% Text title : shivasahasranAmastotra from devIbhAgavata % File name : shivasahasranAmastotradevIbhAgavata.itx % Category : sahasranAma, shiva % Location : doc\_shiva % Transliterated by : DPD % Proofread by : DPD, Nithesh Bharadwaj Sivakumar % Description/comments : bhagIrathakRitam shrImahAdevIbhAgavata upapurANe % Latest update : March 31, 2018 % Send corrections to : sanskrit at cheerful dot c om % % This text is prepared by volunteers and is to be used for personal study % and research. The file is not to be copied or reposted for promotion of % any website or individuals or for commercial purpose without permission. % Please help to maintain respect for volunteer spirit. % \documentstyle[11pt,multicol,itrans]{article} #include=ijag.inc #endwordvowel=.h \portraitwide \parindent=100pt \let\usedvng=\Largedvng % for 1 column \pagenumbering{itrans} \def\engtitle#1{\hrule\medskip\centerline{\LARGE #1}} \def\itxtitle#1{\medskip\centerline{\LARGEdvng #1}\medskip\hrule} \def\endtitles{\medskip\obeyspaceslines} %% \begin{document} \engtitle{.. Shri Shiva Sahasranamastotram from devIbhAgavata ..}## \itxtitle{.. shrIshivasahasranAmastotram devIbhAgavatAntargatam ..}##\endtitles ## bhagIrathakR^itaM shrImahAdevIbhAgavata upapurANe bhagIratha uvAcha\- OM namaste pArvatInAtha devadeva parAtpara | achyutAnagha pa~nchAsya bhImAsya ruchirAnana || 1|| vyAghrAjinadharAnanta pArAvAravivarjita | pa~nchAnana mahAsattva mahAj~nAnamaya prabho || 2|| ajitAmitadurdharSha vishvesha parameshvara | vishvAtmanvishvabhUtesha vishvAshraya jagatpate || 3|| vishvopakArinvishvaikadhAma vishvAshrayAshraya | vishvAdhAra sadAnanda vishvAnanda namo.astu te || 4|| sharva sarvavidaj~nAnavivarjita surottama | suravandya surastutya surarAja surottama || 5|| surapUjya suradhyeya sureshvara surAntaka | surArimardaka surashreShTha te.astu namo namaH || 6|| tvaM shuddhaH shuddhabodhashcha shuddhAtmA jagatAM patiH | shambhuH svayambhUratyugra ugrakarmogralochanaH || 7|| ugraprabhAvashchAtyugramardako.atyugrarUpavAn | ugrakaNThaH shivaH shAntaH sarvashAntividhAyakaH || 8|| sarvArthadaH shivAdhAraH shivAyaniramitrajit | shivadaH shivakartA cha shivahantA shiveshvaraH || 9|| shishuH shaishavayuktascha pi~Ngakesho jaTAdharaH | ga~NgAdharakapardI cha jaTAjUTavirAjitaH || 10|| jaTilo jaTilArAdhyaH sarvadonmattamAnasaH | unmattakesha unmatta unmattAnAmadhIshvaraH || 11|| unmattalochano bhImastrinetro bhImalochanaH | bahunetro dvinetrI cha raktanetraH sunetrakaH || 12|| dIrghanetrascha pi~NgAkShaH suprabhAkhyaH sulochanaH | somanetro.agninetrAkhyaH sUryanetraH suvIryavAn || 13|| padmAkShaH kamalAkShashcha nIlotpaladalekShaNaH | sulakShaNaH shUlapANiH