% Text title            : adhyardhashataka Hymn of One Hundred-fifty Verses
% File name             : adhyardhashataka.itx
% Category              : major\_works, buddha, bauddhastotrasangraha
% Location              : doc\_z\_misc\_major\_works
% Author                : mAtRicheTa
% Transliterated by     : Jens-Uwe Hartmann posted on GRETIL
% Description/comments  : The edition of D. R. Shackleton Bailey, The Śatapañcāśatka of Mātṛceṭa, Cambridge 1951, also Bauddha stotra Samgrahah
% Latest update         : July 13, 2019
% Send corrections to   : sanskrit at cheerful dot c om
%
% This text is prepared by volunteers and is to be used for personal study 
% and research. The file is not to be copied or reposted for promotion of 
% any website or individuals or for commercial purpose without permission. 
% Please help to maintain respect for volunteer spirit.
%
\documentstyle[11pt,multicol,itrans]{article}
#include=ijag.inc
#endwordvowel=.h
\portraitwide
\parindent=100pt                
\let\usedvng=\Largedvng      % for 1 column     
\pagenumbering{itrans} 
\def\engtitle#1{\hrule\medskip\centerline{\LARGE #1}}
\def\itxtitle#1{\medskip\centerline{\LARGEdvng #1}\medskip\hrule}
\def\endtitles{\medskip\obeyspaceslines}
%%
\begin{document}
\engtitle{.. Hymn of One Hundred-fifty Verses ..}##
\itxtitle{.. adhyardhashatakam ..}##\endtitles ##
prasAdapratibhodhava (shatapa~nchAshatakanAmastotram) mAtR^icheTavirachitam |
parichCheda sUchi ## Sections##
1\. upodghAtastavaH  ##1. The purpose of composition.##
2\. hetustavaH ##2. Buddha's struggle for the perfection of his life.##
3\. nirupamastavaH ##3. His unparalleled qualities.##
4\. adbhutastavaH ##4. His wonderful deeds.##
5\. rUpastavaH ##5. His perfection of body.##
6\. karuNAstavaH ##6. His great mercy.##
7\. vachanastavaH ##7. His power and perfection of speech.##
8\. shAsanastavaH ##8. His spotless law.##
9\. praNidhistavaH ##9. The benefits derived from the Buddha's deeds.##
10\. mArgAvatArastavaH ##10. His perfect method of conversion.##
11\. duShkarastavaH ##11. He suffered great hardships in the attainment of the Buddhahood.##
12\. kaushalastavaH ##12. His cleverness in the method of teaching.##
13\. anR^iNyastavaH ##13. His great debt to humanity.##

\section{1\. upodghAtastavaH}
namo buddhAya
sarvadA sarvathA sarve yasya doShA na santi ha |
sarve sarvAbhisAreNa yatra chAvasthitA guNAH || 1||
tameva sharaNaM gantuM taM stotuM tamupAsitum |
tasyaiva shAsane sthAtuM nyAyyaM yadyasti chetanA || 2||
savAsanAshcha te doShA na santyekasya tAyinaH |
sarve sarvavidaH santi guNAste chAnapAyinaH || 3||
na hi pratiniviShTo.api manovAkkAyakarmasu |
saha dharmeNa labhate kashchidbhagavato.antaram || 4||
so.ahaM prApya manuShyatvaM sasaddharmamahotsavam |
mahArNavayugachChidrakUrmagrIvArpaNopamam || 5||
anityatAvyanusR^itAM karmachChidrasasaMshayAm |
AttasArAM kariShyAmi kathaM nemAM sarasvatIm || 6||
ityasa~NkhyeyaviShayAnavetyApi guNAnmuneH |
tadekadeshapraNayaH kriyate svArthagauravAt || 7||
svayambhuve namaste.astu prabhUtAdbhutakarmaNe |
yasya sa~NkhyAprabhAvAbhyAM na guNeShvasti nishchayaH || 8||
iyanta iti nAstyanta IdR^ishA iti kA kathA |
puNyA ityeva tu guNAnprati te mukharA vayam || 9||

