ब्रह्माण्डमहापुराणे ब्रह्माविष्णूकृता शिवस्तुतिः
नमोऽस्तु ते लोकसुरेश देव नमोऽस्तु ते भूतपते महात्मन् ।
नमोऽस्तु ते शाश्वतसिद्धयोगिने नमोस्तु ते सर्वजगत्प्रतिष्ठित ॥ १॥
परमेष्ठी परं ब्रह्म त्वक्षरं परमं पदम् ।
ज्येष्ठस्त्वं वामदेवश्च रुद्रः स्कन्दः शिवः प्रभुः ॥ २॥
त्वं यज्ञस्त्वं वषट्कारस्त्वमोङ्कारः परन्तपः ।
स्वाहाकारो नमस्कारः संस्कारः सर्वकर्मणाम् ॥ ३॥
स्वधाकारश्च यज्ञश्च व्रतानि नियमास्तथा ।
वेदा लोकाश्च देवाश्च भगवानेव सर्वशः ॥ ४॥
आकाशस्य च शब्दस्त्वं भूतानां प्रभवाप्ययः ।
भूमौ गन्धो रसश्चाप्सु तेजोरूपं महेश्वरः ॥ ५॥
वायोः स्पर्शश्च देवेश वपुश्चन्द्रमसस्तथा ॥ ६॥
बुद्धौ ज्ञानं च देवेश प्रकृतेर्बीजमेव च ॥ ७॥
संहर्त्ता सर्वलोकानां कालो मृत्युमयोऽन्तकः ।
त्वं धारयसि लोकांस्त्रींस्त्वमेव सृजसि प्रभो ॥ ८॥
पूर्वेण वदनेन त्वमिन्द्र त्वं प्रकरोषि वै ।
दक्षिणेन तु वक्त्रेण लोकान्सङ्क्षिपसे पुनः ॥ ९॥
पश्चिमेन तु वक्त्रेण वरुणस्थो न संशयः ।
उत्तरेण तु वक्त्रेण सोमस्त्वं देवसत्तमः ॥ १०॥
एकधा बहुधा देव लोकानां प्रभवाप्ययः ।
आदित्या वसवो रुद्रा मरुतश्च सहाश्विनः ॥ ११॥
साध्या विद्याधरा नागाश्चारणाश्च तपोधनाः ।
वालखिल्या महात्मानस्तपः सिद्धाश्च सुव्रताः ॥ १२॥
त्वत्तः प्रसूता देवेश ये चान्ये नियतव्रताः ।
उमा सीता सिनीवाली कुहूर्गायत्र्य एव च ॥ १३॥
लक्ष्मीः कीर्त्तिर्धृतिर्मेधा लज्जा कान्तिर्वपुः स्वधा ।
तुष्टिः पुष्टिः क्रिया चैव वाचां देवी सरस्वती ।
त्वत्तः प्रसूता देवेश सन्ध्या रात्रिस्तथैव च ॥ १४॥
सूर्यायुतानामयुतप्रभाव नमोऽस्तु ते चन्द्रसहस्रगौर ।
नमोऽस्तु ते वज्रपिनाकधारिणे नमोस्तु ते सायकचापपाणये ॥ १५॥
नमोऽस्तु ते भस्मविभूषिताङ्ग नमोऽस्तु ते कामशरीरनाशन ।
नमोऽस्तु ते देव हिरण्यगर्भ नमोऽस्तु ते देव हिरण्यवाससे ॥ १६॥
नमोऽस्तु ते देव हिरण्ययोने नमोऽस्तु ते देव हिरण्यनाभ ।
नमोऽस्तु ते देव हिरण्यरेतसे नमोऽस्तु ते नेत्रसहस्रचित्र ॥ १७॥
नमोऽस्तु ते देव हिरण्यवर्ण नमोऽस्तु ते देव हिरण्यकेश ।
नमोऽस्तु ते देव हिरण्यवीर नमोऽस्तु ते देव हिरण्यदायिने ॥ १८॥
नमोऽस्तु ते देव हिरण्यनाथ नमोऽस्तु ते देव हिरण्यनाद ।
नमोऽस्तु ते देव पिनाकपाणे नमोऽस्तु ते शङ्कर नीलकण्ठ ॥ १९॥
॥ इति ब्रह्माण्डमहापुराणे ब्रह्माविष्णूकृता शिवस्तुतिः ॥
॥ ब्रह्माण्डमहापुराणम् । वायुप्रोक्तं पूर्वभागः । अनुषङ्गपादः - २।
अध्यायः २६ - लिङ्गोत्पत्तिकथनम् । ३२-५०॥
.. brahmANDamahApurANam . vAyuproktaM pUrvabhAgaH . anuSha~NgapAdaH - 2.
adhyAyaH 26 - li~Ngotpattikathanam . 32-50..
Encoded and proofread by Ruma Dewan