% Text title            : haThayogapradIpikA
% File name             : hyp.itx
% Category              : yoga
% Location              : doc\_yoga
% Transliterated by     : Jan Brzezinski in Balaram encoding Converted to itx encoding by Ulrich Stiehl
% Latest update         : April 5,2009
% Send corrections to   : sanskrit at cheerful dot c om
%
% This text is prepared by volunteers and is to be used for personal study 
% and research. The file is not to be copied or reposted for promotion of 
% any website or individuals or for commercial purpose without permission. 
% Please help to maintain respect for volunteer spirit.
%
\documentstyle[11pt,multicol,itrans]{article}
#include=ijag.inc
#endwordvowel=.h
\portraitwide
\parindent=100pt                
\let\usedvng=\Largedvng      % for 1 column     
\pagenumbering{itrans} 
\def\engtitle#1{\hrule\medskip\centerline{\LARGE #1}}
\def\itxtitle#1{\medskip\centerline{\LARGEdvng #1}\medskip\hrule}
\def\endtitles{\medskip\obeyspaceslines}
%%
\begin{document}
\engtitle{.. haTha-yoga-pradIpikA ..}##
\itxtitle{.. haThayogapradIpikA ..}##\endtitles ##
|| 1|| prathamopadeshaH
shrI\-Adi\-nAthAya namo.astu tasmai
yenopadiShTA haTha\-yoga\-vidyA |
vibhrAjate pronnata\-rAja\-yogam
AroDhumichChoradhirohiNIva || 1||
praNamya shrI\-guruM nAthaM svAtmArAmeNa yoginA |
kevalaM rAja\-yogAya haTha\-vidyopadishyate || 2||
bhrAntyA bahumata\-dhvAnte rAja\-yogamajAnatAm |
haTha\-pradIpikAM dhatte svAtmArAmaH kR^ipAkaraH || 3||
haTha\-vidyAM hi matsyendra\-gorakShAdyA vijAnate |
svAtmArAmo.athavA yogI jAnIte tat\-prasAdataH || 4||
shrI\-AdinAtha\-matsyendra\-shAvarAnanda\-bhairavAH |
chaura~NgI\-mIna\-gorakSha\-virUpAkSha\-bileshayAH || 5||
manthAno bhairavo yogI siddhirbuddhashcha kanthaDiH |
koraMTakaH surAnandaH siddhapAdashcha charpaTiH || 6||
kAnerI pUjyapAdashcha nitya\-nAtho nira~njanaH |
kapAlI bindunAthashcha kAkachaNDIshvarAhvayaH || 7||
allAmaH prabhudevashcha ghoDA cholI cha TiMTiNiH |
bhAnukI nAradevashcha khaNDaH kApAlikastathA || 8||
ityAdayo mahAsiddhA haTha\-yoga\-prabhAvataH |
khaNDayitvA kAla\-daNDaM brahmANDe vicharanti te || 9||
asheSha\-tApa\-taptAnAM samAshraya\-maTho haThaH |
asheSha\-yoga\-yuktAnAmAdhAra\-kamaTho haThaH || 10||
haTha\-vidyA paraM gopyA yoginA siddhimichChatA |
bhavedvIryavatI guptA nirvIryA tu prakAshitA || 11||
surAjye dhArmike deshe subhikShe nirupadrave |
dhanuH pramANa\-paryantaM shilAgni\-jala\-varjite |
ekAnte maThikA\-madhye sthAtavyaM haTha\-yoginA || 12||
alpa\-dvAramarandhra\-garta\-vivaraM nAtyuchcha\-nIchAyataM
samyag\-gomaya\-sAndra\-liptamamalaM niHshesa\-jantUjjhitam |
bAhye maNDapa\-vedi\-kUpa\-ruchiraM prAkAra\-saMveShTitaM
proktaM yoga\-maThasya lakShaNamidaM siddhairhaThAbhyAsibhiH || 13||
evaM vidhe maThe sthitvA sarva\-chintA\-vivarjitaH |
gurUpadiShTa\-mArgeNa yogameva samabhyaset || 14||
atyAhAraH prayAsashcha prajalpo niyamAgrahaH |
jana\-sa~Ngashcha laulyaM cha ShaDbhiryogo vinashyati || 15||
utsAhAtsAhasAddhairyAttattva\-j~nAnAshcha nishchayAt |
jana\-sa~Nga\-parityAgAtShaDbhiryogaH prasiddhyati || 16||
atha yama\-niyamAH
ahiMsA satyamasteyaM brahmacharyaM kShamA dhR^itiH |
dayArjavaM mitAhAraH shauchaM chaiva yamA dasha || 17||
tapaH santoSha AstikyaM dAnamIshvara\-pUjanam |
siddhAnta\-vAkya\-shravaNaM hrImatI cha tapo hutam |
niyamA dasha samproktA yoga\-shAstra\-vishAradaiH || 18||
atha Asanam
haThasya prathamA~NgatvAdAsanaM pUrvamuchyate |
kuryAttadAsanaM sthairyamArogyaM chA~Nga\-lAghavam || 19||
vashiShThAdyaishcha munibhirmatsyendrAdyaishcha yogibhiH |
a~NgIkR^itAnyAsanAni kathyante kAnichinmayA || 20||
jAnUrvorantare samyakkR^itvA pAda\-tale ubhe |
R^iju\-kAyaH samAsInaH svastikaM tatprachakShate || 21||
savye dakShiNa\-gulkaM tu pR^iShTha\-pArshve niyojayet |
dakShiNe.api tathA savyaM gomukhaM gomukhAkR^itiH || 22||
ekaM pAdaM tathaikasminvinyaseduruNi sthiram |
itarasmiMstathA choruM vIrAsanamitIritam || 23||
gudaM nirudhya gulphAbhyAM vyutkrameNa samAhitaH |
kUrmAsanaM bhavedetaditi yoga\-vido viduH || 24||
padmAsanaM tu saMsthApya jAnUrvorantare karau |
niveshya bhUmau saMsthApya vyomasthaM kukkuTAsanam || 25||
kukkuTAsana\-bandha\-stho dorbhyAM sambadya kandharAm |
bhavedkUrmavaduttAna etaduttAna\-kUrmakam || 26||
pAdA~NguShThau tu pANibhyAM gR^ihItvA shravaNAvadhi |
dhanurAkarShaNaM kuryAddhanur\-Asanamuchyate || 27||
vAmoru\-mUlArpita\-dakSha\-pAdaM
jAnorbahirveShTita\-vAma\-pAdam |
pragR^ihya tiShThetparivartitA~NgaH
shrI\-matysanAthoditamAsanaM syAt || 28||
matsyendra\-pIThaM jaThara\-pradIptiM
prachaNDa\-rugmaNDala\-khaNDanAstram |
abhyAsataH kuNDalinI\-prabodhaM
chandra\-sthiratvaM cha dadAti puMsAm || 29||
prasArya pAdau bhuvi daNDa\-rUpau
dorbhyAM padAgra\-dvitayaM gR^ihItvA |
jAnUparinyasta\-lalATa\-desho
vasedidaM pashchimatAnamAhuH || 30||
iti pashchimatAnamAsanAgryaM
pavanaM pashchima\-vAhinaM karoti |
udayaM jaTharAnalasya kuryAd
udare kArshyamarogatAM cha puMsAm || 31||
dharAmavaShTabhya kara\-dvayena
tat\-kUrpara\-sthApita\-nAbhi\-pArshvaH |
uchchAsano daNDavadutthitaH khe
mAyUrametatpravadanti pITham || 32||
harati sakala\-rogAnAshu gulmodarAdIn
abhibhavati cha doShAnAsanaM shrI\-mayUram |
bahu kadashana\-bhuktaM bhasma kuryAdasheShaM
janayati jaTharAgniM jArayetkAla\-kUTam || 33||
uttAnaM shabavadbhUmau shayanaM tachChavAsanam |
shavAsanaM shrAnti\-haraM chitta\-vishrAnti\-kArakam || 34||
chaturashItyAsanAni shivena kathitAni cha |
tebhyashchatuShkamAdAya sArabhUtaM bravImyaham || 35||
siddhaM padmaM tathA siMhaM bhadraM veti chatuShTayam |
shreShThaM tatrApi cha sukhe tiShThetsiddhAsane sadA || 36||
atha siddhAsanam
yoni\-sthAnakama~Nghri\-mUla\-ghaTitaM kR^itvA dR^iDhaM vinyaset
meNDhre pAdamathaikameva hR^idaye kR^itvA hanuM susthiram |
sthANuH saMyamitendriyo.achala\-dR^ishA pashyedbhruvorantaraM
hyetanmokSha\-kapATa\-bheda\-janakaM siddhAsanaM prochyate || 37||
meNDhrAdupari vinyasya savyaM gulphaM tathopari |
gulphAntaraM cha nikShipya siddhAsanamidaM bhavet || 38||
