gIta-govinda-kAvyam prathamaH sargaH sAmoda-dAmodaraH meghair meduraM ambaraM vana-bhuvaH shyAmAs tamAla-drumair naktaM bhIrur ayaM tvam eva tad imaM rAdhe gR^ihaM prApaya | itthaM nanda-nideshatash chalitayoH praty-adhva-ku~nja-drumaM rAdhA-mAdhavayor jayanti yamunA-kUle rahaH-kelayaH ||1|| vAg-devatA-charita-chitrita-chitta-sadmA padmAvatI-charaNa-chAraNa-chakravartI | shrI-vAsudeva-rati-keli-kathA-sametaM etaM karoti jayadeva-kaviH prabandhaM ||2|| yadi hari-smaraNe sarasaM mano yadi vilAsa-kalAsu kutUhalaM | madhura-komala-kAnta-padAvalIM shR^iNu tadA jayadeva-sarasvatIm ||3|| vachaH pallavayaty umApatidharaH sandarbha-shuddhiM girAM jAnItejayadeva eva sharaNaH shlAghyo durUha-druteH | shR^i~NgArottara-sat-prameya-rachanair AchArya-govardhana- spardhI ko.api na vishrutaH srutidharo dhoyI kavi-kShmApatiH ||4|| || prathama-prabandhaH || mAlava-gauDa-rAgeNa rUpaka-talena giyate | aShTApadI | pralaya-payodhijale dhR^itavAn asi vedaM vihita-vahitra-charitram akhedam | keshava dhR^ita-mIna-sharIra jaya jagadIsha hare dhruva-padam ||5|| kShitir ativipulatare tava tiShThati pR^iShThe dharaNI-dharaNa-kina-chakra-gariShThe | keshava dhR^ita-kachchapa-rUpa jaya jagadIsha hare ||6|| vasati dashana-shikhare dharaNI tava lagnA shashini kala~Nka-kaleva nimagnA | keshava dhR^ita-sUkara-rUpa jaya jagadIsha hare ||7|| tava kara-kamala-vare nakhaM adbhuta-shR^i~NgaM dalita-hiraNyakashipu-tanu-bhR^i~NgaM | keshava dhR^ita-nara-hari-rUpa jaya jagad-Isha hare ||8|| Chalayasi vikramaNe balim adbhuta-vAmana pada-nakha-nIra-janita-jana-pAvana | keshava dhR^ita-vAmana-rupa jaya jagad-Isha hare ||9|| kShatrIya-rudhira-maye jagad apagata-pApaM snapayasi payasi shamita-bhava-tApam | keshava dhR^ita-bhR^igu-pati-rUpa jaya jagad-Isha hare ||10|| vitarasi dikShu raNe dik-pati-kamanIyaM dasha-mukha-mauli-bali ramaNIyam | keshava dhR^ita-rAma-sharIra jaya jagad-Isha hare ||11|| vahasi vapuShi viShade vasanaM jaladAbhaM hala-hati-bhIti-milita-yamunAbham | keshava dhR^ita-hala-dhara-rUpa jaya jagad-Isha hare ||12|| nindasi yaj~na-vidher ahaha shruti-jAtam sadaya-hR^idaya darshita-pashu-ghAtam | keshava dhR^ita-buddha-sharIra jaya jagad-Isha hare ||13|| mlechCha-nivaha-nidhane kalayasi karavAlaM dhUma-ketum iva kim api karAlam | keshava dhR^ita-kalki-sharIra jaya jagad-Isha hare ||14|| shri-jayadeva-kaver idam uditam udAraM shR^iNu sukhadaM shubhadaM bhava-sAram | keshava dhR^ita-dasha-vidha-rUpa jaya jagad-Isha hare ||15|| vedAn uddharate jaganti vahate bhUgolam udbibhrate daityaM dArayate baliM Chalayate kShatra-kShayaM kurvate | paulastyaM jayate halaM kalayate kAruNyam Atanvate mlechChAn mUrchChayate dashAkR^iti-kR^ite kR^iShNAya tubhyaM namaH ||16|| || prabandhaH 2 || gurjarI-rAga-niHsAra-tA1AbhyAM gIyate | shrita-kamalA-kucha-maNDala dhR^ita-kuNDala e kalita-lalita-vana-mAla jaya jaya deva hare ||17||dhruva-padam dina-maNi-maNDala-maNDana bhava-khaNDana e muni-jana-mAnasa-haMsa j aya jaya deva hare ||18|| kAliya-viSha-dhara-ga~njana jana-ra~njana e yadukula-nalina-dinesha jaya jaya deva hare ||19|| madhu-mura-naraka-vinAshana garuDAsana e | sura-kula-keli-nidAna jaya jaya deva hare ||20|| amala-kamala-dala-lochana bhava-mochana e tribhuvana-bhuvana-nidhAna jaya jaya deva hare ||21|| janaka-sutA-kR^ita-bhUShaNa jita-dUShaNa e samara-shamita-dasha-kaNTha jaya jaya deva hare ||22|| abhinava-jala-dhara-sundara dhR^ita-mandara e shrI-mukha-chandra-chakora jaya jaya deva hare ||23|| tava charaNaM praNatA vayam iti bhAvaya e kuru kushalaM praNateShu jaya jaya deva hare ||24|| shrI-jayadeva-kaver idaM kurute mudam e ma~Ngalam ujjvala-gItaM jaya jaya deva hare ||25|| padmA-payodhara-taTI-parirambha-lagna kashmIra-mudritam uro madhusUdanasya | vyaktAnurAgam iva khelad-ana~Nga-kheda- svedAmbu-pUram anupUrayatu priyaM vaH ||26|| vasante vasantI-kusuma-sukumArair avayavair bhramantIM kAntAre bahu-vihita-kR^iShNAnusaraNAm | amandaM kandarpa-jvara-janita-chintAkulatayA valad-bADhaM rAdhAM sarasam idam Uche saha-charI ||27|| || prabandhaH 3 || vasanta-rAga-yati-tAlAbhyAM gIyate | lalita-lava~Nga-latA-parishIlana-komala-malaya-samIre | madhukara-nikara-karambita-kokila-kUjita-ku~nja-kuTIre ||28|| viharati harir iha sarasa-vasante nR^ityati yuvatI-janena samaM sakhi virahi-janasya durante ||dhr|| unmada-madana-manoratha-pathika-vadhU-jana-janita-vilApe | ali-kula-sa~Nkula-kusuma-samUha-nirAkula-bakula-kalApe ||29|| mR^iga-mada-saurabha-rabhasa-vashaMvada-nava-dala-mAla-tamAle | yuva-jana-hR^idaya-vidAraNa manasija-nakha-ruchi-kiMshuka-jAle ||30|| madana-mahIpati-kanaka-daNDa-ruchi-keshara-kusuma-vikAshe | milita-shili-mukha-pATala-paTala-kR^ita-smara-tUNa-vilAse ||31|| vigalita-lajjita-jagad-avalokana-taruNa-karuNa-kR^ita-hAse | virahi-nikR^intana-kunta-mukhAkR^iti-ketaka-danturitAshe ||32|| mAdhavika-parimala-lalite nava-mAlati-jAti-sugandhau | muni-manasAm api mohana-kArINi taruNa||-karaNa-bandhau ||33|| sphurad-atimukta-latA-parirambhana-muku1ita-pulakita-chUte | vR^indAvana-vIpine parIsara-parigata-yamunA-jala-pUte ||34|| shrI-jayadeva-bhaNitam idam udayati hari-charaNa-smR^iti-sAram | sarasa-vasanta-samaya-vana-varNanam anugata-madana-vikAram ||35|| dara-vidalita-mallI-valli-cha~nchat-parAga- prakaTita-paTa-vAsair vAsayan kAnanAni | iha hi dahati chetaH ketakI-gandha-bandhuH prasarad-asama-bANa-prANavad-gandhavAhaH ||36|| unmIlan-madhu-gandha-lubdha-madhupa-vyAdhUta-chUtA~Nkura- krIDat-kokila-kAkalI-kalakalair udgIrNa-karNa-jvaraH | nIyante pathikaiH kathaM katham api dhyAnAvadhAna-kShaNa prApta-prANa-samAgama-rasollAsair amI vAsarAH ||37|| aneka-nArI-parirambha-sambhrama- sphuraN-manohAri-vilAsa-lAlasam | murArim ArAd upadarshayanty asau sakhI samakShaM punar Aha rAdhikAm ||38|| || prabandhaH 4 || rAmakarI-rAga-yati-tAlAbhyAM gIyate | chandana-charchita-nIla-kalevara-pIta-vasana-vana-mAlI | keli-chalan-maNi-kuNDala-maNDita-gaNDa-yuga-smita-shAlI ||39|| harir iha mugdha-vadhU-nikare vilAsini vilAsati kelI-pare ||dhr|| pIna-payodhara-bhAra-bhareNa hariM parirabhya sarAgam | gopa-vadhUr anugAyati kAchid uda~nchita-parama-rAgam ||40|| kApi vilAsa-vilola-vilochana-khelana-janita-manojam | dhyAyati mugdha-vadhUr adhikaM madhusUdana-vadana-sarojam ||41|| kapi kapola-tale militA lapituM kim api shruti-mUle | chAru chuchumba nitambavatI dayitaM pulakair anukUle ||42|| keli-kalA-kutukena cha kAchid amuM yamunA-jala-kUle | ma~njula-va~njula-ku~nja-gataM vichakarSha kareNa dukUle ||43|| kara-tala-tAla-tarala-valayAvali-kalita-kalasvana-vaMshe | rAsa-rase saha-nR^itya-parA hariNa-yuvatI-prashashaMse ||44|| shliShyati kAm api chumbati kAm api kAm api ramayati rAmAm | pashyati sa-smita-chAru-tarAm aparAm anugachChati vAmAm ||45|| shrI-jayadeva-bhaNitam idam adbhuta-keshava-keli-rahasyam | vR^indAvana-vipine lalitaM vitanotu shubhAni yashasyam ||46|| vishveShAm anura~njanena janayann Anandam indIvara- shreNI-shyAmala-komalair upanayann a~Ngair ana~Ngotsavam | svachChandaM vraja-sundarIbhir abhitaH praty-a~Ngam Ali~NgitaH shR^i~NgAraH sakhi mUrtimAn iva madhau mugdho hariH krIDati ||47|| nijotsa~Nga-vasad-bhuja~Nga-kavala-kleshAd iveshAchalaM prAleya-plavanechChayAnusarati shrI-khaNDa-shailAnilaH | kiM cha snigdha-rasAla-mauli-mukulAny Alokya harShodayAd unmIlanti kuhUH kuhUr iti kalottAlAH pikAnAM giraH ||48|| rAsollAsa-bhareNa vibhrama-bhR^itAm AbhIra-vAma-bhruvAm abhyarNaM parirabhya nirbharam uraH premAndhayA rAdhayA | sAdhu tvad-vadanaM sudhA-mayam iti vyAhR^itya gIta-stuti- vyAjAd udbhaTa-chumbitaH smR^ita-manohAri hariH pAtu vaH ||49|| dvitIyaH sargaH aklesha-keshavaH viharati vane rAdhA sAdhAraNa-praNaye harau vigalita-nijotkarShAd IrShyA-vashena gatA.anyataH | kvachid api latA-ku~nje gu~njan-madhu-vrata-maNDalI mukhara-shikhare lIna dInApy uvAcha rahaH sakhIm ||1|| || prabandhaH 5 || gurjarI-rAgeNa yati-tAlena gIyate | sa~ncharad-adhara-sudhA-madhura-dhvani-mukharita-mohana-vaMsham | chalita-dhR^ig-a~nchala-cha~nchala-mauli-kapola-vilola-vataMsam | rAse harim iha vihita-vilAsM smarati mano mama kR^ita-parihAsam ||dhruva-padam ||2|| chandraka-chAru-mayUra-shikhaNDaka-maNDala-valayita-kesham | prachura-purandara-dhanur-anura~njita-medura-mudira-suvesham ||3|| gopa-kadamba-nitambavatI-mukha-chumbana-lambhita-lobham | bandhujIva-madhurAdhara-pallavam ullasita-smita-shobham ||4|| vipula-pulaka-bhuja-pallava-valayita-ballava-yuvati-sahasram | kara-charaNorasi maNi-gaNa-bhUShaNa-kiraNa-vibhinna-tamisram ||5|| jalada-paTala-chalad-indu-vinindaka-chandana-tilaka-lalATam | pIna-payodhara-parisara-mardana-nirdaya-hR^idaya-kapATam ||6|| maNi-maya-makara-manohara-kuNDala-maNDita-gaNDam udAram | pIta-vasanam anugata-muni-manuja-surAsura-vara-parivAram ||7|| vishada-kadamba-tale militaM kali-kaluSha-bhayaM shamayantam | mAm api kim api tarala-tara~Ngad-ana~Nga-dR^ishA manasA ramayantam ||8|| shrI-jayadeva-bhaNitam atisundara-mohana-madhu-ripu-rUpam | hari-charaNa-smaraNaM prati samprati puNyavatAm anurUpam ||9|| gaNayati guNa-grAmaM bhrAmaM bhrAmAd api nehate vahati cha paritoShaM doShaM vimu~nchati dUrataH | yuvatiShu valat-tR^iShNe kR^iShNe viharati mAM vinA punar api mano vAmaM kAmaM karoti karomi kim ||10|| || prabandhaH 6 || mAlava-gauDa-rAgena ekatAlI-tAlena cha gIyate | nibhR^ita-niku~nja-gR^ihaM gatayA nishi rahasi nilIya vasantam | chakIta-vilokita-sakala-dishA rati-rabhasa-bhareNa hasantam ||11|| sakhi he keshI-mathanam udAram ramaya mayA saha madana-manoratha-bhAvitayA sa-vikAram ||dhruvam || prathama-samAgama-lajjitayA paTu-chATu-shatair anukUlam | mR^idu-madhura-smita-bhAShitayA shithilI-kR^ita-jaghana-dukUlam ||12|| kIsala-shayana-niveshitayA chiram urasi mamaiva shayAnam | kR^ita-parirambhaNa-chumbanayA parirabhya kR^itAdhara-pAnam ||13|| alasa-nimIlita-lochanayA pulakAvali-lalita-kapolam | shrama-jala-sakala-kalevarayA vara-madana-madAd atilolam ||14|| kokila-kala-rava-kUjitayA jita-manasija-tantra-vichAram | shlatha-kusumAkula-kuntalayA nakaha-likhita-ghana-stana-bhAram ||15|| charaNa-raNita-maNi-nUpurayA paripUrita-surata-vitAnam | mukhara-vishR^i~Nkhala-mekhalayA sakacha-graha-chumbana-dAnam ||16|| rati-sukha-samaya-rasAlasayA dara-mukulita-nayana-sarojam | niHsaha-nipatita-tanu-latayA madhusUdanam udita-manojam ||17|| shri-jayadeva-bhaNitam idam atishaya-madhu-ripu-nidhuvana-shIlam | sukham utkaNThita-gopa-vadhU-kathitaM vitanotu salilaM ||18|| hasta-srasta-vilAsa-vaMsham anR^iju-bhrU-vallimad-ballavI- vR^indotsAri-dR^iganta-vIkShitam atisvedArdra-gaNDa-sthalam | mAm udvIkShya vilajjitaM smR^ita-sudhA-mugdhAnana-kAnane govindaM vraja-sundarI-gaNa-vR^itaM pashyAmi hR^iShyAmi cha ||19|| durAloka-stoka-stavaka-navakashoka-latikA- vikAsaH kAsAropavana-pavano.api vyathayati | api bhrAmyad-bhR^i~NgI-raNita-ramanIyA na mukula- prasUtish chUtAnAM sakhi shikhariNIyaM sukhayati ||20|| sakUta-smitam akulAkula-galad-dhammillam ullAsita- bhrU-vallIkam alIka-darshita-bhujA-mUlordhva-hasta-stanam | gopInAM nibhR^itaM nirIkShya gamitAkA~NkShash chiraM chintayann antar mugdha-manoharaM haratu vaH kleshaM navaH keshavaH ||21|| tR^itIyaH sargaH mugdha-madhusUdanaH kaMsArir api saMsAra-vAsanAbaddha-shR^i~NkhalAm | rAdhAm AdhAya hR^idaye tatyAja vraja-sundarIH ||1|| itas tatas tAm anusR^itya rAdhikAm ana~Nga-bANa-vraNa-khinna-mAnasaH | kR^itAnutApaH