Shri Vishnu Nirajanam

 श्रीविष्णुनीराजनम् 
जय माधव मधुसूदन जय करुणासिन्धो ।
जय भवभीतिविनाशन शरणागतबन्धो ॥

जय देव जय देव ॥ १॥

         वन्दे कमलेशानं विनतासुतयानम् ।
         जगदेकान्तनिदानं वाञ्छितवरदानम् ॥

         जय देव जय देव ॥ २॥

मुकुटविभूषितभालं शोभितवनमालम् ।
श्यामलकुञ्चितबालं त्रिभुवनजनपालम् ॥

जय देव जय देव ॥ ३॥

         कटितटपीतदुकूलं विश्वविटपमूलम् ।
         भवसागरजलकूलं भजतामनुकूलम् ॥

         जय देव जय देव ॥ ४॥

सागरजापरिवारं कौस्तुभमणिहारम् ।
क्षीराम्भोधिविहारं निगमागमसारम् ॥

जय देव जय देव ॥ ५॥

         शेषशरीरनिवासं विमलाम्बरभासम् ।
         श्रीवैकुण्ठविलासं दानवकुलनाशम् ॥

         जय देव जय देव ॥ ६॥

शङ्खगदाम्बुजधारं चतुर्भुजाकारम् ।
वृन्दारकहितकारं भववारिधिपारम् ॥

जय देव जय देव ॥ ७॥

         कमलाश्रितवामाङ्गं भूषितसकलाङ्गम् ।
         सुन्दरकरुणापाङ्गं मणिमञ्जुवराङ्गम् ॥

         जय देव जय देव ॥ ८॥

पार्षदपूगसमेतं सुरगणसमवेतम् ।
ब्रह्मानन्दनिकेतं मुनिजनसमुपेतम् ॥

जय देव जय देव ॥ ९॥

         हरिनीराजनमेतत्पठति नरो नित्यम् ।
         विष्णोर्लोकमशोकं व्रजति स वै सत्यम् ॥

         जय देव जय देव ॥ १०॥

इति श्रीब्रह्मानन्दस्वामिविरचितं विष्णुनीराजनं समाप्तम् ॥


Encoded and proofread by Venkata krishna T.