% Text title : Tattvartha Saravalih % File name : tattvArthasArAvaliH.itx % Category : vishhnu, venkateshwara % Location : doc\_vishhnu % Author : subrahmaNyayogi % Proofread by : Rajesh Thyagarajan % Description/comments : From Stotrasamuchchaya 2, Edited by Pandit K. Parameshwara Aithal % Latest update : May 10, 2023 % Send corrections to : sanskrit at cheerful dot c om % % This text is prepared by volunteers and is to be used for personal study % and research. The file is not to be copied or reposted for promotion of % any website or individuals or for commercial purpose without permission. % Please help to maintain respect for volunteer spirit. % \documentstyle[11pt,multicol,itrans]{article} #include=ijag.inc #endwordvowel=.h \portraitwide \parindent=100pt \let\usedvng=\Largedvng % for 1 column \pagenumbering{itrans} \def\engtitle#1{\hrule\medskip\centerline{\LARGE #1}} \def\itxtitle#1{\medskip\centerline{\LARGEdvng #1}\medskip\hrule} \def\endtitles{\medskip\obeyspaceslines} %% \begin{document} \engtitle{.. Tattvartha Saravalih ..}## \itxtitle{.. tattvArthasArAvaliH ..}##\endtitles ## \section{1} shrImadve~NkaTanAyakaM shrutishiraHsImantinIvallabhaM lakShmIprANadhavaM bhuvaHpatimajaM sarveshvaraM sadguNam | sha~NkhaM chakramathAbhayaM varamatha svaiH pANibhiH santataM bibhrANaM bhagavantamArtiharaNaM vande madiShTArthadam || 1|| shrIsheShAdrinivAsinaM smitamukhaM chandrAnanaM shrIpatiM vAgIshAdisurendravanditapadaM vande hariM sundaram | j~nAnAnandaghanaM shrutistutaguNaM sarvaj~namAtmeshvaraM sarvApadvinivArakaM cha sadayaM satyaM paraM shAshvatam || 2|| shrImadve~NkaTanAtha tAvakapadaM dInArti vichChedanaM kAmaprApakamarthinAM kalimalapradhvaMsi sevyaM suraiH | kalyANAkaramAshrito.ahamadhunA kiM chintayAnantayA khidye mAmava mAdhavAkhilajagatsaMrakShaNaikavrata || 3|| vyAdhivyAlaviShaM nibarhaya viha~NgAdhIshayAna prabho mohadhvAntahare hare vraNamahAmattebhavidrAvaNe | shrImadve~NkaTanAtha mAmaka mahAdAridryadAvAnalaM kAruNyAmR^itavarShiNA prashamayApA~Ngena pashyan muhuH || 4|| rugNAnAM nijapA damAshritavatAM bhItAtmanAM yatkalau kShiprArogyavidhAyakaM jvaraharaM saukhyAbhayeShTapradam | lakShmIshaM varave~NkaTAchalapatiM dhanvantariM dhArmikaM pakShIndradhvajamakShayaM sakaruNaM vaidyeshvaraM prArthaye || 5|| brahma brahmaharIsharUpamahitaM mAyAguNairvastuta\- stvAmAhuH shrutayo.atha nirguNamimAH shrIve~NkaTesha prabho | kAryatvAjjagato.asya heturakhilaiH karteti naiyAyikai\- stvaM hyevAha nuto.asi vedakalitaiH shabdaistathA bodhitaH || 6|| nAkendrAdiniketanAya nalinadvandvapratidvandvadR^ig\- ramyAya pratipanthidaityadamanAyAstu shriyaH prAptaye | nAthAyA smadabhIpsitasya nigamAntAla~NkriyAshobhine nirnidrAya samastajIvajagatIsaMrakShiNe ma~Ngalam || 7|| chandrasyeva hi chandrikA tava vibho santoShikA yA kR^ipA jIveShu svata eva sidhyati tataH syAdiShTamasmAdR^ishAm | kiM samprArthayate stanandhayashishustanmAtaraM me payo dehItIshvara nechChatAmapi shivaM shrIve~NkaTeshArpaya || 8|| vande ve~NkaTanAyakA~NghriyugalaM vandAsmandArakaM vande tatkarapadmayugmamanishaM vR^indArakeShTapradam | vande tannayanAravindayugalImindrAdikendindirA\- nandArthAmapi chordhvabAhuyugalaM yachCha~NkhachakrAnvitam || 9|| dhyAyAmi shrutishAkhipallavapadaM drakShyAmi lakShmIpatiM seve sarva sukhapradaM suravaraM shrIve~NkaTAdrIshvaram | sachchitsaukhyamayaM smarAmi satataM sarvaj~namAtmeshvaraM viShNuM jiShNumanantasadguNagaNaM sarvasvatantraM vibhum || 10|| jIvAnAmupabhogasAdhanavapuH kAruNyataH kalpaya\- nniShTaprAptimaniShTavarjanamapi prakhyApya chAdR^iShTataH | tatsampAdakakarmamArgamakhilaM tasmAnnivR^ittiM vibho vedaistvaM vishadIkaroShi bhagavan shrIve~NkaTAdvIshvara || 11|| sheShAdrIshvara tAvakAn guNagaNAn vaktuM phaNAbhR^idvaro nAlaM ko.ahamatIva mandaghiShaNashchetaH paraM kA~NkShati | tanme sAhasamadya pUrNashashinaM chAhartumichChAvato Dimbhasyeva muhurnirIkShya sadayaM mAM pAhi lakShmIpate || 12|| nAtha tvaM puruShottamo.asi kamalA patnI varA devatA putraH padmabhavashcha vAhanamaho tArkShyastrayI vigrahaH | shastraM chApi sudarshanaM nijavapuH sachchinmayaM sadguNaM tvaM chAnandaghano.asi ve~NkaTapate mAM pAhi vishveshvara || 13|| unmIlatpulakA~NkuraM sukhajalasrAvyakShiharShonmiSha\- dvyatyastAkSharagadgadasvaramudUDhaprItisatsAttvikam | lokavyApR^itivarjitaM nijamukhaikAvAsalakShyaM kadA shrImadve~NkaTanAtha te padayugaM drakShyAmyahaM nirbhayaH || 14|| shrImadve~NkaTanAyakA~NghrikamalaM shraddhAtaTAkoditaM bhaktidhyAnatapojalasthitamapi svAstikyakandodbhavam | vedAntArkaruchisphuTaM sakalachaitanyasphuradvambharaM trANodAramarandashaktisukhasaMvitsatyarUpaM bhaje || 15|| dvaitadhvAntadivAkare murahare madhvAdividhvaMsake sattAmAtrasharIriNi priyatame sarvasya jantoH shive | AnandAtmani chinmaye nirupame mUlaprakR^ityAshraye sarvaj~ne sakaleshvare viharatu shrIve~NkaTeshe matiH || 16|| shrImadve~NkaTashailanAtha bhagavan mAmadya dInaM vibho shrAmaMshrAmamapekShitAptikR^itiShu bhrAmyantamaprAptitaH tvAmevAshritalokarakShaNachaNaM svAmIti matvA dR^iDhaM nAmaiveshvara te smarantamaghahannAnandaya shrIpate || 17|| yasyAdriH spR^ishatAmaghAnyapanudatyahnAya yatsannidhi\- rvaikuNThAdatirichyate yadudaraM brahmANDakoTyAshrayam | yannAma smaratAM manorathatatiH sArthaiva yadbhaktimA~n\-\- jIyAd ve~NkaTanAyakaH sa bhagavAnasmAn bhayAt trAtviha || 18|| shrIsheShAdrivihAriNaM kR^itajagatsaMrakShaNaM chakriNaM shrIvatsA~NkitavakShasaM kanakabhAsaMspardhisadvAsasam | kastUrIghanasAraku~NkumamilatkAleyakAlepanaM kalyANaikaniketanaM bhaja manaH kaumArarUpaM harim || 19|| shrImadve~NkaTanAyakasya sakalaprANipriyasya prabho\- rlakShmIneturanantapuNyaphaladasyodAradAnasya cha | dAtushchAhamihAsmi samprati pumarthArthapratigrAhyato dAridryaM na mamAsti puShkaladhanagrAmasya charNaM kutaH || 20|| shrIkAntaM sharadindukAntihasitaM shreyaskaraM prANinAM pAkAripramukhAmarArchitapadaM pAthojaramyekShaNam | lokAnAM jananasthitipralayakR^illIlAvilAsaM hariM nAkArAtiripuM nirastaduritaM shrIve~NkaTeshaM numaH || 21|| chakShurdakShiNamabjapoShaNarataM savyaM tadabjAtmakaM pAdAvabjanibhau kare cha vilasatyabjaM tu yasyAbjajaH | sUnushchAbjaniketanA bhagavatI patnI cha nAbhau svake bhAtyabjaM bhuvanatrayaM sa bhagavAnavyAt sa sheShAdrirAT || 22|| dInAnAthadayAlunA bhagavatAnUnaprabhAvena cha j~nAnAnandaghanena chetanagaNatrANapravINena cha | shrInAthena guNaikatAnatanunA shrIve~NkaTasvAminA ko nAmartihareNa janturadhunA na syAt sanAthaH kalau || 23|| satyAnandachidambudhau guNamaNisthAne cha muktAshraye kAruNyormikalApini shritasamastaprANivarge tathA | brahmANDAhvayabudbude ghanamahAmAyAvalambe trayI\- ghoShe shrImati ve~NkaTeshajaladhau cheto madIyaM plavaH || 24|| yannAmasmaraNapravINajanatAnandopabhogaikabhU\- ryatpAdAmburuhadvayIpraNatirapyApannivR^ittipradA | yatsAkShAtkaraNaM narasya puruShArthAptau bhavet kAraNaM shreyodAnachaNaM karArpaNakR^ite taM ve~NkaTeshaM bhaje || 25|| subrahmaNyamukhoditastutimimAM shrIve~NkaTAdrIshituH saubhAgyopachayapradAM shrutimayIM tattvArthasArAvalim | yaH prAtaH pratimandavAramanishaM bhaktyA paThet sAdaraM tasyeShTArthasukhAptibodhavijayArogyAyurAptirbhavet || 26|| \section{2} shrIve~NkaTAchalaniketanamAshrayAmaH shrIbhUsanAthamakhilAtmasharaNyapAdam | shrImanti yadbhajanashIlakulAni loke dhanyAni dhIbalatapaHsukhakIrtibhA~nji || 27|| yatpAdadarshanapavitritalochanAnAM yatpuNyanAmaparikIrtanapuNyavAchAm | shreyAMsi nityasulabhAni nR^iNAM bhavanti shrIve~NkaTAchalapatiH paripAtu so.asmAn || 28|| sachchitsukhAdidamajAyata vartate cha sachchitsukhe layamupaiti jagat samastam | sachchitsukhaM taditi ve~NkaTashailanAtha shuddhAdvayaM shrutirihAha tatra svarUpam || 29|| pUrNAmR^itadyutilasadvadanasya padma\- patrAbhadIrghanayanasya ramAdhinetuH shrIve~NkaTAdrivasateH kamanIyarUpaM kalyANadaM bhavatu lochanagocharaM naH || 30|| ArAdhito.api bhagavannadhunA kalau tvaM kiM nAma yachChasi sukhaM sakalAstikebhyaH | gomAMsakhAdivashavartini bhUtale cha goviprasaukhyakaraNe kimu bIjamasti || 31|| ArogyadAyini tapaH phaladAtari tva\- yIshe samastajagatAM shritakalpavR^ikShe | shrIve~NkaTAdrinilaye varade prasanne nAhaM bibhemi duritAmayaduHkhasa~NghAt || 32|| chandrashchakoramiva pUrNatanuH karaiH svai\- rApyAyayatyamR^itaguH sadayairapA~NgaiH | shrIve~NkaTesha bhagavan viShayAbhilApa\- santaptachittamadhunA paripAhi mAM tvam || 33|| jIvopabhogyajagadAkalanAvanAdi\- dakShaM dayArdrahR^idayaM dayitaM ramAyAH | dAmodaraM daravikasvarapuNDarIka\- patrekShaNaM bhajata pannagabhUdharesham || 34|| dInAtmarakShaNanisargadayApayodhiM mAnAvanaikabirudaM nijaki~NkarANAm | shrInAyakaM shritabhuja~NgamarAjabhUdhraM ko nAma nAshrayati chitsukharUpamarthI || 35|| netrotsavaM nikhilasAdhujanasya nityaM shrotrotsavaM shrutinutaM shritave~NkaTAdri | divyaM harernikhilajIvasharaNyamIDe rUpaM cha nAma ramaNIyamananyayogam || 36|| shrI sheShashailashikharAbharaNaM ramAyAH prANapriyaM shrutishiraH saridIshachandram | vittArthivittadamapArakR^ipaM prapadye shrIve~NkaTeshvaramakhaNDasukhaikatAnam || 37|| saMsArasAgaramapAramihAtitIrSho\- rmartyasya mR^ityumakarAmayajantujuShTam | shrIve~NkaTeshvarapadasmaraNAhate.asti nAnyaH plavaH pravitatAdhishatAkulasya || 38|| duShpArakukShibharaNodyamadurvidagdhaM durvAraduHkhashatadanturitAntara~Ngam | doShaikatAnamatidInamamuM dayAlo devesha ve~NkaTamahIdharanAtha pAhi || 39|| aj~nAnapAtakamahAmayashatruchintA\- duHkharNadoShashamanAya tavaikameva | shrIve~NkaTeshacharitAmR^itapAnarUpaM divyauShadhaM na hi tato.adhikamasti viShNo || 40|| shrIve~NkaTesha bhagava~njagataH pitAsi mAtA cha mAmakaguruH paripAlakashcha | garbhasthitasya bharaNe janane sahAya\- stvaM garbhiNIM cha parirakShasi dInabandho || 41|| kandarpakoTijanakAnapi kAMshchidIDe kalyANajAlakalanaikapaTIyaso.anyAn | kalyAdhidAvashamanodyatavR^iShTidhArA\- pUrAMshcha ve~NkaTapateH karuNAkaTAkShAn || 42|| shrIve~NkaTesha bhavadIyakR^ipAkaTAkSha\- sa~njIvitasya sakalepsitabhogabhAjaH | vidvajjanasya kalidoShalavAptisha~NkA naivAsti dharmaparirakShakatA yalaste || 43|| kalyANakalpatarubhiH karuNa kaTAkShaiH ka~njAtadarpashamanaiH kalayAshu dhanyAn | asmAnanantadharaNIdharamaulivAsa lakShmIpate sakalalokasharaNya viShNo || 44|| pUrNAmR^itadyutilasadvadanAya phulla\- padmekShaNAya varadAbhayapANaye.astu | sheShAdrimaulinilayAya ramAsakhAya sha~NkhAribhR^itkarayugAya namaHsahasram || 45|| vaishvAnaro.asyudaragaH sakalasya janto\- rbhuktAnnapAkarasabhojanadehavR^iddhIH | kurvan kShudhAM pratidinaM kuruShe tvameva bhu~NkShvAdya ve~NkaTapate paripAhi mAM tvam || 46|| madhvAdimattagajakumbhavidAraNaika\- dakShograsiMhavapuShe parameshvarAya | vidyAmayAya bhajakAbhayadAya santu shrIve~NkaTAdrinilayAya namAMsi nityam || 47|| shrIve~NkaTeshabhagavachcharaNaM bhavAbdhi\- santAraNaM bhajakabhAvukakAraNaM cha | bhaktArtisaMharaNamarthijanepsitArtha\- vishrANanaikanipuNaM sharaNaM bhajAmaH || 48|| arthaM hi sarvajanakAmyamaduHkhalesha\- mAnandamAhuranubhUtha cha yaM mahAntaH | tatsAdhanaM cha bhavatItyubhayAtmakastu shrIve~NkaTAchalapatiH sa hi me pumarthaH || 49|| sraShTA rajoguNayutaH paripAlakastvaM sattvAnvitashcha tamasA pihito nihantA | vishvasya kAraNamamuShya gR^iNanti vedA\- stvAmeva ve~NkaTapate bhagavan ramesha || 50|| ApannivAraNamanAthajanAvanaika\- dIkShAdhurINakaruNaM jagatAM shara Nyam | shrIshaM shritAmarataruM shashisUryanetraM seve.anvahaM sapadi ve~NkaTashailanAtham || 51|| lakShmIdhavAya lasaduttamasadguNAya lAvaNyaratnanidhaye lalitasmitAya | lIlAvinirmitajagattatirakShaNaika\- shIlAya santu natayaH satataM madIyAH || 52|| kalyANamUrtimakhilAghanivR^ittimUla\- lIlAcharitramahirAjagirIndravAsam | shrIve~NkaTeshvaramanantamapAravIryaM seve shriyai shritajane sadayaM sadaiva || 53|| vishvAvanavyasanine nijaki~NkareShu vishvAsine vihitaduShTanibarhaNAya | vidrAvitAtmaripave vidhivanditAya shrIve~NkaTAdripataye.astu mama praNAmaH || 54|| AmnAyamuDdanujanigrahadugdhasindhu\- nirmagnamandarasamuddharaNAdi kartum | pAThInamUrtimapi kachChapavigrahaM tvAM shrIve~NkaTesha bhajatAM na bhayaM kadAchit || 55|| AnandamAshu sadayaM hyabhayaM vidhehi rogaM nirAkuru nibarhaya chittatApam | shrIve~NkaTAchalapate sharaNaM tvameva dehyannamIsha paripopyayutAya mahyam || 56|| shrIve~NkaTAchalapate sharaNAgataika\- saMrakShaNavrata samastasukhaikadhAman | sachchinmayAdvaya sanAtana sarvasAkShin sarveshvarastvamasi mAM paripAhi viShNo || 57|| nAtho.asi mAmakakulasya ramAsanAtha shrIve~NkaTesha bhagavan mama cha prabhustvam | kShema~NkareNa varadena tathAbhayena mAM pAlayasyanishamIsha kareNa viShNo || 58|| utpAdya mAmuditabodhalavaM cha kR^itvA saMvardhya laukika sukhairapi kaishchidIsha | shrIve~NkaTAchalapate tava bhaktamenaM nityaM ghinoShi nijasadguNachintanena || 59|| shrIve~NkaTeshvara shiva~Nkara bhUsurANAM shrIsheSha shailanilayAshritakalpashAkhin | shreyo vidhehi bhagavan bhavadIyapAda\- kai~NkaryalakShaNamanantasukhAnubhUti || 60|| nAmAkSharANi bhagavan bhavataH prakAmaM kAmArimukhyasurapu~NgavasevitAni | tanvantu santatamananyagateramuShya bhartavyavargabharaNArthamanIShitAni || 61|| shrIve~NkaTAchalapatau jagatAM sharaNye jIveshvare jagati kaH kalidoShasa~NgaH | pApaprasaktirapi nAstyakhilAghahantR^i\- tatpAdasevakajanasya na kaShTaleshaH || 62|| shrIve~NkaTeshvaravibhoshcharaNAravindaM chakrA~Nkushadhvajasaroruhamatsyachihnam | nityaM bhajAmi nirupAdhikasaukhyadAyi nirnidramasya jagataH parirakShaNAdau || 63|| sarvApaduddharaNadIkShitamasmadIya\- saubhAgyapu~njasaphalIkaraNaprabhAvam | shrIve~NkaTeshacharaNaM shirasA bhajAmi