% Text title : gItAvalI % File name : gItAvalI.itx % Category : vishhnu, krishna, rUpagosvAmin, stavamAlA % Location : doc\_vishhnu % Author : Rupagoswami % Transliterated by : Jan Brzezinski (Jagadananda Das) jankbrz at yahoo.com and Neal Delmonico (Nitai Das) ndelmonico at sbcglobal.net % Description/comments : From stavamAlA (rUpagosvAmivirachitA) Garland of Devotional Prayers stavamAlA % Acknowledge-Permission: http://granthamandira.net Gaudiya Grantha Mandira % Latest update : February 22, 2019 % Send corrections to : sanskrit at cheerful dot c om % % This text is prepared by volunteers and is to be used for personal study % and research. The file is not to be copied or reposted for promotion of % any website or individuals or for commercial purpose without permission. % Please help to maintain respect for volunteer spirit. % \documentstyle[11pt,multicol,itrans]{article} #include=ijag.inc #endwordvowel=.h \portraitwide \parindent=100pt \let\usedvng=\Largedvng % for 1 column \pagenumbering{itrans} \def\engtitle#1{\hrule\medskip\centerline{\LARGE #1}} \def\itxtitle#1{\medskip\centerline{\LARGEdvng #1}\medskip\hrule} \def\endtitles{\medskip\obeyspaceslines} %% \begin{document} \engtitle{.. Gitavali ..}## \itxtitle{.. gItAvalI ..}##\endtitles ## prathamaM nandotsavAdi shrIrAdhAkR^iShNau jayataH \section{1} bhairavarAgeNa gIyate | putramudAramasUta yashodA | samajani vallavatatiratimodA || dhruvam || ko.apyapanayati vividhamupahAram | nR^ityati ko.api jano bahubAram || ko.api madhuramupagAyati gItam | vikirati ko.api sadadhi navanItam || ko.api tanoti manorathapUrtim | pashyati ko.api sanAtanamUrtim || 1|| \section{2} AsAvarI | vipravR^indamabhUdala~NkR^itigodhanairapi pUrNam | gAyanAn api madvidhAn vrajanAtha toShaya tUrNam || sUnuradbhutasundaro.ajani nandarAja tavAyam | dehi goShThajanAya vA~nChitamutsavochitadAyam || dhruvam || tAvakAtmajavIkShaNakShaNanandi madvidhachittam | yanna kairapi labdhamarthibhiretadichChati vittam || shrIsanAtanachittamAnasakelinIlamarAle | mAdR^ishAM ratiratra tiShThatu sarvadA tava bAle || 2|| \section{3} vasantapa~nchamI vasantarAgaH abhinavakuTmalaguchChasamujjvalaku~nchitakuntalabhAra | praNayijaneritavandanasahakR^itachUrNitavanaghanasAra || jaya jaya sundara nandakumAra | saurabhasa~NkaTavR^indAvanavihitavasantavihAra || dhruva || adharavirAjitamandatarasmitalobhitanijaparivAra | chaTuladR^iga~nchalarachitarasochchalarAdhAmadanavikAra || bhuvanavimohanama~njulanartanagativalgitamaNihAra | nijavallabhajanasuhR^itsanAtanachittaviharadavatAra || 3|| \section{4} dolotsavaH vasantarAgaH kelirasamAdhurI tatibhiratimedurI kR^itanikhilabandhupashupAlam | hR^idi vidhR^itachandanaM sphuradaruNavandanaM deharuchinirjitatamAlam || sundari mAdhavamavakalayAlam | mitrakaralolayA ratnamayadolayA chalitavapuratichapalamAlam || dhruva || vrajahariNalochanA rachitagorochanA tilakaruchiruchiratarabhAlam | smitajanitalobhayA vadanashashishobhayA vibhramitanavayuvatijAlam || narmamayapaNDitaM puShpakulamaNDitaM ramaNamiha vakShasi vishAlam | praNatabhayashAtanaM priyamadhi sanAtanaM goShThajanamAnasamarAlam || 4|| \section{5} AsAvarI nipatati parito vandanapAlI | taM dolayati mudA suhR^idAlI || vilasati dolopari vanamAlI | taralasaroruhashirasi yathAlI || dhruva || janayati gopIjanakaratAlI | kApi puro nR^ityati pashupAlI || ayamAraNyakamaNDanashAlI | jayati sanAtanarasaparipAlI || 5|| \section{6} dhanAshrIH na kuru kadarthanamatra saraNyAm | mAmavalokya satImasharaNyAm || cha~nchala mu~ncha paTA~nchalabhAgam | karavANyadhunA bhAskarayAgam || dhruva || na rachaya gokulavIra vilambam | vidadhe vidhumukha vinatikadambam || rahasi bibhemi viloladR^igantam | vIkShya sanAtana deva bhavantam || 6|| \section{7} sauraShTrI rAdhe nigada nijaM gadamUlam | udayati tanumanu kimiti tApakulamanukR^itavikaTakukUlam || dhruva || prachurapurandaragopavinindakakAntipaTalamanukUlam | kShipasi vidUre mR^idulaM muhurapi sambhR^itamurasi dukUlam || abhinandasi na hi chandrarajobharavAsitamapi tAmbUlam | idamapi vikirasi varachampakakR^itamanupamadAma sachUlam || bhajadanavasthitimakhilapade sakhi sapadi viDambitatUlam | kalitasanAtanakautukamapi tava hR^idayaM sphurati sashUlam || 7|| \section{8} sauraShTrI kuTilaM mAmavalokya navAmbujamupari chuchumba sa ra~NgI | tena haThAdahamabhavaM vepathumaNDalasa~nchalada~NgI || bhAmini pR^ichCha na vAraM vAram | hanta vimuhyati vIkShya mano mama vallavarAjakumAram || dhruva || dADimalatikAmanu nistalaphalanamitAM sa dadhe hastam | tadanubhavAn mama dharmojjvalamapi dhairyadhanaM gatamastam || adashadashokalatApallavamayamatanusanAtananarmA | tadahamavekShya babhUva chiraM bata vismR^itakAyikakarmA || 8|| \section{9} dhanAshrIH anadhigatAkasmikagadakAraNamarpitamantrauShadhinikurambam | avirataruditavilohitalochanamanushochati tAmakhilakuTumbam || deva hare bhava kAruNyashAlI | sA tava nishitakaTAkShasharAhatahR^idayA jIvati kR^ishatanUrAlI || dhruva || hR^idi valadaviralasa~njvarapaTalIsphuTadujjvalamauktikasamudAyA | shItalabhUtalanishchalatanuriyamavasIdati sa.nprati nirupAyA || goShThajanAbhayasatramahAvratadIkShita bhavato mAdhava bAlA | kathamarhati tAM hanta sanAtana viShamadashAM guNavR^indavishAlA || 9|| \section{10} AsAvarI hanta na kimu mantharayasi santatamabhijalpam | dantarochirantarayati santamasamanalpam || rAdhe pathi mu~ncha bhuri sambhramamabhisAre | chAraya charaNAmburuhe dhIraM sukumAre || dhruva || santanu ghanavarNamatulakuntalanichayAntam | dhvAntaM tava jIvatu nakhakAntibhirabhishAntam || sasanAtanamAnasAdya yAntI gatasha~Nkam | a~NgIkuru ma~njuku~njavasateralama~Nkam || 10|| \section{11} gauDI sichayamuda~nchaya hR^idayAdalpam | vilikhAmyadbhutamakarAkalpam || iha na hi sa~Nkucha pa~Nkajanayane | veshaM tava karavai ratishayane || dhruva || rAdhe dolaya na kila kapolam | chitraM rachayAmyahamavilolam || tava vapuradya sanAtanashobham | janayati hR^idi mama ka~nchana lobham || 11|| \section{12} AsAvarI tava cha~nchalamatirayamaghahantA | ahamuttamadhR^itidigdhadigantA || dUti vidUraya komalakathanam | punarabhidhAsye na hi madhumathanam || dhruva || shaThacharito.ayaM tava vanamAlI | mR^iduhR^idayAhaM nijakulapAlI || tava harireSha nira~NkushanarmA | ahamanubaddhasanAtanadharmA || 12|| \section{13} bhairavaH maNDitahallIsakamaNDalAM naTayan rAdhAM chalakuNDalAm || nikhilakalAsampadi