAkyArtharatnaM shamadamaguNaratnaM shAshvatAnandaratnam | praNayanilayaratnaM prasphuTajjyotiratnaM paramapadaviratnaM pAtu mAM rAmaratnam || 109|| nikhilanilayamantraM nityatattvAkhyamantraM bhuvakulaharamantraM bhUmijAprANamantram | pavanajanutamantraM pArvatImokShamantraM pashupati nijamantraM pAtu mAM rAmamantram || 110|| praNavanilayamantraM prANaniryANamantraM prakR^itipuruShamantrambrahmarudrendramantram | prakaTaduritarAgadveShanirnAshamantraM raghupatinijamantraM rAma rAmeti mantram || 111|| dakSharathasutamantraM daityasaMhAramantraM vividhavinutamantraM vishvavikhyAtamantram | munigaNanutamantraM muktamArgaikamantraM raghupati nijamantraM rAma rAmeti mantram || 112|| saMsArasAgarabhayApahavishvamantraM sAkShAnmumukShujanasevitasiddhamantram sAra~NgahastamukhahastanivAsamantraM kaivalyamantramanishaM bhaja rAmamantram || 113|| jayatu jayatu mantraM janmasAphalyamantraM jananamaraNabhedakleshavichChedamantram | sakalanigamamantraM sarvashAstraikamantraM raghupatinijamantraM rAma rAmeti mantram || 114|| aj~nAnasambhavabhavAmbudhibADavAghniM avyaktatattvanikarapraNavAdhirUDham | sItAsametamanujena hR^idantarAle prANaprayANasamaye mama sannidhattAm || 115|| \section{tR^itIyAshvAsaH} shrIrAmaM shivachApabha~NganipuNaM sItA~NganAvallabhaM sutrAmArchitapAdapadmayugalaM sUryendunetrojjvalam | karpUrA~NgavilepanaM ghanaruchiM kAruNyapAthonidhiM vande kalpatarupraveshitalasatsiMhAsanAdhiShThitam || 1|| shrIrAmaM shitikandharasya dhanuShaH sambhedanAtprApitAM sItAM kA~nchanasannibhAM pariNatAmAkalparatnojjvalAm | vAmA~Nkopari lajjayA natamukhImAlokya divyAsane shrImadbhAnushashA~NkakoTinivahaH pAyAtsa vo rAghavaH || 2|| shrIrAmaM bhuvanaikasundaratanuM dhArAdharashyAmalaM rAjIvAyatalochanaM raghuvaraM rAkendubimbAnanam | kodaNDAdinijAyudhAshritabhujairbhAntaM videhAtmajA\- dhIshaM bhaktajanAvanaM raghuvaraM shrIrAmachandraM bhaje || 3|| ArAmaM vaibhavAnAmabhinavasupathaM hArakeyUrakAntaM hAsollAsAbhirAmaM maNimayamukuTaM ma~NgalAnAM nivAsam | mandArAmasImAntaramaNibhavanAdhiShThitaM shiShTasevyaM sallApAnandasindhuM praNavamabhinishaM rAmachandraM bhaje.aham || 4|| rAmaM rAjashikhAmaNiM raghuvaraM rAkendubimbAnanaM rAjIvAyatalochanaM raNahatAnekAsuraM rAghavam | sItAchArupayodharA~nchitalasatkAshmIragandhAchitaM rAjatkuNDalamaNDitaM shubhakaraM rAmAbhirAmaM bhaje || 5|| rAmaM komalanIlameghavilasadgAtraM payojAnanaM kAkutsthaM dashakaNThabAhuvidalatkodaNDabANAnvitam | pApaghnaM vishadAyatAkShiyugalaM saumitrisaMsevitaM bhaktAnAM paramauShadhaM munivaraiH saMstUyamAnaM bhaje || 6|| rAmaM shyAmalameghakomalaruchiM rAkendubimbAnanaM rakShoghnaM ravijAchitaM raghuvaraM ratnojjvalatkuNDalam | rAjIvAkShamamAnuShaM raNabalodagraM ramAnugrahaM rAjendraM ramaNIyarUpamasakR^iddhyAye jaganmohanam || 7|| rAmaM ramyaguNaM ramApatisamaM rAkAshashA~NkAnanaM rAjanyaM ramaNIyarUpamamalaM rAmAbhirAmaM harim | rAjArAdhitapAdapadmamanishaM rAjanyavidbhAsitaM rAkendupratimaM dharAkuchayuge vinyastahastaM bhaje || 8|| rAmaM kaushikagautamapriyakaraM sItApatiM sAnujaM rakShoghnaM vanavAsinaM guNanidhiM vighnaghnamAptArkajam | setorbandhanadhIravAnarabalaM dhikkumbhakarNendrajit\- pa~NkigrIvamavadvibhIShaNamajaM shrIrAmachandraM bhaje || 9|| rAmaM komalanIlanIradanibhaM nIlAlakAla~NkR^itaM kaTyAM shobhitaki~NkiNIjhaNajhaNadhvAnairupetaM shishum | kaNThAlambitarakShunirmalanakhaM ka~njAkShamabjachChaviM bhAsvantaM makuTA~NgadAdivividhAkalpaM sadA.ahaM bhaje || 10|| rAmaM sItAsametaM vimalaravishatAbhAsamAnaM rasArdaM shyAmaM dedIpyamAnasmitaruchiramukhaM kuNDalodbhAsigaNDam | shrIvatsaM shrInivAsaM surataruvilasadratnasiMhAsanasthaM divyAkalpojjvalA~NgaM divijapatinutaM santataM taM bhaje.aham || 11|| jalanidhikR^itasetuM devatAnandahetuM dashamukhamukharakShodAravaidhavyahetum | munijananivahAnAM muktisaukhyAdihetuM raghuvarakulaketuM kIrtaye dharmahetum || 12|| sakalaguNanidhAnaM yogibhiH stUyamAnaM bhajatu suravimAnaM rakShitendrAdimAnam | mahitavR^iShabhayAnaM sitayA shobhamAnaM smaratu hR^idayabhAnuM brahma rAmAbhirAmam || 13|| varaguNamaNisindhurmaithilIprANabandhuH kanakashikharidhairyo bhUtamobhAnusUryaH | dasharathanR^iparatno devatAgraikagaNyo bhajitabhuvanabhadro pAtu mAM rAmabhadraH || 14|| tridashakumudachandro dAnavAmbhojachandro duritatimirachandro yoginAM j~nAnachandraH | praNatanayanachandro maithilInetrachandro dashamukharipuchandraH pAtu mAM rAmachandraH || 15|| svayuvatikulachandraM bandhudugdhAbdhichandraM sujanakumudachandraM vairivaktrAbjachandram | vikasitamukhachandraM vyAptasatkIrtichandraM sakalabhuvanachandraM santataM rAmachandram || 16|| bhetAlaM dashakaNThakaNThakadalIkandarpadarpApahaM shrIkaNThAkR^itimApluvantamamalaM ghorAsuraprANaham | bANaM pratyupasaMharantamatulaM bANAsanodyatkaraM vande.arAtibhayAvahaM muninutaM rAmaM ghanashyAmalam || 17|| AkarNAntaguNollasachCharamajaM kalpAntakAlopamaM netrAntAruNatAM vahantamanishaM prahlAdadaM nAkinAm | paulastyAsuradR^iShTicha~nchalakaraM shastrAstrasandhAyinaM bANAnekavichitrahastakushalaM shrIvIrarAmaM bhaje || 18|| sa hi mAtA sa hi tAtaH sa hi mama tanayaH sa eva sodaryaH | (na hi mAtA na hi tAto na hi mama tanayaH na chaiva sodaryaH |) iti mama kuTile mR^ityau raghupatirayameva bandhurAsannaH || 19|| devendreNa samarpite dhvajayute tatsyandane saMsthitaM sotkaNThaM suravairivIryavibhavaM j~nAtvA