% Text title : shrIshrInivAsaguNAkara % File name : shrInivAsaguNAkara.itx % Category : vishhnu, venkateshwara, stotra, vishnu % Location : doc\_vishhnu % Author : shrIshailastAtayAchArya % Transliterated by : Malleswara Rao Yellapragada malleswararaoy at yahoo.com % Proofread by : Malleswara Rao Yellapragada malleswararaoy at yahoo.com % Source : Venkatesha Kavyakalapa % Latest update : August 28, 2021 % Send corrections to : sanskrit at cheerful dot c om % % This text is prepared by volunteers and is to be used for personal study % and research. The file is not to be copied or reposted for promotion of % any website or individuals or for commercial purpose without permission. % Please help to maintain respect for volunteer spirit. % \documentstyle[11pt,multicol,itrans]{article} #include=ijag.inc #endwordvowel=.h \portraitwide \parindent=100pt \let\usedvng=\Largedvng % for 1 column \pagenumbering{itrans} \def\engtitle#1{\hrule\medskip\centerline{\LARGE #1}} \def\itxtitle#1{\medskip\centerline{\LARGEdvng #1}\medskip\hrule} \def\endtitles{\medskip\obeyspaceslines} %% \begin{document} \engtitle{.. shrInivAsaguNAkaraH ..}## \itxtitle{.. shrInivAsaguNAkaraH ..}##\endtitles ## shrIH atha shrIvaradAchAryavirachitaH shrInivAsaguNakaraH | vAdikaNThIravashrImadvaradAryeNa dhImatA | vyAkhyA shrIvAsakAvyasya likhyate padayojanI || shrIve~NkaTeshvarastotramArabhate\-\- shrIbhR^itsad.hvR^iShagotrashekharamaNe vedapravaktaH shuche lokAsvAdyacharitra sundaratano dhIvAribhiH kShAlite | sasvaitadvaradakShiNA shubhaguNA sAla~N.hkR^itirvisphura\- tsad.hvR^ittA kavitA mayA tava pade dAsena bhAvyA.arpyate || 1|| vANyAsyo.asamadR^ik sahasravadano dyosatpurodhAHsvabhU\- hR^ijjAdAttavaraH purANavarakR^it tatputrakastatsutaH | senesho varabhAShyakR^it tava parA ghaNTA.ahamalpaM paraM yauShmAkInaguNAdikaM kathayituM lakShmIsha shakto na kim || 2|| vyomAbjAyitasImabhUmikamapi shrIbhR^idbhavadvaibhavaM tAvachchitsulabhaM dhR^itAmR^itarasam sa~njIvanaikauShadham | yAvachChakti vadAmi yAmi susukhaM tenaiva kArtsnyena kaH pAnAshakta iti prabhu~nchati payo gA~NgaM satR^iT.hchetanaH || 3|| vANInAthamukhAmararShishaThajidrAmAnujAryAdivA\- gjAle satyapi shabdashakyashubhatAyukte trayIbhAvini | kA~N.hkShethe pitarau mamaiva madhuraM shabdaM yuvAM shrIharI loke.agryAtmajavAk.hchaye sati shishoravyaktashakyaM [bdaM] yathA || 4|| aghaTitaghaTanAyAM tvatsamo.asmi prasiddhA vR^iShadharadhava sA te paNDitaMmanyateddhaH | nutikR^itibharabhArI durghaTaM shAstradR^iShTyA paramiha ghaTayAmi shrIsha shabdArthajAlam || 5|| pUrvaM vyAsamanupravishya mahitAnuchchArya shabdAn svayaM taM pUjAspadamAtanorasupade tvaM chaurya [ra] vat kautukAt | adyainaM samanupravishya kuTilAn shabdAnimAnuchcharan mAM hAsyAspadamAtanoShyapi tathA sheShaH kR^itArtho.asmi hi || 6|| nishAmukhanaTanmahAnaTakirITakoTisphura\- tsudhAnidhigalatsudhAmilitagA~Ngabha~Ngopamam | kavitvamiha me bhuvi tvadanuShaktimadyuktima\- dvidhehi kamalAnidhe yuvanipItabAlAsyavat || 7|| ichChA siddhe na bhajati janiM kintu sAdhye mamedaM chitraM chittaM svasahajatayA sheShatAmeva siddhAm | li~NgadvandvasphuradajaDimatvatsvarUpAbhinutyai vA~nChatyuchchairvR^iShadharashironIlakalpakShamAja || 8|| ramA.api kusumAdhikamradimapANinA sevate pramAdarahitaiva yattava tada~N.hghriyugmaM param | mamApi kaThine hR^idi sthitatayaiva raktIkR^itaM kShamAmiha kuru prabho vR^iShadhareDashakte mayi || 9|| kaThine te mama chitte vR^ittiH shakyA na chechChubhaM kurvetat | kurvanti tathA loke nedaM tyAjyaM vibho kimAyAsena || 10|| viShNo tvatpadabhAktaruvrajamito dhvAntachChalAnniShpiban dhUmAli vibudhavrajaM shuchimukhaM shuddhAH kalAH prApayan | svAH pIyUShamayIrvratAttakrashimAdhikyo vishuddhasphurat\- satsa~Ngo.a~N.hghriruhashriyai charati te shrIsha dvijendrastapaH || 11|| aruNataruNataraNi[kiraNa] vikasajjalavartijalajagarbhAbham | vR^iShagiridhava tava charaNaM sharaNaM karavANyanarghashAtArtham || 12|| ambhassambharitAlavAlabalavadvishvambharArambhava\- drambhAstambhavibha~njakaH karikaraH sheShAdrichUDAmaNe ssAraMsmAramuruprabhaM mradimabhAgUrudvayaM te hviyA sa~NkochaM muhureti kandaramukhaM pItvA viShaM yAtiM cha || 13|| nAbhirnI limanIranimnasarasI yatpadmamAsIttataH tvachCh.hvAsAnilalaulyabhAji yuvayoH pitroH puraH pashyatoH | yatrAnekamukhArbhako madhurasavyAsA~NgibhR^i~NgIchChaTA\- sa~NgItAbdhitara~Ngasa~NgatamanAH prAshnAti DolArasam || 14|| shvAso mandamarunmaNistu mukuro mandasmitaM chandrikA veshmoro vanamAlikA vR^iShadhare~N~NolA tanutviNNadI | madhvAsvAdamadotpatanmadhukarashreNyambubindUtkira dvAryantraM tava nAbhivArijamidaM lIlAbhiklaptyai shriyaH || 15|| kukShisthatrailokyagalokaughavimardaprAptochChUnatvodayabhAjo valayaste | tatsImAkArA valisandhya~nchitarekhAH sheShakShmAkShoNibhR^iddhava lakShmIsha vibhAnti || 16|| kukShinyastajagatrayIjanaghaTAsaMmardajochChUnatAsambhUtA valayashcha sandhaya imAstatsImarekhA iva | saddhIrodarabandhanaM vijayate taddhAraNAdakShatA sandehArachitaM vR^iShAchalashirashchUDAmaNe shrInidhe || 17|| shrIvatsachihnavakShAH shrIvatsalatAtishAyivAtsalyaH | shrIvatsasaktachittaH shrIvastajidAkR^itirharirjIyAt || 18|| taTitpaTukuTIrabhApaTalahemapeTIramA\- ghaTIkuchataTIlasattarapaTIrapa~NkA~Nkitam | namaddhR^idaya pashyatoharataraM tavorassthalaM dhagaddhagitasad.hdR^iShadvR^iShadharesha chitte.astu me || 19|| phullendIvaraguchChasundarashikhA prAntasphuTAbjA tato.adhastAd.hguchChayugA~nchitAgranta vilasanmallyagrasatpallavA | aprAptopamagandhakAntimR^idutAvyomAmbujamlAnatA nyastA champakamAlikorasi vibho kenApi shuddhena te || 20|| ekA tvatpadajA samudramagamatsindhuH parA vArdhijA tvAM sheShadrigR^ihaM shritA chakachakannIrA lasachChaivalA | svabjendIvarasha~NkhachakramithunAvartA sphuratsaikatA smR^ityA.apyarthitajIvanAdiphaladA pApApanodakShamA || 21|| tvad.hdR^ik.hpuShpavadaMshujArdhahasanasvApaM madhudhrAD.hmAsopAnairvalibhissametya shishave nAbhIjuShe chAruje | dAtuM svauShadhikAjyamabjamanishaM haste vahantI bhavad\- vakShasthAbhavarogiNe dishati me kiM nAmR^itaM satkR^ipA || 22|| shrIstvallochanapuShpavatkarachayairardhaprabodhaM madhu\- bhrAjyabjaM tava nAbhipadmashishave valyAkhyasopAnakaiH | gatvA dAtumivauShadhojjvalaghR^itaM sha~NkhaM vahantI bhavad\- vakShassthA bhavarogiNe dishati me kiM nAmR^itaM vatsalA || 23|| pashchAdvAhuyugena padmayugale lakShmyA samIpaM svakaM nIte tAvakamIkShaNaM dinakarashchandrashcha govyApanaiH | ekaM visphuTayan paraM mukulayannityaM sabhR^i~NgasvanaM tasyA vaktraruchiM kalAM kucharuchiM kiM prApayatyachyuta || 24|| cha~nchallokajayechChapa~nchavishikhajyAvAharAvAvalI\- svAdutvApahamAdhurIrasapibadvAchAsudhAshIkaraiH | janyAndhomahatIsamudgatakalAdeshaistvadIshashrutiM mAtassi~nchasi mA kathaM mama kR^ite vIkShyApi me bhaddashAm || 25|| bhogI chandanagandhasa~NgamR^idutAvR^ittAyatatvairbhavad\- bAhushrIjayadIdhIrito vR^iShagiriM matvA jagadrakShaNAt | bAhoH poShyaghanAchcha bhakShitajagatprANaM ghanadveShayuk.h\- svaM nyUnaM tava vIkShya ketanamagAdvalmIkarandhraM bhayAt || 26|| vArAshijAdinijanArIsamUhakuchanIrotthakuD.hmalagaNe tAreT.hkalAnikaramUrIkR^itollasanabhIra~nchitaM kR^itavatI | sphArA~N.hgulivratatisAraprasUnatatirArAddhR^itA~N.hkushadashA krUrAsureT.hkariNi hA rAjate nakharapAramparI tava hare || 27|| anyAvAryAtibhImapratikalarahitApArapApmAsmadIkShA doShArtau puShpavantAvaridarakapaTau tvanmukhenekShaNotkau | ichChantau sAkShitAM svAM maditaraviShayAM pApanutti nu nAttapratyuktI tvatkuto vA paramiha vasataH kiM vR^iShakShmAdharesha || 28|| dharAdharadharAdharaM tava sudhAjharImAdhurI\- nirAkR^itidhurandharaM dR^iDhataraM nipIyAhave | darastava suhR^id.hdviShordhvanimiSheNa hi shrotrayoH sudhAgaralavR^iShTikR^idbhavati puShTinaShTyoH kR^ite || 29|| syAlaM shrIsha dinedine.akShatajaladhyutpattimastopamat\- vadvaktrAbhibhavechChayA.a.agatamatha tvatpannakhena kShatam | hItaM pItakala~NkadurbharagaraM hA kAlachakre vidhuM vinyasya bhramayasyajena vigaraM kartuM ravAttatpituH || 30|| matvA.a.asyAkramaNotkamakShiyugalaM tvachCh.hmashrurekhA natA tanmadhyaM tava chonnatAnunayanekR^itnAsA jagAma shrutiH | svAnulla~NghanadhIH samIpamalikaM bhrUsImalolIkR^ite mUrdhanya~ncha kachaM sa bhAgamaparaM bhItyA kimu shrInidhe || 31|| nyakkR^itakamalollasitaM shrutyantaniShaktamastamithyAdR^iShTik | dR^iShT.hveva bhaktavR^indaM dR^igdvayamAsIttathA vR^iShAdrIsha || 32|| AghrAtuM mukhamIsha kinnu bhavatA kundavrajaH prApitaH kiM kAruNyasudhAbdhiphenapaTalI chittAd.hbahirnirgatA | lagnA tvadvadanendupAnasamaye mAdhuryalobhAdvarAt kiM lakShmIrathavA [radabhA] mukunda kimidaM mandasmitaM te.athavA || 33|| bandhUkAmbujakundachampakasumAnyoShThAkShidantAvalI\- ghrANaM mukhyaruchIhayA samabhavan yugmaM tu sAra~NgayoH | shAkhyantaspR^ihayAlvadabhramahimashrIdR^ik.htvamAshritya kiM tatra shrIpriya sarvagandharasasallabdhyA sadA modate || 34|| ArAdhyArAdhana[ka]parishodhakavedAvalIdhiyai bhavataH | ChandaHpravakturAsye vimale radamAlike bhavataH || 35|| aghaTitaghaTanAlakShyaM vaktrendau shmashrutimirametatte | nAsAchampakanikaTe bhrUbhR^i~NgashreNikeva lakShmIsha || 36|| jitvA prAkR^itasAdhanairjagadatho sAdhyetarAMstairmunIn divye te dhanuShI bhruvau ratiyutastUNyau cha ja~Nghe smaraH | varShbhendIvarajAlama~N.hghrikaradR^igvaktraM cha padmAnyaho yatnaiH prApya chakAra pUruShamaNe tairvallavIstvadviTAH || 37|| sArAchiradyutikanIrAbhirAmataradhArAdharAdhipaghaTA dorAhavaprachayadhIrAnushAsitabhagorAshijAyutatano svArANmukhAgrimukhahIrAliyu~N.hmakuTabhArAjidIpapaTalI nIrAjitA~N.hghriyuga nArAyaNAdyaparamArAdasharma hara me || 38|| vR^indIbhUtatamisrabuddhikalayachchaNDAMshubhAmaNDalI\- sha~NkAma~N.hkurayatsuratnaruchiraM sheShAchalAdhIshvara | baddhaM mUrddhajakuD.hmalaM kabalayannamrAdharAshyAgirat.h\- tvatkAruNyakalAmiva prakaTayatyetat kirITaM tava || 39|| alijaladharabalabhidupalatimiralaghimakalanasabalakabararuchaH | janadR^igaguNaparihR^itimatikR^itaparivR^iti bhavati tava nu suma makuTam || 40|| shrIbhR^idruddhakachaM shramaikaphaladaM kiM te kirITaM mahat chitraM manmakuTaM shirassthamapi me bibhradbharaM bhAsayat | sadgamyaM paramaM padaM tvavati te prAchInamapyuttaraM sarvasmAtparipUrayatyurutarAH svAshA mahadvarNyate || 41|| sAkShiNyAptatamA dayAM tava gatA sarvArthavinmAdhurIyuk shrutyantapadAbhirAmaninadA sarvaistvadIyaissaha | tvadghaNTaiva sahasradhA nikaTabhAgbrUte jagaddhUrvahaM tvad.hbhR^inmanmakuTaprasiddhimadhikAM shrIvallabha shrUyatAm || 42|| sheShatvena nirUpitaM guruvaraistachCheShatAmAshritaiH svAmitvaM nirupAdhikaM bhajadaho nirdoShamatsvatvabhAk | lakShmIbhAgadharIkR^itaM tu bhavatA lokAnukUlaM purA tvAmudvAsya tava prabhutvamakaronno vetsi kiM tatprabho || 43|| gAvo yatra nirUpyamANavilasadrUpAnugachChadhdR^idaH sotkaNThA vicharantyaho sumanasAM padvA.apyajAnAM gavAm | shIrSheShu pratibhAti nirmaladR^ishAm tvadgatyupAyAtmatA yasminneva vibhAti tena sadR^ishaM lakShmIsha kiM vartate || 44|| gehAdermanujAstriviShTapasadasteShAM payojAsanaH teShAM tasya