% Text title            : Kali Vidambanam Parody of Life in the Dark Age
% File name             : kaliviDambanam.itx
% Category              : vishhnu, dashAvatAra, sAhitya, advice, nIlakaNThadIkShita
% Location              : doc\_vishhnu
% Author                : Nilakantha Dikshitar
% Transliterated by     : Somadeva Vasudeva
% Proofread by          : Somadeva Vasudeva
% Description/comments  : Composed in 16-17th century and is still applicable in the present
% Latest update         : July 20, 2021
% Send corrections to   : sanskrit at cheerful dot c om
%
% This text is prepared by volunteers and is to be used for personal study 
% and research. The file is not to be copied or reposted for promotion of 
% any website or individuals or for commercial purpose without permission. 
% Please help to maintain respect for volunteer spirit.
%
\documentstyle[11pt,multicol,itrans]{article}
#include=ijag.inc
#endwordvowel=.h
\portraitwide
\parindent=100pt                
\let\usedvng=\Largedvng      % for 1 column     
\pagenumbering{itrans} 
\def\engtitle#1{\hrule\medskip\centerline{\LARGE #1}}
\def\itxtitle#1{\medskip\centerline{\LARGEdvng #1}\medskip\hrule}
\def\endtitles{\medskip\obeyspaceslines}
%%
\begin{document}
\engtitle{.. Kali Vidambanam Parody of Life in the Dark Age ..}##
\itxtitle{.. kaliviDambanam ..}##\endtitles ##
na bhetavyaM na boddhavyaM na shrAvyaM vAdino vachaH |
jhaTiti prativaktavyaM sabhAsu vijigIShubhiH || 1||
asambhramo vilajjatvamavaj~nA prativAdini |
hAso rAj~naH stavashcheti pa~nchaite jayahetavaH || 2||
uchchairudghoShya jetavyaM madhyasthashchedapaNDitaH |
paNDito yadi tatraiva pakShapAto.adhiropyatAm || 3||
lobho heturdhanaM sAdhyaM dR^iShTAntastu purohitaH |
AtmotkarSho nigamanamanumAneShvayaM vidhiH || 4||
abhyAsyaM lajjamAnena tattvaM jij~nAsunA chiram |
jigIShunA hriyaM tyaktvA kAryaH kolAhalo mahAn || 5||
pAThanairgranthanirmANaiH pratiShThA tAvadApyate |
evaM cha tathyavyutpattirAyuSho.ante bhavenna vA || 6||
stotAraH ke bhaviShyanti mUrkhasya jagatItale |
na stauti chetsvayaM cha svaM kadA tasyAstu nirvR^itiH || 7||
vAchyatAM samayo.atItaH spaShTamagre bhaviShyati |
iti pAThayatAM granthe kAThinyaM kutra vartate || 8||
agatitvamatishraddhA j~nAnAbhAsena tR^iptatA |
trayaH shiShyaguNA hyete mUrkhAchAryasya bhAgyajAH || 9||
yadi na kvApi vidyAyAM sarvathA kramate matiH |
mAntrikAstu bhaviShyAmo yogino yatayo.api vA || 10||
avilambena saMsiddhau mAntrikairApyate yashaH |
vilambe karmabAhulyaM vikhyApyAvApyate dhanam || 11||
sukhaM sukhiShu duHkhe.api jIvanaM duHkhashAliShu |
anugrahAyate yeShAM te dhanyAH khalu mAntrikAH || 12||
yAvadaj~nAnato maunamAchAro vA vilakShaNaH |
tAvanmAhAtmyarUpeNa paryavasyati mAntrike aH || 13||
chArAn vichArya daivaj~nairvaktavyaM bhUbhujAM phalam |
grahachAraparij~nAnaM teShAmAvashyakaM yataH || 14||
putra ityeva pitari kanyaketi mAtari |
garbhaprashneShu kathayan daivaj~no vijayI bhavet || 15||
Ayusprashne dIrghamAyurvAchyaM mauhUrtikairjanaiH |
jIvanto bahumanyante mR^itAH prakShyanti kaM punaH || 16||
sarvaM koTidvayopetaM sarvaM kAladvayAvadhi |
sarvaM vyAmishramiva cha vaktavyaM daivachintakaiH || 17||
nirdhanAnAM dhanAvAptiM dhaninAmadhikaM dhanam |
bruvANAH sarvathA grAhyA lokairjyautiShikA janAH || 18||
shatasya lAbhe tAmbUlaM sahasrasya tu bhojanam |
daivaj~nAnAmupAlambho nityaH kAryaviparyaye || 19||
api sAgaraparyantA vichetavyA vasundharA |
desho hyaratnimAtre.api nAsti daivaj~navarjitaH || 20||
vArAn ke chidgrahAn ke chitke chidR^ikShANi jAnate |
tritayaM ye vijAnanti te vAchaspatayaH svayam || 21||
naimittikAH svapnadR^isho devatAnAM [[amI trayaH]] |
nisargashatravaH sR^iShTA daivaj~nAnAmamI trayaH || 22||
svasthairasAdhyarogaishcha jantubhirnAsti kiM chana |
kAtarA dIrgharogAshcha bhiShajAM bhAgyahetavaH || 23||
nAtidhairyaM pradAtavyaM nAtibhItishcha rogiNi |
naishchintyAnnAdime dAnaM nairAshyAdeva nAntime || 24||
bhaiShajyaM tu yathAkAmaM pathyaM tu kaThinaM vadet |
ArogyaM vaidyamAhAtmyAdanyathAtvamapathyataH || 25||
nidAnaM roganAmAni sAtmyAsAtmye chikitsitam |
sarvamapyupadekShyanti rogiNaH sadane striyaH || 26||
jR^imbhamANeShu rogeShu mriyamANeShu jantuShu |
rogatattveShu shanakairvyutpadyante chikitsakAH || 27||
pravartanArthamArambhe madhye tvauShadhahetave |
bahumAnArthamante cha jihIrShanti chikitsakAH || 28||
lipsamAneShu vaidyeShu chirAdAsAdya rogiNam |
dAyAdAH samprarohanti daivaj~nA mAntrikA api || 29||
rogasyopakrame sAntvaM madhye kiM chiddhanavyayaH |
shanairanAdarasshAntau snAto vaidyaM na pashyati || 30||
daivaj~natvaM mAntrikatA bhaiShajyaM chATukaushalam |
ekaikamarthalAbhAya dvitriyogastu durlabhaH || 31||
anR^itaM chATuvAdashcha dhanayogo mahAnayam |
satyaM vaiduShyamityeSha yogo dAridryakArakaH || 32||
kAtaryaM durvinItattvaM kArpaNyamavivekatAm |
sarvaM mArjanti kavayaH shAlInAM muShTiki~NkarAH || 33||
na kAraNamapekShante kavayaH stotumudyatAH |
kiM chidastuvatAM teShAM jihvA phuraphurAyate || 34||
stutaM stuvanti kavayo na svato guNadarshinaH |
kItaH kashchidalirnAma kiyatI tatra varNanA || 35||
ekaiva kavitA puMsAM grAmAyAshvAya hastine |
antato.annAya vastrAya tAmbUlAya cha kalpate || 36||
shabdAkhyamaparaM brahma sandarbheNa pariShkR^itam |
vikrIyate katipayairvR^ithAnyairviniyujyate || 37||
varNayanti narAbhAsAn vANIM labdhvApi ye janAH |
labdhvApi kAmadhenuM te lA~Ngale viniyu~njate || 38||
prashaMsanto narAbhAsAn pralapanto.anyathAnyathA |
kathaM tarantu kavayaH kAmapAramyavAdinaH || 39||
yatsandarbhe yadullekhe yadvya~Ngye nibhR^itaM manaH |
samAdherapi tajjyAyAH sha~Nkaro yadi varNyate || 40||