bhujAsbhAlanam | kR^itvA sUtayuto dashAnanaharaM tUNIrasaMsthaM sharaM hR^itvA jyAninadAtkaroti bhayadaM shrIvIrarAmaM bhaje || 20|| ruchiramaNikirITaM sundarabhrUlalATaM kanakaruchirachelaM kAshasadbhogakhelam | vimalajaladanIlaM kuNDalodbhAsikarNaM raghukulajaniratnaM santataM chintayAmi || 21|| shrIvatsA~NkamudArakaustubhalasatpItAmbarAla~NkR^itaM nAnAratnavirAjamAnamukuTaM nIlAmbudashyAmalam | kastUrIghanasAracharchitatanuM mandAramAlAdharaM kandarpAyutasundaraM raghupatiM sItAsametaM bhaje || 22|| yannAmaiva sahasranAmasadR^ishaM yannAma vedaiH samaM yannAmA~NkitavAkyamAsurabalastrIgarbhavichChedakam | yannAma shvapachAryabhedarahitaM mukteH sadA dAyakaM yannAmnA raghurAmanAmaramaNaM shrIrAmanAmAmR^itam || 23|| rAmaM rAkShasamardanaM raghuvaraM daiteyavidhvaMsinaM sugrIvepsitarAjyadaM surapatiM daityAntakaM shAr~NgiNam | bhaktAnAmabhayapradaM bhayaharaM pApaughavidhvaMsinaM sAmIristutapAdapadmayugalaM sItAsametaM bhaje || 24|| rAmaM raktasaroruhAkShamamalaM la~NkAdhinAthAntakaM kausalyAnayanotsukaM raghuvaraM nAgendratalpasthitam | vaidehIkuchakumbhaku~Nkumarajo.ala~NkArakAraM hariM mAyAmAnuShavigrahaM raghupatiM sItAsametaM bhaje || 25|| rAmaM hemataTitprabhAMshukadharaM vIrAsane saMsthitaM bAlaM nIlamaNiprabhaM madhuripuM daityendragarvApaham | vishvAmitravasiShThavAnaravaraiH saMsevyamAnaM sadA nityaM bhAskarachandrakoTisadR^ishaM sItAsametaM bhaje || 26|| shatrughno vyajanA~Nkito.api bharataH pArshvadvaye pashchime ChatraM chAmarasaMyutaM kalitavAn saMsevate lakShmaNaH | mUle kalpatarorvimAnavilasanmANikyasiMhAsane padmAsyaM munisevitaM raghupatiM sItAsametaM bhaje || 27|| vAmA~Nkopari taptakA~nchananibhaM sItAsamAlokitaM hastAbhyAM dhR^itaChatrachAmaradhR^itA saumitriNA sevitam | nityaM pUjitapAdapadmayugalaM devaiH surendrAdibhiH sevyaM mAnuSharAkShasaiH kapivaraiH shrIrAmachandraM bhaje || 28|| kastUrItilaka~NkapIndraharaNaM kAruNyavArAnnidhiM kShIrAmbhodhisutAmukhAbjamadhupaM kalyANarAmaM vidhim | kausalyAnayanotsukaM kapivaratrANaM mahApauruShaM kAmAripriyamarkakoTisadR^ishaM sItAsametaM bhaje || 29|| vidyutkoTidivAkaradyutinibhaM shrIkaustubhAla~NkR^itaM yogIndraiH sanakAdibhiH parivR^itaM kailAsanAthapriyam | muktAratnakirITakuNDaladharaM graiveyahArAnvitaM vaidehIkuchasannivAsamanishaM sItAsametaM bhaje || 30|| shyAmalamambujAtanayanaM vistIrNavakShaHsthalaM bAhudvandvavirAjitaM suvadanaM shoNA~Nghripa~Nkeruham | nAnAratnavichitrabhUShaNayutaM kodaNDabANA~NkitaM trailokyapratimAnasundaratanuM sItAsametaM bhaje || 31|| vidyutkoTisahasrabhAnusadR^ishaM siMhAsane saMsthitaM mUle kalpatarormahAmaNimaye bhAntaM pareshaM vibhum | sugrIvA~NgadajAmbavAdiharibhiH saMsevyamAnaM hariM shambubrahmasurAribhiH parivR^itaM sItAsametaM bhaje || 32|| divyAraNyayatIndranAmanagare madhye mahAmaNDape svarNastambhasahasraShoDashayute mandAramUlAshrite | nAnAratnavichitranirmalamahAsiMhAsane saMsthitaM sItAlakShmaNasevitaM raghupatiM sItAsametaM bhaje || 33|| yatpAdAmbujasambhavA tripathagA bhAgIrathI muktidA lokAnAM hatakilbiShA bhagavatI mandAkinI shAmbhavI | loke bhAti sarasvatI suranadI pUrNendukAntiprabhA taM viShNuM bharatAgrajaM raghuvaraM sItAsametaM bhaje || 34|| yatpAdAmbujareNunA munisatI muktiM gatA yanmahA\- puNyaM pAtakanAshane trijAtAM bhAti smR^itA pAvinI | smR^itvA rAghavamaprameyamamalaM purNendumandasmitaM taM rAmaM sarasIruhAkShamamalaM sItAsametaM bhaje || 35|| vaidehIkuchamaNDalAgravilasanmANikyahastAmbujaM kA~nchIka~NkaNahAranUpuralasatkeyUrahArAnvitam | divyashrImaNikuNDalojjvalamahAbhUShAsahasrAnvitaM vIraM shrIraghuvIrapu~NgavaM guNanidhiM sItAsametaM bhaje || 36|| vaidehIkuchamaNDaloparilasanmANikyahArAvalI\- madhyasthaM navanItakomalaruchiM nIlotpalashyAmalam | kandarpAyutakoTisundaratanuM pUrNendubimbAnanaM kausalyAkulabhUShaNaM raghupatiM sItAsametaM bhaje || 37|| vaidehIyutavAmabhAgamatulaM vandArumandArakaM vande prastutakIrtivAsitataruchChAyAnukAriprabham | vaidehIkuchaku~NkumA~NkitamahoraskaM mahAbhUShaNaM vedAntairupagIyamAnamasakR^itsItAsametaM bhaje || 38|| vaidehIstanakumbhasambhramaparIrambhAvR^itaM sindhugaM rAkAchandranibhAnanaM raghuvaraM rAjIvapatrekShaNam | prAvR^iNmeghanibhadyutiM smitayutaM hArAvalIbhUShitaM shrIrAmaM praNamAmi bhaktajanatAchintAmaNiM santatam || 39|| vaidehIramaNaM hiraNyatilakaM vishvambharApAlakaM varShiShThaM vividhAyudheShu nipuNaM vidvajjanashrIkaram | vidyAvAsagR^ihaM viyachcharanutaM vidyutprakAshAmvaraM vipratrANavidheyamAdipuruShaM shrIrAmachandraM bhaje || 40|| vaidehIvashavartinaM raNajitaM ratnAkarAgAriNaM pa~NktigrIvamadApahaM paTubhujaM padmAptakoTiprabham | viShNuM jiShNumavAryashauryanilayaM nIlAmbudashyAmalaM ratnAla~NkaraNAnvitaM raghupatiM shrIrAmachandraM bhaje || 41|| devAnAM hitakAriNaM subhuvane kR^itvA.avatAraM dhruvaM rAmaM kaushikayaj~navighnadanujaghnaM tATakAsaMharam | nityaM gautamapatnishApadalanashrIpadareNuM shubhaM shambhorutkaTachApakhaNDanamahAsattvaM bhaje rAghavam || 42|| rAjIvanetra raghupu~Ngava rAmabhadra rAkendubimbasadR^ishAnana nIlagAtra | rAmAbhirAma raghuvaMshasamudbhava tvaM shrIrAmachandra mama dehi karAvalambam || 43|| mukuraruchiragaNDaM puNDarIkAbhatuNDaM karikarabhujadaNDaM raudratejo.agnikuNDam | namitabhuvanaShaNDaM bheditogrArimuNDaM guNanikarakaraNDaM naumi rAmaprachaNDam || 44|| kodaNDakANDaviniveshitabAhudaNDaM AkhaNDalAdyamaravarShitapuShpavarSham | AyodhanasthitirajaHparidhUsarA~NgaM avyUtidaM raghuvarendramariprabhedam || 45|| sevyaM shrIrAmamantraM shravaNashubhakaraM shreShThasuj~nAnamantraM stavyaM shrIrAmamantraM narakaduritadurvAranirghAtamantram | bhavyaM shrIrAmamantraM bhajatu bhajatu saMsAranistAramantraM divyaM shrIrAmamantraM divi bhuvi vilasanmokSharakShaikamantram || 46|| AjAnubAhumaravindadR^ishaM shubhA~NgaM rAjAdhirAjamagharAjitamaHpata~Ngam | shrIjAnakImukhasaroruhamattabhR^i~NgaM shrImAnitaM hR^idi bhajAmi kR^ipAntara~Ngam || 47|| ekena bANamapareNa kareNa chApaM harShaM vahantamasamAnajaTAshiraskam | sItAsahAyamanujena sahAcharantaM shrIrAmachandramanishaM kalayAmi chitte || 48|| AmIlayandashashirovadanAmbujAtaM unmIlayan janakajAnayanotpale cha | AnandayansakalajIvachakorarAshiM shrIrAmachandramanishaM kalayAmi chitte || 49|| rAmaM purANapuruShaM ramaNIyaveShaM rAjAdhirAjamukuTArchitapAdapITham | sItApatiM sunayanaM jagadekavIraM shrIrAmachandramanishaM kalayAmi chitte || 50|| siMhAsanasthaM surasevitavyaM ratnA~NkitAla~NkR^itapAdapadmam | sItAsametaM shashisUryanetraM rAmaM bhaje rAghavarAmachandram || 51|| sugrIvamitraM shubhanAmarUpaM la~NkAharaM rAkShasavaMshanAsham | vedAshrayA~NgaM vipulAyatAkShaM rAmaM bhaje rAghavarAmachandram || 52|| anantakIrtiM varadaM prasannaM padmAsanaM sevakapArijAtam | rAjAdhirAjaM raghuvIraketuM rAmaM bhaje rAghavarAmachandram || 53|| padmAsanasthaM surasevitavyaM padmAlayAnandakaTAkShavIkSham | gandharvavidyAdhara gIyamAnaM rAmaM bhaje rAghavarAmachandram || 54|| achintyamavyaktamanantarUpaM advaitamAnandamanAdigamyam | puNyasvarUpaM puruShottamAkhyaM rAmaM bhaje rAghavarAmachandram || 55|| mandasmitaM kuNDalagaNDabhAgaM pItAmbaraM bhUShaNabhUShitA~Ngam | nIlotpalA~NgaM bhuvanaikamitraM rAmaM bhaje rAghavarAmachandram || 56|| DiNDIrahAsamaNikuNDalachArukarNa\- dordaNDashauryajitakhaNDanashauryadhIra | kodaNDakANDaparimaNDitapArthivendra vetaNDayAna jaya rAghava rAmachandra || 57|| lokAn sapta ninAdayan harihayAshvaM bhrAmayannindhayan saptAkhye bhuvane prakampamudayan saptArNavAn ghUrNayan | unmUlAni rasAtalAni janayan saptApi pR^ithvIdharAn sushrIrAghavabAhudaNDavidalatkodaNDachaNDadhvaniH || 58|| brahmANDaM dalayan viyadvidalayan bhogIshabhogasthale santrAsaM janayan samudrapaTalItoyaM samudvelayan | dikpAlAnatikShobhayan kulagirIn dIrNatvamApAdayan nakShatrANi cha pAtayan vilasate shaurerdhanujyAravaH || 59|| yashchaNDagAmbhIryadhanurvitejobhUmaNDalItrANakR^itAvatAraH | akhaNDalAdyairamarairupAsyaH kodaNDapANiH kuladaivataM naH || 60|| vaidehyA saha rAjamAnamanishaM sauvarNasiMhAsane mandAradrumavATikAntaramahA shrIchandrakAntAlaye | kaikeyIjanimA~njaneyasahitaM saumitriNA sevitaM meghashyAmamudArahAsavadanaM shrIrAmachandraM bhaje || 61|| vaidehyA pulakA~NkurArchitatanurvyAlambahastAmbujaH haste moditaratnaka~NkaNaravaH kalpadrumANAM vane | pAdAbhyAM maNipAdukAdyutikaraM pre~NkhannakhAbhyAM charan iShTAlApasudhArasaM dishatu me shrIrAmachandraM bhaje || 62|| vAmA~NkasthitajAnakIkuchayuge visrastahastAmbujaM ujjR^imbhAnanapa~NkajaM parilasadvispaShTabimbAdharam | sattAreNa vishiShTaka~NkaNarave o~NkArashabdAshraye bhAntaM shAradachandrahAsamanishaM vande sadA rAghavam || 63|| vaidehIsahitaM sulakShmaNayutaM kaikAsutaM sAnugaM sugrIvaM cha vibhIShaNAnilasutau nIlaM nalaM sA~Ngadam | vishvAmitravasiShThagautamabharadvAjAnusaMsevitaM rAmaM mArutisevitaM smara manaH sAmrAjyasiMhAsane || 64|| rAmaH prA~njalimagrato.anilasutaM saubhrAtramAdarshayan ChatrAchAmarayugmabhAsitakarAn pashchAtsthale pArshvayoH | vAmA~Nge cha nijAn vibhIShaNamukhAn sambhAvayan bodhayan dhImudrAkaratattvarUpamavatAt sAmrAjyasiMhAsane || 65|| paugaNDe hitabAlakaiH parivR^itaH pUrNendukAntAnanaH prItyA baddhavichitrahemavasane saMsaktakA~nchIguNaH | AjAnupravilambibAhuyugalaH shyAmAmbubhR^idvigrahaH bhrAtR^ivyAnucharashcharAcharaguruH pAyAtsa vo rAghavaH || 66|| vaidehIramaNIyavaktravanajapradyotakhadyotanaM kelIsadmani ratnadIpakalikAkAnte vasantaM harim | saurabhyaprasavaprayuktavilasachChAyAntare shAyinaM shrImantaM raghuvaMshadIpakamaNiM shrIrAmachandraM bhaje || 67|| rAmo baddhapayonidhirguNanidhirgatvA.atha pAre.ambudheH la~NkAM prApya sakumbhakarNadanujaM hatvA raNe rAvaNam | tatrAsthApya vibhIShaNaM punaragAtsItApatiH puShpakaM chArUDhaH punarAgataH sa bhR^itavAn dhAtrImajaH pAtu naH || 68|| ratnollasajjvalitakuNDalagaNDabhAgaM kastUrikAtilaka shobhitabhAlabhAgam | karNAntadIrghanayanaM karuNAkaTAkShaM shrIrAmachandramukhamAtmani sannidhattAm || 69|| helAbhagnashashA~NkashekharadhanurbhUmaNDalAkhaNDala\- shreNImaulilasadvinUtnamaNibhirdIptA~Nghripa~NkeruhaH | kalyANaM janayatyakhaNDavibhavaH kalyANalIlotsave mArtANDAnvayamaNDanashcha bhavatAdAviH sa rAmaH sadA || 70|| vidyutsphuranmakarakuNDaladIptachAru\- gaNDasthalaM maNikirITavirAjamAnam | pItAmbaraM jaladanIlamudArakIrtiM shrIrAmachandramanishaM kalayAmi chitte || 71|| karataladhR^itachApaM kAlameghasvarUpaM sarasijadalanetraM chAruhAsaM sugAtram | vichinuta vanavAse vikramodagraveShaM praNamata raghunAthaM jAnakIprANanAtham || 72|| yaH pR^ithvIbharavAraNAya divijaiH samprArthitashchinmayaH sa~njAtaH pR^ithivItale ravikule mAyAmanuShyo.avyayaH | nishchakraM hatarAkShasaM punaragAdbrahmatvamadya sthirAM kIrtiM pApaharAM vidhAya jagatAM taM jAnakIshaM bhaje || 73|| vishvodbhavasthitilayAdiShu