Shri Shailapati Dashakam

 श्रीशैलपतिदशकम् 
जय भस्मविभूषणविग्रह हे
     अहिबन्धक नग्नक अम्बक हे ।
जटिमण्डलमण्डित षण्डपते
     प्रणमामि पदे तव शैलपते ॥ १॥

हर शङ्कर ईश्वर शूलधर
     तटिनीधर धीधर योगिवर ।
शशिशेखर शाश्वतकीर्त्तिरते
     प्रणमामि पदे तव शैलपते ॥ २॥

अनलेक्षण भीषण नीलगल
     विमलास्थिविराजित कालकल ।
वरदायक भैरव देवपते
     प्रणमामि पदे तव शैलपते ॥ ३॥

गिरिराजसुतासुखसाधक हे
     गणनाथषडाननलालक हे ।
सुरसुन्दर निन्दितकामपते
     प्रणमामि पदे तव शैलपते ॥ ४॥

गणपालकधारकनायक हे
     रिपुशासकशोषकनाशक हे ।
विषभक्षक रक्षक लोकततेः
     प्रणमामि पदे तव शैलपते ॥ ५॥

स्मरसुन्दरविग्रहनिग्रह हे
     त्रिपुरासुरमारक तारक हे ।
मखपावकनाशक चण्डपते
     प्रणमामि पदे तव शैलपते ॥ ६॥

करुणावरुणालय शोभन हे
     जनजीवनतारणकारण हे ।
दरदण्डितखण्डितभक्तपते
     प्रणमामि पदे तव शैलपते ॥ ७॥

जनलालनपालनकारक हे
     सुखदायक पोषक तोषक हे ।
भववारणवारणदावपते
     प्रणमामि पदे तव शैलपते ॥ ८॥

मतिवर्द्धक भर्त्तक दर्पक हे
     भयकर्त्तक सार्थकनर्त्तक हे ।
मृतिहारक पारक भूतपते
     प्रणमामि पदे तव शैलपते ॥ ९॥

मनुजासुरनिर्जरपूजित हे
     भजकाखिलपातकघातक हे ।
शुभकर्मद धर्मद विश्वपते
     प्रणमामि पदे तव शैलपते ॥ १०॥

इति व्रजकिशोरविरचितं श्रीशैलपतिदशकं सम्पूर्णम् ।


Encoded and proofread by Vrajakishora