श्रीवेमुलवाडराजराजेश्वरसुप्रभातस्तोत्रम्
वेमुलवाड लेम्बालवाटिक ।
जागृहि त्वं महादेव जागृहि त्वं वृषध्वज ।
जागृहि त्वमुमानाथ जगतां मङ्गलं कुरु ॥ १॥
श्रीनाथपद्मभवजिष्णुमुखामरेन्द्राः
सेवाविनम्रशिरसः परितो ह्यतिष्ठन् ।
वाग्देवता पठति पूर्मथनादिगाथां
बालेन्दुशेखर विभो तव सुप्रभातम् ॥ २॥
शेफालिकावकुलवञ्जुलकुन्दजाती\-
पुन्नागचम्पककदम्बसरोजगन्धैः ।
रावाति शीतलपयःकणपूतवातः
लेम्बालवाटिकविभो तव सुप्रभातम् ॥ ३॥
वीणामृदङ्गमुरलीमुखविप्रभिन्न
सङ्गीतसङ्ग्रथितवाद्यसमेतगीतीः ।
गायन्त्यनल्पमलकाकलकण्ठकण्ठ्यं
लेम्बालवाटिकविभो तव सुप्रभातम् ॥ ४॥
श्रीमन्नतेष्टफलदायक दीनबन्धो
श्रीकण्ठ श्रीदसख श्रीकर प्रेमसिन्धो ।
श्रीपार्वतीप्रणयकेलिकलानिशान्त
लेम्बालवाटिकविभो तव सुप्रभातम् ॥ ५॥
श्रीमानसह्रदनिमग्नविनिर्मलाङ्गाः
बद्धाञ्जलि हित्रप्रणतोत्तमाङ्गाः ।
द्वारे वसन्ति विबुधा मुदितान्तरङ्गाः
लेम्बालवाटिकविभो तव सुप्रभातम् ॥ ६॥
केदारश्रीगिरिचिदम्बरसेतुबन्ध\-
वाराणसीपशुपतीश्वरधेनुकर्ण ।
तीर्थेषु मोदमनवाप्य त्वमागतोऽत्र
लेम्बालवाटिकविभो तव सुप्रभातम् ॥ ७॥
कूजन्ति वृक्षशिखरेषु मुदा विहङ्गाः
नन्दन्ति केलिसरसीषु मरालसङ्घाः ।
गुञ्जन्ति सन्दलिततामरसेषु भृङ्गाः
लेम्बालवाटिकविभो तव सुप्रभातम् ॥ ८॥
नृत्यन्ति सान्द्रतरुभूमिषु नीलकण्ठाः
क्रीडन्ति शाद्वलतलेषु शशाः कुरङ्गाः ।
जल्पन्ति पञ्जरशुकाः प्रहसन्ति कोकाः
लेम्बालवाटिकविभो तव सुप्रभातम् ॥ ९॥
पश्यन्ति यात्रिकजनास्तव गोपुराग्र\-
मायान्ति भूसुरगणास्तव धर्मकुण्डम् ।
ध्यायन्ति तापसवरा स्तव मन्त्रमूर्तिं
लेम्बालवाटिकविभो तव सुप्रभातम् ॥ १०॥
गङ्गा नगेन्द्रतनयाहृदयाधिराज
सङ्गीतलोल शरणागतकल्पभूज ।
श्रीदारुकावनमुनीन्द्रसतीमनोज
लेम्बालवाटिकविभो तव सुप्रभातम् ॥ ११॥
कैलासवास करुणाञ्चितमन्दहास
कर्पूरकुन्दकलहंसतनूविकास ।
कल्याणपूर्णगुणमानस चिद्विलास
लेम्बालवाटिकविभो तव सुप्रभातम् ॥ १२॥
सारङ्गनाभ घनसारविमिश्रितोद\-
कुम्भैर्घुमंघुमदपूर्वसुगन्धिगन्धैः ।
पुष्पैस्सुधूपनिकरैः फलबिल्वपत्रैः
प्रातस्समर्चनविधिं परिकल्पयन्ति ।
लेम्बालवाटिकविभो तव सुप्रभातम् ॥ १४॥
एलालवङ्गयुगपत्रकनागवल्ली-
खर्जूरपूगकदलीपनसादिरम्य- ।
माराममर्चयितुमाह्वयतीव भाति
लेम्बालवाटिकविभो तव सुप्रभातम् ॥ १५॥
प्रसार्य सूर्यस्समुदेति हस्तान्
नदीनदास्सिन्धुमनुव्रजन्ति ।
प्राचीमुखं प्राञ्जलिमादधानः
सन्ध्यामुपास्ते द्विजसञ्चयोऽयं
लेम्बालवाटिकविभो तव सुप्रभातम् ॥ १६॥
धृत्वा गले यदि मुदा विहरेत्पुमान् यः
स प्राप्नुयात्सुखमनङ्गकलाविलासम् ।
आयुश्श्रियं धियमधीतिसुवर्णमाशु
लेम्बालवाटिकविभो तव सुप्रभातम् ॥ १७॥
इति वेमुलवाड लेम्बालवाटिकसुप्रभातं समाप्तम् ।
श्रीराजराजेश्वरसुप्रभातं
Proofread by PSA Easwaran