व्यासकृतं कैलासमहिमावर्णनम्
स नैव तपसा प्राप्यो घोरेणाप्यमितेन वा ।
नान्यैरपीति लोकेषु कैलासः परमो मतः ॥ १॥
न देवेषु यथा देवो मदन्योऽप्यधिकस्तथा ।
तथा सर्वेषु देशेषु कैलासस्त्वाधकाधिकः ॥ २॥
यथा गोक्षीरमधिकं क्षीरेषु विविधेष्वपि ।
तथा सर्वेषु देशेषु कैलासस्त्वाधकाधिकः ॥ ३॥
मधुरेषु यथा श्रेष्ठा मधुरा सिकशर्करा ।
तथा सर्वेषु देशेषु कैलासस्त्वाधकाधिकः ॥ ४॥
यथा घृतेषु सर्वेषु गोघृतं सुमनोहरम् ।
तथा सर्वेषु देशेषु कैलासस्त्वाधकाधिकः ॥ ५॥
परमान्नं यथान्नेषु सर्वेष्वप्यधिकं श्रुतम् ।
तथा सर्वेषु देशेषु कैलासस्त्वाधकाधिकः ॥ ६॥
यथा तरुषु सर्वेषु श्रेष्ठो बिल्वतरुः श्रुतः ।
तथा सर्वेषु देशेषु कैलासस्त्वाधकाधिकः ॥ ७॥
यथा फलेषु सर्वेषु श्रीफलस्य फलं वरम् ।
तथा सर्वेषु देशेषु कैलासस्त्वाधकाधिकः ॥ ८॥
यथा सर्वेषु वस्त्रेषु दुकूलं चित्रितं वरम् ।
तथा सर्वेषु देशेषु कैलासस्त्वाधकाधिकः ॥ ९॥
भूषणेषु यथा श्रेष्ठं भव्यं रुद्राक्षभूषणम् ।
तथा सर्वेषु देशेषु कैलासस्त्वाधकाधिकः ॥ १०॥
अङ्गरागेषु सर्वेषु श्रेष्ठा भूतिः श्रुतिस्तथा ।
तथा सर्वेषु देशेषु कैलासस्त्वाधकाधिकः ॥ ११॥
यथा नरेषु सर्वेषु शाङ्करः पुरुषोत्तमः ।
तथा सर्वेषु देशेषु कैलासस्त्वाधकाधिकः ॥ १२॥
यथा नारीषु सर्वासु नारीरत्नं गिरीन्द्रजा ।
तथा सर्वेषु देशेषु कैलासस्त्वाधकाधिकः ॥ १३॥
यथा तीर्थेषु सर्वेषु शिवलिङ्गपरम्परा । (शिवगङ्गा परं वरा)
तथा सर्वेषु देशेषु कैलासस्त्वाधकाधिकः ॥ १४॥
सरोवरेषु सर्वेषु यथा रुद्रसरोवरम् ।
तथा सर्वेषु देशेषु कैलासस्त्वाधकाधिकः ॥ १५॥
यथा पुरेषु सर्वेषु पुरं काशीपुरं परम् ।
तथा सर्वेषु देशेषु कैलासस्त्वाधकाधिकः ॥ १६॥
यथा वापीषु सर्वासु ज्ञानवापी मनोहरा ।
तथा सर्वेषु देशेषु कैलासस्त्वाधकाधिकः ॥ १७॥
मुक्तिमण्टपमुत्कृष्टं मण्टपेषु यथा मतम् ।
तथा सर्वेषु देशेषु कैलासस्त्वाधकाधिकः ॥ १८॥
यथा वैश्वेश्वरं लिङ्गं लिङ्गेषु श्रेष्ठमुच्यते ।
तथा सर्वेषु देशेषु कैलासस्त्वाधकाधिकः ॥ १९॥
यथा मूर्तिषु सर्वासु दक्षिणामूर्तिरुत्तमा ।
तथा सर्वेषु देशेषु कैलासस्त्वाधकाधिकः ॥ २०॥
यथा गिरिषु सर्वेषु श्रेष्ठो हिमगिरिः स्मृतः ।
तथा सर्वेषु देशेषु कैलासस्त्वाधकाधिकः ॥ २१॥
यथा नदीषु सर्वासु नर्मदा शर्मदा सदा ।
तथा सर्वेषु देशेषु कैलासस्त्वाधकाधिकः ॥ २२॥
यथा मुनिषु सर्वेषु श्रेष्ठः कलशसम्भवः ।