hetumekaM mAyAshrayaM vigatamAyamachintyamUrtim | AnandasAndramamalaM nijabodharUpaM sItApatiM viditatattvamahaM namAmi || 74|| shrIrAmaM navaratnakuNDaladharaM shrIrAmarakShAmaNiM shrIrAmaM cha sahasrabhAnusadR^ishaM shrIrAmachandrodayam | shrIrAmaM shrutakIrtimAkaramahaM shrIrAmamuktipradaM shrIrAmaM raghunandanaM bhayaharaM shrIrAmachandraM bhaje || 75|| rAmaH pAtu sadaiva mAmaribhayAdrAmaM sadA bhAvaye rAmeNaiva hR^itaM mahattaratamo rAmAya nityaM namaH | rAmAnnAsti paraM padaM sulalitau rAmasya pAdau bhaje rAme prItiracha~nchalA.astu mama he shrIrAma mAM pAlaya || 76|| rAmamindIvarashyAmaM rAjIvAyatalochanam jyAghoShanirjitArAtiM jAnakIramaNaM bhaje || 77|| hatvA yuddhe dashAsyaM tribhuvanaviShamaM vAmahastena chApaM bhUmAvaShTabhya tiShThannitarakaradhR^itaM bhrAmayanbANamekam | AraktopAntanetre sharadalitavapuH koTisUryaprakAshaH vIrashrIbandhurA~NgastridashapatinutaH pAtu mAM vIrarAmaH || 78|| yuddhe sannaddhashastraM kapivarabhayadaM kumbhakarNaM surAriM bANenaikena sadyaH prakaTitahutabhugvishvaroShAruNAkSham | hatvA kR^itvA pramodaM surakapivitatermaunivR^indaikasevyaM vIrashrIbandhurA~NgastridashapatinutaH pAtu mAM vIrarAmaH || 79|| daiteyodagrasevyaM paTutaravishikhaM bhIShaNaM ghoranAdaM devendrastUyamAnaH sphuTavaranikarAnandhakAdIMshcha hatvA | dikpAlAn prApya bhogAn maNiruchisubhagAn dikShu tAn dApayitvA vIrashrIbandhurA~NgastridashapatinutaH pAtu mAM vIrarAmaH || 80|| kausalyAvIragarbhAmbudhighanavilasatpUrNachandraH pratApaH maunIndrasvAntapadmapravimalataruNIdharmanaipuNyarUDhaH | mArIchaM rAkShasendraM nijasharadahanAyAhutiM kalpayitvA vIrashrIbandhurA~NgastridashapatinutaH pAtu mAM vIrarAmaH || 81|| yo daNDakAraNyanishAcharendrAn kodaNDalIlAviShayIchakAra | vetaNDashuNDAyatabAhudaNDaH kodaNDapANiH kuladaivataM naH || 82|| taruNau rUpasampannau sukumArau mahAbalau | puNDarIkavishAlAkShau chIrakR^iShNAjinAmbarau || 83|| phalamUlAshanau dAntau tApasau dharmachAriNau | rakShaHkulanihantArau bhrAtarau rAmalakShmaNau || 84|| kalyANAnAM nidAnaM kalimaladahanaM pAvanaM pAvanAnAM pAtheyaM yanmumukShoH sapadi paramaprAptaye prasthitasya | vishrAmasthAnamekaM kavivaravachasAM jIvanaM sajjanAnam bIjaM dharmadrumasya prabhavati bhavatAM bhUtaye rAmanAma || 85|| kausalyAnayanenduM dasharathamukhAravindamArtANDam | sItAmAnasahaMsaM rAmaM rAjIvalochanaM vande || 86|| dIrghabAhumaravindalochanaM dInavatsalamanAtharakShaNam | dIkShitaM sakalalokarakShaNe daivataM dasharathAtmajaM bhaje || 87|| satyena lokA~njayati dInAndAnena rAghavaH | guruM shushrUShayA vIro dhanuShA yudhi shAtravAn || 88|| bharjanaM bhavabIjAnAmArjanaM sukhasampadAm | tarjanaM yamadUtAnAM rAmarAmeti garjanam || 89|| sakR^itpraNatarakShI yaH sAkShI yasya vibhIShaNaH | sAparAdhApratIkAraH sa shrIrAmo gatirmama || na jAne jAnakIjAne rAma tvannAmavaibhavam | sa vetti bhagavAnshambhuH vAlmIkirvetti vA na vA || 90|| kR^ityAkR^ityavivekahInamanasAM hatyAdibhirjIvinAM atyantaM bahutArakaM tanubhR^itAmatyanta rambhAdinA | satyAnandamayaM samasta nigamastutyAspadaM sampadAM sthAnaM shrIraghurAmanAmamamalaM nityaM smaranmuchyate || 91|| sAkete svaniketane suratarormUle lasadvedike haime ratnamayaM dadhAnamaparaM hastAmbujaM jAnuni | sItAM pArshvagatAM saroruhakarAM vidyunnibhAM rAghavaM pashyantaM paripUrNachandravadanaM bhAsvatkirITaM bhaje || 92|| vidyudvarNopamA~NgIM vikachadalamukhIM vidrumAbhAdharoShThIM vetaNDauddhatyakumbhapratikuchayugalAM vedimadhyAvataMsAm | shyAmAbhAM phullapadmachChadanibhanayanAM chAruhAsAM sunAsAM sItAM shrIrAmadevIM shritajanavaradAM chintaye.anantamUrtim || 93|| mANikyama~njIrapadAravindAM rAmArkavatphullamukhAravindAm | bhaktapradAtR^itvakarAravindAM devIM bhaje rAghavavallabhAM tAm || 94|| jayatu vijayakArI jAnakImodadhArI tapanakulavihArI daNDakAraNyachArI | dashavadanakuThArI daityavichChedakArI maNimukuTakadhArI chaNDakodaNDadhArI || 95|| chetaH sthitaM chintitachintanIyaM chintAharaM chintitapArijAtam | achintanIyaM bahu chintaye.ahaM tvAmeva rAmaM bhuvanAbhirAmam || 96|| sAkete sharadindukundadhavale saudhe mahAmaNDape paryastAgarudhUpadhUmapaTale karpUradIpojjvale | sugrIvA~NgadavAyuputrasahitaM saumitriNA sevitaM lIlAmAnuShavigrahaM raghupatiM rAmaM bhaje shyAmalam || 97|| rAmaH pitA rAghava eva mAtA rAmo.atha bandhushcha sakhA sakhI vA | rAmo gururme paramaM cha daivaM rAmaM vinA nAnyamahaM smarAmi || 98|| yA kR^ipA munisantrANe yA kR^ipA kapinAyake | yA vibhIShaNarakShAyAM sA rAma mama dIyatAm || 99|| dayAnidhe rAghava rAmachandra nirasva pApAni mamAbalAni | tvayyeva bhaktiM sudR^iDhAM prayachCha saiva prasUte hyakhilAnabhIShTAn || 100|| akShINabANatUNIraH samAropitakArmukaH | dashagrIvashirohartA shrIrAmaH sharaNaM mama || 101|| shrIrAma me tvaM hi pitA cha mAtA shrIrAma me tvaM hi suhR^ichcha bandhuH | shrIrAma me tvaM hi gururgariShThaH shrIrAma me tvaM hi samastameva || 102|| paTutarajalavAhadhvAnamAdAya chApaM pavanajavanavegaM bANamAkR^iShya tUNAt | abhayavachanadAyI sAnujaH sarvato me raNaharadanujendro rAmachandraH sahAyaH || 103|| kausalyAlasadAlavAlajanitaH sItAlatAli~NgitaH siktaH pa~Nktirathena sodaramahAshAkhAbhiratyunnataH | rakShastIkShNanidAghapATanapaTushChAyAbhirAnandakR^it yachChan vA~nChitasatphalAni bhavatu shrIrAmakalpadrumaH || 104|| nigamashishiraratnaM nityamAshAsyaratnaM jananutanR^iparatnaM jAnakIrUparatnam | bhuvanavalayaratnaM bhUbhujAmekaratnaM raghukulavaratnaM pAtu mAM rAmaratnam || 105|| vishAlanetraM paripUrNagAtraM sItAkalatraM suravairijaitram | kAruNyapAtraM jagataH pavitraM shrIrAmaratnaM praNato.asmi nityam || 106|| shrIrAmachandraH shritapArijAtaH samastakalyANa guNAbhirAmaH | sItAmukhAmbhoruhacha~ncharIko nirantaraM ma~NgalamAtanotu || 107|| indIvaradalashyAmaH puNDarIkanibhekShaNaH | dhR^itakodaNDatUNIro rAma eva gatirmama || 108|| ichChAmo hi mahAbAhuM raghuvIraM mahAbalam | gajena mahatA yAtaM rAmaM ChatrAvR^itAnanam || 109|| rAmo nAma babhUva huM tadabalA sIteti huM tau pituH vAchA pa~nchavaTIvane viharatastAmAharadrAvaNaH | nidrArthaM jananI kathAmiti harerhu~NkArataH shR^iNvatA saumitre kva dhanurdhanuriti vyagrA giraH pAtu naH || 110|| shrIrAmachandreti dayApareti bhaktipriyeti bhavabandhanamochaneti | nAtheti nAgashayaneti sadA stuvantaM mAM pAhi bhItamanishaM kR^ipaNaM kR^itaghnam || 111|| rAmachandracharitAmR^itapAnaM somapAnashatakoTisamAnam | somapAnashatakoTibhireva janma naiti raghunAyakanAmnA || 112|| rAma rAma dayAsindho rAmanAtha jagatpate | tvatpAdakamalAsaktirbhavejjanmani janmani || 113|| shrIrAghavaM rAmachandraM rAvaNAriM ramApatim | rAjIvalochanaM rAmaM taM vande raghunAyakam || 114|| yatpAdapa~NkajarajaH shrutibhirvimR^igyaM yannAbhiSha~NgajabhavaH kamalAsanaH syAt | yannAmasArarasiko bhagavAn purAriH taM rAmachandramanishaM hR^idi bhAvayAmi || 115|| yasyAvatAracharitAni viri~nchaloke gAyanti nAradamukhA bhavapadmajAdyAH | AnandajAshrupariShiktakuchAgrasImA vAgIshvarI cha tamahaM sharaNaM prapadye || rAmachandracharaNAravindayorantara~NgacharabhR^i~NgalIlayA | tatra santi cha rasAshchaturvidhAH mAkarandarasa eva pa~Nkaje || 117|| nAnAdivyAstratejaH sphuradamitabhujaH shatrusaMhAradhIraH kauTilyadyotamAnabhrukuTiyutamukhaM dhArayannambudAbhaH | tUNIradyustavegollasitasharavaraM tADayitvA dashAsyaM vIrashrIbandhurA~NgastridashapatinutaH pAtu mAM vIrarAmaH || 118|| jAtibhraShTo.api pApI paradhanaparadAreShu nityodyato yaH vAsteyI brahmahantA pitR^ivadhanirato yogivR^indApakArI | dhyeyaM karNAmR^itaM yaH paThati hi satataM rAmachandrasya bhakto yogIndrairapyalabhyaM padamapi labhate sarvadevaishcha sevyam || 119|| \section{chaturthAshvAsaH} shrIrAmaM janakAtmajAkuchataTI shrIgandhapa~Nkollasad vakShovIthimudAramAshritamuniM prAdurbhavatkalpakam | brahmeshAnamukhAmarastutamajaM brahmANDabhANDAdhipaM vande kosalakanyakAsutamahaM vArAshigarvApaham || 1|| sAkete maNinirmite pravilasatsaudhAyutAnAM shate antargehamatItabhAnunilaye cha~nchatpatAkojjvale | harmye bharmaghaNa~NghaNAghanaravadghaNTAshatairAvR^ite dolAtalpavihAriNaM raghupatiM sItAsametaM bhaje || 2|| sAkete saudhabaddhadhvajashatamahite rAjamArge vishAle ghaNTArAvairupete kanakakuthayute gandhanAge vasantam | vidyAkalpojjvalA~NgaM rathagajaturagairAvR^itaM suprasannaM rAmaM shvetAtapatrAvR^itamukhakamalaM chintayAmyantara~Nge || 3|| sAkete maNikoTibhiH sukhachite divyAmbarAla~NkR^ite hemastambhasahasrakoTighaTite tArApathAtyunnate | ramyasvarNamaye vichitrabhuvane divyantarikShe mudA rAmaM smeramukhAmbujaM raghupatiM sItAsametaM bhaje || 4|| sAkete maNitoraNA~nchitalasadvIthIshataprA~NgaNe sAnandaM bharatAdibhiH sahacharairatyantamodAnvitaiH | krIDantaM maNikandukaiH karagatairanyonyamatyujjvalaiH | paurastrInayanotsavaiH pratidinaM pUjyaM bhaje rAghavam || 5|| sAkete kanakAdrIshR^i~NgaghaTite kalpadrumairAvR^ite vaiDUryAdimaNIndrakAntighaTite devendranIlojjvale | kurvantaM maNinAyakaM maNigR^ihe mANikyapIThe bhaje putrau manmathasundarau kushalavau saMsevyapAdAvimau || 6|| sAkete jananIkarArpitalasatkastUrIkAsundare phAle mauktikajAlakaM shashinibhaM svarNA~NkitaM vartulam | chUDAlambamanoj~nahArakalitaM bibhrANamatyujjvalaM rAmaM kosalaputrikAvarasutaM sItAsametaM bhaje || 7|| sAkete sarayUjale.ativimale protphallapadmA~Nkite divyashrI shatakoTi nR^ityaruchire svargApagAsundare | pashyantIShu surA~NganAsu shapathaM krIDantamurvIsutAM bAhubhyAM vimalodakena ruchiraM sItAsametaM bhaje || 8|| kadA suratarusthale kanakamaNDape puShpake varAsanamupeyivAn vasudalAravindojjvale | kareNa hR^idayaspR^ishA kalitamudrachinmudrikaH mama sphuTatu vAsanAmanishamAttavIrAsanaH || 9|| nadIramaNabandhanaM matimatAmudAraM dhanaM jagadvihitarandhanaM sakalakAmaniShpandanam | viliptaharichandanaM vinutayAtasa~NkrandanaM bhajAmi raghunandanaM pavananandanasyandanam || 10|| raktAmbhoruhalochanaM kuvalayashyAmaM kapole dhanuH koTinyastakarAmbujaM dhR^itatanutrANaM jaTAmaNDitam | jetAraM kharadUShaNatrishirasAmAbaddhagodhA~Nguli\- trANaM mArgaNapurNatUNayugalaM kodaNDarAmaM bhaje || 11|| shrImatkalpadrumUle sakalamaNimaye maNTape puShpakAkhye tanmadhye sUryabimbadyutisarasiruhe shobhamAne.aShTapadme | pashyanniShTAM janakatanayAM vAmabhAgopasevyAM saumitriM bhAnuputraM pavanasutayutaM pAtu mAM rAmachandraH || 12|| vinIlajaladopamaM vimalachandrabimbAnanaM vinidramaNikuNDalaM vikachapuNDarIkekShaNam | vibhinna danujAdhipaM vidhR^itabANabANAsanaM vibhIShaNavarapradaM vijayarAmamIDe.anisham || 13|| rAjadrAjIvanetraM raghukulatilakaM ra~njitAsheShalokaM vAmA~NkAlokisItaM varakaradhanuShI kuNDaloddIptagaNDam | shyAmaM shAntaM prasannaM darahasitamukhaM vajrasiMhAsanasthaM rAmaM rAjatkirITaM ravishatavishadaM rAjarAjeshamIDe || 14|| bhadrAM vyAkhyAnamudrAM karasarasiruhe dakShiNe dhArayantaM savye