% Text title            : devanAyakapanchAshatstavaH
% File name             : devanAyakapanchAshatstavaH.itx
% Category              : vishhnu, panchAshata, vedAnta-deshika, vishnu, stava
% Location              : doc\_vishhnu
% Author                : vedAntadeshika
% Proofread by          : PSA Easwaran psawaswaran
% Description/comments  : Edited by S. V. Radhakrishna Shastriji
% Acknowledge-Permission: Mahaperiaval Trust
% Latest update         : May 13, 2018
% Send corrections to   : sanskrit at cheerful dot c om
%
% This text is prepared by volunteers and is to be used for personal study 
% and research. The file is not to be copied or reposted for promotion of 
% any website or individuals or for commercial purpose without permission. 
% Please help to maintain respect for volunteer spirit.
%
\documentstyle[11pt,multicol,itrans]{article}
#include=ijag.inc
#endwordvowel=.h
\portraitwide
\parindent=100pt                
\let\usedvng=\Largedvng      % for 1 column     
\pagenumbering{itrans} 
\def\engtitle#1{\hrule\medskip\centerline{\LARGE #1}}
\def\itxtitle#1{\medskip\centerline{\LARGEdvng #1}\medskip\hrule}
\def\endtitles{\medskip\obeyspaceslines}
%%
\begin{document}
\engtitle{.. Devanayakapanchashatstavah ..}##
\itxtitle{.. devanAyakapa~nchAshatstavaH ..}##\endtitles ##

shrIvedAntadeshikakR^itaH |
(tiruvahIndrapure)

