गुहाष्टकम्
ॐ श्रीमहागणपतये नमः ।
वन्दे भानुसहस्रकोटिसदृशं वन्दे सुरेन्द्रार्चितं
वन्दे माल्यविभूषितं शिवसुतं वन्दे गुरूणां गुरुम् ।
वन्दे वेदकदम्बकैरभिनुतं वन्दे मयूरासनं
वन्दे सिद्धगणाश्रयं प्रतिदिनं वन्दे गुहं षण्मुखम् ॥ १॥
वन्दे पाटलदामशोभिततनुं वन्दे भवानीसुतं
वन्दे सिद्धसुरासुरेन्द्रनमितं वन्दे सुरारिद्विषम् ।
वन्दे पूर्णशशांङ्कमण्डलमुखं वन्दे द्विषण्नेत्रकं
वन्दे जहूनुसुतासुतं शिवकरं वन्दे गुहं षण्मुखम् ॥ २॥
वन्दे भक्तजनार्तिहं श्रुतिनुतं वन्दे कुमारं परं
वन्दे कोमलम्पादपल्लवमहं वन्दे शरादुद्भवम् ।
वन्दे कृत्तिकमातृकास्तनजपं वन्दे विभुं पावकिं
वन्दे कुङ्कुमरक्तवर्णमभयं वन्दे गुहं षण्मुखम् ॥ ३॥
वन्दे वज्रधरेण सेवितपदं वन्देऽनलादुद्भवं
वन्दे दण्डधरेण च प्रविनुतं वन्दे नराशिस्तुतम् ।
वन्दे पश्चिमदिक्पतिस्तुतगुणं वन्दे महत्पूजितं
वन्दे यक्षकृताश्रयं शिवगुरुं वन्दे गुहं षण्मुखम् ॥ ४॥
वन्दे रोगमहोरगस्य गरुडं वन्दे दयासागरं
वन्दे तारकसिंहशूरदमनं वन्दे निधीनां निधिम् ।
वन्दे मन्मथकोटिकोटिसदृशं वन्देऽरविन्दाननं
वन्दे जारशिखामणिं वरतनुं वन्दे गुहं षण्मुखम् ॥ ५॥
वन्दे वन्दनतत्परा भुवि जना वन्दे कृपालेशतो
वन्दे यस्य महाधनाः सुनयुता वन्दे भवन्ति स्म तम् ।
वन्दे दक्षिणदिङ्मुनिप्रियगुरुं वन्दे कलानां निधिं
वन्दे केशवभागिनेयमनिशं वन्दे गुहं षण्मुखम् ॥ ६॥
वन्दे मङ्गलदायकं कलियुगे वन्दे परोक्षस्थितं
वन्दे पालितसर्वलोकनिवहं वन्दे परं दैवतम् ।
वन्दे कुक्कुटकेतनं सुविदुषां वन्दे मुदां दायकं
वन्दे शक्तिधरं शिखीन्द्रगमनं वन्दे गुहं षण्मुखम् ॥ ७॥
वन्दे पातकतूलजालपवनं वन्दे वलारिस्तुतं
वन्दे लोकविमोहनं खलहरं वन्देऽखिलव्यापकम् ।
वन्दे सर्वसुखावहं स्वभजनाद् वन्दे मलध्वंसकं
वन्दे शैलसुतात्मजं सुखकरं वन्दे गुहं षण्मुखम् ॥ ८॥
वन्दे भूतपिशाचशासनपरं वन्दे सदा शाम्भवं
वन्दे घोरभयापमृत्युहरणं वन्दे नराणां गतिम् ।
वन्देऽगाधभवार्णवस्य तरणं वन्दे सुराणां पतिं
वन्दे शाश्वतभक्तिमुक्तिफलदं वन्दे गुहं षण्मुखम् ॥ ९॥
इति श्रीगुहाष्टकं समाप्तम् ।
Proofread by Sivakumar Thyagarajan Iyer