shrIkaNThapUrvakasureshvarasevyamAnam || 64|| sAnandamarthijanasArthakatApahaM naH saulabhyamUlamaravindavijetR^ikAnti | shrIve~NkaTeshvarapadaM sharaNaM prapadye shrImanmahAjanamanaHsadanaikavAsam || 65|| AnR^iNyamAvahati duHkhamapAkaroti chintAM nirasyati sukhaM janayatyajasram | dUrIkaroti duritaM shamayechcha roga\- miShTaM dadAti phaNishailapateH smR^itirnaH || 66|| dR^iShTvottamarNalikhitAkSharapa~Nktimanta\- rmAnachyutivyasanakampitachetaso me | chittaM sukhIkuru chirantanasUktigamya shrIve~NkaTesha bhagavannabhayaM vidhehi || 67|| svAmin mayA tava guNAnavichintya loka\- saMrakShaNaikanipuNA~njagataH sharaNye | Aropya doShashatamasmyaghabhAjanaM mA\- menaM tvadekamanasaM paripAhi viShNo || 68|| sarvottamastvamasi tAvaka chitralIlAH puNyA na vedmi sarahasyamatastvayIshe | shrIve~NkaTesha bhagavannapakarShamanyai\- ruktaM shivAdahamavochamidaM kShamasva || 69|| rudrastvameva khalu rudramathAdhikaM me tvatto na vakturaparAdhalavo.api viShNo | sarvAtmakasya na kimastyapakR^iShTatA te yadyasti tathyavachaso.astu na me.aparAdhaH || 70|| sachchAsi vedavachasA bhagavaMstvameva tvachChAsi sarvamasi kevalameka AtmA | dvaitaM na chenmama kathaM vadato.apakarShaM manturmR^iShA sa yadi madgaditaM tathaiva || 71|| viShNuM shivAdhikramathAnadhikaM tato.api nyUnaM guNairvikR^itibhAginamabruvaM yat | vAgAdyagocharapade kathamasya yogaH so.ayaM na chenmama kathaM duritopabhogaH || 72|| yatpAramArthikamathedamakhaNDabodhaM yadbrahmaviShNushivashaktyakhilopagUDham | chaitanyameva tadahaM mayi sarvamasti bhAtIva mAyikamato.asmyubhayaM prapannaH || 73|| yadvyAvahArikadhiyApakalAnubhUtaM dvaitaM mR^iShA na yadi viShNushivAdibhedaH | sidhyet tadA hi katamAvadhi tAratamyaM doShAya tadvyavahR^iteH parato na ki~nchit || 74|| tvayyeva nAtha parikalpya samastadoShaM nAhaM bibhemi bhavatA paratantritAtmA | mantustavaiva yadi tatphalabhAgino me syAdastu tAttvikamathaikyamiti dhruvaM nau || 75|| AnandarUpamakhilAtmasharIraloka\- bIjAyitaprakR^itigaM paramAtmatattvam | shrIve~NkaTeshvaramanantamachintyashaktiM brahmAhamadvayamajasramakhaNDamIDem || 76|| nArAyaNasya dashabhiH shivanandanasya skandasya ShaDbhirakhilairuditoM.ashakairyaH | vishvAvanAya kalidoShanivAraNAya shrIve~NkaTAchalapatiH sa jayatvajasram || 77|| shrIve~NkaTeshvarapadAmbujabhR^i~Ngasubra\- hmaNyAkhyayogimukhaniHsR^itavaikharI vA | vR^ittairvasantatilakairupachIyamAnA dadyAchchirAya paThatAmakhilepsitArthAn || 78|| \section{3} shriyaH kAntaM shAnternilayamakhilAmnAyavachasAM phalIbhUtastutyaM paramapuruShaM chitsukhamayam | mahodAraM dUraM duritanichayasyossuguNaM sharaNyaM sarveShAM bhajati sukR^itI ve~NkaTapatim || 79|| mahimnaste mArgaM madanajanakAnandasuguNa prabho nirNetuM kaH prabhavati yatante.api nigamAH | kiyantaH kvAhaM chedapi muhurupAsAditamatiH stutau tvatkAruNyaM mukharayati mAM ve~NkaTapate || 80|| iyattAmetAvAniti tava mahimnaH shrutiraho jagAdAgho neshA vadati hi yato vAcha iti cha | kathaM vA tattAdR^igduradhigamatattvaM bhagavato bhaved vaktuM shakto narapashurayaM ve~NkaTapate || 81|| lasanmAhendrAshmachChavikulagurUNAM navanabho\- ghanashrIramyANAM kuvalayadalashyAmalaruchAm | phaNIndrAdisvAmipratikR^itijuShAmastu mahasAM prachAro me divyA~njanamiva dR^igAnandajanakaH || 82|| mahAmohadhvAntaprashamanavariShThArkaruchaye mahArogavyAlIvidalanaviha~NgAdhipataye | mahApApAmbhodhigrasanabaDabAyai spR^ihayate muhurmachchetaH shrIphaNigirinivAsAya mahase || 83|| mR^igendrANAM lIlAgamanakushalatvapradaguruH sarojAnAM lajjAjanakaruchiratvaikasharaNam | svabhaktaikashreyovitaraNasuradrurvijayate sarasvatyA stutyaH sa kila charaNo ve~NkaTapateH || 84|| munIndrANAM chetobhavanamaNidIpachChaviriyaM daridrANAM tR^iptivyatikaravidhAnAkShayanidhiH | trayIsImantinyAshchikuranikurumbAbharaNama\- pyudAraste pAdo jayati bhagavan ve~NkaTapate || 85|| yayorlAvaNyAbdhau munijanamanAMsi pratikalaM sarojAyante shrInayanaruchayo ve~NkaTapateH | jhaShAyante nityaM sukR^itasukhasaMvitkushalatA\- shchiraM ratnAyante vicharatu cha vA~NnashcharaNayoH || 86|| dishantI prollAsaM munijanamayUrapravitateH sR^ijantI bhaktAbhIpsitasaliladhArAshcha jagati | ramAvidyudramyA bhujagapatibhUbhR^innivasati\- rghanashyAmA sA me duritabhavatApaM shamayatu || 87|| didR^ikShAsAphalyaM nayanayugalI yAsyati kadA phaNikShmAbhR^inmauliprathitavasatau padmanayane | drutaM dUrIkartuM duritanichayaM buddhirapi me bubhutsAsArthakyaM chiratarasamAptaishcha sukR^itaiH || 88|| namaskurmo nityaM nikhilasurakoTIrapaTalI\- maNitviNmAlAbhirmuhuruditanIrAjanavidhim | phaNikShmAbhR^inmauliprathitavasaterve~NkaTapateH padAmbojadvandvaM shrutinutashatAdvandvavibhavam || 89|| svayaM nyakkurvantau ruchirakamalAbhAM nijarUchA sadA sevyau viShNo tava hi charaNau yau kamalayA | sarAgau dhyAtavyau manasi hi virAgairnaravarai\- rmadakShNostau syAtAM bhajanaviShayau ve~NkaTapate || 90|| tava sthAnaM sarvaM jagadakhilachaitanyavapuShaH samastasya sthAnaM tvamasi jagato ve~NkaTapate | bahishchAntarvyAptaM sadamalamanantaM sukhapadaM chidAnandAdvaitaM shivamahamahantvena kalaye || 91|| ramAnIlAbhUmIkalitavarivasyau shrutishiraH\- sahasrastotavyau sakalasurasevyau suruchirau | tapasvidhyAtavyAvaruNasarasIruTpratibhaTau prapadye pratya~nchau phaNipatigirIshasya charaNau || 92|| nisargapremArdraM niravadhikasaushalya subhagaM jagajjanmasthemapralayakR^itinistandramanisham | chidAnandAkAraM tava hR^idayamasmAnapi kadA smared yadyadbhaktAn vada yadi kR^ipA ve~NkaTapate || 93|| tvamevAsmaddaivaM tava bhajanamasmAkamuchitaM vayaM tvatto jAtAstvamapi bharaNe naH patirapi | tvamasmAkaM shAstA gatirapi cha chaitanyamakhilaM tvadanyo nAstyeva tvamahamahahA ve~NkaTapate || 94|| tvadaMsho.ahaM yasmAt tvamahamakhilAdhAra bhagavan tvamAtmA sarveShAM jagadudayarakShAdinipuNaH | chidAnandAkArastvamahamuditAbhyAsavikR^iti\- statastvaddAsaM mAmava phaNimahIbhR^innivasate || 95|| phaNIndraH ChatraM te shayanamapi vAhaH khagapati\- rdhvajo vA chandrArkau nayanayugamabdhirgR^ihamapi | ramAbhUmI patnyau tanurapi chidAnandasubhagA svayaM dharmo.asi tvaM jaya jaya chiraM ve~NkaTapate || 96|| kumAraste vedhAH sakalabhuvanotpAdanapaTuH tathAna~NgaH kAmaprabhurakhilajetA sumasharaH | kalAnAmIshitrI kalyati patiM naH shrutimayI snuShA shlAghyaM bhAgyaM phaNigiripate tAvaka miha || 97|| tavAkAraH saMvitsukhamayasharIrasya subhago dR^ishAM yogidhyeyaH shrutishikharagAnAM hi viShayaH | kathaM vA maddR^iShTyoH sumasharasahasrAdhikaruchi\- rvinA puNyaM lakShyaH prabhavati phaNikShmAdharapate || 98|| shrutistrIsImantasphuradamalamuktAmaNisaraH svapAdAvirbhUtadhusaridurupUraH kimathavA | phaNikShmAbhR^innetushcharaNanakharANAM dhavalimA vitarkaM madbuddherupadishati mohaM shamayati || 99|| antaryAmI tvamasi bhagavannasya sarvasya jantoH sarvaM