% Text title : shrIshrInivAsastava % File name : shrInivAsastava.itx % Category : vishhnu, venkateshwara, stotra, vishnu % Location : doc\_vishhnu % Author : shrIshailastAtayAchArya % Transliterated by : Malleswara Rao Yellapragada malleswararaoy at yahoo.com % Proofread by : Malleswara Rao Yellapragada malleswararaoy at yahoo.com % Source : Venkatesha Kavyakalapa % Latest update : August 28, 2021 % Send corrections to : sanskrit at cheerful dot c om % % This text is prepared by volunteers and is to be used for personal study % and research. The file is not to be copied or reposted for promotion of % any website or individuals or for commercial purpose without permission. % Please help to maintain respect for volunteer spirit. % \documentstyle[11pt,multicol,itrans]{article} #include=ijag.inc #endwordvowel=.h \portraitwide \parindent=100pt \let\usedvng=\Largedvng % for 1 column \pagenumbering{itrans} \def\engtitle#1{\hrule\medskip\centerline{\LARGE #1}} \def\itxtitle#1{\medskip\centerline{\LARGEdvng #1}\medskip\hrule} \def\endtitles{\medskip\obeyspaceslines} %% \begin{document} \engtitle{.. shrIshrInivAsastavaH ..}## \itxtitle{.. shrIshrInivAsastavaH ..}##\endtitles ## shrI shrInivAsaparabrahmaNe namaH Atreya shrIve~NgaTAdhvariNaH kR^itau shravaNAnande prathamashatakam AchakrAyudhamA cha mAmakagurorAchAryavargaM bhaje yasyAntarnigamAntadeshikayatishreShThau muniryAmunaH | rAmastAmarasekShaNaH sa cha munirnAthaH shaThArAtiri\- tyantassantamasachChidaH shrutidR^ishAmagresarA jAgrati || shrIH || yA kalyANanidhirvrajanti sharaNaM yAmeva dhImedurA yakSheshanti yayekShitA bhuvi janA yasyai haristiShThate | yasyA jAtamidaM vadanti bhuvanaM yasyAH sadasyAH surA yasyAmAyatate shivaM bhagavastAmindirAM chintaye || 2|| mAkAnekahagarvacharvaNachaNaira shrAntavishrANanai\- rmAnAkA~N.hkShitasaMvidhAnanipuNe nArAyaNe jAgrati | kaShTaM kaShThamupetya duShTanR^ipatidvArakShamA rakSha mA\- mityAkrandakR^itAM vR^ithaiva divasAnyetAni yAtAni naH || 3|| tUrNaM durnarapAlavarNanamahAdurnATakopakramaM doShaM sheShayituM vR^iShAchalapate toShaM cha netuM sataH | atrAmutra cha labdhumagryasumanolabhyAni bhAgyAnyamI padmAkAnta tava stave bhavadavairArtAH pravartAmahe || 4|| vAchA vA~nChati yattava stavamiha prahvApi jihvA chirA\- dArAdhyAmi bhavantamityapadishaMstenAparAdhyAmi te | yadvA.asAvatibAlavAgiti kR^ipAvyAjAya te jAyate sandatte shishukaiH shukaishcha kalito varNo.api karNotsavam || 5|| mAlImasyamavApitA ghanatamaHprAyairmurAre chirA\- di~NgAlairiva ja~NgamAdhamaguNAbhAsairiyaM bhAratI | tattAdR^igbhirasha~NkarashiraHkampasya sampAdakai\- rgambhIrairavadAyate tava guNairgA~Ngaistara~Ngairiva || 6|| jambhAlambhanachittakampanamahAkumbhAbhavakShojabhR^i\- drambhAdyAmarashambhalIdR^iDharIrambhAdikaM bhAvukam | shampAlolamavekShya muhyatu janaH kiM pAmareNAmunA tvaM pAdAmbujachumbanaM bhagavataH sampAdayethA manaH || 7|| vedairvaktumajAdayo guNagaNAn vishvesha te neshate stotuM tAn mitayA girA vyavasito hAsyAya hA syAdayam | sindhuM rAghavasetunA.api tarituM taM sarvato dushshakaM ko vA la~NghayituM vyavasyati kushastambena kumbhena vA || 8|| mugdhe vANi nR^iNAM guNAH katipaye mithyA nibaddhA iti protsiktA bhagavadguNAnukathanArambhAya kiM jR^imbhase | AkR^iShTAH katichid vaneShu hariNA ityAjihArShAmaho lubdho labdhamado vidhAsyati vidhora~Nke kura~Nge.api kaH || 9|| tvatkalyANaguNAmR^itArNavasudhAlesho.api lIDho bhavaM hantIti stavavistareShvapaTutA nAtIva doShAya naH | ApAtAplava eva jahnuduhitaryahnAya shudhdyai bhavet tasyA netaragAdhavAriShu talasparsho.api nApekShitaH || 10|| sandarbhe mama mA.astu sundaratayA santoShasAndro budhaH kintu tvadguNaleshapeshalatayA santuShyatu shrIpate | rAjAno maNipeTikAmavahitA rakShanti yat tatra no peTIsauShThavameva heturapi tu khyAtaM maNergauravam || 11|| nAdyaM bhUtamaho vahAmi shirasA tvatpAdajAtaM na cha dvaitIyIkamatha tvadIkShaNabhuvaH shaure tR^itIyasya vA | ante nAvasamapyavApya jananaM turyAnna vA pa~nchame ki~nchAhaM charatAM gurustadapi te stotre pravarte katham || 12|| o~NkArasya rahasyamityaja iti brahmeti sarvAtmanA\- mAtmeti prakR^iteH paraH puruSha ityAdyaH svayambhUriti | vedAntairavabodhitAya bhagavan vishvaikajIvAtave bodhAnandamayAya sindhuduhiturnAthAya