% Text title            : kRiShNavilAsakAvyam
% File name             : shrIkRiShNavilAsakAvyam.itx
% Category              : vishhnu, krishna, vishnu
% Location              : doc\_vishhnu
% Author                : sukumArakavi
% Transliterated by     : NS Panicker in Malayalam http://sreekrishnavilasam.blogspot.in/
% Proofread by          : PSA Easwaran
% Latest update         : August 2, 2012
% Send corrections to   : sanskrit at cheerful dot c om
%
% This text is prepared by volunteers and is to be used for personal study 
% and research. The file is not to be copied or reposted for promotion of 
% any website or individuals or for commercial purpose without permission. 
% Please help to maintain respect for volunteer spirit.
%
\documentstyle[11pt,multicol,itrans]{article}
#include=ijag.inc
#endwordvowel=.h
\portraitwide
\parindent=100pt                
\let\usedvng=\Largedvng      % for 1 column     
\pagenumbering{itrans} 
\def\engtitle#1{\hrule\medskip\centerline{\LARGE #1}}
\def\itxtitle#1{\medskip\centerline{\LARGEdvng #1}\medskip\hrule}
\def\endtitles{\medskip\obeyspaceslines}
%%
\begin{document}
\engtitle{.. shrIkRiShNavilAsakAvyam by Sukumarakavi ..}##
\itxtitle{.. shrIkR^iShNavilAsakAvyam sukumArakavivirachitam ..}##\endtitles ##

                      || shrIH ||
    prathamaH sargaH

asti shriyaH sadma sumerunAmA samastakalyANanidhirgirIndraH |
tiShThannidaM vishvamanupravishya svenAtmanA viShNurivorjitena || 1\-01||

mithastirobhAvavilokanAbhyAM sa~NkrIDamAnAviva bAlakau dvau |
pArshveShu yasyAshu paribhramantau chandrAMshumantau nayato dinAni || 1\-02||

uchchaishshikhaH kA~nchanagauravarNastamo nigR^ihNanmahasA nijena |
dIpastrayANAmiva viShTapAnAM yo bhAti paryantacharatpata~NgaH || 1\-03||

yasyA patitve vihitAbhilAShaH karoti tIvrANi tapAMsi lokaH |
bibharti ratnAkaramekhalAM tAma~Nkena putrImiva yo dharitrIm || 1\-04||

mahAnti dAnAni makhAnudagrAn parA~nchi pAnAshanayostapAMsi |
sharIriNaH shAntamalairmanobhiH kurvanti yachChR^i~NganivAsakAmAH || 1\-05||

surA yugAnteShu saha priyAbhirnniShedivAMso yadadhityakAsu |
udanvatAmaikyamupAgatAnAM pashyanti kallolashataprachArAn || 1\-06||

puShpANi shayyAssurapAdapAnAM krIDAgR^ihAH kA~nchanagahvarANi |
bhavanti cha svargavilAsinInAM ratnA~NkurA yatra ratipradIpAH || 1\-07||

svargaukasassvarNamahIShu pItAH shvetatviSho rUpyamayIShu bhUShu |
nIlAshcha nIlopalamedinIShu j~nAtuM mitho yatra na shaknuvanti || 1\-08||

darIgR^ihotsa~NgagateranUroH kashAbhighAtadhvanibhiH sakampAH |
sadyaH priyAnujjhitamAnadoShAH surA~NganA yatra pariShvajante || 1\-09||

netuM trapAnamramukhIranIshAH sphuTAni yatsvarNaguhAntarANi |
siddhAH prayatnena vinA navoDhAH nayanti nIlopalagahvarANi || 1\-10||

yatrodyatAnAM kusumApachAye kAntAsu kalpadrumavATikAsu |
vibhAnti sutrAmavilAsinInAM padAni lAkShArasapATalAni || 1\-11||

payodamArgavyatila~NghinIShu haMsAH shiraHpuShkariNIShu yasya |
varShAgame.apyashrutameghanAdAH na kurvate mAnasadIrghayAtrAm || 1\-12||

ChanneShu yasmin kanakojjvalAbhirAmUlachUDaM navama~njarIbhiH |
gandhena vij~nAya patanti bhR^i~NgAH shR^i~NgAntarAragvadhapAdapeShu || 1\-13||

mandAkinI yachChikhare vahantI kulyApathAbhyantarasampraviShTA |
bAleva tadrakShaNasampravR^ittA dine dine si~nchati puShpavATIm || 1\-14||

shriyAbhirAmashsharaNaM surANAmala~NghanIyo mahatA mahimnA |
virAjamAno vanamAlayA cha yaH shAr~NgadhanvAnamanuprayAti || 1\-15||

purA purANAM tritayaM didhakShorumApateH kArmukatAM prapannaH |
madhyena vajrA~NkushamatsyachihnaM yo.adyApi tanmuShTipadaM dadhAti || 1\-16||

shR^i~NgAgrabhAjAM surasundarINAM mukhAni pashyannamalAni chandraH |
nigUhituM nUnamuraHkala~NkaM hriyeva yatsAnupathena yAti || 1\-17||

manobhirAme shikhare tadIye sahopaviShTaM surasiddhasa~NghaiH |
avochadAgatya kR^itapraNAmA kadAchidurvI kamalAdhivAsam || 1\-18||

pumAnivAhaM bhavataH purastAdbravImi ki~nchit pratipadya dhairyam |
pIDA madIyA paramatra heturnirllajjatA nanvakhilopahAsyA || 1\-19||

sR^iShTAstvayA dattavarAshcha daityAH bhAreNa mAM samprati pIDayanti |
bale pramANe cha bhavanti yeShAM naivopamAnaM kulabhUbhR^ito.api || 1\-20||

svavikramonmUlitarAjakAnAM jayaiShiNAmadya paraspareNa |
teShAM raNakShoNiShu siMhanAdairnirghAtaghorairgirayaH sphuTanti || 1\-21||

muhurbalAdunnamayatyahIndre madbhArabhugnaM phaNachakravAlam|
mama prakampAshchalitAbdhishailAH digdantino hanta kadarthayanti || 1\-22||

AshAmukheShu bhramatAmajasraM teShAM chamUbhiH parisarpiNIbhiH |
tirohitAM bhAnumato mayUkhAH na kvApi mAM samprati saMspR^ishanti || 1\-23||

sannAsmi daiteyabhareNa sAhaM phaNIshvarassIdati madbhareNa |
tadbhArashIryannijakarparasya dhik tAmavasthAM kamaTheshvarasya || 1\-24||

bhArAvasIdadphaNamaNDalasya phaNIshvarasyopari duHsthitA.aham |
AsannapAtAsmi taTIva nadyAH pravAhavegena viluptamUlA || 1\-25||

niveditA deva mayA dasheyamanuktidoSho mayi nopapAdyaH |
nivedyate rakShyajanena duHkhaM tataH parastAt prabhavaH pramANam || 1\-26||

ityuktavatyAmuchitaM pR^ithivyAM chintAbalena stimito muhUrtam |
mukhAni pashyannamR^itAshanAnAM devaH prajAnAM patirityuvAcha || 1\-27||

nAsatyametadyadavochadurvI svakarmaNaH sAdhu phalaM mayA.a.aptam |
madvarddhitA mAmavamatya daityAH balAdupaghnanti jaganti yatte || 1\-28||

atItakAryAnushayena kiM syAdasheShavidvajjanagarhitena |
surAH samunmUlanamAshu teShAM kartuM yatadhvaM jagatAM hitAya || 1\-29||

sadyassamuttiShThata chintayAlaM chintA hi kAryapratibandhahetuH |
yAmaH pR^ithivyA saha yatra tatra nArAyaNo dAnavakAlarAtriH || 1\-30||

astvevamityAdarapUrvameva sa svIkR^itoktissurasiddhasa~NghaiH |
sarojajanmA saha taiH pratasthe vihAyasA vishvapatessakAsham || 1\-31||

elApariShva~NgalasattamAlaM velAdhirUDhaskhaladUrmimAlam |
dadarsha dhAtA manaso.anukUlaM payaHpayodherachireNa kUlam || 1\-32||

dadarsha cha kShIramayaM samudraM kailAsashR^i~NgonnataphenakUTam |
puNyaM payaHkelisamutsukAnAM shriyaH sakhInAmavagAhanena || 1\-33||

AnandayAmAsa divaukasastAnAghrAtasheSho munimaNDalena |
prakAmapuNyaH pavanopanIto vaikuNThavakShastulasIsugandhaH || 1\-34||

gandhAnusAreNa visR^iShTanetrairhiraNyagarbhapramukhairamartaiH |
navArkakalpaM dadR^ishe murArervakShasthalIkaustubharatnadhAma || 1\-35||

apahnutAsheShamanovikAraM divispR^ishA tUryaraveNa mishram |
AkarNya vaikuNThavilAsinInAM gItadhvaniM harShamayAsiShuste || 1\-36||

