% Text title            : Yajnavalkyaprokta Mahadeva Stuti
% File name             : mahAdevastutiHyAjnavalkyaproktA.itx
% Category              : shiva, stuti, shivarahasya
% Location              : doc\_shiva
% Proofread by          : Ruma Dewan
% Description/comments  : shrIshivarahasyam | harAkhyaH tRitIyAMshaH | pUrvArdham | adhyAyaH 49| 29-69 ||
% Latest update         : May 6, 2023
% Send corrections to   : sanskrit at cheerful dot c om
%
% This text is prepared by volunteers and is to be used for personal study 
% and research. The file is not to be copied or reposted for promotion of 
% any website or individuals or for commercial purpose without permission. 
% Please help to maintain respect for volunteer spirit.
%
\documentstyle[11pt,multicol,itrans]{article}
#include=ijag.inc
#endwordvowel=.h
\portraitwide
\parindent=100pt                
\let\usedvng=\Largedvng      % for 1 column     
\pagenumbering{itrans} 
\def\engtitle#1{\hrule\medskip\centerline{\LARGE #1}}
\def\itxtitle#1{\medskip\centerline{\LARGEdvng #1}\medskip\hrule}
\def\endtitles{\medskip\obeyspaceslines}
%%
\begin{document}
\engtitle{.. Yajnavalkyaprokta Mahadeva Stuti ..}##
\itxtitle{.. yAj~navalkyaproktA mahAdevastutiH ..}##\endtitles ##
namo namaste tridashAdhinAtha namo namaste pramathAdhinAtha |
namo namo mAmava mAmavAva sphura~njaTAjUTataToDunAtha || 29||
saMsArarUpavividhAmitadandashUkadaMShTrAbhighAtaparipIDitamindumaule |
pAhi tvadIyamatidInamamandaduHkhamAdhivyathAviShavinAshaka dInabandho || 30||
shrIvishvanAtha sharaNAgatavatsalesha tvatpAdapadmabhajanAya manaH pravR^ittam |
puNyairagaNyavibhavaiH tadapArapuNyanikShepalAbhamanuvA~nChati tatprayachCha || 31||
durvAraduHkhaparihArakaraM bhavantaM bhAlekShaNaM bhavabhayAbdhivisheShakaM cha |
jAnAti chittamiti me tadapArapuNyanikShepalAbhamabhivA~nChati tatprayachCha || 32||
ye tAvadIsha charaNaM sharaNaM prapannAH te tAvataiva sukhino dayayA tayA te |
tattAvadIsha mama chittamidaM vichArya tvatpAdapadmabhajanAya manaH pravR^ittam || 33||
anyAni yAni kamalAni sarovareShu teShu praNAshamupayAti sugandhaleshaH |
ityAdareNa bahudhaiva vichArya chittaM tvatpAdapadmabhajanAya manaH pravR^ittam || 34||
nAnyanmamAsti sharaNaM taruNendukhaNDadaNDAyamAna karamaNDalamaNDitA~Ngam | (karamaNDitamaNDalAMsam)
tvatpAduke sharaNamityanuvArameva j~nAtvA bhajAmi bhagavantamumAsahAyam || 35||
chittaM mameshacharaNasmaraNapravR^ittaM jihvA maheshvarakathAsamudIraNAya |
karNau sadAshivakathAshravaNapravR^ittau hastau shivArchanavidhau mama to pravR^ittau || 36||
dhanyaM mano mama shivasmaraNapravR^ittaM puNyairapAravibhavaistadupArjintaM me |
puNyAni tena punarapyamitAni tAni sambhAvitAnyapi shubhAnyapi bhAvukAni || 37||
yatkalpakoTisamupArjitapuNyajAtaM tattAvadIshacharaNAmbujapUjanAya |