etatsiddhAsanaM prAhuranye vajrAsanaM viduH |
muktAsanaM vadantyeke prAhurguptAsanaM pare || 39||
yameShviva mitAhAramahiMsA niyameShviva |
mukhyaM sarvAsaneShvekaM siddhAH siddhAsanaM viduH || 40||
chaturashIti\-pITheShu siddhameva sadAbhyaset |
dvAsaptati\-sahasrANAM nADInAM mala\-shodhanam || 41||
Atma\-dhyAyI mitAhArI yAvaddvAdasha\-vatsaram |
sadA siddhAsanAbhyAsAdyogI niShpattimApnuyAt || 42||
kimanyairbahubhiH pIThaiH siddhe siddhAsane sati |
prANAnile sAvadhAne baddhe kevala\-kumbhake |
utpadyate nirAyAsAtsvayamevonmanI kalA || 43||
tathaikAsminneva dR^iDhe siddhe siddhAsane sati |
bandha\-trayamanAyAsAtsvayamevopajAyate || 44||
nAsanaM siddha\-sadR^ishaM na kumbhaH kevalopamaH |
na khecharI\-samA mudrA na nAda\-sadR^isho layaH || 45||
atha padmAsanam
vAmorUpari dakShiNaM cha charaNaM saMsthApya vAmaM tathA
dakShorUpari pashchimena vidhinA dhR^itvA karAbhyAM dR^iDham |
a~NguShThau hR^idaye nidhAya chibukaM nAsAgramAlokayet
etadvyAdhi\-vinAsha\-kAri yaminAM padmAsanaM prochyate || 46||
uttAnau charaNau kR^itvA Uru\-saMsthau prayatnataH |
Uru\-madhye tathottAnau pANI kR^itvA tato dR^ishau || 47||
nAsAgre vinyasedrAjad\-anta\-mUle tu jihvayA |
uttambhya chibukaM vakShasyutthApy pavanaM shanaiH || 48||
idaM padmAsanaM proktaM sarva\-vyAdhi\-vinAshanam |
durlabhaM yena kenApi dhImatA labhyate bhuvi || 49||
kR^itvA sampuTitau karau dR^iDhataraM baddhvA tu padmamAsanaM
gADhaM vakShasi sannidhAya chibukaM dhyAyaMshcha tachchetasi |
vAraM vAramapAnamUrdhvamanilaM protsArayanpUritaM
nya~nchanprANamupaiti bodhamatulaM shakti\-prabhAvAnnaraH || 50||
padmAsane sthito yogI nADI\-dvAreNa pUritam |
mArutaM dhArayedyastu sa mukto nAtra saMshayaH || 51||
atha siMhAsanam
gulphau cha vR^iShaNasyAdhaH sIvantyAH pArshvayoH kShipet |
dakShiNe savya\-gulphaM tu dakSha\-gulphaM tu savyake || 52||
hastau tu jAnvoH saMsthApya svA~NgulIH samprasArya cha |
vyAtta\-vakto nirIkSheta nAsAgraM susamAhitaH || 53||
siMhAsanaM bhavedetatpUjitaM yogi\-pu~NgavaiH |
bandha\-tritaya\-sandhAnaM kurute chAsanottamam || 54||
atha bhadrAsanam
gulphau cha vR^iShaNasyAdhaH sIvantyAH pArshvayoH kShipte |
savya\-gulphaM tathA savye dakSha\-gulphaM tu dakShiNe || 55||
pArshva\-pAdau cha pANibhyAM dR^iDhaM baddhvA sunishchalam |
bhadrAsanaM bhavedetatsarva\-vyAdhi\-vinAshanam |
gorakShAsanamityAhuridaM vai siddha\-yoginaH || 56||
evamAsana\-bandheShu yogIndro vigata\-shramaH |
abhyasennADikA\-shuddhiM mudrAdi\-pavanI\-kriyAm || 57||
AsanaM kumbhakaM chitraM mudrAkhyaM karaNaM tathA |
atha nAdAnusandhAnamabhyAsAnukramo haThe || 58||
brahmachArI mitAhArI tyAgI yoga\-parAyaNaH |
abdAdUrdhvaM bhavedsiddho nAtra kAryA vichAraNA || 59||
susnigdha\-madhurAhArashchaturthAMsha\-vivarjitaH |
bhujyate shiva\-samprItyai mitAhAraH sa uchyate || 60||
kaTvAmla\-tIkShNa\-lavaNoShNa\-harIta\-shAka\-
sauvIra\-taila\-tila\-sarShapa\-madya\-matsyAn |
AjAdi\-mAMsa\-dadhi\-takra\-kulatthakola\-
piNyAka\-hi~Ngu\-lashunAdyamapathyamAhuH || 61||
bhojanamahitaM vidyAtpunarasyoShNI\-kR^itaM rUkSham |
atilavaNamamla\-yuktaM kadashana\-shAkotkaM varjyam || 62||
vahni\-strI\-pathi\-sevAnAmAdau varjanamAcharet || 63||
tathA hi gorakSha\-vachanam
varjayeddurjana\-prAntaM vahni\-strI\-pathi\-sevanam |
prAtaH\-snAnopavAsAdi kAya\-klesha\-vidhiM tathA || 64||
godhUma\-shAli\-yava\-ShAShTika\-shobhanAnnaM
kShIrAjya\-khaNDa\-navanIta\-siddhA\-madhUni |
shuNThI\-paTola\-kaphalAdika\-pa~ncha\-shAkaM
mudgAdi\-divyamudakaM cha yamIndra\-pathyam || 65||
puShTaM sumadhuraM snigdhaM gavyaM dhAtu\-prapoShaNam |
manobhilaShitaM yogyaM yogI bhojanamAcharet || 66||
yuvo vR^iddho.ativR^iddho vA vyAdhito durbalo.api vA |
abhyAsAtsiddhimApnoti sarva\-yogeShvatandritaH || 67||
kriyA\-yuktasya siddhiH syAdakriyasya kathaM bhavet |
na shAstra\-pATha\-mAtreNa yoga\-siddhiH prajAyate || 68||
na veSha\-dhAraNaM siddheH kAraNaM na cha tat\-kathA |
kriyaiva kAraNaM siddheH satyametanna saMshayaH || 69||
pIThAni kumbhakAshchitrA divyAni karaNAni cha |
sarvANyapi haThAbhyAse rAja\-yoga\-phalAvadhi || 70||
iti haTha\-pradIpikAyAM prathamopadeshaH |
\medskip\hrule\medskip
|| 2|| dvitIyopadeshaH
athAsane dR^idhe yogI vashI hita\-mitAshanaH |
gurUpadiShTa\-mArgeNa prANAyAmAnsamabhyaset || 1||
chale vAte chalaM chittaM nishchale nishchalaM bhavet||
yogI sthANutvamApnoti tato vAyuM nirodhayet || 2||
yAvadvAyuH sthito dehe tAvajjIvanamuchyate |
maraNaM tasya niShkrAntistato vAyuM nirodhayet || 3||
malAkalAsu nADIShu mAruto naiva madhyagaH |
kathaM syAdunmanIbhAvaH kArya\-siddhiH kathaM bhavet || 4||
shuddhameti yadA sarvaM nADI\-chakraM malAkulam |
tadaiva jAyate yogI prANa\-saMgrahaNe kShamaH || 5||
prANAyAmaM tataH kuryAnnityaM sAttvikayA dhiyA |
yathA suShumNA\-nADIsthA malAH shuddhiM prayAnti cha || 6||
baddha\-padmAsano yogI prANaM chandreNa pUrayet |
dhArayitvA yathA\-shakti bhUyaH sUryeNa rechayet || 7||
prANaM sUryeNa chAkR^iShya pUrayedudaraM shanaiH |
vidhivatkumbhakaM kR^itvA punashchandreNa rechayet || 8||
yena tyajettena pItvA dhArayedatirodhataH |
rechayechcha tato.anyena shanaireva na vegataH || 9||
prANaM chediDayA pibenniyamitaM bhUyo.anyathA rechayet
pItvA pi~NgalayA samIraNamatho baddhvA tyajedvAmayA |
sUrya\-chandramasoranena vidhinAbhyAsaM sadA tanvatAM
shuddhA nADi\-gaNA bhavanti yaminAM mAsa\-trayAdUrdhvataH || 10||
prAtarmadhyandine sAyamardha\-rAtre cha kumbhakAn |
shanairashIti\-paryantaM chaturvAraM samabhyaset || 11||
kanIyasi bhavedsveda kampo bhavati madhyame |
uttame sthAnamApnoti tato vAyuM nibandhayet || 12||
jalena shrama\-jAtena gAtra\-mardanamAcharet |
dR^iDhatA laghutA chaiva tena gAtrasya jAyate || 13||
abhyAsa\-kAle prathame shastaM kShIrAjya\-bhojanam |
tato.abhyAse  dR^iDhIbhUte na tAdR^i~N\-niyama\-grahaH || 14||
yathA siMho gajo vyAghro bhavedvashyaH shanaiH shanaiH |
tathaiva sevito vAyuranyathA hanti sAdhakam || 15||
prANAyAmena yuktena sarva\-roga\-kShayo bhavet |
ayuktAbhyAsa\-yogena sarva\-roga\-samudgamaH || 16||
hikkA shvAsashcha kAsashcha shiraH\-karNAkShi\-vedanAH |