kapAlI kapilekShaNaH || 14|| vyAghUrNanayano dhUrto vyAghracharmAmbarAvR^itaH | shrIkaNTho nIlakaNThAkhyaH shitikaNThaH sukaNThakaH || 15|| chandrachUDashchandradharashchandramauliH shashA~NkabhR^it | shashikAntaH shashA~NkAbhaH shashA~NkA~NkitamUrdhajaH || 16|| shashA~Nkavadano vIro varado varalochanaH | sharachchandrasamAbhAsaH sharadindusamaprabhaH || 17|| koTisUryapratIkAshashchandrAsyashchandrashekharaH | aShTamUrtirmahAmUtirbhImamUrtirbhayAnakaH || 18|| bhayadAtA bhayatrAtA bhayahartA bhayojjhitaH | nirbhUto bhUtavandyashcha bhUtAtmA bhUtabhAvanaH || 19|| kaupInavAsA durvAsA vivAsAH kAminIpatiH | karAlaH kIrtido vaidyaH kishoraH kAmanAshanaH || 20|| kIrtirUpaH kuntadhArI kAlakUTakR^itAshanaH | kAlakUTaH surUpI cha kulamantrapradIpakaH || 21|| kalAkAShThAtmakaH kAshIvihArI kuTilAnanaH | mahAkAnanasaMvAsI kAlIprativivardhanaH || 22|| kAlIdharaH kAmachAri kulakIrtivivardhanaH | kAmAdriH kAmukavaraH kArmukI kAmamohitaH || 23 kaTAkShaH kanakAbhAsaH kanakojjvalagAtrakaH | kAmAturaH kvaNatpAdaH kuTilabhrukuTIdharaH || 24|| kArtikeyapitA kokanadabhUShaNabhUShitaH | khaTvA~NgayoddhA khaDgI cha girIsho gaganeshvaraH || 25 gaNAdhyakShaH kheTakadhR^ik kharvaH kharvataraH khagaH | khagArUDhaH khagArAdhyaH khecharaH khechareshvaraH || 26|| khecharatvapradaH kShoNIpatiH khecharamardakaH | gaNeshvaro gaNapitA gariShTho gaNabhUpatiH || 27|| gururgurutaro j~neyo ga~NgApatiramarShaNaH | gItapriyo gItarataH sugopyo gopavR^indapaH || 28|| gavArUDho jagadbhartA gosvAmI gosvarUpakaH | goprado godharo gR^idhro garutmAn gokR^itAsanaH || 29| gopIsho gurutAtashcha guhAvAsI sugopitaH | gajArUDho gajAsyashcha gajAjinadharo.agrajaH || 30|| grahAdhyakSho grahagaNo duShTagrahavimardakaH | mAnarUpI gAnarataH prachaNDo gAnavihvalaH || 31|| gAnamatto guNI guhyo guNagramAshayo guNaH | gUDhabuddhirgUDhamUrtirgUDhapAdavibhUShitaH || 32|| goptA golokavAsI cha guNavAnguNinAM varaH | haro haritavarNAkSho mR^ityurmR^ityu~njayo hariH || 33|| havyabhug.hharisampUjyo havirhavirbhujAM varaH | anAdirAdiH sarvAdya AditeyavarapradaH || 34|| anantavikramo loko lokAnAM pApahArakaH | gIShpatiH sadguNopetaH saguNo nirguNo guNI || 35|| guNaprIto guNavaro girijAnAyako giriH | gaurIbhartA guNADhayashcha goshreShThAsanasaMsthitaH || 36|| padmAsanaH padmanetraH padmatuShTaH supadmakaH | padmavaktraH padmakaraH padmArUDhapadAmbujaH || 37|| padmapriyatamaH padmAlayaH padmaprakAshakaH | padmakAnanasaMvAsaH padmakAnanabha~njakaH || 38|| padmakAnanasaMvAsI padmAraNyakR^itAlayaH | praphullavadanaH phullakamalAkShaH praphullakR^it || 39|| phullendIvarasantuShTaH praphullakamalAsanaH | phullAmbhojakaraH phullamAnasaH pApahArakaH || 40|| pApApahArI puNyAtmA