AsaktimAlakShya vinItaveShA svamaulivinyastakarAssurAste |
AlokayAmAsurasheShanAthaM savigrahaM puNyamiva prajAnAm || 1\-37||

pravR^iddhahemAbharaNaprakAshaM tamAlanIlaM jaladhau shayAnam |
taTillatADhyaM payaso.atipAnAdanIshamudgantumivAmbuvAham || 1\-38||

tara~NgavAtena payaHpayodherApUryamANaM karapA~nchajanyam |
vAmena tiryagvalatA salIlaM sambhAvayantaM muhurIkShaNena || 1\-39||

pratikShaNaM premavisheShajAbhissambhAvanAbhiH kamalAsanAyAH |
purA.a.atmanA kalpitamamburAsheH pramArjayantaM mathanAvamAnam || 1\-40||

paryAyataH pANidhR^itaM sarojaM vinyasya vinyasya dR^ishoH padavyAm|
nidrAM prabodhaM cha muhurnnayantIM padmAsanAM sasmitamIkShamANAm || 1\-41||

svachChasvadehapratibimbitena phaNAshmajAlena phaNIshvarasya |
bhAsvat phalastomanirantarasya vahantamAbhAM vaTapAdapasya || 1\-42||

ajasramAsInarathA~Ngasha~NkhamatiprasannaM kamalAdhivAsam |
santApavichChedakaraM prajAnAM hradaM mahIyAMsamivAbhigamyam || 1\-43||

vaktuM mitho rAhuvicheShTitAni karNadvayAbhyarNamupeyivAMsau |
alabdhakAlAviva bhAnuchandrau rathA~Ngasha~Nkhau dadhataM karAbhyAm || 1\-44||

dvArasthasenApatichoditena nivAritAH ka~nchukimaNDalena |
surAH pramodaskhalitairvachobhiH sthitvaiva te vyomani tuShTuvustam || 1\-45||

namaH parasmai puruShAya tubhyaM girAM dhiyAmapyapathi sthitAya |
asmAn punastrAtumudagramohAn kR^ipAbalAt kalpitavigrahAya || 1\-46||

bhAgIrathI pAdakusheshayAtte vinirgatA vishvamidaM punIte |
kastvAM punarbhAvayato janasya shuddhiM parichChettumalaM manIShI || 1\-47||

anantashakterapavikriyasya tisrastrilokIshvara shaktayaste |
vitanvate sthAvaraja~NgamAnAmutpAdanakShemavilopanAni || 1\-48||

kaTAkShamAtreNa bhavAmburAsheH pAraM paraM prApayitustrilokIm |
sakR^innamasyA paramAtaraste yatnAnurUpaM hi phalaM kriyANAm || 1\-49||

tvaM jyotirApastvamasi tvamurvI tvaM vyoma vaishvAnarasArathistvam |
tvaM jIvavargaH paramastvamAtmA yannAsi kiM nAma jagatpate tat || 1\-50||

navAbhravarNaM nalinAyatAkShaM pItAmbaraM hArakirITinaM tvAm |
vayaM tu sevemahi vIkShamANAH sAyUjyamanviChati kaH sukhArthI || 1\-51||

alaM na nirdeShTumiyattayA tvAmasheShanAtha shrutiragrimApi |
sa eva sAkShAtkriyate punastvamaho jitaM naH sukR^itairanalpaiH || 1\-52||

tR^iNAya matvA nikhilAni shAr~Ngin padAni vaidheyamanoharANi |
AvR^ittishUnyaM paramaM padaM te vA~nChanti vairAgyadhanA mahAntaH || 1\-53||

iti stuto devagaNena devo dayAnidhirdAnavakAlarAtriH |
nyaShIdadutthAya bharAvabhugne bhuja~Ngatalpe bhuvanaikanAthaH || 1\-54||

viShvak sa vaikuNThavilAsinInAM salIlamAndolitachAmarANAm |
nivArayannagrakarAravindaiH kolAhalaM kA~nchanaka~NkaNottham || 1\-55||

prasAdavatyA kamalAsanAdIn surAnasheShAnanugR^ihya dR^iShTyA |
uvAcha vAchaM dashanAMshupUraiH samedhayan dugdhamayaM payodhim || 1\-56||

adhijyakodaNDadharo niSha~NgI sannAhavAn pANidhR^itaikabANaH |
ayaM samAjo bhavatAM dviShadbhyo bhayaM samAvedayati sphuTaM me || 1\-57||

alaM vilambena divaukasastannivedyatAmadya kuto bhayaM vaH |
ayaM karo duShTavadhotsukaM me sudarshanaM na kShamate niroddhum || 1\-58||

ityUchivAMsaM paramaM pumAMsaM natvA shirobhirbahushaH surAste |
ArUDhaharShAtishayAH svamarthamArebhire vaktumasheShameva || 1\-59||

nivArya sarvAnapi vaktukAmAn senApatistAnamarAn kareNa |
savibhramapreritayA purasthaM dR^iShTyA sarojAsanamAjuhAva || 1\-60||

athAgatastena kare gR^ihItvA nItaH prabhorantikamabjayoniH |
vaktuM niyuktaH sa kR^itapraNAmo vij~nApayAmAsa vinItaveShaH || 1\-61||

vayaM tvayA dattavibhUtayo.api mohAtirekAdabhimanyamAnAH |
kR^ichChre punastvAM sharaNaM vrajantaH hA nistrapANAM prathame bhavAmaH || 1\-62||

apAraduHkhArNavapotapAtrIM tvayA kR^ipAmudvahatAtigurvIm |
kR^itaghnatAjanmabhuvAmamIShAmasmAkamarthe na kimanvabhAvi || 1\-63||

manasvilokasya vigarhaNIye pratigrahe varjayatA jugupsAm |
purA purastAdbalidAnavasya prasArito nAgrakarastvayA kim || 1\-64||

daityAdhirAjena hiraNyanAmnA paryAkulaM trAtumasheShalokam |
idaM tu divyaM parihR^itya rUpaM na tvaM kimAsIrnaratiryagAtmA || 1\-65||

svavikramAkrAntasurAsurasya rakShaHpaternigrahaNAdareNa |
bhUtvA sutaH pa~Nktirathasya rAj~nastAM tAmavasthAM na kimanvabhUstvam || 1\-66||

anekadhA pAlayitAramevaM sampratyapi tvAM sharaNaM prapannAH |
santApahArI nanu chAtakAnAM bhUyo.api bhUyo.api payoda eva || 1\-67||

vishvaM vidannapyavidanniva tvaM nAthAnuyu~NkShe bhayahetumasmAn |
anugrahasyaitadapi prabhUNAM prAyaH prakArAntaramAshriteShu || 1\-68||

tapobhirugrairbhagavan surANAmavadhyabhAvaM danujAH prapannAH |
pAtAlamurvIM cha vijitya darpAdupakramaM te divamadya jetum || 1\-69||

na jAtu shUnyaH kulishena pANirvakSho na muktaM maNika~NkaTena |
shakrasya daityAgatisha~Nkino.asya nAsajjitastiShThati vAraNendraH || 1\-70||

daNDaM yamAtpAshamapAmadhIshAdgadAM kuberAtkulishaM maghonaH |
AdAtukAmaH prahiNoti dUtAn kaMsaH svadorvikramanirjitAshaH || 1\-71||

raNe vinirjitya balaM surANAM parAkrameNApratimena vIraH |
bhojeshvaraH krIDati sAvarodho mUleShu sampratyamaradrumANAm || 1\-72||

dhanurdharAdhyAsitavaprashIrShAH dvAHpAlanavyagrasamagrayodhAH |
pravIranirbhartsitakAndishIkA sthAtuM na jAnAti purI surANAm || 1\-73||

hAheti vikroshadanAthametadvishvaM jagatpIDayataH prakAmam |
tvayA vinA.anyastriShu viShTapeShu na kartumIShTe narakasya bha~Ngam || 1\-74||

pralambakeshipramukhAstathAnye parassahasraM pariyanti daityAH |
nirghAtakalpairnijasiMhanAdairvidArayanto viyadAhaveShu || 1\-75||

ShaT sUnavassanti hiraNyanAmno daityasya pAtAlatalAdhivAsaiH |
tairnnaH kriyante duritAni yAni vaktuM na shakyAni mukunda tAni || 1\-76||

teShAM mahIdhrapratimAkR^itInAM bhAraM mahI soDhumasAvashaktA |
asmAn puraskR^itya bhavatsakAshaM prAptA nijakleshanivedanAya || 1\-77||

tadetadAvedanamasmadIyaM shrutvA pramANaM prabhurityudIrya |
vidhirvyaraMsIdvihitapraNAmaH sa chApi gambhIramuvAcha devaH || 1\-78||

alaM viShAdena divaukaso vaH samIhitaM hastagataM manudhvam |
vrataM hi me kevalametadeva saMrakShaNaM yachCharaNAgatAnAm || 1\-79||

mAmarthayante vasudevapatnyau patnI cha nandasya sutaM guNADhyam |
aMshadvayena vratakarshitA~NgIstisro.api tAH putravatIrvidhAsye || 1\-80||

iyaM cha lokatritayasya mAtA mAyAbhidhAnA mama shaktiragryA |
kAryANi vaH kAnyapi kartukAmA janiShyate janmavinAshashUnyA || 1\-81||

tadgachChata svargamapetakhedAH na kAlahAniH parisha~NkanIyA |
anena shAr~NgeNa shape sharairvaH sadyo manaHshalyamapAkariShye || 1\-82||

iti tamamaralokaM sAntvayitvA sa devaH
sapadi navaghanAbhaH padmanAbhastiro.abhUt |
sa cha vihitanamasyastasya vAchaM prashaMsan
nijapadamabhipede harShaparyAkulAtmA || 1\-83||

iti sukumArakR^itau kR^iShNavilAsakAvye prathamassargaH || 1 ||
\medskip\hrule\medskip
    dvitIyaH sargaH

athaikadA putraphalAni samyagvratAni bAhyopavane charantIm |
rathena kaMso vasudevayuktaH svasAramAlokayituM jagAma || 2\-01||

sphuratprabhApallavitA~NgayaShTIM katha~nchidUDhastanama~njarIkAm |
tatrAlakaiH ShaT/padinImajAnAt sa tAM latAmadhyagatAM chireNa || 2\-02||

