Lakshminrisimha Suprabhata Vimshatih

 लक्ष्मीनृसिंहसुप्रभातविंशतिः 
पराङ्कुशमुनि विरचिता
अम्ब प्रसन्नशरदिन्दुमुखि प्रपन्न-
      पङ्कच्छटादलनपादसरोजयुग्मे ।
लक्ष्मीनृसिंहपरिरम्भणरम्यगात्रे
      लक्ष्मीनृसिंहदयिते तव सुप्रभातम् ॥ १॥

भानुः स्वभानुपरिरम्भणजृम्भदब्ज-
      पालिर्वलारिहरिदङ्गणमेति दीव्यन् ।
शश्वद् विनश्यति च नैशमिदं तमिस्रं
      लक्ष्मीनृसिंह भगवन् तव सुप्रभातम् ॥ २॥

यः पद्मिनीं स्वविरहेण कलङ्किसङ्ग-
      भीत्येव सङ्कुचितनालकराब्जवक्त्राम् ।
आश्वासयन्नुदयमेति मुहुः कराग्रै-
      र्लक्ष्मीनृसिंह भगवन् तव सुप्रभातम् ॥ ३॥

दोषाकरो निशि पयोजसुहृद्वियोग-
      दूरां स्पृशन् निजकरैर्नलिनीं विभाते ।
मित्रेण दृष्ट उपधाव्य निलीयतेऽब्धौ
      लक्ष्मीनृसिंह भगवन् तव सुप्रभातम् ॥ ४॥

भावत्कपादनखचन्द्ररुचिद्रवत्स्व-
      भावोच्चलन्नयननिःसृतबाष्पपूराः ।
विप्रा हरिर्हरिरिति स्फुटमीरयन्ति
      लक्ष्मीनृसिंह भगवन् तव सुप्रभातम् ॥ ५॥

गम्भीरवारिभवपङ्कजपत्रनेत्रं
      ध्यात्वा द्विजास्तरणिमण्डलमण्डनं त्वाम् ।
अर्घ्यं भवत्पदसरोजयुगे क्षिपन्ति
      लक्ष्मीनृसिंह भगवन् तव सुप्रभातम् ॥ ६॥

आसन्नतिम्मकरगर्भतयेव शक्र-
      काष्ठामुखं विलुलितोडुगणाग्र्यजालम् ।
दूरीकृतेन्दुतिलकं प्रविभाति पाण्डु
      लक्ष्मीनृसिंह भगवन् तव सुप्रभातम् ॥ ७॥

विप्रास्त्रभिन्नकरकन्धरसन्धिबन्ध-
      मन्देहदेहनिवहैरिव मेघखण्डैः ।
मुक्तः पुरा स्वयमुदेति वियद् दिनेशो
      लक्ष्मीनृसिंह भगवन् तव सुप्रभातम् ॥ ८॥

पद्मालयेषु गृहिणो नियताः प्रभाभिः
      किञ्जल्ककर्मठगणा मकरन्दभिक्षाम् ।
विश्राणयन्त्यलिवटुभ्य उपागतेभ्यो
      लक्ष्मीनृसिंह भगवन् तव सुप्रभातम् ॥ ९॥

दूरं गते कुमुदिनी रमणेऽतिमत्त-
      गायन्मधुव्रतहठात्करणातिभीता ।
द्वारं गृहस्य पिदधाति दलाररेण
      लक्ष्मीनृसिंह भगवन् तव सुप्रभातम् ॥ १०॥

श्रीरङ्गनाथशठजिद्गुरुसार्वभौमाः
      कृत्वाह्निकं भुवनमङ्गलमादरात् त्वाम् ।
उद्बोधयन्ति विजयी भव माधवेति
      लक्ष्मीनृसिंह भगवन् तव सुप्रभातम् ॥ ११॥

अम्भोजिनी निजकरैः कमने सुदूरा-
      दागत्य ताडयति पत्रकवाटमाशु ।
उद्धाट्य पृच्छति सुखागमनं मिलिन्दै-
      र्लक्ष्मीनृसिंह भगवन् तव सुप्रभातम् ॥ १२॥

सन्तस्त्वदीयपदपङ्कजवन्दनाभि-
      र्ध्यानार्चनस्तुतिनमस्कृतिबद्धभावाः ।
त्वां सर्वलोकशरणं प्रणमन्ति भूयो
      लक्ष्मीनृसिंह भगवन् तव सुप्रभातम् ॥ १३॥

ध्यायन्ति भान्ति परियन्ति वदन्ति सन्ति
      तिष्ठन्ति यान्त्यभिनमन्ति समाह्वयन्ति ।
आकर्णयन्त्यनुवदन्ति नुवन्ति सन्तो
      लक्ष्मीनृसिंह भगवन् तव सुप्रभातम् ॥ १४॥

गायन्ति भृङ्गनिवहाः सरसीरुहेषु
      भ्राम्यन्ति पान्थनिचयास्तरुणीजनेषु ।
आयान्ति मन्दमरुतस्तटिनीतटेषु
      लक्ष्मीनृसिंह भगवन् तव सुप्रभातम् ॥ १५॥

मत्ता गजेन्द्र विसररास्तुरगैर्नदन्त्यु-
      न्नृत्तास्तुरङ्गततयः प्रचरन्ति सोक्षाः ।
दृप्ता महोक्षनिकराः प्रभजन्ति धेनू-
      र्लक्ष्मीनृसिंह भगवन् तव सुप्रभातम् ॥ १६॥

काकाः प्रयान्ति कुहराणि पुरीगृहाणां
      घूकाः प्रयान्ति कुहराणि महीरुहाणाम् ।
कोकाः प्रयान्ति कुहराणि सरोरुहाणां
      लक्ष्मीनृसिंह भगवन् तव सुप्रभातम् ॥ १७॥

डोलोत्सवे सुरगणैरशितेषु तारा-
      दुग्धान्नखण्डनिवहेष्वजमुख्यदेयाः ।
भागा इवेन्दुधिषणोशनसः प्रयान्ति
      लक्ष्मीनृसिंह भगवन् तव सुप्रभातम् ॥ १८॥

विधिशङ्करशक्रविभावित भो
      विजितामरवैरिकदम्ब विभो ।
विविधागमसारविहार हरे
      विजयी भव देव रमानृहरे ॥ १९॥

झष कूर्म वराह वटोऽरिपटो
      भृगुनन्दन राघव धेनुकहन् ।
वसुदेवसुतानघ कल्कितनो
      विजयी भव देव रमानृहरे ॥ २०॥

रङ्गाधिराजशठजिद्गुरुपादपद्म-
      भृङ्गः पराङ्कुशयतीन्द्रतपोधनेशः ।
हृद्यं ततान नतमङ्गलदायि पद्मा-
      सद्मायिताङ्कनरकेसरिसुप्रभातम् ॥ २१॥

इति महादेवविरचिता श्रीलक्ष्मीनृसिंहसुप्रभातविंशतिः समाप्ता ।
स्तोत्रसमुच्चयः २ (७३)

Proofread by Rajesh Thyagarajan