vyApnopyakhilamahaha tvaM padenaikakena | vishvaM viShNo varada paramastvaM tatastvAM prapadye kAruNyAbdhe kalikaluShitaM pAhi mAM ve~NkaTesha || 100|| subrahmaNyamukhoditastutimimAM bhaktyA paThanto.anvahaM brahmaNyasya jagadgurorbhagavataH shrIve~NkaTeshaprabhoH | deveshasya ramApateH karuNayA viShNoH sukhaM bhAvukaM puNyaM kIrtimanAmayaM chiratarAyuH prApnuvanti dhruvam || 101|| \section{4} lIlAmUlaM nAtha te naiva vidmaH kAle deshe karmayoge vichitram | doShairjuShTaM doShahInaM guNADhyaM nishchetavyaM tat kathaM ve~NkaTesha || 102|| vedaiH shAstrairyogibhiH shiShTavR^indaiH shastaM lIlAjAlamuktaM tavaiva | doShairhInaM sadguNADhyaM vichitraM tat pratyemi shrIpate ve~NkaTesha || 103|| sachchinmAtraM shuddhamadvaitatattvaM brahmajyotirnirguNaM tvaM hi viShNo | mAyAdhyAsAdIshvaraH sadguNaughaiH pUrNaH sAkShAd ve~NkaTAdrIshvaro.asi || 104|| dharmAtmAnaM satyasandhaM dayAluM sarvAdhAraM sarvagaM sarvavandyam | vishvAkAraM vishvavedyaM mukundaM viShNuM sAkShAd ve~NkaTeshaM bhajAmaH || 105|| vR^ittIrantashchodayasyantarAtman mAteva tvaM rakShasi shrInivAsa | shreyaH prAptau tAtavat tvaM niyokShya\- syasmAn viShNo na tvadanyo.asti nAthaH || 106|| dattvA vittaM dInalokAya viShNo kR^itvA chAntaH preraNaM kAryajAte | j~nAtvA tattadbuddhitastvaM phalAni shrImachCheShAdrIsha yachChasyudAra || 107|| jIva~njIvaM yadvadinduH karaiH svaiH bhAsvAn kokIkokayugmaM yathosraiH | tadvachChrImAn ve~NkaTesha tvadakShNo\- rlIlApA~NgaiH pAhi mAM sAnurAgaiH || 108|| sadrUpastvaM sattvadAtAsi viShNo chidrUpatvAchchetanAM me prayachCha | AnandastvaM sharma dehIshvaraM tvAM seve shrIshaM sheShashailAdhivAsam || 109|| sarvavyApi svaprakAshasvarUpaM sattAmAtraM saMvidAnandapUrNam | brahmaivedaM mAyayA mUrtamekaM jIvopAsyaM ve~NkaTeshAbhidhAnam || 110|| nAhaM kartA kArayatyantarAtmA viShNuH sheShAdrIshvaro vedavedyaH | karmAnAdi prAkR^itaM me nimittaM bhogaprAptau tatsvabhAvo hi tAdR^ik || 111|| dehArAme chittavR^ittyAkhyabhUmau satsa~NgatyA sAdhukR^iyochitAyAm | bhaktishraddhAdyAlavAle gurUktaM bIjaM shrImadve~NkaTeshasya mantraH || 112|| dhyAnaM vR^ikShasyA~NkuraM nityapUjA\- kANDo mantrAvartayo yasya shAkhAH | sheShAdrIshasyotsavAdIni parNA\- nyAnandAkhyaM chidrasaM satphalaM naH || 113|| subrahmaNyaprastutaH shrInivAsaH siddhAntArthaH sarvavedAntavAchAm | stotraM chaitad ye paThanti prabhAte pAyAd bhaktAn tAnajasraM dayAluH || 114|| \section{5} shrInivAsaM bhaje maunihR^inmandiraM ve~NkaTAdrIshvaraM vedavedyaM harim | kAmitArthapradaM svAminaM sarvadA bhUmidevapriyaM staumi naumi svayam || 115|| sheShagiribhUShaNamasheShajagadIshaM doShagaNashoShaNavisheShitamanISham | bhAShitavisheShakR^itasushrutisamUhaM sheShashayanaM bhaja sadA ve~NkaTesham || 116|| sheShagirIshvara shashvatkAmaM shivamAkalyAntaryamayan | mAmakamIshvara mAdhava viShNo mohamapAkuru me kuru bodham || 117|| dInajanAvanadIkShitamIDe mAnadamasmatkuladaivam | svAminamahipatigirikR^inavasatiM kAmitadAtAraM shrIsham || 118|| sharaNAgatajanabharaNAdaraNapravaraM sadguNagaNasharaNam | phaNipatidharaNIdharavarabhUShaNacharaNaM bhaja bho.antaHkaraNa || 119|| kSharAdatIto.akSharato.apyatIto viShNo yato.ataH puruShottamo.asi | sharIrashAyI puruSho.ahamasmi tanmAmahIndrAdripate punIhi || 120|| satsa~NgamUlAM sukR^itAlavAlAM shraddhA~NkurAM bhaktirasapravR^iddhAm | dayAprasUnAM shritave~NkaTAdriM vij~nAnavallIM sukhasatphalAM bhaje || 121|| nijanAmajapapravR^ittalokAvanashauNDena dayAmayena deva | varave~NkaTanAthamUrtibhAjA bhavatAsmannayanAni sArthakAni || 122|| saphalIkR^itadarshanArthichakShustava saundaryamahIndrashailanAtha | shrutisArthakatAvahaM cha nAma shrutimaulIshatasaMstutaM cha jIyAt || 123|| yAvat kriyAH kartumashaknuvAnaH kurvan yathAshakti naro na duShyati | tathA pratij~nAtamathopavAsaM mayeti jAnIhyuragAdrinAtha || 124|| paraM parasmAt puruShaM purANaM padmekShaNaM chitsukhasatyalakShaNam | shrIve~NkaTAdrIshvaramAshrayAmashchirantanaM yogijanAttachintanam || 125|| ve~NkaTapatipadapa~NkajabhaktaH sa~NkaTamuktaH satyaniyuktaH | sarvajanottamatAM samupaiti svAmI bhUmerbhavitA dhanyaH || 126|| svAmin ve~NkaTaramaNa shrIman kAmitadAnadhurINa vibho | mAmatidInaM pAlaya dayayA staumi tavA~N ghridvayameva || 127|| seve sheShAdrIshaM bhaktyA doShAtItaM toShaM prAptum | shrIbhUmIshaM shrIdaM nR^iNAM sAbhiprAyAmnAyairgamyam || 128|| sAkShAd viShNuM lakShmIkAntaM prekShAlakShyaM mokShAdhIsham | pakShIDvAhaM rakShAdhuryaM drakShyAmyekaM kukShau yanme || 129|| kShetraM shrIve~NkaTAdriH shritatarudR^iShado ghAtavo devarUpA\- stattvAni prANinaH syustanukaraNagatA devatA devatAshcha viprAdyA bhojanAdyaM pratidinaniyataM pUjanaM ve~NkaTeshaH kShetraj~nastatra chaitanyamakhilaparipUrNaM paraM brahma satyam || 130|| tvannAma smaratAmaghaughashamanaM tvadbhaktibhAjAM sadA yogakShemasamR^iddhirIpsitaphalaprAptirnirAyAsataH | tvatsevAdhigatAtmabodhakagurushrIpAdukArchAvatAM brahmaprAptirapi prasiddhamakhilaM shrIve~NkaTAdrIshvara || 131|| surakShitashchAsmi tavAshrayAdahaM jagatprabho dInasharaNya viShNo | pAlyastvayetashcha sadaiva sAdaraM trAtA na chAnyo mama ve~NkaTesha || 132|| dUraM durApaM cha durAtmanAM hariM pAre girAM svAnubhavaikalabhyam | hiraNyagarbhAdyamarArchitA~Nghri varaM shriyaH sheShagirau shrayAmaH || 133|| uragapatishikharishikharAkalinavasatiM charaNanatajanasuhinakaraNachaNakaruNam | varadamurusuguNagaNaparikalitadivyA\- bharaNamatasIsumasamAnaruchimIDe || 134|| chidAnandarUpaM sadAtmasvarUpaM nirAkAramAdyaM parAkAravedyam | jagadvakShabIjaM samaM devabhAjaM bhavAdhipraNAshaM bhaje ve~NkaTesham || 135|| trayIchorahantA mahIdhrasya dhartA mahIgolabhartA mahAdaityabhettA | balerbhUmihartA nR^ipatrAtakartA dashagrIvahantA harive~NkaTeshaH || 136|| kalindAtmajAkhelanaH kaMsahantA kalau daityasa~Nghasya sammohakartA | kurAjavrajadhvaMsanaH ko.api kalkI harive~NkaTesho haratvasmadArtim || 137|| anAthasya nAthastvamevAsi viShNo sanAthastvayAhaM na me.anyo.asti nAthaH | athAnR^iNyamArogyamAyuH sukhaM me tvameva prayachCha prabho ve~NkaTesha || 138|| mano me samAdhatsva mAM pAhi viShNo mahAkrodhajuShTaM mahAmohaduShTam | muhurmInaketuprabhAvApakR^iShTaM nikR^iShTasvabhAvaM bhavadbhaktamIsha || 139|| mamArogyamAyuShyamAnR^iNyamarthaM yashaH puNyamAnandamIsha prayachCha | prapannArtihArin prabho ve~NkaTesha prasIda tvadekAvalambasya viShNo || 140|| viShNo mAmava vismR^itishIlaM vishvavyApaka mAM pAhi | ve~NkaTanAyaka vetsi samastaM vettR^itvaM me dehi vibho || 141|| varAbhayadarAribhR^itkarasarojamArAdhaye purAntakasurAdhipadviradavaktrapUrvArchitam | girAmatitarAmuraHsaravarAtmake sarvadA virAjaduruvigrahaM varadamarthinAM shrIpatim || 142|| kR^ipArasakarambitAn kamalasundarAnindirA\- kapola parichumbinaH kaluShahAriNaH kA~NkShaye | kalau kushaladAyinaH kalita bhogirADbhUdharAn