bhavanti vividhAH rogAH pavanasya prakopataH || 17||
yuktaM yuktaM tyajedvAyuM yuktaM yuktaM cha pUrayet |
yuktaM yuktaM cha badhnIyAdevaM siddhimavApnuyAt || 18||
yadA tu nADI\-shuddhiH syAttathA chihnAni bAhyataH |
kAyasya kR^ishatA kAntistadA jAyate nishchitam || 19||
yatheShTaM dhAraNaM vAyoranalasya pradIpanam |
nAdAbhivyaktirArogyaM jAyate nADi\-shodhanAt || 20||
meda\-shleShmAdhikaH pUrvaM ShaT\-karmANi samAcharet |
anyastu nAcharettAni doShANAM samabhAvataH || 21||
dhautirbastistathA netistrATakaM naulikaM tathA |
kapAla\-bhAtishchaitAni ShaT\-karmANi prachakShate || 22||
karma ShaTkamidaM gopyaM ghaTa\-shodhana\-kArakam |
vichitra\-guNa\-sandhAya pUjyate yogi\-pu~NgavaiH || 23||
tatra dhautiH
chatur\-a~Ngula\-vistAraM hasta\-pa~ncha\-dashAyatam |
gurUpadiShTa\-mArgeNa siktaM vastraM shanairgraset |
punaH pratyAharechchaitaduditaM dhauti\-karma tat || 24||
kAsa\-shvAsa\-plIha\-kuShThaM kapharogAshcha viMshatiH |
dhauti\-karma\-prabhAveNa prayAntyeva na saMshayaH || 25||
atha bastiH
nAbhi\-daghna\-jale pAyau nyasta\-nAlotkaTAsanaH |
AdhArAku~nchanaM kuryAtkShAlanaM basti\-karma tat || 26||
gulma\-plIhodaraM chApi vAta\-pitta\-kaphodbhavAH |
basti\-karma\-prabhAveNa kShIyante sakalAmayAH || 27||
dhAntvadriyAntaH\-karaNa\-prasAdaM
dadhAchcha kAntiM dahana\-pradIptam |
asheSha\-doShopachayaM nihanyAd
abhyasyamAnaM jala\-basti\-karma || 28||
atha netiH
sUtraM vitasti\-susnigdhaM nAsAnAle praveshayet |
mukhAnnirgamayechchaiShA netiH siddhairnigadyate || 29||
kapAla\-shodhinI chaiva divya\-dR^iShTi\-pradAyinI |
jatrUrdhva\-jAta\-rogaughaM netirAshu nihanti cha || 30||
atha trATakam
nirIkShennishchala\-dR^ishA sUkShma\-lakShyaM samAhitaH |
ashru\-sampAta\-paryantamAchAryaistrATakaM smR^itam || 31||
mochanaM netra\-rogANAM tandAdrINAM kapATakam |
yatnatastrATakaM gopyaM yathA hATaka\-peTakam || 32||
atha nauliH
amandAvarta\-vegena tundaM savyApasavyataH |
natAMso bhrAmayedeShA nauliH siddhaiH prashasyate || 33||
mandAgni\-sandIpana\-pAchanAdi\-
sandhApikAnanda\-karI sadaiva |
asheSha\-doSha\-maya\-shoShaNI cha
haTha\-kriyA mauliriyaM cha nauliH || 34||
atha kapAlabhAtiH
bhastrAvalloha\-kArasya recha\-pUrau sasambhramau |
kapAlabhAtirvikhyAtA kapha\-doSha\-vishoShaNI || 35||
ShaT\-karma\-nirgata\-sthaulya\-kapha\-doSha\-malAdikaH |
prANAyAmaM tataH kuryAdanAyAsena siddhyati || 36||
prANAyAmaireva sarve prashuShyanti malA iti |
AchAryANAM tu keShAMchidanyatkarma na saMmatam || 37||
atha gaja\-karaNI
udara\-gata\-padArthamudvamanti
pavanamapAnamudIrya kaNTha\-nAle |
krama\-parichaya\-vashya\-nADi\-chakrA
gaja\-karaNIti nigadyate haThaj~naiH || 38||
brahmAdayo.api tridashAH pavanAbhyAsa\-tatparAH |
abhUvannantaka\-bhyAttasmAtpavanamabhyaset || 39||
yAvadbaddho marud\-deshe yAvachchittaM nirAkulam |
yAvaddR^iShTirbhruvormadhye tAvatkAla\-bhayaM kutaH || 40||
vidhivatprANa\-saMyAmairnADI\-chakre vishodhite |
suShumNA\-vadanaM bhittvA sukhAdvishati mArutaH || 41||
atha manonmanI
mArute madhya\-saMchAre manaH\-sthairyaM prajAyate |
yo manaH\-susthirI\-bhAvaH saivAvasthA manonmanI || 42||
tat\-siddhaye vidhAnaj~nAshchitrAnkurvanti kumbhakAn |
vichitra kumbhakAbhyAsAdvichitrAM siddhimApnuyAt || 43||
atha kumbhaka\-bhedAH
sUrya\-bhedanamujjAyI sItkArI shItalI tathA |
bhastrikA bhrAmarI mUrchChA plAvinItyaShTa\-kumbhakAH || 44||
pUrakAnte tu kartavyo bandho jAlandharAbhidhaH |
kumbhakAnte rechakAdau kartavyastUDDiyAnakaH || 45||
adhastAtku~nchanenAshu kaNTha\-sa~Nkochane kR^ite |
madhye pashchima\-tAnena syAtprANo brahma\-nADigaH || 46||
ApAnamUrdhvamutthApya prANaM kaNThAdadho nayet |
yogI jarA\-vimuktaH sanShoDashAbda\-vayA bhavet || 47||
atha sUrya\-bhedanam
Asane sukhade yogI baddhvA chaivAsanaM tataH |
dakSha\-nADyA samAkR^iShya bahiHsthaM pavanaM shanaiH || 48||
AkeshAdAnakhAgrAchcha nirodhAvadhi kumbhayet |
tataH shanaiH savya\-nADyA rechayetpavanaM shanaiH || 49||
kapAla\-shodhanaM vAta\-doSha\-ghnaM kR^imi\-doSha\-hR^it |
punaH punaridaM kAryaM sUrya\-bhedanamuttamam || 50||
atha ujjAyI
mukhaM saMyamya nADIbhyAmAkR^iShya pavanaM shanaiH |
yathA lagati kaNThAttu hR^idayAvadhi sa\-svanam || 51||
pUrvavatkumbhayetprANaM rechayediDayA tathA |
shleShma\-doSha\-haraM kaNThe dehAnala\-vivardhanam || 52||
nADI\-jalodarAdhAtu\-gata\-doSha\-vinAshanam |
gachChatA tiShThatA kAryamujjAyyAkhyaM tu kumbhakam || 53||
atha sItkArI
sItkAM kuryAttathA vaktre ghrANenaiva vijR^imbhikAm |
evamabhyAsa\-yogena kAma\-devo dvitIyakaH || 54||
yoginI chakra\-saMmAnyaH sR^iShTi\-saMhAra\-kArakaH |
na kShudhA na tR^iShA nidrA naivAlasyaM prajAyate || 55||
bhavetsattvaM cha dehasya sarvopadrava\-varjitaH |
anena vidhinA satyaM yogIndro bhUmi\-maNDale || 56||
atha shItalI
jihvayA vAyumAkR^iShya pUrvavatkumbha\-sAdhanam |
shanakairghrANa\-randhrAbhyAM rechayetpavanaM sudhIH || 57||
gulma\-plIhAdikAnrogAnjvaraM pittaM kShudhAM tR^iShAm |
viShANi shItalI nAma kumbhikeyaM nihanti hi || 58||
atha bhastrikA
Urvorupari saMsthApya shubhe pAda\-tale ubhe |
padmAsanaM bhavedetatsarva\-pApa\-praNAshanam || 59||
samyakpadmAsanaM baddhvA sama\-grIvodaraH sudhIH |
mukhaM saMyamya yatnena prANaM ghrANena rechayet || 60||
yathA lagati hR^it\-kaNThe kapAlAvadhi sa\-svanam |
vegena pUrayechchApi hR^it\-padmAvadhi mArutam || 61||
punarvirechayettadvatpUrayechcha punaH punaH |
yathaiva lohakAreNa bhastrA vegena chAlyate || 62||
tathaiva sva\-sharIra\-sthaM chAlayetpavanaM dhiyA |
yadA shramo bhaveddehe tadA sUryeNa pUrayet || 63||
yathodaraM bhavetpUrNamanilena tathA laghu |
dhArayennAsikAM madhyA\-tarjanIbhyAM vinA dR^iDham || 64||
vidhivatkumbhakaM kR^itvA rechayediDayAnilam |
vAta\-pitta\-shleShma\-haraM sharIrAgni\-vivardhanam || 65||
kuNDalI bodhakaM kShipraM pavanaM sukhadaM hitam |
brahma\-nADI\-mukhe saMstha\-kaphAdy\-argala\-nAshanam || 66||
samyaggAtra\-samudbhUta\-granthi\-traya\-vibhedakam |
visheSheNaiva kartavyaM bhastrAkhyaM kumbhakaM tvidam || 67||
atha bhrAmarI
vegAdghoShaM pUrakaM bhR^i~Nga\-nAdaM
bhR^i~NgI\-nAdaM rechakaM manda\-mandam |
