jayanArAyaNastotram

 जयनारायणस्तोत्रम् 
जय नारायण जय पुरुषोत्तम जय वामन कंसारे
    उद्धर मामसुरेशविनाशिन् पतितोऽहं संसारे ।
घोरं हर मम नरकरिपो केशव कल्मषभारं
    मामनुकम्पय दीनमनाथं कुरु भवसागरपारम् ॥ १॥

जय जय देव जयासुरसूदन जय केशव जय विष्णो
    जय लक्ष्मीमुखकमलमधुव्रत जय दशकन्धरजिष्णो ।
घोरं हर मम नरकरिपो केशव कल्मषभारं
    मामनुकम्पय दीनमनाथं कुरु भवसागरपारम् ॥ २॥

त्वं जननी जनकः प्रभुरच्युत त्वं पुत्रसुहृद्धनमित्रं
    त्वं शरणं शरणागतवत्सल त्वं भवजलधिवहित्रम् ।
घोरं हर मम नरकरिपो केशव कल्मषभारं
    मामनुकम्पय दीनमनाथं कुरु भवसागरपारम् ॥ ३॥

पुनरपि जननं पुनरपि मरणं पुनरपि गर्भनिवासं
    सोढुमलं पुनरस्मिन्माधव मामुद्धर निजदासम् ।
घोरं हर मम नरकरिपो केशव कल्मषभारं
    मामनुकम्पय दीनमनाथं कुरु भवसागरपारम् ॥ ४॥

जनकसुतापतिचरणपरायणशङ्करमुनिवरगीतं
    धारय मनसि कृष्ण पुरुषोत्तम वारय संसृतिभीतिम् ।
घोरं हर मम नरकरिपो केशव कल्मषभारं
    मामनुकम्पय दीनमनाथं कुरु भवसागरपारम् ॥ ५॥

यद्यपि सकलमहं कलयामि हरे न हि किमपि ससत्त्वं
    तदपि न मुञ्चति मामिदमच्युत पुत्रकलत्रममत्वम् ।
घोरं हर मम नरकरिपो केशव कल्मषभारं
    मामनुकम्पय दीनमनाथं कुरु भवसागरपारम् ॥ ६॥

इति जयनारायणस्तोत्रं सम्पूर्णम् ।


Proofread by PSA Easwaran psaeaswaran at gmail.com