% Text title            : Atma-Vidya-Vilasa 1
% File name             : AtmavidyAvilAsa.itx
% Category              : major\_works, sadAshivabrahmendra
% Location              : doc\_z\_misc\_major\_works
% Author                : Sadashivendra Sarasvati
% Transliterated by     : Sunder Hattangadi
% Proofread by          : Sunder Hattangadi, kalyana krrit kalyanakrrit at gmail.com
% Description-comments  : on advaitic life
% Source                : Sivayogadipika of Sadasivayogisvara with Atmavidyavilasa (Anandashram)
% Latest update         : August 25, 2007, October 6, 2018
% Send corrections to   : sanskrit at cheerful dot c om
%
% This text is prepared by volunteers and is to be used for personal study 
% and research. The file is not to be copied or reposted for promotion of 
% any website or individuals or for commercial purpose without permission. 
% Please help to maintain respect for volunteer spirit.
%
\documentstyle[11pt,multicol,itrans]{article}
#include=ijag.inc
#endwordvowel=.h
\portraitwide
\parindent=100pt                
\let\usedvng=\Largedvng      % for 1 column     
\pagenumbering{itrans} 
\def\engtitle#1{\hrule\medskip\centerline{\LARGE #1}}
\def\itxtitle#1{\medskip\centerline{\LARGEdvng #1}\medskip\hrule}
\def\endtitles{\medskip\obeyspaceslines}
%%
\begin{document}
\engtitle{.. Atma-Vidya-Vilasa ..}##
\itxtitle{.. AtmavidyAvilAsaH ..}##\endtitles ##
shrIsadAshivendrasarasvatIvirachitaH
atha AtmavidyAvilAsaH |
chinmudritakarakamalaM chintitabhakteShTadaM vimalam |
guruvaramAdyaM ka~nchana niravadhikAnandanirbharaM vande ||
vaTatarunikaTanivAsaM paTutaravij~nAnamudritakarAbjam |
ka~nchana deshikamAdyaM kaivalyAnandakandalaM vande || 1||
niravadhisa.nsR^itinIradhinipatitajanatAraNasphurannaukAm |
paramatabhedanaghuTikAM paramashivendrAryapAdukAM naumi || 2||
deshikaparamashivendrAdeshavashodbuddhadivyamahimA.aham |
svAtmani vishrAntikR^ite sarasaM prastaumi ki~nchididam || 3||
nirupamanityanirIho niShkalanirmAyanirguNAkAraH |
vigalitasarvavikalpaH shuddho buddhashchakAsti paramAtmA || 4||
svAvidyaikanibaddhaH kurvankarmANi muhyamAnaH san |
daivAdvidhUtabandhaH svAtmaj~nAnAnmunirjayati || 5||
mAyAvashena supto madhye pashyansahasrashaH svapnAn |
deshikavachaHprabuddho dIvyatyAnandavAridhau ko.api || 6||
prAkR^itabhAvamapAsya svIkR^itanijarUpasachchidAnandaH |
guruvarakaruNApA~NgAdgauravamAsAdya mAdyati prAj~naH || 7||
shrIgurukR^ipayA sachchitsukhanijarUpe nimagnadhIrmaunI |
viharati kashchana vibudhaH shAntAhanto nitAntamuditAntaH || 8||
guruvarakaruNAlaharIvyatikarabharashItalasvAntaH |
ramate yativara eko nirupamasukhasImani svairam || 9||
shrIdeshikavarakaruNAravikarasamapohitAntaradhvAntaH |
viharanmaskarivaryo niravadhikAnandanIradhAvAste || 10||
janiviparItakramato buddhyA pravilApya pa~nchabhUtAni |
parishiShTamAtmatattvaM pashyannAste muniH shAntaH || 11||
jagadakhilamidamasAraM mAyikameveti manasi manvAnaH |
paryaTati pATitAshaH pragalitamadamAnamatsaraH ko.api || 12||
nAtmani ki~nchinmAyA tatkAryaM vA.asti vastuto vimale |
iti nishchayavAnantaH hR^iShyatyAnandanirbharo yogI || 13||
tvamahamabhimAnahIno moditanAnAjanAchAraH |
