वीरेश्वरस्तुतिः - ४
॥ वीरेश्वरस्तुतिः - ४ - त्र्यक्षाक्षोभ्यापराधहरणार्थ निवेदनम् ॥
श्रीकाशीनाथ काशीपुररुचिरकथाकर्णनेन प्रवृत्तं
चित्तं मत्तं कथं वा कथमपि न तयोर्वर्णने वा प्रवीणम् ।
कर्ण शीर्णं न पुण्यं क्षणमपि निपुणं प्राणिनां प्रीणनं वा
त्र्यक्षाक्षोभ्यापराधान् हर हर करुणासारपूरैकसिन्धो ॥ १॥
पुण्यारण्यप्रकीर्णप्रणतसुरतरुश्रीयुतानन्दसङ्ग-
व्यासङ्गाभङ्गगङ्गोज्वलमिलिततलश्रीफलश्रीलमूले ।
तुङ्गं लिङ्गं निरङ्गं निगममनुगतं प्रोक्षितं दीक्षितं वा
त्र्यक्षाक्षोभ्यापराधान् हर हर करुणासारपूरैकसिन्धो ॥ २॥
स्नात्वा न ब्रह्मनाले सितभसितकृतोद्धूलनश्रीत्रिपुण्ड्र
श्रीरुद्राक्षावृताङ्गः कृतनियमविधिः स्वर्धुनीपूरतीरे ।
श्रीरुद्राध्यायवर्णप्रवणनिपुणधीर्न स्मरामि स्मरारिं
त्र्यक्षाक्षोभ्यापराधान् हर हर करुणापूरसारैकसिन्धो ॥ ३॥
संसारापारघोरज्वरकरख दिराङ्गारपूरप्रसार-
व्यापारा नेक शोकव्यतिकरनिकरव्याकुलो बाललीलः ।
काले कालेऽनुवेलप्रलयभयभयं न श्रयामो महेशं
त्र्यक्षाक्षोभ्यापराधान् हर हर करुणासारपूरैकसिन्धो ॥ ४॥
अश्रान्तानन्तचिन्ताहृदविततमतिः स्वान्तपद्मासनस्थं
स्वच्छं शान्तं नितान्तं नतममरगणैः संस्तुतं वेदसङ्घैः ।
अस्ताविद्याविलासव्यसनमतिमतं साधु नारोपयामः
त्र्यक्षाक्षोभ्यापराधान् हर हर करुणासारपूरैकसिन्धो ॥ ५॥
भस्माभ्यङ्गक्षणार्धप्रतिहतविमुखानङ्गमङ्गीकृताङ्ग
शाङ्गं गङ्गातरङ्गं प्रतिभटविलसद्भोगिभोगोत्तमाङ्गम् ।
तुङ्गोत्सङ्गाङ्गसङ्गप्रमुदितगिरिजालिङ्गिताङ्गं च नेडे
त्र्यक्षाक्षोभ्यापराधान् हर हर करुणापारपूरैकसिन्धो ॥ ६॥
मत्वा पापानुतापं पुनरपि जननक्लेशकोशावकाशं
श्रुत्वा काशीमशेषश्रुतिशिखरमतानन्दपीयूषराशिम् ।
श्रुत्वा प्याशातिपाशप्रशमनशमितं (शमनं) न श्रयामो नितान्तं
त्र्यक्षाक्षोभ्यापराधान् हर हर करुणासारपूरैकसिन्धो ॥ ७॥
वारं वारं स्मरामि स्मरहरचरणौ नादरेण क्षणेन
क्षीणप्राणप्रयाणक्षणकरणरणप्रेक्षणादक्षिणोऽपि ।
प्राणप्राणाग्निहोत्रव्रतहितनियमः कामकामप्रकामं
त्र्यक्षाक्षोभ्यापराधान् हर हर करुणासार पूरैकसिन्धो ॥ ८॥
स्मृत्वा स्मृत्वाऽपि कालज्वलदनलकुलस्तम्भसम्भारभार-
व्यापारारम्भभीतिं यमभटघटनाट्टाट्टहासोपहासान् ।
भीतो भीतोऽपि भूतप्रतिभटविषयैर्नार्चयामो यमारिं
त्र्यक्षाक्षोभ्यापराधान् हर हर करुणासारपूरैकसिन्धो ॥ ९॥
सानन्दं वेदवन्द्यं स्मरहरचरणाराधनध्यानदान-
व्यक्तासक्तस्वकर्मप्रतिभुवमभवं मोक्षदाने भव त्वाम् ।
न त्यक्ष्ये लक्षशोऽपि क्षणमपि मरणेऽप्यङ्घ्रिपद्मं तवेश
त्र्यक्षाक्षोभ्यापराधान् हर हर करुणापारपूरैकसिन्धो ॥ १०॥
नग्नो गौरीसहायस्स्मृतिजनितनिजानन्दसन्दोहमग्नो
लग्नस्वर्गापवर्गप्रदद मघहरापारलिङ्गार्चनेऽपि ।
नोद्विग्नः पापकोपप्रचुरविषयजापारदुःखाम्बुराशेः
त्र्यक्षाक्षोभ्यापराधान् हर हर करुणासारपूरैकसिन्धो ॥ ११॥
गर्भाविर्भावभोगव्यपगमसुगमोपायशीतांशुकाय-
श्रीपादाम्भोजपूजाजितनिजजननव्याजजातद्विजश्रीः ।
विज्ञाभिज्ञोनभिज्ञच्युतविततमतिर्नामृतं त्वां भजामि
त्र्यक्षाक्षोभ्यापराधान् हर हर करुणासारपूरैक सिन्धो ॥ १२॥
त्र्यक्ष स्वाश्रितरक्षकादिभवनाध्यक्षाधुना रक्ष मां
रक्ष्यं रक्ष्यमुपेक्षसे किमिति मां दक्षोऽपि मद्रक्षणे ।
भालाक्षाक्षरवीक्षणाक्षयमहाविक्षेपदाक्षायणी-
वक्षोजस्फुरदक्षविक्षयकृपालक्ष्यं परीक्ष्य क्षणम् ॥ १३॥
॥ इति शिवरहस्यान्तर्गते वीरेश्वरस्तुतिः - ४ - त्र्यक्षाक्षोभ्यापराधहरणार्थ निवेदनं सम्पूर्णम् ॥
बृहस्पतिशतानन्दसंवादे वीरेश्वरस्तुतिवर्णनं
- ॥ श्रीशिवरहस्यम् । हराख्यः तृतीयांशः । पूर्वार्धम् । अध्यायः ४७। ९१-१०३ ॥
- .. shrIshivarahasyam . harAkhyaH tRRitIyAMshaH . pUrvArdham . adhyAyaH 47. 91-103 ..
Proofread by Ruma Dewan