tubhyaM namaH || 13|| yashchakShurjagatAM tadeva nigamAstva~nchakShurAchakShate lakShmInAtha tathApi dR^ishyamitarAdR^ishyaH svayaM pashyasi | apyetachChatamanyupAvakajanisthAnaM sadA naH puna\- rvaktraM deva tava prasAdashishiraM harShaM dR^ishorvarShati || 14|| tattAdR^ikkaruNArasairaviralaistvanmAnasaM shItalaM tApAnAM tritayaM harediti hare dhairyaM mamoda~nchati | tajjanmA vivR^iNoti shItakiraNastachChaityamatyujjvalaM li~NgaM kAryaguNaM hi kAraNaguNe shaMsanti nissaMshayam || 15|| nityAya svatanusthavAridhivarApatyAya mR^ityu~njaya\- stutyAya kShapitapraNamrajanadaurgatyAya satyAtmane | ichChAnirmitavishvajanyavanasaMhArAya nishshreyasa\- dvArAya sthirasampade nama idaM nArAyaNAyAstu te || 16|| dInAnAM suradhenave tanubhR^itAmantastamobhAnave mAyAtUlakR^ishAnave kalayate mAnakShatiM dAnave | nirdhUtAkhilakarmaNe vinamatAM nityendirAnarmaNe tubhyaM nirmaladharmaNe nama idaM kurmaH parabrahmaNe || 17|| pAdAmbhojamahaM bhajAmi bhavato vedA~nchalaira~nchitaM prakhyAtAt kila pannagAchalapate yasya prabhAvAdasau | siddhA mUrdhni phanIshvarasya pR^ithivIM sharvasya chApo mune\- ragnishchAkShapadastrivarNajanuShAM shushrUShakAptistathA || 18|| mUrtInAM tisR^iNAM parA tu katametyabjAkSha saMsherate bhrAntiM yAnti cha devatAntaraparairye vA~N.hmayaistAmasaiH | yaH pAdAmbu dadAti yastadupasa~NgR^ihNAti gR^ihNAti vA yashchaitachChirasaiva teShu paramaH ko veti pR^ichChAmi tAn || 19|| parya~Nkastava pa~NkajjAkSha girijAprANeshiturbhUShaNaM chAru tvachcharaNAravindasalilaM chUDApade mAlikA | mantro nityajapochito nanu bhavannAmaiva tadyoShitaH pAramye bhavato mukunda bhuvi kaH sandegdhi mandetaraH || 20|| nAlIke jananaM sthitiM cha bhajato nArAyaNa brahmaNaH sthAne.abhUd raja eva kAraNaguNaH kArye hi sUte guNam | IshAne punarandhakAripadabhAjyarhaM tamastat kila shrIvAse tvayi sArasatvavibhavaH sa~njAghaTIti sphuTam || 21|| nAgendrAdrivihAra sArasavanastomaprakAshAvahA dhIrodArapadakramA matimatAdhyeyA suvarNAkR^itiH | puShyantI nijamaulinA sumanaso jyotiShmada~NgojjvalA trayyeShA surapUjya rajyatitarAM tvayyeva lakShmIriva || 22|| nitpApAkR^itamIrniratyayashubhAdhArairvR^ito bAndhavaiH prauDhAbhasthiradhIrasannabhavanasthAyI vyathAbhArahR^it | sadgoShThIShu sadA vibhAnamadhikaM prAptaH shritastvAM hare tattulyastvadanAshritashcha bhagavannantye bha~NgaM viduH || 23|| shreyastoyadasampradAyarasikachChAyaH sahAyaH shriya\- shchintAratnasapatnavIkShitalavashchekrIyatAmanvaham | yo vishvena cha gAtravAn himaruchA.apyuShNAMshunA netravAn sugrIveNa cha mitravAn kushalavabrahmAdibhiH putravAn || 24|| pUrvaM tvatpadapAMsunA baliripo pUtA jaladhyadganA puMsaH sA.api surApagA vitanute pUtAn surApAnapi | patnI yogivarasya sA surapagA prAptA vishuddhiM parAM tenetyatra na vismayaH sa mama kiM pApaM na lopaM nayet || 25|| mAmArAdhya duratyayaM svayamamI mAyApayodhiM tara\- ntvityAlochya sahendriyairiha vapustvaM chetanebhyo.adishaH | teShveke tata eva duShkR^itashataM sa~nchinvate shrIpate k.hlR^ipte tApashamAya vindati sarasyandhastu pAtavyathAm || 26|| govindeti kR^ipAkareti kamalAkAnteti kR^iShNeti vA kAkutstheti raghUdvaheti jaladashyAmeti rAmeti vA | vaikuNThetyatichaNDakaNTakavanIdAveti deveti vA sheShAdrIsha tavaiva nAma kathayan shreyo na vindeta kaH || 27|| kalyANaikaniketanaM tadanaghaM kAlAmbudashyAmalaM chitte nR^ityatu sheShabhUdharashiroratnaM chiratnaM mahaH | yasyorasyanishaM sutA jalanidheryasyAsti tanmekhalA pArshve yasya pade cha tatpriyatamA yat tatra shete svayam || 28|| durAdeva nirasya duShTanR^ipatidvArAgranityasthitiM tArAvallabhadurlabhaprabhamukhaM dhArAdharashyAmalam | pArAvArasutAsakhaM sumanasAmArAdhayAmaH prabhuM ghorApArasamastaduShkR^itaparIhArAya nArAyaNam || 29|| kIrtiM nashchiravartinIM kShititale puShNAtu kR^iShNAmbudaH kashchit tApaharo gR^ihItakamalaH kallolinIvallabhAt | dhinvan jIvanadAnato jagadidaM tanvannadInAM shriyaM prAptaH sAdhukadambajR^imbhaNakaraH shrIve~NkaTakShmAdharam || 30|| AstAmaShTanavairdinairapayatI prAstAparvargaspR^ihA vR^iShNontaHpurakeLitANDavavidhau tR^iShNA kaduShNA~nchitA | dIkShAmAshritarakShaNe kR^itavato mokShAya lakShmIpateH sAkShadeva padAravindaviShayAM prekShAmapekShAmahe || 31|| kalyANAni chiraM tara~Ngagayatu naH