sa kalinda-nandinI- taTAnta-ku~nje viShasAda mAdhavaH ||2|| prabandhaH 7 || gurjarI-rAga-yati-tAlAbhyAM gIyate | mAm iyaM chalitA vilokya vR^itaM vadhU-nichayena | sAparAdhatayA mayApi na vAritA.atibhayena ||3|| hari hari hatAdaratayA gatA sA kupiteva ||dhruva-padam || kiM kariShyati kiM vadiShyati sA chiraM viraheNa | kiM dhanena janena kiM mama jIvitena gR^iheNa ||4|| chintayAmi tad-AnanaM kuTila-bhrU kopa-bhareNa | shona-padmam ivopari-bhramatAkulaM bhramareNa ||5|| tAm ahaM hR^idi sa~NgatAm anIshaM bhR^ishaM ramayAmi | kiM vane.anusarAmi tAm iha kiM vR^ithA vilapAmi ||6|| tanvi khinnam asUyayA hR^idayaM tavAkalayAmi | tan na vedmi kuto gatAsi na tena te.anunayAmi ||7|| dR^ishyase purato gatAgatam eva me vidadhAsi | kiM pureva sasambhramaM parirambhaNaM na dadAsi ||8|| kShamyatAm aparaM kadApi tavedR^ishaM na karomi | dehi sundari darshanaM mama manmathena dunomi ||9|| varNitaM jayadevakena harer idaM pravaNena | kindubilva-samudra-sambhava-rohiNI-ramaNena ||10|| hR^idi bisa-latA-haro nAyaM bhuja~Ngama-nAyakah kuvalaya-dala-shreNI kaNThe na sA garala-dyutiH | malayaja-rajo nedaM bhasma priya-rahite mayi prahara na hara-bhrAntyA.ana~Nga krudhA kim u dhAvasi ||11|| pANau mA kuru chUta-sAyakam amuM mA chApam Aropaya kR^iIDA-nirjita-vIshva mUrchChita-janAghAtena kiM pauruSham | tasyA eva mR^igI-dR^isho manasija preNkhat-katAkShAshuga- shreNI-jarjaritaM manAg api mano nAdyApi sandhukShate ||12|| bhrU-pallavaM dhanur apA~Nga-taraNgitAni bANA guNaH shravaNa-pAlir iti smareNa | tasyAm ana~Nga-jaya-ja~Ngama-devatAyAm astrAaNi nirjita-jaganti kim arpitAni ||13|| bhrU-chApe nihitaH kaTAkSha-vishikho nirmAtu marma-vyathAM shyAmAtmA kuTilaH karotu kabarI-bhAro.api mArodyamam | mohaM tAvad ayaM cha tanvi tanutAM bimba-dharo rAgavAn sad-vR^ittaH stana-maNDalas tava kathaM prANair mama krIDati ||14|| tAni sparsha-sukhAni te cha taralaH snigdhA dR^ishor vibhramAs tad-vaktrAmbuja-saurabhaM sa cha sudhA-syandi girA- vakrimA | sa bimbAdhara-mAdhurIti viShayAsa~Nge.api chen mAnasaM tasyAM lagna-samAdhi hanta viraha-vyAdhiH kathaM vardhate ||15|| tiryak-kaNTha-vilola-mauli-taralottaMsasya vamshochcharad- gIta-sthAna-kR^itAvadhAna-lalanA-lakShair na samlakShitAH | sammugdhe madhusUdanasya madhure rAdhA-mukhendau sudhA- sAre kandalitAsh chiraM dadatu vaH kShemaM kaTAkShormayaH ||16|| chaturthaH sargaH snigdha-madhusUdanaH yamunA-tIra-vAnIra-niku~nje mandaM AsthitaM | prAha-prema-bharodbhrAntaM mAdhavaM rAdhikA-sakhI ||1|| || prabandhaH 8 || karNATa-rAgaika-tAlI-tAlAbhyAM gIyate | nindati chandanam indukiraNam anu vindati khedam adhIram | vyAla-nilaya-milanena garalam iva kalayati malaya-samIram ||2|| mAdhava manasija-vishikha-bhayAd iva bhavad-avanayA tvayi lInA | sA virahe tava dInA ||dhruva-padam || avirala-nipatita-madana-sharAd iva bhavad-avanAya vIshAlam | sva-hR^idaya-marmaNi varma karoti sajala-nalinI-dala-jAlam ||3|| kusuma-vishikha-shara-talpam analpa-vilAsa-kalA-kamaNIyam | vratam iva tava parirambha-sukhAya karoti kusuma-shayanIyam ||4|| vahati cha chalita-vi1ochana-jala-bharam Anana-kamatam udAram | vidhum iva vikaTa-vidhuntuda-danta-dalana-galitAmR^ita-dhAram ||5|| vilikhati rahasi kura~Nga-madena bhavantam asama-shara-bhUtam | praNamati makaram adho vinidhAya kare cha sharaM nava-chUtam ||6|| dhyAna-layena puraH parikalpya bhavantam atIva durApam | vilapati hasati viShIdati roditi cha~nchati mu~nchati tApam ||7|| prati-padam idam api nigadati mAdhava tava charaNe patitAham | tvayi vimukhe mayi sapadi sudhA-nidhir api tanute tanu-dAham ||8|| shrI-jayadeva-bhaNitam idam adhikaM yadi manasA naTaNIyam | hari-viraha-kula-ballava-yuvati-sakhI-vachanaM paThanIyam ||9|| AvAso vipinAyate priya-sakhI-malApi jAlAyate tApo.api shvasitena dAvadahana-jvAla-kalApAyate | sApi tvad-viraheNa hanta hariNI-rUpAyate hA kathaM kandarpo.api yamAyate virachayan shArdUla-vikrIDitam ||10|| || prabandhaH 9 || deshAkha-rAgaika-tAlI-tAlAbhyAM gIyate | stana-viniHitam api hAram udAram | sa manute kR^ishA-tanur iva bhAram ||11|| rAdhikA tava virahe keshava ||dhruva-padam || sarasa-masR^iNam api malayaja-pa~Nkam | pashyAti viSham iva vapuShi sasha~Nkam ||12|| shvasita-pavanam anupama-pariNAham | madana-dahanam iva vahati sadAham ||13|| dishi dishi kirati sajala-kaNa-jAlam | nayana-nalinam iva vigalita-nAlam ||14|| tyajati na pAni-talena kapolam | bAla-shashinam iva sAyam alolam ||15|| nayana-viShayam api kisalaya-talpaM | kalayati vihita-hutAsha-vikalpam ||16|| harir iti harir iti japati sakarNam | viraha-vihita-maraNeva nikAmaM ||17|| sri-jayadeva-bhaNitam iti gItam | sukhayatu keshava-padam upanItam |||18|| sa romA~nchati sIt-karoti vilapaty utkampate tAmyati dhyAyaty udbhramati pramIlati pataty udyati mUrchChaty api | etAvaty atanu-jvare vara-tanur jIven na kiM te rasAt svar-vaidya-pratimA prasIdasi yadi tyakto.anyathA hastakaH ||19|| smarAturaM daivata-vaidya-hR^idya tvad-a~Nga-sa~NgAmR^ita-mAtra-sAdhyam | nivR^itta-bAdhAM kuruShe na rAdhAm upendra vajrAd api dAruNo.asi ||20|| kandarpa-jvara-saMjvarAtura-tanor ashcharyam asyAsh chiraM chetash chandana-chandramaH-kamalinI-chintAsu santAmyati | kintu klAnti-vashena shItala-tanuM tvAm ekam eva priyaM dhyAyantI rahasi sthitA katham api kShINA kShaNaM prANiti ||21|| kShaNam api virahaH purA na sehe nayana-nimIlana-khinnayA yayA te | shvasiti katham asau rasAla-shAkhAM chira-viraheNa vilokya puShpitAgram ||22|| vR^iShTi-vyAkula-gokula-vana-rasAd uddhR^itya govardhanaM bibhrad ballava-vallabhAbhir adhikAnandAch chiraM chumbitaH | darpeNeva tad-arpitAdhara-taTI-sindUra-mudrA~Nkito bAhur gopa-tanos tanotu bhavatAM shreyAMsi kaMsa-dviShaH ||23|| pa~nchamaH sargaH sAkA~NkSha-puNDarIkAkShaH aham iha nivasAmi yAhi rAdhAm anunaya mad-vachanena chAnayethAH | iti madhu-rIpuNA sakhI niyuktA svayam idam etya punar jagAda rAdhAm ||1|| || prabandhaH 10 || deshIvarADi-rAgeNa rUpaka-tAlena gIyate | vahati malaya-samIre madanam upanidhAya | sphuTati kusuma-nikare virahi-hR^idaya-dalanAya ||2|| tava virahe vana-mAlI sakhi sIdati | dhruva-padam || dahati shishira-mayUkhe maraNam anukaroti | patati madana-vishikhe vilapati vikalataro.ati ||3|| dhvanati madhupa-samUhe shravaNam apidadhAti | manasi kalita-virahe nishi nisi rujam upayAti ||4|| vasati vipina-vitAne tyajati lalita-dhAma | luThati dharaNi-shayane bahu vilapati tava nAma ||5|| bhaNati kavi-jayadeve viraha-vilasitena | manasi rabhasa-vibhave harir udayatu sukR^itena ||6|| pUrvaM yatra samaM tvayA rati-pater AsAditAH siddhayas tasminn eva niku~nja-manmatha-mahA-tIrthe punar mAdhavaH | dhyAyaMs tvAm anishaM japann api tavaivAlApa-mantrAvaliM bhUyas tvat-kucha-kumbha-nirbhara-parIrambhAmR^itaM vA~nChati ||7|| || prabandhaH 11 || gurjarI-rAgeNa ekatAli-tAlena gIyate | rati-sukha-sAre gatam abhisAre madana-manohara-vesham | na kuru nitambini gamana-vilambanam anusara taM hR^idayesham || dhIra-samIre yamunA-tIre vasati vane vana-mali ||dhruva|| ||8|| 9||nAma-sametaM kR^ita-sa~NketaM vAdayate mR^idu-veNum | bahu manute.atanu te tanu-sa~Ngata-pavana-chalitam api reNum || 10||patati patatre vichalati patre sha~Nkita-bhavad-upayAnam | rachayati shayanaM sachakita-nayanaM pashyati tava panthAnam || 11||mukharam adhIraM tyaja ma~njIraM ripum iva keli-sulolam | chala sakhi ku~njaM satimira-pu~njaM shIlaya nIla-nicholam || 12||urasi murArer upahita-hAre ghana iva tarala-balAke | taDid iva pIte rati-viparIte rAjasi sukR^ita-vipAke || 13||vigalita-vasanaM parihR^ita-rashanaM ghaTaya jaghanam apidAnam | kisalaya-shayane pa~Nkaja-nayane nidhim iva harSha-nidhAnam || 14||harir abhimANI rajanir idAnIm iyam api yAti virAmam | kuru mama vachanaM satvara-rachanaM pUraya madhu-ripu-kAmam || 15||shrI-jayadeve kR^ita-hari-seve bhaNati parama-ramaNIyam | pramudita-hR^idayaM harim atisadayaM namata sukR^ita-kamanIyaM || vikirati muhuH shvAsAn AshAH puro muhur IkShate pravishati muhuH ku~njaM gU~njan muhur bahu tAmyati | rachayati muhuH shayyAM paryAkulaM muhur IkShate madana-kadana-klAntaH kAnte priyas tava vartate ||16|| tvad-vAmyena samaM samagram adhunA tigmAMshur astaM gato govindasya manorathena cha samaM prAptaM tamaH sAndratAm | kokAnAM karuNa-svanena sadR^ishI dIrgha-mad-abhyarthanA tan mugdhe viphalaM vilambanam asau ramyo.abhisAra-kShaNaH ||17|| AshleShAd anu chumbanAd anu nakho-lekhAd anu svAntaja- prodbodhAd anu sambhramAd anu ratArambhAd anu prItayoH | anyArthaM gatayor bhramAn militayoH sambhAShaNair jAnator dampatyor iha ko na ko na tamasi vrIDA-vimishro rasaH ||18|| sa-bhaya-chakitaM vinyasyantIM dR^ishaM timire pathi pratitaru muhuH sthitvA mandaM padAni vitanvatIm | katham api rahaH prAptAm a~Ngair ana~Nga-taraNgibhiH sumukhi subhagaH pashyan sa tvAm upaitu kR^itArthatAm ||19|| rAdhA-mugdha-mukhAravinda-madhupas trailokya-mauli-sthalI nepathyochita-nIla-ratnam avanI-bhArAvatArAntakaH | svachChandaM vraja-sundarI-jana-manas-toSha-pradoShodayaH kaMsa-dhvaMsana-dhUma-ketur avatu tvAM devakI-nandanaH ||20|| ShaShThaH sargaH sotkaNTha-vaikuNThaH atha tAM gantum ashaktAM chiram anuraktAM latA-gR^ihe dR^iShTvA | tach-charitaM govinde manasija-mande sakhI prAha ||1|| || prabandhaH 12 || guNakarI-rAgena rUpaka-tAlena gIyate | pashyati dishi dishi rahasi bhavantam | tad-adhara-madhura-madhUni pibantam ||2|| nAtha hare sIdati rAdhA.avAsa-gR^ihe ||dhruva-padam || tvad-abhisaraNa-rabhasena valantI | patati padAni kiyantI chalantI ||3|| vihita-vishada-bisa-kisalaya-valayA | jIvati param iha tava rati-kalayA ||4|| muhur avalokita-maNDana-lIlA | madhu-ripur aham iti bhAvana-shIlA ||5|| tvaritam upaiti na katham abhisAram | harir iti vadati sakhIm anuvAram ||6|| shliShyati chumbati jala-dhara-kalpam | harir upagata iti timiram analpam ||7|| bhavati vilambini vigalita-lajjA | vilapati roditi vAsaka-sajjA ||8|| shrI-jayadeva-kaver idam uditam | rasika-janaM tanutAm atimuditam ||9|| vipula-pulaka-pAliH sphIta-sIt-kAram antar- janita-jaDimam-kAku-vyAkulaM vyAharantI | tava kitava vidhAyAmanda-kandarpa-chintAM rasa-jala-nidhi-magnA dhyAna-lagnA mR^igakShI ||10|| a~NgeShv AbharaNaM karoti bahushaH patre.api sa~nchAriNI prAptaM tvAM parisha~Nkate vitanute shayyAM chiraM dhyAyati | ity Akalpa-vikalpa-talpa-rachanA-sa~Nkalpa-lIlA-shata- vyAsaktApi vinA tvayA vara-tanur naiShA nishAM neShyati ||11|| kiM vishrAmyasi kR^iShNa-bhogi-bhavane bhANDIra-bhUmI-ruhi bhrAtar yAsi na dR^iShTi-gocharam itaH sAnanda-nandAspadam | rAdhAyA vachanaM tad adhvaga-mukhAn nandAntike gopato govindasya jayanti sAyam atithi-prAshastya-garbhA giraH ||12|| saptamaH sargaH nAgara-nArAyaNaH atrAntare cha kulaTA-kula-vartma-ghATa sa~njAta-pAtaka iva sphuTa-lA~nChana-shrIH | vR^indAvanAntaram adIpayad aMshu-jAlair dik-sundarI-vadana-chandana-bindur induH ||1|| prasarati shasha-dhara-bimbe vihita-vilambe cha mAdhave vidhurA | virachita-vividha-vilApaM saparitApaM chakArochchaiH ||2|| || prabandhaH 13 || mAlava-rAga-yati-tAlAbhyAM gIyate | kathita-samaye.api harir ahaha na yayau vanam | mama viphalam idam amala-rUpam api yauvanam ||3|| yAmi he kam iha sharaNaM sakhI-jana-vachana-va~nchitA ||dhruva|||| yad-anugamanAya nishi gahanam api shilitam | tena mama hR^idayam idam asama-shara-kIlitam ||4|| mama maraNam eva varam iti vitatha-ketanA | kim iha viShahAmi virahAnalam achetanA ||5|| mAm ahaha