भस्मासुरपुत्रदुरासदःकृता शिवस्तुतिः
त्वं जगत्कारणं देव परमानन्दविग्रहः ।
क्षराक्षरातीततनुर्गुणत्रयविकारकृत् ॥ ४९॥
गुणातीतो ज्ञानमयो व्यक्ताव्यक्तविधानवित् ।
मुनिध्येयतनुः सर्वभक्तानुग्रहकारकः ॥ ५०॥
ब्रह्माण्डानामनन्तानां हेतुः श्रेयस्करः सताम् ।
अखण्डानन्दपूर्णस्त्वममोघफलदायकः ॥ ५१॥
सर्वाधारः सर्वसहः सर्वशक्त्युपबृंहितः ।
पृथिवीवायुसलिलवह्नितेजः स्वरूपवान् ॥ ५२॥
अद्य धन्यं तपो नेत्रे पितरौ जन्म ते यतः ।
दृष्टं स्वरूपं साक्षान्मे गतं पापं लयं परम् ॥ ५३॥
योगित्दृच्छ्रुतिवाचो यो गोचरो न कदाचन ।
इदानीं वरये देव तन्मे त्वं दातुमर्हसि ॥
शिव उवाच ।
निश्शङ्कं वरयाशु त्वं सर्वं दास्येऽतिदुर्लभम् ॥ ५४॥
स्तोत्रेण तपसा चैव प्रणयेन सुतोषितः ।
मुनिरुवाच ।
ततो वव्रेऽयं देवात् सुप्रसन्नात् सदाशिवात् ॥ ५५॥
चतुराकरजेभ्यो मे मा मृत्युः सम्भवेदिति ।
यक्षरक्षःपिशाचेभ्यो देवदानवकिन्नरात् ॥ ५६॥
मुनिमानवगन्धर्वसर्पेभ्यो हि वनेचरात् ।
दृष्ट्वा रूपं मदीयं तु त्रसेयू रणमूर्द्धनि ॥ ५७॥
सर्वे देवा महाभाग ! सुरराज्यं चयच्छ मे ।
संस्मृतिश्चरणे नित्यं भक्तिस्तेऽव्यभिचारिणी ॥ ५८॥
शिव उवाच ।
एकां शक्तिं विना सर्वं देवेभ्योऽदायि तेऽभयम् ।
शक्तितेजोद्भवः कश्चिज्जित्वा सञ्जीवयिष्यति ॥ ५९॥
शिरसि स्थाप्य चरणं धरिष्यति निरन्तरं ।
निष्काशितो यदा तेन चरणस्ते शिरोगतः ॥ ६०॥
तदा पुनस्त्रिलोकीं त्वं बलाज्जेष्यसि तेजसा ।
भक्तिश्च मे दृढतरा स्मृतिस्ते वै भविष्यति ॥ ६१॥
गृत्समद उवाच ।
एवं दत्त्वा वराँस्तस्मै शिवोऽन्तर्धानमन्वगात् ।
दुरासदोऽपि स्वगृहमाययौ हर्षनिर्भरः ॥ ६२॥
इदं स्तोत्रं पठेद् यस्तु सर्वान् कामानवाप्नुयात् ॥ ६३॥
इति भस्मासुरपुत्र दुरासदःकृता शिवस्तुतिः सम्पूर्णा ॥
- ॥ श्रीगणेशपुराणं क्रीडा (उत्तर)खण्डः । अध्यायः ३८ । २.३८ ४९-६३॥
- .. shrIgaNeshapurANaM krIDA (uttara)khaNDaH . adhyAyaH 38 . 2.38 49-63..
Proofread by Preeti Bhandare