\section{bandhavaH}
gR^ihiNI bhaginI tasyAH shvashurau shyAla ityapi |
prANinAM kalinA sR^iShTAH pa~ncha prANA ime.apare || 41||
jAmAtaro bhAgineyA mAtulA dArabAndhavAH |
aj~nAtA eva gR^ihiNAM bhakShyantyAkhuvadgR^ihe || 42||
mAtulasya balaM mAtA jAmAturduhitA balam |
shvashurasya balaM bhAryA svayamevAtitherbalam || 43||
jAmAturvakratA tAvadyAvachChyAlasya bAlatA |
prabudhyamAne sAralyaM prabuddhe.asmin palAyanam || 44||
bhAryA jyeShThA shishuH shyAlaH shvashrUH svAtantryavartinI |
shvashurastu pravAsIti jAmAturbhAgyadhoraNI || 45||
bhUShaNairvAsanaiH pAtraiH putrANAmupalAlanaiH |
sakR^idAgatya gachChantI kanyA nirmArShTi mandiram || 46||
gR^ihiNI svajanaM vakti shuShkAhAraM mitAshanam |
patipakShyAMstu bahvAshAn kShIrapAMstaskarAnapi || 47||
bhArye dve putrashAlinyau bhaginI pativarjitA |
ashrAntakalaho nAma yogo.ayaM gR^ihamedhinAm || 48||
bhArye dve bahavaH putrA dAridryaM rogasambhavaH |
jIrNau cha mAtApitarAvekaikaM narakAdhikam || 49||