sA sannatA~NgI niyamAvasAne jyeShThAya tasmai vidadhe namasyAm |
sa chAshiShA tAmanugR^ihya sAdhvIM bhojeshvaro vAkyamidaM babhAShe || 2\-03||

adyApi bAlAsi sutAnanekAn prasoShyase kiM vratayAtanAbhiH |
pashyAdhunA pallavasUtikAle kiM kalpate chUtalatA phalAya || 2\-04||

kR^ishAsi kAmaM virama prayAsAnmanobhirAmAnupabhu~NkShva bhogAn |
a~NgAni te sannatagAtri duHkhaM mR^iNAlakalpAni kathaM saheran || 2\-05||

tAmevamuktvA sa tu sAbhyanuj~nAM rathaM samAropya sahaiva patyA |
prayAtukAmaH puramantarikShe shushrAva vAchaM shatadhArakalpAm || 2\-06||

tvadantikasthA sahajAshamIyaM prasoShyate putramayaM kR^ishAnum |
marutsamiddhassa tu durnivArastvAM bhasmasAt kaMsa kariShyatIti || 2\-07||

nishamya tadbhUtavacho nikAmaM kaMsassa roShAgamadurnirIkShyaH |
kR^ipAM parityajya kR^ipANapANiH svasurvadhAya svayamudyato.abhUt || 2\-08||

nR^ishaMsakR^itye nitarAM pravR^ittamudagrakopasphuritAdharoShTham |
prasAdayannAnakadundubhistamuvAcha dhImAnupapattiyuktam || 2\-09||

alaM tavAnena vadhodyamena tvayA vidheyo nR^ipate vimarshaH |
kimeSha nAshrAvi vichArashUnyaM vrajantyanarthA iti sAdhuvAdaH || 2\-10||

bhayena yuddheShu purandarAdIn surAn parAchastrapayA vimu~nchan |
mahIshvara strIvadhapAtake.asmin kathaM tavopakramate kR^ipANaH || 2\-11||

anena kiM vA tava jIvitena yadrakShaNaM syAt sahajAvadhena |
guNena kenApi hi labdhanAmnAmapi svanAshAdayasho garIyaH || 2\-12||

prapadyamAnasya sadAbhivR^iddhiM divAnishaM prINayatashcha lokAn |
bhavadyashashchandramaso.asya mAbhUnnavaH kala~Nko bhaginIvadhena || 2\-13||

svasurvadhenAsya bhavedakIrtistena tyajeyussuhR^ido.api bhItAH |
ityeva nUnaM bhujanirjitaistaissuraiH prayuktassumahAnupAyaH || 2\-14||

kAlena taddrakShyasi yanmaduktaM mA bhUttavAsmin viShaye.api sha~NkA |
tathApi chetastava sha~Nkate chedAkarNyatAM tarhyaparaH prakAraH || 2\-15||

sarvANyapatyAni vashe tavAhaM jAtAni jAtAni samarpayiShye |
tannigrahaM vA tadanugrahaM vA vichintya kartAsi dashAnurUpam || 2\-16||

kiM buddhimAndyena nijena tasya kiM bhAgadheyena varA~NganAyAH |
balena kiM vA bhavitavyatAyAstatheti jagrAha vachastadIyam || 2\-17||

vadhapravR^itto vasudevamantraprabhAvasaMstambhitaghorakarmA |
nivR^itya nistriMshamahAbhuja~Ngo mahIbhR^itaH koshabilaM vivesha || 2\-18||

satyA nu sA syAdasharIriNI vAk satyaM kimetadvasudevavAkyam |
vitarkayannevamudastaketuM purIM prapede maNitoraNADhyAm || 2\-19||

AlokanairmauliShu bhUpatInAmAsajjayanna~njalibandhanAni |
sa vaimanasyena mukhasthitena bhayAvahaH svaM bhavanaM jagAma || 2\-20||

visha~NkamAnaH sa gR^ihopakaNThe tau sadmani kvApi vidhAya guptau |
parAkramAkrAntasamastalokaH pureva bhogAnayamanvabhu~Nkta || 2\-21||

mAyA haressA.atha hiraNyaputrAn yAn devakIgarbhagatAnakArShIt |
bhojeshvarassatvarametya bhItyA tAn jAtamAtrAnavadhIt krameNa || 2\-22||

jagadvibhUtyai paramasya puMsaH yo devakIgarbhamavikShadaMshaH |
AkR^iShya tasmAnmuravairimAyA taM rohiNIgarbhagataM chakAra || 2\-23||

chakAsa saptachChadapANDureNa sutena sA garbhatirohitena |
valAhakAntarhitashItabhAnordisho dashAM vR^itrajitaH prapannA || 2\-24||

tatassamAhlAdanamIkShaNAnAmasUta putraM sharadindukalpam |
prakarShamApannudayena yasya sadyaH samudrA iva satvavantaH || 2\-25||

patyussamAdiShTamidaM vidhAya sheShaM chikIrShussurakAryamAryA |
charAcharANAM jagatAM savitrI sA shraddadhe janmabhuvaM yashodAm || 2\-26||

atha prajAnAmabhivR^iddhikAmo devo dayAyAH kila janmabhUmiH |
svajanmane janmavinAshahetuH prApyassatAM prApa sa devakIM tAm || 2\-27||

kR^ishAvalagnA kuchayorgarimNA sA devakI sannatagAtrayaShTiH |
jagattrayIpuNyakR^itAvalambA babhAra garbheNa jagannivAsam || 2\-28||

antardadhAnA sarasIruhAkShaM svenAvatAreNa bhuvaM punAnA |
sA devakI sA cha kaverakanyA mitho.adadhAtAmupamAnabhAvam || 2\-29||

alaM nivAsAya na yasya vishvaM vasan sa garbhe mumude mukundaH |
paropakAraprabhavaM hi duHkhaM puMsassukhAyaiva mahattarasya || 2\-30||

bahiHsphurantyA karapA~nchajanyatviSheva viShNorudarasthitasya |
adhatta tasyAstapanIyavarNA madhUkapuShpachChavima~NgayaShTiH || 2\-31||

babhAra hAraM kuchayorna tanvI na pAdayornUpuramAmumocha |
dadhau maNiM bhArabhiyA na maulau tadeva kaivalyamabhUShayattAm || 2\-32||

dR^ishaH prayatnena dadhau tirashchIruvAcha mandaM nibhR^itaM jahAsa |
shanairyayau dattakarA sakhIbhirbhR^ishaM nishashvAsa cha tAvadeva || 2\-33||

sahaiva harSheNa sudhAshanAnAM sahaiva puNyena vasundharAyAH |
bhayena bhojAdhipateshcha devo sahaiva garbhe vavR^idhe mukundaH || 2\-34||

shirobhirUDhena vanaspatInAM phalopahAreNa niveditarddhiH |
prAvR^iT samAsAditasUtikAlAM tAM devakIM draShTumivAjagAma || 2\-35||

athaikadeshA iva vArirAsheruchchaiH puromArutaviprakIrNAH |
vR^itAstaDidvidrumavallarIbhirvirejire vyomani vArivAhAH || 2\-36||

balAhakavrAtabhavaistamobhirdineShu durbodhapuraHsthiteShu |
na kashchidAsIdabhisArikANAM vidyutprakAshena vinA.antarAyaH || 2\-37||

payodabhastrAntaranirgatena jhAtkAriNA chaNDasamIraNena |
viyoginAM chetasi meghakAlaH sandhukShayAmAsa manobhavAgnim || 2\-38||

smareNa lokatritayeshvareNa sambhAvitAjjIvitanirvisheSham |
R^itorvasantAjjvaladAgamasya jahAra jAtirnikhilaM nikarSham || 2\-39||

balAdgR^ihItA iva vaitasIbhiH shAkhAbhirArUDhamadA ivochchaiH |
pariskhalantyo nikhilAstaTinyaH jagmurjavAdudbhaTaphenahAsAH || 2\-40||

udArasaurabhyavashIkR^itAnAmanvIyamAnaH paTalairalInAm |
akalpayat ketakamAtarishvA manobhavasyApi manovikAram || 2\-41||

atyambupAnaprabhavasya kartumantarjaDimnaH pratisaMvidhAnam |
papustiraskArapadena meghAH mayUkhamAlAmaravindabandhoH || 2\-42||

rarAja kharjUraphalaprakAshaM navaM payaH kAnanapalvaleShu |
payodavR^indaiH paripIya muktaM prabhAkarasyeva marIchijAlam || 2\-43||

mahIbhR^itAM mUrddhasu dattapAdaM vilokya mitraM vihatapratApam |
magne jale martumivAravinde madhuvratAshchukrushurantarikShe || 2\-44||

niShevya haMsA madhurairvachobhiH padmAkaraM labdhasamIhitArthAH |
sadyo yayustasya vipattikAle jalAshayAnAM prakR^itiH kilaiShA || 2\-45||

prarUDhasasyAH phalamUlashAkairnirantarAH svAdunavodakADhyAH |
pallIjuShAM chetasi pAmarANAM dhR^itiM parAmAdadhire vanAntAH || 2\-46||

samunmiShantI girimallikAnAM prasUnarAjissutarAM vireje |
muktvA nabho meghavimardabhItyA nakShatramAleva gatA dharitrIm || 2\-47||

dhArAlajImUtakR^itAndhakAre tasminnaparyantajaDimni kAle |
alakShyamANaH kvachidaMshumAlI divA.apyuvAseva tanUnapAti || 2\-48||

iti pravR^itte samaye ghanAnAM mAse nabhasye nishi madhyamAyAm |
gaNe shubhAkhyAyini cha grahANAM devakyuvAha prasavAbhimukhyam || 2\-49||

haratsu bAhyaM bhuvanasya tApaM prAvR^iT prasUteShu valAhakeShu |
asUta tasyAntaratApashAntyai kR^iShNAmbuvAhaM kR^ipayeva devI || 2\-50||

dishaH praseduH saha nimnagAbhirjaharSha lokena sahAmburAshiH |
jAte mukunde mumuchushcha sadyaH bhayena devAH saha puShpavR^iShTim || 2\-51||

manobhirAmeNa madhuvratAnAM nAdena shaMsanniva diShTavR^iddhim |
chachAra vAyuH sumanoM.ashukAni samprApya samprApya mahIruhebhyaH || 2\-52||

vyajR^imbhata prasphuTasha~NkhanAdaH tAreNa gItadhvaninA vimishraH |
samashnuvAnaH kakubhAM mukhAni divaukasAM ma~NgalatUryaghoShaH || 2\-53||

trapAmapAsyan vinayaM vilumpan nItiM nigR^ihNan bhayamAshu bha~njan |
sharIriNAmachyutajanmajanmA modo jajR^imbhe madanirvisheShaH || 2\-54||

