श्रीदक्षिणशेषाचलेशश्रीनिवासभगवन्मङ्गलम्
श्रीमते प्रसन्नवेङ्कटेशश्रीनिवासाय नमः ।
श्रियः कान्ताय कल्याणनिधये निधयेऽर्थिनाम् ।
श्रीवेङ्कटनिवासाय श्रीनिवासाय मङ्गलम् ॥ १॥
श्रीमद्दक्षिणशेषाद्रि शिरस्पदविहारिणे ।
प्रसन्नवेङ्कटेशाय श्रीनिवासाय मङ्गलम् ॥ २॥
सर्वमङ्गलरूपाय सर्वमङ्गलमूर्तये ।
सर्वमङ्गलदायास्तु श्रीनिवासाय मङ्गलम् ॥ ३॥
सर्वभूतशरण्याय सर्वप्रणतबन्धवे ।
सर्वकर्मभिरर्च्याय श्रीनिवासाय मङ्गलम् ॥ ४॥
सर्वन्तरात्मने सर्ववपुषे सर्वशक्तये ।
सर्वज्ञाय ब्रह्मणेऽस्तु श्रीनिवासाय मङ्गलम् ॥ ५॥
छत्रत्फणालिभोगीन्द्रभोगान्तस्स्थानमीयुषे ।
चतुर्भुजाय भद्राय श्रीनिवासाय मङ्गलम् ॥ ६॥
सर्ववेदैकवेद्याय सर्ववेदान्विजानते ।
सर्वलोकनिवासाय श्रीनिवासाय मङ्गलम् ॥ ७॥
आदिकोलेन चक्रेण वामदक्षिणपार्श्वयोः ।
भास्वराय श्रियः पत्ये श्रीनिवासाय मङ्गलम् ॥ ८॥
वामदक्षिणपाणिभ्यां पाञ्चजन्यसुदर्शनौ ।
मुदासदादधानाय श्रीनिवासाय मङ्गलम् ॥ ९॥
नमेदं मत्पदं भक्त सुतरस्स्याद्भवस्तव ।
इति सूचयते दोर्भ्यां श्रीनिवासाय मङ्गलम् ॥ १०॥
सतां भक्त्याप्रपत्त्या वा प्रसन्नाय दयालवे ।
अपवर्गप्रदायास्तु श्रीनिवासाय मङ्गलम् ॥ ११॥
अस्त्रभूषणतापन्नसर्वतत्त्वाय मायिने ।
सर्वेश्वरेश्वरायास्तु श्रीनिवासाय मङ्गलम् ॥ १२॥
सर्वश्रुत्यभिनूताय सर्वश्रेयोविधायिने ।
श्रियःकान्ताय पूर्णाय श्रीनिवासाय मङ्गलम् ॥ १३॥
चतुर्मुखादिभिः सर्वैः पूज्यमानाय निर्जरैः ।
भक्तानां सुलभायास्तु श्रीनिवासाय मङ्गलम् ॥ १४॥
रमानित्यविहाराढ्यविशालशुभवक्षसे ।
विश्वकल्याणरूपाय श्रीनिवासाय मङ्गलम् ॥ १५॥
उपत्यकाधित्यकयोर्दक्षिणस्याहिभूभृतः ।
द्विधा हनुमतार्च्याय श्रीनिवासाय मङ्गलम् ॥ १६॥
धर्मस्थापनसद्रक्षादुष्कृद् ध्वंसफलान् बहून् ।
भावानाश्रयते दिव्यान् श्रीनिवासाय मङ्गलम् ॥ १७॥
मङ्गलाशासनपरैस्सुरैस्सर्वैर्नरैरपि ।
आचार्यैश्चार्चितायास्तु श्रीनिवासाय मङ्गलम् ॥ १८॥
श्रीसीतारामसद्भक्त हृदयाम्बुजवासिने ।
तद्भक्ताभीष्टदायास्तु श्रीनिवासाय मङ्गलम् ॥ १९॥
वात्स्यराघवसूर्युक्तं श्रीनिवासाय मङ्गलम् ।
शुभदं यः पठेन्नित्यं स भवेत्सर्वमङ्गलः ॥ २०॥
इति श्रीदक्षिणशेषाचलेश श्रीनिवासभगवन् मङ्गलं सम्पूर्णम् ।
श्रीनिवासाय नमः ।
Proofread by Aruna Narayanan