श्रीशिवषडक्षरस्तोत्रम् २
ओङ्कारसञ्जातसमस्तवेदपुराणपुण्यागमपूजिताय ।
ओङ्कारवर्णप्रतिपादिताय ओङ्काररूपाय नमः शिवाय ॥ १॥
नगाधिवासाय निरामयाय भस्माङ्गरागाय भयापहाय ।
देवादिदेवाय दिगम्बराय तस्मै नकाराय नमः शिवाय ॥ २॥
मत्तेभचर्माम्बरभूषणाय मारान्तकाराय महेश्वराय ।
चन्द्रार्कवैश्वानरलोचनाय तस्मै मकाराय नमः शिवाय ॥ ३॥
शिवाय गौरीवदनारविन्द सूर्याय दक्षाध्वरनाशनाय ।
श्रीनीलकण्ठाय शिवाप्रियाय तस्मै शिकाराय नमः शिवाय ॥ ४॥
वागीशकुम्भोद्भवगौतमादिमुनीन्द्रवन्द्याय मुनीश्वराय ।
त्रैलोक्यनाथाय पुरान्तकाय तस्मै वकाराय नमः शिवाय ॥ ५॥
यज्ञस्वरूपाय जटाधराय पिनाकहस्ताय सनातनाय ।
नित्याय शुद्धाय निरञ्जनाय तस्मै यकाराय नमः शिवाय ॥ ६॥
षडक्षरमिदं स्तोत्रं यः पठेञ्छिवसन्निधौ ।
शिवलोकमवाप्नोति शिवेन सह मोदते ॥ ७॥
प्रातःकाले शिवं दृष्ट्वा निशापापं विनश्यति ।
मध्याह्ने कृतमाजन्म सायाह्वे सप्तजन्मसु ॥ ८॥
मेरुकाञ्चनदत्तानां गवां कोटिशतैरपि ।
पञ्चकोटीतुरङ्गानां तत्फलं (शिव)लिङ्गदर्शनम् ॥ ९॥
॥ इति श्रीशिवषडक्षरस्तोत्रं सम्पूर्णम् ॥
Proofread by Aruna Narayanan