kaTAkShasubhagodayAn paramapUruShasyAnvaham || 143|| shrImadve~NkaTanAyaka bhagavan kAmitadAnadhurINa vibho | chAmIkaranibhachelavirAjita bhUmIvava mAmava sadayam || 144|| pannagararAjamahIdharamastakasannihitAvirbhAvasya | chinmayamUrti chetasi kalayan tanmayatAmApnoti naraH || 145|| sheShagirIndraM shritavati deve doShavihIne duritArau | sarvArtheshe sAkShiNi bhagavati sarvasvaM te kuru chetaH || 146|| ghaTAdeH kulAlaH paTAdeH kuvindo gR^ihAdeshcha kAruryathA lokadR^iShTaH | prapa~nchasya kartA tathA vedadR^iShTa\- stvamevAsi viShNo phaNIndrAdrivAsin || 147|| yathA svApnikasya prapa~nchasya kartA sharIrAbhimAnI shrutastaijasAtmA | tathA jAgrato.api tvamevAsi vishva\- stvadanyo.asti ko vA hare ve~NkaTesha || 148|| na me ki~nchidasti tvadIyaM hare svaM svatantrastvamevAhamasmi tvadIyaH | atashchAsvatantratvataH kiM nu kuryAM tvadIyAM saparyA kathaM ve~NkaTesha || 149|| kalau ve~NkaTeshAt paraM nAsti daivaM yatastasya bhaktA jayanti prakAmam | na teShAM parAbhUtirAtmAkhilAnAM tamIshaM bhajAmo hariM shrInivAsam || 150|| bhaje ve~NkaTeshaM bhavabhrAntinAshaM surANAmadhIshaM supuNyopadesham | viha~NgeshavAhaM vinirmuktamohaM chidekapravAhaM mude yAmi so.aham || 151|| kalau yuge ve~NkaTanAyakasya kalyANamUrteH kamalAshrayasya | nAmasmR^itiH sarvarujApahantrI sa eva devo bhiShajAM bhiShaktamaH || 152|| shrIve~NkaTeshaM smaratAM na rogaH shrIve~NkaTeshaM bhajatAM na duHkham | shrIve~NkaTeshaM namatAM na bhItiH shrIve~NkaTeshaM viduShAM na chintA || 153|| shrInivAsa jagatAM nivAsa te mAnavAkR^itimivAshritaM vapuH | dInarakShaNavidhAnadIkShitaM dhyAnagocharamihAstu me sadA || 154|| shriyaH kaTAkShairabhiShiktamUrtiM payaHpayodhau vaTapatrashAyinam | vibhAvaye ve~NkaTashailamastake vibhrAjamAnaM harinIlabhAsA || 155|| shriyaH sahAyaM shritakalpabhUjaM sheShAdrigaM doShavivarjitaM harim | samastalokaikasharaNyamachyutaM sukhaikatAnaM sharaNaM bhajAmaH || 156|| shrIsheShashailaM shritakalpasAlaM shrIve~NkaTAkhyaM shrutapuNyamukhyam | vande hariryatra vasatyajasraM vandAravo yasya surAH sahasram || 157|| trayImayI yasya hi puNyamUrtistrayantakUTo.avatu ve~NkaTo naH | yatraiva nityaM ramate ramesho dhAtrAdibhirdevagaNairupAsyaH || 158|| surAlayAdeSha suvarNashailAt kailAsato vApi himAlayAdvA | vindhyAt punarmandarato.api ramyaH shrIve~NkaTArviradashcha puNyaH || 159|| yatrodakaM viShNupadAnuSha~NgAd ga~NgAmbhaso.apyuttamatIrthamAhuH | purANavAkyAni sa ve~NkaTAdriH punAtu puShyaH kalikAlikAnnaH || 160|| yadAshritAnAmanaghatvasiddhiryatratyatIrthAmbuniShevaNena | airammadIyAmR^italabhyalAbhaH sa ve~NkaTAdriH sulabho mamAstu || 161|| bhAnuprabhAmaNDalabhAsurANi bhAsvanti kArtasvarakAntito.api | jyotIMShi sheShAchalashR^i~NgabhA~nji jvaraM harantvIkShaNamAtrato naH || 162|| ghanAshrayatvAd ghanasArashItaH pravAti vAtaH prachuro hi yatra | tatraiva vAso.astu nirantaraM me shrIve~NkaTAdrau shritatApahAriNi || 163|| yatropalA daivatamUrtikalpAH kalpadrukalpAstaravo.apyanalpAH | supuShkalaM puShkariNIjalaM cha naH sArthatIrtho.astu sa ve~NkaTAdriH || 164|| adhityakAyAmamarAdhivAsaprasAdhitAyAM puruShottamasya | virAjate yatra vihArabhUmiH sa ve~NkaTo.adriH sharaNaM mamAstu || 165|| guhAshaye yatra harirvirAjate gajendrasantoShakaraH sushAntaH | nAnyatra tasmAdavirodhayuktaH shrIve~NkATAdriM sharaNaM bhajAmaH || 166|| maharShisevyaM manujairupAsyaM mukundamukhyairamarairadhiShThitam | mUlaM mahimno mahasAM nindAnaM mahAphaNIndrAdimahaM bhajAmi || 167|| vihArabhUmirvanamAlino.ayaM vilAsahetuH kamalAdhinetuH | vivekinAM ve~NkaTanAmako.adrirvedAtmakatvaM vivR^iNoti hi svam || 168|| shrIsvAminaH puShkariNItaTasthamashvattharUpaM praNamAmi devam | yatsannidhau bhaktajanasya nityaM bhavanti karmANi shubhapradAni || 169|| bhUtAni bhetAlapishAchayakShapretAni sheShAdrinR^isiMhatIrthe | yaH snAti taddehamapAsya muktiM prayAnti rakShAMsi cha tatkShaNena || 170|| govipranArIshishusarpahatyAnAstikyatatkAryabhavAnyaghAni shrIve~NkaTAdrau kapilasya tIrthaM niShevya nashyanti narasya tatkShaNAt || 171|| tachchakratIrthaM smR^itimAtrato yad rugNasya rogArtimapAkaroti | tIrthaM cha sha~Nkhasya sukhAya yatra sa ve~NkaTAdriH sukhayatvihAsmAn || 172|| yatpuShkariNyAmavagAhya martyaH pApAni sarvANi vidhUya sadyaH | yomyo bhaved ve~NkaTanAthamIkShituM sa ve~NkaTAdriH sharaNaM mamAstu || 173|| yadIyasopAnamupArurukShorbhavenmumukShoriva bhUmikAptiH | vishrAmabhUmishcha marutpathasthaM shrIgopuraM naH sa punAtu ve~NkaTaH || 174|| adhityakAyAmaravindanAbhashrImUrtinityotsavayogyarUpaM vedAntavAkyArthamayaM vimAnaM virAjate yasya sa ve~NkaTAdriH || 175|| dainandinA vAravisheShalakShyAH pakShoditA mAsagatAshcha vArShikAH | mahotsavA yatra hareranargalAH bhavanti taM ve~NkaTashailamAshraye || 176|| samasta deshAgatabhaktasa~NghaiH karArpaNadravyasamarpaNAya | yaH pratyahaM pUrNatanustamadriM shrIve~NkaTAkhyaM sharaNaM bhajAmaH || 177|| upAsakArthArpaNayogyarUpaM kaTAhayugmaM purataH shriyaH pateH | nirantaraM nANakanAdadanturaM prakAshate yatra sa ve~NkaTAdriH || 178|| surAH paraM bhUsurarUpametya brahmotsave yatra hariM didR^ikShavaH | pratyakShameShyanti kalau tamAshraye shriyaH paterAyatanaM girIndram || 179|| kalau yuge kAmaratasya jantorbhaktasya sa~NkalpitasAdhanAya | dayA babhUveshitura~njanAdrau sA mUrtimatyasmadabhIShTadA syAt || 180|| bhadrAtmane bhadrakarAya dehinAM garutmadudyadrathaketanAya | varapradAyA~njanashailagAya tejasvine shrIpataye namo.astu || 181|| tave~NgitaM vettumihAkhilesha prakalpate kaH phaNishailamauleH | taTe niShaNNasya ramAdhinetuH svashaktileshena jaganti shAsataH || 182|| shriyaHpate jovagaNasya dehaM j~nAnaM cha tatsAdhanasAdhyabhogyAn | prAdAH purA tvaM kR^ipayA mamApi tvameva nAthaH paripAhi mAM tvam || 183|| adyAshanaM dehi jagannivAsa tvadekanAthAya cha ve~NkaTesha | dAsAya mahyaM muhurarthine tvAM smR^itvApnuvantIpsitameva santaH || 184|| indindirendIvaramechakena vR^indArakendrArchitapAdukena | chandradyutidyotidarasmitena shrIve~NkaTeshena vayaM sanAthAH || 185|| yachchintitaM duShkR^itameva chetasA pApaM mayoktaM vachasA cha yat kR^itam | kAyena tat sarvamaghaM kShamasva shrIve~NkaTeshAshritarakShaka tvam || 186|| anantakalyANaguNAkarasya sheShAchaleshasya padAbjabhaktiH | anantakalyANasukhaM tanoti jantorasheShasya jagattraye.asmin || 187|| shriyaHpate ve~NkaTanAyakashcha kalau yuge tvaM varado.asi nR^INAm | asmatkulAdhIshvaramIpsitAptyai sarveshvaraM tvAM sharaNaM bhajAmaH || 188|| dhanaM namatsarvasukhaikamUlaM dhanAya sarve.api sadA yatante | dhanaM prayachCha priyamadya mahyaM dhaneshvarastvaM khalu ve~NkaTesha || 189|| sachchitsukhAkhaNDarasaikarUpaM sAkShAt parabrahma girAM durApam | shrIve~NkaTeshaM shritaduHkhanAshaM shriyaH patiM madgatimAshrayAmaH || 190|| ma~NgAmbikAjAniramandabodhamAhAtmyasampatsukhashaktirUpaH | mahIndirAbhyAM parisevyamAnaH shrIve~NkaTesho mudamAtanotu || 191|| satyodbhavAM saMvidudArakANDAM satkarmapuShpAM sukR^itapravAlAm | AnandapUrNAmR^itasatphalADhyAM sheShAchale kalpalatAM bhajAmaH || 192|| jIvA na jIvanti binA bhavantaM lokaika sa~njIvana jIvasAnj~nam | svAdhInamAyaM parameshvaraM cha shrIve~NkaTAdrIsha nirastamAya || 193|| sachchitsukhAkhaNDamayAtmamUrte sarvaj~na sarveshvara divyashakte | lakShmIpate ve~NkaTashailanAtha vilokyAsmAn sadayairapA~NgaiH || 194|| anantakalyANaguNaikadhAmA samA~nchitAchintyavichitrabhUmA | pAramyasImAnvitasatyabhAmA sheShAchale kAchana ko.api bhAti || 195|| samAnashUnyo.apyadhikena hIno ramAsanAtho jagatAM sahAyaH | pumAn purANaH shritave~NkaTAdrirmamAstu nityaM sharaNaM dayAluH || 196|| sarvAtmanAM tulyadR^igIshvarastvaM svAmI sahAyaM kuruShe piteva | tathApyaho.apyAshritapakShapAtI kuto.asi bho ve~NkaTashailanAtha || 197|| phalAbhisandhyA tvashanAdyabhAvaM tapo bhavennAnashanaM hi kiM tu | tyAgaH phalasya tvayi ve~NkaTesha tapastadevAnashanaM hi manye || 198|| shrIve~NkaTeshaM shritaduHkhanAshaM kR^itAvatAraM kalitAraNAya | mukundamAdyaM munivR^indavandyaM madhvAdividhvaMsakamAshrayAmaH || 199|| shriyaHpate ve~NkaTashailanAtha sarvaj~na sarveshvara sarvashakte | sarvAntarAtmannaravindanetra svAmin padaM te sharaNaM prapadye || 200|| shrIve~NkaTeshAhvayamAshrayAmashchintAmaNiM satsukhachitsvarUpam | phaNIndrashailasya phaNAmaNiryathA virAjate.anarShyaguNaH sadA yaH || 201|| jagatpatirve~NkaTashailagamyaH shriyA dharaNyA shritasevyapAdaH | jayatyajasraM jitadaityavargo devastutashchakradharo mukundaH || 202|| aki~nchanaM mAM paripAhi viShNo nisarganirvyAjadayAsamudra | yatki~nchidastIha madIyapuNyaM yadIsha tad vardhaya ve~NkaTesha || 203|| tvamuttamarNo.apyaghamarNatA me tato.abhavat sarvamapIha vastu | tavaiva no me kimahaM samarthaH kuryAM vibho ve~NkaTashailanAtha || 204|| dAtuM samartho.asi pumarthajAlaM pAtuM prabhuH svAshritajIvajAlam | mAM pAhyato ve~NkaTashailanAtha tvAM pAlakaM prArthayate na ko nu || 205|| sheShAdrivAsI sharaNaM harirnaH keShAmasau yachChati kAmintArtham | yeShAM manastasya padAravinde teShAM hi nAnyeShu tanoti toSham || 206|| shriyaHpatirnaH shriyamAtanotu dahatvadhaM ve~NkaTanAyako me | sa pAtu yaH pAlayati prapa~nchaM mAmIshvaraH prerayatu prakAshe || 207|| shrIvai~NkaTeshasmR^itichitsukhAkhyaphalopabhogAptamahAnubhAvaH | AyuShyamArogyamudArabhAgyaM j~nAnaM cha viShNoH padamati dhanyaH || 208|| shrIve~NkaTeshasmaraNauShadhaM naH samastaduHkhAni nirAkaroti | shrIve~NkaTAdrIshvaramantrarAjastvasadbhayaM shAmayati prakAmam || 209|| brahmotsavaM sheShagirIndraneturnirIkShate bhaktiyutaH pumAn yaH | aMho nirasyAptasamastakAmaH paraM padaM vaiShNavameti satyam || 210|| shrIra~NgashAyI parichintya sarve chiraM jagadrakShaNatantratattvam | kalau yuge ve~NkaTashailanAthaH karoti lekaraya cha tena rakShAm || 211|| sheShAdrimaulau shivali~Ngamarchayan viShNutvametyAkhilarakShaNAya | shrIve~NkaTeshAtmaka AvirAsIt taM devasenApatimAshrayAmaH || 212|| Agatya shambhoravatAramUrtiH shrIve~NkaTeshasya kalAbhivR^iddhadhai | yantraM dhanAkarShaNamalilekha yatraiva taM sheShagirIndramIDe || 213|| ma~NgAmbikodbrAhakR^itAdhamarNamAtmAnamIsho.api samuddidhIrShuH | gR^ihNAti bhaktArpitamarthamIpsitaM pratyarpayan yatra sa ve~NkaTAchalaH || 214|| abhyarthitairvyAdhinipIDitairvA dhanArthibhirjIvanakAlibhishcha | bhaktyarpitaM prApya karaM pradiShTaM pratyarpayed yatra hariH sa ve~NkaTaH || 215|| yanmauligaM shrIpatidivyarUpaM yatraiva siddhA bahavastapasvinaH | devAMshajA yatra vasanti jantavo jayatyasau sheShagirirmadIshaH || 216|| unmUlayed vA~Nmalamasya kIrtanaM mUrtirmalaM chAkShuShamunmR^ijennaH | smR^itirmalaM mAnasikaM nihanyAchChrIve~NkaTAdreH kimito.adhikaM shivam || 217|| shrIve~NkaTeshAyatanoditaM hi tIrthaM pibantaH shirasA vahanti | shrIpAdareNuM satataM labhante shanerdine tvekubhujaH sukhAni || 218|| kalau yuge pApini nAstikADhye shrIve~NkaTeshAhvayamasti daivam | yadAstikAnAM varadaM variShThaM pratyakShametaddhi mayAnubhUtam || 219|| satyapratij~naM saphalaM hi kuryAt tathAnR^itA~nChikShayatIva bhItim | utpAdayed bhaktiyutaM muhustaM sa~njIvayedeSha dayAlurIshaH || 220|| paThanti padyAnyapi yatra mUkA jAnanti mUDhAH kuNayo likhanti | pashyantyathAndhA badhirAshcha tadvachChR^iNvantyo sheShagiriprabhAvAt || 221|| pa~NguH samArohati ve~NkaTAdriM vandhyAshcha haste shishumudvahanti | dadAti dIno.api mahAdhanAni pApI sukhaM yAti hareH prasAdAt || 222|| asheShadevAMsha visheShaveShaM niHsheShitAnantavikarmadoSham | sheShAdribhUShAyitadivyamUrtyanmeShaM muhushchintaya shemuShIsham || 223|| shrImadve~NkaTanAyaka mAmakkuladaivataM tvamevAsi | kAmitadAnadhurINaH kalau yuge na tvadanyo.asti || 224|| padmAlyAsahAyaM madIyachetashchakorapUrNendum | ma~NgalamUrti ve~NkaTashR^i~NgAlayamIshamAkaye || 225|| rAkAshashA~NkavadanaM rAkShasamathanaM kR^ipAsadanam | saundaryavijitamadanaM sauguNyasyaikatAnahamIDe || 226|| shrIsheShashailavAsI shriyaHpatirnaH shriyaM dishatu | svAshritajanachintAmaNirakhilAtmaivAshrayo.asmAkam || 227|| atha mama ki~nchanamadhakR^itamashaktamaj~naM tvameva mAM vetsi | sarvaj~na sarvashakte sarveshvara, ve~NkaTesha paripAhi || 228|| ve~NkaTanAtho bhagavAn vedastutavaibhavo dhavo.asmAkam | vitaratu vij~nAni muhuH pratidinamakShINabhogabhAgyAni || 229|| ApannivArako naH ko.api pumAn ve~NkaTAdrikR^itavAsaH | vijayati devashikhAmaNirojasvI rakShako jagatAm || 230|| sheShAdrishikharadhAmA doShAn spR^iShTaprashastaguNabhUmA | shrIve~NkaTeshanAmA shriyaHpatirmadgurushcha tannAmA || 231|| yogArUDho bhagavAn bhogIndragirau cha tintriNImUle | valmIkAbhivyakto virAjate ve~NkaTeshAkhyaH || 232|| anvahamabhiShi~nchantIM kShIraM valmIkamUrdhni gAM viShNuH | trAtuM dadhau jighAMsorgopasya kuThAraghAtamantaH stham || 233|| kupitasya gojighAMsoH kuThAraghAtaM vahan mUrdhnA | tadvraNashAmakamauShadhamIshaH sheShAchale niShannasti || 234|| suravaravanditacharaNaM karadAyiShu sajjaneShu sAdaraNam | varave~NkaTagirisharaNaM paramaM jyotiH sadAstu me sharaNam || 235|| puruShAyAstu parasmai purAtanAya prapa~nchalIlAya | puruhUtAdibhiramaraiH puraskR^itAya praNAmo.ayam || 236|| ve~NkaTaramaNAya namaH sa~NkaTaharaNAya sAvusharaNAya | rA~NkavasA~NkavaghanasArA~NkitavapuShe ramAvihArajuShe || 237|| varivasye ve~NkaTagirisharaNaM karuNAlumindirAramaNam | harimakhilalokarakShaNadhurINamAmnAyamastakAbharaNam || 238|| vR^indArakagaNavanditamindIvarasundaraM darasmeram | vande ve~NkaTabhUbhR^inmandiramAnandavallarIkandam || 239|| atasIsumasa~NkAshaM shatamakhamukhyAmaravrajAdhIsham | kR^itaduShTadanujanAshaM satataM shrIve~NkaTeshamahamIDe || 240|| padmAvatIvivAhe padmadhanarNaM kuberataH kR^itvA | padmadvayadhanakA~NkShI sadmani