upodghAtastavo nAma prathamaH parichChedaH |

\section{2\. hetustavaH}
viShahyamaviShahyaM vetyavadhUya vichAraNAm |
svayamabhyupapannaM te nirAkrandamidaM jagat || 10||
avyApAritasAdhustvaM tvamakAraNavatsalaH |
asaMstutasakhashcha tvamanavaskR^itabAndhavaH || 11||
svamAMsAnyapi dattAni vastuShvanyeShu kA kathA |
prANairapi tvayA sAdho mAnitaH praNayI janaH || 12||
svaiH sharIraiH sharIrANi prANaiH prANAH sharIriNAm |
jighAMsubhirupAttAnAM krItAni shatashastvayA || 13||
na durgatibhayAnneShTAmabhiprArthayatA gatim |
kevalAshayashud.hdhyaiva shIlaM sAtmIkR^itaM tvayA || 14||
jihmAnAM nityavikShepAdR^ijUnAM nityasevanAt |
karmaNAM parishuddhAnAM tvamekAyanatAM gataH || 15||
pIDyamAnena bahushastvayA kalyANachetasA |
klesheShu vivR^itaM tejo janaH kliShTo.anukampitaH || 16||
parArthe tyajataH prANAnyA prItirabhavat tava |
na sA naShTopalabdheShu prANeShu prANinAM bhavet || 17||
yadrujAnirapekShasya chChidyamAnasya te.asakR^it |
vadhakeShvapi sattveShu kAruNyamabhavat prabho || 18||
samyaksambodhibIjasya chittaratnasya tasya te |
tvameva vIra sAraj~no dUre tasyetaro janaH || 19||
nAkR^itvA duShkaraM karma durlabhaM labhyate padam |
ityAtmanirapekSheNa vIryaM saMvardhitaM tvayA || 20||
visheShotkarShaniyamo na kadA chidabhUt tava |
atastvayi visheShANAM ChinnastaratamakramaH || 21||
susukheShvapi sa~Ngo.abhUt saphaleShu samAdhiShu |
na te nityAnubaddhasya mahAkaruNayA hR^idi || 22||
tvAdR^ishAnpIDayatyeva nAnugR^ihNAti tat sukham |
praNItamapi sadvR^ittaM yadasAdhAraNaM paraiH || 23||
vimishrAt sAramAdattaM sarvaM pItamakalmaSham |
tvayA sUktaM duruktaM tu viShavat parivarjitam || 24||
krINatA ratnasAraj~na prANairapi subhAShitam |
parAkrAntaM tvayA bodhau tAsu tAsUpapattiShu || 25||
iti tribhirasa~NkhyeyairevamudyachChatA tvayA |
vyavasAyadvitIyena prAptaM padamanuttaram || 26||

hetustavo nAma dvitIyaH parichChedaH |

\section{3\. nirupamastavaH}
akR^itverShyAM vishiShTeShu hInAnanavamatya cha |
agatvA sadR^ishaiH spardhAM tvaM loke shreShThatAM gataH || 27||
hetuShvabhinivesho.abhUdguNAnAM na phaleShu te |
tena samyakpratipadA tvayi niShThAM guNA gatAH || 28||
tathAtmA prachayaM nItastvayA sucharitairyathA |
puNyAyatanatAM prAptAnyapi pAdarajAMsi te || 29||
karshayitvoddhR^itA doShA vardhayitvA vishodhitAH |
guNAstena sunItena parAM siddhiM tvamadhyagAH || 30||
tathA sarvAbhisAreNa doSheShu prahR^itaM tvayA |
yathaiShAmAtmasantAne vAsanApi na sheShitA || 31||
tathA sambhR^itya sambhR^itya tvayAtmanyAhitA guNAH |
pratirUpakamapyeShAM yathA nAnyatra dR^ishyate || 32||
upaghAtAvaraNavanmitakAlaM pradeshi cha |
sulabhAtishayaM sarvamupamAvastu laukikam || 33||
advandvinAmagamyAnAM dhruvANAmanivartinAm |
anuttarANAM kA tarhi guNAnAmupamAstu te || 34||
goShpadottAnatAM yAti gAmbhIryaM lavaNAmbhasaH |
yadA te buddhigAmbhIryamagAdhApAramIkShate || 35||
shirIShapakShmAgralaghu sthairyaM bhavati pArthivam |
akampye sarvadharmANAM tvatsthairye.abhimukhIkR^ite || 36||
aj~nAnatimiraghnasya j~nAnAlokasya te mune |
na ravirviShaye bhUmiM khAdyotImapi vindati || 37||
malinatvamivAyAnti sharachchandrAmbarAmbhasAm |
tava vAgbuddhicheShTAnAM shuddhiM prati vishuddhayaH || 38||
anena sarvaM vyAkhyAtaM yat kiM chit sAdhu laukikam |
dUre hi buddhadharmANAM lokadharmAstapasvinaH || 39||
yasyaiva dharmaratnasya prAptyA prAptastvamagratAm |
tenaiva kevalaM sAdho sAmyaM te tasya cha tvayA || 40||
AtmechChAchChalamAtraM tu sAmAnyopAMshu kiM chana |
yatropakShipya kathyeta sA vakturatilolatA || 41||

