श्रीचिदम्बरेश्वरवन्दनस्तवः
वन्दे शम्भुमुमापतिं सुरगुरुं वन्दे जगत्कारणं
वन्दे पन्नगभूषणं मृगधरं वन्दे पशूनां पतिम् ।
वन्दे सूर्यशशाङ्कवह्निनयनं वन्दे मुकुन्दप्रियं
वन्दे भक्तजनाश्रयञ्च वरदं वन्दे शिवं शङ्करम् ॥ १॥
वन्दे सर्वजगद्विहारमतुलं वन्दे करित्वग्धरं
वन्दे देवशिखामणिं शशिनिभं वन्दे हरेर्वल्लभम् ।
वन्दे पर्वतकन्यकार्धवपुषं वन्दे परं चिन्मयं
वन्दे भक्तजनाश्रयञ्च वरदं वन्दे शिवं शङ्करम् ॥ २॥
वन्दे व्योमसभापतिं नटपतिं वन्देऽर्कदन्तापहं
वन्दे निर्मलमादिभूतमनिशं वन्दे मखध्वंसिनम् ।
वन्दे नित्यमगेन्द्रजाप्रियकरं वन्देऽतिशान्ताकृतिं
वन्दे भक्तजनाश्रयञ्च वरदं वन्दे शिवं शङ्करम् ॥ ३॥
वन्दे भूरथमम्बुजाक्षविशिखं वन्दे त्रयीवाजिनं
वन्दे शैलशरासनं फणिगुणं वन्देऽब्धितूणीरकम् ।
वन्दे पद्मजसारथिं पुरहरं वन्दे महाभैरवं
वन्दे भक्तजनाश्रयञ्च वरदं वन्दे शिवं शङ्करम् ॥ ४॥
वन्दे पञ्चमुखाम्बुजं त्रिणयनं वन्दे ललाटेक्षणं
वन्दे व्योमकचं जटासुमकुटं वन्देऽब्जगङ्गाधरम् ।
वन्दे मारहरं त्रिपुण्ड्रनिटिलं वन्देऽष्टमूर्त्यात्मकं
वन्दे भक्तजनाश्रयञ्च वरदं वन्दे शिवं शङ्करम् ॥ ५॥
वन्दे राजतपर्वताग्रनिलयं वन्दे सुराधीश्वरं
वन्दे निर्गुणमप्रमेयममलं वन्दे यमद्वेषिणम् ।
वन्दे कुण्डलिराजकुण्डलधरं वन्दे सहस्राननं
वन्दे भक्तजनाश्रयञ्च वरदं वन्दे शिवं शङ्करम् ॥ ६॥
वन्देऽनन्तरविप्रकाशमगुणं वन्देऽन्धकस्यान्तकं
वन्दे पद्मजविष्णुगर्वकुलिशं वन्दे दयाम्भोनिधिम् ।
वन्दे चित्सभमीश्वरं सुरनुतं वन्दे त्रिमूर्त्यात्मकं
वन्दे भक्तजनाश्रयञ्च वरदं वन्दे शिवं शङ्करम् ॥ ७॥
वन्देऽपस्मृतिशिक्षकं विषहरं वन्दे मृडं धूर्जटिं
वन्दे विप्रवरैस्सुपूजितपदं वन्दे भवोत्तारकम् ।
वन्दे धर्ममुखार्थदं श्रुतिनुतं वन्दे गुरूणां गुरुं
वन्दे भक्तजनाश्रयञ्च वरदं वन्दे शिवं शङ्करम् ॥ ८॥
शार्दूलाङ्घ्रिमहर्षिणा विरचितं सङ्कीर्तयेद्वन्दन-
स्तोत्रं तद्गतनामभिर्यजति यश्शम्भुं सभायाः पतिम् ।
सन्ध्यासु प्रतिवासरं सुनियतो धर्मादि सत्सम्पदो
लब्ध्वेहेन्दुकलाधरस्य सचिवो भूत्वा स च क्रीडति ॥ ९॥
इति श्रीव्याघ्रपादमुनीन्द्रविरचितः श्रीचिदम्बरेश्वरवन्दनस्तवः सम्पूर्णः ।
(Verses 1-5 follow shivastutiH vande shivaM
Rest differ so this may be included as a separate. )
Proofread by Aruna Narayanan