parichayI | priyasakhi pashya naTati murajayI || dhruva || muhurAndolita ratnavalayam | salayaM chalayan karakishalayam || gatibha~NgibhiravashIkR^itashashI | sthagitasanAtanasha~NkaravashI || 13|| \section{14} bhairavaH dAmodararativardhanaveshe hariniShkuTavR^indAvipineshe | rAdhe jaya jaya mAdhavadayite gokulataruNImaNDalamahite || dhruva || vR^iShabhAnudadhinavashashilekhe lalitAsakhi guNaramitavishAkhe | karuNAM kuru mayi karuNAbharite | sanakasanAtanavarNitacharite || 14|| \section{15} dhanAshrIH | rAjapurAd gokulamupayAtam | pramadonmAditajananItAtam || svapne sakhi punaradya mukundam | AlokayamavataMsitakundam || dhruva || paramamahotsavaghurNitaghoSham | nayane~NgitakR^itamatparitoSham || navagu~njAvalikR^itaparabhAgam | prabalasanAtanasuhR^idanurAgam || 15|| \section{16} saurAShTrI pulakamupaiti bhayAn mama gAtram | hasasi tathApi madAdatimAtram || vAraya tUrNamimaM sakhi kR^iShNam | anuchitakarmaNi nirmitatR^iShNam || dhruva || jAne bhavatImeva vipakShAm | mAmupanItA yad vanakakShAm || adya sanAtanamatisukhahetum | na parihariShye vidhikR^itasetum || 16|| atha rAsaH \section{17} dhanAshrIH komalashashikararamyavanAntaranirmitagItavilAsa | tUrNasamAgatavallavayauvatavIkShaNakR^itaparihAsa || jaya jaya bhAnusutAtaTara~NgamahAnaTa sundara nandakumAra | sharada~NgIkR^itadivyarasAvR^ita ma~NgalarAsavihAra || dhruva || gopIchumbita rAgakarambita mAnavilokanalIna | guNavargonnatarAdhAsa~NgatasauhR^idasampadadhIna || tadvachanAmR^itapAnamadAhR^ita valayIkR^itaparivAra | surataruNIgaNamativikShobhaNa khelanavalgitahAra || ambuvigAhanananditanijajana maNDitayamunAtIra | sukhasaMvidghana pUrNasanAtana nirmalanIlasharIra || 17|| \section{18} dhanAshrIH shuddhasatIvratavittA ahamatinirmalachittA | prathayasi sujanavimuktaM narmedaM kimayuktam || mAdhava parihara me paTametam | yAmi javena niketam || dhruva || yadi jAnAmyadhitIraM tvAmatigUDhasharIram | dUre sUrasutAyAM sAyaM kathamupayAyAm || vidadhe bhavadavanAmaM charitaM parihara vAmam | vartma sanAtanamuchitaM pAlaya dhArmikaruchitam || 18|| \section{19} karNATaH kiM vitanoShi mudhA~NgavibhUShaNakapaTenAtra vighAtam | soDhumahaM samayasya na sa.nprati shaktA lavamapi pAtam || gokulama~NgalavaMshI dhvanirudgarjati vanagataye smarabhUpatishAsanashaMsI || dhruva || mAdhavacharaNA~NguShThanakhadyutirayamudayati himadhAmA | mA gurujanabhayamudgira muhuriyamabhavaM dhAvitakAmA || taM sevitumiha pashya sanAtanaparamAraNyajavesham | gopavadhUtatiriyamupasarpati bhAnusutAtaTadesham || 19|| \section{20} karNATaH sphuradindIvaranindikalevara rAdhAkuchaku~Nkumabhara pi~njara | sundarachandrakachUDa manohara chandrAvalimAnasashukapa~njara || jaya jaya jaya gu~njAvalimaNDita | praNayavishR^i~NkhalagopImaNDalavara bimbAdharakhaNDanapaNDita || dhruva || mR^igavanitAnanatR^iNavisraMsana karmadhurandharamuralIkUjita | svArasikasmitasuShamonmAdita siddhasatInayanA~nchalapUjita || tAmbUlollasadAnanasArasa jAmbUnadaruchivisphuradambara | harakamalAsanasanakasanAtana dhR^itividhvaMsanalIlADambara || 20|| \section{21} kedAraH saurabhasevitapuShpavinirmita nirmalavanamAlAparimaNDita | madnatarasmitakAntikarambita vadanAmbujanavavibhramapaNDita || jaya jaya marakatakandalasundara | varachAmIkarapItAmbaradhara vR^indAvanajanavR^indapurandara || dhruva || navagu~njAphalarAjibhirujjvala kekishikhaNDakashekharama~njula | guNavargAtulagopavadhUkula chittashilImukhapuShpitava~njula || kalamuralIkvaNapUravichakShaNa pashupAlAdhipahR^idayAnandana | girishasanAtanasanakasanandana nAradakamalAsanakR^itavandana || 21|| \section{22} gauDI yAmunajalakaNikAbhirupete | sa~Ngatamujjvalaku~njanikete || tvayi vinihitavarasauhR^idabhAram | vihitAparataruNIparihAram || bhaja sakhi vallavarAjakumAram | kAmitatAvakasa~NgavihAram || dhruva || navagu~njAphalama~njulahAram | mAlyavihArimadhupaparivAram || nirmalanarmavibhAvanashIlam | vallavamatra sanAtanalIlam || \section{23} mallAraH taruNIlochanatApavimochana hAsasudhA~NkuradhArI | mandamaruchchalapi~nChakR^itojjvala maulirudAravihArI || sundari pashya milati vanamAlI | divase pariNatimupagachChati sati navanavavibhramashAlI || dhruva || dhenukhuroddhutareNuparipluta phullasaroruhadAmA | achiravikasvaralasadindIvara maNDalasundaradhAmA || kalamuralIrutikR^itatAvakarati\- ratra dR^igantatara~NgI | chArusanAtanatanuranura~njana kArisuhR^idgaNasa~NgI || 23|| \section{24} dhanAshrIH yadyapi samAdhiShu vidhirapi pashyati na tava nakhAgramarIchim | idamichChAmi nishamya tavAchyuta tadapi kR^ipAdbhutavIchim || deva bhavantaM vande | manmAnasamadhukaramarpaya nija padapa~Nkajamakarande || dhruva || bhaktiruda~nchati yadyapi mAdhava na tvayi mama tilamAtrI | parameshvaratA tadapi tavAdhika durghaTaghaTanavidhAtrI || ayamavilolatayAdya sanAtana kalitAdbhutarasabhAram | nivasatu nityamihAmR^itanindini vindanmadhurimasAram || 24|| atha nAyikAbhedAH athAbhisArikA vAsasajjApyutkaNThitA tathA | vipralabdhA khaNDitA cha kalahAntaritA parA || proShitapreyasI proktA tathA svAdhInabhartR^ikA | ityaShTau nAyikAbhedA rasatantre prakIrtitAH || tatrAbhisArikA yA paryutsukachittAtimadena madanena cha | AtmanAbhisaret kAntaM sA bhavedabhisArikA || \section{25} dhanAshrIH tvaM kuchavalgitamauktikamAlA | smitasAndrIkR^itashashikarajAlA || harimabhisara sundari sitaveshA | rAkArajanirajani gurureShA || dhruva || parihitamAhiShadadhiruchisichayA | vapurarpitaghanachandananichayA || karNakarambitakairavahAsA | kalitasanAtanasa~NgavilAsA || 25|| atha vAsakasajjA bhaved vAsakasajjAsau sajjitA~NgaratAlayA | nishchityAgamanaM bharturdvArekShaNaparAyaNA || \section{26} kalyANaH kusumAvalibhirupaskuru talpam | mAlyaM chAmalamaNisarakalpam || priyasakhi keliparichChadapu~njam | upakalpaya satvaramadhiku~njam || dhruva || maNisampuTamupanaya tAmbUlam | shayanA~nchalamapi pItadukUlam || viddhi samAgatamapratibandham | mAdhavamAshu sanAtanasandham || 25|| athotkaNThitA sA syAdutkaNThitA yasyA vAsaM naiti drutaM priyaH | tasyAnagamane hetuM chintayantyA shuchA bhR^isham || \section{27} AsAvarI kimu chandrAvaliranayagabhIrA | nyaruNadamuM rativIramadhIrA || atichiramajani rajaniratikAlI | sa~Ngamavindata na hi vanamAlI || dhruva || kimiha jane dhR^itapa~NkavipAke | vismR^itirasya babhUva varAke || kimuta sanAtanatanuralaghiShTham | raNamArabhata surAribhiriShTam || 27|| atha vipralabdhA yasyA dUtIM svayaM preShya samaye nAgataH