nirupamastavo nAma tR^itIyaH parichChedaH |

\section{4\. adbhutastavaH}
pratanviva hi pashyAmi dharmatAmanuchintayan |
sarvaM chAvarjitaM mAravijayaM prati te jagat || 42||
mahato.api hi saMrambhAt pratihantuM samudyataH |
kShamAyA nAtibhAro.asti pAtrasthAyA visheShataH || 43||
yat tu mArajayAnvakShaM sumahat kleshavaishasam |
tasyAmeva kR^itaM rAtrau tadeva paramAdbhutam || 44||
tamovidhamane bhAnoryaH sahasrAMshumAlinaH |
vIra vismayamAgachChet sa tIrthyavijaye tava || 45||
sarAgo vItarAgeNa jitaroSheNa roShaNaH |
mUDho vigatamohena tribhirnityaM jitAstrayaH || 46||
prashaMsasi cha saddharmAnasaddharmAnvigarhasi |
anurodhavirodhau cha na staH sadasatostava || 47||
naivArhatsu na tIrthyeShu pratighAnunayaM prati |
yasya te chetaso.anyatvaM tasya te kA stutirbhavet || 48||
guNeShvapi na sa~Ngo.abhUt tR^iShNA na guNavatsvapi |
aho te suprasannasya sattvasya parishuddhatA || 49||
indriyANAM prasAdena nityakAlAnapAyinA |
mano nityaprasannaM te pratyakShamiva dR^ishyate || 50||
AbAlebhyaH prasiddhAste matismR^itivishuddhayaH |
gamitA bhAvapishunaiH suvyAhR^itasucheShTitaiH || 51||

adbhutastavo nAma chaturthaH parichChedaH |

\section{5\. rUpastavaH}
upashAntaM cha kAntaM cha dIptamapratighAti cha |
nibhR^itaM chorjitaM chedaM rUpaM kamiva nAkShipet || 52||
yenApi shatasho dR^iShTaM yo.api tatpUrvamIkShate |
rUpaM prINAti te chakShuH samaM tadubhayorapi || 53||
asechanakabhAvAddhi saumyabhAvAchcha te vapuH |
darshane darshane prItiM vidadhAti navAM navAm || 54||
adhiShThAnaguNairgAtramadhiShThAtR^iguNairguNAH |
parayA sampadopetAstavAnyonyAnurUpayA || 55||
kvAnyatra suniviShTAH syurime tAthAgatA guNAH |
R^ite rUpAt tavaivAsmAl lakShaNavya~njanojjvalAt || 56||
dhanyamasmIti te rUpaM vadatIvAshritAnguNAn |
sunikShiptA vayamiti pratyAhuriva tadguNAH || 57||

