% Text title            : stotraratnam athavA AlavandArastotram
% File name             : stotraratnaAlavandAra.itx
% Category              : vishhnu, krishna, vishnu, yAmunAchArya
% Location              : doc\_vishhnu
% Author                : yAmunachArya
% Transliterated by     : Rajnarayanan C K krajnara at gmail.com
% Proofread by          : Rajnarayanan C K krajnara at gmail.com, PSA Easwaran
% Latest update         : February 21, 2018
% Send corrections to   : Sanskrit@cheerful.com
%
% This text is prepared by volunteers and is to be used for personal study 
% and research. The file is not to be copied or reposted for promotion of 
% any website or individuals or for commercial purpose without permission. 
% Please help to maintain respect for volunteer spirit.
%
\documentstyle[11pt,multicol,itrans]{article}
#include=ijag.inc
#endwordvowel=.h
\portraitwide
\parindent=100pt                
\let\usedvng=\Largedvng      % for 1 column     
\pagenumbering{itrans} 
\def\engtitle#1{\hrule\medskip\centerline{\LARGE #1}}
\def\itxtitle#1{\medskip\centerline{\LARGEdvng #1}\medskip\hrule}
\def\endtitles{\medskip\obeyspaceslines}
%%
\begin{document}
\engtitle{.. Stotraratnam or Alavandarastotram ..}##
\itxtitle{.. stotraratnaM athavA AlavandArastotram ..}##\endtitles ##

svAdayanniha sarveShAM trayyantArthaM sudurgraham |
stotrayAmAsa yogIndrastaM vande yAmunAhvayam ||
namo namo yAmunAya yAmunAya namo namaH |
namo namo yAmunAya yAmunAya namo namaH ||
namo yAmunapAdAbjareNubhiH pAvitAtmane |
viditAkhila vedyAya gurave viditAtmane ||