yogIndrANamevamabhyAsa\-yogAch
chitte jAtA kAchidAnanda\-lIlA || 68||
atha mUrchChA
pUrakAnte gADhataraM baddhvA jAlandharaM shanaiH |
rechayenmUrchChAkhyeyaM mano\-mUrchChA sukha\-pradA || 69||
atha plAvinI
antaH pravartitodAra\-mArutApUritodaraH |
payasyagAdhe.api sukhAtplavate padma\-patravat || 70||
prANAyAmastridhA prokto recha\-pUraka\-kumbhakaiH |
sahitaH kevalashcheti kumbhako dvividho mataH || 71||
yAvatkevala\-siddhiH syAtsahitaM tAvadabhyaset |
rechakaM pUrakaM muktvA sukhaM yadvAyu\-dhAraNam || 72||
prANAyAmo.ayamityuktaH sa vai kevala\-kumbhakaH |
kumbhake kevale siddhe recha\-pUraka\-varjite || 73||
na tasya durlabhaM kiMchittriShu lokeShu vidyate |
shaktaH kevala\-kumbhena yatheShTaM vAyu\-dhAraNAt || 74||
rAja\-yoga\-padaM chApi labhate nAtra saMshayaH |
kumbhakAtkuNDalI\-bodhaH kuNDalI\-bodhato bhavet |
anargalA suShumNA cha haTha\-siddhishcha jAyate || 75||
haThaM vinA rAjayogo rAja\-yogaM vinA haThaH |
na sidhyati tato yugmamAniShpatteH samabhyaset || 76||
kumbhaka\-prANa\-rodhAnte kuryAchchittaM nirAshrayam |
evamabhyAsa\-yogena rAja\-yoga\-padaM vrajet || 77||
vapuH kR^ishatvaM vadane prasannatA
nAda\-sphuTatvaM nayane sunirmale |
arogatA bindu\-jayo.agni\-dIpanaM
nADI\-vishuddhirhaTha\-siddhi\-lakShaNam || 78||
iti haTha\-pradIpikAyAM dvitIyopadeshaH |
\medskip\hrule\medskip
|| 3|| tR^itIyopadeshaH
sa\-shaila\-vana\-dhAtrINAM yathAdhAro.ahi\-nAyakaH |
sarveShAM yoga\-tantrANAM tathAdhAro hi kuNDalI || 1||
suptA guru\-prasAdena yadA jAgarti kuNDalI |
tadA sarvANi padmAni bhidyante granthayo.api cha || 2||
prANasya shUnya\-padavI tadA rAjapathAyate |
tadA chittaM nirAlambaM tadA kAlasya va~nchanam || 3||
suShumNA shUnya\-padavI brahma\-randhraH mahApathaH |
shmashAnaM shAmbhavI madhya\-mArgashchetyeka\-vAchakAH || 4||
tasmAtsarva\-prayatnena prabodhayitumIshvarIm |
brahma\-dvAra\-mukhe suptAM mudrAbhyAsaM samAcharet || 5||
mahAmudrA mahAbandho mahAvedhashcha khecharI |
uDDIyAnaM mUlabandhashcha bandho jAlandharAbhidhaH || 6||
karaNI viparItAkhyA vajrolI shakti\-chAlanam |
idaM hi mudrA\-dashakaM jarA\-maraNa\-nAshanam || 7||
AdinAthoditaM divyamaShTaishvarya\-pradAyakam |
vallabhaM sarva\-siddhAnAM durlabhaM marutAmapi || 8||
gopanIyaM prayatnena yathA ratna\-karaNDakam |
kasyachinnaiva vaktavyaM kula\-strI\-surataM yathA || 9||
atha mahA\-mudrA
pAda\-mUlena vAmena yoniM sampIDya dakShiNAm |
prasAritaM padaM kR^itvA karAbhyAM dhArayeddR^iDham || 10||
kaNThe bandhaM samAropya dhArayedvAyumUrdhvataH |
yathA daNDa\-hataH sarpo daNDAkAraH prajAyate || 11||
R^ijvIbhUtA tathA shaktiH kuNDalI sahasA bhavet |
tadA sA maraNAvasthA jAyate dvipuTAshrayA || 12||
tataH shanaiH shanaireva rechayennaiva vegataH |
mahA\-mudrAM cha tenaiva vadanti vibudhottamAH || 13||
iyaM khalu mahAmudrA mahA\-siddhaiH pradarshitA |
mahA\-kleshAdayo doShAH kShIyante maraNAdayaH |
mahA\-mudrAM cha tenaiva vadanti vibudhottamAH || 14||
chandrA~Nge tu samabhyasya sUryA~Nge punarabhyaset |
yAvat\-tulyA bhavetsa~NkhyA tato mudrAM visarjayet || 15||
na hi pathyamapathyaM vA rasAH sarve.api nIrasAH |
api bhuktaM viShaM ghoraM pIyUShamapi jIryati || 16||
kShaya\-kuShTha\-gudAvarta\-gulmAjIrNa\-purogamAH |
tasya doShAH kShayaM yAnti mahAmudrAM tu yo.abhyaset || 17||
kathiteyaM mahAmudrA mahA\-siddhi\-karA nR^INAm |
gopanIyA prayatnena na deyA yasya kasyachit || 18||
atha mahA\-bandhaH
pArShNiM vAmasya pAdasya yoni\-sthAne niyojayet |
vAmorUpari saMsthApya dakShiNaM charaNaM tathA || 19||
pUrayitvA tato vAyuM hR^idaye chubukaM dR^iDham |
niShpIDyaM vAyumAku~nchya mano\-madhye niyojayet || 20||
dhArayitvA yathA\-shakti rechayedanilaM  shanaiH |
savyA~Nge tu samabhyasya dakShA~Nge punarabhyaset || 21||
matamatra tu keShAMchitkaNTha\-bandhaM vivarjayet |
rAja\-danta\-stha\-jihvAyA bandhaH shasto bhavediti || 22||
ayaM tu sarva\-nADInAmUrdhvaM gati\-nirodhakaH |
ayaM khalu mahA\-bandho mahA\-siddhi\-pradAyakaH || 23||
kAla\-pAsha\-mahA\-bandha\-vimochana\-vichakShaNaH |
triveNI\-sa~NgamaM dhatte kedAraM prApayenmanaH || 24||
rUpa\-lAvaNya\-sampannA yathA strI puruShaM vinA |
mahA\-mudrA\-mahA\-bandhau niShphalau vedha\-varjitau || 25||
atha mahA\-vedhaH
mahA\-bandha\-sthito yogI kR^itvA pUrakameka\-dhIH |
vAyUnAM gatimAvR^itya nibhR^itaM kaNTha\-mudrayA || 26||
sama\-hasta\-yugo bhUmau sphichau sanADayechChanaiH |
puTa\-dvayamatikramya vAyuH sphurati madhyagaH || 27||
soma\-sUryAgni\-sambandho jAyate chAmR^itAya vai |
mR^itAvasthA samutpannA tato vAyuM virechayet || 28||
mahA\-vedho.ayamabhyAsAnmahA\-siddhi\-pradAyakaH |
valI\-palita\-vepa\-ghnaH sevyate sAdhakottamaiH || 29||
etattrayaM mahA\-guhyaM jarA\-mR^ityu\-vinAshanam |
vahni\-vR^iddhi\-karaM chaiva hyaNimAdi\-guNa\-pradam || 30||
aShTadhA kriyate chaiva yAme yAme dine dine |
puNya\-sambhAra\-sandhAya pApaugha\-bhiduraM sadA |
samyak\-shikShAvatAmevaM svalpaM prathama\-sAdhanam || 31||
atha khecharI
kapAla\-kuhare jihvA praviShTA viparItagA |
bhruvorantargatA dR^iShTirmudrA bhavati khecharI || 32||
Chedana\-chAlana\-dohaiH kalAM krameNAtha vardhayettAvat |
sA yAvadbhrU\-madhyaM spR^ishati tadA khecharI\-siddhiH || 33||
snuhI\-patra\-nibhaM shastraM sutIkShNaM snigdha\-nirmalam |
samAdAya tatastena roma\-mAtraM samuchChinet || 34||
tataH saindhava\-pathyAbhyAM chUrNitAbhyAM pragharShayet |
punaH sapta\-dine prApte roma\-mAtraM samuchChinet || 35||
evaM krameNa ShaN\-mAsaM nityaM yuktaH samAcharet |
ShaNmAsAdrasanA\-mUla\-shirA\-bandhaH praNashyati || 36||
kalAM parA~NmukhIM kR^itvA tripathe pariyojayet |
sA bhavetkhecharI mudrA vyoma\-chakraM taduchyate || 37||
rasanAmUrdhvagAM kR^itvA kShaNArdhamapi tiShThati |
viShairvimuchyate yogI vyAdhi\-mR^ityu\-jarAdibhiH || 38||
na rogo maraNaM tandrA na nidrA na kShudhA tR^iShA |
na cha mUrchChA bhavettasya yo mudrAM vetti khecharIm || 39||
pIDyate na sa rogeNa lipyate na cha karmaNA |
bAdhyate na sa kAlena yo mudrAM vetti khecharIm || 40||
chittaM charati khe yasmAjjihvA charati khe gatA |
