% Text title            : kArpaNyapanjikAstotram
% File name             : kArpaNyapanjikAstotram.itx
% Category              : vishhnu, krishna, rUpagosvAmin, stavamAlA
% Location              : doc\_vishhnu
% Author                : Rupagoswami
% Transliterated by     : Jan Brzezinski (Jagadananda Das) jankbrz at yahoo.com and Neal Delmonico (Nitai Das) ndelmonico at sbcglobal.net
% Description/comments  : From stavamAlA (rUpagosvAmivirachitA) Garland of Devotional Prayers stavamAlA
% Acknowledge-Permission: http://granthamandira.net Gaudiya Grantha Mandira
% Latest update         : February 22, 2019
% Send corrections to   : sanskrit at cheerful dot c om
%
% This text is prepared by volunteers and is to be used for personal study 
% and research. The file is not to be copied or reposted for promotion of 
% any website or individuals or for commercial purpose without permission. 
% Please help to maintain respect for volunteer spirit.
%
\documentstyle[11pt,multicol,itrans]{article}
#include=ijag.inc
#endwordvowel=.h
\portraitwide
\parindent=100pt                
\let\usedvng=\Largedvng      % for 1 column     
\pagenumbering{itrans} 
\def\engtitle#1{\hrule\medskip\centerline{\LARGE #1}}
\def\itxtitle#1{\medskip\centerline{\LARGEdvng #1}\medskip\hrule}
\def\endtitles{\medskip\obeyspaceslines}
%%
\begin{document}
\engtitle{.. Karpanyapanjikastotram ..}##
\itxtitle{.. kArpaNyapa~njikAstotram ..}##\endtitles ##

