% Text title            : Tejobindu Upanishad
% File name             : tejobindu.itx
% Category              : upanishhat
% Location              : doc\_upanishhat
% Author                : Vedic tradition
% Transliterated by     : Sunder Hattangadi
% Proofread by          : Sunder Hattangadi
% Description-comments  : 37/108; Krishna Yajurveda- Yoga upanishad
% Latest update         : Feb. 3, 2000, October 7, 2016
% Send corrections to   : sanskrit at cheerful dot c om
%
% This text is prepared by volunteers and is to be used for personal study 
% and research. The file is not to be copied or reposted for promotion of 
% any website or individuals or for commercial purpose without permission. 
% Please help to maintain respect for volunteer spirit.
%
\documentstyle[11pt,multicol,itrans]{article}
#include=ijag.inc
#endwordvowel=.h
\portraitwide
\parindent=100pt                
\let\usedvng=\Largedvng      % for 1 column     
\pagenumbering{itrans} 
\def\engtitle#1{\hrule\medskip\centerline{\LARGE #1}}
\def\itxtitle#1{\medskip\centerline{\LARGEdvng #1}\medskip\hrule}
\def\endtitles{\medskip\obeyspaceslines}
%%
\begin{document}
\engtitle{.. Tejobindu Upanishad ..}##
\itxtitle{.. tejobindUpaniShat ..}##\endtitles ##

yatra chinmAtrakalanA yAtyapahnavama~njasA |
tachchinmAtramakhaNDaikarasaM brahma bhavAmyaham ||
AUM saha nAvavatu || saha nau bhunaktu || saha vIryaM karavAvahai ||
tejasvinAvadhItamastu mA vidviShAvahai ||
AUM shAntiH shAntiH shAntiH ||
AUM tejobinduH paraM dhyAnaM vishvAtmahR^idisa.nsthitam |
ANavaM shAmbhavaM shAntaM sthUlaM sUkShmaM paraM cha yat || 1||
duHkhADhyaM cha durArAdhyaM duShprekShyaM muktamavyayam |
durlabhaM tatsvayaM dhyAnaM munInAM cha manIShiNAm || 2||
yatAhAro jitakrodho jitasa~Ngo jitendriyaH |
nirdvandvo niraha~NkAro nirAshIraparigrahaH || 3||
agamyAgamakartA yo gamyA.agamayamAnasaH |
mukhe trINi cha vindanti tridhAmA ha.nsa uchyate || 4||
paraM guhyatamaM viddhi hyastatandro nirAshrayaH |
somarUpakalA sUkShmA viShNostatparamaM padam || 5||
trivaktraM triguNaM sthAnaM tridhAtuM rUpavarjitam |
nishchalaM nirvikalpaM cha nirAkAraM nirAshrayam || 6||
upAdhirahitaM sthAnaM vA~Nmano.atItagocharam |
svabhAvaM bhAvasa~NgrAhyamasa~NghAtaM padAchchyutam || 7||
anAnAnandanAtItaM duShprekShyaM muktimavyayam |
chintyamevaM vinirmuktaM shAshvataM dhruvamachyutam || 8||
tadbrahmaNastadadhyAtmaM tadviShNostatparAyaNam |
achintyaM chinmayAtmAnaM yadvyoma paramaM sthitam || 9||
ashUnyaM shUnyabhAvaM tu shUnyAtItaM hR^idi sthitam |
na dhyAnaM cha na cha dhyAtA na dhyeyo dhyeya eva cha || 10||
sarvaM cha na paraM shUnyaM na paraM nAparAtparam |
achintyamaprabuddhaM cha na satyaM na paraM viduH || 11||
munInAM samprayuktaM cha na devA na paraM viduH |
lobhaM mohaM bhayaM darpaM kAmaM krodhaM cha kilbiSham || 12||
shItoShNe kShutpipAse cha sa~Nkalpakavikalpakam |
na brahmakuladarpaM cha na muktigranthisa~nchayam || 13||
na bhayaM na sukhaM duHkhaM tathA mAnAvamAnayoH |
etadbhAvavinirmuktaM tadgrAhyaM brahma tatparam || 14||
yamo hi niyamastyAgo maunaM deshashcha kAlataH |
AsanaM mUlabandhashcha dehasAmyaM cha dR^iksthitiH || 15||
prANasa.nyamanaM chaiva pratyAhArashcha dhAraNA |
AtmadhyAnaM samAdhishcha proktAnya~NgAni vai kramAt || 16||
sarvaM brahmeti vai j~nAnAdindriyagrAmasa.nyamaH |
yamo.a.ayamiti samprokto.abhyasanIyo muhurmuhuH || 17||
sajAtIyapravAhashcha vijAtIyatiraskR^itiH |
niyamo hi parAnando niyamAtkriyate budhaiH || 18||
tyAgaH prapa~ncharUpasya sachchidAtmAvalokanAt |
tyAgo hi mahatA pUjyaH sadyo mokShapradAyakaH || 19||
yasmAdvAcho nivartante aprApya manasA saha |
yanmaunaM yogibhirgamyaM tadbhajetsarvadA budhaH || 20||
vAcho yasmAnnivartante tadvaktuM kena shakyate |
prapa~ncho yadi vaktavyaH so.api shabdavivarjitaH || 21||
iti vA tadbhavenmaunaM sarvaM sahajasaMj~nitam |
girAM maunaM tu bAlAnAmayuktaM brahmavAdinAm || 22||
AdAvante cha madhye cha jano yasminna vidyate |
yenedaM satataM vyAptaM sa desho vijanaH smR^itaH || 23||
kalpanA sarvabhUtAnAM brahmAdInAM nimeShataH |
kAlashabdena nirdiShTaM hyakhaNDAnandamadvayam || 24||
sukhenaiva bhavedyasminnajasraM brahmachintanam |
AsanaM tadvijAnIyAdanyatsukhavinAshanam || 25||
siddhaye sarvabhUtAdi vishvAdhiShThAnamadvayam |
yasminsiddhiM gatAH siddhAstatsiddhAsanamuchyate || 26||
yanmUlaM sarvalokAnAM yanmUlaM chittabandhanam |
mUlabandhaH sadA sevyo yogyo.asau brahmavAdinAm || 27||
a~NgAnAM samatAM vidyAtsame brahmaNi lIyate |
no chennaiva samAnatvamR^ijutvaM shuShkavR^ikShavat || 28||
dR^iShTIM j~nAnamayIM kR^itvA pashyedbrahmamayaM jagat |
sA dR^iShTiH paramodArA na nAsAgrAvalokinI || 29||
draShTR^idarshanadR^ishyAnAM virAmo yatra vA bhavet |
dR^iShTistatraiva kartavyA na nAsAgrAvalokinI || 30||
chittAdisarvabhAveShu brahmatvenaiva bhAvanAt |
nirodhaH sarvavR^ittInAM prANAyAmaH sa uchyate || 31||
niShedhanaM prapa~nchasya rechakAkhyaH samIritaH |
brahmaivAsmIti yA vR^ittiH pUrako vAyuruchyate || 32||
tatastadvR^ittinaishchalyaM kumbhakaH prANasa.nyamaH |
ayaM chApi prabuddhAnAmaj~nAnAM ghrANapIDanam || 33||
viShayeShvAtmatAM dR^iShTvA manasashchittara~njakam |
pratyAhAraH sa vij~neyo.abhyasanIyo muhurmuhuH || 34||
yatra yatra mano yAti brahmaNastatra darshanAt |
manasA dhAraNaM chaiva dhAraNA sA parA matA || 35||
brahmaivAsmIti sadvR^ittyA nirAlambatayA sthitiH |
dhyAnashabdena vikhyAtaH paramAnandadAyakaH || 36||
nirvikAratayA vR^ittyA brahmAkAratayA punaH |
vR^ittivismaraNaM samyaksamAdhirabhidhIyate || 37||
imaM chAkR^itrimAnandaM tAvatsAdhu samabhyaset |
lakShyo yAvatkShaNAtpu.nsaH pratyaktvaM sambhavetsvayam || 38||
tataH sAdhananirmuktaH siddho bhavati yogirAT |
tatsvaM rUpaM bhavettasya viShayo manaso girAm || 39||
samAdhau kriyamANe tu vighnAnyAyAnti vai balAt |
anusandhAnarAhityamAlasyaM bhogalAlasam || 40||
layastamashcha vikShepastejaH svedashcha shUnyatA |
evaM hi vighnabAhulyaM tyAjyaM brahmavishAradaiH || 41||
bhAvavR^ittyA hi bhAvatvaM shUnyavR^ittyA hi shUnyatA |
brahmavR^ittyA hi pUrNatvaM tayA pUrNatvamabhyaset || 42||
ye hi vR^ittiM vihAyainAM brahmAkhyAM pAvanIM parAm |
vR^ithaiva te tu jIvanti pashubhishcha samA narAH || 43||
ye tu vR^ittiM vijAnanti j~nAtvA vai vardhayanti ye |
te vai satpuruShA dhanyA vandyAste bhuvanatraye || 44||
yeShAM vR^ittiH samA vR^iddhA paripakvA cha sA punaH |
te vai sadbrahmatAM prAptA netare shabdavAdinaH || 45||
kushalA brahmavArtAyAM vR^ittihInAH surAgiNaH |
te.apyaj~nAnatayA nUnaM punarAyAnti yAnti cha || 46||
nimiShArdhaM na tiShThanti vR^ittiM brahmamayIM vinA |