kAruNyakallolinI\- kAntassvAntacharassatAM saphalayan kAkodarendrAchalam | AmodAdamR^itaM dadAti vibudhavrAtAya jAtAdaro gAmbhIryaikanidhirghanairabhigato yo jIvanaprepsubhiH || 32|| puNyAraNyamahIruhairavirale puShpAsavaishshItale nAnAdigjanasevyamAna shikhare nAgAdhipakShmAdhare | AvirbhUtamupAsitaM munijanairaprAkR^itaM daivataM padmAkAntabhujAntaraM shubhaparIpAkAdvilokAmahe || 33|| a~NghriM jighrati ve~NkaTAchalapaterAruhya chorudvayI\- madhyAste rashanAmathATati kaTomAsevate nandakam | vakShasthAM shrayate shriyaM viharate sha~Nkhe rathA~Nge cha dhI\- rAlIDhe mukhachandramaNDalasudhAM koTIramATIkate || 34|| dhyAtaM yogakalAvilAsarasikaishshItaM dayAsrotasA khyAtaM mauLiShu kR^itrimetaragirAM krItaM shriyA vibhramaiH | vetaNDendravipadvimochanachaNaM vAtandhayakShmAdhare jAtaM dhAma nirAmayaM prashamayatvA ta~NkajAtaM mama || 35|| hemATopaviDambigAtrasuShamAM vAmAlakAM kAmapi premAveshavashena vakShasi vahanvaimAnikendrA~nchitaH | kShemANi svayamAtanotu jagatAM kAmAbhirAmAkR^itiM\- rbhUmA ko.api bhuja~NgabhUdharashirassImAtamAlopamaH || 36|| prAtarnAtanavaM tavAbhigamanaM pashchAttvadarchAkShamaM dravyaM nArjayamAcharaM na cha tataH prAjyAM tvadijyAmaShi | svAdhyAyaM na cha harShahetumajapaM nAdhyAyama~N.hghrI cha te tanme janma vipashchito.api viphalaM shaure tirashchAmiva || 37|| bhogIshAnamahIdharendramakuTIpATIravATIchara\- dbhillotphullasarojapatranayanAnetraikapAtrAyitaH | nAbhIpadmanivAsidhAtR^ivadanaprodyajjaradbhAratI\- gAnAkarNanahR^iShTakarNayugaLaH pAyAdapUrvaH prabhuH || 38|| nAbhereva babhUva yasya gaganaM netrAdasau tanmaNiH chittAttatparipanthi dhAma shishiraM tachChekharaH phAlataH | prANAttatkaraka~NkaNAshanamadomitraM cha vakrAdayaM sheShAdrAvavalokito harirurobhUShAyitAntaHpuraH || 39|| shaure vAhanayA~nchakartha shakuniM muktvA gajAshchAdikAn sarpe saMvishase kathaM maNimaye talpe.apyanalpe sati | vistIrNAlayahInavat subahuShu sthAneShu satsvapyaho putraM nAbhibile nyadhAH kathamimAM patnIM cha vakShasthale || 40|| aviratamadhupAnakShubhyadakShibhruvANA\- mavanibhR^idadhamAnAmAsyamAtmambharINAm | paruShatamamapAsya pratyahaM nityaharSha\- pradamidamavaloke padmanAbhA~N.hghripadmam || 41|| sakalakushaladAyI sarvadevAtishAyI prabaladuritalAvI bhaktachittAnusevI | bhavagahanavidArI pArijAtApahArI phaNipatigirivAsI pAdu padmAvilAsI || 42|| urutaraduritaighadhvaMsadakShaiH kaTAkShaiH upachitakamalAnAmutpalashyAmalAnAm | phaNigirinilayAnAM bhaktadattAbhayAnAM dR^iDhamatirahamadya stomamabhyemi bhAsAm || 43|| prabaladanujapALIprANasaMhArakeLI\- paTimaghaTitakIrtirbhAsvadAnandamUrtiH | phaNigirigR^ihamedhI bhaktabAdhAnirodhI bhavatu hR^idi mamAyaM prAstuvannAgamA yam || 44|| kamalavimalashobhAvibhramAdabhramAn\- kShapaNanipuNavaktraH kauNapAnAmamitraH | urasi sarasijAkShImudvahanvidvadADhyaM\- karaNacharaNareNuH ko.api pAyAdapAyAt || 45|| vividhanigamasAre vishvarakShaikadhIre vR^iShashikharivihAre vakShasA.a.ashliShTadAre | bhagavati yaduvIre bhaktabuddheradUre bhavatu chiramudAre bhAvanA nirvikAre || 46|| anishamurubhiratrAmutra cha kleshamUlaiH kimudarabhR^itikAryairAprayANAdavAryaiH | sukhamanaghamavAptuM so.ahamambhodabhAsaM phaNipatigirivAsaM bhAvaye shrInivAsam || 47|| pratikaTakamaTitvA pArthivAgre naTitvA paTuchaTushatamuktvA pAtakAnyeva kR^itvA | kimiha phalamavAptaM kevalaM kaiTabhAreH smara charaNasaroje santarAmyantarAtman || 48|| vashayati hR^idayaM me varShati shrIsha harShaM janayati parishuddhiM jAyate ma~NgaLAya | damayati paritApaM deva nirhanti pApaM daramapi vidhunIte darshanaM tAvakInam || 49|| kabalitaghanavargaH kAntibhiH peshalAbhiH kamalavananivAsAkAntabAhAntarAlaH | puruSha iha rathA~NgI pUrNimAchandrabimba\- pratibhaTavadanashrIH prAtarAbhAtu chitte || 50|| suratarurivodAro dAropashobhibhujAntaraH madhurakaruNAloko lokoparakShaNadIkShitaH | akhilasumanaHkoTIkoTIrachumbipadAmbujaH phaNidharaNibhR^inmallo mallochanAbharaNAyate || 51|| tamupaniShadAM sAraM sAra~NgalA~nChanalochanaM prakaTitakR^ipAsAraM sArambhamAshritapAlane | layamiha ruShA vAraM vAraM nayantamamuM dviShAM vR^iShagiripatiM vAraM vAraM shubhAya vichintaye || 52|| munibhiranishaM dhyeyA geyA surapramadAjanaiH valabhidupalachChAyAdAyAdadIptilasattanuH | urasi viharajjAyA kAyAdhavAbhayadAyinI vihitaduritApAyA