श्रीकटाक्षषोडशी
सम्भावयन् विधिशिवौ सकृदिन्दिरायाः
वक्त्रारविन्दपरिरम्भकरः सुरस्पृक् ।
मज्जन् मुहुः स्वशरणेषु निपत्य मग्नो
दीनेषु रक्षतु स भां भगवत्कटाक्षः ॥ १॥
मज्जन् दयामयसुधाम्बुनिधौ जगत्या-
मत्यादरेण परिरभ्य करीन्द्रमार्तम् ।
कुम्भीरमाप परुषाकृतिमेव रोषात्
यः पातु जातु विशदो भगवत्कटाक्षः ॥ २॥
रक्तः स्वयं सलिलराशिसुतास्यबिम्ब-
सम्भावनासु शुचिरार्तजनप्रसादे ।
अम्भोजनिःसरदलिप्रकारनुकारी
चित्रास्चिरादवतु मां भगवत्कटाक्षः ॥ ३॥
दुःखप्रवाहपरिणाहविगाहनोद्यत्-
सन्तापमादृशविवर्जनदुर्यशोभिः ।
संलिप्तमूर्तिरिव मेचकरोचिरव्या-
दव्याजरक्षितजगद्भगवत्कटाक्षः ॥ ४॥
पद्मालायावदनमण्डलनेत्रयुग्म-
च्छद्मोल्लसद्विकचपद्मविहारलुब्धः ।
मुग्धो मधुव्रतसमूह इव प्रसर्पन्
श्रेयः समर्पयतु मे भगवत्कटाक्षः ॥ ५॥
पातानुभावपरिपावितपातकाध्व-
पान्थाधिकाररहितान्तकददर्शिन्ताधिः ।
दुःखाभिभूततरभूतचयानुभूतौ
दायस्तनोतु कुशलं भगवत्कटाक्षः ॥ ६॥
मन्दारमुख्यसुरवृक्षवदान्यभावः
सन्ध्यास्फुटीकृतबहुप्रवणार्थिवन्द्यः ।
निष्कामभक्तजनसात्कृतनित्यधामा
कामाय सम्भवतु मे भगवत्कटाक्षः ॥ ७॥
न्यस्तात्मभारभरणादरभाव्यमान-
वृत्तिप्रवृत्तिपरतन्त्र इव प्रवृत्तिः ।
सद्वृत्तिधूर्तविषयाधिकतोपरोष-
संलक्षितो भगवतोऽवतु मां कटाक्षः ॥ ८॥
दुर्वारमारशरवार इवातिधीर-
वाराङ्गनाहृदयदुर्जयधैर्यभेदी ।
सत्पक्षयोगविहितद्रुतगत्यनिन्द्यो
निन्द्यां मतिं हरतु मे स हरेः कटाक्षः ॥ ९॥
निर्व्याजदृष्टिकरुणामृतवृष्टिहृष्ट-
पुष्टत्रिलोकगतकोकविलोकनीयः ।
दिव्याम्बुवाह इव सक्षणरुग्विलासः
तापत्रयं हरतु मे स हरेः कटाक्षः ॥ १०॥
यस्मिन् समुल्लसति कामधुगल्पदो वा
कल्पद्रुरल्पफलपुष्प इवास्तु कल्पः ।
चिन्तामणिर्मणिगणैर्गणनीयभाग्यः
कामं स पूरयतु मे भगवत्कटाक्षः ॥ ११॥
अन्तर्निरन्तरवलद्विमलानुकम्पा-
संस्पर्धमानमहिमानुगृहीतभक्तः ।
अग्राध्वजाग्रदतिवेललसत्तितिक्षः
क्षेमं तनोतु नितरां भगवत्कटाक्षः ॥ १२॥
इन्दीवरोदरमनोहरमन्दिरान्त-
र्वास्तव्यकान्तिरमणीपरिरभ्यमाणः ।
कश्चिद्विपश्चिदनुभूतमहाप्रसादः
सीदन्तमुद्धरतु मां भगवत्कटाक्षः ॥ १३॥
ध्यायान्निकायनिरपायकृपौधयुक्तो
मुक्तोपभुक्तमहिमामृतसिन्धुबिन्दुः ।
कामप्रकामफलदाननिदानकल्प-
वृक्षोपमः फलतु मे भगवत्कटाक्षः ॥ १४॥
यस्यानुकूल्यबहुमूल्यमनोज्ञरत्न-
भूषाविभूषिततनुस्तनुजाम्बुराशेः ।
भूरप्यभूदतुलसौभगयोगयोग्या
भूयात् स भूरिविभवाय विभोः कटाक्षः ॥ १५॥
इन्दीवरैरिव किरन् रुचिभिः समन्तात्
वृन्दावनान्तरमनन्तगुणास्पदं यः ।
आनन्दयत्यनुदिनं व्रजसुन्दरीणां
चेतांसि मेऽस्तु सुखदः स हरेः कटाक्षः ॥ १६॥
कटाक्षषोडशी से कविचन्द्रविनिर्मिता ।
कलेव कृष्णचन्द्रस्य करोतु जगतां मुदम् ॥ १७॥
इति श्रीकटाक्षषोडशी सम्पूर्णा ।
भगवत्कटाक्षषोडशी
Proofread by Saritha Sangameswaran