yathA tiShThanti brahmAdyAH sanakAdyAH shukAdayaH || 47||
kAraNaM yasya vai kAryaM kAraNaM tasya jAyate |
kAraNaM tattvato nashyetkAryAbhAve vichArataH || 48||
atha shuddhaM bhavedvastu yadvai vAchAmagocharam |
udeti shuddhachittAnAM vR^ittij~nAnaM tataH param || 49||
bhAvitaM tIvravegena yadvastu nishchayAtmakam |
dR^ishyaM hyadR^ishyatAM nItvA brahmAkAreNa chintayet || 50||
vidvAnnityaM sukhe tiShTheddhiyA chidrasapUrNayA ||
iti prathamo.adhyAyaH || 1||
\medskip\hrule\medskip

atha ha kumAraH shivaM paprachChA.akhaNDaikarasa\-
chinmAtrasvarUpamanubrUhIti | sa hovAcha paramaH shivaH |
akhaNDaikarasaM dR^ishyamakhaNDaikarasaM jagat |
akhaNDaikarasaM bhAvamakhaNDaikarasaM svayam || 1||
akhaNDaikaraso mantra akhaNDaikarasA kriyA |
akhaNDaikarasaM j~nAnamakhaNDaikarasaM jalam || 2||
akhaNDaikarasA bhUmirakhaNDaikarasaM viyat |
akhaNDaikarasaM shAstramakhaNDaikarasA trayI || 3||
akhaNDaikarasaM brahma chAkhaNDaikarasaM vratam |
akhaNDaikaraso jIva akhaNDaikaraso hyajaH || 4||
akhaNDaikaraso brahmA akhaNDaikaraso hariH |
akhaNDaikaraso rudra akhaNDaikaraso.asmyaham || 5||
akhaNDaikaraso hyAtmA hyakhaNDaikaraso guruH |
akhaNDaikarasaM lakShyamakhaNDaikarasaM mahaH || 6||
akhaNDaikaraso deha akhaNDaikarasaM manaH |
akhaNDaikarasaM chittamakhaNDaikarasaM sukham || 7||
akhaNDaikarasA vidyA akhaNDaikaraso.avyayaH |
akhaNDaikarasaM nityamakhaNDaikarasaM param || 8||
akhaNDaikarasaM ki~nchidakhaNDaikarasaM param |
akhaNDaikarasAdanyannAsti nAsti ShaDAnana || 9||
akhaNDaikarasAnnAsti akhaNDaikarasAnna hi |
akhaNDaikarasAtki~nchidakhaNDaikarasAdaham || 10||
akhaNDaikarasaM sthUlaM sUkShmaM chAkhaNDarUpakam |
akhaNDaikarasaM vedyamakhaNDaikaraso bhavAn || 11||
akhaNDaikarasaM guhyamakhaNDaikarasAdikam |
akhaNDaikaraso j~nAtA hyakhaNDaikarasA sthitiH || 12||
akhaNDaikarasA mAtA akhaNDaikararasaH pitA |
akhaNDaikaraso bhrAtA akhaNDaikarasaH patiH || 13||
akhaNDaikarasaM sUtramakhaNDaikaraso virAT |
akhaNDaikarasaM gAtramakhaNDaikarasaM shiraH || 14||
akhaNDaikarasaM chAntarakhaNDaikarasaM bahiH |
akhaNDaikarasaM pUrNamakhaNDaikarasAmR^itam || 15||
akhaiNDaikarasaM gotramakhaNDaikarasaM gR^iham |
akhaNDaikarasaM gopyamakhaNDaikarasashashI || 16||
akhaNDaikarasAstArA akhaNDaikaraso raviH |
akhaNDaikarasaM kShetramakhaNDaikarasA kShamA || 17||
akhaNDaikarasa shAnta akhaNDaikaraso.aguNaH |
akhaNDaikarasaH sAkShI akhaNDaikarasaH suhR^it || 18||
akhaNDaikaraso bandhurakhaNDaikarasaH sakhA |
akhaNDaikaraso rAjA akhaNDaikarasaM puram || 19||
akhaNDaikarasaM rAjyamakhaNDaikarasAH prajAH |
akhaNDaikarasaM tAramakhaNDaikaraso japaH || 20||
akhaNDaikarasaM dhyAnamakhaNDaikarasaM padam |
akhaNDaikarasaM grAhyamakhaNDaikarasaM mahat || 21||
akhaNDaikarasaM jyotirakhaNDaikarasaM dhanam |
akhaNDaikarasaM bhojyamakhaNDaikarasaM haviH || 22||
akhaNDaikaraso homa akhaNDaikaraso japaH |
akhaNDaikarasaM svargamakhaNDaikarasaH svayam || 23||
akhaNDaikarasaM sarvaM chinmAtramiti bhAvayet |
chinmAtrameva chinmAtramakhaNDaikarasaM param || 24||
bhavavarjitachinmAtraM sarvaM chinmAtrameva hi |
idaM cha sarvaM chinmAtramayaM chinmayameva hi || 25||
AtmabhAvaM cha chinmAtramakhaNDaikarasaM viduH |
sarvalokaM cha chinmAtraM vattA mattA cha chinmayam || 26||
AkAsho bhUrjalaM vAyuragnirbrahmA hariH shivaH |
yatki~nchidyanna ki~nchichcha sarvaM chinmAtrameva hi || 27||
akhaNDaikarasaM sarvaM yadyachchinmAtrameva hi |
bhUtaM bhavyaM bhaviShyachcha sarvaM chinmAtrameva hi || 28||
dravyaM kAlaM cha chinmAtraM j~nAnaM j~neyaM chideva hi |
j~nAtA chinmAtrarUpashcha sarvaM chinmayameva hi || 29||
sambhAShaNaM cha chinmAtraM yadyachchinmAtrameva hi |
asachcha sachcha chinmAtramAdyantaM chinmayaM sadA || 30||
Adirantashcha chinmAtraM gurushiShyAdi chinmayam |
dR^igdR^ishyaM yadi chinmAtramasti chechchinmayaM sadA || 31||
sarvAshcharyaM hi chinmAtraM dehaM chinmAtrameva hi |
li~NgaM cha kAraNaM chaiva chinmAtrAnna hi vidyate || 32||
ahaM tvaM chaiva chinmAtraM mUrtAmUrtAdichinmayam |
puNyaM pApaM cha chinmAtraM jIvashchinmAtravigrahaH || 33||
chinmAtrAnnAsti sa~NkalpashchinmAtrAnnAsti vedanam |
chinmAtrAnnAsti mantrAdi chinmAtrAnnAsti devatA || 34||
chinmAtrAnnAsti dikpAlAshchinmAtrAdvyAvahArikam |
chinmAtrAtparamaM brahma chinmAtrAnnAsti ko.api hi || 35||
chinmAtrAnnAsti mAyA cha chinmAtrAnnAsti pUjanam |
chinmAtrAnnAsti mantavyaM chinmAtrAnnAsti satyakam || 36||
chinmAtrAnnAsti koshAdi chinmAtrAnnAsti vai vasu |
chinmAtrAnnAsti maunaM cha chinmAtrAnnastyamaunakam || 37||
chinmAtrAnnAsti vairAgyaM sarvaM chinmAtrameva hi |
yachcha yAvachcha chinmAtraM yachcha yAvachcha dR^ishyate || 38||
yachcha yAvachcha dUrasthaM sarvaM chinmAtrameva hi |
yachcha yAvachcha bhUtAdi yachcha yAvachcha lakShyate || 39||
yachcha yAvachcha vedAntAH sarvaM chinmAtrameva hi |
chinmAtrAnnAsti gamanaM chinmAtrAnnAsti mokShakam || 40||
chinmAtrAnnAsti lakShyaM cha sarvaM chinmAtrameva hi |
akhaNDaikarasaM brahma chinmAtrAnna hi vidyate || 41||
shAstre mayi tvayIshe cha hyakhaNDaikaraso bhavAn |
ityekarUpatayA yo vA jAnAtyahaM tviti || 42||
sakR^ijj~nAnena muktiH syAtsamyagj~nAne svayaM guruH || 43||
iti dvitIyo.adhyAyaH || 2||
\medskip\hrule\medskip

kumAraH pitaramAtmAnubhavamanubrUhIti paprachCha |
sa hovAcha paraH shivaH |
parabrahmasvarUpo.ahaM paramAnandamasmyaham |
kevalaM j~nAnarUpo.ahaM kevalaM paramo.asmyaham || 1||
kevalaM shAntarUpo.ahaM kevalaM chinmayo.asmyaham |
kevalaM nityarUpo.ahaM kevalaM shAshvato.asmyaham || 2||
kevalaM sattvarUpo.ahamahaM tyaktvAhamasmyaham |
sarvahInasvarUpo.ahaM chidAkAshamayo.asmyaham || 3||
kevalaM turyarUpo.asmi turyAtIto.asmi kevalaH |
sadA chaitanyarUpo.asmi chidAnandamayo.asmyaham || 4||
kevalAkArarUpo.asmi shuddharUpo.asmyahaM sadA |
kevalaM j~nAnarUpo.asmi kevalaM priyamasmyaham || 5||
nirvikalpasvarUpo.asmi nirIho.asmi nirAmayaH |
sadA.asa~NgasvarUpo.asmi nirvikAro.ahamavyayaH || 6||
sadaikarasarUpo.asmi sadA chinmAtravigrahaH |
aparichChinnarUpo.asmi hyakhaNDAnandarUpavAn || 7||
satparAnandarUpo.asmi chitparAnandamasmyaham |
antarAntararUpo.ahamavA~NmanasagocharaH || 8||
AtmAnandasvarUpo.ahaM satyAnando.asmyahaM sadA |
AtmArAmasvarUpo.asmi hyayamAtmA sadAshivaH || 9||
AtmaprakAsharUpo.asmi hyAtmajyotiraso.asmyaham |
AdimadhyAntahIno.asmi hyAkAshasadR^isho.asmyaham || 10||
nityashuddhachidAnandasattAmAtro.ahamavyayaH |
nityabuddhavishuddhaikasachchidAnandamasmyaham || 1||
nityasheShasvarUpo.asmi sarvAtIto.asmyahaM sadA |
rUpAtItasvarUpo.asmi paramAkAshavigrahaH || 12||
bhUmAnandasvarUpo.asmi bhAShAhIno.asmyahaM sadA |