cha ve~NkaTAchalapate shrIshasya te shrIsha pAdadvayam | yattasyApi hi pAdukAmaNimayaM saMrakShakaM puMmaNivyAkIrNaM tadananyarakShakakathaM mAM sarvadA rakShatu || 45|| stotraM gotrApatInAM na kuru mukha mudhA svAya te j~nA yadi syuH no jAnantyuktishaktiM trichaturapadadhIlolavAcho yadi syuH | durvArAkharvagarvAH paribhavachaturAssiddhayo yadyalabhyAH nAtmashlAghAM sahante na tava phalalavastadbhaja shrInivAsam || 46|| no gachCheH kavite sute kShitipatiM tvaM chandanadruM dhane gandhe lolatayA sasaMshayabudhakrUrAhayastatra hi | anyonyaikyagalatkudUShaNaviShAH sAdhvoShadhisparshato.apyegre tvAM bata mArayeyurachirAt tat patripatraM bhaja || 47|| boddhAro.api samiddhamatsaratayA nAddhAvahitthAchaNAH shuddhoktiShvavishuddhabuddhijananashraddhAlutAtyuddhatAH | maddhIkAnapi viddhayanti kavite shraddhatsva teme.addhAvacho.a baddhakShmeshaguNA jagaddhavapade naddhA mamR^iddhA bhava || 48|| vidvad.hdveShabhR^ito mudhApadagaNAH prochchaissvarA nistrapAH sa~Nketena parasparaM svavijaye sAkShitvamapyAshritAH | sad.hbuddhInapi va~nchayanti vibudhAn bhUpAntike nAstikA vidyAvittavighAtukA bhuvi kR^ite lakShmIshamevAshraya || 49|| gaurgAM gavA gave gorgorgavi gauryasya pAti yaH | varAya pIDakAn vyAptAn datte taM shrInidhiM bhaja || 50|| vR^iShAchaleshituH padAshritAH kubhR^inmudA.a.apatat\- phalAdivanmahAphalArthino.apyavAntaraM phalam | akA~NkShitAmapi shriyaM prayAnti sheShavR^ittisatphalA pareritAM mahIM pureva tasya pAdukA || 51|| ArAdvegAdariShTaM bhavati bahutaraM yatpadAbjAnatAnAM savyau bhAgau yadIyau niravadhikaruchI chArubhAbhyAM cha mAbhyAm | vibhrAjatpuShpavadbhAparihasanachaNe yatkarAmbhojahetI shrInAthaH shreyasI so.apratimabalabhavAsa~NgyadhIne karoti || 52|| vanachara rAma puShTavarago druhiNAryatano virachitasUtravedamayakAvyapurANatate | parakhapayodhijIvashubhadeshanivAsarate [para] mayi cha vasasyaho sakR^ipa vatsala mAdhipate || 53|| udyatsUnasamIpabhAk parabhR^itA dR^iShTaM dvitIyakShaNa\- prAptAmArdavamiddhasUnajayakR^iddantAvalIsa~NginaH | lakShmyAsvAdyarasasya nityamR^idutAruNyasya chATIkate sheShAdrIsha tavAdharasya kimu bhAsampallavaM pallavam || 54|| gauryasyAmaravairinAshanapaTustatkarNanAthAchalo dhAmaitannidhibhAnuku~nchidalayuggehAvihArAspadam | vatsaM tatpadavairihetikapaTagrAhichChidAvarNitaH kAmastachChatajittanustaditarA shrIH pAtu devassa naH || 55|| kAmo yasya jagajjanisthitilayavyagrastanustachChato\- tkR^iShTA shrIritarA tato hi hR^idayaM tannityayogojvalam | bhogastatpathadUravartimahimA tadvadvarAdriH padaM nityaM dhAma tadekanamrasulabhaM tadvAnmude so.astu naH || 56|| tvatkai~NkaryArthadivyAmitatanujananIM shrIsha shaktiM na kurvan vittAshAM varghayeshchetsuchiramanusR^itairnaikadeshyairdhanADhyaiH | matparvaNyeva dattaM kimapi parimitaM sAmbu kR^ichChAdgrahItuM bahvIrme pArthivIrvA sapadi disha tanUrvaidhahainye.api mAnyAH || 57|| nAgaM puShkarapuShkarahR^idagataM nakrAsyaruddhA~N.hghrikaM bhrAjatpuShkarapuShkaraM smR^itajaganmUlaM tvarakSho javAt | taM tvAM puShkarapuShkarAyitasamotkR^iShTaM maNIndraprabhA\- sphUrjatpuShkara puShkaraprabhumahAtalpAshraye shrInidhe || 58|| dInaM mAM kamalAsamAshrita nataM trAhIti vAchaM mama shrutvA kiM na karoShi sundara shiraHkampaM samandAsmitam | maddInatvatamashChaTApratibhaTasphUrjatkirITAgraNI\- pratyuptopalaphAlaphalyachapalAmAlAsamudbhAsitam || 59|| chitraM ramAdhava yashomuktA randhrojjhitAstavAnantaiH parigumphitA guNaughaiH sudR^ishAM hR^idaya~NgamA vibhAnti || 60|| anarghyaphaladAyake praNatimAtrasAdhye tvayi sthite.api dhanakA~NkShayA chiramupAsyamAnArthinaH | madAndhatadupekShayA dhanalavaM cha nopashyato\- .apyaho tadupasevinI bhavati dhIrmama shrInidhe || 61|| sechChaM mAmavituM pade tava sukhe vitte cha duHkhAtmake tvaM shAstreNa dR^igAdinA cha suguNaM doShaM cha me darshayan | j~nAtvApyarthiniSheviNe vighaTayan lAbhaM punashchArthabhAk\- kA~NkShasyoddharaNAbhyupAyamadhikaM shrIbhR^idvibhopashyasi || 62|| shastrakShArAgnikarmANyatihitamanasA sUnave tvaM pitevAn\- antre duHkhAni kurvan nR^ipasutarachitAkR^ityadaNDAgurUNi | dattvA hetUn gaterapyavasi hitatamaM tvAmupekShyotkaTAgha\- vyAptyA duHkhaikabhAjo varakR^ipa sumatiM dehi me shrInivAsa || 63|| rUpeNAlalitena mandavibhavairakhairananyasthayA vR^ittyA chAchalatA mayA sakamala tvaM sUtradhAro hare | ramyaprANisubhUmike bahurasaiH pUrNe jagannATake chitraM hAsyarasaM kirasyalaghubhirvedyaM hi sAmAjikaiH || 64|| chittAkarShiguNaM bhuja~NgajayakR^iddoShaM pradAnaspR^ihAd\- InAriprakArAgranartitasuguM bhaktaikasaktAshayam | udvellatkanakAchalAdaramitaM vaikuNThagoShThyaspR^ihAM sarvAshAnilayAtmakaM natanidhe tvattulyamIkShasva mAm || 65|| shrIbhR^itpuNyajanAnnihanti tava gaustAtrekShate me punaH tvaM chejjihmagabhogasa~Ngatirato.ahaM chettapasvI mahAn | avyaktAridaro.asi vedmi na paraM lokaM kutastadbhayaM bhede tvatsadasanmayAtparamasadrUpasya sAmyaM krame || 66|| maddoShavrajamAshrayavyayakaraM lakShmIdhara tvadguNa\- vrAtaM lokahite rataM cha manasA jAnan bhayAbhItibhAk | dAvavyAptamukhadrukoTaragatasvAbhIShTavAtApatad\- varShatsannihitAmbubhR^idgaNashukanyAyena varte hare || 67|| AchakrAma jaganti te padamiti syAtkiMvadantI mR^iShA naivaM chenmitabhAvR^iNotu mama hR^id.hbhUyo.api naiva tyajat | sthAlyandhaHkaNanItito.arthayugatho nishchIyate sA mayA sarve shrIbhR^idavetya shaktimamitAM tvAmAshrayeyustataH || 68|| kulyAyAM sagarAtmajaiH kararuhairutpAditAyAM kvachit setuM ki~nchidakArayo vanacharaiH pUrvaM kilaitatkiyat | uttArAya