tenaiShA khecharI nAma mudrA siddhairnirUpitA || 41||
khecharyA mudritaM yena vivaraM lambikordhvataH |
na tasya kSharate binduH kAminyAH shleShitasya cha || 42||
chalito.api yadA binduH samprApto yoni\-maNDalam |
vrajatyUrdhvaM hR^itaH shaktyA nibaddho yoni\-mudrayA || 43||
Urdhva\-jihvaH sthiro bhUtvA somapAnaM karoti yaH |
mAsArdhena na sandeho mR^ityuM jayati yogavit || 44||
nityaM soma\-kalA\-pUrNaM sharIraM yasya yoginaH |
takShakeNApi daShTasya viShaM tasya na sarpati || 45||
indhanAni yathA vahnistaila\-varti cha dIpakaH |
tathA soma\-kalA\-pUrNaM dehI dehaM na mu~nchati || 46||
gomAMsaM bhakShayennityaM pibedamara\-vAruNIm |
kulInaM tamahaM manye chetare kula\-ghAtakAH || 47||
go\-shabdenoditA jihvA tatpravesho hi tAluni |
go\-mAMsa\-bhakShaNaM tattu mahA\-pAtaka\-nAshanam || 48||
jihvA\-pravesha\-sambhUta\-vahninotpAditaH khalu |
chandrAtsravati yaH sAraH sA syAdamara\-vAruNI || 49||
chumbantI yadi lambikAgramanishaM jihvA\-rasa\-syandinI
sa\-kShArA kaTukAmla\-dugdha\-sadR^ishI madhvAjya\-tulyA tathA |
vyAdhInAM haraNaM jarAnta\-karaNaM shastrAgamodIraNaM
tasya syAdamaratvamaShTa\-guNitaM siddhA~NganAkarShaNam || 50||
mUrdhnaH ShoDasha\-patra\-padma\-galitaM prANAdavAptaM haThAd
UrdvhAsyo rasanAM niyamya vivare shaktiM parAM chintayan |
utkallola\-kalA\-jalaM cha vimalaM dhArAmayaM yaH piben
nirvyAdhiH sa mR^iNAla\-komala\-vapuryogI chiraM jIvati || 51||
yatprAleyaM prahita\-suShiraM meru\-mUrdhAntara\-sthaM
tasmiMstattvaM pravadati sudhIstan\-mukhaM nimnagAnAm |
chandrAtsAraH sravati vapuShastena mR^ityurnarANAM
tadbadhnIyAtsukaraNamadho nAnyathA kAya\-siddhiH || 52||
suShiraM j~nAna\-janakaM pa~ncha\-srotaH\-samanvitam |
tiShThate khecharI mudrA tasminshUnye nira~njane || 53||
ekaM sR^iShTimayaM bIjamekA mudrA cha khecharI |
eko devo nirAlamba ekAvasthA manonmanI || 54||
atha uDDIyAna\-bandhaH
baddho yena suShumNAyAM prANastUDDIyate yataH |
tasmAduDDIyanAkhyo.ayaM yogibhiH samudAhR^itaH || 55||
uDDInaM kurute yasmAdavishrAntaM mahA\-khagaH |
uDDIyAnaM tadeva syAttava bandho.abhidhIyate || 56||
udare pashchimaM tAnaM nAbherUrdhvaM cha kArayet |
uDDIyAno hyasau bandho mR^ityu\-mAta~Nga\-kesarI || 57||
uDDIyAnaM tu sahajaM guruNA kathitaM sadA |
abhyasetsatataM yastu vR^iddho.api taruNAyate || 58||
nAbherUrdhvamadhashchApi tAnaM kuryAtprayatnataH |
ShaNmAsamabhyasenmR^ityuM jayatyeva na saMshayaH || 59||
sarveShAmeva bandhAnAM uttamo hyuDDIyAnakaH |
uDDiyAne dR^iDhe bandhe muktiH svAbhAvikI bhavet || 60||
atha mUla\-bandhaH
pArShNi\-bhAgena sampIDya yonimAku~nchayedgudam |
apAnamUrdhvamAkR^iShya mUla\-bandho.abhidhIyate || 61||
adho\-gatimapAnaM vA UrdhvagaM kurute balAt |
Aku~nchanena taM prAhurmUla\-bandhaM hi yoginaH || 62||
gudaM pArShNyA tu sampIDya vAyumAku~nchayedbalAt |
vAraM vAraM yathA chordhvaM samAyAti samIraNaH || 63||
prANApAnau nAda\-bindU mUla\-bandhena chaikatAm |
gatvA yogasya saMsiddhiM yachChato nAtra saMshayaH || 64||
apAna\-prANayoraikyaM kShayo mUtra\-purIShayoH |
yuvA bhavati vR^iddho.api satataM mUla\-bandhanAt || 65||
apAna Urdhvage jAte prayAte vahni\-maNDalam |
tadAnala\-shikhA dIrghA jAyate vAyunAhatA || 66||
tato yAto vahny\-apAnau prANamuShNa\-svarUpakam |
tenAtyanta\-pradIptastu jvalano dehajastathA || 67||
tena kuNDalinI suptA santaptA samprabudhyate |
daNDAhatA bhuja~NgIva nishvasya R^ijutAM vrajet || 68||
bilaM praviShTeva tato brahma\-nADyaM taraM vrajet |
tasmAnnityaM mUla\-bandhaH kartavyo yogibhiH sadA || 69||
atha jalandhara\-bandhaH
kaNThamAku~nchya hR^idaye sthApayechchibukaM dR^iDham |
bandho jAlandharAkhyo.ayaM jarA\-mR^ityu\-vinAshakaH || 70||
badhnAti hi sirAjAlamadho\-gAmi nabho\-jalam |
tato jAlandharo bandhaH kaNTha\-duHkhaugha\-nAshanaH || 71||
jAlandhare kR^ite bandhe kaNTha\-saMkocha\-lakShaNe |
na pIyUShaM patatyagnau na cha vAyuH prakupyati || 72||
kaNTha\-saMkochanenaiva dve nADyau stambhayeddR^iDham |
madhya\-chakramidaM j~neyaM ShoDashAdhAra\-bandhanam || 73||
mUla\-sthAnaM samAku~nchya uDDiyAnaM tu kArayet |
iDAM cha pi~NgalAM baddhvA vAhayetpashchime pathi || 74||
anenaiva vidhAnena prayAti pavano layam |
tato na jAyate mR^ityurjarA\-rogAdikaM tathA || 75||
bandha\-trayamidaM shreShThaM mahA\-siddhaishcha sevitam |
sarveShAM haTha\-tantrANAM sAdhanaM yogino viduH || 76||
yatkiMchitsravate chandrAdamR^itaM divya\-rUpiNaH |
tatsarvaM grasate sUryastena piNDo jarAyutaH || 77||
atha viparIta\-karaNI mudrA
tatrAsti karaNaM divyaM sUryasya mukha\-va~nchanam |
gurUpadeshato j~neyaM na tu shAstrArtha\-koTibhiH || 78||
Urdhva\-nAbheradhastAlorUrdhvaM bhAnuradhaH shashI |
karaNI viparItAkhA guru\-vAkyena labhyate || 79||
nityamabhyAsa\-yuktasya jaTharAgni\-vivardhinI |
AhAro bahulastasya sampAdyaH sAdhakasya cha || 80||
alpAhAro yadi bhavedagnirdahati tat\-kShaNAt |
adhaH\-shirAshchordhva\-pAdaH kShaNaM syAtprathame dine || 81||
kShaNAchcha kiMchidadhikamabhyasechcha dine dine |
valitaM palitaM chaiva ShaNmAsordhvaM na dR^ishyate |
yAma\-mAtraM tu yo nityamabhyasetsa tu kAlajit || 82||
atha vajrolI
svechChayA vartamAno.api yogoktairniyamairvinA |
vajrolIM yo vijAnAti sa yogI siddhi\-bhAjanam || 83||
tatra vastu\-dvayaM vakShye durlabhaM yasya kasyachit |
kShIraM chaikaM dvitIyaM tu nArI cha vasha\-vartinI || 84||
mehanena shanaiH samyagUrdhvAku~nchanamabhyaset |
puruSho.apyathavA nArI vajrolI\-siddhimApnuyAt || 85||
yatnataH shasta\-nAlena phUtkAraM vajra\-kandare |
shanaiH shanaiH prakurvIta vAyu\-saMchAra\-kAraNAt || 86||
nArI\-bhage padad\-bindumabhyAsenordhvamAharet |
chalitaM cha nijaM bindumUrdhvamAkR^iShya rakShayet || 87||
evaM saMrakShayedbinduM jayati yogavit |
maraNaM bindu\-pAtena jIvanaM bindu\-dhAraNAt || 88||
sugandho yogino dehe jAyate bindu\-dhAraNAt |
yAvadbinduH sthiro dehe tAvatkAla\-bhayaM kutaH || 89||
chittAyattaM nR^INAM shukraM shukrAyattaM cha jIvitam |
tasmAchChukraM manashchaiva rakShaNIyaM prayatnataH || 90||
R^itumatyA rajo.apyevaM nijaM binduM cha rakShayet |
meDhreNAkarShayedUrdhvaM samyagabhyAsa\-yoga\-vit || 91||