AShADhinaM pANimudasya dUraM brahmarShilokaH pataduttarIyaH |
nanarta paryAkulapAdachAraH prahasyamAnaH surasundarIbhiH || 2\-55||

shR^i~NgojjhitaiH ku~NkumavAripUrairanyonyamabhyukShaNatatparANAm |
pramodajanmA divi sambabhUva kolAhalaH ko.api sudhAshanAnAm || 2\-56||

pitR^IMshcha putrA pitarashcha putrAn gurUMshcha shiShyA guravashcha shiShyAn |
patIMshcha dArAH patayashcha dArAn pramodamattAssiShichuH payobhiH || 2\-57||

asi~nchadambhoruhayonirindraM taM pa~NkajAvAsamasi~nchadindraH |
asi~nchatAM dvau vibudhAnasheShAn sarve surAstau cha balAdasi~nchan || 2\-58||

mithaH payobhiH siShichurvineduH vavalguruchchikShipurambarANi |
anyonyamaMsena sudUramUhurmattA iva svargasado babhUvuH || 2\-59||

trilokanAthodayasambhavena modena paryAkulamAnasAnAm |
gIte cha nR^itte cha surA~NganAnAM babhUva tAlaskhalitaM na doShaH || 2\-60||

shR^i~NgodakAsphAlanaraktanetrAH vichChinnahArAshchyutakarNabhUShAH |
prahAsasIdadhvanibhirvachobhiH samAlapanto vibudhA vijahruH || 2\-61||

jAte harau daityavimardanena vishvambharAbhAramapAchikIrShau |
muneH praharShaH kalahapriyasya jagatpraharShashcha samAvabhUtAm || 2\-62||

iti praharShAkulitairmanobhiH vishR^i~NkhalaM krIDati dehivarge |
kaMsassabhR^ityaH pratipadya mUrChAM nidrAbhidhAnAM na kimapyabodhi || 2\-63||

shyAmaM chaturbAhumudArahAraM kirITinaM kuNDaladIptagaNDam |
pitA.api mAtA cha vilokya putramAnandamagnau vivashAvabhUtAm || 2\-64||

niyamya harShodayapAravashyaM taM devakIjAniruvAcha vAcham |
prasIda bhIto.ahamatIva kaMsAdidaM tu rUpaM pratisaMhareti || 2\-65||

tatpreritastalpagataM karAbhyAM tamAdade kalpitabAlabhAvam |
tayoshshayAnaH karayossa tasya prakAmamaprIyata padmanAbhaH || 2\-66||

asheta yaH prAgvaTapatramadhye lokAnasheShAnudare dadhAnaH |
vinA tapobhiH kimu tasya sidhyettatpANiyugme shayanaM murAreH || 2\-67||

tamAlanilena tamobhareNa nipIDitAshAvalaye nishIthe |
AdAya pa~NkeruhalochanaM taM sadyaH sa nirgatya gR^ihAt pratasthe || 2\-68||

nivArya varShodakamAtmanaiva prakAshya mArgaM phaNaratnabhAsA |
upAyamuktvA vasudevakarNe sheShassiSheve bahudhaiva viShNum || 2\-69||

purAt sa nirgatya pumAMsamAdyaM vahan vahantIM yamunAmapashyat |
kUla~NkaShaughA.api kalindakanyA tadIyagulphadvayasodakA.abhUt || 2\-70||

uttIrya tAM tattaTasaMshritAnAM dAtuM karaM vArShikamAgatAnAm |
vrajaukasAM nandapurogamAnAM prIto niveshaM sahasA vivesha || 2\-71||

pravishya jAnanniva nandagopaniveshanaM suptasharIrivargam |
sutAM prasUya pratipannanidrAM dadarsha taddharmavadhUM yashodAm || 2\-72||

taM shAyayitvA shayane tadIye kanyAM samAdAya nipatya gachChan |
shushrAva putrodayaharShamUlaM kolAhalaM gopavadhUjanAnAm || 2\-73||

kareNa kanyAM manasA cha putraM vahan muhUrtena vila~Nghya mArgam |
visha~NkamAvishya gR^ihaM gR^ihiNyAH nidhAya bAlAM shayane sa tasthau || 2\-74||

sA cha~ncharIkasvanasannibhena nAdena lokasya mano harantI |
ruroda ki~nchidvivR^itena bAlA sphuTatpayojAkR^itinA mukhena || 2\-75||

AkarNya bAladhvanimastanidrAH pradhAvya rakShApuruShA javena |
prabodhya yatnena patiM pR^ithivyAH shashaMsurasmai bhaginIM prasUtAm || 2\-76||

sadyaH samAgatya sa tatra dR^iShTvA bAlAmamarSheNa vimarshashUnyaH |
svasrA niShiddho.api vadhAbhilAShI jagrAha tasyAshcharaNau karAbhyAm || 2\-77||

udasya dUraM tarasA kareNa chikShepa tAM durmatirashmapR^iShThe |
mahImayAtaiva divi sthitA sA jajvAla dhAmnA jagatAM savitrI || 2\-78||

tataH karaistAmarasaprakAshaiH sA mandamAndolitashastrajAlA |
vilokya taM vihvalachittavR^ittiM jagAda vAchaM jagadekamAtA || 2\-79||

tvamagrahIrmachcharaNau ruShA.api prAyaH phalaM tasya na hanmi yattvAm |
jAtaH pR^ithivyAM tava jAlma hantA sadyo hitaM chintaya sAdhayAmi || 2\-80||

iti nR^ipamabhidhAya jyotiShA kurvatI sA taDidiva nayanAni prANinAmAkulAni |
surayuvatibhiruchchairgIyamAnApadAnA surapadamabhipede pATitAbhrA javena || 2\-81||

shrutvA tasyA shravaNaparuShAM vAchamantarviShaNNaH
putrApAyavyathitamanasaM sAntvayitvA svasAram |
padbhyAmeva svabhavanamatha prApya kR^ichChrAdanaiShIt
kaMsashchintAkulitahR^idayo jAgradeva triyAmAm || 2\-82||

iti sukumArakR^itau kR^iShNavilAsakAvye dvitIyAssargaH || 2 ||
\medskip\hrule\medskip
    tR^itIyaH sargaH

prAtaH pralambapramukhAnamAtyAn sarvAn samAhUya sa bhojarAjaH |
savibhramapreritadR^iShTidatte sthAne niShaNNAnavadadvinItaH || 3\-01||

sandihya mohAdvasudevavAkyaM mayA pramANIkR^itabhUtavAchA |
hatA nR^ishaMsena sutA bhaginyAstenAvilaM me hR^idayaM yasho.api || 3\-02||

jAtAM punaH kA~nchanakA~nchanAbhAM sutAM gatAyurnnishi hantumaichCham |
utplutya sA vyomni javAdatiShThat shastrotkaTA darshitadivyarUpA || 3\-03||

niyamya sA mAtula ityamarShaM praseduShI mAmavadachcha bAlA |
arirmahIyAnajaniShTa bhUmau tavochitaM samprati chintayeti || 3\-04||

vyAhR^itya mAM dyAM prati devanArIgaNairgatAyAmiti sevitAyAm |
devyAmahaM dushcharitaM svameva smaran vinidro rajanImanaiSham || 3\-05||

yuddheShu devA puruhUtamukhyAH bhagnA mayA sthAtumashaknuvantaH |
ashvAn parityajya vimuchya nAgAn muktvA cha shastrANi disho dravanti || 3\-06||

tadeShu naiko.api bhuvaM gato me shaknoti kartuM pratikUlabhAvam |
mahIyasaH kiM ghaTate parAgaH samIraNasyAbhimukhaM prasaktum || 3\-07||

kimanyadArtAbhyavapattikAmaH sureShu sandarshitapakShapAtaH |
ajAyatorvyAmasurAnnihantuM sa eva manye sarasIruhAkShaH || 3\-08||

sarve vayaM daityakulaprasUtAH kenApi jAtA bhuvi kAraNena |
sa tena sannahyati jetumasmAnukto.ayamarthaH kila nAradena || 3\-09||

atastaduchChedavidhau vinidrAH yatadhvamadyaiva balAnurUpam |
nakhAgralAvyastarura~NkurAtmA parashvadhasyApi tato.atibhUmiH || 3\-10||

