शिवजयवादस्तोत्रम्
श्रीगणेशाय नमः ॥
जय जय गिरिजालङ्कृतविग्रह, जय जय विनताखिलदिक्पाद ।
जय जय सर्वविपत्तिविनाशन, जय जय शङ्कर दीनदयाल ॥ १॥
जय जय सकलसुरासुरसेवित, जय जय वाञ्छितदानवितन्द्र ।
जय जय लोकालोकधुरन्धर जय जय नागेश्वर धृतचद्र ॥ २॥
जय जय हिमाचलनिवासिन् जय जय करुणाकल्पितलिङ्ग ।
जय जय संसृतिरचनाशिल्पिन् जय जय भक्तहृदम्बुजभृङ्ग ॥ ३॥
जय जय भोगिफणामणिरञ्जित, जय जय भूतिविभूषितदेह ।
जय जय पितृवनकेलिपरायण, जय जय गौरीविभ्रमगेह ॥ ४॥
जय जय गङ्गातरङ्गलुलितजट, जय जय मङ्गलपूरसमुद्र ।
जय जय बोधविजृम्भणकारण जय जय मानसपूर्तिविनिद्र ॥ ५॥
जय जय दयातरङ्गितलोचन, जय जय चित्रचरित्रपवित्र ।
जय जय शब्दब्रह्मविकाशक जय जय किल्बिषतापधवित्र ॥ ६॥
जय जय तन्त्रनिरूपणतत्पर, जय जय योगविकस्वरधाम ।
जय जय मदनमहाभटभञ्जन, जय जय पूरितपूजककाम ॥ ७॥
जय जय गङ्गाधर विश्वेश्वर, जय जय पतितपवित्रविधान ।
जय जव बम्बन्नाद कृपाकर, जय जय शिव शिव सौख्यनिधान ॥ ८॥
य इमं शिवजयवादमुदारं, पठति सदा शिवधाम्नि ।
तस्य सदाशिवशासनयोगान्माद्यति सम्पन्नाम्नि ॥ ९॥
इति शिवजयवादस्तोत्रं सम्पूर्णम् ॥
शिवगाथा
Proofread by PSA Easwaran