vidhurayati madhura-madhu-yAminI | kApi harim anubhavati kR^ita-sukR^ita-kAminI ||6|| ahaha kalayAmi valayAdi-maNi-bhUShaNam | hari-viraha-dahana-vahanena bahu-dUShaNam ||7|| kusuma-sukumAra-tanum atanu-shara-lIlayA | srag api hR^idi hanti mAm ativiShama-shilayA ||8|| aham iha nivasAmi na-gaNita-vana-vetasA | smarati madhusUdano mAm api na chetasA ||9|| hari-charaNa-sharaNa-jayadeva-kavi-bhAratI | vasatu hR^idi yuvatir iva komala-kalAvatI ||10|| tat-kiM kAm api kAminIm abhisR^itaH kiM vA kalA-kelibhir baddho bandhubhir andhakAriNi vanAbhyarNe kim udbhrAmyati | kAntaH klAnta-manA manAg api pathi prasthAtum evAkShamaH sa~NketI-kR^ita-ma~nju-vA~njula-latA-ku~nje.api yan nAgataH ||11|| athAgatA mAdhavam antareNa sakhIm iyaM vIkShya viShAda-mUkAm | visha~NkamAnA ramitaM kayApi janArdanaM dR^iShTavad etad Aha ||12|| || prabandhaH 14 || vasanta-rAga-yati-tAlAbhyAM gIyate | smara-samarochita-virachita-veshA | galita-kusuma-dara-vilulita-keshA ||13|| kApi madhuripuNA vilasati yuvatir adhika-guNA ||dhruva|||| hari-parirambhana-chalita-vikArA | kucha-kalashopari taralita-hArA ||14|| vichalad-alaka-lalitAnana-chandrA | tad-adhara-pAna-rabhasa-kR^ita-tandrA ||15|| cha~nchala-kuNDala-dalita-kapolA | mukharita-rashana-jaghana-gati-lolA ||16|| dayita-vilokita-lajjita-hasitA | bahu-vidha-kUjita-rati-rasa-rasitA ||17|| vipula-pulaka-pR^ithu-vepathu-bha~NgA | shvasita-nimIlita-vakasad-ana~NgA ||18|| shrama-jala-kaNa-bhara-subhaga-sharIrA | paripatitorasi rati-raNa-dhIrA ||19|| shrI-jayadeva-bhaNita-hari-ramitam | kali-kaluShaM janayatu parishamitam ||20|| viraha-pANDu-murAri-mukhAmbuja- dyutir ayaM tirayann api vedanAm | vidhur atIva tanoti mano-bhuvaH suhR^id aye hR^idaye madana-vyathAm ||21|| || prabandhaH 15 || gurjarI-rAgaika-tAli-tAlena gIyate | samudita-madane ramaNI-vadane chumbana-valitAdhare | mR^iga-mada-tilakaM likhati sapulakaM mR^igam iva rajanI-kare ||22|| ramate yamunA-pulina-vane vijayI murArir adhunA ||dhruva|||| ghana-chaya-ruchire rachayati chikure taralita-taruNAnane | kurubaka-kusurnaM chapalA suShamaM rati-pati-mR^iga-kAnane ||23|| ghaTayati sughane kucha-yuga-gagaNe mR^iga-mada-ruchi-rUShite | maNi-saram arnalaM tAraka-paTalaM nakha-pada-shashi-bhUShite ||24|| jita-bisa-shakale mR^idu-bhuja-yugale kara-tala-nalinI-dale | marakata-valayaM madhu-kara-nichayaM vitarati hima-shitale ||25|| rati-gR^iha-jaghane vipulApaghane manastja-kanakAsane | maNi-maya-tashanaM toraNa-hasanaM vikirati ktta-vasane||26|| charaNa-kisalaye kamala-nilaye nakha-maNi-gaNa-pUjite | bahir-apavaraN aM ya-vaka-bharaN aM janayati hR^idiyojite ||27|| ramayati subhR^ishaM kam api sudR^ishaM khala-hala-dhara-sodare | kim aphalam avasaM chiram iha virasaM vada sakhi viTapodare ||28|| iha rasa-bhaNane kR^ita-hari-guNane madhu-ripu-pada-sevake | kali-yuga-rachitaM na vasatu duritaM kavi-nR^ipa-jayadevake ||29|| nayataH sakhi nirdayo yadi shaThas tvaM dUti kiM dUyase svachChandaM bahu-vallabhaH sa ramate kiM tatra te dUShaNam | pashyAdy priya-sa~NgamAya dayitasyAkR^iShyamANaM guNair utkaNThArti-bharAd iva sphuTad idaM chetaH svayam yAsyati ||30|| || prabandhaH 16 || deshavarADi-rAgeNa rUpaka-tAlena gIyate | anila-tarala-kuvalaya-nayanena | tapati na sA kisalaya-shayanena ||31|| sakhi yA ramitA vana-mAlinA ||dhruva-padam || vikasita-sarasija-lalita-mukhena | sphuTati na sa manasija-vishikhena ||32|| amR^ita-madhura-mR^idu-tara-vachanena | jvalati na sa malayaja-pavanena ||33|| sthala-jala-ruha-ruchi-kara-charaNena | luThati na sA hima-kara-kiraNena ||34|| sajalajalada-samudaya-ruchireNa | dalati na sA hR^idi chira-viraheNa ||35|| kanaka-nikaSha-ruchi-shuchi-vasanena | shvasiti na sA parijana-hasanena ||36|| sakala-bhuvana-jana-vara-taruNena | vahati na sA rujam atikaruNena ||37|| shrI-jayadeva-bhaNita-vachanena | pravishatu harir api hR^idayam anena ||38|| mano-bhavAnandana-chandanAnila prasIda re dakShiNa mu~ncha vAmatAm | kShaNaM jagat-prANa nidAya mAdhavaM puro mama prANa-haro bhaviShyasi ||39|| ripur iva sakhi-saMvAso.ayaM shikhIva himAnilo viSham iva sudhA-rashmir yasmin dunoti mano-gate | hR^idayam adaye tasminn aivaM punar valate balAt kuvalaya-dR^ishAM vAmaH kAmo nikAma-niraNkushaH ||40|| bAdhAM vidhehi malayAnila pa~ncha-bANa prANAn gR^ihANa na gR^ihaM punar AshrayiShye | kiM te kR^itAnta-bhagini kShamayA tara~Ngair a~NgAni si~ncha mama shAmyatu deha-dAhaH ||41|| prAtar-nIla-nicholam achyutam uraH saMvIta-pItAMshukaM rAdhAyAsh chakitaM vilokya hasati svairaM sakhi-maNDale | vrIDA-cha~nchalam a~nchalaM nayanayor AdhAya rAdhAnane svAdu-smera-mukho.ayam astu jagad-AnandAya nandAtmajaH ||42|| aShTamaH sargaH vilakShya-lakShmIpatiH atha katham api yAminIM vinIya smara-shara-jarjaritApi sA prabhAte | anunaya-vachanaM vadantam agre praNatam api priyaM Aha sAbhyasUyam ||1|| || prabandhaH 17 || bhairavi-rAga-yati-tAlAbhyAM gIyate | rajani-janita-guru-jAgara-rAga-kaShAyitam alasa-niveshaM | vahati nayanam anurAgam iva sphUm udita-rasa-bhinivesham ||2|| han hari yAhi mAdhava yAhi keshava mA vada kaitava-vAdaM | tam anusara sarasI-ruha-lochana yA tava harati viShAdam ||dhr|||| kajjala-malina-vilochana-chumbana-virachita-nIlima-rUpam | dashana-vasanam aruN aM tava krsNa tanoti tanor anurUpaM ||3|| vapur anuharati tava smara-sa~Ngara-khara-nakhara-kShata-rekham | marakata-shakala-kalita-kala-dhauta-liper iva rati-jaya-lekham ||4|| charaNa-kamala-galad-alaktaka-siktam idaM tava hR^idayam udAraM | darsayatIva bahir madana-drurna-nava-kisalaya-parivAram ||5|| dashana-padaM bhavad-adhara-gataM mama janayati chetasi khedam | kathayati katham adhunApi mayA saha tava vapur etad abhedam ||6|| bahir