bhavAmbudherapajane ratnairguNaistairhare setuM me pratipAdya darshayasi chechChakto vinirNAyase || 69|| aprakR^itibaddhamapi supratyayamanavadyamapi lasaddoSham | kamalApriyamapi kupatiM giristhamapi shraye niyantAram || 70|| surAsurAryA~nchitapArshvarAkAvilakShaNendUpamitaM ramesha | ekaikamuktAphalakarNabhUShaM mukhaM muhuste kurute mudaM me || 71|| durvArogramahAghajAlayugasau ki~nchit katha~nchitkvachit kuryAchchechCharaNAgatiM kathamamuM rakShiShya ityAttabhIH | abhyastaM sharaNAgatAvanavachaH kR^itvA.abhrachitraM girau durge shrIsha phaNIshabhR^idviShabhiShagveShI nigUDho.asi kim || 72|| girichChalabileshayapravaramUrdhanailyasphuran\- maNirnarapatanmR^igakrimidR^ishAM cha vIkShyassadA | yadIkShitanataspR^ihaH kR^itavilambano vartase tadA tvanR^itamadgirA samayabhAk tvamevAva mAm || 73|| bhIkarakA~nchanalochanaghUkadivAkaramabhIrumanekam | nAkapashokavimoka shrIkara sUkaravibho naumi tvAm || 74|| dustyajaphalIkaraNa sushrIH kanakAdristhito.api vittArthI | purato nipatitamasharaNamanavathikArtasvaraM tyaja na mAM tvam || 75|| mA te stAdruDadeyatAntasuma mayyarthitvatastajjagat\- saMsargAnnatu matsvabhAvajanitaM nAyAchathAH kiM balim | vittArthI kanakAdribhAgasi tato yAch~nAnivR^ittyujjhitaM lokaM mAM naya vItadehivachanaH syAM ki~Nkaraste sadA || 76|| bhaktaissvArthaparairakAryupakR^itiH kA veti tAn rakShasi tvadvAtsalyadayAkShamAdyupachayavyagraM parArthe ratam | kasmAnnAvasi mAmaghaughanirataM svIyaM prabho shrInidhe ghaNTAkarNamukhAvanAdapi yasho madrakShaNe syAnmahat || 77|| shrInAtha svApahArAnmayi tava ruDabhUddaNDayasyetamasmAt mAM tvatkrUraprakR^ityA svavibhavaparayA preritA dhIrmamettham | chakre nAhaM tadenAM nigalaya tu pade svaM hR^itaM te gR^ihANa tvaM dUre me kuruShva prakR^itimapi punarnApahAraH prasIda || 78|| ratnairitarApramedyapaTutaistrAsAdidoShojjhitaiH shuddhaiH kA~nchanabhUShaNAlimamitAmudbhAsayadbhiH param | tvatsAyujyamupAgataistava vapurhArairjarIjR^ibhyate viShNo tvatpadamaprameyamahima shrInAtha sadbhiryathA || 79|| sa~NkhyAvadbhirapi vyapetagaNanairgandhojjhitairapyalaM sAmodairvigatogratairapi manassambhUtadhikkAribhiH | sheShAdrIDasadR^igbalairapi sadA tvaddarshanaprojjvalaiH sadbhissevitamAdarAttava kadA pashyema pAdadvayam || 80|| hariNA ripukariNAmurukaruNAvitakariNA sharaNAgatikaraNAmarataruNA.a.adimaguruNA | dariNA.ambujasharaNAsharadaruNAmbujahariNA hariNA kR^itabharaNA vayamaruNAlijidariNA || 81|| tulyotkR^iShTabivarjito yadi guNaistvaM chettaNaiH svaM te ta danyairahaM tAdR^iD.hmAnatamA trayI yadi tataH shuddhasya matsa~NgataH | nAvadyaM tava kiM bhavediti purA dR^iShTaM na chenmAdR^ishAH kiM dR^iShTaH kvachanApi tatkuru bhavachChudhyai vidoShaM tu mAm || 82|| vaikuNThe parataiva vaibhavavatI saushIlyamukhyAstvaha\- rdIpAstad.hvR^iShashailabhA~N.hnaramR^igavyomAD.hdrumAdyairapi | sevyo.asyadya bahukShudhastava chirAdete guNAH prasphurad\- darvArAmitapAparAshimamitaM samprApya tuShyantu me || 83|| padadarshakoruyojitahastAbhyAM nijapadAbjanamrANAm | bhavajaladhirUrudaghnaH syAditi sUchayasi nanu vR^iShAdrIsha || 84|| cha~nchaddAramarIchikAviShayadurvIrudgadavyAghrayuk\- kruD.hdAvAvR^itibhImasaMsR^itivanIdagdhAtmasaMjIvanIm | sArAsArabhavatkathArasasudhAM pItAM sadA kurvatAM sheShAdrIsha sudhA sudhA.abdhijanitA sA sharkarA sharkarA || 85|| kAnta tvanmatikAntishAntikaraNaprakAntavikrAntyasad\- bhrAntidhvAntadurantaduShpathagatishrAntipratAntAntaram | shAntasvAntakR^itAchChachintanasudhAsiktatvada~N.hghridvayAH santo mAM viniveshayantu sadamanasi svIye kaTAkSheNa te || 86|| pAThAntaram \-\- enaHkR^intanasantatolbaNabhavad.hvR^ittAntachintAsudhA\- santuShyantamimaM kuru shritanidhe shrakAnta chintApaha || 86|| kiM chAmarANi dhavalAtapavAraNAni siMhAsanAni shayanAni padAsanAni | pItAmbarANi yadi vA.atra yathochitaM te sarvopachArakaraNAni vR^iShAchalesha || 87|| siddhAntArthaviruddhabaddhakuhanAbauddhaprabandhachChaTA\- shraddhAsiddhaduradhvabAdhitabhavannirdhAraNAdhAraNam | mA tvaM mA kuru mAsamAshrita sudhAmAdhuryamAdhuryavAg\- gumbhe tvad.hguNayuk.hprabandhanikare sambandhayAsmanmanaH || 88|| vakSho dakShiNamIkShyate.akShatataTillakShmyA hi lakShmyA jagad\- rakShAdakShakaTAkShayA.akShayabhavatsvAtantryahR^idvIkShayA | mAtrA me satatAshritaM tava tato mA trAsamAtrA.asakR^id\- gADhapremakR^itAgaso.apyatishishoH kShAntyekarakShyasya me || 89|| abhrAmbhojasukhassadaiva nirayavrAte svatantrashcharan prAptaM madgrahaNechChayA sthirasukhaM tvAM matpUre duHkhitam | ruddhaM chAkaravaM parAsti yati te shaktirhare tvatpure nobhUyashchyutide nidhehi sukhade mAM shrInidhe sadvidhe || 90|| rakShatu lakShmIsho mAM rakShitarakSho.anujAdihitapakShaH | kukShisunikShiptajagallakShmaNamunidattalakShmasallakShyaH || 91|| shabdAdidurviShayatApakayugbhave.asmin ghorajvalajjvalanatapta ivAmbarIShe | vrIhi purANamapayaH paTutojjhitaM mAM kAlaM kiyantamabhibhartjayase ramesha || 92|| kechitpuNyadineShvanalpayatanA jihvAgramAtre kShaNaM svAdvalpaM gadakR^ichcha vastu samudo yad.hbhu~njate tatkiyat | pUrNA sarvarasaiH samastagadabhinniryatnalabhyAmitA lakShmInAthakathAsamujjvalasudhA svAdyAstu me sarvadA || 93|| saumyAmekakalAM shuchiM cha dadhataH sarvaj~nashabdaM guDa\- kShmAbhR^ichChabdamivAvamatya nipuNo yatsevayA prAptavAn | nirdoShAH sakalAH kalAH shrayati taM shabdaM yathArthaM namach\- ChIrShAla~NkR^itipAduko.astu satataM devastura~NgAnanaH || 94|| yatpAdAmR^itamAdarAchChirasi yannAmAmR^itaM chAnane vibhratprApa shivatvamindumakuTaH sarvaj~natAM chojjvalAm | dhAtA