राममत्तेभस्तोत्रम्
श्रीकामुको निखिलनाकालयैर्विपुलशोकाकुलैरभिनतो
रेखारथाङ्गवरशङ्खाञ्चितः कपटशाखामृगैः सह सुरैः ।
यो गामुपेत्य बहुवेगान्वितः कलितयागात् स्वयं दशरथात्
श्लाघाशतैर्दिविषदोघार्पितैः सजलमेघाकृतिः समजनि ॥ १॥
वाचा मुनेस्तदनु वाचालितज्यधनुराचाम्यजीवनमिषून्
तुच्छात्मनां स्वतनुदुच्छायसन्तमससञ्छादितान्तरनिशाम् ।
आजानपावनसरोजायमानपदभाजा कणेन रजसः
कष्टं स्त्रिया झटिति निष्टङ्कितं विदधदिष्टं च योऽदित मुनेः ॥ २॥
कुण्ठान्यशक्तिशितिकण्ठाशुगासनमरं ठात्कृतं भञ्जयन्
व्रीडास्मरस्फुरणनीडायितां च जनक्रेडापतेरात्मजाम् ।
रूढानुरागकमुदूढामुपेत्य पथि मूढाशयं प्रतिघया
शोणाक्षमप्यथ भृगूणामधीशमपरीणावलेपमतनोत् ॥ ३॥
ताताज्या तदनु सीतान्वितो भुवनपाता समेत्य विपिनं
यथार्थ्यवेदिमुनिनाथार्थतो विमतमाधाय पञ्चवटिकाम् ।
गोदावरीविगनादानुबन्धबहुमोदावहाधिवसन्
क्रोधादरं विपुलयोधाधरं विषममेधाधरं खरमहन् ॥ ४॥
नानामुखोक्तिबहुमानागतं झटिति लीनायुषं च हरिणं
आपाद्य यातुहृतभूपात्मजाविरहतापातुरो वनभुवि ।
शेफालिकामिलितरेफाधिकारख्यरवरेफायिताधिकधृतिः
क्षीबाशयं तद्नु चाबघितोष्णकरशाबार्थमिन्द्रतनयम् ॥ ५॥
........ missing in the manuscript
प्राभातिकार्कफललोभाभियुक्तकपिनाभातदारकुशलः ।
भीमाशुगैस्त्रसति सामावलम्बिनि विनामाश्रये जलनिधौ
आयासलेशमपहायालिकृज्झटिति जायामुषः पुरमगात् ॥ ६॥
श्रीराशयः सकलवीराग्रणीरहितमाराय सैनिकयुतः
कालात्मकः स्वभुजलीलावमुक्तशरजालाहताशरगणः ।
दावानलः खलु यथा वा तृणं युधि तथैवातृणोद् दशमुखं
नैशाचरीं तदनुजे शास्त्रतो विलसदाशावतीं श्रियमधात् ॥ ७॥
योषामुपेत्य गतदोषां ततोऽभजत तोषान्वितो निजपुरे
नीहारशीतलविदेहात्मजाङ्ग मिलदीहानुरूपविहृति ।
डोलाविहारमथ तालन्विताभिनयमेलाधिको ह्यनुभवन्
साक्षात् पुरोऽस्तु धनुदीक्षागुरुर्मम स रक्षामणिस्त्रिजगताम् ॥ ८॥
मत्तेभयूथमिदमुत्तेजिताशुगनिकृत्तेन्द्रवैरिशिरसे
त्रस्तापतज्जनसमस्तावनप्रणयविस्तारितात्मयशसे ।
श्रीजानकीसहितराजाधिराजतनवे जायतां सदुपदा
पादेऽर्पितं ननु महादेवनामकविना देवतार्चितपदे ॥ ९॥
इति महादेवविरचितं श्रीराममत्तेभं सम्पूर्णम् ।
स्तोत्रसमुच्चयः २ (७२)
The Ramamallehhaslotra (72) is of particular
interest because of its special form of
composition. The poet employs the dvAdashaprAsa,
repetition of a syllable twelve times in each
verse (the second syllable of each yati), in a
different way, using the repeated syllables in
the alphabetical order. The author, Mahadeva,
is probably the same as the author of the
naTeshAShTaka.
Proofread by Rajesh Thyagarajan