श्रीनीलकण्ठ नमश्शिवायाष्टकम्
नमो नमः कारणकारणाय
जगन्मयायाहितपाशकाय ।
त्वत्पादपद्माश्रितरक्षकाय
श्रीनीलकण्ठाय नमः शिवाय ॥ १॥
ध्यायन्ति ये त्वां यतयः स्तुवन्ति
हृदम्बुजे दीपसमप्रकाशम् ।
नासाग्रविन्यस्तविलोचनाय
श्रीनीलकण्ठाय नमः शिवाय ॥ २॥
सर्गस्थितिध्वंसनकारणाय
यमादियोगाष्टकसिद्धिदाय ।
तपस्विनां शीघ्रफलप्रदाय ।
श्रीनीलकण्ठाय नमः शिवाय ॥ ३॥
वेदादिरूपाय त्रिलोचनाय
वेदान्तवेद्याय दिगम्बराय ।
विभूतिशुभ्राय जटाधराय
श्रीनीलकण्ठाय नमः शिवाय ॥ ४॥
उग्राय संसारभयापहाय
ज्ञानप्रदायशुसुखप्रदाय ।
कालान्तकाय प्रलयानिलाय
श्रीनीलकण्ठाय नमः शिवाय ॥ ५॥
विधातृरूपाय जगद्धिताय
रमेशरूपाय सदाशिवाय ।
अनन्तरूपाय चतुर्भुजाय
श्रीनीलकण्ठाय नमः शिवाय ॥ ६॥
विश्वैकवन्द्याय कलाधराय
समस्तलोकैकसमाश्रयाय ।
कुठारपाशाङ्कुशपालिने च
श्रीनीलकण्ठाय नमः शिवाय ॥ ७॥
शर्वाय सर्वप्रियकारणाय
पिनाकिने बाणधराय तुभ्यम् ।
गौरीप्रियायाखिलपालकाय
श्रीनीलकण्ठाय नमः शिवाय ॥ ८॥
इति स्तुत्वा महादेवं प्रणम्य च पुनः पुनः ।
विदध्यू ऋषयस्तत्र सुराः पद्मभुवादयः ॥ ९॥
इति श्रीनीलकण्ठ नमः शिवायाष्टकं सम्पूर्णम् ।
It is said to be from Shri Garalapurinatha
Mahatmya from Skanda Purana, however is not
readily found in the Purana.
Proofread by Vani V.