atha sahajoliH
sahajolishchAmarolirvajrolyA bheda ekataH |
jale subhasma nikShipya dagdha\-gomaya\-sambhavam || 92||
vajrolI\-maithunAdUrdhvaM strI\-puMsoH svA~Nga\-lepanam |
AsInayoH sukhenaiva mukta\-vyApArayoH kShaNAt || 93||
sahajoliriyaM proktA shraddheyA yogibhiH sadA |
ayaM shubhakaro yogo bhoga\-yukto.api muktidaH || 94||
ayaM yogaH puNyavatAM dhIrANAM tattva\-darshinAm |
nirmatsarANAM vai sidhyenna tu matsara\-shAlinAm || 95||
atha amarolI
pittolbaNatvAtprathamAmbu\-dhArAM
vihAya niHsAratayAntyadhArAm |
niShevyate shItala\-madhya\-dhArA
kApAlike khaNDamate.amarolI || 96||
amarIM yaH pibennityaM nasyaM kurvandine dine |
vajrolImabhyasetsamyaksAmarolIti kathyate || 97||
abhyAsAnniHsR^itAM chAndrIM vibhUtyA saha mishrayet |
dhArayeduttamA~NgeShu divya\-dR^iShTiH prajAyate || 98||
puMso binduM samAku~nchya samyagabhyAsa\-pATavAt |
yadi nArI rajo rakShedvajrolyA sApi yoginI || 99||
tasyAH kiMchidrajo nAshaM na gachChati na saMshayaH |
tasyAH sharIre nAdashcha bindutAmeva gachChati || 100||
sa bindustadrajashchaiva ekIbhUya svadehagau |
vajroly\-abhyAsa\-yogena sarva\-siddhiM prayachChataH || 101||
rakShedAku~nchanAdUrdhvaM yA rajaH sA hi yoginI |
atItAnAgataM vetti khecharI cha bhaveddhruvam || 102||
deha\-siddhiM cha labhate vajroly\-abhyAsa\-yogataH |
ayaM puNya\-karo yogo bhoge bhukte.api muktidaH || 103||
atha shakti\-chAlanam
kuTilA~NgI kuNDalinI bhuja~NgI shaktirIshvarI |
kuNDalyarundhatI chaite shabdAH paryAya\-vAchakAH || 104||
udghATayetkapATaM tu yathA kuMchikayA haThAt |
kuNDalinyA tathA yogI mokShadvAraM vibhedayet || 105||
yena mArgeNa gantavyaM brahma\-sthAnaM nirAmayam |
mukhenAchChAdya tadvAraM prasuptA parameshvarI || 106||
kandordhve kuNDalI shaktiH suptA mokShAya yoginAm |
bandhanAya cha mUDhAnAM yastAM vetti sa yogavit || 107||
kuNDalI kuTilAkArA sarpavatparikIrtitA |
sA shaktishchAlitA yena sa mukto nAtra saMshayaH || 108||
ga~NgA\-yamunayormadhye bAla\-raNDAM tapasvinIm |
balAtkAreNa gR^ihNIyAttadviShNoH paramaM padam || 109||
iDA bhagavatI ga~NgA pi~NgalA yamunA nadI |
iDA\-pi~Ngalayormadhye bAlaraNDA cha kuNDalI || 110||
puchChe pragR^ihya bhuja~NgIM suptAmudbodhayechcha tAm |
nidrAM vihAya sA shaktirUrdhvamuttiShThate haThAt || 111||
avasthitA chaiva phaNAvatI sA
prAtashcha sAyaM praharArdha\-mAtram |
prapUrya sUryAtparidhAna\-yuktyA
pragR^ihya nityaM parichAlanIyA || 112||
UrdhvaM vitasti\-mAtraM tu vistAraM chatura~Ngulam |
mR^idulaM dhavalaM proktaM veShTitAmbara\-lakShaNam || 113||
sati vajrAsane pAdau karAbhyAM dhArayeddR^iDham |
gulpha\-desha\-samIpe cha kandaM tatra prapIDayet || 114||
vajrAsane sthito yogI chAlayitvA cha kuNDalIm |
kuryAdanantaraM bhastrAM kuNDalImAshu bodhayet || 115||
bhAnorAku~nchanaM kuryAtkuNDalIM chAlayettataH |
mR^ityu\-vaktra\-gatasyApi tasya mR^ityu\-bhayaM kutaH || 116||
muhUrta\-dvaya\-paryantaM nirbhayaM chAlanAdasau |
UrdhvamAkR^iShyate kiMchitsuShumNAyAM samudgatA || 117||
tena kuNDalinI tasyAH suShumNAyA mukhaM dhruvam |
jahAti tasmAtprANo.ayaM suShumNAM vrajati svataH || 118||
tasmAtsaMchAlayennityaM sukha\-suptAmarundhatIm |
tasyAH saMchAlanenaiva yogI rogaiH pramuchyate || 119||
yena saMchAlitA shaktiH sa yogI siddhi\-bhAjanam |
kimatra bahunoktena kAlaM jayati lIlayA || 120||
brahmacharya\-ratasyaiva nityaM hita\-mitAshinaH |
maNDalAddR^ishyate siddhiH kuNDaly\-abhyAsa\-yoginaH || 121||
kuNDalIM chAlayitvA tu bhastrAM kuryAdvisheShataH |
evamabhyasyato nityaM yamino yama\-bhIH kutaH || 122||
dvA\-saptati\-sahasrANAM nADInAM mala\-shodhane |
kutaH prakShAlanopAyaH kuNDaly\-abhyasanAdR^ite || 123||
iyaM tu madhyamA nADI dR^iDhAbhyAsena yoginAm |
Asana\-prANa\-saMyAma\-mudrAbhiH saralA bhavet || 124||
abhyAse tu vinidrANAM mano dhR^itvA samAdhinA |
rudrANI vA parA mudrA bhadrAM siddhiM prayachChati || 125||
rAja\-yogaM vinA pR^ithvI rAja\-yogaM vinA nishA |
rAja\-yogaM vinA mudrA vichitrApi na shobhate || 126||
mArutasya vidhiM sarvaM mano\-yuktaM samabhyaset |
itaratra na kartavyA mano\-vR^ittirmanIShiNA || 127||
iti mudrA dasha proktA AdinAthena shambhunA |
ekaikA tAsu yaminAM mahA\-siddhi\-pradAyinI || 128||
upadeshaM hi mudrANAM yo datte sAmpradAyikam |
sa eva shrI\-guruH svAmI sAkShAdIshvara eva saH || 129||
tasya vAkya\-paro bhUtvA mudrAbhyAse samAhitaH |
aNimAdi\-guNaiH sArdhaM labhate kAla\-va~nchanam || 130||
iti haTha\-pradIpikAyAM tR^itIyopadeshaH |
\medskip\hrule\medskip
|| 4|| chaturthopadeshaH
namaH shivAya gurave nAda\-bindu\-kalAtmane |
nira~njana\-padaM yAti nityaM tatra parAyaNaH || 1||
athedAnIM pravakShyAmi samAdhikramamuttamam |
mR^ityughnaM cha sukhopAyaM brahmAnanda\-karaM param || 2||
rAja\-yogaH samAdhishcha unmanI cha manonmanI |
amaratvaM layastattvaM shUnyAshUnyaM paraM padam || 3||
amanaskaM tathAdvaitaM nirAlambaM nira~njanam |
jIvanmuktishcha sahajA turyA chetyeka\-vAchakAH || 4||
salile saindhavaM yadvatsAmyaM bhajati yogataH |
tathAtma\-manasoraikyaM samAdhirabhidhIyate || 5||
yadA saMkShIyate prANo mAnasaM cha pralIyate |
tadA samarasatvaM cha samAdhirabhidhIyate || 6||
tat\-samaM cha dvayoraikyaM jIvAtma\-paramAtmanoH |
pranaShTa\-sarva\-sa~NkalpaH samAdhiH so.abhidhIyate || 7||
rAja\-yogasya mAhAtmyaM ko vA jAnAti tattvataH |
j~nAnaM muktiH sthitiH siddhirguru\-vAkyena labhyate || 8||
durlabho viShaya\-tyAgo durlabhaM tattva\-darshanam |
durlabhA sahajAvasthA sad\-guroH karuNAM vinA || 9||
vividhairAsanaiH kubhairvichitraiH karaNairapi |
prabuddhAyAM mahA\-shaktau prANaH shUnye pralIyate || 10||
utpanna\-shakti\-bodhasya tyakta\-niHsheSha\-karmaNaH |
yoginaH sahajAvasthA svayameva prajAyate || 11||
suShumNA\-vAhini prANe shUnye vishati mAnase |
tadA sarvANi karmANi nirmUlayati yogavit || 12||
amarAya namastubhyaM so.api kAlastvayA jitaH |
patitaM vadane yasya jagadetachcharAcharam || 13||
chitte samatvamApanne vAyau vrajati madhyame |
tadAmarolI vajrolI sahajolI prajAyate || 14||
j~nAnaM kuto manasi sambhavatIha tAvat
prANo.api jIvati mano mriyate na yAvat |
prANo mano dvayamidaM vilayaM nayedyo