\section{uttamaR^iNAH}
smR^ite sIdanti gAtrANi dR^iShTe praj~nA vinashyati |
aho mahadidaM bhUtamuttamaR^iNAbhishAbdhitam || 50||
antako.api hi jantUnAmantakAlamapekShate |
na kAlaniyamaH kashchiduttamArNasya vidyate || 51||
na pashyAmo mukhe daMShTrAM na pAshaM vA karA~njale |
uttamArNamavekShyaiva tathApyudvejite manaH || 52||

\section{dAridryam}
shatrau sAntvaM pratIkAraH sarvarogeShu bheShajam |
mR^ityau mR^ityu~njayadhyAnaM dAridrye tu na kiM chana || 53||
shaktiM karoti sa~nchAre shItoShNe marShayatyapi |
dIpayatyudare vahniM dAridryaM paramauShadham || 54||
giraM skhalantIM mIlantIM dR^iShTiM pAdau visaMsthulau |
protsAhayati yAch~nAyAM rAjAj~neva daridratA || 55||
jIryanti rAjavidveShA jIryantyavihitAnyapi |
Aki~nchanyabalADhyAnAmantato.ashmApi jIryati || 56||
nAsya chorA na pishunA na dAyAdA na pArthivAH |
dainyaM rAjyAdapi jyAyo yadi tattvaM prabudhyate || 57||

\section{dhaninaH}
prakAshayatyaha~NkAraM pravartayati taskarAn |
protsAhayati dAyAdAMllAkShmIH kiM chidupasthitA || 58||
viDambayanti ye nityaM vidagdhAn dhanino janAH |
ta eva tu viDambyante shriyA ki~nchidupekShitAH || 59||
prAmANyabuddhiH stotreShu devatAbuddhirAtmani |
kITabuddhirmanuShyeShu nUtanAyAH shriyaH phalam || 60||
shR^iNvanta eva pR^ichChanti pashyanto.api na jAnate |
viDambanAni dhanikAH stotrANItyeva manvate || 61||
AvR^itya shrImadenAndhAnanyonyakR^itasaMvidaH |
svairaM hasanti+pArshvasthA bAlonmattapishAchavat || 62||
stotavyaiH stUyante nityaM sevanIyaishcha sevyate |
na bibheti na jihreti tathApi dhaniko janaH || 63||
kShaNamAtraM grahAvesho yAmamAtraM surAmadaH |
lakShmImadastu mUrkhANAmAdehamanuvartate || 64||
shrIrmAsamardhamAsaM vA cheShTitvA vinivartate |
vikArastu tadArabdho nityaM lashunagandhavat || 65||
kaNTHe madaH kodravajo hR^idi tAmbUlajo madaH |
lakShmImadastu sarvA~Nge putradAramukheShvapi || 66||
yatrAsIdasti vA lakShmIstatronmadaH pravartatAm |
kule.apyavataratyeSha kuShThApasmAravatkatham || 67||
adhyApayanti shAstrANi tR^iNIkurvanti paNDitAn |
vismArayanti jAtiM svAM varATAH pa~nchaShA kare || 68||
bibhartu bhR^ityAn dhaniko dattAM vA deyamarthiShu |
yAvadyAchakasAdharmyaM tAvalloko na mR^iShyati || 69||

\section{pishunAH}
dhanabhAro hi lokasya pishunaireva dhAryate |
kathaM te taM laghUkartuM yatante.aparathA svataH || 70||
shramAnurUpaM pishune kimupakriyate nR^ipaiH |
dviguNaM triguNaM chaiva kR^itAnto lAlayiShyati || 71||
gokarNe bhadrakarNe cha japo duShkarmanAshanaH |
rAjakarNe japaH sadyaH sarvakarmavinAshanaH || 72||
na svArthaM ki~nchidichChanti na preryante cha kena chit |
parArtheShu pravartante shaThAH santashcha tulyavat || 73||
kAlAntare hyanarthAya gR^idhro gehopari sthitaH |
khalo gR^ihasamIpasthaH sadyo.anarthAya dehinAm || 74||