puNyakIrtiH supuNyavAn | puNyaH puNyatamo dhanyaH supUtAtmA parAtmakaH || 41|| puNyeshaH puNyadaH puNyanirataH puNyabhAjanaH | paropakArI pApiShThanAshakaH pApahArakaH || 42|| purAtanaH pUrvahInaH paradrohavivarjitaH | pIvaraH pIvaramukhaH pInakAyaH purAntakaH || 43|| pAshI pashupatiH pAshahastaH pAShANavitpatiH | palAtmakaH paro vettA pAshabaddhavimochakaH || 44|| pashUnAmadhipaH pAshachChettA pAshavibhedakaH | pAShANadhArI pAShANashayAnaH pAshipUjitaH || 45|| pashvArUDhaH puShpadhanuH puShpavR^indasupUjitaH | puNDarIkaH pItavAsA puNDarIkAkShavallabhaH || 46|| pAnapAtrakaraH pAnamattaH pAnAtibhUtakaH | poShTA poShTTvaraH pUtaH paritrAtA.akhileshvaraH || 47|| puNDarIkAkShakartA cha puNDarIkAkShasevitaH | pallavasthaH prapIThasthaH pIThabhUminivAsakaH || 48|| pitA pitAmahaH pArthaprasanno.abhIShTadAyakaH | pitR^INAM prItikartA cha prItidaH prItibhAjanaH || 49|| prItyAtmakaH prItivashI suprItaH prItikArakaH | prItihR^itprItirUpAtman prItiyuktastvameva hi || 50|| praNatArtiharaH prANavallabhaH prANadAyakaH | prANI prANasvarUpashcha prANagrAhI munirdayaH || 51|| prANanAthaH prItamanAH sarveShAM prapitAmahaH | vR^iddhaH pravR^iddharUpashcha pretaH praNayinAM varaH || 52|| parAdhIshaH paraM jyotiH paranetraH parAtmakaH | pAruShyarahitaH putrI putradaH putrarakShakaH || 53|| putrapriyaH putravashyaH putravatparipAlakaH | paritrAtA parAvAsaH parachetAH pareshvaraH || 54|| patiH sarvasya sampAlyaH pavamAnaH paro.antakaH | purahA puruhUtashcha tripurAriH purAntakaH || 55|| purandaro.atisampUjyaH pradharSho duShpradharShaNaH | paTuH paTutaraH prauDhaH prapUjyaH parvatAlayaH || 56|| pulinasthaH pulastyAkhyaH pi~NgachakShuH prapannagaH | abhIrurasitA~Ngashcha chaNDarUpaH sitA~NgakaH || 57|| sarvavidyAvinodashcha sarvasaukhyayutaH sadA | sukhahartA sarvasukhI sarvalokaikapAvanaH || 58|| sadAvanaH sAradashcha susiddhaH shuddharUpakaH | sAraH sArataraH sUryaH somaH sarvaprakAshakaH || 59|| somamaNDaladhArI cha samudra sindhurUpavAn | surajyeShThaH surashreShThaH surAsuraniShevitaH || 60|| sarvadharmavinirmuktaH sarvalokanamaskR^itaH | sarvAchArayutaH sauraH shAktaH paramavaiShNavaH || 61|| sarvadharmavidhAnaj~naH sarvAchAraparAyaNaH | sarvarogaprashamanaH sarvarogApahArakaH || 62|| prakR^iShTAtmA mahAtmA cha sarvadharmapradarshakaH | sarvasampadyutaH sarvasampaddAnasamekShaNaH || 63|| sahAsyavadano hAsyayuktaH prahasitAnanaH | sAkShI samakShavaktA cha sarvadarshI samastavit || 64|| sakalaj~naH samarthaj~naH sumanAH shaivapUjitaH | shokaprashamanaH shokahantA.ashochyaH shubhAnvitaH || 65|| shailaj~naH shailajAnAthaH shailanAthaH shanaishcharaH | shashA~NkasadR^ishajyotiH shashA~NkArdhavirAjitaH || 66|| sAdhupriyaH