देवकीकृतं विष्णुस्तोत्रम्
अबालो बालरूपेण येनेश त्वमिहास्थितः ।
त्वद्रूपं प्रणिपत्याहं यद्ब्रवीमि निबोध तत् ॥ १८॥
नमस्ते सर्वभूतेश नमस्ते मधुसूदन ।
नमस्ते पुण्डरीकाक्ष नमस्तेऽस्तु जनार्दन ॥ १९॥
नमस्ते शार्ङ्गचक्रासिगदापरिघपाणये ।
उपेन्द्रायाप्रमेयाय हृषीकेशाय वै नमः ॥ २०॥
नमोऽस्तु तेऽणुरूपाय बृहद्रूपाय वै नमः ।
अशेषभूतरूपाय तथारूपाय ते नमः ॥ २१॥
अनिर्देश्यविशेषाय तुभ्यं सर्वात्मने नमः ।
सर्वेश्वराय सर्वाय सर्वभूताय ते नमः ॥ २२॥
नमोऽस्तु ते वासुदेव नमोऽस्तु कमलेक्षण
अशेषभूतरूपाय तथाभूताय ते नमः
नमोऽस्तु तेऽश्वरूपाय तथारूपाय ते नमः
अनिर्देश्यविशेषाय तुभ्यं सर्वात्मने नमः
नमोऽस्तु ते वासुदेव नमस्ते पुष्करेक्षण ।
नमोऽस्तु ते सदाचिन्त्य योगिचिन्त्य जगत्पते ॥ २३॥
विष्णो नमोऽस्तु ते कृष्ण नमस्ते पुरुषोत्तम ।
नमो नारायण हरे नमस्तेऽस्तु सदाच्युत ॥ २४॥
नमो नमस्ते गोविन्द नमस्ते गरुडध्वज ।
श्रीश श्रीवत्स योगीश श्रीकान्तेश नमोऽस्तु ते ॥ २५॥
नीलोत्पलदलश्याम दंष्ट्रोद्धृतवसुन्धर ।
हिरण्याक्षरिपो देव नमस्ते यज्ञसूकर ॥ २६॥
नृसिंह जय विश्वात्मन्दैत्योरःस्थलदारक ।
नमो नमस्तेऽस्तु सदा विक्षेपध्वस्ततारक ॥ २७॥
मायावामनरूपाय तुभ्यं देव नमो नमः ।
त्रिविक्रम नमस्तुभ्यं त्रैलोक्यक्रान्तिदुर्जय ॥ २८॥
ऋग्यजुःसामभूताय वेदाहरणकर्मणे ।
प्रणवोद्गीतवचसे महाश्वशिरसे नमः ॥ २९॥
निःक्षत्रियोर्वीकरण विकरालपराक्रम ।
जामदग्न्य नमस्तुभ्यं कार्तवीर्यासुतस्कर ॥ ३०॥
पौलस्त्यकुलनाशाय साहुमार्गविचारिणे ।
नलसेतुकृते तुभ्यं नमो राघवरूपिणे ॥ ३१॥
साम्प्रतं मत्प्रसन्नाय सम्भूताय ममोदरे ।
स्वमायाबालरूपाय नमः कृष्णाय वै हरे ॥ ३२॥
यावन्ति तव रूपाणि यावत्यश्च विभूतयः ।
नमामि कृष्ण सर्वेभ्यस्तेभ्यस्ताभ्यश्च सर्वदा ॥ ३३॥
स्वरूपचेष्टितं यत्ते यद्देवत्वे विचेष्टितम् ।
यच्च तिर्यङ्मनुष्यत्वे चेष्टितं तन्नमाम्यहम् ॥ ३४॥
परमेश परेशेश तिर्यगीश नरेश्वर ।
सर्वेश्वरेश्वरेशेश नमस्ते पुरुषोत्तम ॥ ३५॥
इति विष्णुधर्मेषु नवतितमोऽध्यायान्तर्गतं देवकीकृतं विष्णुस्तोत्रं सम्पूर्णम् ।
Proofread by PSA Easwaran