sarvAdhiShThAnarUpo.asmi sarvadA chidghano.asmyaham || 13||
dehabhAvavihIno.asmi chintAhIno.asmi sarvadA |
chittavR^ittivihIno.ahaM chidAtmaikaraso.asmyaham || 14||
sarvadR^ishyavihIno.ahaM dR^igrUpo.asmyahameva hi |
sarvadA pUrNarUpo.asmi nityatR^ipto.asmyahaM sadA || 15||
ahaM brahmaiva sarvaM syAdahaM chaitanyameva hi |
ahamevAhamevAsmi bhUmAkAshasvarUpavAn || 16||
ahameva mahAnAtmA hyahameva parAtparaH |
ahamanyavadAbhAmi hyahameva sharIravat || 17||
ahaM shiShyavadAbhAmi hyayaM lokatrayAshrayaH |
ahaM kAlatrayAtIta ahaM vedairupAsitaH || 18||
ahaM shAstreNa nirNIta ahaM chitte vyavasthitaH |
mattyaktaM nAsti ki~nchidvA mattyaktaM pR^ithivI cha vA || 19||
mayAtiriktaM yadyadvA tattannAstIti nishchinu |
ahaM brahmAsmi siddho.asmi nityashuddho.asmyahaM sadA || 20||
nirguNaH kevalAtmAsmi nirAkAro.asmyahaM sadA |
kevalaM brahmamAtro.asmi hyajaro.asmyamaro.asmyaham || 21||
svayameva svayaM bhAmi svayameva sadAtmakaH |
svayamevAtmani svasthaH svayameva parA gatiH || 22||
svayameva svayaM bha~nje svayameva svayaM rame |
svayameva svayaM jyotiH svayameva svayaM mahaH || 23||
svasyAtmani svayaM ra.nsye svAtmanyeva vilokaye |
svAtmanyeva sukhAsInaH svAtmamAtrAvasheShakaH || 24||
svachaitanye svayaM sthAsye svAtmarAjye sukhe rame |
svAtmasi.nhAsane sthitvA svAtmano.anyanna chintaye || 25||
chidrUpamAtraM brahmaiva sachchidAnandamadvayam |
Anandaghana evAhamahaM brahmAsmi kevalam || 26||
sarvadA sarvashUnyo.ahaM sarvAtmAnandavAnaham |
nityAnandasvarUpo.ahamAtmAkAsho.asmi nityadA || 27||
ahameva hR^idAkAshashchidAdityasvarUpavAn |
AtmanAtmani tR^ipto.asmi hyarUpo.asmyahamavyayaH || 28||
ekasa~NkhyAvihIno.asmi nityamuktasvarUpavAn |
AkAshAdapi sUkShmo.ahamAdyantAbhAvavAnaham || 29||
sarvaprakAsharUpo.ahaM parAvarasukho.asmyaham |
sattAmAtrasvarUpo.ahaM shuddhamokShasvarUpavAn || 30||
satyAnandasvarUpo.ahaM j~nAnAnandaghano.asmyaham |
vij~nAnamAtrarUpo.ahaM sachchidAnandalakShaNaH || 31||
brahmamAtramidaM sarvaM brahmaNo.anyanna ki~nchana |
tadevAhaM sadAnandaM brahmaivAhaM sanAtanam || 32||
tvamityetattadityetanmatto.anyannAsti ki~nchana |
chichchaitanyasvarUpo.ahamahameva shivaH paraH || 33||
atibhAvasvarUpo.ahamahameva sukhAtmakaH |
sAkShivastuvihInatvAtsAkShitvaM nAsti me sadA || 34||
kevalaM brahmamAtratvAdahamAtmA sanAtanaH |
ahamevAdisheSho.ahamahaM sheSho.ahameva hi || 35||
nAmarUpavimukto.ahamahamAnandavigrahaH |
indriyAbhAvarUpo.ahaM sarvabhAvasvarUpakaH || 36||
bandhamuktivihIno.ahaM shAshvatAnandavigrahaH |
AdichaitanyamAtro.ahamakhaNDaikaraso.asmyaham || 37||
vA~Nmano.agocharashchAhaM sarvatra sukhavAnaham |
sarvatra pUrNarUpo.ahaM bhUmAnandamayo.asmyaham || 38||
sarvatra tR^iptirUpo.ahaM parAmR^itaraso.asmyaham |
ekamevAdvitIyaM sadbrahmaivAhaM na sa.nshayaH || 39||
sarvashUnyasvarUpo.ahaM sakalAgamagocharaH |
mukto.ahaM mokSharUpo.ahaM nirvANasukharUpavAn || 40||
satyavij~nAnamAtro.ahaM sanmAtrAnandavAnaham |
turIyAtItarUpo.ahaM nirvikalpasvarUpavAn || 41||
sarvadA hyajarUpo.ahaM nIrAgo.asmi nira~njanaH |
ahaM shuddho.asmi buddho.asmi nityo.asmi prabhurasmyaham || 42||
o~NkArArthasvarUpo.asmi niShkala~Nkamayo.asmyaham |
chidAkArasvarUpo.asmi nAhamasmi na so.asmyaham || 43||
na hi ki~nchitsvarUpo.asmi nirvyApArasvarUpavAn |
nira.nsho.asmi nirAbhAso na mano nendriyo.asmyaham || 44||
na buddhirna vikalpo.ahaM na dehAditrayo.asmyaham |
na jAgratsvapnarUpo.ahaM na suShuptisvarUpavAn || 45||
na tApatrayarUpo.ahaM neShaNAtrayavAnaham |
shravaNaM nAsti me siddhermananaM cha chidAtmani || 46||
sajAtIyaM na me ki~nchidvijAtIyaM na me kvachit |
svagataM cha na me ki~nchinna me bhedatrayaM kvachit || 47||
asatyaM hi manorUpamasatyaM buddhirUpakam |
aha~NkAramasiddhIti nityo.ahaM shAshvato hyajaH || 48||
dehatrayamasadviddhi kAlatrayamasatsadA |
guNatrayamasatviddhi hyayaM satyAtmakaH shuchiH || 49||
shrutaM sarvamasatdviddhi vedaM sarvamasatsadA |
shAstraM sarvamasatdviddhi hyahaM satyachidAtmakaH || 50||
mUrtitrayamasadviddhi sarvabhUtamasatsadA |
sarvatattvamasadviddhi hyayaM bhUmA sadAshivaH || 51||
gurushiShyamasadviddhi gurormantramasattataH |
yaddR^ishyaM tadasadviddhi na mAM viddhi tathAvidham || 52||
yachchintyaM tadasadviddhi yannyAyaM tadasatsadA |
yaddhitaM tadasadviddhi na mAM viddhi tathAvidham || 53||
sarvAnprANAnasadviddhi sarvAnbhogAnasattviti |
dR^iShTaM shrutamasadviddhi otaM protamasanmayam || 54||
kAryAkAryamasadviddhi naShTaM prAptamasanmayam |
duHkhAduHkhamasadviddhi sarvAsarvamanmayam || 55||
pUrNApUrNamasadviddhi dharmAdharmamasanmayam |
lAbhAlAbhAvasadviddhi jayAjayamasanmayam || 56||
shabdaM sarvamasadviddhi sparshaM sarvamasatsadA |
rUpaM sarvamasadviddhi rasaM sarvamasanmayam || 57||
gandhaM sarvamasadviddhi sarvAj~nAnamasanmayam |
asadeva sadA sarvamasadeva bhavodbhavam || 58||
asadeva guNaM sarvaM sanmAtramahameva hi |
svAtmamantraM sadA pashyetsvAtmamantraM sadAbhyaset || 59||
ahaM brahmAsmi mantro.ayaM dR^ishyapApaM vinAshayet |
ahaM brahmAsmi mantro.ayamanyamantraM vinAshayet || 60||
ahaM brahmAsmi mantro.ayaM dehadoShaM vinAshayet |
ahaM brahmAsmi mantro.ayaM janmapApaM vinAshayet || 61||
ahaM brahmAsmi mantro.ayaM mR^ityupAshaM vinAshayet |
ahaM brahmAsmi mantro.ayaM dvaitaduHkhaM vinAshayet || 62||
ahaM brahmAsmi mantro.ayaM bhedabuddhiM vinAshayet |
ahaM brahmAsmi mantro.ayaM chintAduHkhaM vinAshayet || 63||
ahaM brahmAsmi mantro.ayaM buddhivyAdhiM vinAshayet |
ahaM brahmAsmi mantro.ayaM chittabandhaM vinAshayet || 64||
ahaM brahmAsmi mantro.ayaM sarvavyAdhInvinAshayet |
ahaM brahmAsmi mantro.ayaM sarvashokaM vinAshayet || 65||
ahaM brahmAsmi mantro.ayaM kAmAdInnAshayetkShaNAt |
ahaM brahmAsmi mantro.ayaM krodhashaktiM vinAshayet || 66||
ahaM brahmAsmi mantro.ayaM chittavR^ittiM vinAshayet |
ahaM brahmAsmi mantro.ayaM sa~NkalpAdInvinAshayet || 67||
ahaM brahmAsmi mantro.ayaM koTidoShaM vinAshayet |
ahaM brahmAsmi mantro.ayaM sarvatantraM vinAshayet || 68||
ahaM brahmAsmi mantro.ayamAtmAj~nAnaM vinAshayet |
ahaM brahmAsmi mantro.ayamAtmalokajayapradaH || 69||
ahaM brahmAsmi mantro.ayamapratarkyasukhapradaH |
ahaM brahmAsmi mantro.ayamajaDatvaM prayachChati || 70||
ahaM brahmAsmi mantro.ayamanAtmAsuramardanaH |
ahaM brahmAsmi vajro.ayamanAtmAkhyagirInharet || 71||
ahaM brahmAsmi mantro.ayamanAtmAkhyAsurAnharet |
ahaM brahmAsmi mantro.ayaM sarvA.nstAnmokShayiShyati || 72||
ahaM brahmAsmi mantro.ayaM j~nAnAnandaM prayachChati |
saptakoTimahAmantraM janmakoTishatapradam || 73||
sarvamantrAnsamutsR^ijya etaM mantraM samabhyaset |
sadyo mokShamavApnoti nAtra sandehamaNvapi || 74||
