सङ्कटमोचन श्रीरामाष्टकम्
श्रीरघुनन्दन-पङ्कजलोचन मुक्तिमहाजन-रावणहारी
त्वं विभुशङ्कर-सर्वचराचर-धर्मविशारद-दैत्यविदारी ।
पाहि दयामय-कार्म्मुकशोभन-भूमिसुताधर-नीलशरीरी
सङ्कटमोचन-कोशलवन्दन लक्ष्मणपूर्वज-रामविहारी ॥ १॥
शान्तसुकोमल-नीरजसुन्दर-बन्धुविभीषण-पालनकारी
सूर्यकुलोद्भव-दाशरथिप्रिय-भारतभूषण-विश्वविहारी ।
वानर-भल्लुक-सेवित हे खर-दूषणदानव-मारणकारी
भक्तिमती-शबरी-कुलपालक-धीवरतारक-राक्षसवैरी ॥ २॥
ब्रह्म-दिवाकर-वह्निविनायक-वासववन्दित-शीतलवारि
पाशि-महेश-सुरार्चित-पङ्कज-पादमनोहर-हैमविधारी ।
दुर्गतिनाशन-दुःखविनाशन-मोहमहार्णव-तारणकारी
हे रघुनायक-कष्टविमोचक-संसृतितारक-जीवनधारी ॥ ३॥
मैथिलचर्चित-शङ्करकोदण्ड-खण्डित-मण्डित-दण्डकचारी
पञ्चवटीवन-चारणशेखर-पैतृकसत्य-सुपालनकारी ।
बालिविनाशन-अङ्गदभाजन वानरपुङ्गव-भक्तिविधारी
आदर्शशासक-घोषितराघव-विश्वजनाश्रय-पोषणकारी ॥ ४॥
हे करुणामय-भागवतोत्तम-नीलकलेवर-धारणकारी
भक्तिमहाधन-दायक-मायिक-मानवपुङ्गव-गोलकचारी ।
नाथमहाप्रभु-विश्वसुरेश्वर-सार्थकभारत-भूमिविहारी
वैष्णवनायक-नाममहासुख-गायक-पार्वण-सौख्यविधारी ॥ ५॥
गौतम-कौशिक-ऋषिगणार्चित-भार्गवदर्प-विखण्डनकारी
दुष्टदशानन-मूलविनाशन-कौणपसङ्घ-विघातनभूरिः ।
वानरयूथ-महाबल-धारक-गैरिकवस्त्र-विधारणकारी
श्यामल-सुन्दर-नित्य-निरञ्जन-देवगणेश्वर-विष्णुमुरारिः ॥ ६॥
मञ्जुलदर्शन-कञ्जसुलोचन-निकुञ्जमोहन-धामविहारी
पिञ्जमहाधन-मानवरञ्जन-सज्जनमज्जन-पौरुषभारी ।
दानवपञ्जर-पातितदारुण-युद्धमहाजय-घोषविधारी
वैष्णवशस्त्र-विधारणशेखर-कालमहानल-नाशनकारी ॥ ७॥
अक्षयकीर्ति-गुणाश्रयकल्पित-कामविताडन-कल्मषहारी
दक्षनरेश्वर-मुक्तिसुरेश्वर-कारणकार्य-विशेषविधारी ।
भावविनोद-कलाकरमालिक-जूटसुशोभन-स्वस्तिकधारी
नीलवलाहक-मूर्तिमनोहर-तीर्थनियामक-यज्ञविहारी ॥ ८॥
इति नन्दप्रदीप्तकुमारविरचितं सङ्कटमोचन श्रीरामाष्टकं सम्पूर्णम् ।
Composed by Dr. Pradipta Kumar Nanda, Kendrapara, Orisa pknanda65 at gmail.com