jAtaM tadeva mama bhAgyamiti smarAmi bhUyaH smarAmi chiramAshu hara smarAre || 38||
bho sha~Nkara smaraharAmaravIra dhIra gaurImanoramaNa pApaharapravINa |
mAmuddharoddhara mahAghasamudramagnaM saMsAradhoraviShasarpamukhAbhilagnam || 39||
kAruNyasAgaravisheShaguNAmburAshe kAshIpate kushalameva mama prayachCha |
mAmuddharoddhara mahAghasamudramagnaM saMsAraghoraviShasarpamukhAgralagnam || 40||
tvaM dInavatsala iti shrutiShu prasiddhaH siddhAdisevita maheshvara shUlapANe |
mAmuddharoddhara mahAghasamudramagnaM saMsAraghoraviShasarpamukhAgralagnam || 41||
shrInIlakaNTha girirAjasutopakaNTha sotkaNThamindukalikAbharaNArchanAdau |
mAmuddharoddhara mahAghasamudramagnaM saMsAraghoraviShasarpamukhAgralagnam || 42||
kA vA maheshvara gatirmama chintitA.asti shrIkAlakAla shivapUjakapUjakasya |
mAmuddharoddhara mahAghasamudramagnaM saMsAraghoraviShasarpamukhAgralagnam || 43||
pApapravR^ittirapi mAstu bhavatpadAbjapUjAvidhAnaniratasya shivAsahAya |
mAmuddharoddhara mahAghasamudramagnaM saMsAraghoraviShasarpamukhAgralagnam || 44||
yatsa~nchitaM vividhapApakulaM tadAshu nAshaM prayAtu shashikhaNDavimaNDitA~Ngam |
mAmuddharoddhara mahAghasamudramagnaM saMsAraghoraviShasarpamukhAgralagnam || 45||
garbhAdhivAsajanakaM duradR^iShTamasya yattAvadAshu mama tadvilayaM prayAtu |
mAmuddharoddhara mahAghasamudramagnaM saMsAraghoraviShasarpamukhAgralagnam || 46||
yo yonimArgaviShadurgavinirgamAdihetuH sa tAvadadhunA vilayaM prayAtu |
mAmuddharoddhara mahAghasamudramagnaM saMsAraghoraviShasarpamukhAgralagnam || 47||
durgandhapUraparipUritayonibhAgasambhogabuddhiradhunA vilayaM prayAtu |
mAmuddharoddhara mahAghasamudramagnaM saMsAraghoraviShasarpamukhAgralagnam || 48||
ye ye purIShajalasa~NkulagarbhavAsa durvAsanAparivR^itAH pralayo.astu teShAm |
mAmuddharoddhara mahAghasamudramagnaM saMsAraghoraviShasarpamukhAgralagnam || 49||
vishveshanAmasu sudhArasapAnapInA nityaM mamAstu rasanA girijAsahAya |
mAmuddharoddhara mahAghasamudramagnaM saMsAraghoraviShasarpamukhAgralagnam || 50||
shrIbilvapallavalavairapi pUjitastvaM mukti pradAtumapi sha~Nkara kiM pravR^ittaH |
mAmuddharoddhara mahAghasamudramagnaM saMsAraghoraviShasarpamukhAgralagnam || 51||
matvArthanIyamidametadanantajanmasa~nchIrNapuNyaphalabhUtamabhUtapUrvam |
sAnandamindushakalAkalitAvataMsapAdAravindamakarandamadhuvratattvam || 52||
sApAyamanyaditi me matirAvirAsIttena tvadIyacharaNAmbujabhaktirekA |
kAmAntakAstu mama kAmada kAmaye.ahaM kAmArichArucharaNArchanasAdhanAni || 53||
na brahmalokamapi vA~nChati mAnasaM me vANImanoramaNatAmapi kintu shambho |
li~NgArchane shivaniveditabhojane.api vA~nChAM karoti tadidaM varamadya dehi || 54||
vaikuNThavAsamapi nechChati mAnasaM me shambho ramAramaNatAmapi kintu bhaktim |