priyaH | shochantI taM vinA duHsthA vipralabdhA tu sA smR^itA || \section{28} gauDI komalakusumAvalIkR^itachayanam | apasAraya ratilIlAshayanam || shrIhariNAdya na lebhe shamaye | hanta janaM sakhi sharaNaM kamaye || dhruva || nidhR^itamanoharagandhavilAsam | kShipa yAmunataTabhuvi paTavAsam || labdhamavehi nishAntimayAmam | mu~ncha sanAtanasa~NgatikAmam || 28|| atha khaNDitA anyayA saha kAntasya dR^iShTe sambhogalakShaNe | IrShyAkaShAyitAtmAsau khaNDitA khalu kathyate || \section{29} rAmakeliH hR^idayAntaramadhishAyitam | ramaya janaM nijadayitam || kiM phalamaparAdhikayA | sa.nprati tava rAdhikayA || mAdhava parihara paTimatara~Ngam | vetti na kA tava ra~Ngam || dhruva || AghUrNati tava nayanam | yAhi ghaTIM bhaja shayanam || anulepaM rachayAlam | nashyatu nakhapadajAlam || tvAmiha vilasati bAlA | mukharasakhInAM mAlA || deva sanAtana vande | na kuru vilambamAlinde || 29|| \section{30} yAM sevitavAn asi jAgarI | tvAmajayat sA nishi nAgarI || kapaTamidaM tava vindati hare | nAvasaraM punarAlinikare || dhruva || mA kuru shapathaM gokulapate | vetti chiraM kA charitaM na te || muktasanAtanasauhR^idabhare | na punarahaM tvayi rasamAhare || 30|| atha kalahAntaritA nirasto manyunA kAnto namannapi yayA puraH | sAnutApayutA dInA kalahAntaritA bhavet || \section{31} lalitaH nAkarNayamatisuhR^idupadesham | mAdhavachATupaTalamapi lesham || sIdati sakhi mama hR^idayamadhIram | yadabhajamiha na hi gokulavIram || dhruva || nAlokayamarpitamuruhAram | praNamantaM cha dayitamanuvAram || hanta sanAtanaguNamabhiyAntam | kimadhArayamahamurasi na kAntam || 31|| atha virahiNI proShitapreyasI kutashchit kAraNAd yasyA vidUrastho bhavet patiH | tadanAgamaduHkhArtA sA syAt proShitabhartR^ikA || \section{32} gauDI kurvati kila kokilakule ujjvalakalanAdam | jaiminiriti jaiminriti jalpati saviShAdam || mAdhava ghore viyogatamasi nipapAta rAdhA | vidhuramalinamUrtiradhikamadhirUDhabAdhA || dhruva || nIlanalinamAlyamahaha vIkShya pulakavItA | garuDa garuDa garuDetyabhirauti paramabhItA || lambhitamR^iganAbhimagurukardamamanu dInA | dhyAyati shitikaNThamapi sanAtanamanulInA || 32|| atha svAdhInabhartR^ikA yasyAH premaguNAkR^iShTaH priyaH pArshvaM na mu~nchati | vichitrasambhramAsaktA sA syAt svAdhInabhartR^ikA || \section{33} mallAraH patrAvalimiha mama hR^idi gaure | mR^igamadabindubhirarpaya shaure || shyAmala sundara vividhavisheSham | virachaya vapuShi mamojjvalavesham || dhruva || pi~nChamukuTa mama pi~nChanikAsham | varamavataMsaya kuntalapAsham || atra sanAtana shilpalava~Ngam | shrutiyugale mama lambhaya sa~Ngam || 33|| \section{34} vasantarAgaH kimayaM rachayati nayanatara~Ngam | kairavinI na hi bhajati pata~Ngam || vAraya mAdhavamudyadana~Ngam | spR^ishati yathAyaM na sakhi mada~Ngam || dhruva || kampikarAn mama patati lava~Ngam | tvamapi tathApi na mu~nchasi ra~Ngam || kamapi sanAtanadharmamabha~Ngam | na parihariShye hR^idi kR^itasa~Ngam || 34|| \section{35} bhairavarAgaH apaghanaghaTitaghusR^iNaghanasAra | pi~nChakhachitaku~nchitakachabhAra || jaya jaya vallavarAjakumAra | rAdhAvakShasi harimaNihAra || dhruva || rAdhAdhR^itiharamuralItAra | nayanA~nchalakR^itamadanavikAra || rasara~njitarAdhAparivAra | kalitasanAtanachittavihAra || 35|| \section{36} karNATarAgaH, ekatAlI tAlaH sundari sAdhvI tvamiha kishorI | tat kathamasi vada goShThapurandaranandana hR^inmaNichaurI || na hi sa~Ngopaya paradhanamadhunA tvaM viditA kulapAlI | lalitAsakhi kuru karuNAM sIdati kandarabhuvi vanamAlI || ayi ramaNImaNi ramaNIyaM maNimarpaya punarAvalambam | bahvatu nirAkulamatikR^ipayA tava hariparijananikurambam || dUtIyugamidamavanamati svayamavaniluThitakachajuTam | tanvi sanAtanasauhR^idamanusara vistAraya na hi kUTam || 36|| \section{37} mallArarAgaH, ekatAlI tAlaH rAdhe kalaya hR^idayamanukUlam | dalati dR^iga~nchalasharahatahR^it tava gokulajIvitamUlam || dhruva || shIlitapa~nchamagItiradakShiNapANisaroruhahaMsI | tanute sAmpratamasya munivratamaratibharAdiva vaMshI || bhramadindindiravR^indavikarShaNaparimalapaTalavishAlA | patitA kaNThataTAdabhishuShyati tasya vane vanamAlA || adaye dadhatI tanurapi tanutAM tasya samujjhitalIlA | shIryati kandaradhAmni sanAtanahR^idayAnandanashIlA || 37|| \section{38} vasantarAgaH madhuripuradya vasante | khelati gokulayuvatibhirujjvalapuShpasugandhadigante || dhruva || premakarambitarAdhAchumbitamukhavidhurutsavashAlI | dhR^itachandrAvalichArukarA~Nguliriha navachampakamAlI || navashashirekhAlikhitAvashAkhAtanuratha lalitAsa~NgI | shyAmalayAshritabAhuruda~nchitapadmAvibhramara~NgI || bhadrAlambitashaivyodIritaraktarajobharadhArI | pashya sanAtanamUrtirayaM ghanavR^indAvanaruchikArI || 38|| (39] @1 vasantarAgaH R^iturAjArpitatoShara~Ngam | rAdhe bhaja vR^indAvanaMra~Ngam || dhruva || malayAnilagurushikShitalAsyA | naTati latAtatirujjvalahAsyA || pikatatiriha vAdayati mR^ida~Ngam | pashyati tarukulama~Nkurada~Ngam || gAyati bhR^i~NgaghaTAdbhutashIlA | mama vaMshIva sanAtanalIlA || 39|| \section{40} vasantarAgaH viharati saha rAdhikayA ra~NgI | madhumadhure vR^indAvanarodhasi haririha harShatara~NgI || dhruva || vikirati yantreritamaghavairiNi rAdhA ku~Nkumapa~Nkam | dayitAmayamapi si~nchati mR^igamadarasarAshibhiravisha~Nkam || kShipati mitho yuvamithunamidaM navamaruNataraM paTavAsam | jitamiti jitamiti muhurapi jalpati kalpayadatanuvilAsam || subalo raNayati ghanakaratAlI jitavAn iti vanamAlI | lalitA vadati sanAtanavallabhamajayat pashya mamAlI || 40|| \section{41} dhanAshrIH rAdhA sakhi jalakeliShu nipuNA | khelati nijakuNDe madhuripuNA || dhruva || kuchapaTaluNThananirmitakalinA | AyudhapadavIyojitanalinA || dR^iDhaparirambhaNachumbanahaThinA | himajalasechanakarmaNi kaThinA || sukhabharashithilasanAtanamahasA | dayitaparAjayalakShaNasahasA || \section{42} dhanAshrIH rAdhe nijakuNDapayasi tu~NgIkuru ra~Ngam | kiM cha si~ncha pi~nChamukuTama~NgIkR^itabha~Ngam || dhruva || asya pashya phullakusumarachitojjvalachUDA | bhItibhiratinIlaniviDakuntalamanu gUDhA || dhAturachitachitravIthirambhasi parilInA | mAlApyatishithilavR^ittirajani bhR^i~NgahInA || shrIsanAtanasumaNiratnamaMshubhirapi chaNDam | bheje pratibimbabhAvadambhI tava gaNDam || 42|| iti shrIrUpagosvAmivirachitastavamAlAyAM gItAvalI samAptA | ## \medskip\hrule\obeylines Please send corrections to sanskrit@cheerful.com Last updated \today https://sanskritdocuments.org \end{document}