shrIgopIjanavallabhAShTakam 2

श्रीगोपीजनवल्लभाष्टकम् २

नवाम्बुदानीकमनोहराय प्रफुल्लराजीवविलोचनाय वेणुस्वनैर्मोदितगोकुलाय नमोऽस्तु गोपीजनवल्लभाय ॥ १॥ किरीटकेयूरविभूषिताय ग्रैवेयमालामणिरञ्जिताय । स्फुरच्चलत्काञ्चनकुण्डलाय नमोऽस्तु गोपीजनवल्लभाय ॥ २॥ दिव्याङ्गनावृन्दनिषेविताय स्मितप्रभाचारुमुखाम्बुजाय । त्रैलोक्यसम्मोहनसुन्दराय नमोऽस्तु गोपीजनवल्लभाय ॥ ३॥ रत्नादिमूलालयमाश्रिताय कल्पद्रुमच्छायसमाश्रिताय । हेमस्फुरन्मण्डलमध्यगाय नमोऽस्तु गोपीजनवल्लभाय ॥ ४॥ श्रीवत्सरोमावलिरञ्जिताय वक्षःस्थले कौस्तुभभूषिताय । सरोजकिञ्जल्कनिभांशुकाय नमोऽस्तु गोपीजनवल्लभाय ॥ ५॥ दिव्याङ्गुलीयाङ्गुलिरञ्जिताय मयूरपिच्छच्छविशोभिताय । वन्यस्रजालङ्कृतविग्रहाय नमोऽस्तु गोपीजनवल्लभाय ॥ ६॥ मुनीन्द्रवृन्दैरभिसंस्तुताय क्षरत्पयोगोकुलगोकुलाय । धर्मार्थकामामृतसाधकाय नमोऽस्तु गोपीजनवल्लभाय ॥ ७॥ एनस्तमःस्तोमदिवाकराय भक्तस्य चिन्तामणिसाधकाय । अशेषदुःखामयभेषजाय नमोऽस्तु गोपीजनवल्लभाय ॥ ८॥ इति श्रीवह्निसूनुविरचितं श्रीगोपीजनवल्लभाष्टकं समाप्तम् । Proofread by PSA Easwaran