somakanItavedanikaraH samprApa yasmAttrayIM taM shubhrAMshuvishuddhavAhavadanaM shrIve~NkaTeshaM bhaje || 95|| pUtAstvadvachanAnanAH kShitiruhaH sheShAdrishIrShasthitAn Aruhya kratave tavoDu sumanobud.hdhyA.apachinvantyaho | tad.hbud.hdhyA muhurutsR^ijanti kusumAnyuchchaistvarAshAlinaH pratyUpe.adya bhaja prabodhamamalasphUrte ramAvallabha || 96|| sattejAMsi sumAni nandanavanAdAnIya devAdhipaiH tvatpAdadvitaye.arpitAni sudhiyAM kurvanta lakShmIpate | tvatpUjAparatu~Ngave~NkaTashirorUDhadrumAgrashrita\- prabhrAjatsumabuddhibhAgapachitAnItArpitoDubhramam || 97|| tvatsamprAptavibhUtirakShaNabharaH kAruNyapUrNo yati\- kShmAbhR^ittvatpadayoH prapattimakarotsvIyArthamapyAdarAt | itthaM tadvachane cha darshitamabhUdAryaistato mAmachit\- kalpaM vA.apyava ve~NkaTAdridhava tatsambandhataH shrInidhe || 98|| dainyoktirmama saptapAdavinatirjAtA tavAgre kutaH kAruNyAmbunidhe ramesha viditaM no pUrNakAmAntike | svAntaM tannavanItakomalatamaM heturvidhorAtmabhU\- vahniprojjvalagopikAkuchataTIlagraM vilInaM kShaNAt || 99|| phullAkShidvitayena te mayi kathAH shR^iNvatyamaryAdatAM shrutyAdIni dR^ishorvilokya karaNAnyalpetarAMstvad.hguNAn | shabdAdInavibhAgato.anubhavituM vA~nChanti shaktassamaH tvaM chaivaM kuru mApate vibhajanaM stoke.api dAye.ayudhi || 100|| bhUbhR^idbhidvajramAlyasphuradamararipusvAmivakShobhidaste rekhAmAtreNa namrAH smarayudhi nakharA yeShu sampIDanotkAH | gopIvakShojashaileShvasakR^idakaruNodghaTTanaistaiH kiNatvaM prAptaM gachChenmR^idutvaM hR^idayamiha kathaM shrIsha mayyAkule.api || 101|| la~NkAyAM prApya bandIM svayamamaravadhUrvItabandIrvyadhAH shrIH ArdrAgorAkShasIshcha plavagavarabhayAdadhyarakShaH kR^ipArtA | vandIj~ne karmabandIvikalamanukalaM sAgasaM vA tvada~N.hghrayo lagnaM kasmAnna pAsi khavashavR^iShadhare Damba mAM vatsalA.api || 102|| khadyotabhAvaM bhavadIyatejaH pradyotanAgre tapanassametya | khadyotanAma prayayau trilokIvidyotamAnapratha ve~NkaTesha || 103|| satsa~NghAtamahosahe kuvalayapradveShivR^ittya~nchite nityaM pa~NkajanIShTakAriNi kadAchit prApya vA dakShiNAm | bhUyo.apyuttarayAshayA prachalite prAyo visarpatkare sarvatraiva kaThoragau bhayi kathaM lakShmIsha no tiShThasi || 104|| vaikuNThAdavatIrya chauryaniyataM jAratvamabhyastavAn shrIsha tvaM navanItagopavanitAH stoyAnuShaktIH shrayan | shabdAdau viShaye chirAnmama ruchiM pAtivratIM bibhratIM hR^itvotkAM tvayi chetpare tu puruShe kuryAH kR^itI syAstadA || 105|| sheShAdrau kusumaM bhaveyamapi tadyatsvalpamekaM phalaM nashyaddAgdrumasa~NgataM na janayallUnaM kareNAdarAt | tvadbhaktAya phalAnyadR^iShTavilayAnyachChAnyanekAnyalaM sUte tvatpadagandhakAntimR^idutAshchApnoti sArthodayam || 106|| jetuM tvAM sajaDAntarassaninado megho vR^iShAdriM gato nityashrIyuta sAchiradyutirilAM kurvan sapa~NkAM svataH | pa~NkadhvaMsaka shuddhasevita shuchityakto nabhogassukhin lajjAbhAgashanIddhatApavikaro mu~nchatyaho jIvanam || 107|| samIraNasamIraNashritasudhanyavanyasphurat\- sumaprakaratatparabhramaramaNDalIveShTitam | himAhimabhayAdivAdhavalagADhavastrAvR^itaM vimAnamupamAnavAgrahitamAshritaM tvAshraye || 108|| prayAti mukhatAM vidhau tava kala~NkahAnechChayA bhajAlamabhijidyutaM priyaviyogaduHkhAsaham | chaturyugalamauktikashravaNabhUShaNatvaM tathA nakhapratatitAmapi svayamagAdramAvallabha || 109|| madrakShaikakR^itakShaNena bhavatA dattena chittAdinA sevAyai karaNena sAdhu guruNA govAlasaMChedanam | Chittyai shiShya ivaidhasaH kucharitaM kurve.atidurvAradhIH mAmIdR^igguNamIsha rakShasi kathaM sheShAchalAdhIshvara || 110|| shATIbhAsvatkaTItviT.hphaNipatiphaNitiM chAruTIkAsuku~nchIM yuShmatsarvasvapeTIM ruchiravirachitAM shuddhagorAshiratnaiH | vittAshAyattachitte mayi varadayayA sannidhe tvaM nidhehi tvadvashyo.avashyataHsyAM tadanu tava padaM na tyajeyaM bhajeyam || 111|| prayAti mukhatAM vidhau tava kala~NkahAnechChayA priyAvirahagUDhadhIrbhavaduraHsthitAyA galam | nanAnduriva rAgato.ashliShadanardhyabhAsojjvalA vR^iShakShitibhR^idIshvarAsitakirITa tArAvaliH || 112|| AkheTotkaM vR^iShAdriprabhumatijavana shrIshamAnIya devaM chAra~nchAraM puro me visadR^igupakR^ite krItadAsatvamAptam | mAM tvatpAde.abhirAjad.hguNagaNa vinataM vIshvarAnandayitvA karmAjanyAbhavaspR^igvara bhaja vinatAnandanAkhyAM shubhArthAm || 113|| kAMshcidrakShasi mAM kuto na kamaleNNirhetukAruNyabhAk sechChAste yadi mAM tathA na kurupe kasmAnna yAdR^ichChikam | puNyaM me yadi tatkuto na tanuShe chitkR^ityametattu chet antaH kiM kurupe hyudAssa iha chechChaktaH samo vA na kim || 114|| agre te.api vivAdatatparamamuM kiM pAtayasyugraruT duHkhe tvatpura Akutra purAsthito.asmi sahajaM bhUyo.astu kA me kShatiH | kurve sAdhu vivAdameva yadi vA nitye pade chaidyavat ghaNTAkarNavadapyaye kShipasi chetsyAH sArthakopastadA || 115|| ArAnma~Ngalatu~NgashR^i~NgashashambhR^idgrAvasravadvArnishA\- siddhAsekamahAlavAlatarujairnAnAsphuratsaurabhaiH | vibhrAjanmakarandakaiH sumarutA vikShipyamANaiH sumaiH AkrAntAlayamindirAsahacharaM vande mahAnandadam || 116|| tiShThan ve~NkaTashailamUrdhni purataH kR^itvA pata~NgaM shuchi\- stomena sphuratA.a.avR^ito nanu dharan savye pavitraM kare vArastrIjananR^ittavIkShaNamapi tyaktvA.advitIyo hare gopIjAratayA samAgatamaghaM mArShTuM tapastapyase || 117|| shabdAdipravaNAMstvada~N.hghrijalajAt dvandvaM tR^iNIkurvataH pashyanto manujAn visR^iShTaviShayAHsanto.api lakShmIpate | prApyaprApakashodhakAH parihR^itau bhakterapi protsukAH tattvatpadyugasaddhanaM tR^iNamiva prekShanta ityad.hbhutam || 118|| sheShAdrIshvara