viharati bAlavadeko vimalasukhAmbhonidhau magnaH || 14||
avadhUtakarmajAlo jaDabadhirAndhopamaH ko.api |
AtmArAmo yatirADaTavIkoNeShvaTannAste || 15||
shAntyA dR^iDhopagUDhaH shAntasamastAnyavedanodAraH |
ramate rasaj~na eko ramye svAnandaparya~Nke || 16||
unmUlitaviShayAriH svIkR^itavairAgyasarvasvaH |
svAtmAnandamahimni svArAjye.asmin virAjate yatirAT || 17||
savitaryapi shItaruchau chandre tIkShNe.apyadho vahatyagnau |
mAyikamidamiti jAnanjIvanmukto na vismayI bhavati || 18||
aj~nAnavairivijayI praj~nAmAta~NgamastakArUDhaH |
viharati sa.nyamirAjaH samarasasukhadhAmni sarvato ramye || 19||
shAntAha.nkR^itidoShaH susamAhitamAnasaH ko.api |
pUrNendushishirabhAvo rAjatyAnandasatyachidrasikaH || 20||
tiShThanparatra dhAmni svIyasukhAsvAdaparavashaH kashchit |
kvApi dhyAyati kuhachidgAyati kutrApi nR^ityati svairam || 21||
agR^ihItAghakala~NkaH prashamitasa~NkalpavibhramaH prAj~naH |
nyakkR^itakAryakalApastiShThatyApUrNasImani kvApi || 22||
chapalaM manakura~NgaM chAru gR^ihItvA vimarshavAgurayA |
nigamAraNyavihArashrAntaH shete svadhAmni ko.apyekaH || 23||
dAruNachittavyAghraM dhIramanaHkhaDgadhArayA hatvA |
abhayAraNye ko.api svairavihArI jayatyekaH || 24||
sajjanahR^idayasarojonmIlanakaradhIkaraprasaraH |
eko yativarapUShA nirdoShashcharati chidgagane || 25||
kuvalayavikAsakAraNamaj~nAnadhvAntakaumudIpraj~naH |
shuddho munIndrachandraH surasevye lasati viShNupade || 26||
svAnandAmR^itasekairAntarasa.ntApasa.ntatiM shamayan |
chitramacha~nchalavR^ittishchidvyomani bhAti yogivaryaghanaH || 27||
sumanaHsaurabhama~njulasa~nchAranivAritAkhilashrAntiH |
sa.nyamichArusamIro viharatyAnandasa.nvidArAme || 28||
niHshreyasasarasaphale nirmalavij~nAnapallavamanoj~ne |
vItabhaye vipinatale yatishitikaNTho vibhAti ko.apyekaH || 29||
niHsArabhuvanamarutalamutsAryAnandasArarasapUrNe |
varasarasi chinmaye.asminparaha.nsaH ko.api dIvyati svairam || 30 |
nikhilAgamapallavite nigamashirastantrashItalodyAne |
madhuratarama~njuvAchaH kUjannAste yatIdrakalakaNThaH || 31||
dAritamohamadebho dUrIkR^itasakaladuritashArdUlaH |
vibudhottamasi.nhavaro viharatyAnandavitatakAntAre || 32||
aj~nAnamR^igavarojjhitavij~nAnottu~NgashR^i~Ngashikharitale |
matisalilashItalA~Ngo yatimadakalabho virAjate viharan || 33||
nAsA~nchalanihitAkSho nAmAdibhyo nivartitasvAntaH |
taTinItaTeShu tattvaM dhyAyannAste yatiH ko.api || 34||
AshAvasano maunI nairAshyAla~NkR^itaH shAntaH |
karatalabhikShApAtrastarutalanilayo munirjayati || 35||
vijananadIku~njagR^ihe ma~njulapulinaikama~njutaratalpe |
shete ko.api yatIndraH samarasasukhabodhavastunistandraH || 36||
bhUtalamR^idutarashayyaH shItalavAtaikachAmaraH shAntaH |
rAkAhimakaradIpo rAjati yatirAjashekharaH ko.api || 37||
vipulashilAtalaphalake vimalasaridvAriparivR^itodAre |
mandaM malayajapavane vAti prasvapiti ko.api yatirAjaH || 38||
AntaramekaM ki~nchitsantatamanusandadhanmahAmaunI |
karapuTabhikShAmashnannaTati hi vIthyAM jaDAkR^itiH ko.api || 39||
pravilApya jagadasheShaM parishiShTAkhaNDavastuparatantraH |
prAshnAti kavalamAsye prAptaM prArabdhakarmaNA ko.api || 40||
nindati kimapi na yogI nandati naivAparaM kimapyantaH |
chandanashItalahR^idayaH kandalitAnandamantharaH svAste || 41||