yasmin bhavatyAshritavatsalatvaM vipreShu yasyAsti visheShasa~NgaH |
manoharaM yashcha bibharti rUpaM vadhaM sa bAlo.arhati matsakAshAt || 3\-11||

makhAshcha tatprItikR^ito nivAryAH nivAraNIyA shrutiragrimA.api |
tR^iNIkR^itAsheShajanaprabhAvA saMsthauti yA tanmahimAnameva || 3\-12||

gate virAmaM garuDadhvaje.asmin makheShu sarvatra nivAriteShu |
sureShu sarveShvapi durbaleShu haste bhaviShyatyamarAvatI naH || 3\-13||

ityUchuShastasya padopakaNThaM nIrAjayanto makuTaprabhAbhiH |
avAdiShurvikramadarpitAste kR^itATTahAsadhvanikampitAshAH || 3\-14||

kiM chintayA pArthiva bhu~NkShva bhogAnasmAsu jIvatsu kuto ripuste |
kathaM mayUkheShu parisphuratsu sarojabandhostamasAbhibhUtiH || 3\-15||

amAtarishvAnamahavyavAhaM asUryashItAMshumavajrapANim |
anachyuteshAnapitAmahaM cha draShTAsi rAjannachireNa lokam || 3\-16||

ityUchuShastAnuchitopahAraiH sambhAvya kR^ityeShu samAdidesha |
sa devakImAnakadundubhiM cha vimochayAmAsa cha bandhanasthau || 3\-17||

labdhvA nidhAnaM na tathA daridro gatiM samAsAdya tathA na pa~NguH |
tathA na chAndho dR^ishamApya hR^iShyedyathAptaputraH sa jaharSha nandaH || 3\-18||

tapane charamAchalaM prapanne tamasA cha sthagiteShu di~NmukheShu |
yamunAtaTavAsinaM tamUche vasudevaH pratipadya nandagopam || 3\-19||

tapasA tava nandagopa manye phalitaM janmasahasrasa~nchitena |
R^iNamantyamapohituM tvadIyaM yadayaM putranidhiH samAvirAsIt || 3\-20||

iha khelati pUtaneti kR^ityA shishuhatyAniratA puropakaNThe |
tadaharnnishamatra rakShaNIyo nayanAnandakaraH sutastvayA.ayam || 3\-21||

athavA kimivAsyate tvayAsminnijamutsR^ijya padaM puropakaNThe |
savidhe na vasanti buddhimanto phaNino vAyusakhasya bhUpateshcha || 3\-22||

prativedi niviShTapUrNakumbhaM vilasattoraNamujjvalapradIpam |
vraja gokulamAkulaM prajAbhIbhavadIyAgamanapraharShiNIbhiH || 3\-23||

shishurasti mamApi rauhiNeyo bhavadIye viShaye vivardhamAnaH |
sa cha sAdhu nirIkShya rakShitavyo vapuShA kevalamAvayorhi bhedaH || 3\-24||

ityuktvA gatavati devakIsahAye saMtrastaH kathamapi nItarAtrisheShaH |
ArohatyudayamahIdharasya shR^i~NgaM tigmAMshau nijavasatiM prati pratasthe || 3\-25||

sachakitamR^igamaNDalAni kurvan shakaTashatadhvanibhirvanAntarANi |
pramuditamatha gokulaM prapede dishi dishi mArutadhUtaketumAlam || 3\-26||

nijavasatimabhiprapadya tuShTaH kimapi na karma karoti nandagopaH |
navanalinapalAshachArunetraM vadanamaharnnishamAtmajasya pashyan || 3\-27||

mugdhabhAvamadhureNa ra~njayan shaishavena hR^idayaM vrajaukasAm |
gokule sa vijahAra keshavaH kShIravArinidhimapyachintayan || 3\-28||

vadanaM madhusUdanaH karAbhyAM charaNA~NguShThamupAnayat pipAsuH |
galiteva tatassurasravantI nakhamuktAmaNidIdhitichChalena || 3\-29||

amR^itAMshurivAparaH pramodaM nayanAnAM janayan sa padmanAbhaH |
bhavanaM bhavanAt karau karAbhyAM vrajayoShidbhiranIyatA~Nkama~NkAt || 3\-30||

adhaH kadAchichChakaTasya shAyitaH svakAryaparyAkulayA yashodayA |
sa lIlayA pAdasaroruhaM shanairuda~nchayAmAsa sarojalochanaH || 3\-31||

madhubhidashcharaNAmbujatADitaM shakaTamAshu samutthitamambare |
viparivR^itya papAta mahItale paTutaradhvanipUritadi~Nmukham || 3\-32||

shakaTapatanajanma nandamukhyAH stanitamiva dhvanitaM nishamya gopAH |
kimidamiti bhayena tatra jagmustvaritagatichyavamAnakeshabandhAH || 3\-33||

kuchakalashavilagnapANipadmA vigalitabandhamanoj~nakeshapAshA |
sapadi saha sakhIbhiranvadhAvat kalamaNinUpurashi~njitA yashodA || 3\-34||

kR^itasmitaM kvachidaparikShataM sutaM vilokya taM pramuditamAnasA param |
vrajaukasAM savidhanivAsinAM mukhAdvisismiye viditatadIyavikramA || 3\-35||

srutashoNitameva manyamAnA charaNaM tasya nisargapATalaM tat |
udamArjayadaMshukA~nchalena drutamAgatya punaH punaryashodA || 3\-36||

tilakaM madhuvidviSho lalATe rajasA gomayajanmanA vidhAya |
urasA parirabhya nandagopaH suchiraM tasya suma~NgalAni dadhyau || 3\-37||

shakaTaM madhusUdanasya dR^iShTvA charaNoda~nchanavibhrameNa bhagnam |
atha vArinidhervivesha garbhaM svarathasyApi visha~Nkya bha~NgamarkaH || 3\-38||

paritaHsphuratA navena sandhyAmahasA pallavapATalena liptAH |
patitA iva pAvake virejuH kakubho dussahabhAnuviprayogAt || 3\-39||

kShubhitashchiramambarAmburAshiH tapanasyandanavAhanAvagAhAt |
sphuradudbhaTatArakApadeshAt sahasA.a.akIryata phenamaNDalena || 3\-40||

ahimaruchi rasAtalaM praviShTe bhayachakitaH svavinAshamAkalayya |
tata iva tarasotpatannasImA timirabharaH pR^ithivItalaM prapede || 3\-41||

bhUrantarikShaM bhavanAni rathyAH vanAni shailAssaritassamudrAH |
dhvAnte dishAM rundhati chakravAlaM vyaktaM na kenApi kimapyavedi || 3\-42||

atha prayAti prahare yashodA jane cha ki~nchinnibhR^ite sanidre |
putraM payaHpAnagurupramodaM prasvApayantI kalamityagAyat || 3\-43||

kundatviShastAlaphalaprakAshAH tApi~nChavarNAstaruNArkabhAsAH |
prabhUtadugdhA navanItavatyo gAvassahasraM tanaya tvadIyAH || 3\-44||

priyAlakharjUrasamagrasAnuH phalADhyarambhAvanashobhanIyaH |
nanUpabhogAya sutAyamAste govardhano nAma mahIdharaste || 3\-45||

sarasiruhavane gate.api nidrAM kathamiva te nayanAmbuje vinidre |
shrutiparichayashAlino hi karma svajananiShevitameva saMshrayante || 3\-46||

taddhvanishravaNajAtakautukA bAlajIvitavilopavishrutA |
AjagAma gaganena pUtanA yAtanA tanumatIva dehinAm || 3\-47||

sA.avatIrya nabhaso nishAcharI gUDhameva niShasAda kutrachit |
sA cha supta iva vIkShite sute svApamApa sarasIruhekShaNA || 3\-48||

kR^iShNama~Nkamadhiropya nirdayA dAtumArabhata pUtanA stanam |
yatpayodharamukhe mukhArpaNAdAyuShA shishujano viyujyate || 3\-49||

pA~nchajanyamiva pUtanAstanaM pANipallavayugena pIDayan |
Ananena madhushatrurAntarAnAdade sa tu tatassamIraNAn || 3\-50||

viprakIrNakachabAlapallavA bhagnabAhuviTapA nishAcharI |
sA papAta bhuvi ghoraniHsvanA mArutAhatamahIruhopamA || 3\-51||

jhaTiti vyapanItagADhanidro mahatA tena raveNa pUtanAyAH |
pratipattumiyAya tAM pravR^ittiM saha gopAlagaNena nandagopaH || 3\-52||

tasyAshsharIramadhiruhya vichetanAyAH
krIDantamamburuhalochanamIkShamANAH |
tasthussamunmiShitavismayanirvikArAH
nAsAdhiropitakarA~Ngulayo muhUrtam || 3\-53||

nandaH pramR^ijya nayane muhurashrupUrNe
putraM kR^itAntamukhanirgalitaM nidadhyau |
dadhyau cha tasya nitarAmabhivR^iddhikAmaH
tattvaM paraM sa hR^idayena samAhitena || 3\-54||

shyAmalaH kamalapatralochano nIlakuntalabharaH shuchismitaH |
dhyAyato manasi tasya sannidhiM putra eva vidadhe punaH punaH || 3\-55||

na kShamaM bhavati putravAsanAnistaraM hR^idayamachyutasmR^itau |
ityasheShaduritApahAriNIragrajanmabhirakArayat kriyAH || 3\-56||

pUtanAcharitabhAvanAbhavaM dAruNaM hR^idayadAraNaM pituH |
shrIpatiH shamayati sma vaishasaM krIDitairakhilalokamohanaiH || 3\-57||

