श्रीधर्मपुरीरामलिङ्गेश्वर मङ्गलाशासनम्
अथ श्री धर्मपुरीरामलिङ्गेश्वर मङ्गलाशासनम्
एकस्मै जगतां भर्त्रे ह्यनेकाकृतिशोभने ।
मङ्गलं धर्मपूर्वास ! रामलिङ्गेश्वराय ते ॥ १॥
द्विजिह्व गलभूषाय द्विजेन्द्राश्रितमौलये ।
मङ्गलं धर्मपूर्वास ! रामलिङ्गेश्वराय ते ॥ २॥
त्रिनेत्राञ्चितरूपाय त्रिशूलायुधधारिणे ।
मङ्गलं धर्मपूर्वास ! रामलिङ्गेश्वराय ते ॥ ३॥
चतुरास्यसुसेव्याय चतुर्वेदस्वरूपिणे ।
मङ्गलं धर्मपूर्वास ! रामलिङ्गेश्वराय ते ॥ ४॥
पञ्चास्यशोभिने तस्मै पञ्चबाणविमर्दिने ।
मङ्गलं धर्मपूर्वास ! रामलिङ्गेश्वराय ते ॥ ५॥
षड्दर्शनैः सुवेद्याय षडानननुताय च ।
मङ्गलं धर्मपूर्वास ! रामलिङ्गेश्वराय ते ॥ ६॥
सप्तर्षिवर्यगीताय सप्ताश्वरथचक्षुषे ।
मङ्गलं धर्मपूर्वास ! रामलिङ्गेश्वराय ते ॥ ७॥
अष्टमूर्तिस्वरूपाय ह्यष्टैश्वर्य प्रदायिने ।
मङ्गलं धर्मपूर्वास ! रामलिङ्गेश्वराय ते ॥ ८॥
नवग्रहाणां शास्त्रे च नव द्रव्यात्मकाय च ।
मङ्गलं धर्मपूर्वास ! रामलिङ्गेश्वराय ते ॥ ९॥
दशदिग्व्याप्तदेहाय दशास्येन नुताय च ।
मङ्गलं धर्मपूर्वास ! रामलिङ्गेश्वराय ते ॥ १०॥
एकादशात्मरुद्राय ह्येकादशाघनाशिने ।
मङ्गलं धर्मपूर्वास ! रामलिङ्गेश्वराय ते ॥ ११॥
दाक्षायणी प्रियङ्कर्त्रे दक्षयज्ञविनाशिने ।
मङ्गलं धर्मपूर्वास ! रामलिङ्गेश्वराय ते ॥ १२॥
पार्वतीहृतदेहाय पर्वताग्रनिवासिने ।
मङ्गलं धर्मपूर्वास ! रामलिङ्गेश्वराय ते ॥ १३॥
यतीन्द्रप्रवारा यं हि नित्यं ध्यायन्ति तत्पराः ।
मङ्गलं धर्मपूर्वास ! रामलिङ्गेश्वराय ते ॥ १४॥
मयाहि कोरिडे कुलीन विश्वनाथशर्मणा
मुदा कृतं तु रामलिङ्ग सुप्रभात सेवनम् ।
शिवाय चास्तु मोदकं प्रपाठकाय मोक्षदं
भवेन्नुताय शङ्करं सदा ह्यरिष्ट नाशकम् ॥ १५॥
श्री धर्मपुरवास्तव्य कोर्डे वंशोद्भवेन हि ।
राजन्नशास्त्रि पुत्रेण विश्वनाथेन शर्मणा ॥ १६॥
कृता हि वाङ्मयी पूजा शिवानुग्रहकाङ्क्षिणा ।
शिवाय प्रीतिदा भूयात् पाठकाय शिवङ्करी ॥ १७॥
इति संस्कृतसाहित्यरत्नपदलाञ्छनस्य,
बुधकोटिनुतस्य, प्रथितकविपण्डितगणाग्रणीवरस्य,
अखिलशिष्यकोटिवृन्दार्चितपादपद्मयुगलस्य,
आचार्यकोरिडेराजन्नशास्त्रिणः द्वितीयपुत्रेण कोरिडे विश्वनाथ शर्मणा
विरचिता श्रीधर्मपुरीरामलिङ्गेश्वर वाङ्मयीपूजा समाप्ता ॥
Composed by Koride Vishwanatha Sharma, Dharmapuri, Telangana
Proofread by Koride Vishwanatha Sharma.