pAyAdvR^iShAchaladevatA || 53|| duritabharite durdehe.asmin durAmayadUShite mama navanavastarShotkarSho bhavatyanivAritaH | amumapanayannambhojashrIkadambaviDambake tava hR^itanamatkhede pAde ruchiM rachayeshitaH || 54|| abhigatimukhairasyAmi shrInivAsa na vAsarAn prashamitabhavodvegairyogairnayAmi na yAminIH | na cha virachaye nAtha truThyattamAMsi namAMsi te tadapi bhavatA hA me muktispR^ihA.api na hApitA || 55|| duratyayarujAture duritadhUsare nashvare hare bata kalevare matihare kR^itaghnodare | spR^ihAmiha vihAya te smarati mAnasaM me yathA tathA kuru sudhAbdhijAsakha dayAmavighnodayAm || 56|| tamaHprakararuddhaye tadanu sattvasaMvR^iddhaye vishuddhamatisiddhaye vimalanirbR^iterlabdhaya | bhavantu mayi santataM bhagavato vR^iShAdriprabhoH pragetanapayoruhapratibhaTAH kaTAkShachChaTAH || 57|| prapannAnAM nAnAduritaparitApavyatikaraM nirundhAnA dhAnApradamunidhaneshIkR^itichaNA | prabibhrANA.abhrANAmapi madaharAM dIptimanaghAm bhR^itAsheShA sheShAchalashikharabhUShA vijayate || 58|| mude vo devo.ayaM bhavatu bhujagendrAchalataTI\- kR^itAvAso vAsoruchinichayadhUtAchiraruchiH | gajAdInAM dInAM shamayitumavasthAM karuNayA nijagrAha grAhaprabhR^itiripuvargaM sapadi yaH || 59|| abhIShTaM vo dugdhAmakhilamiha gopAlatilakaH payodashyAmA~NgaH phaNidharaNibhR^itkAnanacharaH | aghA saM vaddhAnAmahaha jaratInAmapi gavAM parIpoShaM kurvan rasamamitamutpAdayati yaH || 60|| namastasmai bhasmIkR^itanarakabANAdivibudha\- pratidvandvishreNIviShataruvanIkAya mahate | hutAnAM havyAnAM niyatamupabhoktre.adhisavanaM prashastArAdhyAya prachuraruchaye nisyashuchaye || 61|| vihAri jagadudbhavasthitivilopanairyAtanAM dhunAtu mithunaM mithastadaviyogi yatraikakam | vadanti vasudhAdharaM punaracha~nchalAbhaM budhAH paraM navasudhAdharaM sphurati cha~nchalAbhaM tathA || 62|| shuchaye rachaye praNAmamasmai prabhave suprabhaveShapeshalAya haraye nirayekShaNaM kShaNaM yaM vinatA no janatA kadApyupaiti || 63|| kalikalmaShahArinAmadheyaM kalaye tApasamAnasAvadheyam | madanaspR^ihaNIyarUpadheyaM tadanantAchalamaulibhAgadheyam || 64|| tava sAgarabhUstu dharmapatnI divasAnAmadhipo nivAsavediH | shivadhAtR^imukhAssutAstvadanyai\- ravadhAryo mahimA kathaM tvadIyaH || 65|| madhuraM vidhuramyavaktrabimbaM mahitaM dhAma hitaM makhAshanebhyaH | tadahaM madahantR^i dAnavAnAM vidadhe bhItyudadheH plavaM guNADhyam || 66|| namatAM mamatAvalepahantre varadAya sphuradAyatekShaNAya | karavai muravairiNe praNAmA\- nuragorvIdharago ya eSha bhAti || 67|| karuNAvaruNAlayaM murAre kamalAkShaM kamalAkShamAsametam | bhajate nijatejasA jitArkaM vigatAMhA jagatAM dhurandharaM tvAm || 68|| anantashailesha tavAbhidhAnaM kShaNaM gR^iNantaH pravishanti nAkam | ramAsakha tvadvimukhAshcha madhye rasa~NgataM hanta tameva yAnti || 69|| prasAdhayed yAM tapasA chireNa smarAntaka shlAghyatarAM gatiM tAm | vR^iShAchalAraNyaniShAdakAnA prasAdaleshena na sAdhayetkim || 70|| dadAsi dAsaprakarAya rAya stathA.api nAtha tvamakampasampat | shriyo viyogasya kathA kathaM syA\- dahInapR^ithvIbhR^idupAshrayasya || 71|| prAptodayo hi prathamAdrishR^i~Nge doShAvasAne harireSha dR^ishyaH | saMshoShayanmAnasavR^itipa~NgaM prasannapa~NkeruhashobhanAbhaH || 72|| sA kA.api rAkAshashidAsyadAsya\- mudrA samudrAtmajayA jayADhyA | sheShAdribhUShA jaladAvisheShA pAyAdapAyAdvasatiH kR^ipAyAH || 73|| anyAdR^ishI tArkShyarathA sudhAbdhi\- kanyApadanyAsavisheShadhanyA | mUrtirmadArtiM mahanIyakIrti\- rmuShNAtu kR^iShNA vinateShvanuShNA || 74|| bhavAn purANaH puruShaH prasiddho vayo.adhikaM tAvakavAhamAhuH | kApi tvarA te karirAjagarjA\- kAle katha~NkAramabhUnmurAre || 75|| nare nare.ahaM dhanachApalena navaM navaM vyAtanavaM stavaM yat | tatastataM doShamasheShamu~nchai\- stava stavaH shrIkamana chChinattu || 76|| na me mano yoShidurojakumbhe na svIyaDimbhe na cha shAtakumbhe | paraM tu rantuH kamalAlayAyAH padAravinde ruchimeva vinde || 77|| abhUrivarShonmukhameghasundarai\- ranAshritashrIvR^iShashailakandaraiH | anindirAmandirasadbhujAntarai\- ralaM batAndhai riha devatAntaraiH || 78|| tvada~NghripadmaikadhanA dhanAntaraM na kAmayante na cha sAdhanAntaram | anantashailesha bhavantameva yat phaNantyupAyaM cha phalaM cha paNDitAH || 79|| nalinanayana nAgashailavAsin malinahR^idAmapi