iva malinataraM tava kR^iShNa mano.api bhaviShyati nUnam | katham atha va~nchayase janam anugatam asama-shara-jvara-dUnam ||7|| bhramati bhavAn abalA-kavalAya vaneShu kim atra vichitram | prathayati pUtanikaiva vadhU-vadha-nirdaya-bAla-charitram ||8|| shrI-jayadeva-bhaNita-rati-va~nchita-khaNDita-yuvati-vilApam | shR^iNuta sudhA-madhuraM vibudhA vibudhAlayato.api durApam ||9|| tavedaM pashyantyAH prasarad-anurAgaM bahir iva priya-pAdAlakta-chChuritam aruNa-dyoti hR^idayam | mamAdya prakhyAta-praNaya-bhara-bha~Ngena kitava tvad-AlokaH shokAd api kim api lajjAM janayati ||10|| antar-mohana-mauli-ghUrNana-chalan-mandAra-vibhraMshana- stambhAkarShaNa-dR^ipti-harShaNa-mahA-mantraH kura~NgI-dR^ishAm | dR^ipyad-dAnava-dUyamAna-diviShad-durvAra-duHkha-padAM bhraMshaH kaMsa-ripor vyapohayatu vaH shreyAMsi vaMshI-ravaH ||11|| navamaH sargaH mugdha-mukundaH tam atha manmatha-khinnAM rati-rabhasa-bhinnAM viShAda-sampannAm anuchintita-hari-charitAM kalahAntaritam uvAcha rahasi sakhI ||1|| || prabandhaH 18 || gurjarI-rAga-yati-tAlAbhyAM gIyate | harir abhisarati vahati madhu-pavane | kim aparam adhika-sukhaM sakhi bhavane ||2|| mAdhave mA kuru mAnini mAnam aye ||dhruva-padam || tAla-phalAd api gurum atisarasam | kiM viphalI-kuruShe kucha-kalasham ||3|| kati na kathitam idam anupadam achiram | mA parihara harim atIshaya-ruchiram ||4|| kim iti viShIdasi rodiShi vikalA | vihasati yuvatI-sabhA tava sakalA ||5|| sajala-nalinI-dala-shItala-shayane | harim avalokaya saphalaya nayane ||6|| janayasi manasi kim iti guru-khedam | shR^iNu mama vachanam anIhita-bhedam ||7|| harir upayAtu vadatu bahu-madhuram | kim iti karoShi hR^idayam atividhuram ||8|| shrI-jayadeva-bhaNitam atilalitaM | sukhayatu rasika-janaM hari-charitaM ||9|| snigdhe yat paruShAsi praNamati stabdhAsi yad rAgiNi dveShasthAsi yad unmukhe vimukhatAM yAtAsi tasmin priye | tad yuktaM viparIta-kAriNi tava shrI-khaNDa-charchA viShaM shItAMshus tapano himaM hutavahaH krIDA-mudo yAtanAH ||10|| sAndrAnanda-puraM-darAdi-diviShad-vR^indair amandAdarAd Anamrair mukuTendra-nIla-maNibhiH sandarshitendivaram | svachChandaM makaranda-sundara-galan-mandAkinI-meduraM shrI-govinda-padAravindam ashubha-skandAya vandAmahe ||11|| dashamaH sargaH chatura-chatur-bhujaH atrAntare.amasR^iNa-roSha-vashAm apAra- niHshvAsa-niHsaha-mukhIM sumukhIm upetya | savrIDam IkShita-sakhI-vadanAM dinAnte sAnanda-gadgada-padaM harir ity uvacha ||1|| || prabandhaH 19 || deshavarADi-rAgAShTAtAlI-tAlAbhyAM gIyate | vadasi yadi ki~nchid api danta-ruchi-kaumudI harati dara-timiram atighoram | sphurad-adhara-sIdhave tava vadana-chandramA rochayatu lochana-chakoraM ||2|| priye chAru-shIle mu~ncha mayi mAnam anidAnaM | sapadi madanAnalo dahati mama mAnasam dehi mukha-kamala-madhu-pAnaM ||dhruva-padaM || satyam evAsi yadi sudati mayi kopinI dehi khara-nakhara-shara-ghAtam | ghaTaya bhuja-bandhanaM janaya rada-khaNDanaM yena vA bhavati sukha-jAtaM ||3|| tvam asi mama bhUShaNaM tvam asi mama jIvanaM tvam asi mama bhava-jaladhi-ratnam | bhavatu bhavatIha mayi satatam anurodhinI tatra mama hR^idayam atiyatnaM ||4|| nIla-nalinAbham api tanvi tava lochanaM dhArayati koka-nada-rUpaM | kusuma-shara-bANa-bhAvena yadi ra~njayasi kR^iShNam idam etad anurUpam ||5|| sphuratu kucha-kumbhayor upari maNi-ma~njarI ra~njayatu tava hR^idaya-desham | rasatu rashanApi tava ghana-jaghana-maNDale ghoShayatu manmatha-nidesham ||6|| sthala-kamala-ga~njanaM mama hR^idaya-ra~njanaM janita-rati-ra~Nga-parabhAgam | bhaNa masR^iNa-vANi karavANi charaNa-dvayaM sarasa-lasad-alaktaka-rAgam ||7|| smara-garala-khaNDanaM mama shirasi maNDanaM dehi pada-pallavam udAram | jvalati mayi dAruNo madana-kadanAruNo haratu tad-upAhita-vikAram ||8|| iti chaTula-chATu-paTu-chAru mura-vairiNo rAdhikAm adhi vachana-jAtam | jayatu jayadeva-kavi-bhAratI-bhUShitaM mAninI-jana-janita-shAtam ||9|| parihara kR^itAta~Nke sha~NkAM tvayA satataM ghana- stana-jaghanayAkrAnte svAnte parAn-avakAshinI | vishati vitanor anyo dhanyo na ko.api mamAntaraM praNayini parIrambhArambhe vidhehi vidheyatAm ||10|| mugdhe vidhehi mayi nirdaya-danta-daMsha- dor-valli-bandha-niviDa-stana-pIDanAni | chaNDi tvam eva mudam udvaha pa~ncha-bANa- chANDAla-kANDa-dalanAd asavaH prayAnti ||11|| shashi-mukhi tava bhAti bha~Ngura-bhrUr yuva-jana-moha-karAla-kAla-sarpI | tad-udita-bhaya-bha~njanAya yUnAM tvad-adhara-sIdhu-sudhaiva siddha-mantraH ||12|| vyathayati vR^ithA maunaM tanvi prapa~nchaya pa~nchamaM taruNi madhurAlApais tApaM vinodaya dR^iShTibhiH | sumukhi vimukhI-bhAvaM tAvad vimu~ncha na mu~ncha mAM svayam atishaya-snigdho mugdhe priyo.ayam upasthitaH ||13|| bandhUka-dyuti-bAndhavo.ayam adharaH snigdho madhUka-chChavir gaNDash chaNDi chakAsti nIla-nalina-shrI-mochanaM lochanam | nAsAbhyeti tila-prasUna-padavIM kundAbha-danti priye prAyas tvan-mukha-sevayA vijayate vishvaM sa puShpAyudhaH ||14|| dR^ishau tava madAlase vadanam indu-sandIpanaM gatir jana-manoramA vijitArambhaM Uru-dvayam | ratis tava kalAvatI ruchira-chitra-lekhe bhruvAv aho vibudha-yauvataM vahasi tanvi pR^ithvI-gatA ||15|| sa prItiM tanutAM hariH kuvalayApIDena sArdhaM raNe rAdhA-pIna-payodhara-smaraNa-kR^it-kumbhena sambhedavAn | yatra svidyati mIlati kShaNam api kShipraM tad-Alokana- vyAmohena jitaM jitaM jitam abhUt kaMsasya kolAhalaH ||16|| ekAdashaH sargaH sAnanda-dAmodaraH suchiram anunayena prINayitvA mR^igAkShIM gatavati kR^itaveshe keshave ku~nja-shayyAm | rachita-ruchira-bhUShAM dR^iShTi-moShe pradoShe sphurati niravasAdaM kApi rAdhAM jagAda ||1|| || prabandhaH 20 || vasanta-rAga-yati-tAlAbhyAM gIyate | virachita-chATu-vachana-rachanaM charaNe