श्रीवरदराजस्तोत्रम्
दद्यान्मे देवराजो वितरतु भगवान् मङ्गलं मङ्गलाना-
मावासो हस्तिशैले मणिमयशिखरे शेखरो दीप्यमानः ।
लक्ष्मीनाथो दयालुर्विधिमुखविबुधैर्वन्दितश्रीपदाब्जः
सर्वेषामिष्टदाता स्मितमधुरमुखः श्रीनिधिर्लोकनाथः ॥ १॥
हस्त्यद्रौ पुण्यकोट्यां विलसितममलं वत्सलं देवराजं
शेषाद्यैः सूरिसङ्घैर्नतपदकमलं लोकानाथं दयालुम् ।
पारावारप्रसूतापदकमललसल्लाक्षया लक्षिताङ्गं
वेदान्ते पाश्चरात्रे प्रविदितविभवं वन्दिषीय क्षमाब्धिम् ॥ २॥
तीरे श्रीवेगवत्या विलसति विमलैरुत्तरे पुण्यकोट्यां
सर्वाभीष्टप्रदाता प्रवरगुणनिधिर्देवरजो मुकुन्दः ।
वेदान्तेषु प्रसिद्धः सरसिजनयनो भासमानप्रभावः
दिव्यं कल्याणमाद्यं दिशतु मम पदं वत्सलः स्वाश्रितानाम् ॥ ३॥
अनन्तगरुडादिभिः प्रणतपादपद्मो रमा-
स्तनस्तबकचञ्चलो वरादराजभृङ्गः सदा ।
मुदा मम हृदम्बुजे रमतु हस्तिशैलाभु-
र्नितान्तललिताननः कमलदिवयनेत्रोज्ज्वलः ॥ ४॥
सुवर्णमकुटोज्ज्वलं सुभगदिव्यनीलालकं
ललाटफलकोल्लसत्तिलकपुण्ड्रन्दीप्राननम् ।
विचित्रमणिभूषणज्वलितनीलगात्रप्रभं
भजे करिगिरीश्वरं वरदराजमत्युज्ज्वलम् ॥ ५॥
रथाङ्गजलजाङ्कुशध्वजसरोजरेखादिभिः
स्वलङ्कृतलौ बहिर्विलसदिन्द्रनीलप्रभौ ।
विकासिकमलोपमौ विविधरत्नभूषोज्ज्वलौ
करीशचरणौ भजे सकलभक्तसौख्यप्रदौ ॥ ६॥
सुकल्पकतरुश्रिया तुलितदिव्यजङ्घोज्ज्वलं
कनत्प्रभककुत्समज्वलितभास्वदूरुप्रभम् ।
कटीतटसमुल्लसत्सुभगदिव्यपीताम्बरं
भजे करिगिरीश्वरं वरदमब्जनीलप्रभम् ॥ ७॥
सनाभिकनकप्रभज्वलितयज्ञसूत्रोज्ज्वलं
मणीन्द्रकमलालसद्विपुलदिव्यवक्षःस्थलम् ।
करीन्द्रकरसन्निभस्फुरितवृत्तबाहोज्ज्वलं
भजे करिगिरीश्वरं विलसदसभूषोज्ज्वलम् ॥ ८॥
लसद्गलसमुज्ज्वलस्फटिकरत्नहारोज्ज्वलं
विलास्यधरपल्लवप्रभवदिव्यमन्दस्मितम् ।
सुफालतलमुन्नसं नमितसुन्दरभ्रूयुगं
भजे करिगिरीश्वरं विकचपद्मनेत्रोज्ज्वलम् ॥ ९॥
सुनीलघनसन्निभं सुभगदिव्यरत्नाढ्यक-
स्फुरन्मकुटशोभितं कनकदिव्यभूषोज्ज्वलम् ।
दयागुणपयोनिधिं दरदलत्सरोजाननं
भजे करिगिरीश्वरं वरदराजमत्यद्भुतम् ॥ १०॥
अव्यादव्याजबन्धुर्दिवि भुवि जगतां वेदशास्त्रप्रशस्तः
लोकानामाभिमुख्ये त्वभिमतवरदो देवदेवाधिराजः ।
