श्रीदक्षिणशेषाचलेशश्रीनिवासभगवत्प्रपत्तिः
श्रीमते प्रसन्नवेङ्कटेशश्रीनिवासाय नमः ।
श्रीनिवासहृदयङ्गमां रमां सन्नमद्भवखिदापहारिणीम् ।
नित्यफुल्लसरसीरुहासनां सुस्मितां शरणमाश्रयेश्रियम् ॥ १॥
सर्वज्ञ शक्तिभिरुपेत समस्तहेतो
सर्वेश सर्वगुण सर्व हरे दयालो ।
लक्ष्मीपते प्रणतवत्सल चक्रपाणे
श्रीश्रीनिवास चरणौ शरणं प्रपद्ये ॥ २॥
वज्रध्वजाङ्कुश सरोरुहशङ्ख चक्रै-
रेखामयैः शुभकरैः परमत्वचिन्हैः ।
कान्तैर्विभूषिततलौ तव देवदेव
श्रीश्रीनिवास चरणौ शरणं प्रपद्ये ॥ ३॥
अत्यर्थ मार्दवयुतैः करपल्लवैः स्वैः
संवाहने विरचिते कमलाधराभ्याम् ।
तज्जक्लमासहनसूचकरक्तवर्णौ
श्रीश्रीनिवास चरणौ शरणं प्रपद्ये ॥ ४॥
ब्रह्मेशदेवपतयो नियताधिकाराः
सद्यस्तरन्ति विपदो हि ययोः प्रणामात् ।
स्थास्नुं भजन्ति च समीहितसिद्धिमेतौ
श्रीश्रीनिवास चरणौ शरणं प्रपद्ये ॥ ५॥
यत्संश्रितप्रिय जनावन नित्यसक्तो
देव्याश्रिया कनसि दक्षिणशेषशैले ।
तौ नित्यमुक्तजनभोग्यतमावुदारौ
श्रीश्रीनिवास चरणौ शरणं प्रपद्ये ॥ ६॥
भावत्कपूजनविधावुपयोगभाजां
उत्तुङ्गसौरभभृतां तुलसीदलानाम् ।
स्वच्छन्दकेलिनिलयाविव भासमानौ
श्रीश्रीनिवास चरणौ शरणं प्रपद्ये ॥ ७॥
त्रैलोक्यविक्रमविधिप्रसितौ तदा यौ
इन्द्रं बलिं त्रिभुवनं च कृतार्थयन्तौ ।
सर्वेशितुस्तव यशोऽपुषतां भृशं तौ
श्रीश्रीनिवास चरणौ शरणं प्रपद्ये ॥ ८॥
रामात्मनस्तव शिला मिथिलाप्रयाणे
स्पृष्टा यदीयरजसा किल शापमुक्ता ।
जाता हि गौतमवधूर्बत तौ निषेव्यौ
श्रीश्रीनिवास चरणौ शरणं प्रपद्ये ॥ ९॥
तौ दण्डकावननिवासितपोधनानां
क्षेमानुयोग पदपद्मनिषेवणार्थम् ।
प्रत्याश्रमं रघुप ते गमने सहायौ
श्रीश्रीनिवास चरणौ शरणं प्रपद्ये ॥ १०॥
है बालकृष्ण भवतो हनेनप्रसक्तं
दैत्यं विपोथ्य तरसा शकटं बलाढ्यम् ।
रक्षाविधेस्तव दिशास्वधिरूढकीर्ति
श्रीश्रीनिवास चरणौ शरणं प्रपद्ये ॥ ११॥
सोलूखलस्य तव दामनि बद्धमूर्तेः
गन्धर्वयुग्मतरुतामपनेतुमिच्छोः ।
है बालकृष्ण बतचङ्क्रमणे सखायौ
श्रीश्रीनिवास चरणौ शरणं प्रपद्ये ॥ १२॥
है वासुदेव यमुनाह्रदवासिघोर-
दुष्कृत्यकालियफणावलिरङ्गमध्ये ।
निश्शङ्कनर्तनकृतो भवतोऽनुकूलौ
श्रीश्रीनिवास चरणौ शरणं प्रपद्ये ॥ १३॥
हे कृष्ण पाण्डवसख त्वरयोत्तराया
गर्भं प्रविश्यभसितत्वदशान्निरस्य ।
सन्तानबीजमवतो भवतः सहायौ
श्रीश्रीनिवास चरणौ शरणं प्रपद्ये ॥ १४॥
यौ द्राविडस्य सुकवेः शठकोपसूरे-
र्जिह्वाग्रपीठमधिगम्य हरे सुहृद्याम् ।
गाधामयीमपुषतां भवतः स्तुतिं तौ
श्रीश्रीनिवास चरणौ शरणं प्रपद्ये ॥ १५॥
सीताभिराममहनीय महार्हणोत्क
श्रीश्रीनिवासभगवच्चरणप्रपत्तिम् ।
श्रीराघवोऽकृत कविः पदवित् स इत्थं
गम्भीरभावरुचिरैस्सरलैः स्वपद्यैः ॥ १६॥
इति श्रीदक्षिणशेषाचलेश श्रीश्रीनिवास भगवत्प्रपत्तिः समाप्ता ।
Proofread by Aruna Narayanan