iti tR^itIyodhyAyaH || 3||
\medskip\hrule\medskip

kumAraH parameshvaraM paprachCha jIvanmuktavidehamuktayoH
sthitimanubrUhIti | sa hovAcha paraH shivaH |
chidAtmAhaM parAtmAhaM nirguNo.ahaM parAtparaH |
AtmamAtreNa yastiShThetsa jIvanmukta uchyate || 1||
dehatrayAtirikto.ahaM shuddhachaitanyamasmyaham |
brahmAhamiti yasyAntaH sa jIvanamukta uchyate || 2||
AnandaghanarUpo.asmi parAnandaghano.asmyaham |
yasya dehAdikaM nAsti yasya brahmeti nishchayaH |
paramAnandapUrNo yaH sa jIvanmukta uchyate || 3||
yasya ki~nchidahaM nAsti chinmAtreNAvatiShThate |
chaitanyamAtro yasyAntashchinmAtraikasvarUpavAn || 4||
sarvatra pUrNarUpAtmA sarvatrAtmAvasheShakaH |
AnandaratiravyaktaH paripUrNashchidAtmakaH || 5||
shuddhachaitanyarUpAtmA sarvasa~NgavivarjitaH |
nityAnandaH prasannAtmA hyanyachintAvivarjitaH || 6
ki~nchidastitvahIno yaH sa jIvanmukta uchyate |
na me chittaM na me buddhirnAha~NkAro na chendriyam || 7||
na me dehaH kadAchidvA na me prANAdayaH kvachit |
na me mAyA na me kAmo na me krodhaH paro.asmyaham || 8||
na me ki~nchididaM vApi na me ki~nchitkvachijjagat |
na me doSho na me li~NgaM na me chakShurna me manaH || 9||
na me shrotraM na me nAsA na me jihvA na me karaH |
na me jAgranna me svapnaM na me kAraNamaNvapi || 10||
na me turIyamiti yaH sa jIvanmukta uchyate |
idaM sarvaM na me ki~nchidayaM sarvaM na me kvachit || 11||
na me kAlo na me desho na me vastu na me matiH |
na me snAnaM na me sandhyA na me daivaM na me sthalam || 12||
na me tIrthaM na me sevA na me j~nAnaM na me padam |
na me bandho na me janma na me vAkyaM na me raviH || 13||
na me puNyaM na me pApaM na me kAryaM na me shubham |
ne me jIva iti svAtmA na me ki~nchijjagatrayam || 14||
na me mokSho na me dvaitaM na me vedo na me vidhiH |
na me.antikaM na me dUraM na me bodho na me rahaH || 15||
na me gururna me shiShyo na me hIno na chAdhikaH |
na me brahma na me viShNurna me rudro na chandramAH || 16||
na me pR^ithvI na me toyaM na me vAyurna me viyat |
na me vahnirna me gotraM na me lakShyaM na me bhavaH || 17||
na me dhyAtA na me dhyeyaM na me dhyAnaM na me manuH |
na me shItaM na me choShNaM na me tR^iShNA na me kShudhA || 18||
na me mitraM na me shatrurna me moho na me jayaH |
na me pUrvaM na me pashchAnna me chordhvaM na me dishaH || 19||
na me vaktavyamalpaM vA na me shrotavyamaNvapi |
na me gantavyamIShadvA na me dhyAtavyamaNvapi || 20||
na me bhoktavyamIShadvA na me smartavyamaNvapi |
na me bhogo na me rAgo na me yAgo na me layaH || 21||
na me maurkhyaM na me shAntaM na me bandho na me priyam |
na me modaH pramodo vA na me sthUlaM na me kR^isham || 22||
na me dIrghaM na me hrasvaM na me vR^iddhirna me kShayaH |
adhyAropo.apavAdo vA na me chaikaM na me bahu || 23||
na me AndhyaM na me mAndyaM na me paTvidamaNvapi |
na me mA.nsaM na me raktaM na me medo na me hyasR^ik || 24||
na me majjA na me.asthirvA na me tvagdhAtu saptakam |
na me shuklaM na me raktaM na me nIlaM name pR^ithak || 25||
na me tApo na me lAbho mukhyaM gauNaM na me kvachit |
na me bhrAntirna me sthairyaM na me guhyaM na me kulam || 26||
na me tyAjyaM na me grAhyaM na me hAsyaM na me nayaH |
na me vR^ittaM na me glAnirna me shoShyaM na me sukham || 27||
na me j~nAtA na me j~nAnaM na me j~neyaM na me svayam |
na me tubhyaM name mahyaM na me tvaM cha na me tvaham || 28||
na me jarA na me bAlyaM na me yauvanamaNvapi |
ahaM brahmAsmyahaM brahmAsmyahaM brahmeti nishchayaH || 29||
chidahaM chidahaM cheti sa jIvanmukta uchyate |
brahmaivAhaM chidevAhaM paro vAhaM na sa.nshayaH || 30||
svayameva svayaM ha.nsaH svayameva svayaM sthitaH |
svayameva svayaM pashyetsvAtmarAjye sukhaM vaset || 31||
svAtmAnandaM svayaM bhokShyetsa jIvanmukta uchyate |
svayamevaikavIro.agre svayameva prabhuH smR^itaH || 32||
brahmabhUtaH prashAntAtmA brahmAnandamayaH sukhI |
svachCharUpo mahAmaunI vaidehI mukta eva saH || 33||
sarvAtmA samarUpAtmA shuddhAtmA tvahamutthitaH |
ekavarjita ekAtmA sarvAtmA svAtmamAtrakaH || 34||
ajAtmA chAmR^itAtmAhaM svayamAtmAhamavyayaH |
lakShyAtmA lalitAtmAhaM tUShNImAtmasvabhAvavAn || 35||
AnandAtmA priyo hyAtmA mokShAtmA bandhavarjitaH |
brahmaivAhaM chidevAhamevaM vApi na chintyate || 36||
chinmAtreNaiva yastiShThedvaidehI mukta eva saH || 37||
nishchayaM cha parityajya ahaM brahmeti nishchayam |
AnandabharitasvAnto vaidehI mukta eva saH || 38||
sarvamastIti nAstIti nishchayaM tyajya tiShThati |
ahaM brahmAsmi nAsmIti sachchidAnandamAtrakaH || 39||
ki~nchitkvachitkadAchichcha AtmAnaM na spR^ishatyasau |
tUShNImeva sthitastUShNIM tUShNIM satyaM na ki~nchana || 40||
paramAtmA guNAtItaH sarvAtmA bhUtabhAvanaH |
kAlabhedaM vastubhedaM deshabhedaM svabhedakam || 41||
ki~nchidbhedaM na tasyAsti ki~nchidvApi na vidyate |
ahaM tvaM tadidaM so.ayaM kAlAtmA kAlahInakaH || 42||
shUnyAtmA sUkShmarUpAtmA vishvAtmA vishvahInakaH |
devAtmAdevahInAtmA meyAtmA meyavarjitaH || 43||
sarvatra jaDahInAtmA sarveShAmantarAtmakaH |
sarvasa~NkalpahInAtmA chinmAtro.asmIti sarvadA || 44||
kevalaH paramAtmAhaM kevalo j~nAnavigrahaH |
sattAmAtrasvarUpAtmA nAnyatki~nchijjagadbhayam || 45||
jIveshvareti vAkkveti vedashAstrAdyahaM tviti |
idaM chaitanyameveti ahaM chaitanyamityapi || 46||
iti nishchayashUnyo yo vaidehI mukta eva saH |
chaitanyamAtrasa.nsiddhaH svAtmArAmaH sukhAsanaH || 47||
aparichChinnarUpAtmA aNusthUlAdivarjitaH |
turyaturyA parAnando vaidehI mukta eva saH || 48||
nAmarUpavihInAtmA parasa.nvitsukhAtmakaH |
turIyAtItarUpAtmA shubhAshubhavivarjitaH || 49||
yogAtmA yogayuktAtmA bandhamokShavivarjitaH |
guNAguNavihInAtmA deshakAlAdivarjitaH || 50||
sAkShyasAkShitvahInAtmA ki~nchitki~nchinna ki~nchana |
yasya prapa~nchamAnaM na brahmAkAramapIha na || 51||
svasvarUpe svaya~njyotiH svasvarUpe svaya.nratiH |
vAchAmagocharAnando vA~NmanogocharaH svayam || 52||
atItAtItabhAvo yo vaidehI mukta eva saH |
chittavR^itteratIto yashchittavR^ittyavabhAsakaH || 53||
sarvavR^ittivihInAtmA vaidehI mukta eva saH |
tasminkAle videhIti dehasmaraNavarjitaH || 54||
IShanmAtraM smR^itaM chedyastadA sarvasamanvitaH |
parairadR^iShTabAhyAtmA paramAnandachiddhanaH || 55||
parairadR^iShTabAhyAtmA sarvavedAntagocharaH |
brahmAmR^itarasAsvAdo brahmAmR^itarasAyanaH || 56||
brahmAmR^itarasAsakto brahmAmR^itarasaH svayam |
brahmAmR^itarase magno brahmAnandashivArchanaH || 57||
brahmAmR^itarase tR^ipto brahmAnandAnubhAvakaH |
brahmAnandashivAnando brahmAnandarasaprabhaH || 58||
brahmAnandaparaM jyotirbrahmAnandanirantaraH |
brahmAnandarasAnnAdo brahmAnandakuTumbakaH || 59||