तथा सर्वेषु देशेषु कैलासस्त्वाधकाधिकः ॥ २३॥
यथा सर्वेषु मन्त्रेषु शिवपञ्चाक्षरः परः ।
तथा सर्वेषु देशेषु कैलासस्त्वाधकाधिकः ॥ २४॥
शिवपूजासाधनेषु बिल्वपत्रं यथा परम् ।
तथा सर्वेषु देशेषु कैलासस्त्वाधकाधिकः ॥ २५॥
यथा वेदेषु सर्वेषु रुद्राध्यायः परः स्मृतः ।
तथा सर्वेषु देशेषु कैलासस्त्वाधकाधिकः ॥ २६॥
यथा सर्पेषु सर्वेषु सहस्रफणिरुत्तमः ।
तथा सर्वेषु देशेषु कैलासस्त्वाधकाधिकः ॥ २७॥
यथा चतुष्पदां मध्ये प्रसिद्धो वृषभो वरः ।
तथा सर्वेषु देशेषु कैलासस्त्वाधकाधिकः ॥ २८॥
यथा विद्यासु सर्वासु शिवविद्या वरा स्मृता ।
तथा सर्वेषु देशेषु कैलासस्त्वाधकाधिकः ॥ २९॥
यथा भोज्येषु सर्वेषु शिवनैवेद्यमुत्तमम् ।
तथा सर्वेषु देशेषु कैलासस्त्वाधकाधिकः ॥ ३०॥
यथा गृहेषु सर्वेषु श्रेष्ठमन्तर्गृहं मतम् ।
तथा सर्वेषु देशेषु कैलासस्त्वाधकाधिकः ॥ ३१॥
मन्दिरेषु यथा श्रेष्ठं रम्यं शाङ्करमन्दिरम् ।
तथा सर्वेषु देशेषु कैलासस्त्वाधकाधिकः ॥ ३२॥
उत्तमाङ्गं यथाङ्गेषु शिवानतिकिणाङ्कितम् ।
तथा सर्वेषु देशेषु कैलासस्त्वाधकाधिकः ॥ ३३॥
कुमारेषु यथा श्रेष्ठः षण्मुखः श्रुतिषु श्रुतः ।
तथा सर्वेषु देशेषु कैलासस्त्वाधकाधिकः ॥ ३४॥
लोहमध्ये यथा श्रेष्टं काञ्चनं शैलजाप्रियम् ।
तथा सर्वेषु देशेषु कैलासस्त्वाधकाधिकः ॥ ३५॥
ब्राह्मणेषु यथा श्रेष्ठः शाम्भवो ब्राह्मणोत्तमः ।
तथा सर्वेषु देशेषु कैलासस्त्वाधकाधिकः ॥ ३६॥
यथा रत्नेषु सर्वेषु श्रेष्ठचिन्तामणिः स्मृतः ।
तथा सर्वेषु देशेषु कैलासस्त्वाधकाधिकः ॥ ३७॥
यथा सर्वेषु देशेषु श्रेष्ठः सोऽयं सुधाकरः ।
तथा सर्वेषु देशेषु कैलासस्त्वाधकाधिकः ॥ ३८॥
पावनेषु यथा भस्म श्रुत्युक्तं पावनोत्तमम् ।
तथा सर्वेषु देशेषु कैलासस्त्वाधकाधिकः ॥ ३९॥
कैलासतुल्यः कुत्रापि वेदेष्वपि न दृश्यते ॥ ४०॥
तथाप्यधिकमस्तीति वक्ता पापकुलाकुलः ।
सन्निधिः सर्वदा यत्र मम तस्मात् किमुत्तमः ॥ ४१॥
कैलाससन्निधिर्नित्यं तेनासावधिकः स्मृतः ।
विचित्रा रचनास्तत्र वेदान्तागोचरा अपि ॥ ४२॥
ततस्तत्र सुखं तावत् तावदन्यत्र कुत्र वा ।
सर्वोत्तमः स कैलासः तत्र मे रमते मनः ॥ ४३॥
॥ इति शिवरहस्यान्तर्गते व्यासकृतं कैलासमहिमावर्णनं सम्पूर्णम् ॥
- ॥ श्रीशिवरहस्यम् । हराख्यः तृतीयांशः । पूर्वार्धम् । अध्यायः २४। ४५-८८ ॥
- .. shrIshivarahasyam . harAkhyaH tRRitIyAMshaH . pUrvArdham . adhyAyaH 24. 45-88 ..
Proofread by Ruma Dewan