Shri Dandayudhapani Ashtakam

 श्रीदण्डायुधपाण्यष्टकम् 
यः पूर्वं शिवशक्तिनामकगिरिद्वन्द्वे हिडिम्बासुरे-
     णानीते फलिनीस्थलान्तरगते कौमारवेषोज्ज्वलः ।
आविर्भूय घटोद्भवाय मुनये भूयो वरान् प्रादिशत्
     श्रीदण्डायुधपाणिरात्तकरुणः पायादपायात्स माम् ॥ १॥

श्रीमत्पुष्यरथोत्सवेऽन्नमधुदुग्धाद्यैः पदार्थोत्तमैः
     नानादेशसमागतैरगणितैर्यः कावडीसम्भृतैः ।
भक्तौघैरभिषेचितो बहुवरांस्तेभ्यो ददात्यादरात्
     श्रीदण्डायुधपाणिरात्तकरुणः पायादपायत्स माम् ॥ २॥

नानादिग्भ्य उपागता निजमहावेशान्विताः सुन्दरीः
     तासामेत्य निशासु यः सुमशरानन्दानुभूतिच्छलात् ।
गोपीनां यदुनाथवन्निजपरानन्दं तनोति स्फुटं
     श्रीदण्डायुधपाणिरात्तकरुणः पायादपायात्स माम् ॥ ३॥

दुष्टानामिह भूतभाविभवतां दुर्मार्गसञ्चारिणां
     कष्टाहङ्कृतिजन्यकिल्बिषवशाच्छिष्टप्रविध्वंसिनाम् ।
शिक्षार्थं निजपाणिनोद्वहति यो दण्डाभिधानायुधं
     श्रीदण्डायुधपाणिरात्तकरुणः पायादपायात्स माम् ॥ ४॥

पूर्वं तारकसंज्ञक दितिसुतं यः शूरपद्मासुरं
     सिंहास्यं च निहत्य वासवमुखान् देवान् जुगोपाखिलान् ।
श्रीवल्ल्या सहितश्च निस्तुलयशाः श्रीदेवसेन्या युतः
     श्रीदण्डायुधपाणिरात्तकरुणः पायादपायात्स माम् ॥ ५॥

यस्याङ्गस्थितरोमकूपनिकरे ब्रह्माण्डकोटिच्छटाः
     सौधाग्रस्थगवाक्षरन्ध्रविचरत्पीलूपमा एव ताः ।
लक्ष्यन्ते यमिदृग्भिरात्मनि तथाभूतस्वविश्वाकृतिः
     श्रीदण्डायुधपाणिरात्तकरुणः पायादपायात्स माम् ॥ ६॥

सद्योजातमुखैश्च पञ्चवदनैः शम्भोः सहैकं मुखं
     पार्वत्या मिलितं विभाति सततं यद्वक्त्रषट्कात्मना ।
तत्तादृक् च्छिवशक्त्यभेदविषयव्यक्त्युज्ज्वलाङ्गं वहन्
     श्रीदण्डायुधपाणिरात्तकरुणः पायादपायात्स माम् ॥ ७॥

सत्यं ज्ञानमनन्तमद्वयमिति श्रुत्यन्तवाक्योदितं
     यद् ब्रह्मास्ति तदेव यस्य च विभोर्मूर्तेः  स्वरूपं विदुः ।
योगीन्द्रा विमलाशया हृदि निजानन्दानुभूत्युन्नताः
     श्रीदण्डायुधपाणिरात्तकरुणः पायादपायात्स माम् ॥ ८॥

इदं श्रीफलिनीदण्डायुधपाण्यष्टकस्तवम् ।
पठतामाशु सिध्यन्ति निखिलाश्च मनोरथाः ॥ ९॥

      ॥ इति श्रीदण्डायुधपाण्यष्टकं सम्पूर्णम् ॥


Proofread by Sreenivasa Rao Bhagavatula