sa lochane ki~nchidupAntaghUrNite nidhAya mAturvadane shuchismitaH |
payodharaM pANiyugAvalambitaM manashcha tasyA madhusUdanaH papau || 3\-58||

pANijAnuparicha~NkramashramasvedabindumadhuraM mukhaM vahan |
dhUsareNa vapuShA janArdano gokulaM nikhilamanvara~njayat || 3\-59||

paribhramantaM bhuvi pANijAnunA gavAmadhastAtpravishantamekadA |
sutaM yashodA gR^ihakR^ityatatparA babandha pAshena balAdulUkhale || 3\-60||

jano hi yaH karma karoti yAdR^ishaM sa sarvathA tAdR^ishamashnute phalam |
baliH purA.abadhyata yena dAnavaH sa lokanAtho.api tadApa bandhanam || 3\-61||

nikhilabhuvanamuktide murArau bhagavati gADhamulUkhale nibaddhe |
parishithilasamAdhirAvirAsInmanasi mahAmunimaNDalasya hAsaH || 3\-62||

niShIda loleti nibadhya sasmitaM chakAra kAryANi chakoralochanA |
anAdareNa bhramayannulUkhalaM viniryayau vishvapatiH svamandirAt || 3\-63||

upeyivAMsau kakubhadrumAtmatAM mahIyasA nAradashApatejasA |
atiShThatAmadhvani kaiTabhadviShaH kuberaputrau tarasaiva ri~NkhataH || 3\-64||

sa sannikR^iShya sthitayoH parasparaM mahIruhormadhyapathena nissaran |
gatena tiryaktvamulUkhalena tau babha~nja dAmodaragandhavAraNaH || 3\-65||

prapadya divyaM vapurambarasthitau vimuktashApau dhanadAtmajAvubhau |
praNamya bhaktyA puruShaM purAtanaM mudAnvitau jagmaturantikaM pituH || 3\-66||

nandAdayaH sapadi gokulavAsinaste
tadbha~Ngajanma sumahaddhvanitaM nishamya |
abhyetya bhagnapatitau kakubhadrumau tau
tatrAkShataM cha dadR^ishussarasIruhAkSham || 3\-67||

nandaH samIkShya duritAni bahUni sadbhyaH
datvA gavAmayutamAtmasutAbhivR^iddhyai |
sammantrya bandhubhirapAsya padaM tadAshu
vR^indAvanaM prati yayau shakaTairasa~NkhyaiH || 3\-68||

gatvA sa gokulapatirmanaso.anukUle
kUle kalindaduhiturnidadhe padAni |
reme cha tatra puruhUtapadAbhirAme
lIlAyitAni tanayasya nirIkShyamANaH || 3\-69||

dadhinirmathane nirudyamA sA navanItashrapaNe gavAM cha dohe |
sutakelihR^itekShaNA yashodA kShaNakalpAni ninAya vAsarANi || 3\-70||

anuyAti jighR^ikShayeva nande tarasA ri~NkhaNatatparasya viShNoH |
lalitAlakavellitAni rejurmukhamAtreNa muhurnivartitAni || 3\-71||

antarA vihatimadbhirutthitairasphuTAkSharapadAbhiruktibhiH |
bha~Nguraishcha parirambhaNodyamairgokulaM nikhilamanvara~njayat || 3\-72||

pashya mAtulamiti pradarshitaM yAminIShu gagane yashodayA |
AjuhAva lalitena pANinA shItabhAnumaravindalochanaH || 3\-73||

AtmanaH pratikR^itiM vilokayan mAtR^ihastamaNidarpaNodare |
ehi mitra kimiheti kautukAdvyAjahAra shatapatralochanaH || 3\-74||

gauravaM kathamiyaM saheta me medinIti kR^ipayeva chintayan |
mAdhavaH patanabhItimudvahan mandameva nidadhe padAvalim || 3\-75||

devo nishAsu harira~Nkagato jananyAH
shR^iNvan kathA madhumucho mahatA.a.adareNa |
mandaM tadIyakarapallavatADitoruH
suShvApa kuDmalitalochanapuNDarIkaH || 3\-76||

kautukena pituragrato harerdhAvataskhalanamIkShamANayA |
modanighnamanasA salajjayA na sthitaM na chalitaM yashodayA || 3\-77||

mukhaDiNDimavAdinA parIto madhujit kautukinA suhR^idgaNena |
adhiropitavAraNendrabhAvo lalitAbhirgatibhirgR^iheShu reme || 3\-78||

athAbhivR^iddhiM pratipadyamAno dadhyAdiShu prItimuvAha shauriH |
tattat pradAnena vashe vidhAtumArebhire gokulayoShitastam || 3\-79||

kuruShva nR^ittaM navanItamUlyaM kR^iShNeti sAbhyarthanamUchiShINAm |
vrajA~NganAnAM sa purassalIlamuda~nchayAmAsa padAravindam || 3\-80||

tAsAM manaHprItividhAnadakShe tathA kShaNaM tasthuShi shAr~NgapANau |
ekA~NghrisaMsparshaviyogamAtrAdadhanyamAtmAnamamanyatorvI || 3\-81||

uda~nchitaM tasya vilokya pAdaM vedhA punarvikramasha~NkichetAH |
kamaNDaluM pANitalena gR^ihNannabhyudyato.abhUdavanejanAya || 3\-82||

nR^ittAmR^itaM gokulayoShitastat kR^iShNasya netrA~njalibhiH pibantyaH |
prItiprakarShastimitairmanobhirAlekhyayoShitpratimA babhUvuH || 3\-83||

vidurna taddarshanapAravashyAddAtuM karasthaM navanItamekAH |
visrasya bhUmau patitaM tadanyAH na menire pANisaroruhebhyaH || 3\-84||

ajasramevaM bhavaneShu tAsAM babhrAma kR^iShNo navanItabhikShAm |
purA kilAnyairanivartanIyA nivartitA yena harasya bhikShA || 3\-85||

dhigyAchanAM chauryabhavasya bhUyAnastyaMhaso nirharaNAbhyupAyaH |
matveti nUnaM navanItachaurye madhornihantA matimAbabandha || 3\-86||

nirvApya dIpaM mukhamArutena haiya~NgavInaM nishi hartumichChan |
kR^iShNaH kaTIbhUShaNaratnabhAsA vihanyamAno viShasAda bhUyaH || 3\-87||

nipIDayannagrapadena pR^ithvImunnamya dehaM bhR^ishamUrdhvabAhuH |
payoghaTasparshanamashnuvAnastrivikramo.abhUt parihAsapAtram || 3\-88||

niyamitashvasito nibhR^itaiH padairnishi katha~nchana garbhagR^ihaM gataH |
sa tu bhayAdasamAptamanoratho nivavR^ite navanItaharo hariH || 3\-89||

hartuM harervyavasitasya ghane nishIthe
bhUShAravashrutibhayAdvrajato.atimandam |
antargR^ihasya navanItavataH praveshAt
prAgeva hanta pathi sA rajanI vibhAtA || 3\-90||

gopIsamAgamabhiyA cha tR^iShA cha gurvyA
pAtuM vihAtumapi gopagR^iheShvajAnan |
AdvAramAdadhighaTaM cha gatAgatAni
kurvan sarojanayanaH shramameva lebhe || 3\-91||

bhittiShu pratisharIradarshanAt sha~NkitaH sa navanItaniHspR^ihaH |
ki~nchidanyadiva tatra mArgayannirjagAma maNimandirodarAt || 3\-92||

jihIrShurantarbhavaneShu gorasaM dinAnyanaiShIttadupAyachintayA |
sa jAgarUkashcha ninAya yAminIM manoharAbhirharaNapravR^ittibhiH || 3\-93||

dR^iShTe.api tatsavidhasa~ncharaNe sa tatra
vaktuM nimittamuchitaM kR^itanishchayassan |
abhyarNa eva nidadhe dadhibhAjanasya
lIlAyitopakaraNAni nijAni shauriH || 3\-94||

vahan gR^ihIto navanItamachyuto bhayena pAriplavanetrapa~NkajaH |
padA likhan bhUmimavA~Nmukhasthito jahAra cheto.api cha gopayoShitAm || 3\-95||

shape pitR^ibhyAmita UrdhvamevaM nAhaM vidhAsye navanItachauryam |
viniHshvasannityabhidhAya kR^iShNo jahAra mAtushcha pitushcha chetaH || 3\-96||

ehi sadma tanayeti sAdaraM yAchito.api sa muhuryashodayA |
Ananena navanItaganghinA nAjagAma viharannivAchyutaH || 3\-97||

hR^itaM navaM me navanItamAlayAt hR^itaM ghR^itaM me dadhi me hR^itaM nishi |
iti prabhAte vachanAni yoShitAmuvAha shR^iNvan na mukhe sa vikriyAm || 3\-98||

putraM kulasya bhuvanasya cha rakShitAra\-
mabhyarthito.api bhagavAnaravindanAbhaH |
tvAM me dadau vidhivashAdbhuvanaikachora\-
mityAha kopamabhinIya sutaM yashodA || 3\-99||

sa sAntvanena pratipAdanena bhedena tIvreNa cha tarjanena
nibaddhya pR^iShTo.api muhurjananyA nA~NgIkaroti sma hariH svachauryam || 3\-100||

saMrakShaNAya jagatAmavatIrya pR^ithvyAM
gopAlasadmasu haratyakhilaM mukundaH |
itthaM nishamya parihAsavachassurANAm\-
antarjahAsa bhagavAnaravindanAbhaH || 3\-101||