sheShAdrige harirvasati || 241|| krItvA varAhadattaM kShetraM vittena sheShagirimaulau | praNayakupitendirAyAH prasAdanArthI hariH kalau vasati || 242|| bhR^igumunipadahatidhUsarabhagavattanusa~NgamAkShipantIva | praNayakupitendirAsInma~NgAmbA sheShabhUbhR^ito nikaTe || 243|| AkAsharAjatanayAmAkA~NkShan ve~NkaTAchale viShNuH | mR^igayAmaTannavApa prAk padmAM praNayakopatadrUpAm || 244|| ve~NkaTabhUdharashikharaprA~NgaNabhuvi tintriNImUle | bhaktAvanAya bhagavAn vyaktAkR^itirasya vasatiM valmIke || 245|| shampAsanAbhichelaM sampAditasarvabhaktasAphalyam | taM pAlakaM tri~njagatAM champasamanAsamAshraye devam || 246|| a~njanagirikR^itavasatiM ra~njakamakhilasya bhaktalokasya | ku~njaravaradaM kalaye ka~njadR^ishaM ve~NkaTeshamiShTAptyai || 247|| kA nAma devatAnyA mAnAvanadIkShitAsmAkam | dInAnAthasharaNyaM j~nAnAnandAtmakaM hariM tyaktvA || 248|| kalashAtapatraketanakulishA~NkushachakrapadmarekhAbhiH | vilasatkarAbjamIDe kuladaivaM ve~NkaTAdrikR^itavAsam || 249|| vastvastyanantabhUbhR^inmastakavasatipradarshitAkAram | svastyayanaM sAdhUnAmastamitAj~nAnamasmadArAdhyam || 250|| ve~NkaTamahIghramaulau vyaktaM shivali~Ngamarchayan skandaH | viShNutvametya tatphalavisheShayogena vaiShNavesho.abhUt || 251|| kalikAle.api kalAbhiH kalitaH ShaDbhiH kumArasya | kamalApateshcha dashabhiH kalyANaM ve~NkaTeshvaraH kurute || 252|| vemiti kalimalamakhilaM kaTatIti dahatyasau skandaH | ve~NkaTasubrahmaNyaM taM vande yatra vaiShNavaM dhAma || 253|| shivali~NgArchanasukR^itaM bhavati hi viShNutvasAdhakaM jantoH | ve~NkaTasubrahmaNyo viShNurbhavitaiSha viShNukalpAnte || 254|| nIlaghanaruchiragAtraM nirupamavishvAtishAyichAritram | lakShmIkaTAkShapAtraM lakShyaM bhaktairmaho.asti supavitram || 255|| vastvasti sheparaule varadAbhayasha~Nkhachakrashayashobhi | vishvAmaragaNamukhyaM vikhyAtaM ve~NkaTeshAkhyam || 256|| ramate ramayA sAkaM ramaNaH sarvaprapa~nchasya | kamalAkShaH sheShAdrau shamayannaMhAMsi bhaktAnAm || 257|| OM tat saditi padairyat satataM nirdishyate paraM brahma | satyaM tachchaitanyaM nityaM shrIve~NkaTesharUpaM hi || 258|| prANiShvavyAjakR^itaM vANIpatipitaramachyutamanAdim | pUrNashashivaktramanishaM pUrNaguNaM shrInivAsamahamIDe || 259|| yadviShayAj~nAnabhavaM yatrAdhyastaM jaganmithyA | yajj~nAnena tadekaM satyaM vastvasti ve~NkaTeshAkhyam || 260|| brahmaiveshvarasAnj~naM svamAyayA ve~NkaTeshAkhyam | rakShatyAtmAvidyApratibimbitajIvakoTimapi kR^ipayA || 261|| atra khalu pratyakShaM sheShAdrau shrInivAsAkhyam | prArthitadAnavariShThaM sadayaM bhakteShu sarvadA daivam || 262|| ma~NgaladevI mahiShI yatputraste pitAmaho jagataH | Ayudhamapi cha sudarshanamatyadhikaM ve~NkaTesha sAmrAjyam || 263|| vidyAdhidevatA te snuShA tvadIyAn guNAn paraM stauti | vAgAtmanA tvameva svAtmAnaM stauShi ve~NkaTAdrIsha || 264|| vishvAsarUpiNaste vedAstvayyeva nityamanuraktAH | sArasvatasarvasvaM tvadekaphalakaM hi sheShagirinAtha || 265|| sheShagirIshaM stotuM sheSho nAlaM sahasravadano.api | AjanmasiddhajaDimA kimutAhaM shukavadatra kiM vachmi || 266|| nAhaM vadAmi vachanaM vAchayitA ve~NkaTeshvaro vasati | hR^idaye sadayaH satataM madAgaso nAvakAshalesho.api || 267|| jaya jaya nijachichChaktipratibimbitavividhalokavishvAtman | shrIve~NkaTesha bhagava~nChritajanasaMrakShaka svAmin || 268|| sheShagirIshvara tAvakakalyANaguNAH kathaM nu gaNyAH syuH | yadi sheShitAkhilAnAM jIvAnAmapyasheShANAm || 269|| ve~NkaTaramaNo bhagavAn vetti madIyAghamarNatAkhedam | vitarati vittaM kR^ipayA viShNurvikhyAtabhaktajIvAtuH || 270|| bhaktebhyastvamabhIShTaM bhagavan yadi na dishasi tvamIsho.api | tAvakanirvyAjakR^ipA kAM kIrtiM prApnuyAd dattvA || 271|| viShNuH parama iti shrutirUche yatpareShAM te | dattvA cha mAM parebhyaH paramo.asi tvaM kathaM nu tad bhagavan || 272|| kArayasi tvamR^iNArNaM tasya nivR^ittau dhanAni dApayasi | shrIve~NkaTesha bhagavannAnR^iNyaM tvatprasAdino bhavitA || 273|| nijatanuvanitAtmajagR^ihadhanamukhyaM yanmameti sarvasvam | shrIve~NkaTesha bhagavaMstavaiva chAhaM dvitIyo.asmi || 274|| tvadbhaktaM manvAnAnAmasmAkaM vivekavidhurANAm | tvannAmasmaraNavatAM mAnachyutimIkShase kathaM viShNo || 275|| dhanalAbhasyApAyaM ki~nchit sandarbhya kR^ichChramaghahetum | tatrApi bhayamalAbhaM kiM me darshayasi ve~NkaTAdrIsha || 276|| itthaM karoShi chedahamadhamarNatvaM kathaM nirAkuryAm | bhIto.asmyabhayaM yAche tvAmeva shrInivAsa tad dehi || 277|| vanitAtmajAdinijajanasahavAsaM kA~NkShataH prabho yanme | AkArayituM tAniha dhanadaurlabhyaM karoShi kiM shrIsha || 278|| hara me manAMsi kartuM rayena yAyAnnaro.adya sheShAdrim | yena shrIharidarshananamaskriyAdau yathechChalAbhaH syAt || 279|| shrImannadya hi jagatAM nivAsa sheShAdrivAsa govinda | mAmatidInaM kR^ipayA pAhi pratipanthishamanamAkalayan || 280|| shashiravilochana mAdhava parameshvara te jagatpate yadaham | ve~NkaTaramaNa shrIman jaya viShNo shrInivAsa bho bhagavan || 281|| pannagarAgirimastakamandiravAsiprapannasaubhAgyam | chinmayarUpaM tejashchitte nityaM chirantanaM me.astu || 282|| annamayAdyAvaraNaiH pa~nchabhiratyAdaropagUDhadhanam | shrIve~NkaTesharatnaM svAtmAkhyaM pUrNamasmyato.asmi dhanI || 283|| sukhataramakhilasukhAnAM j~nAnAnAmuttamaM j~nAnam | satyAnAmapi satyaM svaM me vastvasti ve~NkaTeshAkhyam || 284|| uptvA bIjaM ve~NkaTanAthaH saMvitphalAni santanute | shrIve~NkaTAchalapate shrImantaM tvAM bhajAmi govindam || 285|| nijabhaktalokamAnasasukShetre.atyarthasuprasAdAkhyam | uptvA bIjaM ve~NkaTanAthaH saMvitphalAni santanute || 286|| shrIve~NkaTAchalapate shrImantaM tvAM bhajAni govindam | svAmin prayachCha kR^ipayA mahyamudArAM manorathAvAptim || 287|| sheShagirinAtha tAvakacharaNayugAlambishemuShIyogAt | niHsheShitadoSho.ahaM toShaM yAsyAmi te kR^ipayA || 288|| shrove~NkaTAchaleshvara tAvakashaktiH samastajIveShu | AnandachiddhanAkhyA svAnubhave bhAti tAmahaM kalaye || 289|| sheShagirIshapadAmbujashekharitAtmAshritaH saukhyam | saMvitsattArUpaM sauvargaM yAti sarvadA sAkShAt || 290|| karavANi ve~NkaTeshvaracharaNaM sharaNaM samastajIvAnAm | duritanivAraNanipuNaM dUrIkR^itaduHkhamasmadAdaraNam || 291|| shrIve~NkaTesha bhagavan shritajanachintAmaNe jaya shrIman | mAM pAhi satyabhUman mukunda vishvAtmaka svAmin || 292|| AvAsaM karuNAyA adhibhUmiM sarvasuguNatateH | AnandabodhamandiramAlambe ve~NkaTAdrIsham || 293|| gauriva vatsaM bhagavan govinda shrInivAsa mAmadya | tAvakakaruNAmR^itarasatara~NgiNI ve~NkaTesha tarpayatu || 294|| kamanaH kamalabhavAyAH shamanaH saMsAraghoratApAnAm | damano durAtmanAmapi sumanaH sevyo.asti ve~NkaTAdrIshaH || 295|| ve~NkaTashailaniveshe vijayati vishvAvane shrIshe | bhaktajanAnAM bhadraM nirupadravameva bhavati nirnidre || 296|| vitarasi vittaM viShNo ve~NkaTanAtha shriyaH pate mahyam | yogakShemau vahase yogIshvara me tvadAshritasya