श्रीत्रिगुणेश्वरशिवस्तोत्रम्
आदर्श चिक्कण-कपोलतलं सुनासं
चञ्चत्बृहच्छवयुगं स्वलिनीलकण्ठम् ।
भोगोपमप्रथितसुन्दरदीर्घबाहुं
पद्मासने समुपविष्टमहं स्वतुष्टम् ॥ १॥
शान्तं त्रिनेत्रमलिकेब्जकलां वहन्तं
नागेन्द्रचर्मवसनं भुजगोपवीतम् ।
अन्तर्बहिश्च रमणीयतमस्वरूपं
विद्याऽमृताऽभयवराऽऽश्रयदानदक्षम् ॥ २॥
गौरीं गणेशसहितां दधतं निजाङ्गे
गौरं प्रसन्नमुखमम्बुजलचनाढ्यम् ।
गङ्गां स्वमूर्धनि जटापटले दधानं
ध्यायामि तं हृदि शिवं त्रिगुणेश्वर स्वम् ॥ ३॥
ब्रह्मा हरिर्हर इति त्रिगुणीमतीत्य
यस्तन्मयो वरकलो जयति त्रिलोक्याम् ।
विश्वप्रपञ्चरचनाचतुराय मह्यं
तस्मै नमो भगवते त्रिगुणेश्वराय ॥ ४॥
यं वैद्यनाथ इति वन्द्यजना वदन्ति
मृत्युञ्जय यमिह मर्त्यजनाः स्तुवन्ति ।
शं काङ्क्षिणः स्वमिह शङ्करमामनन्ति
तस्मै नमो भगवते त्रिगुणेश्वराय ॥ ५॥
वाचो बृहस्पतिमम निगदन्ति तिस्रो
वेदत्रयो सततमेन मिह स्तवीति ।
अग्नित्रयी ज्वलति यं श्रितवत्यजस्रं
तस्मै नमो भगवते त्रिगुणेश्वराय ॥ ६॥
धामयत्री परमधामनि साऽपि यस्मिन्
विश्रान्तिमेति परनिर्वृतिभावरम्ये ।
स्वेभ्यो ददाति कृपया तदपि प्रसन्न-
स्तस्मै नमो भगवते त्रिगुणेश्वराय ॥ ७॥
शक्तित्रयो घनतपाऽश्रयते यतोऽमुं
तुर्योऽपि पञ्चतनुते सततं कृतीः स्वाः ।
पञ्चाननः सुरनराऽसुरसङ्घपूज्य-
स्तस्मै नमो भगवते त्रिगुणेश्वराय ॥ ८॥
वैभूत्यवांस्त्रिदिवसेवितपादपोऽद्य
नाकार्थिनां विजयते सुखदः परोऽर्थम् ।
वह्नीन्दुसूर्यनयनः परमार्थसार-
कल्पःश्रियेऽस्तु स सतां त्रिगुणेशलीलः ॥ ९॥
स्वनिर्मितेन स्तोत्रेण प्रीण यँस्त्रिगुणेश्वरं
शमिच्छति समस्तानामार्चामृतवार्भवः ॥ १०॥
इति आचार्याऽमृतवाग्भवपादाः विरचितं श्रीत्रिगुणेश्वरशिवस्तोत्रं सम्पूर्णम् ।
Encoded and proofread by Aaditya Kalyanaraman aadityakalyaan at gmail.com