kR^iShNasya kelisamarekShaNakautukena
gopIShu muktabhavanAsu bahiH sthitAsu |
mitraiH parAjita iva drutametya gehaM
baddhvA kavATamaharannavanItamantaH || 3\-102||

tribhuvanamahanIyairabhyupAyairasa~NkhyaiH
nikhilamiti sa muShNan gokulaM nandasUnuH |
aramata savayobhistatra gopAlaputrai\-
rapara iva shashA~NkaH prANinAM prItihetuH || 3\-103||

iti sukumArakR^itau kR^iShNavilAsakAvye tR^itIyaH sargaH || 3 ||
\medskip\hrule\medskip
    chaturthaH sargaH

sa rohiNIsUnunibaddharAgaH satAM sharaNyastamaso.apahartA |
manoharo bAla ivauShadhIsho dine dine poShamiyAya shauriH || 4\-01||

tyaktvA hariH stainyakR^itApavAdaM tachChaishavaM prApya dashAntaraM saH |
manye tadaMhaHparimArjanAya gavAM paritrANasamudyato.abhUt || 4\-02||

putre tathodyogini nandagopo gopAlaputrAnanunIya sarvAn |
trAtustrayANAmapi viShTapAnAM saMrakShaNe tasya samAdidesha || 4\-03||

mAtrA kR^itasvastyayanaH prabhAte pitrA pariShvajya chiraM visR^iShTaH |
sahaiva rAmeNa samagraharShaH viniryayau vishvapatirvanAya || 4\-04||

sa prAtarAshI vyatiShaktapANiryaShTiM vahannaMsaviShaktashR^i~NgaH |
vimuchyatAM gauriti sambhrameNa gachChan pratidvAramavochaduchchaiH || 4\-05||

nishamya tasya dhvanimUrdhvakarNAH vilUnapAshA bhR^ishamutsukinyaH |
vatsAnapi svAnanavekShya gAvaH sasambhramaM niryayurAlayebhyaH || 4\-06||

gatvA purastAdgajarAjagAmI goShThaM gariShTho guNamaNDalena |
ApUrayanmitragaNAgamArthaM pitrorabhIShTena sahaiva shR^i~Ngam || 4\-07||

nabhasspR^ishA karNapathaM gatena tenaiva saMj~nAgavalasvanena |
AdAya tattatparibarhajAtaM sadyo gR^ihebhyaH suhR^ido nirIyuH || 4\-08||

gavAM khuranyAsasamudbhavena viShANasa~NghaTTanajanmanA cha |
prasarpatA dikShu mahAsvanena ghoShaH kShaNaM ghoShamayo babhUva || 4\-09||

pradhAvanairutplutibhissudUraM mitho balAdgrAhavimochanaishcha |
samAgataistatra samaM suhR^idbhirbahuprakAraM vijahAra shauriH || 4\-10||

pareNa harSheNa purANapuMsaH sa~NkrIDamAnasya samaM suhR^idbhiH |
pavitrayAmAsa padAmbujotthitA karIShadhUliH kakubhAM mukhAni || 4\-11||

maharShayastatra mahAnubhAvAH gR^ihItarUpAntaradurnnirUpAH |
bhavAgnisantApahare mamajjuH padotthite tasya parAgapUre || 4\-12||

praharShamAlokayatAM janAnAM krIDAbhirApAdya manoharAbhiH |
utthApayAmAsa sa chItkR^itena goShThe harirgosamajaM shayAnam || 4\-13||

tasmin gavAM pAlanakautukena vanAya nirgaChati daityashatrau |
yayuH priyAkhyAnachikIrShayeva divAkR^ito digvalayaM mayUkhAH || 4\-14||

kUladrumANAM kusumAni dhUnvan karShan payashshIkaramaNDalAni |
kR^iShNaM kR^itAnekavihArakhinnaM yAntaM siSheve yamunAsamIraH || 4\-15||

parasya puMsaH padapa~NkajAbhyAM pravekShyato gokulapAlanAya |
chakAra nIhAraharairmayUkhaiH praveshayogyAni vanAni bhAnuH || 4\-16||

premNA parityaktumashaknuvantaM baddhA~njaliM bandhujanaM nivArya |
rAmaM puraskR^itya samitravargaH vivesha viShNurvipinAntarANi || 4\-17||

araNyabhUmIravagAhamAnaM tamAtapaklAntamavekShamANaH |
pakShAtapatreNa paristR^itena viyatyaseviShTa viha~NgarAjaH || 4\-18||

mA gachCha ga~Nge yamune kva yAsi kiM tatra godAvari dhAvasIti |
nyaShedhi tattadvyapadeshapUrvaM mArgachyutaM gokulamachyutena || 4\-19||

prarUDhasusnigdhatR^iNA~NkurAsu ChAyAdrumashyAmalitAntarAsu |
gavAM kulaM tatsulabhodakAsu prachArayAmAsa vanasthalIShu || 4\-20||

sATopamAndolitalambasAsnAH gAvashcharantyo valamAnavAlAH |
truTyattR^iNastomachaTatkR^itinyaH chakruH priyaM chetasi chakrapANeH || 4\-21||

harinmaNishyAmaruchIni tatra svairaM charantIShu tR^iNAni goShu |
shauriH svayaM bhukta ivApa tR^iptiM tR^ipyantyudArAH paratarpaNena || 4\-22||

sarvAsu kaNDUyanalipsayochchairunnamya kaNThaM dadhatIShu goShu |
bAlo harirbAhusahasrashUnyaM janmAtmano niShphalameva mene || 4\-23||

paribhramadgokulamugrakopaM samuchchaladdhUliraTadviShANam |
sa yuddhamukShNAM madanirbharANAM pravishya madhyaM shamayA~nchakAra || 4\-24||

shAkhAkarAgrairavalambya pR^ithvIM niSheduShaH puShpaphalAvanamrAn |
tatra drumAn sAdaramIkShamANo jagAma tR^iptiM na kadA.api shauriH || 4\-25||

alakShyamUlAnyativiprakarShAd ghoShAnumeyaskhalitodakAni |
uttu~NgarodhastarumaNDalAni nimnAni dR^iShTvA nitarAM sa reme || 4\-26||

atuchChaguchChastanabhAranamrAH latAH pravAlAdharalobhanIyAH |
sa tatra vIkShya bhramarAlakADhyAstAmasmarattAmarasAdhivAsAm || 4\-27||

samutsukaM sAgarakanyakAyAmAkraShTumantaHkaraNaM murAreH |
sarvasya vettA sarasAM sa vAchaM sa~NkarShaNassAdaramityuvAcha || 4\-28||

antassamIrabhramaNaprasa~NgAdudIrNanAdena guhAmukhena |
bhUyaH prayu~Nkte pR^ithivIdharaste govardhanaH svAgatameSha shaure || 4\-29||

nishamya govardhananirjharANAM dhIradhvaniM kR^iShNashikhaNDino.amI |
mudA tvadAlokanajAtayeva nR^ityanti chakrIkR^itabarhabhArAH || 4\-30||

pAdAvimau sa~ncharaNAya nAlamatreti matvA mR^igayUthametat |
svalochanAMshustabakApadeshAnnIlotpalairbhUmimivAstR^iNAti || 4\-31||

vikIrya viShvagvipinadrumANAM madhUni puShpastabakachyutAni |
arkAMshutaptAmanilo dharitrIM sa~nchArayogyAM bhavato vidhatte || 4\-32||

na bhItirantarna dR^ishoshchalatvaM nAsthA tR^iNenotsukatA.api shAbe |
rUpeNa dAmodara mohitAste tiShThantyamI kAShThakR^itA ivaiNAH || 4\-33||

teneti sandarshitamagrajena manoharaM tattadavekShamANaH |
gAshchArayan shAdvalinIShu bhUShu reme ramAyA ramaNaH prakAmam || 4\-34||

taM tatra dR^iShTvA mahanIyarUpaM shauriM shabaryashcharitArthanetrAH |
phalopahArairupasR^itya vanyairavAdiShuH prashrayashobhi vAkyam || 4\-35||

itaH padaM naH sharapAtamAtraM yAyAssahAnena suhR^idgaNena |
atrAgamiShyanti kirAtaputrAH gavAmamUShAM paripAlanAya || 4\-36||

vyAdhAhR^itairvAraNakumbhagarbhAt muktAphalairAmalakAbhirAmaiH |
prasAdhanaM tvAM bhuvanatrayasya prasAdhayiShyanti kirAtakanyAH|| 4\-37||

kanyA.asti kAchichChabareshvarasya yA naH kulAnAmadhidevateva |
tAM sarvathA dAsyati te sa rAjA mahAntyanarghANi cha yautakAni || 4\-38||

ityUchiShINAM shabarA~NganAnAmatyAdaraM chetasi vIkShamANaH |
kR^iShNaH kR^ipAnighnamanAssa vAchamityAha lajjAmR^idunA svanena || 4\-39||

pitroranuj~nAmadhigamya bhadrAH samIhitaM vaH sakalaM vidhAsye |
mayi sthite tiShThati gokulaM tadgachChAmi mA bhUta viShAdavatyaH || 4\-40||

gate pulindIriti sAntvayitvA tadiShTabha~Ngvyathite mukunde |
phalApachAyAdiShu nispR^ihAstAH shanairyayuH pakkaNameva khinnAH || 4\-41||

vihR^itya garbheShu latAgR^ihANAM nipIya vArINi cha palvalAnAm |
phalAni chAsvAdya mahIruhANAM vanAni dhanyAni chakAra shauriH || 4\-42||