brahmAnandarasArUDho brahmAnandaikachiddhanaH |
brahmAnandarasodbAho brahmAnandarasambharaH || 60||
brahmAnandajanairyukto brahmAnandAtmani sthitaH |
AtmarUpamidaM sarvamAtmano.anyanna ka~nchana || 61||
sarvamAtmAhamAtmAsmi paramAtmA parAtmakaH |
nityAnanda svarUpAtmA vaidehI mukta eva saH || 62||
pUrNarUpo mahAnAtmA prItAtmA shAshvatAtmakaH |
sarvAntaryAmirUpAtmA nirmalAtmA nirAtmakaH || 63||
nirvikArasvarUpAtmA shuddhAtmA shAntarUpakaH |
shAntAshAntasvarUpAtmA naikAtmatvavivarjitaH || 64||
jIvAtmaparamAtmeti chintAsarvasvavarjitaH |
muktAmuktasvarUpAtmA muktAmuktavivarjitaH || 65||
bandhamokShasvarUpAtmA bandhamokShavivarjitaH |
dvaitAdvaitasvarUpAtmA dvaitAdvaitavivarjitaH || 66||
sarvAsarvasvarUpAtmA sarvAsarvavivarjitaH |
modapramodarUpAtmA modAdivinivarjitaH || 67||
sarvasa~NkalpahInAtmA vaidehI mukta eva saH |
niShkalAtmA nirmalAtmA buddhAtmApuruShAtmakaH || 68||
AnandAdivihInAtmA amR^itAtmAmR^itAtmakaH |
kAlatrayasvarUpAtmA kAlatrayavivarjitaH || 69||
akhilAtmA hyameyAtmA mAnAtmA mAnavarjitaH |
nityapratyakSharUpAtmA nityapratyakShanirNayaH || 70||
anyahInasvabhAvAtmA anyahInasvayamprabhaH |
vidyAvidyAdimeyAtmA vidyAvidyAdivarjitaH || 71||
nityAnityavihInAtmA ihAmutravivarjitaH |
shamAdiShaTkashUnyAtmA mumukShutvAdivarjitaH || 72||
sthUladehavihInAtmA sUkShmadehavivarjitaH |
kAraNAdivihInAtmA turIyAdivivarjitaH || 73||
annakoshavihInAtmA prANakoshavivarjitaH |
manaHkoshavihInAtmA vij~nAnAdivivarjitaH || 74||
AnandakoshahInAtmA pa~nchakoshavivarjitaH |
nirvikalpasvarUpAtmA savikalpavivarjitaH || 75||
dR^ishyAnuviddhahInAtmA shabdaviddhavivarjitaH |
sadA samAdhishUnyAtmA AdimadhyAntavarjitaH || 76||
praj~nAnavAkyahInAtmA ahambrahmAsmivarjitaH |
tattvamasyAdihInAtmA ayamAtmetyabhAvakaH || 77||
o~NkAravAchyahInAtmA sarvavAchyavivarjitaH |
avasthAtrayahInAtmA akSharAtmA chidAtmakaH || 78||
Atmaj~neyAdihInAtmA yatki~nchididamAtmakaH |
bhAnAbhAnavihInAtmA vaidehI mukta eva saH || 79||
AtmAnameva vIkShasva AtmAnaM bodhaya svakam |
svamAtmAnaM svayaM bhu~NkShva svastho bhava ShaDAnana || 80||
svamAtmani svayaM tR^iptaH svamAtmAnaM svayaM chara |
AtmAnameva modasva vaidehI muktiko bhavetyupaniShat ||
iti chaturtho.adhyAyaH || 4||
\medskip\hrule\medskip

nidAgho nAma vai muniH paprachCha R^ibhuM
bhagavantamAtmAnAtmavivekamanubrUhIti |
sa hovAcha R^ibhuH |
sarvavAcho.avadhirbrahma sarvachintAvadhirguruH |
sarvakAraNakAryAtmA kAryakAraNavarjitaH || 1||
sarvasa~NkalparahitaH sarvanAdamayaH shivaH |
sarvavarjitachinmAtraH sarvAnandamayaH paraH || 2||
sarvatejaHprakAshAtmA nAdAnandamayAtmakaH |
sarvAnubhavanirmuktaH sarvadhyAnavivarjitaH || 3||
sarvanAdakalAtIta eSha AtmAhamavyayaH |
AtmAnAtmavivekAdibhedAbhedavivarjitaH || 4||
shAntAshAntAdihInAtmA nAdAntarjyotirUpakaH |
mahAvAkyArthato dUro brahmAsmItyatidUrataH || 5||
tachChabdavarjyastva.nshabdahIno vAkyArthavarjitaH |
kSharAkSharavihIno yo nAdAntarjyotireva saH || 6||
akhaNDaikaraso vAhamAnando.asmIti varjitaH |
sarvAtItasvabhAvAtmA nAdAntarjyotireva saH || 7||
Atmeti shabdahIno ya AtmashabdArthavarjitaH |
sachchidAnandahIno ya eShaivAtmA sanAtanaH || 8||
sa nirdeShTumashakyo yo vedavAkyairagamyataH |
yasya ki~nchidbahirnAsti ki~nchidantaH kiyanna cha || 9||
yasya li~NgaM prapa~nchaM vA brahmaivAtmA na sa.nshayaH |
nAsti yasya sharIraM vA jIvo vA bhUtabhautikaH || 10||
nAmarUpAdikaM nAsti bhojyaM vA bhogabhuk.hcha vA |
sadvA.asadvA sthitirvApi yasya nAsti kSharAkSharam || 11||
guNaM vA viguNaM vApi sama AtmA na sa.nshayaH |
yasya vAchyaM vAchakaM vA shravaNaM mananaM cha vA || 12||
gurushiShyAdibhedaM vA devalokAH surAsurAH |
yatra dharmamadharmaM vA shuddhaM vAshuddhamaNvapi || 13||
yatra kAlamakAlaM vA nishchayaH sa.nshayo na hi |
yatra mantramamantraM vA vidyAvidye na vidyate || 14||
draShTR^idarshanadR^ishyaM vA IShanmAtraM kalAtmakam |
anAtmeti prasa~Ngo vA hyanAtmeti mano.api vA || 15||
anAtmeti jagadvApi nAsti nAsti nishchinu |
sarvasa~NkalpashUnyatvAtsarvakAryavivarjanAt || 16||
kevalaM brahmamAtratvAnnAstyanAtmeti nishchinu |
dehatrayavihInatvAtkAlatrayavivarjanAt || 17||
jIvatrayaguNAbhAvAttApatrayavivarjanAt |
lokatrayavihInatvAtsarvamAtmeti shAsanAt || 18||
chittAbhAchchintanIyaM dehAbhAvAjjarA na cha |
pAdAbhAvAdgatirnAsti hastAbhAvAtkriyA na cha || 19||
mR^ityurnAsti janAbhAvAdbuddhyabhAvAtsukhAdikam |
dharmo nAsti shuchirnAsti satyaM nAsti bhayaM na cha || 20||
akSharochchAraNaM nAsti gurushiShyAdi nAstyapi |
ekAbhAve dvitIyaM na na dvitIye na chaikatA || 21||
satyatvamasti chetki~nchidasatyaM na cha sambhavet |
asatyatvaM yadi bhavetsatyatvaM na ghaTiShyati || 22||
shubhaM yadyashubhaM viddhi ashubhAchChubhamiShyate |
bhayaM yadyabhavaM viddhi abhayAdbhayamApatet || 23||
bandhatvamapi chenmokSho bandhAbhAve kva mokShatA |
maraNaM yadi chejjanma janmAbhAve mR^itirna cha || 24||
tvamityapi bhavechchAhaM tvaM no chedahameva na |
idaM yadi tadevAsti tadabhAdidaM na cha || 25||
astIti chennAsti tadA nAsti chedasti ki~nchana |
kAryaM chetkAraNaM ki~nchitkAryAbhAve na kAraNam || 26||
dvaitaM yadi tadA.advaitaM dvaitAbhAve dvayaM na cha |
dR^ishyaM yadi dR^igapyasti dR^ishyAbhAve dR^igena na || 27||
antaryadi bahiH satyamantA bhAve bahirna cha |
pUrNatvamasti chetki~nchidapUrNatvaM prasajyate || 28||
tasmAdetatkvachinnAsti tvaM chAhaM vA ime idam |
nAsti dR^iShTAntikaM satye nAsti dArShTAntikaM hyaje || 29||
parambrahmAhamasmIti smaraNasya mano na hi |
brahmamAtraM jagadidaM brahmamAtraM tvamapyaham || 30||
chinmAtraM kevalaM chAhaM nAstyanAtmyeti nishchinu |
idaM prapa~nchaM nAstyeva notpannaM no sthitaM kvachit || 31||
chittaM prapa~nchamityAhurnAsti nAstyeva sarvadA |
na prapa~nchaM na chittAdi nAha~NkAro na jIvakaH || 32||
mAyAkAryAdikaM nAsti mAyA nAsti bhayaM nahi |
kartA nAsti kriyA nAsti shravaNaM mananaM nahi || 33||
samAdhidvitayaM nAsti mAtR^imAnAdi nAsti hi |
aj~nAnaM chApi nAstyeva hyavivekaM kadAchana || 34||
anubandhachatuShkaM na sambandhatrayameva na |
na ga~NgA na gayA seturna bhUtaM nAnyadasti hi || 35||
na bhUmirna jalaM nAgnirna na vAyurna cha khaM kvachit |
na devA na cha dikpAlA na vedA na guruH kvachit || 36||
na dUraM nAstikaM nAlaM na madhyaM na kvachitsthitam |
nAdvaitaM dvaitasatyaM vA hyasatyaM vA idaM na cha || 37||
bandhamokShAdikaM nAsti sadvA.asadvA sukhAdi vA |
jAtirnAsti gatirnAsti varNo nAsti na laukikam || 38||
sarvaM brahmeti nAstyeva brahma ityapi nAsti hi |
chidityeveti nAstyeva chidahambhAShaNaM na hi || 39||
ahaM brahmAsmi nAstyeva nityashuddho.asmi na kvachit |
vAchA yaduchyate ki~nchinmanasA manute kvachit || 40||