sAdhutamaH sAdhvIpatiralaukikaH | shUnyarUpaH shUnyadehaH shUnyasthaH shUnyabhAvanaH || 67|| shUnyagAmI shmashAnasthaH shmashAnAdhipatiH suvAk | shatasUryaprabhaH sUryaH sUryadIptaH surArihA | shubhAnvitaH shubhatanuH shubhabuddhiH shubhAtmakaH || 68|| shubhAnvitatanuH shuklatanuH shuklaprabhAnvitaH | sushauklaH shukladashanaH shuklAbhaH shuklamAlyadhR^it || 69|| shuklapuShpapriyaH shuklavasanaH shuklaketanaH | sheShAla~NkaraNaH sheSharahitaH sheShaveShTitaH || 70|| sheShArUDhaH sheShashAyI sheShA~NgadavirAjitaH | satIpriyaH sAsha~Nkashcha samadarshI samAdhimAn || 71|| satsa~NgI satpriyaH sa~NgI niHsa~NgI sa~NgavarjitaH | sahiShNuH shAshvataishvaryaH sAmagAnarataH sadA || 72|| sAmavettA sAmyataraH shyAmApatirasheShabhuk | tAriNIpatirAtAmranayanastvaritApriyaH || 73|| tArAtmakastvagvasanastaruNIramaNo rataH | tR^iptirUpastR^iptikartA tArakAriniShevitaH || 74|| vAyukesho bhairavesho bhavAnIsho bhavAntakaH | bhavabandhurbhavaharo bhavabandhanamochakaH || 75|| abhibhUto.abhibhUtAtmA sarvabhUtapramohakaH | bhuvanesho bhUtapUjyo bhogamokShaphalapradaH || 76|| dayAlurdInanAthashcha duHsaho daityamardakaH | dakShakanyApatirduHkhanAshako dhanadhAnyadaH || 77|| dayAvAn daivatashreShTho devagandharvasevitaH | nAnAyudhadharo nAnApuShpaguchChavirAjitaH || 78|| nAnAsukhaprado nAnAmUrtidhArI cha nartakaH | nityavij~nAnasaMyukto nityarUpo.anilo.analaH || 79|| labdhavarNo laghutaro laghutvaparivarjitaH | lolAkSho lokasampUjyo lAvaNya parisaMyutaH || 80|| napurInyAsasaMsthashcha nAgesho nagapUjitaH | nArAyaNo nAradashcha nAnAbharaNabhUShitaH || 81|| nagabhUto nagnadesho nagnaH sAnandamAnasaH | namasyo natanAbhishcha namramUrdhAbhivanditaH || 82|| nandikesho nandipUjyo nAnAnIrajamadhyagaH | navInabilvapatraughatuShTo navaghanadyutiH || 83|| nandaH sAnanda AnandamayashchAnandavihvalaH | nAlasaMsthaH shobhanasthaH susthaH susthamatistathA || 84|| svalpAsano bhImaruchirbhuvanAntakarAmbudaH | AsannaH sikatAlIno vR^iShAsIno vR^iShAsanaH || 85|| vairasyarahito vAryo vratI vrataparAyaNaH | brAhmyo vidyAmayo vidyAbhyAsI vidyApatistathA || 86|| ghaNTAkAro ghoTakastho ghorarAvo ghanasvanaH | ghUrNachakShuraghUrNAtmA ghorahAso gabhIradhIH || 87|| chaNDIpatishchaNDamUrtishchaNDo muNDI prachaNDavAk | chitAsaMsthashchitAvAsashchitirdaNDakaraH sadA || 88|| chitAbhasmAbhisaMliptashchitAnR^ityaparAyaNaH | chitApramodI chitsAkShI chintAmaNirachintakaH || 89|| chaturvedamayashchakShushchaturAnanapUjitaH | chIravAsAshchakorAkShashchalanmUrtishchalekShaNaH || 90|| chalatkuNDalabhUShADhayashchaladbhUShaNabhUShitaH | chalannetrashchalatpAdashchalannUpurarAjitaH || 91|| sthAvaraH sthiramUrtishcha sthAvareshaH sthirAsanaH | sthApakaH sthairyanirataH