mAmakaM dR^iDhapadaM bahvarthasandhAyakaM gojAlaM vrajavAsinAmiva bhavadgItAmR^itAsArataH | vyAvartyAmitaduShTasattvaviShayAt tvatsannidhau chArayan rakSha kShemada ki~nchidAntaradhanaM gopAlaka svIkuru || 119|| AryAnAryAshayAmbhobhavabhavanashirashChedapApogratApa\- vyagrasyograsya bhikShAM pratidishamaTataH pANilagnaM kapAlam | bhrAjattejA vyadhAstvaM sphuTitamaja yadA pArshvaraktaprasR^ityA pAramyaM ramya samyaktava jagadavadatsattadaivAdideva || 120|| tryakShaM rakShakamAhave vivashayan rakShyasya bANasya cha tvatpautrAya nijAtmajAM kalayituM dvau dvau samAshliShya cha | sveshaM kranditumAtmanornanu dashAM tyaktvA.avashiShTAn bhujAn ChitvA rakShakatAM tvadekanilayAM lakShmInivAsAkaroH || 121|| na jAne shrIjAne hitamahitamapyAhitamahA\- vimoho mohodyadviShamaviShayAsaktivivashaH | nihantA.ahantAyA bhavati na viveko bhavati dhIH khapadmaM padmA~N.hghrI kathamiva labheyaM samaguNa || 122|| kadA vA sheShAdrau tulitavirajasvAmisarasI\- jale snAtaH pUto bhuvanabhavana tvadbhavanabhAk | aye lakShmInAthAsuravimathanAsmaddhananidhe prasIdeti kroshannimiShamiva neShyAmi divasAn || 123|| kadA vA pa~NkachChijjanayadamR^itaM nirmalanakha\- shrIyA pa~NkotpannaM viShanilayamabjaM hasadiha | na te rAgaM svIyaM prakaTayadivAlohitatayA ramesha tvatpAdadvitayamaja pashyeyamasakR^it || 124|| kadA vA dAvArchiHparibhavabhavadvaibhavabhava\- chChidambhobhR^iddambhollasanahasanaprojjvalatano | susArAsArAbhAsharaNakaruNAdR^iShTiramitA prasannA.a.asannArtA mayi paripatedve~NkaTapate || 125|| dhArakapoShakabhogyatvatkaH paramo gururdayAlurnaH asmabhyaM tvayi rachitanyAso.ayaM tat sumAva sambandhAt || 126|| anekaiH svai rUpairdharati mama rUpANyanudinaM shramo bhUyAnAsIditi phaNipatestAni kR^ipayA | dadhantIM shrIbhartarnijapR^ithukalakShmImanupamAM shirobAhAmadhye vahasi kimu sheShatvakutukI || 127|| sugandhaparibandhuraM savidhasevinAM sAmyadaM lasadviTapasad.hbhujaM kisalayAbhadantachChadam | adabhramalayaM giriM shritamameyalakShmyA~nchitaM bhavantamabhajanta kiM paTupaTIrabudhdyoragAH || 128|| tvAM valmIkagataM purA.atisurabhe saMveShTayantaH phaNi\- shreShTAH shIrShabhujAvalagnanilayA gandhaikavashyAntarAH | gokShIrachyutavAmalUrukabhayapratyaktavantadbhyaH pare bhAntIme kimu ve~NkaTAchalapate shrIvAsabAhvantaram || 129|| nirhetvapratiShedhamAdR^igavanaM haryAkhuvairyarbhaka\- nyAyAbhyAM na bhavatyathApi shakanAdrudhdvA nipedhdre.api me | ShaT.hpatkITanayena dehi samatAM kaH kiM svatantraM vadet maryAdA kvachidujjhitA jayatu vA nityA vibhUtiH param || 130|| mannindAspR^ihayAlutALuriha nirbIjaM kR^ipAlurbhayA guptaM vA~N.hmanasApadaM cha madaghavrAtaM svayaM kIrtayan | Adatte samudagramuttava cha matpApApanuttishramaM ke ki~nchit ku~nchayati prapa~nchajananoda~nchadviri~ncheDita || 131|| raktA dR^ik svaguNena te hR^idakarodraktaM shriyaH sa~NgateH tvad.hdR^i~N.hnIlatamA tu raktabhakarot hR^itte vichitraM tvidam | svAtantryaM guNamagrahIttava dadau svaM pAratantryaM cha te bhAgyaM me pitaretadatyaghayujo mAtA tvalaM vatsalA || 132|| ramyasyandamarandabindusumanovR^indatvada~N.hghryambuja\- dvandvAskandananandanIyavibhavAH kundendumandasmita | vandAruvrajachandirAnana sudhAnandAshrusandohinaH suspandAH pavanAH tvadadyupavanAd.hbhUpAvanAH vAntviti || 133|| jIvAH pAtrANi mAyA vipulayavanikA sUtrajAlAni karma\- vrAtA mAyAvikArA hyupakaraNapadaM yAnti peTyau paTiShThe | shrIvatsaH kaustubhashvAprakR^itiparavashA vIkShaNotkA naTI shrIH lIlAdIn sUtradhAraH tvamakhilabhuvanaM nATakaste ramesha || 134|| samamasamamanantaM ma~NgalaM ma~NgalAnAm amalamamalabhAsA bhAsayantaM jaganti | hR^idayahR^idayamuShNadyotahR^iShyannashuShya\- tkamalakamalanetraM stotrapAtraM karomi || 135|| prItaH shrIsha vapuHshrameNa sumade bhUra~NgadAse dhana\- chyutyA prItataraH suvarNasumude toNDaprabhau nirvyaye | nAtha prItatamaH kulAlajaraThe mR^itsUnade tatsume prItiste sulabhe mamAdya sulabhaM hR^itpadmama~NgIkuru || 136|| nAyaM shItakaro jagatsu viharattvatkIrtilakShmyAH kare shvetAbjaM na cha lakShma bambharakulaM no kaumudI tArakAH shItatviT.hpaTavAsajAtikusumavrAtAH surastrIkara\- kShiptAstattanusa~NgatAstadanishaM te hi bhramantyambare || 137|| rUpi svaM guNamAdadhAti nikaTe svachChe.anyarUpAspade dR^iShTAntasphaTike japAsumamiha prAptaM vichitraM mahat | shyAmo.apyAtmaguNena kAmamatanoH shyAmAH purA gopikAH raktA nandatapovipAkajanane sheShAchalAdhIshvara || 138|| brahmANDe sarasi sphuToDukumude dyurvAri te meruNA krIDAmaNDapinInachandiramipeNaujoyashassampadau | pashyantIShvamarIShvapakShmachalanAsvArAdvisarpatkare sAnyonyagrahaNaspR^ihe bhramamitaH sheShAdrichUDAmaNe || 138|| netrAruNyamiSheNa ve~NkaTapate yuShmatsvarUpAdike sattvAsattvadR^ishoruparyanusR^ichalitasvoddeshyabhedaM param | bhUShAstratvayutatvadAyudhasamaM prahlAdadaityendrayoH sandR^iShTaM yugapatpradarshayasi kiM sadrAgaruT.htvaM padam || 139|| ramA.aruNapayoruhapratimayatkarairlohitA tvamapyadhavalotpalaprabhavadIkShaNaprekShaNaiH | gato.asyasitatAM dhruvaM tava tadakShiyugmaM sadA mayi prasaratu prabho vR^iShadharAdhradhArAdhara || 140|| dAtR^itvopakR^itipriyoktirahitAnnodyaddayAn prAbhava\- sphItAn darshitadantapa~N.hkti dhaninaH saMsevyamAnAnmayA | manye hR^idyupakArakAn dhanalavAlAbhAkulaM mAM yataH te shrIve~NkaTashailanAtha sadayaM tvAM smArayantya~njasA || 142|| uShNAnuShNasahiShNureva vicharannuShNAMshutejashvayaM bhUShNuM jiShNumajaM cha viShNumasukhaM muShNantamarthisthitam | raitR^iShNAmR^igatR^iShNayA paravasho duShTAdhvaniShNAtadhIH