athAdhirUDhe gaganasya madhyaM divAkare duHsahabhAnujAle |
gharmAkulaM gokulamIkShamANaH halAyudhaH prAha rathA~NgapANim || 4\-43||

ki~nchitparimlAnalatApravAlastR^iNA~NkurabhrAntakura~NgayUthaH |
ahnaH parityaktajanaprachAraH pravartate madhyama eSha bhAgaH || 4\-44||

kulAni vIkShasva viha~NgamAnAM pakShAntarasthApitashAbakAni |
kaThoramenaM gamayanti kAlaM nIDeShu nidrAlasalochanAni || 4\-45||

prAyaH kaThorAtapapIDayeva ChAyAH parityaktabahirvihArAH |
AlokayAdhvanyajanena sArddhamadhyAsate mUlamanohakAnAm || 4\-46||

karairasahyairayamaMshumAlI tapan mahImugra iva kShitIshaH |
AshaMsitApatprasaraH prajAbhirdhatte dashAmadya vigarhaNIyAm || 4\-47||

vihR^itya kAntAramahIShu vegAdvrajannapaH puShkariNIShu pAtum |
mArge karIndraH karashIkareNa priyAmasAvukShati tApakhinnAm || 4\-48||

taptAni bhAsA tapanasya haMsAH vihAya vArINi nakhaMpachAni |
patreShu vinyasya padAni mandaM padmAkare samprati paryaTanti || 4\-49||

nigUDhamInagrahaNAbhisandhiM kR^iChreNa muktvA kapaTAsikAM svAm |
amI bakoTAstapanAMshutApAttaTIniku~njaM tarasA vishanti || 4\-50||

tadehi yAmastaruShaNDametad gharmAkulaM gokulamAnayAmaH |
atraiva vishramya muhUrtamAtraM bhUyo.api gAvaH pracharantvaraNye || 4\-51||

itIritaM tatsamayAnurUpaM vAkyaM samAkarNya halAyudhasya |
Aryo yathAj~nApayatIti kR^iShNastaM rAmamuktvA taruShaNDamApa || 4\-52||

alabdhamArtANDakarapraveshamArAmakalpaM taruShaNDametya |
AnetukAmaH sa gavAM kulaM tadAsajjayAmAsa mukhena veNum || 4\-53||

salIlamIShatparivR^ittapAdaM savibhramoda~nchitasavyanetram |
kR^iShNasya vaMshArpitapATaloShThaM vIkShya sthitaM vismayamApa lokaH || 4\-54||

tatra sthitaM tAmarasAyatAkShaM tApi~nChavarNaM shikhipi~nChachUDam |
tameva pashyannanimeShatAyAH phalaM prapede surasiddhasa~NghaH || 4\-55||

sthitastribha~NgyA vivareShu veNorvyApArayanna~NgulipallavAni |
jagattrayImohavidhAnadakShamutthApayAmAsa sa nAdamuchchaiH || 4\-56||

athotthitAnandanimIlitAkShyaH vilUnadUrvA~NkuralA~nChitAsyAH |
gAvastadabhyAshamupetya tasthuH nispandadehA nibhR^itaiH shravobhiH || 4\-57||

naisargikaM vairamapatyasa~NgastR^iShNA bubhukShA kusumAyudhashcha |
tadveNunAdashrutitatparANAM nAlaM vidhAtuM vikR^itiM tirashchAm || 4\-58||

tasmin manohAriNi chakrapANervanAntare mUrChati vaMshanAde |
vidhIyamAnaM parihR^itya karma sarve.api satvA likhitA ivAsan || 4\-59||

pravR^ittamAtrau vanapadminIShu dAtuM gR^ihItuM cha mR^iNAlabha~Ngam |
chakrAhvayastadgR^ihamedhinI cha prasArya cha~nchU paramAsiShAtAm || 4\-60||

upAvishannujjhitachApalAni svajAnuvinyastakarAnanAni |
niShpandadR^iShTIni vanadrumANAM shAkhAsu shAkhAmR^igamaNDalAni || 4\-61||

padbhyAmavaShTabhya mahImubhAbhyAM sadyassamuttambhitapUrvakAyaH |
siMhaH karIndrAkramaNe pravR^ittastasthau tathA kR^itrimasiMhakalpaH || 4\-62||

siddhAH kalatrANi latAgR^iheShu samudyatAH pAyayituM madhUni |
karadvayoda~nchitaratnapAtrAH niShedurAlekhyamiva prapannAH || 4\-63||

tadvaMshanAlAchchyutamachyutasya geyAmR^itaM sAdhu niShevya vR^ikShAH |
chiraM jarAjarjaritatvacho.api bAlA ivAsannavapallavADhyAH || 4\-64||

nAdena veNorvivashIkR^itAnAM vidyAdharANAM galitAH karebhyaH |
gatirbhavAsmAkamapIti nUnaM vINA nipeturmadhuvidviSho.agre || 4\-65||

svaveNunAdena sa jIvalokamitthaM parAnandamayaM vidhAya |
prabhurvyaraMsIdamarAshcha sarve suptotthitAnAM sthitiranvabhUvan || 4\-66||

pratyAgate chetasi te viditvA prabhrashya hastAt patitA vipa~nchIH |
punarnna chakruH pratipannalajjAH vidyAdharAstadgrahaNAbhilASham || 4\-67||

madhuvratAnAM dhvanibhirmanoj~nairvAchAlayantI valayaM dishAnAm |
prasUnavR^iShTiH surasiddhamuktA papAta maulau paramasya puMsaH || 4\-68||

avarShi kenAyamadR^iShTapUrvaH prasUnarAshistava mUrdhanIti |
pR^iShTo vihasyAha vibhussahAyAn j~nAnaM bhavadbho.api kathaM mameti || 4\-69||

viShahyatAM yAti vivasvadaMshau vishrAntamutthApya gavAM sa pu~njam |
bhUyastR^iNAshyAmalabhUtaleShu prArabdha sa~nchArayituM vaneShu || 4\-70||

tataH parikShINasahasrabhAnorashAmyadUShmA divasasya tIvraH |
yathA vinAshe dhanasa~nchayasya mahAvalepo dhanino janasya || 4\-71||

prabhAkare pATalabhAsi dUraM dishaM pratIchImavagAhamAne |
Alokya rAmaH pariNAmamahno dAmodaraM sAdaramityuvAcha || 4\-72||

AvirbhavanmandamarutprachArA shAntAtapA nirvR^itasarvasatvA |
virAmavelA divasasya shaure pravartate pashya manobhirAmA || 4\-73||

shirobhirUDhendhanashAkamUlAH svayUthyamuchchaiHsvaramAhvayantaH |
vanecharA vIkShya virAmamahnaH samArabhante sahasaiva gantum || 4\-74||

shataM shataM vyomani baddhamAlAH shAtkAravAchAlavilolapakShAH |
vrajanti lakShmIkR^itavAsavR^ikShAH manojavAH pashya patatriNo.amI || 4\-75||

bhuvaH parAge bahusho luThitvA pravishya nIDaM kalavi~NgayUtham |
dhinotyapatyAni bubhukShitAni grAsena cha~nchUpuTasa~nchitena || 4\-76||

tadehi shaure tapanavyapAyAtprAgeva yAmaH padamasmadIyam |
iyaM kShatiH shvabhrataTena pashchAdduHsa~ncharA lubdhakanirmitena || 4\-77||

shrutveti rAmasya giraM murAriH astvevamityAdarapUrvamuktvA |
saha pratasthe sa cha mitravargaiH prachaNDashR^i~NgadhvanipUritAshaiH || 4\-78||

sahaprayANAya kR^itatvarANAmUdhobharAddUravilambinInAm |
sa tatra tatra pratipAlya tasthau prIto gavAmAgamanaM mukundaH || 4\-79||

samAvR^ito gopajanena nandaH gopA~NganAbhishcha vR^itA yashodA |
atiShThatAmadhvani lochanAbhyAM putrAgatiprekShaNasaspR^ihAbhyAm || 4\-80||

chakAra karNeShu tayoH pramodaM dAmodarApUritashR^i~NganAdaH |
divi prasarpannatha pAMsupUraH netreShu pIyUShamivAbhyavarShat || 4\-81||

tau dhUsarA~Ngau rajasA kumArau gatvA sa nandaH parirabhya gADham |
AtmAnamAnandasamudramagnaM nAlaM samuddhartumabhUnmuhUrtam || 4\-82||

utpatya dhAvadbhirudastashastraiH kShvelAravakShobhitadigvibhAgaiH |
AbhIravIraissa vR^itaH prapede vrajaM samAkarNitatUryaghoSham || 4\-83||

chATUktibhiH pArshvacharAnasheShAn visR^ijya gopAn sahitassa mitraiH |
vivesha kR^iShNo bhavanaM dinAnte samujvalanma~NgaladIpikAbhiH || 4\-84||

kAmaM divA karNapathaM gatena nItAH priyaM veNuraveNa viShNoH |
pratipriyaM chakruramuShya sAyaM gAvaH payodohananiHsvanena || 4\-85||

anudinamiti kurvan pAlanaM gokulasya
kShaNamiva divasAni krIDayA yApayan saH |
akhilamapi dharitrIbhAramabhyuddhariShyan
aramata saha shauristatra sa~NkarShaNena || 4\-86||

iti sukumArakR^itau kR^iShNavilAsakAvye chaturthaH sargaH || 4 ||
##
Encoded and proofread by PSA Easwaran

\medskip\hrule\obeylines

Please send corrections to sanskrit at cheerful dot c om
Last updated \today
https://sanskritdocuments.org

\end{document}