sadA || 297|| vidhimiha vidherapi tvAM vidmaH shrIve~NkaTesha varadaM naH | vij~nAtasarvatattvaM vij~nAnAnandasatyabhUmAnam || 298|| hariravatu ve~NkaTAchalasharaNaH sarvArthavarganutacharaNaH | asmAnudArakaruNaH kalyANaguNo ramAramaNaH || 299|| kamalAnAtha kaTAkShAn kalaye.ahaM kalpapAdapasadR^ikShAn | durjana shikShaNadakShAn sajjanasaMrakShaNaikadIkShAMshcha || 300|| shrIve~NkaTAchalapate ve~NkaTamachalaM patiM cha tvAm | shrImantamapi purANAnyAhustvaM vijayase virANamUrtiH || 301|| mantusahasraM kR^itavatyanto mayi pAtakasya naivAsti | kShantavyo.asmi tvAM shrIkAntaM seve phaNAbhR^idadrIsham || 302|| nijacharaNAshritajanatAvananiratAM devatAM bhaje kA~nchit | shrIve~NkaTeshvarAkhyAM shrImanto yatprasAdino manujAH || 303|| kalikaluShatArakaM te kalaye kalyANaguNanidhe bhagavan | shrIve~NkaTeshvareti cha nAmAmR^itatulyameva jihvAyAm || 304|| kaTvamlalavaNarasamayakarAlanarasiMhaduHsahAkAra | shrIve~NkaTAchalapate krodhamayastvaM kathaM nu satsevyaH || 305|| kShutkShAmaM tvAM seve kShutkShAmo.ahaM tato.abhavaM khinnaH | sarvAdhAragatAt te ve~NkaTaramaNasya duHkhitA na kutaH || 306|| lakShmIpatiriti nAmAnarthaM tava yena bhaktalokasya | dishasi tvaM bhikShukatAM tadvittaM prApya ve~NkaTAdrIsha || 307|| bhaktajanadattavittaM pratigR^ihya na lajjase kathaM shrIman | dIneShu teShu khidyatsvapi te na dayA phaNIndra girirAja || 308|| vittAshayA karaM te dAtuM sa~Nkalpya ka~nchidatha dattvA | riktastvattastadR^iNaM khidyati labdhvA phaNAbhR^idadrIsha || 309|| tava kila sarvaM vittaM tvadbhaktasyAsti kinnu tadbhinnam | niHsvaH kiM vA dadyAt karadAnaM ve~NkaTesha kathayasva || 310|| svatvamathAropyAtmanyabhimAnI tatprayuktasa~NkalpaiH | klishyati bhaktastadbhramanivR^ittaye ve~NkaTesha tat kuruShe || 311|| pAlayitumenamIdR^ishamasamarthashchejjagatpate dInAn | kathamiha sarvAnavasi shrIve~NkaTashailanAtha kimashaktaH || 312|| bhrAmyata eva hi jIvAn yoniShvapi chaturashItilakShAsu | sarvAMstvameva pAlayasItyAhurve~NkaTesha vedAntAH || 313|| pAlanashaktisametastvamimaM dInaM kathaM na pAlayase | shakteH sa~Nkocho vA tvaM vApyalaso.asi ve~NkaTAdrIsha || 314|| athavA nirghR^iNatA te laubhyaM dR^iptatvamanabhimAnitvam | doShA ete tvayi kiM santi vada shrInivAsa kiM brUShe || 315|| shrImadve~NkaTagirivaradhAmAnaM chitsukhaikabhUmAnam | kAmitadAnadhurINaM kalaye kalyANakalpatarumIsham || 316|| vande ve~NkaTanAyakasundaracharaNAravindayordvandvam | advandvamakhilasaMsR^itinirdvandvaM dvandvaduHkhapariharaNam || 317|| sheShi~nCheShamahIbhR^iti sheShe tvamasheShavandyacharaNo.asi peShaya madIyapApaM shoShaya duHkhArNavaM cha jagadIsha || 318|| dakShiNanayanaM viShNordUre tamasAM nirastaduritaM cha | ArogyadAyi kalaye ve~NkaTaramaNasya vA~nChitAvApyai || 319|| dInAnAthasharaNyaM devaM shrIve~NkaTeshamahamIDe | duritatimiraughamihiraM dUrIkR^itaduHkhamakhilashubhanilayam || 320|| vyAdhiyAlasuparNaM suparNavAhaM cha ve~NkaTAdrIsham | kalaye kamapi rameshaM kalikalupaharaM kR^ipApUram || 321|| bhu~Nkte brahmakShatrAdyakhilajagatkabalamekamiva devaH | upadaMshIkR^itamR^ityuH sa tvaM shrIve~NkaTesha mAM pAhi || 322|| AdityAntarvartijyotirmUrtirhiraNmayaH puruShaH chakShuHprakAshakastvaM jagatashchakShushcha ve~NkaTAdrIsha || 323|| tvaM daharapuNDarIke kShetre kShetre vibhAsi sUkShmAyAH | dIpashikhAyA madhye paramAtmA ve~NkaTAdrIsha || 324|| shrotavyastvaM shrotA shravaNamapi shrIpate tvameveti | shrutirAha ve~NkaTAdrau shrautArthaM tvAM prapadye.aham || 325|| vaktA vAg vaktavyo vAchayitA ve~NkaTeshvaro nAnyaH | vachasAmabhUmirasya prabhorhi mahimA gatiH sa me devaH || 326|| tvAmaprApya vachAMsi shrautAnyapi yannivartante | saha manasA ve~NkaTagirinAtha kathaM gocharo.asi madvachasAm || 327|| dR^ishyaM draShTA dR^iShTistvameva yat sakalajagadadhiShThAnam | satyaM chitsukharUpaM ve~NkaTarAT tvAM kathaM nu pashyAmi || 328|| AdhivyAdhinivAraNamApannatrANamArtisaMharaNam | vande ve~NkaTaramaNaM vishvAmaravandyacharaNamurukaruNam || 329|| nijacharaNabhaktarakShaNanipuNo.ayaM ve~NkaTAdrikR^itasharaNaH | nityAnapAyakaruNaH kamalAramaNaH karotu kalyANam || 330|| varadarachakrAbhayakaramaravindAkShaM parAtparaM vastu | karuNaikatAnamAshritabharaNadhurINaM bhaje hariM bhaktyA || 331|| ve~NkaTashailavihArI vetti narANAM manogataM sakalam | devaH sa eva bhagavAn bhAvaM saphalIkarotu me kR^ipayA || 332|| sraShTA jagatAM sraShTuH pAlayitA pAlakAnAM cha | hantR^INAmapi hantA hare tvamevAsi ve~NkaTAdrIsha || 333|| bhagavan ve~NkaTanAtha tvadAj~nayA vAti vAyurAdityaH | ambaracharo vibhAti tvatto mR^ityurbibheti dhAvati cha || 334|| vande ve~NkaTanAthaM sakalabudhAshreyapAdapadmaM yam | ArAdhya bhaktibharitA rAjante devamAnitAH kAle || 335|| tvatpadapa~NkajahaMsAyitachittamimaM janaM kR^ipAjaladhe | mAM pAhi santataM tvaM bhaktAnAM kShemadAnakR^itadIkSha || 336|| OM tatsaditi yaduktaM brahma shrIve~NkaTAdrigaM dhyAye | tasmAt sarvopAsyaM sarvaj~naM sarvapUrNamAtmAnam || 337|| shrIve~NkaTeshama~NgalamUrtidhyAnaM janasya vimaladR^ishaH | sarvaM shrIviShNumayaM bhAti chidAnandarUpamahameva || 338|| yamayatyantaryAmI madantara~NgaM yathA yathAntaHsthaH | kalaye tathaiva kartA ve~NkaTagirinAyako nAham || 339|| dehadR^ishA jAto.ahaM jIvadR^ishA ve~NkaTeshAMshaH | AtmadR^ishaiva tu so.ahaM pratyagbrahmAdvayAnandaH || 340|| shrIve~NkaTeshakR^ipayA shrImatsvakhileShu bhaktavargeShu | kashchit tattvaM buddhavA sattAmAtro nira~njano bhavati || 341|| abhayamamR^itaM prapadya brahmAkArAntara~NgavR^ittiryaH | nirdvandvaH sukhasampatsattAmAtro bhaved viShNuH || 342|| nityaM shuddhaM buddhaM shAntaM shivamavyayaM chidAnandam | pUrNaM brahmAhamahaM brahma shrIve~NkaTeshapadalakShyam || 343|| bhAvAnAdyaj~nAnadvaitadhvAntapramApaNAdityAn | bhagavatpAdakaTAkShAn kalaye kalyANakalpavR^ikShAMshcha || 344|| jayati brahmAnAvR^itachidakhaNDarasaM jagad yatra | astIva ve~NkaTeshvarapadalakShye bhAti lIyate tatra || 345|| vedAntasArabhUtaistattvamasItyAdikairmahAvAkyaiH | shrImachCha~NkarabhagavachcharaNoktArthaiH prabodhitaH so.asmi || 346|| subrahmaNyamukhodgatasiddhAntArthastutiM viShNoH | paThatAM pApanivR^ittiH phalamabhilaShitaM bhavet satyam || 347|| iti subrahmaNyayogivirachitA shrItattvArthasArAvaliH samAptA | stotrasamuchchayaH 2 (59) ## The Tattvdrlliasaravali (59), in 347 verses of different metres, by Subrahmanyayogin is on Lord Venkatesvara on the hills at Tirupati. It refers to certain incidents in the story of the Venkatacalamahatmya to various tirtha-s and places of importance in Tirupati and to the tradition that the God in the shrine of Venkatesvara was originally Subrahmanya. Proofread by Rajesh Thyagarajan \medskip\hrule\obeylines Please send corrections to sanskrit at cheerful dot c om Last updated \today https://sanskritdocuments.org \end{document}