kalmaShApahantaH | jananamaraNarogaduHkhashAntyai charaNayugaM sharaNaM vR^iNe tvadIyam || 80|| govardhano.api shirasA vidhR^itaH kimanya\- dyena tvayAdhijaTharaM sakalo.api lokaH | tasminniha tvayi vR^iShAdripate.ahamAtma\- rakShAbharaM kR^ishatamo nidadhAmi dakShe || 81|| kiM bho manaH kitavalampaTashambhalInAM sambhogakelikiliki~nchitasambhrameNa | ambhojadambhaharanetrayugo yashodA\- Dimbho rasena bhavatA parirambhaNIyaH || 82|| moTTAyitaM tridashapaTTaNakuTTinInAM dR^iShTaM vinaShTamidamaShTanavairdinaistat | hR^iTTIkatAM sthitimaduShTini shuksamaShTi\- kuTTAkadR^iShTini dhR^itakShiNi vastunIdam || 83|| dambholipANipuTabhedanashambhalInAM vakShojakumbhaparirambhasukhopalambham | mA nAma chIkamata mAnasamasmadIyaM vaikuNThachintanarasairvayamutsukAH smaH || 84|| na maNIn ramaNIshcha so.ahamIhe na hayebhyaH spR^ihaye na vA gajebhyaH | varadashsharadashshataM dR^ishau me bhujagAdrau sharaNArthino dhinotu || 85|| kArAgehe saMsR^itirUpe bhramato me kA rAge he kR^iShNa vivR^iddhe mativArtA | nAgodArAhAryapate mAM svayamavyA nAgo dArAla~NkR^itamUrte mama vIkShyam || 86|| vandAruShu mandAramamandArtiharaM te vandAmaha indAvapi nindAvahamAsyam | mArArikumArAdisamArAdhitamUrte nArAyaNa ghorAdapachArAdiha pAyAH || 87|| pradhAnAya sampannidhAnAya bhakta\- vyathAnAshadattAvadhAnAya tubhyam | samastAdhinAtha svamasthAbhiklR^iptaM namasstAdidaM nistamastAvidhAyin || 88|| nAgarAjAchale sAgarAgryAtmajA\- kAntabAhAntaro dAntabAdhAharaH | vArijAkShashshrayatpArijAto jaga\- drAjate rakShituM rAjatejomukhaH || 89|| marutAM bhagavan marutAM viratiM laShatAM miShatAM dviShatAM tatayaH | bhavatA manujIbhavatA mR^idutAM jahatA mahatA nihatA iha tAH || 90|| ki~nchitsa~nchintaye gopIkiliki~nchitava~nchitam | a~nchitaM jyotiramaraira~njanAdrAvuda~nchitam || 91|| sarvadAnandanilayaM sArthayannavanItahR^it | kR^iShNastvaM ve~NkaTAdhIsha kiM tu shailena dhAryase || 92|| vR^iShAchalapate kR^itsnaviShAdaharaNakShamam | prapadye bhavataH pAdapayoruhamahaM kR^ishaH || 93|| mAnayAmo hare na tvAmAnayAmo na te mudam | panAyAmo.ahaha kShudrAn dhanAyAmohato hatAH || 94|| prapadye niravadyaM tatphaNibhUdharabhUShaNam | parabrahma harabrahmadurlabhaM vallabhaM shriyaH || 95|| a~njanamahIdharacharaM janamanIShA\- ra~njanamadhokShaja nira~njanamiha tvAm | lochanayugIkR^itavirochanasudhAMshuM kechana bhajanti bhavamochanamabhij~nAH || 96|| sa~ncharati yogihR^idi ki~ncha ravibimbe yo lasati nIlaghanajAlasamamUrtiH | niShkR^itivihInabahuduShkR^itisamutthaM sa~NkaTamapAsyatu sa ve~NkaTagirIshaH || 97|| indukaravR^indaparikandaladamandA\- nandakaramandahasasundaramukhashri | nistulamupasthitamurassthitavarasta\- nyastu mama sheShagirimastagatavastu || 98|| prashamitapishitAshaM prAstasaMsArapAshaM kR^itanatagadanAshaM kIrtibhissmeritAsham | navajaladanikAshaM nAgashailaprakAshaM parihR^itaviShayAshaM bhAvayAmo ramesham || 99|| kalyANAbhyAmasheShAbhyudayavibhavasampIDanakrIDanAbhyAM nAbhyAmabhyudgatasya dviyugamukhashishoH shrUyamANastavAbhyAm | bodhAmodArNavAbhyAM bhujagaparibR^iDhakShmAdharAla~NkR^itibhyAM divyAbhyAM dampatibhyAM bhavatu nama idaM devatAsevitAbhyAm || 100|| || ityAtreya shrIve~NkaTadhvarikR^itiShu shravaNAnande shrInivAsastave prathamashatakam || \medskip\hrule\medskip || atha dvitIyashatakam || shriyaH priyatamaM seve sheShAchalashiromaNim | mahitaM sumanovR^indairmandAramiva mAdR^ishAm || 1|| kamanIyairnijAlokaiH kamalAnandakAribhiH tamasAmapanetAraM tameva harimAshraye || 2|| pariShkR^itA~njanadharaM paraM shrutyantagocharam | lochanaM staumi lokAnAM kimapyaj~nAnamochanam || 3|| pratIpasharabhArAvalopakaM gajapAlakam | dadhAmi harimAshcharyaM guhAshayamihAshraye || 4|| adR^ishyaM yogivaryairapyabjadIptikaraM harim | upatiShThe.adhikAruNyamudyantamiva bhAskaram || 5|| devatAmAdimAM vande dhR^itAM bhujagabhUbhR^itA | samudramAshritAmurvIM pR^ithuchApaprasAdhitAm || 6|| AnandanilayaM vande shlAghyaM dugdhArNavAdapi | shrIdharaM yatra jAgarti paraM jyotirnira~njanam || 7|| prapannAbhayadosmIti satyApaya vacho mayi | nALIkashabda uchitaH shrInivAsasya te yataH || 8|| prapa~nchAsyamupAsya tvAM nR^ipa~nchAsyati mAnavaH | karoShi tasya yatsvAmin karoShitamabhIpsitam || 9|| vR^iShAchaleshasya tuShAradIdhititviShA