vA~nChatyapAravibhavaiH shivali~NgapUjAM kartuM pradoShasamayeShu visheShatastu || 55||
na svargalokamabhivA~nChati mAnasaM me svargAdhipatyamapi chArushashA~Nkamaule |
prANaprayANasamaye.api shivArchanechChArUpaM phalaM samabhivA~nChati puNyapu~njaiH || 56||
jAtaM cha chittamasakR^idgirisha tvayA me vIreshali~NgavikaTAnikaTATanena |
nItaM vayaH shivadineShvashanaM vihAya tvalli~NgapUjanaratena na vismR^itiste || 57||
deshAntarasthitagR^ihItavilAsinI yA tatsa~Ngame.api na ratirmama yauvane.api |
tatkiM tvayA na viditaM girishArdhajAne jAne shivAnyamanishaM shivapUjanena || 58||
vAkpuShpajAlamasakR^idruchiraM chireNa kAlena dattamapi tubhyamapi tvayApi |
tattadgR^ihItamasakR^ittava vismR^itiH kA kAkodarAbharaNa mAM smara mAM smarAshu || 59||
dhuttUrapuShpanavabilvadalArkapuShpaga~NgAjalAtisitabhUtikaNA dibhistvam |
nArAdhito.asi kimumAramaNAtibhakatyA tadvismR^itaM kathamapi smara vishvanAtha || 60||
ekaikabilvanavakomalapallavena li~Nga pradoShasamaye tava vIranAtha |
dattena tena na chaturdashalokalokavandyatvamapyaphalamalpaphalaM tadIsha || 61||
ga~NgAtara~NgavimalAnilashItalena toyena yA shirasi te rachitA sudhArA |
sA vismR^itA kathasumAramaNAdya tasyAH kiM vA phalaM na suragauriva sA pravR^ittA || 62||
vishvAsabIjavilayAya kathaM pravR^ittiH tattatphalArpaNasamarthakadarthaneyam |
sahyA kathaM mama tavApi na mAmakatvamadyApi te mayi kimatra vadAmi shambho || 63||
yadyasti tAni paralokaphalAni teShAM nAdyAdhunA phalamiti bhrama eva so.ayam |
sarvepsitArthaphaldAni shivArchanAni shrautAni saphalAni sadApi shambho || 64||
kR^ityaM kimasti maraNottaramauShadhAnAM sa~njIvanIphalamapi shrutameva kiM na |
sA jIvanaM janayatIti nikR^iShTavastu vastu prakR^iShTamidamIsha shivArchanaM hi || 65||
AmuShmikAnyapi phalAnyamitAni shambho tAvadbhavantu bhagavan adhunApi tAni |
sambhAvitAni na phalAni kathaM bahUni yaiH kIrtiratra bahudhA girishaprasAdAt || 66||
etAvadIsha sahamAna mayA yaduktaM tannAparAdha iti mAmava dInabandho |
yo niShThuraM badati ko.api shishuH kumAraH tatpAlanAya janakaH khalu sampravR^ittaH || 67||
snehastavAsti mayi santatamityavaimi teneva jIvanamapIsha sasantaterme |
dUrIkuru pratibhave.api bhayAni shambho tvayyastu bhaktiranishaM muhurindumaule || 68||
adyaprabhR^ityamitapAtakarAshibhItirnAstIti me hara vibhAtyanuvAramasya |
kalyANarAshirupapanna iti smarAmi sampatsamUhasahito.api pade pade me || 69||

|| iti shivarahasyAntargate yAj~navalkyaproktA mahAdevastutiH sampUrNA ||
\- || shrIshivarahasyam | harAkhyaH tR^itIyAMshaH | pUrvArdham | adhyAyaH 49| 29\-69 ||
##
- .. shrIshivarahasyam . harAkhyaH tRRitIyAMshaH . pUrvArdham . adhyAyaH 49. 29-69 ..

Proofread by Ruma Dewan

\medskip\hrule\obeylines

Please send corrections to sanskrit at cheerful dot c om
Last updated \today
https://sanskritdocuments.org

\end{document}