Ananta Stava

 अनन्तस्तवः 
येनेदं जगदखिलं धृतं विधात्रा
     विश्वं यज्जठरगतं युगान्तकाले ।
यो वेदानवति तमेत्य मत्स्यरूपं
     तं देवं शरणमहं गतोऽस्म्थनन्तम् ॥ १॥

यो लोकानसृजदनाद्यनन्तरूपो
     विश्वात्मा विगततमोरजोभिरीड्यः ।
घृत्वेमां कमठवपुमेहीं सृजन्तं
     तं देवं शरणमहं गतोऽस्म्यनन्तम् ॥ २॥

यः पृथ्वीमसुरभयाद्रसातलस्था-
     मुद्धर्तुं खुरनिकरक्षतासुरौघः ।
वाराहीं तनुमभजत् त्रयीनिवास-
     स्तं देवं शरणमहं गतोऽस्म्यनन्तम् ॥ ३॥

हैरण्यं कुलिशदृढं पुरा नखाग्रै-
     र्वक्षो यः सपदि विदारयाश्चकार ।
रह्लादप्रियहितकृन्नृसिंहरूप-
     स्तं देवं शरणमहं गतोऽस्म्यनन्तम् ॥ ४॥

स्वर्लोकस्थितिकरणाय यो धरित्री
     त्रेधा विक्रमितुमयाचतासुरेशम् ।
भूत्वा वामनतनुरीश्वरं सुराणां
     तं देवं शरणमहं गतोऽस्म्यनन्तम् ॥ ५॥

यः क्षत्रं निहितपरश्वधेन सर्वं
     छित्वा तत्क्षतजजलेन कर्म पित्र्यम् ।
चक्रे विक्रमविभवैकसम्पदीड्य-
     स्तं देवं शरणमहं गतोऽस्म्यनन्तम् ॥ ६॥

यो लोकत्रयवनवह्निमीश्वराणा-
     मीशानो दशवदनं रणे निहन्तुम् ।
रामो दाशरथिरभूदुदारवीर्य-
     स्तं देवं शरणमहं गतोऽस्म्यनन्तम् ॥ ७॥

यः पृथ्वीमसुरभरातिभङ्गुरार्ता-
     मुद्धर्तुं मुसलहलायुधो बभूव ।
कालिन्दीकर्षणदर्शितातिवीर्य-
     स्तं देवं शरणमहं गतोऽस्म्यनन्तम् ॥ ८॥

कंसादींस्त्रिदशरिपूनपाचिकीर्षु-
     र्यः पृथ्व्यामिह यदुनन्दनो वभूव ।
बालार्कयुतिविकसत्सरोजवक्त्रं
     तं देवं शरणमहं गतोऽस्म्यनन्तम् ॥ ९॥

पाषण्डान् कलिकलुषीकृत स्वधर्मा-
     निश्शेषं सपदि निराकरिष्णुरीशः ।
यः कल्की भवति नितान्तघोररूपं
     तं देवं शरणमहं गतोऽस्म्यनन्तम् ॥ १०॥

(This stotra contains ten shlokas and describes
the ten inscarnations of Vishnu.)

इति सुभद्राकृतः अनन्तस्तवः सम्पूर्णः ।

Proofread by Mohan Chettoor