dhyAnaH |
koNenAkShNoH pR^ithuruchiH mitho hAriNA lihyamAnA\-
     vekaikena prachurapulakenopaguDhau bhujena |
gaurIshyAmau vasanayugalaM shyAmagauraM vasAnau
     rAdhAkR^iShNau smaravilasitoddAmatR^iShNau smarAmi || 1||
atha shrIkArpaNyapa~njikAstotraM
shrIvR^indAvaneshau jayataH
tiShThan vR^indATavIku~nje vij~naptiM vidadhatyasau |
vR^indATavIshayoH pAdapadmeShu kR^ipano janaH || 1||
navendIvarasandohasaundaryAskandanaprabham |
chArugorochanAgarvagauravagrAsigaurabhAm || 2||
shAtakumbhakadambashrIviDambisphuradambaram |
haratA kiMshukasyAMshUn aMshukena virAjitAm || 3||
sarvakaishoravadvR^indachUDArUDhahariNmaNim |
goShThAsheShakishorINAM dhammillottaMsamallikAm || 4||
shrIshamukhyAtmarUpaNAM rUpAtishayivigraham |
ramojjvalavrajavadhUvrajavismApisauShThavAm || 5||
saurabhyahR^itagAndharvaM gandhonmAditamAdhavAm |
rAdhArodhanavaMshIkaM mahatImohitAchyutAm || 6||
rAdhAdhR^itidhanastenalochanA~nchalachApalam |
dR^iga~nchalakalAbhR^i~NgIdaShTakR^iShNahR^idambujAm || 7||
rAdhAgUDhaparIhAsaprauDhinirvachanIkR^itam |
vrajendrasutanarmoktiromA~nchitatanUlatAm || 8||
divyasadguNamANikyashreNIrohaNaparvatam |
umAdiramaNIvyUhaspR^ihaNIyaguNotkarAm || 9||
tvAM cha vR^indAvanAdhIsha tvAM cha vR^indAvaneshvari |
kAkubhirvandamAno.ayaM mandaM prAR^ithayate janaH || 10||
     || dashabhiH kulakam ||
yogyatA me na kAchid vAM kR^ipAlAbhAya yadyapi |
mahAkR^ipAlumaulitvAt tathApi kurutaM kR^ipAm || 11||
ayogye sAparAdhe.api dR^ishyante kR^ipayAkulAH |
mahAkR^ipAlavo hanta loke lokeshavanditau || 12||
bhaktervAM karuNAhetorleshAbhAso.api nAsti me |
mahAlIlesharatayA tadapyatra prasIdatam || 13||
jane duShTe.apyabhakte.api prasIdanto vilokitAH |
mahAlIlAmaheshAshcha hA nAthau bahavo bhuvi || 14||
adhamo.apyuttamaM matvA svamaj~ne.api manIShiNam |
shiShTaM duShTo.apyayaM janturmantuM vyadhita yadyapi || 15||
tathApyasmin kadAchid vAmadhIshau nAmajalpini |
avadyavR^indanistArinAmAbhAsau prasIdatam || 16||
yadakShamyaM nu yuvayoH sakR^idbhaktilavAdapi |
tadAgaH kvApi nAstyeva kR^itAshAM prArthaye tataH || 17||
hanta klIbo.api jIvo.ayaM nItaH kaShTena dhR^iShTatAm |
muhuH prArthayate nAthau prasAdaH ko.apyuda~nchatu || 18||
eSha pApI rudann uchchairAdAya radanaistR^iNam |
hA nAthau nAtheti prANI sIdatyatra prasIdatam || 19||
hAhArAvamasau kurvan durbhago bhikShate janaH |
etAM me shR^iNutaM kAkuM kAkuM shR^iNutamIshvarau || 20||
yAche phutkR^itya phutkR^itya hA hA kAkubhirAkulaH |
prasIdatamayogye.api jane.asmin karuNArNavau || 21||
kroshatyArtasvarairAsye nyasyA~NguShThamasau janaH |
kurutaM kurutaM nAthau karuNAkaNikAmapi || 22||
vAcheha dInayA yAche sAkrandamatimandadhIH |
kirataM karuNasvAntau karuNormichChaTAmapi || 23||
madhurAH santi yAvanto bhAvAH sarvatra chetasaH |
tebhyo.api premamadhuraM prasAdIkurutaM nijam || 24||
sevAmevAdya vAM devAvIhe  ki~nchana nAparam |
prasAdAbhimukhau hanta bhavantau bhavatAM mayi || 25||
nAthitaM paramevedamanAthajanavatsalau |
svaM sAkShAddAsyamevAsmin prasAdIkurutaM jane || 26||
a~njaliM mUrdhni vinyasya dIno.ayaM bhikShate janaH |
asya siddhirabhIShTasya sakR^idapyupapAdyatAm || 27||
amalo vAM pArimalaH kadA parimalan vane |
anargheNa pramodena ghrANaM me ghUrNayiShyati || 28||
ra~njayisyati karNau me haMsagu~njitaga~njanam |
ma~njulaM kiM nu yuvayorma~njIrakalasi~njitam || 29||
saubhAgyA~NkarathA~NgAdilakShitAni padAni vAm |
kadA vR^indAvane pashyann unmadiShyatyayaM janaH || 30||
sarvasaundaryamaryAdAnIrAjyapadanIrajau |
kimapUrvANi parvANi hA mamAkShNorvidhAsyatha || 31||
suchirAshAphalAbhogapadAmbhojavilokanau |
yuvAM sAkShAjjanasyAsya bhavetAmiha kiM bhave || 32||
kadA vR^indATavIku~njakandare sundarodayau |
khelantau vAM vilokiShye suratau nAtidUrataH || 33||
gurvAyattatayA kvApi durlabhAnyonyavIkShaNau |
mithaH sandeshasIdhubhyAM nandayisyAmi vAM kadA || 34||
gaveShayantAvanyo.anyaM kadA vR^indAvanAntare |
sa~Ngamayya yuvAM lapsye hAriNaM pAritoShikam || 35||
paNIkR^itamithohAralu~nchanavyagrahastayoH |
kaliM dyUte vilokiShye kadA vAM jitakAshinoH || 36||
ku~nje kusumashayyAyAM kadA vAmarpitA~NgayoH |
pAdasaMvAhanaM hanta jano.ayaM rachayiShyati || 37||
kandarpakalahodghaTTatruTitAnAM latAgR^ihe |
kadA gumphAya hArANAM bhavantau mAM niyokShyataH || 38||
kelikallolavisrastAn hanta vR^indAvaneshvarau |
karhi barhipatatrairvAM maNDayiShyAmi kuntalAn || 39||
kandarpakelipANDityakhaNDitAkalpayoraham |
kadA vAmalikadvandvaM kariShye tilakojjvalam || 40||
devArambhe vanasragbhirdR^ishau te devi kajjalaiH |
ayaM janaH kadA ku~njamaNDape maNDayiShyati || 41||
jAmbUnadAbhatAmbUlIparNAnyavadalayya vAm |
vadanAmbujayoreSha nidhAsyati janaH kadA || 42||
kvAsau duShkR^itakarmAhaM kva vAmabhyarthanedR^ishI |
kiM vA kaM vA na yuvayorunmAdayati mAdhurI || 43||
yayA vR^indAvane janturanarho.apyeSha vAsyate |
tayaiva kR^ipayA nAthau siddhiM kurutamIpsitam || 44||
kArpaNyapa~njikAmetAM sadA vR^indATavInaTau |
giraiva jalpato.apyasya jantoH sidhyatu vA~nChitam || 45||

iti shrIrUpagosvAmivirachitastavamAlAyAM shrIkArpaNyapa~njikAstotraM samAptam |

##

\medskip\hrule\obeylines

Please send corrections to sanskrit@cheerful.com
Last updated \today
https://sanskritdocuments.org

\end{document}