mokShaM sa gachChati naro na kathaMchidanyaH || 15||
j~nAtvA suShumNAsad\-bhedaM kR^itvA vAyuM cha madhyagam |
sthitvA sadaiva susthAne brahma\-randhre nirodhayet || 16||
sUrya\-chandramasau dhattaH kAlaM rAtrindivAtmakam |
bhoktrI suShumnA kAlasya guhyametadudAhR^itam || 17||
dvA\-saptati\-sahasrANi nADI\-dvArANi pa~njare |
suShumNA shAmbhavI shaktiH sheShAstveva nirarthakAH || 18||
vAyuH parichito yasmAdagninA saha kuNDalIm |
bodhayitvA suShumNAyAM pravishedanirodhataH || 19||
suShumNA\-vAhini prANe siddhyatyeva manonmanI |
anyathA tvitarAbhyAsAH prayAsAyaiva yoginAm || 20||
pavano badhyate yena manastenaiva badhyate |
manashcha badhyate yena pavanastena badhyate || 21||
hetu\-dvayaM tu chittasya vAsanA cha samIraNaH |
tayorvinaShTa ekasmintau dvAvapi vinashyataH || 22||
mano yatra vilIyeta pavanastatra lIyate |
pavano lIyate yatra manastatra vilIyate || 23||
dugdhAmbuvatsaMmilitAvubhau tau
tulya\-kriyau mAnasa\-mArutau hi |
yato maruttatra manaH\-pravR^ittir
yato manastatra marut\-pravR^ittiH || 24||
tatraika\-nAshAdaparasya nAsha
eka\-pravR^itterapara\-pravR^ittiH |
adhvastayoshchendriya\-varga\-vR^ittiH
pradhvastayormokSha\-padasya siddhiH || 25||
rasasya manasashchaiva cha~nchalatvaM svabhAvataH |
raso baddho mano baddhaM kiM na siddhyati bhUtale || 26||
mUrchChito harate vyAdhInmR^ito jIvayati svayam |
baddhaH khecharatAM dhatte raso vAyushcha pArvati || 27||
manaH sthairyaM sthiro vAyustato binduH sthiro bhavet |
bindu\-sthairyAtsadA sattvaM piNDa\-sthairyaM prajAyate || 28||
indriyANAM mano nAtho manonAthastu mArutaH |
mArutasya layo nAthaH sa layo nAdamAshritaH || 29||
so.ayamevAstu mokShAkhyo mAstu vApi matAntare |
manaH\-prANa\-laye kashchidAnandaH sampravartate || 30||
pranaShTa\-shvAsa\-nishvAsaH pradhvasta\-viShaya\-grahaH |
nishcheShTo nirvikArashcha layo jayati yoginAm || 31||
uchChinna\-sarva\-sa~Nkalpo niHsheShAsheSha\-cheShTitaH |
svAvagamyo layaH ko.api jAyate vAg\-agocharaH || 32||
yatra dR^iShTirlayastatra bhUtendriya\-sanAtanI |
sA shaktirjIva\-bhUtAnAM dve alakShye layaM gate || 33||
layo laya iti prAhuH kIdR^ishaM laya\-lakShaNam |
apunar\-vAsanotthAnAllayo viShaya\-vismR^itiH || 34||
veda\-shAstra\-purANAni sAmAnya\-gaNikA iva |
ekaiva shAmbhavI mudrA guptA kula\-vadhUriva || 35||
atha shAmbhavI
antarlakShyaM bahirdR^iShTirnimeShonmeSha\-varjitA |
eShA sA shAmbhavI mudrA veda\-shAstreShu gopitA || 36||
antarlakShya\-vilIna\-chitta\-pavano yogI yadA vartate
dR^iShTyA nishchala\-tArayA bahiradhaH pashyannapashyannapi |
mudreyaM khalu shAmbhavI bhavati sA labdhA prasAdAdguroH
shUnyAshUnya\-vilakShaNaM sphurati tattattvaM padaM shAmbhavam || 37||
shrI\-shAmbhavyAshcha khecharyA avasthA\-dhAma\-bhedataH |
bhavechchitta\-layAnandaH shUnye chit\-sukha\-rUpiNi || 38||
tAre jyotiShi saMyojya kiMchidunnamayedbhruvau |
pUrva\-yogaM mano yu~njannunmanI\-kArakaH kShaNAt || 39||
kechidAgama\-jAlena kechinnigama\-sa~NkulaiH |
kechittarkeNa muhyanti naiva jAnanti tArakam || 40||
ardhonmIlita\-lochanaH sthira\-manA nAsAgra\-dattekShaNash
chandrArkAvapi lInatAmupanayannispanda\-bhAvena yaH |
jyotI\-rUpamasheSha\-bIjamakhilaM dedIpyamAnaM paraM
tattvaM tat\-padameti vastu paramaM vAchyaM kimatrAdhikam || 41||
divA na pUjayelli~NgaM rAtrau chaiva na pUjayet |
sarvadA pUjayelli~NgaM divArAtri\-nirodhataH || 42||
atha khecharI
savya\-dakShiNa\-nADI\-stho madhye charati mArutaH |
tiShThate khecharI mudrA tasminsthAne na saMshayaH || 43||
iDA\-pi~Ngalayormadhye shUnyaM chaivAnilaM graset |
tiShThate khecharI mudrA tatra satyaM punaH punaH || 44||
sUrchyAchandramasormadhye nirAlambAntare punaH |
saMsthitA vyoma\-chakre yA sA mudrA nAma khecharI || 45||
somAdyatroditA dhArA sAkShAtsA shiva\-vallabhA |
pUrayedatulAM divyAM suShumNAM pashchime mukhe || 46||
purastAchchaiva pUryeta nishchitA khecharI bhavet |
abhyastA khecharI mudrApyunmanI samprajAyate || 47||
bhruvormadhye shiva\-sthAnaM manastatra vilIyate |
j~nAtavyaM tat\-padaM turyaM tatra kAlo na vidyate || 48||
abhyasetkhecharIM tAvadyAvatsyAdyoga\-nidritaH |
samprApta\-yoga\-nidrasya kAlo nAsti kadAchana || 49||
nirAlambaM manaH kR^itvA na kiMchidapi chintayet |
sa\-bAhyAbhyantaraM vyomni ghaTavattiShThati dhruvam || 50||
bAhya\-vAyuryathA lInastathA madhyo na saMshayaH |
sva\-sthAne sthiratAmeti pavano manasA saha || 51||
evamabhyasyatastasya vAyu\-mArge divAnisham |
abhyAsAjjIryate vAyurmanastatraiva lIyate || 52||
amR^itaiH plAvayeddehamApAda\-tala\-mastakam |
siddhyatyeva mahA\-kAyo mahA\-bala\-parAkramaH || 53||
shakti\-madhye manaH kR^itvA shaktiM mAnasa\-madhyagAm |
manasA mana Alokya dhArayetparamaM padam || 54||
kha\-madhye kuru chAtmAnamAtma\-madhye cha khaM kuru |
sarvaM cha kha\-mayaM kR^itvA na kiMchidapi chintayet || 55||
antaH shUnyo bahiH shUnyaH shUnyaH kumbha ivAmbare |
antaH pUrNo bahiH pUrNaH pUrNaH kumbha ivArNave || 56||
bAhya\-chintA na kartavyA tathaivAntara\-chintanam |
sarva\-chintAM parityajya na kiMchidapi chintayet || 57||
sa~Nkalpa\-mAtra\-kalanaiva jagatsamagraM
sa~Nkalpa\-mAtra\-kalanaiva mano\-vilAsaH |
sa~Nkalpa\-mAtra\-matimutsR^ija nirvikalpam
Ashritya nishchayamavApnuhi rAma shAntim || 58||
karpUramanale yadvatsaindhavaM salile yathA |
tathA sandhIyamAnaM cha manastattve vilIyate || 59||
j~neyaM sarvaM pratItaM cha j~nAnaM cha mana uchyate |
j~nAnaM j~neyaM samaM naShTaM nAnyaH panthA dvitIyakaH || 60||
mano\-dR^ishyamidaM sarvaM yatkiMchitsa\-charAcharam |
manaso hyunmanI\-bhAvAddvaitaM naivolabhyate || 61||
j~neya\-vastu\-parityAgAdvilayaM yAti mAnasam |
manaso vilaye jAte kaivalyamavashiShyate || 62||
evaM nAnA\-vidhopAyAH samyaksvAnubhavAnvitAH |
samAdhi\-mArgAH kathitAH pUrvAchAryairmahAtmabhiH || 63||
suShumNAyai kuNDalinyai sudhAyai chandra\-janmane |
manonmanyai namastubhyaM mahA\-shaktyai chid\-Atmane || 64||
ashakya\-tattva\-bodhAnAM mUDhAnAmapi saMmatam |
proktaM gorakSha\-nAthena nAdopAsanamuchyate || 65||
shrI\-AdinAthena sa\-pAda\-koTi\-
laya\-prakArAH kathitA jayanti |
nAdAnusandhAnakamekameva