mukhenArtaviShAdahAriNaH | mudAM nidAnaM dyusadAvalistutaM sadA padAmbhojamudAramAshraye || 10|| sakR^itprapannAya kR^ishAya daivatairanApyamapyarpayasi sthiraM padam | dayAlutA mAdhava durbaleShu hi prabhUttamAnAM paramaM vibhUShaNam || 11|| ajasramapyabdhisutAM vahannurasyajAmadhiShThAya sR^ijan prajA hare | bhavatyaho manmathajanmabhUrbhavAn tathApi kandarpajitA.abhimanyase || 12|| tva kimindunA tena kala~Nkitena yaM prabibhrato nApagatAndhakAritA | tavaiva vIkShe mukhachandramadbhutaM tamo murAre harati smR^ito.api yaH || 13|| pata~Nga udyannupamAnatAM bhava\- spado nu[dorna]deva prativaktu [pattu]marhati | asaMshayaM duShyati yasya darshane jano yayostvabhyudayaM prapadyate || 14|| phaNabhR^idadrIsha guNAlibhiH kShamA\- ghR^iNAvirodhikShapaNAdibhishshrutam | praNAmatastvAM nipuNAshrayaM ta [\-NaH shrayan sa]dA nR^iNAM patIneva tR^iNAva[ya] manyate || 15|| manastura~NgaM viShayachChaTAvaTAntare gabhIreva da[pata]yAlumAshu me | vitu[kR^i]Shya dakShaM virachayya shikShayA hare tadu[mu]chchairadhiroDhumarhasi || 16|| sthirama~NgaladAyakam shritAnAM paramaM dhAma vR^iShAdridhAma vande | smaramanyumadairgadairayuktA na ramante hi yato.aparatra yuktAH || 17|| valavairishilAvalepalopakShamabhU[bhA]maNDalabhavyadivyadeham | praNamattitradashA[shaM] dR^ishoH purastAt paramaM vastu tadastu niShkalaM me || 18|| taruNArkakarAvamarshahR^iShyannalinAha~NkR^itihu~NkR^itipravINam | bhavamochana lochanadvayaM te bhagavanmAmakamAnase chakAstu || 19|| bhuvanAbhyudayAvanAntalIla stavanAdeva satIhitArthadAtaH | tava dAsyapade mayIha shaure bhavadAvAnalapAtitA na yuktA || 20|| vR^iShashailavanasthalIvihArI madhuhArI sumanashshirassu nityam | nihitA~N.hghrirala~NkR^itAgamAnto mama chetaHkamale tu lAlagItu || 21|| dyutaro namatAM prasIda shAr~Ngin itaropAyavidhAvahaM na shaktaH | taraNau taraNe tra[kR^i]pAM sR^ijantau charaNau te sharaNaM vR^iNe sharaNyam[Nya] || 22|| idameva padaM surasravantIM janayitvA shivayAmbabhUva shambhum | iti mAdhava darshayan karaste satataM lochanagocharo mama stAt || 23|| jagadaNDasahasrabhArakhedo jaTharasyAtikR^ishasya jatu mA bhUt | iti tadbalakalpanAya kaTyAM kalitaM shrIdhara chintaye karaM te || 24|| natirastu taTiddhanadyutibhyAM shritasheShAchalashR^i~Ngasa~NgatibhyAm | paripAlitabhaktasantatibhyAM prathamAbhyAmanurUpadampatibhyAm || 25|| harinIlanibhaM harerurastatkalaye shrIH kila yatra vartamAnA | uShitA dhruvamutpale.api nIle kamalA padma iveti sauti buddhim || 26|| gArutmatadyutiviDambini kaiTabhAre gADhe virAjati tavorasi kaustubho.ayam | dIvyattamAlagahanAhitamechakimni prAchyAvanIdharataTe bhagavAnivArkaH || 27|| sarvaj~namastakagR^ihItakalasya tasya bhrAturvidhAtumanasaH paramaM praka[ha]rSham | lakShmyAH kimi~Ngitamavetya vR^iShAchalendo vaktre.ardhachandratilakaM vahasi prasannaH || 28|| govardhanaM dhR^itavatA guNapUrNa mUrdhnA manthAnamapyachalamUDhavatA mahAntam | ambhoruhAkSha vahase kimapakShapAtAt taM chAru kA~nchanamayam cha [giriM su]merum || 29|| prahlAdavAraNavibhIShaNabhAnusUnu\- pA~nchAlarAjatanayApramukhAvanena | tAvadbabhUva tava naive vR^iShAchalendo yAvadyasho.atikR^ishamAdR^isharakShaNena || 30|| grAhagraheNa viraTan karaTIva naite lokAntarAgamavilambasahiShNavo me | ityasmadAdyalasadAsarirakShiShAto jAgarti[rShi] nAtha vR^iShabhUbhR^iti sAvadhAne[naH] || 31|| yanmekhalAparilasanmaNima~njudIpti\- pItAmbarassu[raM su]manasaH kathayanti yA[yaM] cha | yadbhogibhUbhR^iditi yashcha hare prasiddhaM vAsastavAvahatu ta~ncha sa cha shriyaM naH || 32|| atyunnataM tilakabhUShitamAyatAkSha\- mudbhAsimekhalamudArasahasrapAdam | sheShAchaleshitaranantapadAbhidheyaM tvAM tvadgiriM cha samameva vichintayAmaH || 33|| alpetarashramavikAsakarairasArai\- rghorairalaM tava[bata] lulAyakulAnusAraiH | kA~NkShAdhikArpaNakR^itatridivadruninde vande mukunda bhavatashcharaNAravinde || 34|| akShANi me viShayapa~NkamalImasAni prakShipya [\-kShAlya] nAtha guruNA karuNArasena | pAdAmbuje nanu nije amR^itaprado [de] ShaDetAni talpadaya [sa~Ngamaya] ShaT.hpadakUjitAni || 35|| mandetarasphuraNama~NgalakAlamegha\- mandehadAyisuShumaikanikAyakAyam | vande tameva varadaM sharambujAkShaM yaM devamAhuraravindagR^ihAsahAyam || 36|| kamalanayana dIvyatkaustubhodAradIpaM bhavanabhavatu