buddhyA nishchinute nAsti chittena j~nAyate nahi |
yogI yogAdikaM nAsti sadA sarvaM sadA na cha || 41||
ahorAtrAdikaM nAsti snAnadhyAnAdikaM nahi |
bhrAntirabhrAntirnAstyeva nAstyanAtmeti nishchinu || 42||
vedashAstraM purANaM cha kAryaM kAraNamIshvaraH |
loko bhUtaM janastvaikyaM sarvaM mithyA na sa.nshayaH || 43||
bandho mokShaH sukhaM duHkhaM dhyAnaM chittaM surAsurAH |
gauNaM mukhyaM paraM chAnyatsarvaM mithyA na sa.nshayaH || 44||
vAchA vadati yatki~nchitsa~NkalpaiH kalpyate cha yat |
manasA chintyate yadyatsarvaM mithyA na sa.nshayaH || 45||
buddhyA nishchIyate ki~nchichchitte nishchIyate kvachit |
shAstraiH prapa~nchyate yadyannetreNaiva nirIkShyate || 46||
shrotrAbhyAM shrUyate yadyadanyatsadbhAvameva cha |
netraM shrotraM gAtrameva mithyeti cha sunishchitam || 47||
idamityeva nirdiShTamayamityeva kalpyate |
tvamahaM tadidaM so.ahamanyatsadbhAvameva cha || 48||
yadyatsambhAvyate loke sarvasa~NkalpasambhramaH |
sarvAdhyAsaM sarvagopyaM sarvabhogaprabhedakam || 49||
sarvadoShaprabhedAchcha nAstyanAtmeti nishchinu |
madIyaM cha tvadIyaM cha mameti cha taveti cha || 50||
mahyaM tubhyaM mayetyAdi tatsarvaM vitathaM bhavet |
rakShako viShNurityAdi brahmA sR^iShTestu kAraNam || 51||
sa.nhAre rudra ityevaM sarvaM mithyeti nishchinu |
snAnaM japastapo homaH svAdhyAyo devapUjanam || 52||
mantraM tantraM cha satsa~Ngo guNadoShavijR^imbhaNam |
antaHkaraNasadbhAva avidyAshcha sambhavaH || 53||
anekakoTibrahmANDaM sarvaM mithyeti nishchinu |
sarvadeshikavAkyoktiryena kenApi nishchitam || 54||
dR^ishyate jagati yadyadyadyajjagati vIkShyate |
vartate jagati yadyatsarvaM mithyeti nishchinu || 55||
yena kenAkShareNoktaM yena kena vinishchitam |
yena kenApi gaditaM yena kenApi moditam || 56||
yena kenApi yaddattaM yena kenApi yatkR^itam |
yatra yatra shubhaM karma yatra yatra cha duShkR^itam || 57||
yadyatkaroShi satyena sarvaM mithyeti nishchinu |
tvameva paramAtmAsi tvameva paramo guruH || 58||
tvamevAkAsharUpo.asi sAkShihIno.asi sarvadA |
tvameva sarvabhAvo.asi tvaM brahmAsi na sa.nshayaH || 59||
kAlahIno.asi kAlo.asi sadA brahmAsi chidghanaH |
sarvataH svasvarUpo.asi chaitanyaghanavAnasi || 60||
satyo.asi siddho.asi sanAtano.asi
         mukto.asi mokSho.asi mudAmR^ito.asi |
devo.asi shAnto.asi nirAmayo.asi
         brahmAsi pUrNo.asi parAtparo.asi || 61||
samo.asi sachchApi sanAtano.asi
         satyAdivAkyaiH pratibodhito.asi |
sarvA~NgahIno.asi sadA sthito.asi
         brahmendrarudrAdivibhAvito.asi || 62||
sarvaprapa~nchabhramavarjito.asi
         sarveShu bhUteShu cha bhAsito.asi |
sarvatra sa~Nkalpavivarjito.asi
         sarvAgamAntArthavibhAvito.asi || 63||
sarvatra santoShasukhAsano.asi
         sarvatra gatyAdivivarjito.asi |
sarvatra lakShyAdivivarjito.asi
         dhyAto.asi viShNvAdisurairajasram || 64||
chidAkArasvarUpo.asi chinmAtro.asi nira~NkushaH |
Atmanyeva sthito.asi tvaM sarvashUnyo.asi nirguNaH || 65||
Anando.asi paro.asi tvameka evAdvitIyakaH |
chidghanAnandarUpo.asi paripUrNasvarUpakaH || 66||
sadasi tvamasi j~no.asi so.asi jAnAsi vIkShasi |
sachchidAnandarUpo.asi vAsudevo.asi vai prabhuH || 67||
amR^ito.asi vibhushchAsi cha~nchalo hyachalo hyasi |
sarvo.asi sarvahIno.asi shAntAshAntavivarjitaH || 68||
sattAmAtraprakAsho.asi sattAsAmAnyako hyasi |
nityasiddhisvarUpo.asi sarvasiddhivivarjitaH || 69||
IShanmAtravishUnyo.asi aNumAtravivarjitaH |
astitvavarjito.asi tvaM nAstitvAdivivarjitaH || 70||
lakShyalakShaNahIno.asi nirvikAro nirAmayaH |
sarvanAdAntaro.asi tvaM kalAkAShThAvivarjitaH || 71||
brahmaviShNvIshahIno.asi svasvarUpaM prapashyasi |
svasvarUpAvasheSho.asi svAnandAbdhau nimajjasi || 72||
svAtmarAjye svamevAsi svayambhAvavivarjitaH |
shiShTapUrNasvarUpo.asi svasmAtki~nchinna pashyasi || 73||
svasvarUpAnna chalasi svasvarUpeNa jR^imbhasi |
svasvarUpAdananyo.asi hyahamevAsi nishchinu || 74||
idaM prapa~nchaM yatki~nchidyadyajjagati vidyate |
dR^ishyarUpaM cha dR^igrUpaM sarvaM shashaviShANavat || 75||
bhUmirApo.analo vAyuH khaM mano buddhireva cha |
aha~NkArashcha tejashcha lokaM bhuvanamaNDalam || 76||
nAsho janma cha satyaM cha puNyapApajayAdikam |
rAgaH kAmaH krodhalobhau dhyAnaM dhyeyaM guNaM param || 77||
gurushiShyopadeshAdirAdirantaM shamaM shubham |
bhUtaM bhavyaM vartamAnaM lakShyaM lakShaNamadvayam || 78||
shamo vichAraH santoSho bhoktR^ibhojyAdirUpakam |
yamAdyaShTA~NgayogaM cha gamanAgamanAtmakam || 79||
AdimadhyAntara~NgaM cha grAhyaM tyAjyaM hariH shivaH |
indriyANi manashchaiva avasthAtritayaM tathA || 80||
chaturvi.nshatitattvaM cha sAdhanAnAM chatuShTayam |
sajAtIyaM vijAtIyaM lokA bhUrAdayaH kramAt || 81||
sarvavarNAshramAchAraM mantratantrAdisa~Ngraham |
vidyAvidyAdirUpaM cha sarvavedaM jaDAjaDam || 82||
bandhamokShavibhAgaM cha j~nAnavij~nAnarUpakam |
bodhAbodhasvarUpaM vA dvaitAdvaitAdibhAShaNam || 83||
sarvavedAntasiddhAntaM sarvashAstrArthanirNayam |
anekajIvasadbhAvamekajIvAdinirNayam || 84||
yadyaddhyAyati chittena yadyatsa~Nkalpate kvachit |
buddhyA nishchIyate yadyadguruNA sa.nshR^iNoti yat || 85||
yadyadvAchA vyAkaroti yadyadAchAryabhAShaNam |
yadyatsvarendriyairbhAvyaM yadyanmImA.nsate pR^ithak || 86||
yadyannyAyena nirNItaM mahadbhirvedapAragaiH |
shivaH kSharati lokAnvai viShNuH pAti jagattrayam || 87||
brahmA sR^ijati lokAnvai evamAdikriyAdikam |
yadyadasti purANeShu yadyadvedeShu nirNayam || 88||
sarvopaniShadAM bhAvaM sarvaM shashaviShANavat |
deho.ahamiti sa~NkalpaM tadantaHkaraNaM smR^itam || 89||
deho.ahamiti sa~Nkalpo mahatsa.nsAra uchyate |
deho.ahamiti sa~Nkalpastadbandhamiti chochyate || 90||
deho.ahamiti sa~NkalpastadduHkhamiti chochyate |
deho.ahamiti yadbhAnaM tadeva narakaM smR^itam || 91||
deho.ahamiti sa~Nkalpo jagatsarvamitIryate |
deho.ahamiti sa~Nkalpo hR^idayagranthirIritiH || 92||
deho.ahamiti yajj~nAnaM tadevAj~nAnamuchyate |
deho.ahamiti yajj~nAnaM tadasadbhAvameva cha || 93||
deho.ahamiti yA buddhiH sA chAvidyeti bhaNyate |
deho.ahamiti yajj~nAnaM tadeva dvaitamuchyate || 94||
deho.ahamiti sa~NkalpaH satyajIvaH sa eva hi |
deho.ahamiti yajj~nAnaM parichChinnamitIritam || 95||
deho.ahamiti sa~Nkalpo mahApApamiti sphuTam |
deho.ahamiti yA buddhistR^iShNA doShAmayaH kila || 96||
yatki~nchidapi sa~NkalpastApatrayamitIritam |
kAmaM krodhaM bandhanaM sarvaduHkha.n
       vishvaM doShaM kAlanAnAsvarUpam |
yatki~nchedaM sarvasa~NkalpajAla.n
       tatki~nchedaM mAnasaM soma viddhi || 97||
mana eva jagatsarvaM mana eva mahAripuH |
mana eva hi sa.nsAro mana eva jagattrayam || 98||
mana eva mahadduHkhaM mana eva jarAdikam |