shrIshaM kR^iShNaruchiM vihAya naramAH staumyeSha puShNAtviti || 143|| vR^ittirme na satIti chettava kutaH sarvAnnabhuk sA satI bhillIsheShaphalAda jAranR^ipate dasyo.a~NganAdhvaMsaka | sUte pApamasau mamaiva yadi tatkiM nigrahaste yadi tvadvadvIkShya tadujjhitaH shishumimaM shrIshAva bhAM tAvakam || 144|| svAtantryaprabalAghavIkShaNabhiyA tvajjIvayorvatsalA shrIrAste ruchirorasi pratikalaM svAtantryabha~NgAttataH | vAtsalyAdiguNA jayanti sharaNaM tvaM bhIrna na kliShTatA saukhyaM tUtkaTamitthamapyaruchayo na tvAM bhajante jaDAH || 145|| choraH ko.api vR^iShAchale bata mahAmAyo jarIjR^imbhate ArAdhyaprajavaprasAritaguNAkR^iShTAH pramodA~nchitAH | tatsAtkR^itya samagrava~nchitadhipaH svaM sarvamanyAnapi svaM sarvaM tadadhInameva kurutetyevaM bhaNatyanvaham || 146|| machchakShuHparipeyakaustubhamaNe nAvekShya matpAtakaM rakShAyai hR^idaye niveshitamamuM mAM shobhamAnAjjalim mahyaM darshayase bhayaM mama paraM hartuM kR^ipAmbhonidhe shrIsheShakShitibhR^innivAsa kamalAshuddhAntavakShaHsthala || 147|| svaprANoshchaNDapatroddalitanijapadodyadrajovaibhavena svAkShyAsyabhrAT svanAbhiM shravaNamapi nijaM svaM cha kaM ChAdayAdbhiH | bhrAjatsattvaistamobhAvivaraNapaTubhirjanyasaktaiH svakR^ittaiH bhinnAkSho nasvagIHsthaiH svahR^idayasharaNaM chArugurmAH punAtu || 148|| shrIbhR^inmAmava chakShuShoshcha hR^idaye vinyasya me sarvadA tvAM varte vishayo.asti te yadi parityaktetarapratyayaH | tvatkAruNyadR^igApatattaralasaddhAraikapAtraM tu mAM kR^itvA tatra vilokayojjvalamate mA madhvavAchyAdaraH || 149|| ehyatra manye.adya hariShyase hR^idvR^iShAdrinAthena hR^itaM tadAsIt shabdAdimevaM viShayaM hasadbhirnatirgR^ihItA mama sadbhirastu || 150|| hR^idvo hariShyadhva itIva manye vR^iShAdribhartraiva hR^itaM purA tat iti prakR^iShTAn viShayAn hasadbhirnatirgR^ihItA mama sadbhiratu || 151|| shutyAdyavagatyAhatavR^ittyA jaDamatyA\- .adhR^ityA.adhR^itimatyA paravatyA janatatyA | satyA chidupetyA kShitibhR^ityAparavatyAtatanityA prItyA bhagavatyAvirabhUtyAjyakugatyA || 152|| shrIbhvIT kudhrabhR^idabru~NudbhavashiveT.hChakrAdilekheDyapa chChAr~NgachChinnaripuchChididdhavishikhAchChannachChavidviT.hChirAH | kArtArthyAnvahasaMsphuratsadaghadhakCheShakShitidhrakShayo dadyAtsvastyadarI darIlasadarI nIlassanIlassa naH || 153|| tava mukharuchimAptuM sa~NghashakttyA samAbjo nakhamiShadashavarShmA pAdayoste papAta | atha tada sahamabjaM ChAdayat taM sagandhaM svayamapi bahusa~NkhyaM tatphalArthaM tathAbhUt || 154|| shrayati yasya vadhUrhR^idayaM sadA sa puruShottama ityanishaM hariH | svapuruShottamatAmiva bodhayan hR^idayavAsiramaH sa mude.astu naH || 155|| svAMshaM svAmisarasyapArakusume nR^INAM mude kArtike dvAdashyAM sitapakShake plavamupArUDhaM vR^iShAdrIshvaram | dR^iShTvA devamude viyatsarasi satsUneM.akadambho hariH supremNoDupametya nIlarachitAM nIlaH sa sa~N.hkrIDate || 156|| aghaTitaghaTanApaTutA yadi tava bahulAghamuttamAnandam | shrIbhR^it kuru mAM nityaM seve tvAM bhavati hi svalAbhaste || 157|| tvannAmAni japantaM nityaM rakShasi kathaM na mAM shrIsha | laukikashabdaparo.ahaM kiM te.akhilashabdavAchyatA no vA || 158|| paraM padamayaM svahyato.apyaparameva vA syAnna chet parAparavidAM varA vR^iShagirIsha te sUrayaH | kuto.anyatamavastutAmiha charAchareShvAtmanAm avekShya tadupekShya te nikaTadehalItvaM yayuH || 159|| vaikuNThAdvR^iShashaila eva paramo yasmAttato.atrAgataH tatratyaiH saha modase kamalayA bhAntyatra te sad.hguNAH | dyosanmartyapatatpashukrimidR^ishAM gamyo.atra pUrNainasaH dR^igyogyo.asi mamApi hanta vimukhAH pashyanti te svAmitAm || 160|| nitye dhAmni namAnamakShamapi no sAkShI na li~NgaM kShamaM nityA gIrbahubhiH parairitarathA nItA svayaM darshaya | tanme vishvasimi shrutAH svalu gatAyAtA bhavasthA na chet tanme darshayase na tadvR^iShagiriH shreShThaH paraM shrInidhe || 161|| pUrvaM tvaM nijadhAmanI tulayituM vaikuNThasheShAchalau rodaHpAtragatau vidhAya nitarAmUrdhvodgataM lAghavAt utsR^ijyAdimamantimaM gurutayA.adhaHsthaM shrito.asyAdarAt etad.hj~nApayituM tathaiva jagataH kiM tau nidhatse sadA || 162|| lakShmIlakShma mahaH paraM dadhadidaM haimaM vidoShaprabhaiH sadratnaiH sahitaM tamaHpratibhaTaM dhAmAchalAtmottamam | atyarkAnaladIpramakSharapadaM viShNoriti svachChadhI\- yogI~NgIrviShayaH svamityanudinaM vaktIva vInAM ravaiH || 163|| dhAmnyasmin bahulakShapApi vilad.hbhUbhR^inmahArAjate sraglagrabhramarAlidhIdatanubhAtishyAmahArAja te | prAkAre sphuritairvimAnamaNirAD.hbhAsAmahA rAjate jAlairdhvAntaharaiHkR^itapriyalasatkokImahA rAjate || 164|| tyaktavA svArthagaNaM parArthaghaTakaH satpUruShaH kIrtitaH vAtsalyAdibhavad.hguNAtimahase soDhvApi duHkhavrajam | doShAneva sadA karo.api sukhadaM puNyaM na ki~nchitkvachit tasmAtsatpuruShaM bhavaddhitaparaM lakShmIsha rakShasva mAm || 165|| kasmaichinmahate prasannamanasA bhUpena dattaM varaM grAmaM tasya sutAdayo.apyanadhikA dAsAshcha bhUpAvidaH | loke bhujjata eva tadvadahamapyaj~no.api te.aja tvayA pUrvAchAryavashIkR^itaM tava padaM bhokShye hi taddAsyataH || 166|| shrIsha tvannikaTe purArthitavate mAdR^iksvakIyAvalI\- yuktasvasya shaThadvipe karuNAyA tvaM tatphalaM prAdishaH | bahvekatvanirUpaNotkavachanA shrIsUktirasyAdimA siddhodarkamivaitadIyamavadanmAM kAsti chittA mama || 167|| kUreshaH svapadAshritAya hi chaturgrAmAya labdhainase tvAM tasmin vilasatkrudhaM samuditakShAntiM vidhAya svayam | svasmai dattamadApayatphalamataH shrIsha tvayAryo.api me pUrNAghAya cha dApayiShyati phalaM svIyaM mamatvAshrayaH || 168|| kA