sthUlarUpI sthalAlayaH || 92|| sthairyAtigaH sthitiparaH sthANurUpI sthalAdhipaH | aihiko madanArtashcha mahImaNDalapUjitaH || 93|| mahIpriyo mattaravo mInaketuvimardakaH | mInarUpo manisaMstho mR^igahasto mR^igAsanaH || 94|| mArgastho mekhalAyukto maithilIshvarapUjitaH | mithyAhIno ma~Ngalado mA~Ngalyo makarAsanaH || 95|| matsyapriyo mathuragIrmadhupAnaparAyaNaH | mR^iduvAkyaparaH saurapriyo modAnvitastathA || 96|| muNDAlirbhUShaNo daNDI uddaNDo jvalalochanaH | asAdhyasAdhakaH shUrasevyaH shokApanodanaH || 97|| shrIpatiH shrIsusevyashcha shrIdharaH shrIniketanaH | shrImatAM shrIsvarUpashcha shrImAnshrInilayastathA || 98|| shramAdiklesharahitaH shrInivAsaH shriyAnvitaH | shraddhAluH shrAddhadevashcha shrAddho madhuravAk tathA || 99|| pralayAgnyarkasa~NkAshaH pramattanayanojjvalaH | asAdhyasAdhakaH shUrasevyaH shokApanodanaH || 100|| vishvabhUtamayo vaishvAnaranetro.adhimohakR^it | lokatrANaparo.apAraguNaH pAravivarjitaH || 101|| agnijihvo dvijAsyashcha vishvAsyaH sarvabhUtadhR^ik | khecharaH khecharAdhIshaH sarvagaH sArvalaukikaH || 102|| senAnIjanakaH kShubdhAbdhirvArikShobhavinAshakaH | kapAlavilasaddhastaH kamaNDalubhR^idarchitaH || 103|| kevalAtmasvarUpashcha kevalaj~nAnarUpakaH | vyomAlayanivAsI cha bR^ihadvyomasvarUpakaH || 104|| ambhojanayano.ambhodhishayAnaH puruShAtigaH | nirAlambo.avalambashcha sambhogAnandarUpakaH || 105|| yoganidrAmayo lokapramohApaharAtmakaH | bR^ihadvaktro bR^ihannetro bR^ihadvAhurbR^ihadvalaH || 106|| bR^ihatsarpA~Ngado duShTabR^ihadvAlavimardakaH | bR^ihadbhujabalonmatto bR^ihattuNDo bR^ihadvapuH || 107|| bR^ihadaishvaryayuktascha bR^ihadaishvaryadaH svayam| bR^ihatsambhogasanuShTo bR^ihadAnandadAyakaH || 108|| bR^ihajjaTAjUTadharo bR^ihanmAlI bR^ihaddhanuH | indriyAdhiShThitaH sarvalokendriyavimohakR^it || 109|| sarvendriyapravR^ittikR^it sarvendriyanivR^ittikR^it| pravR^ittinAyakaH sarvavipattiparinAshakaH || 110|| pravR^ittimArganetA tvaM svatantrechChAmayaH svayam | satpravR^ittirato nityaM dayAnandashivAdharaH || 111|| kShitirUpastoyarUpI vishvatR^iptikarastathA | tarpastarpaNasamprItastarpakastarpaNAtmakaH || 112|| tR^iptikAraNabhUtashcha sarvatR^iptiprasAdhakaH | abhedo bhedako.achChidyachChedako.achChedya eva hi || 113|| achChinnadhanvA.achChinneShurachChinnadhvajavAhanaH | adR^iShTaH samadhR^iShTAstraH samadhR^iShTo balonnataH || 114|| chitrayodhI chitrakarmA vishvasa~NkarShakaH svayam | bhaktAnAmIpsitakaraH sarvepsitaphalapradaH || 115|| vA~nChitAbhIShTaphalado.abhinnaj~nAnapravartakaH | bodhanAtmA bodhanArthAtigaH sarvaprabodhakR^it || 116|| trijaTashchaikajaTilashchalajjUTo bhayAnakaH | jaTATIno jaTAjUTaspR^iShTAvaravachaH svayam || 117|| ShANmAturasya