rachita-praNipAtam | samprati ma~njula-va~njula-sImani keli-shayanam anuyAtaM ||2|| mugdhe madhu-mathanam anugatam anusara rAdhike ||dhruva|||| ghana-jaghana-stana-bhAra-bhare dara-manthara-charaNa-vihAram | mukharita-maNi-ma~njIram upaihi vidhehi marAla-vikAram ||3|| shR^iNu ramaNIyataraM taruNI-jana-mohana-madhupa-virAvam | kusuma-sharAsana-shAsana-bandini pika-nikare bhaja bhAvam ||4|| anila-tarala-kisalaya-nikareNa kareNa latA-nikurambam | preraNam iva karabhoru karoti gatiM prati muncha vilambam ||5|| sphuritam ana~Nga-tara~Nga-vashAd iva sUchita-hari-parirambham | pR^ichCha manohara-hAra-vimala-jala-dhAram amuM kucha-kumbham ||6|| adhigatam akhila-sakhIbhir idaM tava vapur api rati-raNa-sajjam | chaNDi rasita-rashanA-rava-DiNDimam abhisara sarasam alajjam ||7|| smara-shara-subhaga-nakhena sakhIm avalambya kareNa salIlam | chala valaya-kvaNitair avabodhaya harim api nija-gati-shIlaM ||8|| shrI-jayadeva-bhaNitam adharIkR^ita-hAram udAsita-vAmam | hari-viniHita-manasAm adhitiShThatu kaNTha-taTIm avirAmam ||9|| sA mAM drakShyati vakShyati smara-kathAM praty-a~Ngam Ali~NganaiH prItiM yAsyati raMsyate sakhi samAgatyeti chintAkulaH | sa tvAM pashyAti vepate pulakayaty Anandati svidyati pratyudgachChati mUrchChati sthira-tamah-pu~nje niku~nje prIyaH ||10|| akShNor nikShipad a~njanaM shravaNayos tApichCha-guchChAvaliM mUrdhni shyAma-saroja-dAma kuchayoH kastUrikA-patrakam | dhUrtAnAm abhisara-sambhrama-jUShAM viShva~N-niku~nje sakhi dhvAntaM nIla-nichola-chAru sudR^ishAM praty-a~Ngam ali~Ngati ||11|| kAshmIra-gaura-vapuSham abhisArikAnAM Abaddha-rekham abhito ruchi ma~njarIbhiH | etat tamAla-dala-nIlatamaM tamisraM tat-prema-hema-nikaShopalatAM tanoti ||12|| hArAvalI-tarala-kA~nchana-kA~nchi-dAma keyUra-ka~NkaNa-maNi-dyuti-dIpitasya | dvAre niku~nja-nilayasya hariM nirIkShya brIDAvatim atha sakhIM Iyam ity uvacha ||13|| || prabandhaH 21|| varADi-rAga-rUpaka-tAlAbhyAM gIyate | ma~njutara-ku~nja-tala-keli-sadane | vilasa rati-rabhasa-hasita-vadane ||14|| pravisha rAdhe mAdhava-samIpam iha ||dhruva-padaM || nava-lasad-ashoka-dala-shayana-sAre | vilasa kucha-kalasha-tarala-hAre ||15|| kusuma-chaya-rachita-shuchi-vAsa-gehe | vilasa kusuma-sukumAra-dehe ||16|| mR^idu-chala-malaya-pavana-surabhi-shIte | vilasa madana-shara-nikara-bhIte ||17|| vitata-bahu-valli-nava-pallava-ghane | vilasa chiram alasa-pIna-jaghane ||18|| madhu-mudita-madhupa-kula-kalita-rAve | vilasa madana-rasa-sarasa-bhAve ||19|| madhuratara-pIka-nikara-ninada-mukhare | vilasa dashana-ruchi-ruchira-shikhare ||20|| vihita-padmAvati-sukha-samAje | kuru murAre ma~Ngala-shatAni | bhaNati jayadeva-kavi-rAja-rAje ||21|| tvaM chittena chiraM vahann ayam atishrAnto bhR^ishaM tApitaH kandarpeNa cha pAtum ichChati sudhA-sambAdha-bimbAdharam | asyA~NkaM tad ala~Nkuru kShaNam iha bhrU-kShepa-lakShmI-lava- krIte dAsa ivopasevita-padAmbhoje kutaH sambhramaH ||22|| sa sasAdhvasa-sAnandaM govinde lola-lochanA | si~njAna-ma~nju-ma~njIraM praviveshAbhiveshanam ||23|| || prabandhaH 22 || varADi-rAga-yati-tAlAbhyAM gIyate | rAdhA-vadana-vilokana-vikasita-vividha-vikAra-vibha~Ngam | jala-nidhim iva vidhu-maNDala-darshana-taralita-tu~Nga-tara~Ngam ||24|| harim eka-rasaM chiram abhilaShita-vilAsam | sA dadarsha guru-harSha-vashaMvada-vadanam ana~Nga-nivAsaM || dhr|| hAram amalatara-tAram urasi dadhataM parilambya vidUram | sphuTatara-phena-kadamba-karambitam iva yamunA-jala-pUram ||25|| shyAmala-mR^idula-kalevara-maNDalam adhigata-gaura-dukUlam | nIla-nalinam iva pita-parAga-paTala-bhara-valayita-mUlam ||26|| tarala-dR^ig-a~nchala-chalana-manohara-vadana-janita-rati-rAgam | sphuTa-kamalodara-khelita-kha~njana-yugam iva sharadi taDAgam ||27|| vadana-kamala-parishIlana-milita-mihira-sama-kuNDala-shobham | smita-ruchi-ruchira-samullasitAdhara-pallava-kR^ita-rati-lobham ||28|| shashi-kiraNa-chChuritodara-jaladhara-sundara-sakusuma-kesham | timirodita-vidhu-maNDala-nirmala-malayaja-tilaka-nivesham ||29|| vIpula-pulaka-bhara-danturitaM rati-keli-kalAbhir adhIraM | maNi-gaNa-kiraNa-samUha-samujjvala-bhUShaNa-subhaga-sharIram ||30|| shrI-jayadeva-bhaNita-vibhava-dviguNIkR^ita-bhUShaNa-bhAram | praNamata hR^idi vinidhAya hariM suchiraM sukR^itodaya-sAram ||31|| atikramyApA~NgaM shravaNa-patha-paryanta-gamana- prayAsenevAkShNos taralatara-tAraM gamitayoH | idAnIM rAdhAyAH priyatama-samAloka-samaye papAta svedAmbu-prasara iva harShAshru-nikaraH ||32|| bhajantyAs talpAntaM kR^ita-kapaTa-kaNTUti-pihita- smitaM yAte gehAd bahir avahitAlI-parijane | priyAsyaM pashyantyAH smara-paravashAkUta-subhagaM salajjA-lajjApi vyagamad iva dUraM mR^iga-dR^ishaH ||33|| sAnandaM nanda-sUnur dishatu mitaparaM saMmadaM manda-mandaM rAdhAm AdhAya bAhvor vivaram anu drDhaM pIDayan prIti-yogAt | tu~Ngau tasyA urojAv atanu-varatanor nirgatau mA sma bhUtAM pR^iShThaM nirbhidya tasmAd bahir iti valita-grIvam Alokayan vaH ||34|| jaya-shrI-vinyastair mahita iva mandAra-kusumaiH svayaM sindUreNa dvipa-raNa-mudA mudrita iva | bhujApIDa-krIDA-hata-kuvalayApIDa-kariNaH prakIrNAsR^ig-bindur jayati bhuja-daNDo murajitaH ||35|| saundaryaika-nidher ana~Nga-lalanA-lAvaNya-lIlA-juSho rAdhAyA hR^idi palvale manasija-krIDaika-ra~Nga-sthale | ramyoroja-saroja-khelana-rasitvAd AtmanaH khyApayan dhyAtur mAnasa-rAja-haMsa-nibhatAM deyAn mukundo mudam ||36|| dvAdashaH sargaH suprIta-pItAmbaraH gatavati sakhI-vR^inde.amanda-trapA-bhara-nirbhara- smara-paravashAkUta-sphIta-smita-snapitAdharam | sarasa-mAnasaM dR^iShTvA rAdhAM muhur nava-pallava- prasava-shayane nikShiptAkShIm uvAcha hariH priyAm ||1|| || prabandhaH 23 || vibhAsa-rAgaikatAli-tA1AbhyAM gIyate | kisalayashayana-tale kuru kAmini charaNa-nalina-vinivesham | tava pada-pallava-vairi-parAbhavam idam anubhavatu suveshaM ||2|| kShaNam adhunA nArAyaNam anugatam anusara rAdhike ||dhruva|| kara-kamalena karomi charaNam aham AgamitAsi vidUram | kShaNam upakuru shayanopari mAm iva nUpuram anugati-shUram ||3|| vadana-sudhA-nidhi-galitam amR^itam iva rachaya vachanam anukUlam | viraham ivApanayAmi payodhara-rodhakam urasi dukUlaM ||4|| priya-parirambhaNa-rabhasa-valitam iva pulakitam atiduravApam | mad-urasi kucha-kalashaM viniveshaya shoShaya manasija-tApam ||5|| adhara-sudhA-rasam upanaya bhAmini jIvaya mR^itam iva dAsam | tvayi vinihita-manasaM virahAnala-dagdha-vapuSham avilAsam ||6|| shashi-mukhi mukharaya maNi-rashanA-guNam anuguNa-kaNTha-ninAdam | shruti-yugale pika-ruta-vikale mama shamaya chirAd avasAdam ||7|| mAm ativiphala-ruShA vikalI-kR^itam avalokitum adhunedam | lajjitam iva nayanaM tava viramati visR^ija vR^ithA rati-khedam ||8|| shrI-jayadeva-bhaNitam idam anupada-nigadita-madhu-ripu-modam | janayatu rasika-janeShu manorama-rati-rasa-bhAva-vinodam ||9|| pratyUha-pulakA~NkureNa niviDa-lesha-nimeSheNa cha krIDAkUta-vilokite.adhara-sudhA-pAne kathA-kelibhiH | AnandAdhigamena manmatha-kalA-yuddhe.api yasminn abhud udbhUtaH sa tayor babhUva suratArambhaH priyambhAvukaH ||10|| dorbhyAM saMyamitaH payodhara-bhareNApIDitaH pANijair Aviddho dashanaiH kShatAdhara-puTaH shroNI-taTenAhataH | hastenAnamitaH kache.adhara-madhu-syandena saMmohitaH kAntaH kAm api tR^iptim Apa tad aho kAmasya vAmA gatiH ||11|| mArA~Nke rati-keli-sa~Nkula-raNArambhe tayA sAhasa- prAyaM kAnta-jayAya kiMchid upari prArambhi yat-sambhramAt | niShpandA jaghana-sthalI shithilitA dor-vallir utkampitaM vakSho militam akShi pauruSha-rasaH strINAM kutaH sidhyati ||12|| tasyAH pATala-pANijA~Nkitam uro nidrA-kAShAye dR^ishau nirdhautAdhara-shonimA vilulita-srasta-srajo mUrdha-jaH | kA~nchI-dAma dara-shlathA~nchalam iti prAtar nikhAtair dR^ishor ebhiH kAmasharais tad-adbhutam abhUt patyur manaH kIlitaM ||13|| vyAlolaH kesha-pAshas taralitam alakaiH sveda-mokShau kapolau kliShTA bimbAdhara-shrIH kucha-kalasha-ruchA hAritA hAra-yaShTiH | kA~nchI-kAntir hatAshA stana-jaghana-padaM pANinAchChadya sadyaH pashyantI satrapA sA tad api vilulitA mugdha-kantir dhinoti ||14|| IShan-mIlita-dR^iShTi mugdha-vilasat-shItkAra-dhArA-vashAd avyaktAkula-keli-kAku-vikasad-dantAMshu-dhautAdharam | shAnta-stabdha-payodharaM bhR^isha-pariShva~NgAt kura~NgI-dR^isho harShotkarSha-vimukta-niHsaha-tanor dhanyo dhayaty AnanaM ||15|| atha sahasA suprItaM suratAnte sA nitAnta-khinnA~Ngi | rAdhA jagAda sAdaram idam Anandena govindam ||16|| || prabandhaH 24 || rAmakari-rAga-yati-tAlAbhyAM gIyate | kuru yadu-nandana chandana-shishiratareNa kareNa payodhare | mR^iga-mada-patrakam atra mano-bhava-ma~Ngala-kalasha-sahodare ||17|| nijagAda sA yadu-nandane krIDati hR^idaya-nandane ||dhruva|||| ali-kula-ga~njanam a~njanakaM rati-nAyaka-sAyaka-mochane | tvad-adhara-chumbana-lambita-kajjala ujjvalaya pnya lochane ||18|| nayana-kura~Nga-tara~Nga-vikasa-nirAsa-kare shruti-maNDale | manasija-pAsha-vilAsa-dhare shubha-vesha niveshaya kuNDale ||19|| bhramara-chayaM rachayantam upari ruchiraM suchiraM mama sammukhe | jita-kamale vimale parikarmaya narma-janakam alakaM mukhe ||20|| mR^iga-mada-rasa-valitaM lalitaM kuru tilakam alika-rajani-kare | vihita-kala~Nka-kalaM kamalAnana vishramita-shrama-sIkare ||21|| mama ruchire chikure kuru mAnada manasija-dhvaja-chAmare | rati-galite lalite kusumAni shikhaNDi-shikhaNDaka-DAmare ||22|| sarasa-ghane jaghane mama shambara-dAraNa-vAraNa-kandare | maNi-rashanA-vasanAbharaNAni shubhAshaya vAsaya sundare ||23|| shrI-jayadeva-vachasi ruchire sadayaM hR^idayaM kuru maNDane | hari-charaNa-smaraNAmR^ita-nirmita-kali-kaluSha-jvara-khaNDane ||24|| rachaya kuchayosh chitraM patraM kuruShva kapolayor ghaTaya jaghane kA~nchIM mugdha-srajA kabari-bharaM | kalaya valaya-shreNIM pANau pade maNi-nUpurAv iti nigaditaH prItaH pitAmbaro.api tathAkarot ||25|| parya~NkI-kR^ita-nAga-nAyaka-phaNA-shreNI-maNInAM gaNe sa~NkrAnta-pratibimba-samvalanayA bibhrad-vibhu-prakriyAm | pAdAmbho-ruha-dhAri-vAridhi-sutAm akShNAM didR^ikShuH shataiH kAya-vyUham iva-charann apachitau bhUyo hariH pAtu vaH ||26|| tvAm aprApya mayi svayaMvara-parAM kShIroda-tIrodare sha~Nke sundari kAlakUTam apiban mUDho mR^idAnI-patiH | itthaM pUrva-kathAbhir anya-manasA vikShipya vakSho.a~nchalaM rAdhAyAH stana-korakopari-milan-netro hariH pAtu vaH ||27|| yad gAndharva-kalAsu kaushalam anudhyAnaM cha yad vaiShNavaM yach ChR^i~NgAra-viveka-tattva-rachanA-kAvyeShu lIlAyitam | tat sarvaM jayadeva-paNDita-kaveH kR^iShNaika-tAnAtmanaH sAnandAH parishodhayantu sudhiyaH shri-gIta-govindataH ||28|| sAdhUnAM svata eva saMmatir iha syAd eva bhaktyArthinAm Alochya grathana-shramaM cha vidusAm asmin bhaved AdaraH | ye kechit para-kR^ity-upashruti-parAs tAn arthaye mat-kR^itiM bhUyo vIkShya vadanto avadyam iha chet sA vAsanA sthAsyati ||29|| shrI-bhojadeva-prabhavasya rAmAdevI-suta-shrI-jayadevakasya | parAsharAdi-pnya-varga-kaNThe shrI-gIta-govinda-kavitvam astu ||30|| sAdhvI mAdhvIka chintA na bhavati bhavataH sharkare karkashAsi drAkShe drakShyanti ke tvAm amR^ita mR^itam asi kShIra nIraM rasaste | mAkanda kranda kAntAdhara dhara na tulAM gachCha yachChanti bhAvaM yAvach ChR^i~NgAra-sAraM shubham iva jayadevasya vaidagdhya-vAchaH ||31|| itthaM keli-tatir vihR^itya yamunA-kUle samaM rAdhayA tad-romAvali-mauktikAvali-yuge veNI-bhramaM bibhrati | tatrAhlAdi-kucha-prayAga-phalayor lipsAvator hastayor vyApArAa puruShottamasya dadatu sphItAM mudaM sampadaM ||32||