Shri Bana Ashtakam

 श्रीबाणाष्टकम् 
श्रीमत्कपर्दितटिनीतटशोभनाय
      शीतांशुरेखपरिकल्पितशेखराय ।
नित्याय निर्मलगुणाय निरञ्जनाय
      नीहारहारधवलाय नमः शिवाय ॥ १॥

डिण्डीरपिण्डपरिपाण्डुरविग्रहाय
      दीव्यज्जटापटलमण्डितमस्तकाय ।
नागेन्द्रकृत्तिवसनाय निरामयाय
      नारायणप्रियतमाय नमः शिवाय ॥ २॥

दर्वीकराकलितकुण्डलमध्यमानं (मण्ड्यमान)
      गण्डाय चण्डसुरशात्रवदण्डनाय ।
आखण्डलादिसुरमण्डलमध्यमान (वन्द्यमान)
      पादाम्बुजाय वरदाय नमः शिवाय ॥ ३॥

कालान्तकाय कमलासनपूजिताय
      कल्याणशैलपरिकल्पितकार्मुकाय ।
कन्दर्पदर्पदहनाय कलाधराय
      कारुण्यपुण्यनयनाय नमः शिवाय ॥ ४॥

विश्वेश्वराय वृषभोत्तमवाहनाय
      विध्वस्तदक्षविहरा(विहिता)ध्वरविभ्रमाय ।
गङ्गाधराय गजदानवमर्दनाय
      दोर्दण्डदण्डविभवाय नमः शिवाय ॥ ५॥

सोमानलार्कपरिकल्पितलोचनाय
      सोमार्कवह्निमुनिपुङ्गवसेविताय ।
भूतेश्वराय भुवनत्रयनायकाय
      भूत्यङ्गरागशुभदाय नमः शिवाय ॥ ६॥

नानाविधागमरहस्यविबोधकाय
      स्वीयानुभावपरिकल्पितभावनाय ।
भक्तार भक्तिविवशान्मलनाशनाय
      स्वर्गापवर्गसुखदाय नमः शिवाय ॥ ७॥

लोकत्रयाध्व(घ)हरणोत्सुकमानसाय
      लोकत्रयार्चितपदाय जगन्मयाय ।
श्रीभट्टबाणकविसूक्तिविराजिताय
      कैवल्यदाननिपुणाय नमः शिवाय ॥ ८॥

॥ इति श्रीबाणाष्टकं सम्पूर्णम् ॥


Proofread by Aruna Narayanan