jAnunyudAraM karamapi cha mudA dhArayantaM sphurantam | pashyantaM vAmabhAge karadhR^itakamalAM chitrabhUShAvisheShAM vaidehIM kA~nchanAbhAM stanabharanamitAM bhAvaye rAmachandram || 15|| vibudhaviTapimUle jAnakIlakShmaNAbhyAM sahitamanilavegaM bANamAdAya chApam | bahusharapaTutUNaM ramyapuShpopahAraM vibudhabharaNachittaM chintaye rAmachandram || 16|| jAnAti rAma tava svAmigatiM hanUmAn jAnAti rAma tava sakhyagatiM kapIshaH | jAnAti rAma tava yuddhagatiM dashAsyo jAnAti rAma dhanadAnuja eva satyam || he rAma he ramaNa he jagadekavIra he nAtha he raghupate karuNAlavAla | he jAnakIramaNa he jagadekabandho mAM pAhi dInamanishaM kR^ipaNaM kR^itaghnam || 18|| ayodhyAnAtha rAjendra sItAkAnta jagatpate | shrIrAma puNDarIkAkSha rAmachandra namo.astu te || 19|| dakShiNe lakShmaNo dhanvI vAmato jAnakI shubhA | purato mArutiryasya tannamAmi raghUttamam || 20|| rAmaM rAkShasamardanaM raghupatiM shakrArividhvaMsinaM sugrIvepsita rAjyadaM surapateH putrAntakaM shAr~NgiNam | bhaktAnAmabhayapradaM bhayaharaM pApaughavidhvaMsinaM sItAsevitapAdapadmayugalaM rAmaM bhaje shyAmalam || 21|| bhavabhayaharamekaM bhAnukoTiprakAshaM karadhR^itasharachApaM kAlameghAvabhAsam | kanakaruchiravastraM ratnavatkuNDalADhyaM kamalavishadanetraM sAnujaM rAmamIDe || 22|| rAmaM shyAmapayodanIlamamalaM rAjIvanetraM sadA\- .ahalyAshApanivAraNa praNayapAdAmbhojamurvIshvaram | vidyutkoTisahasradIdhitilasatkoTIramuktojjvalaM dhyAye tArakanAmamIshvarasakhaM daiteyavaMshApaham || 23|| dasharathasutamIshaM daNDakAraNyavAsaM shatamakhamaNinIlaM jAnakIprANalolam | sakalabhuvanamohaM sannutAmbhodadehaM bahulanutasamudraM bhAvaye rAmabhadram || 24|| sUryatIravane latAnivasane sadratnavedItaTe shrIparya~Nkatale videhasutayA sArdhaM parikrIDatA | kastUrIghanasArachandanamiladgandhollasatpAvanI pAyAnmUrtiranAmayI raghupaterbhadrAtmikA no.anisham || 25|| vaidehIpriyavallabhaM vijayinaM vAtAtmajAdhIshvaraM vANIvAridhivAnarAdivinutaM vandArumandArakam | vishvAmitravasiShThavAsavashivAvAgIshashashvannutaM deveshaM vinatAtmajAbhivinutaM vande sadA rAghavam || 26|| vishAlanetraM paripUrNagAtraM sItAkalatraM suravairijaitram | jagatpavitraM paramAtmatantraM shrIrAmachandraM praNamAmi chitte || 27|| saumitrimAnArNavapUrNachandra sItAlasallochanapUrNachandra | surArivaktrAmbudhipurNachandra saMrakSha mAM rAghava rAmachandra || 28|| yasya ki~nchidapi no haraNIyaM karma ki~nchidapi no charaNIyam | rAmanAma cha sadA smaraNIyaM lIlayA bhavajalaM taraNIyam || 29|| ri~NgamANamabhito gR^ihA~NgaNe bhR^i~NganIlamalakAvR^itAnanam | ma~Ngalapradamama~NgalApahaM sa~NgR^ihANa dasharathAtmajaM hR^idi || 30|| danujatimirabhAnuM tApasaishchintyamAnaM shamitakaluShachAraM sevake duShTadUram | dalitaviShamasAlaM daNDitArAtijAlaM praNama shikharishatruM bhavyapAthodagAtram || he gopAlaka he dayAkaranidhe he shambhuchApAkR^ivR^it te he daityAntaka he vibhIShaNadayApArINa he bhUpate | he vaidehasutAmanoj~navihR^ite he koTimArAkR^ite he navyAmbujanetra pAlaya paraM jAnAmi na tvAM vinA || 32|| sAkete praNavAbjaratnakhachite siMhAsane saMsthitaM vishvAmitravasiShThagAlavamukhairAshIrbhirAmoditam | pUjyaM pArshvagatAbjachArunayanaM vidyuchchalachchAmaraM vande komalasaMsmitAnanamilArakShAvatIrNaM harim || 33|| nityaM nirjitapa~NkasambhavamahonetrashriyaM rAghavaM rAmaM parvaNi chandrachAruvadanaM dikpAlakaiH sevitam | karpUrAgaru chandanArdra hR^idayaM mandAramAlA~NkitaM vidyutpu~njanibhAmbarAvR^itatanuM rAmaM bhaje shyAmalam || 34|| shrIrAmaM kushikAtmajasya vachanenAkR^iShya bANAsanaM mArIchaM cha subAhukaM sharayugenaivAhave lIlayA | kAntaM sundarakAkapakSharuchiraM saumitriNA saMstutaM pashyAmaH kamalAmukhe sakaruNaM kAlAmbudashyAmalam || 35|| AnandarUpaM varadaM prasannaM siMhAsane sevitapArijAtam | nIlotpalA~NgaM bhuvanaikamitraM rAmaM bhaje rAghavarAmachandram || 36|| yuddhe vasantamR^iduradbhutabANavarShai rAmaH prahArasamaye rajanIcharANAm | rakShAnukUlasamayAya vibhIShaNAya la~NkAdhipatyamadishadraghurAmachandraH || 37|| vedAntanAdaM sukR^itaikadAsaM hatAbhimAnaM tridashapradhAne | gajendrayAnaM vigatAvasAnaM shrIrAmachandraM satataM namAmi || 38|| shrIrAmachandraM dhR^itachApasAyakaM nIlotpalAbhaM nalinAyatekShaNam | saumitriNA sevitapAdapa~NkajaM sItAsametaM sharaNaM bhaje.aham || 39|| shrIrAmachandra karuNAkara dInabandho sItAsameta bharatAghraja rAghavesha | pApArtibha~njana bhayAturadInabandho pApAmbudhau patitamuddhara mAmanAtham || 40|| idaM sharIraM shatasandhijarjaraM patatyavashyaM pariNAmadurlabham | kimauShadhaM pR^ichChasi mUDha durmate nirAmayaM rAmakathAmR^itaM piva || 41|| dashamukhagajasiMhaM daityagarvAdaraMhaM kadanabhayadahastaM tArakabrahmashastam | maNikhachitakirITaM ma~njulAlApanAdaM dasharathakulachandraM rAmachandraM bhaje.aham || 42|| la~NkAvirAmaM raNara~NgabhImaM rAjIvanetraM raghuvaMshamitram | kAruNyamUrtiM karuNAprapUrtiM shrIrAmachandraM sharaNaM prapadye || 43|| shrIrAmachandramanishaM hR^idisthitaM shrIrAmaminduvadanaM pravibhAsam | bhAvayAmi nigamAntanivAsaM bhAratIpatinutaM bhavavandyam || 44|| kaumAre rAmachandraH kamalamR^idupadA shobhayan bhUmibhAgaM mAtushchAnandakArI marakatanikarAkAra indIvarAkShaH | utsa~Nge sanniviShTaH pituramaravaraiH stUyamAnopakArI nAnAla~NkArabhUShaH sphuratu mama sadA mAyayA rAma IshaH || 45|| sannaddhaH kavachI khaDgI chApabANadharo yuvA | gachChanmamAgrato