भक्तानां दोषभोग्यः करिगिरिशिखरप्रोल्लसत्कल्पवृक्षः
संसाराब्धौ निमग्नं मदनपरवशं दुर्दशं दुगुणं माम् ॥ ११॥
मेघश्यामः कृपालुः करिगिरिशिखरप्रोज्ज्वलत्पारिजातः
पद्माक्षः पद्मपाणिः सरसिजवदनः सर्ववेदान्तवेद्यः ।
मुक्तादामप्रभास्वन्मणिवरकमलावन्सजाज्वल्यवक्षाः
पित्रादिर्बन्धुवर्गो मम किल विविधः पातु मां देवराजः ॥ १२॥
अब्जानाथः पदाब्जप्रणतजननिधिः प्रज्वलत्कौस्तुभादि-
श्रीभूषादीप्रगात्रः प्रवरगुणनिधिर्नीलमेघप्रभाभः ।
सर्वज्ञः सर्वधाता शकनबलयुतः सत्यसङ्कल्पमानो-
भूतानामादिबन्धुः करिगिरिवरदः पातु मां देवराजः ॥ १३॥
असारं संसारं धिगशुचिमलजं हृदय मे
निराबाधं नित्यं कमलनयनं शेषशयनम् ।
करीशं कन्दर्पप्रभममलकल्याणगुणकं
मुरारिं लोकेशं मधुमथनमाद्यं भज हरिम् ॥ १४॥
जगन्नाथं नाथं भज हृदय नाथं प्रणामता-
मानाथं मानाथं कमलभववन्द्यं गुणनिधिम् ।
पयः पारावारप्रभववदनं पद्मचरणं
मदीशं हस्तीशं मदनशततुल्यं मुरभिदम् ॥ १५॥
करीशं लोकेशं कमलचरणं भक्तरमण
मुमेशब्रह्मेन्द्रप्रमुखसुरसङ्घस्तुतपदम् ।
घनाभं श्रीनाभिप्रविलसितसूत्रोज्ज्वलतनुं
भजेयं देवेश शुभगुणसुधाम्भोनिधिमहम् ॥ १६॥
रथाङ्गं श्रीशार्ङ्घं प्रणतजनरक्षार्थममलो
हरिः शङ्खं खड्गं सततमपि बिभ्रन्मुररिपुः ।
गरिष्ठश्रेष्ठानां करिगिरिलसन् कल्पकतरु-
र्वरिष्टं कल्याणं दिशतु मम वात्सल्यजलधिः ॥ १७॥
कलानाथःक्षीरप्रभवलसदास्यस्मितरुचि-
र्दयासिन्धुर्बन्धुर्मम तु करिशैलोज्ज्वलतरुः ।
जगन्नाथो दिव्यस्फटिकमकुटप्रोज्ज्वलतनुः
मम क्षेमं दद्यादतुलगुणवात्सल्यजलधिः ॥ १८॥
विधोशाधीशानो विनतजनताकल्पकतरुः
करीशः पद्मेशः परमपुरुषो वत्सलतरः ।
सुशीलो देवेशः कमलनयनः सौम्यवदनः
मम क्षेमं दद्यादतुलमहिमा भक्तरमणः ॥ १९॥
सदामारामोराः करिगिरिशिरोभूषणवरः
दयापारावारः परमपुरुषो मङ्गलनिधिः ।
गुणानां पाथोधिः सुभगसुलभोदारचरणो
मन क्षेमं दद्यादतुलमहिमा भक्तरमणः ॥ २०॥
सकलभुवननाथः सर्वबन्धुर्दयालु-
र्विमलमधुरमन्दस्मेरवक्त्त्रारविन्दः ।
कलशजलधिकन्याप्राणनाथो मुकुन्दः
प्रणतवरदराजः पातु मां देवराजः ॥ २१॥
इति श्रीवरदराजस्तोत्रं सम्पूर्णम् ।
Proofread by Saritha Sangameswaran