व्यासमहर्षिप्रोक्तं रुद्रस्तोत्रम्
व्यास उवाच ।
नमो रुद्राय महते देवदेवाय शूलिने ।
त्र्यम्बकाय त्रिनेत्राय योगिनां गुरवे नमः ॥ १॥
नमोऽस्तु वामदेवाय महादेवाय वेधसे ।
शम्भवे स्थाणवे नित्यं शिवाय परमेष्ठिने ॥ २॥
नमः सोमाय रुद्राय महाग्रासाय हेतवे ।
प्रपद्येऽहं विरूपाक्षं शरण्यं ब्रह्मचारिणम् ॥ ३॥
महादेवं महायोगमीशानं चाम्बिकापतिम् ।
योगिनां योगदातारं योगमायासमावृतम् ॥ ४॥
योगिनां गुरुमाचार्यं योगिगम्यं पिनाकिनम् ।
संसारतारणं रुद्रं ब्रह्माणं ब्रह्मणोऽधिपम् ॥ ५॥
शाश्वतं सर्वगं शान्तं ब्रह्मण्यं ब्राह्मणप्रियम् ।
कपर्दिनं कालमूर्त्तिममूर्त्तिं परमेश्वरम् ॥ ६॥
एकमूर्त्तिं महामूर्त्तिं वेदवेद्यं दिवस्पतिम् ।
नीलकण्ठं विश्वमूर्त्तिं व्यापिनं विश्वरेतसम् ॥ ७॥
कालाग्निं कालदहनं कामदं कामनाशनम् ।
नमस्ये गिरिशं देवं चन्द्रावयवभूषणम् ॥ ८॥
विलोहितं लेलिहानमादित्यं परमेष्ठिनम् ।
उग्रं पशुपतिं भीमं भास्करं परमं तपः ॥ ९॥
इति कूर्मपुराणे पूर्वभागे त्रिंशाध्यायान्तर्गतं
व्यासमहर्षिप्रोक्तं शिवस्तोत्रं समाप्तम् ।
कूर्मपुराणे पूर्वभागे ३०/४४-५२
Proofread by PSA Easwaran