mana eva hi kAlashcha mana eva malaM tathA || 99||
mana eva hi sa~Nkalpo mana eva hi jIvakaH |
mana eva hi chittaM cha mano.aha~NkAra eva cha || 100||
mana eva mahadbandhaM mano.antaHkaraNaM cha tat |
mana eva hi bhUmishcha mana eva hi toyakam || 101||
mana eva hi tejashcha mana eva marunmahAn |
mana eva hi chAkAshaM mana eva hi shabdakam || 102||
sparshaM rUpaM rasaM gandhaM koshAH pa~ncha manobhavAH |
jAgratsvapnasuShuptyAdi manomayaritIritam || 103||
dikpAlA vasavo rudrA AdityAshcha manomayAH |
dR^ishyaM jaDaM dvandvajAtamaj~nAnaM mAnasaM smR^itam || 104||
sa~Nkalpameva yatki~nchittattannAstIti nishchinu |
nAsti nAsti jagatsarvaM gurushiShyAdikaM nahItyupaniShat || 105||
iti pa~nchamo.adhyAyaH || 5||
\medskip\hrule\medskip

R^ibhuH || sarvaM sachchinmayaM viddhi sarvaM sachchinmayaM tatam |
sachchidAnandamadvaitaM sachchidAnandamadvayam || 1||
sachchidAnandamAtraM hi sachchidAnandamanyakam |
sachchidAnandarUpo.ahaM sachchidAnandameva kham || 2||
sachchidAnandameva tvaM sachchidAnandako.asmyaham |
manobuddhiraha~NkArachittasa~NghAtakA amI || 3||
na tvaM nAhaM na chAnyadvA sarvaM brahmaiva kevalam |
na vAkyaM na padaM vedaM nAkSharaM na jaDaM kvachit || 4||
na madhyaM nAdi nAntaM vA na satyaM na nibandhajam |
na duHkhaM na sukhaM bhAvaM na mAyA prakR^itistathA || 5||
na dehaM na mukhaM ghrANaM na jihvA na cha tAlunI |
na dantoShThau lalATaM cha nishvAsochChvAsa eva cha || 6||
na svedamasthi mA.nsaM cha na raktaM na cha mUtrakam |
na dUraM nAntikaM nA~NgaM nodaraM na kirITakam || 7||
na hastapAdachalanaM na shAstraM na cha shAsanam |
na vettA vedanaM vedyaM na jAgratsvapnasuptayaH || 8||
turyAtItaM na me ki~nchitsarvaM sachchinmayaM tatam |
nAdhyAtmikaM nAdhibhUtaM nAdhidaivaM na mAyikam || 9||
na vishvataijasaH prAj~no virATsUtrAtmakeshvaraH |
na gamAgamacheShTA cha na naShTaM na prayojanam || 10||
tyAjyaM grAhyaM na dUShyaM vA hyamedhyAmedhyakaM tathA |
na pInaM na kR^ishaM kledaM na kAlaM deshabhAShaNam || 11||
na sarvaM na bhayaM dvaitaM na vR^ikShatR^iNaparvatAH |
na dhyAnaM yogasa.nsiddhirna brahmavaishyakShatrakam || 12||
na pakShI na mR^igo nA~NgI na lobho moha eva cha |
na mado na cha mAtsaryaM kAmakrodhAdayastathA || 13||
na strIshUdrabiDAlAdi bhakShyabhojyAdikaM cha yat |
na prauDhahIno nAstikyaM na vArtAvasaro.ati hi || 14||
na laukiko na loko vA na vyApAro na mUDhatA |
na bhoktA bhojanaM bhojyaM na pAtraM pAnapeyakam || 15||
na shatrumitraputrAdirna mAtA na pitA svasA |
na janma na mR^itirvR^iddhirna deho.ahamiti bhramaH || 16||
na shUnyaM nApi chAshUnyaM nAntaHkaraNasa.nsR^itiH |
na rAtrirna divA naktaM na brahmA na hariH shivaH || 17||
na vArapakShamAsAdi vatsaraM na cha cha~nchalam |
na brahmaloko vaikuNTho na kailAso na chAnyakaH || 18||
na svargo na cha devendro nAgniloko na chAgnikaH |
na yamo yamaloko vA na lokA lokapAlakAH || 19||
na bhUrbhuvaHsvastrailokyaM na pAtAlaM na bhUtalam |
nAvidyA na cha vidyA cha na mAyA prakR^itirjaDA || 20||
na sthiraM kShaNikaM nAshaM na gatirna cha dhAvanam |
na dhyAtavyaM na me dhyAnaM na mantro na japaH kvachit || 21||
na padArthA na pUjArhaM nAbhiSheko na chArchanam |
na puShpaM na phalaM patraM gandhapuShpAdidhUpakam || 22||
na stotraM na namaskAro na pradakShiNamaNvapi |
na prArthanA pR^ithagbhAvo na havirnAgnivandanam || 23||
na homo na cha karmANi na durvAkyaM subhAShaNam |
na gAyatrI na vA sandhirna manasyaM na duHsthitiH || 24||
na durAshA na duShTAtmA na chANDAlo na paulkasaH |
na duHsahaM durAlApaM na kirAto na kaitavam || 25||
na pakShapAtaM na pakShaM vA na vibhUShaNataskarau |
na cha dambho dAmbhiko vA na hIno nAdhiko naraH || 26||
naikaM dvayaM trayaM turyaM na mahatvaM na chAlpatA |
na pUrNaM na parichChinnaM na kAshI na vrataM tapaH || 27||
na gotraM na kulaM sUtraM na vibhutvaM na shUnyatA |
na strI na yoShinno vR^iddhA na kanyA na vitantutA || 28||
na sUtakaM na jAtaM vA nAntarmukhasuvibhramaH |
na mahAvAkyamaikyaM vA nANimAdivibhUtayaH || 29||
sarvachaitanyamAtratvAtsarvadoShaH sadA na hi |
sarvaM sanmAtrarUpatvAtsachchidAnandamAtrakam || 30||
brahmaiva sarvaM nAnyo.asti tadahaM tadahaM tathA |
tadevAhaM tadevAhaM brahmaivAhaM sanAtanam || 31||
brahmaivAhaM na sa.nsArI brahmaivAhaM na me manaH |
brahmaivAhaM na me buddhirbrahmaivAhaM na chendriyaH || 32||
brahmaivAhaM na deho.ahaM brahmaivAhaM na gocharaH |
brahmaivAhaM na jIvo.ahaM brahmaivAhaM na bhedabhUH || 33||
brahmaivAhaM jaDo nAhamahaM brahma na me mR^itiH |
brahmaivAhaM na cha prANo brahmaivAhaM parAtparaH || 34||
idaM brahma paraM brahma satyaM brahma prabhurhi saH |
kAlo brahma kalA brahma sukhaM brahma svayamprabham || 35||
ekaM brahma dvayaM brahma moho brahma shamAdikam |
doSho brahma guNo brahma damaH shAntaM vibhuH prabhuH || 36||
loko brahma gururbrahma shiShyo brahma sadAshivaH |
pUrvaM brahma paraM brahma shuddhaM brahma shubhAshubham || 37||
jIva eva sadA brahma sachchidAnandamasmyaham |
sarvaM brahmamayaM proktaM sarvaM brahmamayaM jagat || 38||
svayaM brahma na sandehaH svasmAdanyanna ki~nchana |
sarvamAtmaiva shuddhAtmA sarvaM chinmAtramadvayam || 39||
nityanirmalarUpAtmA hyAtmano.anyanna ki~nchana |
aNumAtralasadrUpamaNumAtramidaM jagat || 40||
aNumAtraM sharIraM vA hyaNumAtramasatyakam |
aNumAtramachintyaM vA chintyaM vA hyaNumAtrakam || 41||
brahmaiva sarvaM chinmAtraM brahmamAtraM jagattrayam |
AnandaM paramAnandamanyatki~nchinna ki~nchana || 42||
chaitanyamAtramo~NkAraM brahmaiva sakalaM svayam |
ahameva jagatsarvamahameva paraM padam || 43||
ahameva guNAtIta ahameva parAtparaH |
ahameva paraM brahma ahameva gurorguruH || 44||
ahamevAkhilAdhAra ahameva sukhAtsukham |
Atmano.anyajjagannAsti Atmano.anyatsukhaM na cha || 45||
Atmano.anyA gatirnAsti sarvamAtmamayaM jagat |
Atmano.anyannahi kvApi Atmano.anyattR^iNaM nahi || 46||
Atmano.anyattuShaM nAsti sarvamAtmamayaM jagat |
brahmamAtramidaM sarvaM brahmamAtramasanna hi || 47||
brahmamAtraM shrutaM sarvaM svayaM brahmaiva kevalam |
brahmamAtraM vR^itaM sarvaM brahmamAtraM rasaM sukham || 48||
brahmamAtraM chidAkAshaM sachchidAnandamavyayam |
brahmaNo.anyatarannAsti brahmaNo.anyajjaganna cha || 49||
brahmaNo.anyadaha nAsti brahmaNo.anyatphalaM nahi |
brahmaNo.anyattR^iNaM nAsti brahmaNo.anyatpadaM nahi || 50||
brahmaNo.anyadgururnAsti brahmaNo.anyamasadvapuH |
brahmaNo.anyanna chAhantA tvattedante nahi kvachit || 51||
svayaM brahmAtmakaM viddhi svasmAdanyanna ki~nchana |
yatki~nchiddR^ishyate loke yatki~nchidbhAShyate janaiH || 52||
yatki~nchidbhujyate kvApi tatsarvamasadeva hi |