janakaH shaktiH praharatAM varaH | anarghAstraprahArI chAnarghadhanvA mahArghyapAt || 118|| yonimaNDalamadhyastho mukhayonirajR^imbhaNaH | mahAdrisadR^ishaH shvetaH shvetapuShpasraganvitaH || 119|| makarandapriyo nityaM mAsartuhAyanAtmakaH | nAnApuShpaprasUrnAnApuShpairarchitagAtrakaH || 120|| ShaDa~NgayoganirataH sadAyogArdramAnasaH | surAsuraniShevyA~NghrirvilasatpAdapa~NkajaH || 121|| suprakAshitavaktrAbjaH sitetaragalojjvalaH | vainateyasamArUDhaH sharadindusahasravat || 122|| jAjvalyamAnastejobhirjvAlapu~njo yamaH svayam | prajvaladvidyudAbhashcha sATTahAsabhaya~NkaraH || 123|| pralayAnalarUpI cha pralayAgniruchiH svayam | jagatAmekapuruSho jagatAM pralayAtmakaH || 124|| prasIda tvaM jagannAtha jagadyone namo.astu te || 125|| shrImahAdeva uvAcha\- evaM nAmasahasreNa rAj~nA vai saMstuto haraH | pratyakShamagamattasya suprasannamukhAmbujaH || 126|| sa taM vilokya tridashaikanAthaM pa~nchAnanaM shvetaruchiM prasannam | vR^iShAdhirUDhaM bhujagA~NgadairyutaM nanarta rAjA dharaNIbhujAM varaH || 127|| provAcha chedaM parameshvarAdya me etAni sarvANi sukhArthakAni | tapashcha homashcha manuShyajanma yattvAM prapashyAmi dR^ishA paresham || 128|| matto na dhanyosti mahItale vA svarge yatastvaM mama netragocharaH | surAsurANAmapi durlabhekShaNaH parAtparaH pUrNamayo nirAmayaH || 129|| tatastamevaM pratibhAShamANaM prAha prapanArtiharo maheshvaraH | kiM te manovA~nChitameva vidyate vR^iNuShva tatputra dadAmi tubhyam || 130|| sachAha pUrvaM kapilasya shApataH pAtAlarandhre mama pUrvavaMshajAH | bhasmIbabhUvuH sagarasya putrA mahAbalA devasamAnavikramAH || 131|| teShAM tu nistAraNakAmyayA hyahaM ga~NgAM dharaNyAmabhinetumIhe | sA tu tvadIyA paramA hi shaktiH vinAj~nayA te na hi yAti pR^ithvIm || 132|| tadetadichChAmi sametya ga~NgA kShitau mahAvegavatI mahAnadI | pravishya tasminvivare maheshvarI punAtu sarvAnsagarasya putrAn || 133|| ityevamAkarNya vachaH pareshvaraH provAcha vAkyaM kShitipAlapu~Ngavam | manorathaste.ayamavehi pUrNo mama prasAdAdachirAdbhaviShyati || 134|| ye chApi mAM bhaktita eva martyAH stotreNa chAnena nR^ipa stuvanti | teShAM tu pUrNAH sakalA manorathA dhruvaM bhaviShyanti mama prasAdAt || 135|| shrImahAdeva uvAcha\- ityevaM sa varaM labdhvA rAjA hR^iShTamanAstataH | daNDavatpraNipatyAha dhanyo.ahaM tvatprasAdataH || 136|| tatashchAntardadhe devaH kShaNAdeva mahAmate | rAjA nirvR^ittachetAH sa babhUva munisattama || 137|| rAj~nA kR^itamidaM stotraM sahasranAmasa.nj~nakam | yaH paThetparayA bhaktyA sa kaivalyamavApnuyAt || 138|| na cheha duHkhaM kutrApi jAyate tasya nArada | jAyate paramaishvaryaM prasAdAchcha maheshituH || 139|| mahApadi bhaye ghore yaH paThetstotramuttamam | shambhornAmasahasrAkhyaM sarvama~Ngalavardhanam || 140|| mahAbhayaharaM sarvasukhasampattidAyakam | sa muchyate mahAdevaprasAdena mahAbhayAt || 141|| durbhikShye lokapIDAyAM deshopadrava eva vA | sampUjya parameshAnaM dhUpadIpAdibhirmune || 142|| yaH paThetparayA bhaktyA stotraM nAmasahasrakam | na tasya deshe durbhikShaM na cha lokAdipIDanam || 143|| na chAnyopadravo vApi bhavedetatsunishchitam | parjanyo.api yathAkAle vR^iShTiM tatra karoti hi || 144|| yatredaM paThyate stotraM sarvapApapraNAshanam | sarvasasyayutA pR^ithvI tasmindeshe bhaveddhruvam || 145|| na duShTabuddhirlokAnAM tatrasthAnAM bhavedapi | nAkAle maraNaM tatra prANinAM jAyate mune || 146|| na hiMsrAstatra hiMsanti devadevaprasAdataH | dhanyA deshAH prajA dhanyA yatra deshe maheshvaram || 147|| sampUjya pArthivaM li~NgaM paThedyatredamuttamam | chaturdashyAM tu kR^iShNAyAM phAlgune mAsi bhaktitaH || 148|| yaH paThetparameshasya nAmnAM dashashatAkhyakam | stotramatyantasukhadaM na punarjanmabhAgbhavet || 149|| vAyutulyabalo nUnaM vihareddharaNItale | dhaneshatulyo dhanavAnkandarpasamarUpavAn || 150|| vihareddevatAtulyo nigrahAnugrahe kShamaH | ga~NgAyAM vA kurukShetre prayAge vA maheshvaram | paripUjya paThedyastu sa kaivalyamavApnuyAt || 151|| kAshyAM yastu paThedetatstotraM paramama~Ngalam | tasya puNyaM munishreShTha kimahaM kathayAmi te || 152|| etatstotraprasAdena sa jIvanneva mAnavaH | sAkShAnmaheshatAmeti muktirante karasthitA || 153|| pratyahaM prapaThedetadbilvamUle narottamaH | sa sAlokyamavApnoti devadevaprasAdataH || 154|| yo hyetatpAThayetstotraM sarvapApanibarhaNam | sa muchyate mahApApAtsatyaM satyaM vadAmi te || 155|| na tasya grahapIDA syAnnApamR^ityubhayaM tathA | na taM dviShanti rAjAno na vA vyAdhibhayaM bhavet || 156|| paThedetaddhR^idi dhyAtvA devadevaM sanAtanam | sarvadevamayaM pUrNaM rajatAdrisamaprabham || 157|| praphullapa~NkajAsyaM cha chArurUpaM vR^iShadhvajam| jaTAjUTajvalatkAlakUTashobhitavigraham || 158|| trishUlaM Damaru chaiva dadhAnaM dakShavAmayoH | dvIpicharmAmbaradharaM shAntaM trailokyamohanam || 159|| evaM hR^idi naro bhaktyA vibhAvyaitatpaThedyadi | iha bhuktvA paraM bhogaM paratra cha mahAmate || 160|| shambhoH svarUpatAM yAti kimanyatkathayAmi te || 161|| tatraiva sadbhaktiyutaH paThedidaM stotraM mama prItikaraM paraM mune | martyo hi yo.anyaH khalu so.api kR^ichChraM jagatpavitrAyata eva pApataH || 162|| || shrImahAbhAgavate upapurANe bhagIrathaproktaM shivasahasranAmastotraM sampUrNam || ## Encoded and proofread by DPD, Nithesh Bharadwaj Sivakumar \medskip\hrule\obeylines Please send corrections to sanskrit at cheerful dot c om Last updated \today https://sanskritdocuments.org \end{document}