namo.achintyAdbhutAkliShTa j~nAnavairAgyarAshaye |
nAthAya munaye.agAdhabhagavadbhaktisindhave || 1||
tasmai namo madhujida~Nghrisarojatattvaj~nAnAnurAgamahimAtishayAntasImne |
nAthAya nAthamunaye.atra paratra chApi nityaM yadIyacharaNau sharaNaM madIyam || 2||
bhUyo namo.aparimitAchyutabhaktitattva\-
j~nAnAmR^itAbdhiparivAhashubhairvachobhiH |
loke.avatIrNaparamArthasamagrabhakti\-
yogAya nAthamunaye yaminAM varAya || 3||
tattvena yashchidachidIshvaratatsvabhAvabhogApavargatadupAyagatIrudAraH |
sandarshayanniramamIta purANaratnaM tasmai namo munivarAya parAsharAya || 4||
mAtA pitA yuvatayastanayA vibhUtissarvaM yadeva niyamena madanvayAnAm |
Adyasya naH kulapatervakulAbhirAmaM shrImattada~NghriyugalaM praNamAmi mUrdhnA || 5||
yanmUrdhni me shrutishirassu cha bhAti yasmi\-
nnasmanmanorathapathassakalassameti |
stoShyAmi naH kuladhanaM kuladaivataM ta\-
tpAdAravindamaravindavilochanasya || 6||
tattvena yasya mahimArNavashIkarANu\-
shshakyo na mAtumapi sharvapitAmahAdyaiH |
kartuM tadIyamahimastutimudyatAya
mahyaM namo.astu kavaye nirapatrapAya || 7||
yadvA shramAvadhi yathAmati vApyashakta\-
sstaumyevameva khalu te.api sadA stuvantaH |
vedAshchaturmukhamukhAshcha mahArNavAntaH
ko majjatoraNukulAchalayorvisheShaH || 8||
ki~nchaiSha shaktyatishayena na te.anukampya\-
sstotApi tu stutikR^itena parishrameNa |
tatra shrumastu sulabho mama mandabuddhe\-
rityudyamo.ayamuchito mama chAbjanetra || 9||
nAvekShase yadi tato bhuvanAnyamUni
nAlaM prabho bhavitumeva kutaH pravR^ittiH |
evaM nisargasuhR^idi tvayi sarvajanto\-
ssvAminvichitramidamAshritavatsalatvam || 10||
svAbhAvikAnavadhikAtishayeshitR^itvaM
nArAyaNa tvayi na mR^iShyati vaidikaH kaH |
brahmA shivashshatamakhaH paramasvarADi\-
tyete.api yasya mahimArNavavipruShaste || 11||
kashshrIshshriyaH paramasattvasamAshrayaH kaH
kaH puNDarIkanayanaH puruShottamaH kaH |
kasyAyutAyutashataikakalAMshakAMshe
vishvaM vichitrachidachitpravibhAgavR^ittam || 12||
vedApahAragurupAtakadaityapIDA\-
dyApadvimochanamahiShThaphalapradAnaiH |
ko.anyaH prajApashupatI paripAti kasya
pAdodakena sa shivassvashirodhR^itena || 13||
kasyodare haraviri~nchimukhaH prapa~nchaH
ko rakShatImamajaniShTa cha kasya nAbheH |
krAntvA nigIrya punarudgirati tvadanyaH
kaH kena vaiSha paravAniti shakyasha~NkaH || 14||
tvAM shIlarUpacharitaiH paramaprakR^iShTa\-
sattvena sAtvikatayA prabalaishcha shAstraiH |
prakhyAtadaivaparamArthavidAM mataishcha
naivAsuraprakR^itayaH prabhavanti boddhum || 15||
ulla~NghitatrividhasImasamAtishAyi\-
sambhAvanaM tava parivraDhimasvabhAvam |
mAyAbalena bhavatA.api nigUhyamAnaM
pashyanti kechidanishaM tvadananyabhAvAH || 16||
yadaNDamaNDAntaragocharaM cha yaddashottarANyAvaraNAni yAni cha |
guNAH pradhAnaM puruShaH parampadaM parAtparaM brahma cha te vibhUtayaH || 17||
vashI vadAnyo guNavAnR^ijushshuchirmR^idurdayAlurmadhurassthirassamaH |
kR^itI kR^itaj~nastvamasi svabhAvatassamastakalyANaguNAmR^itodadhiH || 18||
uparyuparyabjabhuvo.api pUruShAnprakalpya te ye shatamityanukramAt |
girastvadekaikaguNAvadhIpsayA sadAsthitA nodyamato.atisherate || 19||
tvadAshritAnAM jagadudbhavasthitipraNAshasaMsAravimochanAdayaH |
bhavanti lIlAvidhayashcha vaidikAstvadIyagambhIramano.anusAriNaH || 20||
namo namo vA~NmanasAtibhUmaye namo namo vA~NmanasaikabhUmaye |
namo namo.anantamahAvibhUtaye namo namo.anantadayaikasindhave || 21||
na dharmaniShTho.asmi na chAtmavedI na bhaktimAMstvachcharaNAravinde |
aki~nchano.ananyagatishsharaNya tvatpAdamUlaM sharaNaM prapadye || 22||
na ninditaM karma tadasti loke sahasrasho yanna mayA vyadhAyi |
so.ahaM vipAkAvasare mukunda krandAmi sampratyagatistavAgre || 23||
nimajjato.anantabhavArNavAntashchirAya me kUlamivAsi labdhaH |
tvayApi labdhaM bhagavannidAnImanuttamaM pAtramidaM dayAyAH || 24||
abhUtapUrvaM mama bhAvi kiM vA sarvaM sahe me sahajaM hi duHkham |