karmaj~nAnabhaktiprapadanavirahAt pAtakebhyashcha bhIrme svA~N.hghrau baddhAjjalInAmabhinayati harirjAnudaghnaM bhavAbdhim | uddishyainaM kadAchitkathamapi cha sakR^itkutrachinme.ajjaliH syA\- dAryokto.ashaktibuddherabhimatasukhakR^ichChaktalakShyaM paraM hi || 169|| mando hanta jano.anavadyasukhade sa~NkalpamAtrAdvadhU\- putrAdyaihikalokadAyini harernatyekalabhye sthire | haime dhAmni nadhIH kSharAlpasukhadAlabhyAdhikAnarthada\- strIhemAyatikA~NkShayAtra bahudhA nichatvamApadyate || 170|| utpUlutya tvarayA sushIlakaNo vaikuNThato.amuM shritaH chihaM bhUdharanimnatA kkanu gatA sA te tvarA vashyave | dInasyAtyaghino.agatermama puro na prAdurAsIH kutaH shrIbhR^illokuguNastavApi kimabhUddhImAndyamasyainasA || 171|| bhaktaya~NgaM kimuta prapattimilito hetvantaraM vA phalaM heturnAnyaphalasya kR^itsnamapi no ki~nchittvayaivAjjalim | tvatpAde.arachayaM kathA~nchidava vA mA vA.aghamagnaM tu mAM kurvasyAnamatashchinatsi tu karaM dInaH karomIsha kim || 172|| vilokya mama deshikaM varabhavatpadaikAshrayaM aki~nchanamasadgatiM bahulapApamagnAshayam | tvada~N.hghrisharaNAgatiM kathamapIrayantaM jaDaM na vIkShya mama duShTatAM svakR^itavittvamevAva mAm || 173|| duHkhaM mAM sharaNAgataM bhajati chetkrandAmi taddarshinaH tanna syAdyadi te dayAvirahitaH syAstadbhavet te yadi | nirdoSho na bhaverdvidhA shrutishatotsAdastathAnyashruteH sidhyennaiva kimapyataH paramamuM rakShAkhilAghavrajAt || 174|| vAchAmagocharamanantamananyaniShTaM shrutyAdisiddhamanishaM guNamaNDalaM te | AchChAdyapUrvamidameva mamApi chitraM asyaikadaiva hi viruddhabhayAbhaye staH || 175|| kAmAdidoShanivahaH parivardhate me jAnannadhIrapi sadA rachayAmyaghAni | dussa~Ngatau ruchirato.anushayaH kadApi nodeti hanta kathamIdR^igahaM tareyam || 176|| rAgaM vivardhaya bhavachcharaNAravinde doSheShu yatnamanishaM viphalaM kuruShva | bAlAdyavadyaparihAranayAdayuktaM mA darshayArjaya sadA bhavadIyasa~Ngam || 177|| hAtuM nAtha nabhogatAM vR^iShadharAvAsa tvamAsIddhanaH chihnaM chAmR^itadatvamAshrayavinAbhAvAsahA.agAt taTit | asthairye vimanAshcha mAtvamihate vakShasyalolasthitau lakShmyAM shrIshchapaleti lokavachanaM vidyunmayatvArthakam || 178|| kAMshchidrakShasi mAM kuto na bahunA pApena chettatkR^itaM mandaM mAmanivArayan mayi vasan dakShaH kilAkArayaH | kUpAntarnipatantamarbhakamalaM pashyantyupekShAparA mAtA.apAtayadeva tattvaduditaM pApaM nivartyAva mAm || 179|| antaHstho jagatAM janisthitilayAn kurvanniyantA svarAT duShTaghne jananAdibhAk svamanasA shratyAdimAno.apyaham | na tvaM sAkShyavadaH pramANamashubhaM vAchA kimevaMvidhaH tvaM chenmAmava pAtakAdakapaTaM tvAM nishchinomIdR^isham || 180|| kurve duHkhakarANyaghAni manasA kasmAdahaM vAsanA\- mohAdyairiti chedamUni kimu te vashyAnyavashyAni vA | Adye taistvamakArayaH svakaraNairvashyo na daNDyo.asmyahaM pitrAj~nArachitasvamAtR^inidhanaH kiM jAmadagnyo.aghabhAk || 181|| antye yadyalayAni tAni na sukhaM syAtkasyachitkiM tvayA shrIyante yadi jAtuchitkathamapi shrInAtha kiM vA tvayA tvattashchettadavArakaH shakanavAnnAkArayo.aghaM kutaH machchetki~nchidapekShase na hi bhaveH pUrNastato rakSha mAm || 182|| nirbIjaM mama rakShaNe nikhilachinmuktiprasa~Ngo yadi syAnnau kA kShatirakSharaM tava padaM vardheta hIda~NkShayAt | loko.ayaM sakalaH sukhaikanilayaH syAdvA janAyaM vinA lIlA te na ghaTeta chettava kR^ite duHkhapradastvaM bhaveH || 183|| svAj~nAbhedanijasvahR^ityapadavIchArasthiraM prAyasho daNDairapyanivR^ittameva nidhanAnarhaM svakIyaM prabhuH | svechChAchAranirodhake dR^iDhatare dhAmni svake pAtaya\- tyevambhUtamamuM ramAdhava kuto mA pAtayasyakShare || 184|| bAlaM karmapitApyakAryashatakaM kR^itvApyadoSho.avati tvaM tAto.anupadhiH svarADasharaNaM dInaM jaDaM mAmamum | maryAdAmanavapramANagaditAmutsR^ijya vA pAsi chet kA te hAniranIdR^isheShu bhavatAt sA sarvavichChInidhe || 185|| maryAdAmavadhIrya chakramadharo viprAtmajAnakSharaM dhAmAropya punardvijAya samadAstasmAtsamAnIya tAn | ghaNTAkarNamukhadviShaH samanayo muktiM parAM shrInidhe santyanyAni nidarshanAni cha shataM mayyeva sA pAlyate || 186|| chetovAktanukarmabhiH kSharatamaiH kAlAntare kAryakR^it kalpyaM kartR^igataM svatastvakushalaM ki~nchid gataM lAghavAt | vidvatkArakadharmatAM tadiha te kopo hi madgocharaH pApaM me tvadanugrahe.atra parame kutraiSha tiShTheddhare || 187|| kasmAnnAvasi mAM hare mayi guNo nAstIti chet kiM tvayA doShe satyavituM yathA na nipuNo naivaM guNe shikShitum | rakShArakShaNayorguNAguNagatA syAddakShatA tadbhava\- nnAthatvAya sadoShamastaguNamapyetaM prabho rakSha mAm || 188|| vIkShya shrIT prabhutAM bhayAttava mude bhrAntyA nu mugdhaM janaH tvAmAhAkhilavedinaM svamavati svArthArthameva svavAn | svasya svAnavane kShatiH svamavituM svaM naiva dakShaM tviti tvaM no vetsyatha vetsi chetkathamamuM svAminna mAM rakShasi || 189|| nAmbAmambeti tAtetyapitaramapi kiM vakShyasisho.api yAchnAM dautyaM vA sArathitvaM giridhR^itimavaneruddhR^itiM vA vanAnte | sa~nchAraM daityarakShobahuvidhanidhanaM dAvapAnaM dayAlo madrakShArthaM [kariShyasyajita bata kuto mugdhavattiShTasi tvam] || 190|| || iti shlokAnimAn sapta shrInivAsaguNAkare || || shrIshailastAtayAchAryo vyAkhyayA samayojayat || || iti shrInivAsaguNAkaraH || || yAvadupalabdhaH || ## From a telugu book veNkaTeshakAvyakalApa Encoded and proofread by Malleswara Rao Yellapragada malleswararaoy at yahoo.com \medskip\hrule\obeylines Please send corrections to sanskrit at cheerful dot c om Last updated \today https://sanskritdocuments.org \end{document}