praNatasurakirITaprAntamandAramAlA
vigalitamakarandasnigdhapAdAravindaH |
pashupatividhipUjyaH padmapatrAyatAkShaH
phaNipatipuranAthaH pAtu mAM devanAthaH || 1||
devAdhinAtha kamalApR^itaneshapUrvAM
dIptAntarAM vakulabhUShaNanAthamukhyaiH |
rAmAnujaprabhR^itibhiH paribhUShitAgrAM
goptrIM jaganti gurupa~NktimahaM prapadye || 2||
divye dayAjalanidhau diviShanniyantuH
tIrthaM nidarshitavatastrijaganniShevyam |
prAchaH kavIn nigamasammitasUnR^itoktIn
prAchetasaprabhR^itikAn praNamAmyabhIkShNam || 3||
mAtastvamamburuhavAsini ki~nchidetat
vij~nApyate mayi kuruShva tathA prasAdam |
AkarNayiShyati yathA vibudheshvaraste
preyAnasau pR^ithukajalpitavanmaduktim || 4||
nirvishyamAnavibhavaM nigamottamA~NgaiH
stotuM kShamaM mama cha devapate bhavantam |
gAvaH pibantu gaNashaH kalashAmburAshiM
kiM tena tarNakagaNAstR^iNamAdadAnAH || 5||
aj~nAtasImakamanantagarutmadAdyaiH
taM tvAM samAdhiniyatairapi sAmi dR^iShTam |
tuShTUShato mama manorathasiddhidAyI
dAseShu satya iti dhAraya nAmadheyam || 6||
vishrANayanmama visheShavidAmanindyAM
antarvatIM giramahIndrapurAdhirAja |
stavyastavapriya itIva tapodhanoktaM
stoteti cha tvadabhidhAnamavandhyaya tvam || 7||
saMrakShaNIyamamarAdhipate tvayaiva
dUraM prayAtamapi dustyajagADhabandham |
AkR^iShTavAnasi bhavAnanukampamAnaH
sUtrAnubaddhashakunikramataH svayaM mAm || 8||
vyAmohitA vividhabhogamarIchikAbhiH
vishrAntamadya labhate vibudhaikanAtha |
gambhIrapUrNamadhuraM mama dhIrbhavantaM
grIShme taTAkamiva shItamanupraviShTA || 9||
divye pade jalanidhau nigamottamA~Nge
svAnte satAM savitR^imaNDalamadhyabhAge |
brahmAchale cha bahumAnapade munInAM
vyaktiM tava tridashanAtha vadanti nityAm || 10||
tIrthairvR^itaM vR^ijinadurgatinAshanArhaiH
sheShakShamAvihagarAjaviri~nchajuShTaiH |
nAtha tvayA natajanasya bhavauShadhena
prakhyAtamauShadhagiriM praNamanti devAH || 11||
svAdhInavishvavibhavaM bhagavan visheShAt
tvAM devanAyakamushanti parAvaraj~nAH |
prAyaH pradarshayitumetaditi pratImaH
tvadbhaktibhUShitadhiyAmiha devabhAvam || 12||
tattvAni yAni chidachitpravibhAgavanti
trayyantavR^iddhagaNitAni sitAsitAni |
dIvyanti tAnyahipurandaradhAmanAtha
divyAstrabhUShaNatayA tava vigrahe.asmin || 13||
bhUShAyudhairadhigataM nijakAntahetoH
bhuktaM priyAbhiranimeShavilochanAbhiH |
pratya~NgapUrNasuShamAsubhagaM vapuste
dR^iShTvA dR^ishau vibudhanAtha na tR^ipyato me || 14||
vedeShu nirjarapate nikhileShvadhItaM
vyAsAdibhirbahumataM tava sUktamagryam |
a~NgAnyamUni bhavataH subhagAnyadhIte
vishvaM vibho janitavanti viri~nchapUrvam || 15||
deveshvaratvamiha darshayituM kShamaste
nAtha tvayApi shirasA vidhR^itaH kirITaH |
ekIkR^itadyumaNibimbasahasradIptiH
nirmUlayan manasi me nibiDaM tamisram || 16||
mugdhasmitAmR^itashubhena mukhendunA te
sa~Ngamya saMsaraNasa~njvarashAntaye naH |
sampadyate vibudhanAtha samAdhiyogyA
sharvaryasau kuTilakuntalakAntarUpA || 17||
bimbAdharaM vikachapa~NkajalochanaM te
lambAlakaM lalitakuNDaladarshanIyam |
kAntaM mukhaM kanakakaitakakarNapUraM
svAntaM vibhUShayati devapate mayIyam || 18||
labdhA tithau kvachidiyaM rajanIkareNa
lakShmIH sthirA surapate bhavato lalATe |
yatsvedabindukaNikodgatabudbudAntaH
tryakShaH purA sa puruSho.ajani shUlapANiH || 19||
lAvaNyavarShiNi lalATataTe ghanAbhe
bibhrattaTidguNavisheShamivordhvapuNDram |
vishvasya nirjarapate tamasA.a.avR^itasya
manye vibhAvayasi mA~NgalikapradIpam || 20||
AhuH shrutiM vibudhanAyaka tAvakInAM
AshAgaNaprasavahetumadhItavedAH |
AkarNite tadiyamArtarave prajAnAM
AshAH prasAdhayitumAdishati svayaM tvAm || 21||
kandarpalA~nChanatanustridashaikanAtha
kAnta pravAharuchire tava karNapAshe |
puShyatyasau pratimukhasthitidarshanIyA
pUShAmayI makarikA vividhAn vihArAn || 22||
netuM sarojavasatirnijamAdhirAjyaM
nityaM nishAmayati devapate bhruvau te |
evaM na chedakhilajantu vimohanArhA
kiM mAtR^ikA bhavati kAmasharAsanasya || 23||
AlakShya sattvamativeladayottara~NgaM
abhyarthinAmabhimatapratipAdanArham |
snigdhAyataM prathimashAli suparvanAtha
dugdhAmbudheranukaroti vilochanaM te || 24||
vishvAbhirakShaNavihArakR^itakShaNaiste
vaimAnikAdhipaviDambitamugdhapadmaiH |
AmodavAhibhiranAmayavAkyagarbhaiH
ArdrIbhavAmyamR^itavarShanibhairapA~NgaiH || 25||
nityoditairnigamaniHshvasitaistavaiShA
nAsA nabhashcharapate nayanAbdhisetuH |
AmreDitapriyatamA mukhapadmagandhaiH
AshvAsinI bhavati samprati muhyato me || 26||
AruNyapallavitayauvanapArijAtaM
AbhIrayoShidanubhUtamamartyanAtha |
vaMshena sha~NkhapatinA cha niShevitaM te