kintu tvadagre sharaNAgatAnAM parAbhavo nAtha na te.anurUpaH || 25||
nirAsakasyApi na tAvadutsahe mahesha hAtuM tava pAdapa~Nkajam |
rUShA nirasto.api shishusstanandhayo na jAtu mAtushcharaNau jihAsati || 26||
tavAmR^itasyandini pAdapa~Nkaje niveshitAtmA kathamanyadichChati |
sthite.aravinde makarandanirbhare madhuvrato nekShurakaM hi vIkShate || 27||
tvada~Nghrimuddishya kadApi kenachidyathA tathA vA.api sakR^itkR^ito.a~nchaliH |
tadaiva muShNAtyashubhAnyasheShatashshubhAni puShNAti na jAtu hIyate || 28||
udIrNasaMsAradavAshushukShaNiM kShaNena nirvyApya parAM cha nirvR^itim |
prayachChati tvachcharaNAruNAmbujadvayAnurAgAmR^itasindhushIkaraH || 29||
vilAsavikrAntaparAvarAlayaM namasyadArtikShapaNe kR^itakShaNam |
dhanaM madIyaM tava pAdapa~NkajaM kadA nu sAkShAtkaravANi chakShuShA || 30||
kadA punashsha~NkharathA~NgakalpakadhvajAravindA~NkushavajralA~nChanam |
trivikrama tvachcharaNAmbujadvayaM madIyamUrdhAnamala~NkariShyati || 31||
virAjamAnojjvalapItavAsasaM smitAtasIsUnasamAmalachChavim |
nimagnanAbhiM tanubhadhyamunnataM vishAlavakShassthalashobhilakShaNam || 32||
chakAsataM jyAkiNakarkashaishshubhaishchaturbhirAjAnuvilambibhirbhujaiH |
priyAvataMsotpalakarNabhUShaNashladhAlakAbandhavimardashaMsibhiH || 33||
udagrapInAMsavilambikuNDalAlakAvalIbandhurakambukandharam |
mukhashriyA nyakkR^itapUrNanirmalAmR^itAMshubimbAmburuhojjvalashriyam || 34||
prabuddhamugdhAmbujachArulochanaM savibhramabhrUlatamujjvalAdharam |
shuchismitaM komalagaNDamunnasaM lalATaparyantavilambitAlakam || 35||
sphuratkirITA~NgadahArakaNThikAmaNIndrakA~njIguNanUpurAdibhiH |
rathA~Ngasha~NkhAsigadAdhanurvarairlasattulasyAvanamAlayojjvalam || 36||
chakartha yasyA bhavanaM bhujAntaraM tava priyaM dhAma yadIyajanmabhUH |
jagatsamastaM yadapA~NgasaMshrayaM yadarthamambhodhiramanthyabandhi cha || 37||
svavaishvarUpyeNa sadA.anubhUtayApyapUrvavadvismayamAdadhAnayA |
guNena rUpeNa vilAsacheShTitaissadA tavaivochitayA tava shriyA || 38||
tayA sahAsInamanantabhogini prakR^iShTavij~nAnabalaikadhAmani |
phaNAmaNitrAtamayUkhamaNDalaprakAshamAnodaradivyadhAmani || 39||
nivAsashayyAsanapAdukAMshukopadhAnavarShAtapavAraNAdibhiH |
sharIrabhedaistava sheShatAM gatairyathochitaM sheSha itIryate janaiH || 40||
dAsassakhA vAhanamAsanaM dhvajo yaste vitAnaM vyajanaM trayImayaH |
upasthitaM tena puro garutmatA tvada~NghrisammardakiNA~NkashobhinA || 41||
## var ## tvada~NghrisaMsparshasukhaikakAminA
tvadIyabhuktojjhitasheShabhojinA tvayA nivR^iShTAtmabhareNa yadyathA |
priyeNa senApatinA nyavedi tattathA.anujAnantamudAravIkShaNaiH || 42||
hatAkhilakleshamalaissvabhAvatassadAnukUlyaikarasaistavochitaiH |
gR^ihItatattatparichArasAdhanairniShevyamANaM sachivairyathochitam || 43||
apUrvanAnArasabhAvanirbharaprabaddhayA mugdhavidagdhalIlayA |
kShaNANuvatkShiptaparAdikAlayA praharShayantaM mahiShIM mahAbhujam || 44||
achintyadivyAdbhutanityayauvanasvabhAvalAvaNyamayAmR^itodadhim |
shriyashshriyaM bhaktajanaikajIvitaM samarthamApatsaskhamarthikalpakam || 45||
bhavantamevAnucharannirantaraprashAntanishsheShamanorathAntaraH |
kadAhamaikAntikanityaki~NkaraH praharShayiShyAmi sanAthajIvitaH || 46||
dhigashuchimavinItaM nirdayaM mAmalajjaM
paramapuruSha yo.ahaM yogivaryAgragaNyaiH |
vidhishivasanakAdyairdhyAtumatyantadUraM
tava parijanabhAvaM kAmaye kAmavR^ittaH || 47||
aparAdhasahasrabhAjanaM patitaM bhImabhavArNavodare |
agatiM sharaNAgataM hare kR^ipayA kevalamAtmasAtkuru || 48||
avivekaghanAndhadi~Nmukhe bahudhA santataduHkhavarShiNi |
bhagavanbhavadurdine pathaskhalitaM mAmavalokayAchyuta || 49||
na mR^iShA paramArthameva me shR^iNu vij~nApanamekamagrataH |
yadi me na dayiShyase tato dayanIyastava nAtha durlabhaH || 50||
tadahaM tvadR^ite na nAthavAnmadR^ite tvaM dayanIyavAnna cha |
vidhinirmitametadanyaM bhagavanpAlaya mA sma jaihmyayA || 51||

