Shri Guruvatapuranatha Pancharatna Stotram

श्रीगुरुवातपुरनाथपञ्चरत्नस्तोत्रम्

आदित्यादिप्रभृतिकमिदं चक्षुराद्यं च तेजो ज्ञानाज्ञाने स्फुरितमखिलं येन नित्यं विभाति । तत्तादृक्षे सकलवचनागोचरे स्वप्रकाशे त्वद्रूपेऽस्मिन् किमिव कथये वातगेहाधिनाथ ॥ १॥ आकाशान्तं जगदखिलमप्यंशमात्रं यदीयं माया सेयं मरुदधिपते त्वत्स्वरूपैकदेशे । स त्वं कोणे क्वचन धरणेस्तिष्ठसे देहधारी कारुण्यं ते जगति कथये नाथ तादृक् कथं वा ॥ २॥ दृश्यं सर्वं वरद भवतो देह इत्यामनन्त्यां श्रुत्यां सत्यामपि बत नृणां जायते नैव बुद्धिः । इत्थङ्कारं कमपिच नवं कल्पयन् देहभेदं भासि स्पष्टं तदपि भगवन् भाग्यहीनो जनोऽयम् ॥ ३॥ मर्त्यामर्त्यप्रमुखमखिलं क्षेत्रजातं त्वदीया मायैव श्रीगुरुपुरपते साऽपि नास्ति त्वदन्या । एको देवस्त्वमसि सकलक्षेत्र साक्षी चिदात्मा तत्वं किञ्चित् पृथगिह विभो त्वां विना नैव जाने ॥ ४॥ सद्रूपाढ्यं भवति भवताऽधिष्ठितं सर्वमेतत् भानं नाम क्वचिदपि जडे नो भवन्तं विनाऽन्यम् । प्रेम श्रीमन् जगति भवति त्वत्प्रतिच्छाययाऽस्मिन् वातेशासावहमपि भवान् सच्चिदानन्दरूपः ॥ ५॥ इति श्रीगुरुवातपुरनाथपञ्चरत्नस्तोत्रं सम्पूर्णम् ।