\section{lobhinaH}
shuShkopavAso dharmeShu bhaiShajyeShu cha la~Nghanam |
japayaj~nashcha yaj~neShu rochate lobhashAlinAm || 75||
kiM vakShyatIva dhanikAdyAvadudvijate.adhanaH |
kiM prakShyatIti lubdho.api tAvadudvijate tataH || 76||
sarvamAtithyashAstrArthaM sAkShAtkurvanti lobhinaH |
bhikShAkabalamekaikaM ye hi pashyanti meruvat || 77||
dhanapAlaH pishAcho hi datte svAminyupasthite |
dhanalubdhaH pishAchastu na kasmai chana ditsate || 78||
dAtAro.arthibhirarthyante dAtR^ibhiH puno.arthinaH |
kartR^ikarmavyatIhArAdaho nimnonnataM kiyat || 79||
svasminnasati nArthasya rakShakaH sambhavediti |
nishchityaivaM svayamapi bhu~Nkte lubdhaH kathaM chana || 80||
prasthAsyamAnaH pravishetpratiShTheta dine dine |
vichitrAnullikhedvighnAMstiShThAsuratithishchiram || 81||

\section{dhArmikAH}
pradIyate viduShyekaM kavau dasha naTe shatam |
sahasraM dAmbhike loke shrotriye tu na ki~nchana || 82||
ghaTakaM samyagArAdhya vairAgyaM paramaM vahet |
tAvadarthAH prasid.hdhyanti yAvachchApalamAvR^itam || 83||
ekataH sarvashAstrANi tulasIkAShThamekataH |
vaktavyaM kiM chidityuktaM vastutastulasI parA || 84||
vismR^itaM vAhaTenedaM tulasyAH paThatA guNan |
vishvasammohinI vitta dAyinIti guNadvayam || 85||
kaupInaM bhasitAlepo darbhA+rudrAkShamAlikA |
maunamekAsikA cheti mUrkhasa~njIvanAni ShaT || 86||
vAsaH puNyeShu tIrtheShu prasiddhashcha mR^ito guruH |
adhyApanAvR^ittayashcha kIrtanIyA dhanArthibhiH || 87||
mantrabhraMshe sampradAyaH prayogashchyutasa~NkR^itau |
deshadharmastvanAchAre pR^ichChatAM siddhamuttaram || 88||
yathA jAnanti bahavo yathA vakShyanti dAtari |
tathA dharmaM charetsarvaM na vR^ithA kiM chidAcharet || 89||
sadA japapaTo haste madhye madhye.akShimIlanam |
sarvaM brahmeti vAdashcha sadyaspratyayahetavaH || 90||
AmadhyAhnaM nadIvAsaH samAje devatArchanam |
satataM shuchiveShashcha ityetaddambhasya jIvitam || 91||
tAvaddIrghaM nityakarma yAvatsyAddraShTR^imelanam |
tAvatsa~NkShipyate sarvaM yAvaddraShTA na vidyate || 92||
AnandabAShparomA~nchau yasya svechChAvashaMvadau |
kiM tasya sAdhanairanyaiH ki~NkarAH sarvapArthivAH || 93||

\section{durjanAH}
daNDyamAnA vikurvanti lAlyamAnAstatastarAm |
durjanAnAmato nyAyyaM dUrAdeva visarjanam || 94||
adAnamIShaddAnaM cha ki~nchitkopAya durdhiyAm |
sampUrNadAnaM prakR^itirvirAmo vairakAraNam || 95||
jyAyAnasaMstavo duShTairIrShyAyai saMstavaH punaH |
apatyasambandhavidhiH svAnarthAyaiva kevalam || 96||
j~nAteyaM j~nAnahInatvaM pishunatvaM daridratA |
milanti yadi chatvAri taddishe.api namo namaH || 97||
paraChidreShu hR^idayaM paravArtAsu cha shravaH |
paramarmAsu vAchaM cha khalAnAmasR^ijadvidhiH || 98||
viSheNa puchChalagnena vR^ishchikaH prANinAmiva |
kalinA dashamAMshena sarvaH kAlo.api dAruNaH || 99||
yatra bhAryAgiro vedA yatra dharmo.arthasAdhanam |
yatra svapratibhA mAnaM tasmai shrIkalaye namaH || 100||
kAmamastu jagatsarvaM kAlasyAsya vashaMvadam |
kAlakAlaM prapannAnAM kAlaH kiM naH kariShyati? || 101||
kavinA nIlakaNThena kaleretadviDambanam |
rachitaM viduShAM prItyai rAjAsthAnAnumodanam || 102||

iti nIlakaNThadIkShitavirachitaM kaliviDambanaM sampUrNam |
##

There are some differences in verse numbering sequence
from print to print.

\medskip\hrule\obeylines

Please send corrections to sanskrit at cheerful dot c om
Last updated \today
https://sanskritdocuments.org

\end{document}