vapurAdiShu yo.api ko.api vA guNato.asAni yathAtathAvidhaH |
tadayaM tava pAdapadmayorahamadyaiva mayA samarpitaH || 52||
mama nAtha yadasti yo.asmyahaM sakalaM taddhi tavaiva mAdhava |
niyatasvamiti prabuddhadhIrathavA kinnu samarpayAmi te || 53||
avabodhitavAnimAM yathA mayi nityAM bhavadIyatAM svayam |
kR^ipayaivamananyabhogyatAM bhagavanbhaktimapi prayachCha me || 54||
tavadAsyasukhaikasa~NginAM bhavaneShvastvapi kITajanma me |
itarAvasatheShu mAsma bhUdapi me janma chaturmukhAtmanA || 55||
sakR^ittvadAkAravilokanAshayA tR^iNIkR^itAnuttamabhuktimuktibhiH |
mahAtmabhirmAmavalokyatAM naya kShaNe.api te yadviraho.atidussahaH || 56||
na dehaM na prANAnna cha sukhamasheShAbhilaShitaM
na chAtmAnaM nAnyatkimapi tava sheShatvavibhavAt |
bahirbhUtaM nAtha kShaNamapi sahe yAtu shatathA
vinAshaM tatsatyaM madhumathana vij~nApanamidam || 57||
durantasyAnAderapariharaNIyasya mahato
vihInAchAro.ahaM nR^ipashurashubhasyAspadamapi |
dayAsindho bandho niravadhikavAtsalyajaladhe |
tava smAraM smAraM guNagaNamitIchChAmi gatabhIH || 58||
anichChannapyevaM yadi punaritIchChanniva raja\-
stamashChannachChadmastutivachanabha~NgImarachayam |
tathApItthaM rUpaM vachanamavalambyApi kR^ipayA
tvamevaivaM bhUtaM dharaNidhara me shikShaya manaH || 59||
pitA tvaM mAtA tvaM dayita tanayastvaM priyasuhR^i\-
ttvameva tvaM mitraM gururasi gatishchAsi jagatAm |
tvadIyastvadbhR^ityastava parijanastvadgatirahaM
prapannashchaivaM satyahamapi tavaivAsmi hi bharaH || 60||
janitvA.ahaM vaMshe mahati jagati khyAtayashasAM
shuchInAM yuktAnAM guNapuruShatattvasthitividAm |
nisargAdeva tvachcharaNakamalaikAntamanasA\-
madhodhaH pApAtmA sharaNada nimajjAmi tamasi || 61||
amaryAdaH kShudrashchalamatirasUyAprasavabhUH
kR^itaghno durmAnI smaraparavasho va~nchanaparaH |
nR^ishaMsaH pApiShTaH kathamahamito duHkhajaladhe\-
rapArAduttIrNastava parichareyaM charaNayoH || 62||
raghuvara yadabhUstvaM tAdR^isho vAyasasya
praNata iti dayAluryachcha chaidyasya kR^iShNaH |
pratibhavamaparAddhurmugdhasAyujyado.abhU\-
rvada kimapadamAgastasya te.asti kShamAyAH || 63||
nanu prapannassakR^ideva nAtha tavAhamasmIti cha yAchamAnaH |
tavAnukampyassmarataH pratij~nAM madekavarjaM kimidaM vrataM te || 64||
akR^itrimatvachcharaNAravindapremaprakarShAvadhimAtmavantam |
pitAmahaM nAthamuniM vilokya prasIda madvR^ittamachintayitvA || 65||
yatpAdAmbhoruhadhyAnavidhvastAsheShakalmaShaH |
vastutAmupayAto.ahaM yAmuneyAM namAmitam || 66||

|| iti shrImadyAmunamunivirachitaM shrIAlavandArastotraratnaM sampUrNam ||
##
Encoded by Rajnarayanan C K krajnara at gmail.com
Proofread by Rajnarayanan C K krajnara at gmail.com, PSA Easwaran

\medskip\hrule\obeylines

Please send corrections to sanskrit at cheerful dot c om
Last updated \today
https://sanskritdocuments.org

\end{document}