nityaM rAmaH pAtu salakShmaNaH || 46|| sugrIvamitraM paramaM pavitraM sItAkalatraM navahemasUtram | kAruNyapAtraM shatapatranetraM shrIrAmachandraM shirasA namAmi || 47|| shrIrAghaveti ramaNeti raghUdvaheti rAmeti rAvaNahareti ramAdhaveti | sAketanAtha sumukheti cha suvrateti vANI sadA vadatu rAma hare hareti || 48|| jayatu jayatu rAmo jAnakIvallabho.ayaM jayatu jayatu rAmashchandrachUDArchitA~NghriH | jayatu jayatu vANInAthanAthaH parAtmA jayatu jayatu rAmo nAthanAthaH kR^ipAluH || 49|| varaM na yAche raghunAtha yuShmatpAdAbjabhaktiH satataM mamAstu | idaM priyaM nAtha varaM prayachCha punaH punastvAmidameva yAche || 50|| ambhodhiroShairaruNAyamAne nAthasya mR^iShTvA nayane raghUNAm | marudgaNaistatkShaNamAnusha~Nke mandAkinIma~NgalasUtrabha~NgaH || 51|| ambhodhismayabandhanena jagadAnandena bhUputrikA\- svAntAmbhobhavabAndhavena natarakShAyattachittena me | karNAlambitakuNDalena diviShAttrANodyamenAshrita\- shreyaH kalpalateva me matiriyaM rAmeNa saMvardhatAm || 52|| rAmAdau jananaM kumAragamanaM yaj~napratIpAlanaM shApAduddharaNaM dhanurvidalanaM sItA~NganodvAhanam | la~NkAyA dahanaM samudrataraNaM saumitrisammohanaM rakShaH saMharaNaM svarAjyabhavanaM chaitaddhi rAmAyaNam || 53|| janmAdau kraturakShaNaM munipateH sthANordhanurbha~njanaM vaidehIgrahaNaM pitushcha vachanAdghorATavIgAhanam | kodaNDagrahaNaM kharAdimathanaM mAyAmR^igachChedanaM baddhAbdhikramaNaM dashAsyanidhanaM chaitaddhi rAmAyaNam || 54|| pUrvaM rAmatapovanAnugamanaM hatvA mR^igaM kA~nchanaM vaidehIharaNaM jaTAyumaraNaM sugrIvasambhAShaNam | bAlInigrahaNaM samudrataraNaM la~NkApurIdAhanaM pashchAdrAvaNakumbhakarNakadanaM chaitaddhi rAmAyaNam || 55|| shAntaM shAradachandrakoTisadR^ishaM chandrAbhirAmAnanaM chandrArkAgnivikAsakuNDaladharaM chandrAvataMsastutam | vINApustakasAkShasUtravilasadvyAkhyAnamudrAkaraM deveshaM bharatAdibhiH parivR^itaM rAmaM bhaje shyAmalam || 56|| kR^iShTaM bhImadhanuH kaThoraninadaM brahmAdisaMvitsmayaM bhAsvadvAjigatena mArgamanishaM shAmbhoH shiraH kampanam | digdantiskhalanaM kulAdrichalanaM saptArNavonmIlanaM vaidehImadanaM madAndhadamanaM trailokyasammohanam || 57|| ka~njAtapatrAyatalochanAya karNAvataMsojjvalakuNDalAya | kAruNyapAtrAya suvaMshajAya namo.astu rAmAya salakShmaNAya || 58|| vidyunnibhAmbhodasuvigrahAya vidyAdharaiH saMstutasadguNAya | vIrAvatArAya virAdhahantre namo.astu rAmAya salakShmaNAya || 59|| saMsaktadivyAyudhakArmukAya samudragarvApaharAyudhAya | sugrIvamitrAya surArihantre namo.astu rAmAya salakShmaNAya || 60|| pItAmbarAla~NkR^itamadhyakAya pitAmahendrAmaravanditAya | pitre svabhaktasya janasya mAtre namo.astu rAmAya salakShmaNAya || 61|| namo namaste.akhilapUjitAya namo namashchandranibhAnanAya | namo namaste raghuvaMshajAya namo.astu rAmAya salakShmaNAya || 62|| imAni pa~ncharatnAni trisandhyaM yaH paThennaraH | sarvapApavinirmuktaH sa yAti paramAM gatim || 63|| shrIrAmaH kalpavR^ikSho me virAmaH sakalApadaH | abhirAmastrilokAnAM rAmaH kShemaM karotu naH || 64|| hR^idayasadayachittaM chittanAthaM guNAnAM udadhimuditanimnaM nimnagAla~NkR^itA~Nghrim | janakapatitanujAsvAntakAntotpalasya sphuraNakaraNachandraM rAmachandraM bhaje.aham || 65|| vadatu vadatu vANI rAma rAmeti nityaM japatu japatu nityaM rAmapAdAravindam | vadatu vadatu dehaH chintayedrAmachandraM na bhavatu mama pApaM janmajanmAntareShu || chApabANadharaH sItAkAmadaH kAntimAnnaraH | sItAlakShmaNasaMyuktaH pAtu mAM rAghaveshvaraH || 67|| prAtaH smarAmi raghunAthamukhAravindaM mandasmitaM madhurAbhAShi vishAlabhAlam | karNAvalambichalakuNDalagaNDabhAgaM karNAntadIrghanayanaM nayanAbhirAmam || 68|| prAtarbhajAmi raghunAthapadAravindaM rakShogaNAya bhayadaM varadaM nijebhyaH | yadrAjasaMsadi vibhidya maheshachApaM sItAkaragrahaNama~NgalamApa sadyaH || 69|| prAtarnamAmi raghunAthapadAravindaM padmA~NkushAdishubharekhashubhAvahaM me | yogIndramAnasamadhuvratasevyamAnaM shApApahaM sapadi gautamadharmapatnyAH || 70|| prAtarvadAmi vachasA raghunAthanAma vAgdoShahAri sakalaM kaluShaM nihatya | yatpArvatI svapatinA saha bhoktukAmA prItyA sahasraharinAmasamaM jajApa || prAtaH shraye shrutinutAM raghunAthamUrtiM nIlAmbudotpalasitetararatnanIlAm | AmuktamauktikavisheShavibhUShaNADhyAM dhyeyAM samastamunibhirnijabhR^ityamukhyaiH || 72|| yaH shlokapa~nchakamidaM niyataH paTheta nityaM prabhAtasamaye puruShaH prabuddhaH | shrIrAmaki~NkarajaneShu sa eva mukhyo bhUtvA prayAti harilokamananyalabhyam || 73|| kiM mantrairbahubhishcha duShkaraphalairAyAsadaistadvidAM ki~nchillopavidhAnamAtraviphalaiH saMsAraduHkhAvahaiH | ekaH sannapi sarvamantraphalado doShojjhitaH sarvadA shrIrAmaH sharaNaM mameti paramo mantro.ayamaShTAkSharaH || 74|| rAmabhadrAshrayaH sAkShAdrAmachandro na saMshayaH | tatra kodaNDatUNIrAvatra daNDakamaNDalU || 75|| raghunAtha padAravindayoste bhramarIbhUtamadAndhakArasUryaH | aparAdhashatAlayaM kalau mAmavagR^ihNAti hi ma~NgalaiH kaTAkShaiH || 76|| rAmanAma tava nAma japantaH pAmarA api taranti bhavAbdhim | a~Ngasa~Ngibhavada~NgulimudraH kiM vichitramataratkapirabdhim || 77|| shrIrAmanAmAmR^itamantrabIjaM sa~njIvanaM chenmanasi pratiShTham | hAlAhalaM vA pralayAnalaM vA mR^ityormukhaM vA vitathIkaroti || 78|| hA kR^iShNAchyuta hA kR^ipAlaya hare hA pANDavAnAM sakhe kvAsi kvAsi suyodhanAvaragatAM hA rakSha mAM draupadIm | ityuktau kShayavastrarakShaNatanuryo.arakShadAshu