manyAmahe mukhyatamaM layAnAm || 66||
muktAsane sthito yogI mudrAM sandhAya shAmbhavIm |
shR^iNuyAddakShiNe karNe nAdamantAsthamekadhIH || 67||
shravaNa\-puTa\-nayana\-yugala
ghrANa\-mukhAnAM nirodhanaM kAryam |
shuddha\-suShumNA\-saraNau
sphuTamamalaH shrUyate nAdaH || 68||
Arambhashcha ghaTashchaiva tathA parichayo.api cha |
niShpattiH sarva\-yogeShu syAdavasthA\-chatuShTayam || 69||
atha ArambhAvasthA
brahma\-grantherbhavedbhedo hyAnandaH shUnya\-sambhavaH |
vichitraH kvaNako dehe.anAhataH shrUyate dhvaniH || 70||
divya\-dehashcha tejasvI divya\-gandhastvarogavAn |
sampUrNa\-hR^idayaH shUnya Arambhe yogavAnbhavet || 71||
atha ghaTAvasthA
dvitIyAyAM ghaTIkR^itya vAyurbhavati madhyagaH |
dR^iDhAsano bhavedyogI j~nAnI deva\-samastadA || 72||
viShNu\-granthestato bhedAtparamAnanda\-sUchakaH |
atishUnye vimardashcha bherI\-shabdastadA bhavet || 73||
atha parichayAvasthA
tR^itIyAyAM tu vij~neyo vihAyo mardala\-dhvaniH |
mahA\-shUnyaM tadA yAti sarva\-siddhi\-samAshrayam || 74||
chittAnandaM tadA jitvA sahajAnanda\-sambhavaH |
doSha\-duHkha\-jarA\-vyAdhi\-kShudhA\-nidrA\-vivarjitaH || 75||
atha niShpatty\-avasthA
rudra\-granthiM yadA bhittvA sharva\-pITha\-gato.anilaH |
niShpattau vaiNavaH shabdaH kvaNad\-vINA\-kvaNo bhavet || 76||
ekIbhUtaM tadA chittaM rAja\-yogAbhidhAnakam |
sR^iShTi\-saMhAra\-kartAsau yogIshvara\-samo bhavet || 77||
astu vA mAstu vA muktiratraivAkhaNDitaM sukham |
layodbhavamidaM saukhyaM rAja\-yogAdavApyate || 78||
rAja\-yogamajAnantaH kevalaM haTha\-karmiNaH |
etAnabhyAsino manye prayAsa\-phala\-varjitAn || 79||
unmany\-avAptaye shIghraM bhrU\-dhyAnaM mama saMmatam |
rAja\-yoga\-padaM prAptuM sukhopAyo.alpa\-chetasAm |
sadyaH pratyaya\-sandhAyI jAyate nAdajo layaH || 80||
nAdAnusandhAna\-samAdhi\-bhAjAM
yogIshvarANAM hR^idi vardhamAnam |
AnandamekaM vachasAmagamyaM
jAnAti taM shrI\-gurunAtha ekaH || 81||
karNau pidhAya hastAbhyAM yaH shR^iNoti dhvaniM muniH |
tatra chittaM sthirIkuryAdyAvatsthira\-padaM vrajet || 82||
abhyasyamAno nAdo.ayaM bAhyamAvR^iNute dhvanim |
pakShAdvikShepamakhilaM jitvA yogI sukhI bhavet || 83||
shrUyate prathamAbhyAse nAdo nAnA\-vidho mahAn |
tato.abhyAse vardhamAne shrUyate sUkShma\-sUkShmakaH || 84||
Adau jaladhi\-jImUta\-bherI\-jharjhara\-sambhavAH |
madhye mardala\-sha~NkhotthA ghaNTA\-kAhalajAstathA || 85||
ante tu ki~NkiNI\-vaMsha\-vINA\-bhramara\-niHsvanAH |
iti nAnAvidhA nAdAH shrUyante deha\-madhyagAH || 86||
mahati shrUyamANe.api megha\-bhery\-Adike dhvanau |
tatra sUkShmAtsUkShmataraM nAdameva parAmR^ishet || 87||
ghanamutsR^ijya vA sUkShme sUkShmamutsR^ijya vA ghane |
ramamANamapi kShiptaM mano nAnyatra chAlayet || 88||
yatra kutrApi vA nAde lagati prathamaM manaH |
tatraiva susthirIbhUya tena sArdhaM vilIyate || 89||
makarandaM pibanbhR^i~NgI gandhaM nApekShate yathA |
nAdAsaktaM tathA chittaM viShayAnnahi kA~NkShate || 90||
mano\-matta\-gajendrasya viShayodyAna\-chAriNaH |
samartho.ayaM niyamane ninAda\-nishitA~NkushaH || 91||
baddhaM tu nAda\-bandhena manaH santyakta\-chApalam |
prayAti sutarAM sthairyaM Chinna\-pakShaH khago yathA || 92||
sarva\-chintAM parityajya sAvadhAnena chetasA |
nAda evAnusandheyo yoga\-sAmrAjyamichChatA || 93||
nAdo.antara~Nga\-sAra~Nga\-bandhane vAgurAyate |
antara~Nga\-kura~Ngasya vadhe vyAdhAyate.api cha || 94||
antara~Ngasya yamino vAjinaH parighAyate |
nAdopAsti\-rato nityamavadhAryA hi yoginA || 95||
baddhaM vimukta\-chA~nchalyaM nAda\-gandhaka\-jAraNAt |
manaH\-pAradamApnoti nirAlambAkhya\-khe.aTanam || 96||
nAda\-shravaNataH kShipramantara~Nga\-bhuja~Ngamam |
vismR^itaya sarvamekAgraH kutrachinnahi dhAvati || 97||
kAShThe pravartito vahniH kAShThena saha shAmyati |
nAde pravartitaM chittaM nAdena saha lIyate || 98||
ghaNTAdinAda\-sakta\-stabdhAntaH\-karaNa\-hariNasya |
praharaNamapi sukaraM syAchChara\-sandhAna\-pravINashchet || 99||
anAhatasya shabdasya dhvanirya upalabhyate |
dhvanerantargataM j~neyaM j~neyasyAntargataM manaH |
manastatra layaM yAti tadviShNoH paramaM padam || 100||
tAvadAkAsha\-sa~Nkalpo yAvachChabdaH pravartate |
niHshabdaM tat\-paraM brahma paramAteti gIyate || 101||
yatkiMchinnAda\-rUpeNa shrUyate shaktireva sA |
yastattvAnto nirAkAraH sa eva parameshvaraH || 102||
iti nAdAnusandhAnam
sarve haTha\-layopAyA rAjayogasya siddhaye |
rAja\-yoga\-samArUDhaH puruShaH kAla\-va~nchakaH || 103||
tattvaM bIjaM haThaH kShetramaudAsInyaM jalaM tribhiH |
unmanI kalpa\-latikA sadya eva pravartate || 104||
sadA nAdAnusandhAnAtkShIyante pApa\-saMchayAH |
nira~njane vilIyete nishchitaM chitta\-mArutau || 105||
sha~Nkha\-dundhubhi\-nAdaM cha na shR^iNoti kadAchana |
kAShThavajjAyate deha unmanyAvasthayA dhruvam || 106||
sarvAvasthA\-vinirmuktaH sarva\-chintA\-vivarjitaH |
mR^itavattiShThate yogI sa mukto nAtra saMshayaH || 107||
khAdyate na cha kAlena bAdhyate na cha karmaNA |
sAdhyate na sa kenApi yogI yuktaH samAdhinA || 108||
na gandhaM na rasaM rUpaM na cha sparshaM na niHsvanam |
nAtmAnaM na paraM vetti yogI yuktaH samAdhinA || 109||
chittaM na suptaM nojAgratsmR^iti\-vismR^iti\-varjitam |
na chAstameti nodeti yasyAsau mukta eva saH || 110||
na vijAnAti shItoShNaM na duHkhaM na sukhaM tathA |
na mAnaM nopamAnaM cha yogI yuktaH samAdhinA || 111||
svastho jAgradavasthAyAM suptavadyo.avatiShThate |
niHshvAsochChvAsa\-hInashcha nishchitaM mukta eva saH || 112||
avadhyaH sarva\-shastrANAmashakyaH sarva\-dehinAm |
agrAhyo mantra\-yantrANAM yogI yuktaH samAdhinA || 113||
yAvannaiva pravishati charanmAruto madhya\-mArge
yAvadvidurna bhavati dR^iDhaH prANa\-vAta\-prabandhAt |
yAvaddhyAne sahaja\-sadR^ishaM jAyate naiva tattvaM
tAvajj~nAnaM vadati tadidaM dambha\-mithyA\-pralApaH || 114||

iti haTha\-yoga\-pradIpikAyAM samAdhi\-lakShaNaM nAma chaturthopadeshaH |
##
Input by Jan Brzezinski in Balaram encoding
Converted to itx encoding by Ulrich Stiehl

\medskip\hrule\obeylines

Please send corrections to sanskrit at cheerful dot c om
Last updated \today
https://sanskritdocuments.org

\end{document}