santyajya shAstrajAlaM saMvyavahAraM cha sarvatastyaktvA |
Ashritya pUrNapadavImAste niShkampadIpavadyogI || 42||
tR^iNapa~NkacharchitA~NgastR^iNamiva vishvaM vilokayanyogI |
viharati rahasi vanAnte vijarAmarabhUmni vishrAntaH || 43||
pashyati kimapi na rUpaM na vadati na shR^iNoti ki~nchidapi vachanam |
tiShThati nirupamabhUmani niShThAmavalambya kAShThavadyogI || 44||
jAtyabhimAnavihIno jantuShu sarvatra pUrNatAM pashyan |
gUDhaM charati yatIndro mUDhavadakhilAgamArthatattvaj~naH || 45||
upadhAya bAhumUlaM paridhAyAkAshamavanimAstIrya |
prasvapiti virativanitAM parirabhyAnandaparavashaH ko.api || 46||
gatabhedavAsanAbhiH svapraj~nodAravAranArIbhiH |
ramate saha yatirAjastrayyantAntaHpure ko.api || 47||
vairAgyavipulamArgaM vij~nAnoddAmadIpikoddIptam |
Aruhya tattvaharmyaM muktyA saha modate yatirAT || 48||
vijanatalotpalamAlAM vanitAvaitR^iShNyakalpavallIM cha |
apamAnAmR^itaguTikAmAtmaj~naH ko.api gR^ihNAti || 49||
na niShedhati doShadhiyA guNabuddhyA vA na ki~nchidAdatte |
Avidyakamakhilamiti j~nAtvodAste muniH ko.api || 50||
bhUtaM kimapi na manute bhAvi cha ki~nchinna chintayatyantaH |
pashyati na purovartyapi vastu samastArthasamarasaH ko.api || 51||
nigR^ihItAkhilakaraNo nirmR^iShTAsheShaviShayehaH |
tR^iptimanuttamasImAM prAptaH paryaTati ko.api yativaryaH || 52||
santyajati nopapannaM nAsampannaM cha vA~nChati kvApi |
svasthaH shete yatirADAntaramAnandamanubhavannekaH || 53||
kAmapi vimalAM padavImAsAdyAnandasaMvidunnidrAm |
Aste bhikShuka eko viharannirmuktabandhanaH svairam || 54||
vastunyastamitAkhilavishvavihAre vilInamanAH |
rAjati parAnapekSho rAjA.akhilavItarAgANAm || 55||
AchAryApA~NgadR^ishA samavAptApArasaMvidAkAraH |
prashamitasakalavibhedaH parahaMsaH kashchidAbhAti || 56||
varNAshramavyavasthAmuttIrya vidhUya vidyAdIn |
parishiShyate yatIndraH paripUrNAnandabodhamAtreNa || 57||
kShayamupanIya samastaM karma prArabdhamupabhujya |
pravigalitadehabandhaH prAj~no brahmaiva kevalaM bhavati || 58||
stimitamanantamanAdyaM santatamAnandabodhaghanam |
avikalpamAdyamekaM sanmAtraM vidyate kimapi || 59||
akSharamajaramajAtaM sUkShmatarApUrvashuddhavij~nAnam |
pragalitasarvakleshaM paratattvaM vartate kimapi || 60||
sukhataramamaramadUraM sAraM saMsAravAridhestIram |
samarasamabhayamapAraM tatki~nchana vidyate tattvam || 61||
arasamagandhamarUpaM virajaskamasattvamatamaskam |
nirupamanirbhayatattvaM tatkimapi dyotate nityam || 62||
iti gurukaruNApA~NgAdAryAbhirdvyadhikaShaShTisa~NkhyAbhiH |
niravadyAbhiravochaM nigamashirastantrasArabhUtArtham || 63||
gaditamimamAtmavidyAvilAsamanuvAsaraM smaranvibudhaH |
pariNataparAtmavidyaH prapadyate sapadi paramArtham || 64||
paramashivendrashrIgurushiShyeNetthaM sadAshivendreNa |
rachiteyamAtmavidyAvilAsanAmnI kR^itiH pUrNA || 65||

iti shrImatparamahaMsaparivrAjakAchArya\-
shrIparamashivendrasarasvatIpAdAbjasevAparAyaNa\-
shrIsadAshivendrasarasvatyA virachitaH
AtmavidyAvilAsaH samAptaH ||
##
Encoded by Sunder Hattangadi
Proofread by Sunder Hattangadi, kalyana krrit kalyanakrrit at gmail.com

\medskip\hrule\obeylines

Please send corrections to sanskrit@cheerful.com
Last updated \today
https://sanskritdocuments.org

\end{document}