nastadbAhumadhyAbhidhAnam | prathitasadanubhAvaissAtvikairbhAvyamAnaM yadutilaka samindhe yatra shR^i~NgAravatvam || 37|| anuchitamahamIdR^i~N.hmuktatAM yatsamIhe mashakashishurivochchairbhakta [matta] mAta~NgarUpam | kShamamidamathavA me tvAM prapannasya tUrNaM tR^iNamapi vR^iShashailAdhIsha divyAstrayantam || 38|| viShada[ja]vitatirAstAmutpalaM dhik sarogaM kR^itamatikaThinaistairgotrabhid.hgrAvabhishcha | niyatamamR^itadaM te nirmitAta~Nkabha~NgaM vapuratisukumAraM vAsudeva stuto[ve.a]ham || 39|| prakR^itimahadaha~NkR^ityAdikaM tattvajAtaM puruShamapi sharIraM tAvakaM sa~Ngirante | madhumathana paraM brahmaikamevAdvitIyaM tvamasi tadakhilashrutyantatAtparyabhUmiH || 40|| nikhilavihitahAtR^In nItakAlAnniShiddhaiH nirupadhikaruNAbdhistrAtumasmAnakasmAt | vibhurapahatapApmA vishvabhUtAntarAtmA\- pyadhivasasi vR^iShAgAdhityakAM satyakAmaH || 41|| punarapi jananInAM chenna kukShau vivikShA niravadhini sukhe chedasti sAkShAdapekShA | charaNanalinayugme tAvake deva ke vA sharaNavaraNamete shrIpate nAcharanti || 42|| varada madapachArAH ki~nchidAlochitAshche\- nnalinanayana nAlaM nArakAstvatprak.hlR^iptAH | vitaraNakaruNAdyAstvadguNAshshIlitAshche\- damR^itamapi sudhAndhuM [surAndhaH] svalpamityapyavaimi || 43|| hR^idi mama kaluShe.asmin pAdapadmaM tvadIyaM charatu kathamidaM te nAtha hanteti chintAm | durupalasutanR^ikR^ityad.hbhutAnaHprahAra\- prabhR^iti charitamasya shrIpate nirdhunIte || 44|| asharaNaM bhagavannabhirakSha mAmayamahaM bhavataH karuNApadam | prachurarogagaNena cha pApmanAM nanu yatashchayataH prasR^ito.asmyaham || 45|| atitarAmaparAdhaparamparAM rachayato manujAnabhirakShitum | kamalayA sahakhelamabhUShayan hi[ddhi]tatamaM tatama~njanabhUdharam || 46|| tribhuvanaikavadAnyamananyadhIH kimapi nAtha bhavantamihArthaye | tava padAmbujabhaktimanuttamAM kalaya me layameti yathA[yA] tamaH || 47|| kR^itabudhAvamatIn kumahIpatIniha vihAya madIyagirAM chayaH | madhuripuM bhajatAM madhurasphurannavaraso varasomasuhR^inmukham || 48|| viphalayA viShayAntarachintayA kimanayA.apitu kAmapi devatAm bhaja manassumanaHprakaraiH sadA namasitAmasitAmbudharopamAm || 49|| tava ramAsakha tu~NgatamA kShamA tamapi yena rarakShitha vAyasam | tvaditaro nihatiM bata tatra ko na kurute kurute.api kR^itAgasi || 50|| api kR^itAgasi te.ajanayatkShamAM mayi ramA kShaNamapyanayA bhavAn | muraripo varivarti kana[kara]sphuradvanajayA na jayAvahayA vinA || 51|| madhuripo bhavadIyabhujAntaraM manasi me lagatAd dhR^itakaustubham | sphurati yatra hi mAdR^ishaguptaye sarasijorasijopamitAchalA || 52|| phaNipatikShitibhR^ittaTabhUShaNe baliripo hR^idayaM ripubhIShaNe | bhavati rajyati mUrtirivollasanmaratake ratakelijuShaH shriyaH || 53|| phaNigirau hi sa eva bhavAn [van] bhavAnmitadhiyAmavanArthamavAtarat avirataM munayaH kamalollasatpada hare dahare yamupAsate || 54|| tAvakaM kimapi deva ka~njabhUvAmadevavalashAsanAdibhiH | daivatairavirataM niShevitam pAdapa~NkajayugaM bhajAmahe || 55|| a~nchatAM duritapu~njabha~njanAda~njanAvanidharAvataMsakAt | anyamatra nahi chittamAnaye mAnaye na cha virodhihAnaye || 56|| dAsamAvidhi [tha] kayAsu [dhu] nandanaM dantinaM dashamukhAnujaM gha [shri] tam | shrInivAsa charitAni te paraM kAni vA na vikR^itAni paNDitaiH || 57|| rAjamAnavibhavAM mahImarudrAjamAnasavihArahA [vA] sikAm | mAnayAmi phaNishailadevatAmAnayAmi cha tada~N.hghrimAshayam || 58|| devakItanaya tAvakI tanUrindirAvihR^itimandirAyitA | Atanoti mama nUtanotpalashyAmalA paramakomalA mudam || 59|| prAtarAshayamahIshabhUmibhR^innetarAsha [shra] ya ramApate mama | vItarAgavinutAt tvadu~nchakairnetarAniha bhajAmi nirjarAn || 60|| nIti [cha] rAjimanusR^itya nityamapyAcharAmi vihitaM na mAdhava | khecharAbhinuta no matirbhavadgocharApi kR^ipayaiva pAhi mAm || 61|| meghadarpaharadIptivaikharI shekharIkR^itapadAmbujA suraiH | bhAvitA munibhirAdidevatA saM [sA] vatAdupavitA padA.avatA || 62|| durvachaprathimagarvacharvitaprAGYamudbhirakR^ipairalaM nR^ipaiH | a~njanAdrichara ka~njanAbha te chintaye vapuraraNya shAntaye || 63|| aprabuddhamakR^itatvada~njanaM ka~njalochana kR^itAtmava~nchanam | bhAvitAparichitaprapa~nchanaM pAhi chakradhara mAmaki~nchanam || 64|| varuNasya bhaktimaruNasya shUlino valashAsanasya vanajAsanasya vA | tanutAM cha notra