bimbAdharaM spR^ishati rAgavatI matirme || 27||
padmAlayA valayadattasujAtarekhe
tvatkAntimechakitasha~Nkhanibhe matirme |
vismerabhAvaruchirA vanamAlikeva
kaNThe guNIbhavati devapate tvadIye || 28||
AjAnulambibhirala~NkR^itahetijAlaiH
jyAghAtarAjiruchirairjitapArijAtaiH |
chitrA~Ngadaistridashapu~Ngava jAtasa~NgA
tvadbAhubhirmama dR^iDhaM parirarabhyate dhIH || 29||
nIlAchaloditanishAkarabhAskarAbhe
shAntAhite surapate tava sha~Nkhachakre |
pANeramuShya bhajatAmabhayapradasya
pratyAyanaM jagati bhAvayataH svabhUmnA || 30||
akShobhaNIyakaruNAmbudhividrumAbhaM
bhaktAnura~njanamamartyapate tvadIyam |
nityAparAdhachakite hR^idaye madIye
dattAbhayaM sphurati dakShiNapANipadmam || 31||
durdAntadaityavishikhakShatapatrabha~NgaM
vIrasya te vibudhanAyaka bAhumadhyam |
shrIvatsakaustubharamAvanamAlikA~NkaM
chintA.anubhUya labhate charitArthatAM naH || 32||
varNakrameNa vibudhesha vichitritA~NgI
smeraprasUnasubhagA vanamAlikeyam |
hR^idyA sugandhirajahatkamalAmaNIndrA
nityA tava sphurati mUrtiriva dvitIyA || 33||
ArdraM tamomathanamAshritatArakaM te
shuddhaM manaH sumanasAmamR^itaM duhAnam |
tattAdR^ishaM vibudhanAtha samR^iddhakAmaM
sargeShvidaM bhavati chandramasAM prasUtiH || 34||
vishvaM nigIrya vibudheshvara jAtakAryaM
madhyaM valitrayavibhAvyajagadvibhAgam |
AmodinAbhinalinasthaviri~nchabhR^i~NgaM
Akalpayatyudarabandha ivAshayo me || 35||
nAkaukasAM prathamatAmadhikurvate te
nAbhIsarojarajasAM pariNAmabhedAH |
ArAdhayadbhiriha tairbhavataH samIchI
vIrochitA vibudhanAyaka ityabhikhyA || 36||
pItAmbareNa parivAravatI sujAtA
dAsye niveshayati devapate dR^ishau me |
vinyastasavyakarasa~NgamajAyamAna\-
romA~ncharamyakiraNA rashanA tvadIyA || 37||
strIratnakAraNamupAttatR^itIyavarNaM
daityendravIrashayanaM dayitopadhAnam |
devesha yauvanagajendrakarAbhirAmaM
UrIkaroti bhavadUruyugaM mano me || 38||
lAvaNyapUralalitordhvaparibhramAbhaM
lakShmIvihAramaNidarpaNabaddhasakhyam |
gopA~NgaNeShu kR^itacha~NkramaNaM tavaitat
jAnudvayaM surapate na jahAti chittam || 39||
dUtye dukUlaharaNe vrajasundarINAM
daityAnudhAvanavidhAvapi labdhasAhyam |
kandarpakAhalaniSha~NgakalAchikAbhaM
ja~NghAyugaM jayati devapate tvadIyam || 40||
pAShANanirmitatapodhanadharmadAraM
bhasmanyupAhitanarendrakumArabhAvam |
saMvAhitaM tridashanAtha ramAmahIbhyAM
sAmAnyadaivatamushanti padaM tvadIyam || 41||
AvarjitAbhiranuShajya nijAMshujAlaiH
devesha divyapadapadmadalAyitAbhiH |
anyAbhilAShaparilolamidaM madIyaM
a~NgIkR^itaM hR^idayama~NgulibhiH svayaM te || 42||
pa~NkAnyasau mama nihanti mahastara~NgaiH
ga~NgAdhikAM vidadhatI garuDasravantIm |
nAkaukasAM maNikirITagaNairupAsyA
mAnyaM padaM bhavatu maulivibhUShaNaM naH || 44||
chitraM tvadIyapadapadmaparAgayogAd\-
yogaM vinApi yugapadvilayaM prayAnti |
viShva~nchi nirjarapate shirasi prajAnAM
vedhaH svahastalikhitAni durakSharANi || 45||
ye janmakoTibhirupArjitashuddhadharmAH
teShAM bhavachcharaNabhaktiratIva bhogyA |
tvajjIvitaistridashanAyaka durlabhaistaiH
AtmAnamapyakathayaH svayamAtmavantam || 46||
niShka~nchanatva dhaninA vibudhesha yena
nyastaH svarakShaNabharastava pAdapadme |
nAnAvidhaprathitayogavisheShadhanyAH
nArhanti tasya shatakoTitamAMshakakShyAm || 47||
AtmApahArarasikena mayaiva dattaM
anyairadhAryamadhunA vibudhaikanAtha |
svIkR^itya dhArayitumarhasi mAM tvadIyaM
choropanItanijanUpuravat svapAde || 48||
aj~nAnavAridhimapAyadhurandharaM mAM
Aj~nAvibha~njanamaki~nchanasArvabhaumam |
vindan bhavAn vibudhanAtha samastavedI
kiM nAma pAtramaparaM manute kR^ipAyAH || 49||
prahlAdagokulagajendraparIkShidAdyAH
trAtAstvayA nanu vipattiShu tAdR^ishIShu |
sarvaM tadekamaparaM mama rakShaNaM te
santolyatAM tridashanAyaka kiM garIyaH || 50||
vAtyAshatairviShayarAgatayA vivR^ittaiH
vyAghUrNamAnamanasaM vibudhAdhirAja |
nityopatapta iti mAM nijakarmagharmaiH
nirveshaya svapadapadmamadhupravAham || 51||
jaya vibudhapate tvaM darshitAbhIShTadAnaH
saha sarasijavAsAmedinIbhyAM vashAbhyAm |
nalavanamiva mR^idgan pAparAshiM natAnAM
garuDasaridanUpe gandhahastIva dIvyan || 52||
niravadhiguNajAtaM nityanirdoShamAdyaM
narakamathana dakShaM nAkinAmekanAtham |
vinataviShayasatyaM ve~NkaTeshaH kavistvAM
stutipadamadhigachChan shobhate satyavAdI || 53||

iti shrIvedAntadeshikakR^itaH devanAyakapa~nchAshatstavaH sampUrNaH |

##
Proofread by PSA Easwaran

\medskip\hrule\obeylines

Please send corrections to sanskrit@cheerful.com
Last updated \today
https://sanskritdocuments.org

\end{document}