kShaNe\- nArttatrANaparAyaNaH sa bhagavAnnArAyaNo me gatiH || 79|| indIvaradalashyAmamindukoTi nibhAnanam | kandarpakoTilAvaNyaM vande.ahaM raghunandanam || 80|| kiM yogashAstraiH kimasheShavidyayA kiM yAgaga~NgAdivisheShatIrthaiH | kiM brahmacharyAshramasa~nchareNa bhaktirnachette raghuvaMshakIrtyAm || 81|| he rAma bhadrAshraya he kR^ipAlo he bhaktalokaikasharaNyamUrte | punIhi mAM tvachcharaNAravindaM jagatpavitraM sharaNaM mamAstu || 82|| he rAma bhadrAshraya yogichandra prasannamUrtau paridR^ishyamAne | tApatrayaM nAshamupaiti puMsAM mamAndhakAraM vinihantu nadyaH || 83|| nIlAbhravR^inda nikhilesha jagannivAsa rAjIvanetra ramaNIya guNAbhirAma | shrIrAma daityakulamardana rAmachandra tvatpAdapadmamanishaM kalayAmi chitte || 84|| kuvalayadalanIlaH pItavAsAH smitAsyo vividharuchirabhUShAbhUShito divyamurtiH | dasharathakulanAtho jAnakIprANanAtho nivasatu mama chitte sarvadA rAmachandraH || 85|| sajalajaladanIlaM sanmunistutyalIlaM sugamanigamamUlaM yAtudhAnAntakAlam | dasharathanR^ipabAlaM satkR^ipApUrNalIlaM bhajatu bhuvanakhelaM bhaktasaMstutyashIlam || 86|| dasharathavaraputraM jAnakIsatkalatraM dashamukhaharadakShaM padmapatrAyatAkSham | karadhR^itasharachApaM chArumuktAkalApaM raghukulanR^ipavarNyaM rAmamIDe sharaNyam || 87|| rAmaM vIrAsanasthaM vimalaravinibhaM bhAsamAnasvarUpaM shyAmaM sItAsametaM smitaruchiramukhaM kuNDaloddIptagaNDam | shrIvatsaM shrInivAsaM suraviTapitaTanyastasiMhAsanasthaM divyAkalpojjvalA~NgaM divijapatinutaM dhyAnayaj~nena yakShye || 88|| shrIrAmabhadrAshrayasadgurUNAM pAdAravindaM bhajatAM narANAm | ArogyamaishvaryamanantakIrtiM ante cha viShNoH padamasti satyam || 89|| raNahatadanujendro rAjarAjAtmachandraH samadaripumR^igendraH sanmano.ambhodhichandraH | lalitaghananagendro lakShmaNAnandasAndro mahitasujanachandro maithilIprANachandraH || 90|| namaH kodaNDahastAya sandhIkR^itasharAya cha | daNDitAkhiladaityAya rAmAyApannivAriNe || 91|| na jAnan jAnakIjAnau rAme tattvamapi prabhau | dhik kuryAdyamadUtAn sa yo narastattvamIhate || 92|| rAmo me hR^idi sannidhiM ramayatAM rAmaM bhaje duShkR^itaM rAmeNApahR^itaM namo bhagavate rAmAya rAmAchChubham | vakShye shrIraghunandanasya sukR^iterdAsosmyahaM sarvadA nityaM kosalakanyakApriyasute rAme mano vartatAm || 93|| kodaNDanirmuktasharAgrakhaNDanaM prachaNDaviShvagbhujadaNDamaNDanam | prachaNDachaNDAMshusamAnamaNDanaM bhajAmi rAmaM raNara~NgamaNDanam || 94|| siMhAsanasthaM munisiddhasevyaM raktotpalAla~NkR^itapAdapadmam | sItAsametaM shashisUryanetraM rAmaM bhaje rAghavarAmachandram || 95|| dayArUpe bhUpe raghukulakalApe suhR^idaye bhujastambhe dambhetaravijayagumbhe viharatAm | mahAvIre dhIre dasharathakumAre parisarad guNArAme rAme dashamukhavirAme mama manaH || 96|| gateShvanekeShu bhaveShu pApavrateShvamUrteShu na yogitIrtheH | vitrastasarveShu nR^iNAM kuleshe sa~njAyate bhaktiranantamIDe || 97|| shrIrAmabhadrAshritayogivarya pAdAbjayugmaM satataM bhaje.aham | yachchakShuShI dhAma janapraveshaM tachchakShuShI pashyati yasya chetaH || 98|| na grastastamasA na chAhni malino darshena no karshito naivAstaM gatavAn na chA~Nkitatanurno pAkShikashrIrapi | lokAlokanagendrala~Nghanavidhau no pa~NgubhAva~Ngato nirdoSho guNasAgaradraghupatestejo yashashchandramAH || 99|| nAgAnAmayutaM tura~NganiyutaM sArthaM rathAnAM shataM pAdAtAH shatakoTiyuddhadalitA nR^ityatkabandho raNe | evaM koTisahasranartanavidhau cha~nchachchaladghaNTikA yAmArdhaM paramAtmano raghupateH kodaNDaghaNTAravaH || 100|| bhajehaM sadA rAmamindIvarAbhaM bhavAraNyadAvAnalAbhAbhidheyam | bhavAnIhR^idA bhAvitAnandarUpaM bhavAbhAvahetuM bhavAnIprasannam || 101|| surAnIka duHkhaughanAshaika hetuM narAkAradehaM nirAkAramIDyam | pareshaM parAnandarUpaM vareNyaM hariM rAmamIshaM bhaje bhAranAsham || 102|| prapannAkhilAnandadohaprapannaM prapannArtiniHsheShanAshAbhidhAnam | tapoyogayogIshabhAvAbhibhAvyaM kapIshAdimitraM bhaje rAmachandram || 103|| sphuradratnakeyUra hArAbhirAmaM dharAbhArabhUtAsurAnIkadAvam | sharachchandravaktraM lasatpadmanetraM durAsAdyapAraM bhaje rAmachandram || 104|| surAdhIshanIlAbhanIlA~NgakAntiM virAdhAdirakShogaNAnIkanAsham | kirITAdishobhaM purArAtilAbhaM bhaje rAmachandraM raghUnAmadhIndram || 105|| lasachachchandrakoTiprakAshAdi pIThe samAsInama~Nke samAdAya sItAm | sphuraddhemavarNAM lasatka~njapu~njAM bhaje rAmachandraM nivR^ittyAditantram || 106|| sadA bhogabhAjAM sudUre vibhAntaM mudA yogabhAjAmadUre vibhAntam | chidAnandakandaM sadA rAghAveshaM videhAtmajAnandakandaM prapadye || 107|| mahAyogamAyAvisheShAnuyukto vibhAsIsha lIlAnarAkAravR^ittiH | tvadAnandalIlAkathApUrNakaNThAH sadAnandarUpA bhavantIha loke || 108|| yasya prANanivAraNAvanakR^ite syAtAM nidAnau vibhoH aindradhvA~NkShapateH kR^ipAjalanidhau kopaprasAdau mude | bhUyAdvAsavanIlasannibhatanurvAmA~NkasevyadvadhUH so.ayaM duShTanishATapATanapaTuH shrIrAghavo naH sadA || 109|| dR^iShTo vA kaluShAtmako.api pishuno durmArgasa~nchAri vA mAtR^ighno.api pitR^ighnavartanarataH sanmauninindAparaH | yo.ayaM smR^ityamR^itaM tathA madhurasaM vaktA cha shretA likhet sa prApnoti nirantaraihikasukhaM nirvANa saukhyaM tataH || 110|| iti shrIrAmakarNAmR^itaM sampUrNam | ## Proofread by PSA Easwaran \medskip\hrule\obeylines Please send corrections to sanskrit at cheerful dot c om Last updated \today https://sanskritdocuments.org \end{document}