vinutAM suraissamaM smara gADhabhaktiruragAdridevatAm || 65|| kamalAbhirAmavimalAyatekShaNAM kamanIyamUrtimamanIShidurgamAm | paramAmupasthitaramAmimAM mano bhaja gADhameva bhujagAdridevatAm || 66|| smaraNaM padatrabharaNaM mukunda te yajanaM padAbjabhajanaM cha kIrtanam | stavanaM guNAnubhavanaM shubhAlayavrajanaM cha hanti vR^ijinaM sharIriNam || 67|| nijavaibhavena nahi kevalaM svayaM tava sArasatvamupayAti lochanam | nijagochare.api puruShe paraM ramAsakha sArasatvamupapAdayatyadaH || 68|| ramayA sadaiva ramamANa uchchakairnaramAnitastvamiti nAtha sAmpratam | nalinAyatAkSha parametadad.hbhutaM namadiShTakAryapi madiShTakAryasi || 69|| duritAni sAdhu charitAni vA janastanute mukunda nanu te prachodanAt | uchite stavaM [ve] virachito [te] pi me [vachaH] paripoShaNe madhuripo tava spR^ihA || 70|| urageshabhUmidharagehamachyutaM sharaNaM gatasya taraNaM bhavAmbudheH | sukaraM nanu shramakaraM yadAshrayAt kapayo.api naiva napayodhila~NghinaH || 71|| dalitograchApa tulitobhra [gra] gUDhapAdviShayA tvana [da] nyaviShayAshayA kR^itam | tava nAgashailabhavanAsmadAshaye chiramastu vItaviramastu sannidhiH || 72|| hR^idayaM pravishya hR^itasarvakalmaSho viduShAM vidhAtumapavargamutsavam | tanute tadIyatanuShu praharShataH puruShottamaM su [massa] pulakA~NkurArpaNam || 73|| madamohalobhamukhavairidhUtaye paritApakAriduritApanItaye | kimapi smarAmi kamalAbdhikanyakAkiliki~nchitaikarasikaM paraM mahaH || 74|| avichChedAmodA kalashajalarAsherduhitari\- sphuradrAgA nAgAdhipashikhariNIshAdimahitA | asau dAsatrAsakShapaNanipuNA duShTadamane kR^itAsaktivyaktirnigamagaNagItA vijayate || 75|| viditvA tattvArthAnapi vishadamAmnAyashirasAM purANAni shrutvApyasakR^idapi buddhvA smR^itigiraH | samAje sthitvApi shrutinayavidAM hanta viduShAM [viShayAn] na hAtuM shaktohaM narakahara kiM me na dayase || 76|| dhanAyAbhiH kShudraM nR^ipamapi vinA yAdavanutiM vapanAyAnItIchChAM janayasi mahAyAsajananIm | ahantAmAhatmyAdasurabalahantAramatulaM na hantAre cheto nayasi khalu chintAviShayatAm || 77|| asheShAn sheShAdreradhipa mama doShAnnirasituM mahatprAyashchittaM madhumathana naivAstyanuguNam | prapashyannApIThAnmaNimakuTaparyantamatulaM pavitraM gAtraM te paramapuruShAbhUvamanaghaH || 78|| spR^ihA dInatrANasthirabirudarakShAsu yadi te yashaH prAptuM vyAptaM yadi cha ruchirAshAsu dashasu | tadAshaiShairdoShaiH sharaNitamasambhAvitaguNaM vipadbhyastrAyethA vR^iShagiripate khinnamiha mAm || 79|| naraM vA devaM vA kamapi nalinAkSha shrutavatAM prasiddhyante [nto] dR^iShTAH paramabhimatarthAH katipaye | prapannAnAM tvAM naH paramamadhipaM brUhi jagatA\- maho kaShTaM siddhyatyabhilaShitamadyApi na katham || 80|| dhanAditsopaj~navyasanajanitaprANivipadAM mahIbhR^itpAshAnAM madanamadanaddhogramanasAm | mukhaM dUre hitvA muramathana me lochanayugaM vadAnyaM vaktraM te varada sharadaH pashyatu shatam || 81|| niyantA [ntarvi] vishveShAM niyatamanukUlastava bhavan\- napanthAnaM mu~nchannatidR^iDhamatistrAsyasa iti | vR^iNAno goptA syAH svayamiti vimuktetaragatiH prapadye bhItohaM paramapuruSha tvAmabhayadam || 82|| na dA [yA] tuM na stA [snA] tuM na cha rachayituM te stutigiro na dA [gA] tuM na dhyAtuM na kalayitumArAdhanamapi | na yaShTuM na spraShTuM kimapi tava tuShTyai paTurahaM sharaNyau te lakShmIramaNa sharaNaM yAmi charaNau || 83|| abhaktyA bhaktyA vA shuchirashuchirvA madhuripo sakR^idvA bhUyo vA sakalaphaladaM tvAM smarati yaH | nirAta~NkaM tu~NgaM nikhilamapi datse.abhilaShitaM na keShAmAshcharyaM janayati tavaudAryamatulam || 84|| || iti shrI pa~nchamatabha~njana vikhyAtatAtayajvabhAgineyAptoryAmAdiyajvAtreyavaMshamauktikAppayAchArya tanUbhavashleShayamakachakravartiravunAthAchAryatanayasya shrInivAsakR^ipAviditanayasya shrIsItAmbAgarbhasambhavasya kA~nchInagaravAstavyasya ve~NkaTAchAryayajvanaH kR^itiShu shravaNAnande dvitIya shatakaM sampUrNam || shravaNanandapadyeShu kAThinyaM yatra lakShitam | shrIshailastAtayAchAryastatraivaM vivR^itiM vyadhAt || ## From a telugu book veNkaTeshakAvyakalApa Encoded and proofread by Malleswara Rao Yellapragada malleswararaoy at yahoo.com \medskip\hrule\obeylines Please send corrections to sanskrit at cheerful dot c om Last updated \today https://sanskritdocuments.org \end{document}