द्वादश्यां पारणायाः पूर्वम् विष्णुस्तोत्रम्
एकादश्युपवासात्परं द्वादश्यां पारणायाः पूर्वं करणीयं विष्णुस्तोत्रम् ।
(VishNu Stotra to be recited after the fast on Ekaadashi,
before PaaraNa on Dwaadashi)
नामत्रयमशेषेषु मासि मासि दिनद्वयम् ।
तथैवोच्चारयेद्दद्याद्द्वादश्यां च यवादिकम् ।
प्रणम्य च हृषीकेशं कृतपूजः प्रसादयेत् ॥ १५॥
विष्णो नमस्ते जगतः प्रसूते
ॐ वासुदेवाय नमो नमस्ते ।
नारायण त्वां प्रणतोऽस्म्यचिन्त्य
जयोऽस्तु मे शाश्वतपुण्यराशेः ॥ १६॥
प्रसीद पुण्यं जयमेतु विष्णो
ॐ वासुदेवर्द्धिमुपैतु पुण्यम् ।
नारायणॐ भूतिमुपैतु पुण्यं
प्रयातु चाशेषमघं विनाशम् ॥ १७॥
विष्णो पुण्योद्भवो मेऽस्तु वासुदेवास्तु मे शुभम् ।
नारायणास्तु धर्मो मे जहि पापमशेषतः ॥ १८॥
अनेकजन्मजनितं बाल्ययौवनवार्द्धिके ।
पुण्यं विवृद्धिमायातु यातु पापं तु सङ्क्षयम् ॥ १९॥
आकाशादिषु शब्दादौ श्रोत्रादौ महदादिषु ।
प्रकृतौ पुरुषे चैव ब्रह्मण्यपि च स प्रभुः ।
यथैक एव सर्वात्मा वासुदेवो व्यवस्थितः ॥ २०॥
तेन सत्येन मे पापं नरकार्तिप्रदं क्षयम् ।
प्रयातु सुकृतस्यास्तु ममानुदिवसं जयः ।
पापस्य हानिः पुण्यं च वृद्धिमभ्येत्यनुत्तमाम् ॥ २१॥
एवमुच्चार्य विप्राय दत्त्वा यत्कथितं तव ।
भुञ्जीत कृतकृत्यस्तु पारणे गते ॥ २२॥
इति विष्णुधर्मेषु चतुर्विंशोऽध्यायान्तर्गतं विष्णुस्तोत्रं सम्पूर्णम् ।
Proofread by PSA Easwaran