kartR^ibhedaM kriyAbhedaM guNabhedaM rasAdikam || 53||
li~NgabhedamidaM sarvamasadeva sadA sukham |
kAlabhedaM deshabhedaM vastubhedaM jayAjayam || 54||
yadyadbhedaM cha tatsarvamasadeva hi kevalam |
asadantaHkaraNakamasadevendriyAdikam || 55||
asatprANAdikaM sarvaM sa~NghAtamasadAtmakam |
asatyaM pa~nchakoshAkhyamasatyaM pa~ncha devatAH || 56||
asatyaM ShaDvikArAdi asatyamarivargakam |
asatyaM ShaDR^itushchaiva asatyaM ShaDrasastathA || 57||
sachchidAnandamAtro.ahamanutpannamidaM jagat |
AtmaivAhaM paraM satyaM nAnyAH sa.nsAradR^iShTayaH || 58||
satyamAnandarUpo.ahaM chidghanAnandavigrahaH |
ahameva parAnanda ahameva parAtparaH || 59||
j~nAnAkAramidaM sarvaM j~nAnAnando.ahamadvayaH |
sarvaprakAsharUpo.ahaM sarvAbhAvasvarUpakam || 60||
ahameva sadA bhAmItyevaM rUpaM kuto.apyasat |
tvamityevaM paraM brahma chinmayAnandarUpavAn || 61||
chidAkAraM chidAkAshaM chideva paramaM sukham |
AtmaivAhamasannAhaM kUTastho.ahaM guruH paraH || 62||
sachchidAnandamAtro.ahamanutpannamidaM jagat |
kAlo nAsti jagannAsti mAyAprakR^itireva na || 63||
ahameva hariH sAkShAdahameva sadAshivaH |
shuddhachaitanyabhAvo.ahaM shuddhasattvAnubhAvanaH || 64||
advayAnandamAtro.ahaM chidghanaikaraso.asmyaham |
sarvaM brahmaiva satataM sarvaM brahmaiva kevalam || 65||
sarvaM brahmaiva satataM sarvaM brahmaiva chetanam |
sarvAntaryAmirUpo.ahaM sarvasAkShitvalakShaNaH || 66||
paramAtmA paraM jyotiH paraM dhAma parA gatiH |
sarvavedAntasAro.ahaM sarvashAstrasunishchitaH || 67||
yogAnandasvarUpo.ahaM mukhyAnandamahodayaH |
sarvaj~nAnaprakAsho.asmi mukhyavij~nAnavigrahaH || 68||
turyAturyaprakAsho.asmi turyAturyAdivarjitaH |
chidakShro.an satyo.ahaM vAsudavo.ajararo.amaraH || 69||
ahaM brahma chidAkAshaM nityaM brahma nira~njanam |
shuddhaM buddhaM sadAmuktamanAmakamarUpakam || 70||
sachchidAnandarUpo.ahamanuntpannamidaM jagat |
satyAsatyaM jagannAsti sa~NkalpakalanAdikam || 71||
nityAnandamayaM brahma kevalaM sarvadA svayam |
anantamavyayaM shAntamekarUpamanAmayam || 72||
matto.anyadasti chenmithyA yathA marumarIchikA |
vandhyAkumAravachane bhItishchedasti ki~nchana || 73||
shashashR^i~NgeNa nAgendro mR^itashchejjagadasti tat |
mR^igatR^iShNAjalaM pItvA tR^iptashchedastvidaM jagat || 74||
narashR^i~NgeNa naShTashchetkashcidastvidameva hi |
gandharvanagare satye jagadbhavati sarvadA || 75||
gagane nIlimAsatye jagatsatyaM bhaviShyati |
shuktikArajataM satyaM bhUShaNaM chejjagadbhavet || 76||
rajjusarpeNa daShTashchennaro bhavatu sa.nsR^itiH |
jAtarUpeNa bANena jvAlAgnau nAshite jagat || 77||
vindhyATavyAM pAyasAnnamasti chejjagadudbhavaH |
rambhAstambhena kAShThena pAkasiddhau jagadbhavet || 78||
sadyaH kumArikarUpaiH pAke siddhe jagadbhavet |
chitrasthadIpaistamaso nAshashchedastvidaM jagat || 79||
mAsAtpUrvaM mR^ito martyo hyAgatashchejjagadbhavet |
takraM kShIrasvarUpaM chetkvachinnityaM jagadbhavet || 80||
gostanAdudbhavaM kShIraM punarAropaNe jagat |
bhUrajo.abdhau samutpanne jagadbhavatu sarvadA || 81||
kUrmaromNA gaje baddhe jagadastu madotkaTe |
nAlasthatantunA merushchAlitashchejjagadbhavet || 82||
tara~NgamAlayA sindhurbaddhashchedastvidaM jagat |
agneradhashchejjvalanaM jagadbhavatu sarvadA || 83||
jvAlAvahniH shItalashchedastirUpamidaM jagat |
jvAlAgnimaNDale padmavR^iddhishchejjagadastvidam || 84||
mahachChailendranIlaM vA sambhavachchedidaM jagat |
merurAgatya padmAkShe sthitashchedastvidaM jagat || 85||
nigirechchedbhR^i~NgasUnurmeruM chalavadastvidam |
mashakena hate si.nhe jagatsatyaM tadAstu te || 86||
aNukoTaravistIrNe trailokyaM chejjagadbhavet |
tR^iNAnalashcha nityashchetkShaNikaM tajjagadbhavet || 87||
svapnadR^iShTaM cha yadvastu jAgare chejjagadbhavaH |
nadIvego nishchalashchetkenApIdaM bhavejjagat || 88||
kShudhitasyAgnirbhojyashchennimiShaM kalpitaM bhavet |
jAtyandhai ratnaviShayaH suj~nAtashchejjagatsadA || 89||
napu.nsakakumArasya strIsukhaM chedbhavajjagat |
nirmitaH shashashR^i~NgeNa rathashchejjagadasti tat || 90||
sadyojAtA tu yA kanyA bhogayogyA bhavejjagat |
vandhyA garbhAptatatsaukhyaM j~nAtA chedastvidaM jagat || 91||
kAko vA ha.nsavadgachChejjagadbhavatu nishchalam |
mahAkharo vA si.nhena yudhyate chejjagatsthitiH || 92||
mahAkharo gajagatiM gatashchejjagadastu tat |
sampUrNachandrasUryashchejjagadbhAtu svayaM jaDam || 93||
chandrasUryAdikau tyaktvA rAhushcheddR^ishyate jagat |
bhR^iShTabIjasamutpannavR^iddhishchejjagadastu sat || 94||
daridro dhanikAnAM cha sukhaM bhu~Nkte tadA jagat |
shunA vIryeNa si.nhastu jito yadi jagattadA || 95||
j~nAnino hR^idayaM mUDhairj~nAtaM chetkalpanaM tadA |
shvAnena sAgare pIte niHsheSheNa mano bhavet || 96||
shuddhAkAsho manuShyeShu patitashchettadA jagat |
bhUmau vA patitaM vyoma vyomapuShpaM sugandhakam || 97||
shuddhAkAshe vane jAte chalite tu tadA jagat |
kevale darpaNe nAsti pratibimbaM tadA jagat || 98||
ajakukShau jagannAsti hyAtmakukShau jagannahi |
sarvathA bhedakalanaM dvaitAdvaitaM na vidyate || 99||
mAyAkAryamidaM bhedamasti chedbrahmabhAvanam |
deho.ahamiti duHkhaM chedbrahmAhamiti nishchayaH || 100||
hR^idayagranthirastitve Chidyate brahmachakrakam |
sa.nshaye samanuprApte brahmanishchayamAshrayet || 101||
anAtmarUpachorashchedAtmaratnasya rakShaNam |
nityAnandamayaM brahma kevalaM sarvadA svayam || 102||
evamAdisudR^iShTAntaiH sAdhitaM brahmamAtrakam |
brahmaiva sarvabhavanaM bhuvanaM nAma santyaja || 103||
ahaM brahmeti nishchitya ahambhAvaM parityaja |
sarvameva layaM yAti suptahastasthapuShpavat || 104||
na deho na cha karmANi sarvaM brahmaiva kevalam |
na bhUtaM na cha kAryaM cha na chAvasthAchatuShTayam || 105||
lakShaNAtrayavij~nAnaM sarvaM brahmaiva kevalam |
sarvavyApAramutsR^ijya hyahaM brahmeti bhAvaya || 106||
ahaM brahma na sandeho hyahaM brahma chidAtmakam |
sachchidAnandamAtro.ahamiti nishchitya tattyaja || 107||
shA~NkarIyaM mahAshAstraM na deyaM yasya kasyachit |
nAstikAya kR^itaghnAya durvR^ittAya durAtmane || 108||
gurubhaktivishuddhAntaHkaraNAya mahAtmane |
samyakparIkShya dAtavyaM mAsaM ShANmAsavatsaram || 109||
sarvopaniShadabhyAsaM dUratastyajya sAdaram |
tejobindUpaniShadamabhyasetsarvadA mudA || 110||
sakR^idabhyAsamAtreNa brahmaiva bhavati svayam |
brahmaiva bhavati svayamityupaniShat ||
AUM saha nAvavatu || saha nau bhunaktu ||
saha vIryaM karavAvahai ||
tejasvinAvadhItamastu mA vidviShAvahai ||
iti tejobindUpaniShatsamAptA ||

##
Encoded and proofread by Sunder Hattangadi

\medskip\hrule\obeylines

Please send corrections to sanskrit at cheerful dot c om
Last updated \today
https://sanskritdocuments.org

\end{document}