rupastavo nAma pa~nchamaH parichChedaH |

\section{6\. karuNAstavaH}
sarvamevAvisheSheNa kleshairbaddhamidaM jagat |
tvaM jagatkleshamokShArthaM baddhaH karuNayA chiram || 58||
kaM nu prathamato vande tvAM mahAkaruNAmuta |
yayaivamapi doShaj~nastvaM saMsAre dhR^itashchiram || 59||
vivekasukhasAtmyasya yadAkIrNasya te gatAH |
kAlA labdhaprasarayA tat te karuNayA kR^itam || 60||
shAntAdaraNyAdgrAmAntaM tvaM hi nAga iva hradAt |
vineyArthaM karuNayA vidyayevAvakR^iShyase || 61||
paramopashamastho.api karuNAparavattayA |
kAritastvaM padanyAsaM kushIlavakalAsvapi || 62||
R^iddhiryA siMhanAdA ye svaguNodbhAvanAshcha yAH |
vAntechChopavichArasya kAruNyanikaShaH sa te || 63||
parArthaikAntakalyANI kAmaM svAshrayaniShThurA |
tvayyeva kevalaM nAtha karuNAkaruNAbhavat || 64||
tathA hi kR^itvA shatadhA dhIrA balimiva kva chit |
pareShAmarthasid.hdhyarthaM tvAM vikShiptavatI dishaH || 65||
tvadichChayaiva tu vyaktamanukUlA pravartate |
tathA hi bAdhamAnApi tvAM satI nAparAdhyate || 66||

karuNAstavo nAma ShaShThaHparichChedaH |

\section{7\. vachanastavaH}
supadAni mahArthAni tathyAni madhurANi cha |
gUDhottAnobhayArthAni samAsavyAsavanti cha || 67||
kasya na syAdupashrutya vAkyAnyevaMvidhAni te |
tvayi pratihatasyApi sarvaj~na iti nishchayaH || 68||
prAyeNa madhuraM sarvamagatyA kiM chidanyathA |
vAkyaM tavArthasid.hdhyA tu sarvameva subhAShitam || 69||
yachChlakShNaM yachcha paruShaM yadvA tadubhayAnvitam |
sarvamevaikarasatAM vimarde yAti te vachaH || 70||
aho suparishuddhAnAM karmaNAM naipuNaM param |
yairidaM vAkyaratnAnAmIdR^ishaM bhAjanaM kR^itam || 71||
asmAddhi netrasubhagAdidaM shrutimanoharam |
mukhAt kSharati te vAkyaM chandrAddravamivAmR^itam || 72||
rAgareNuM prashamayadvAkyaM te jaladAyate |
vainateyAyate dveShabhuja~NgoddharaNaM prati || 73||
divAkarAyate bhUyo.apyaj~nAnatimiraM nudat |
shakrAyudhAyate mAnagirInabhividArayat || 74||
dR^iShTArthatvAdavitathaM niShkleshatvAdanAkulam |
gamakaM suprayuktatvAt trikalyANaM hi te vachaH || 75||
manAMsi tAvachChrotR^INAM harantyAdau vachAMsi te |
tato vimR^ishyamAnAni rajAMsi cha tamAMsi cha || 76||
AshvAsanaM vyasaninAM trAsanaM cha pramAdinAm |
saMvejanaM cha sukhinAM yogavAhi vachastava || 77||
viduShAM prItijananaM madhyAnAM buddhivardhanam |
timiraghnaM cha mandAnAM sArvajanyamidaM vachaH || 78||
apakarShati dR^iShTibhyo nirvANamupakarShati |
doShAnniShkarShati guNAnvAkyaM te.abhipravarShati || 79||
sarvatrAvyAhatA buddhiH sarvatropasthitA smR^itiH |
avandhyaM tena sarvatra sarvaM vyAkaraNaM tava || 80||
yannAdeshe na chAkAle naivApAtre pravartase |
vIryaM samyagivArabdhaM tenAmoghaM vachastava || 81||

vachanastavo nAma saptamaH parichChedaH |

\section{8\. shAsanastavaH}
ekAyanaM sukhopAyaM svanubandhi niratyayam |
AdimadhyAntakalyANaM tava nAnyasya shAsanam || 82||
evamekAntakAntaM te dR^iShTirAgeNa bAlishAH |
mataM yadi vigarhanti nAsti dR^iShTisamo ripuH || 83||
anvabhu~NkthA yadasyArthe jagato vyasanaM bahu |
tat saMsmR^itya virUpe.api stheyaM te shAsane bhavet || 84||
prAgeva hitakartushcha hitavaktushcha shAsanam |
kathaM na nAma kAryaM syAdAdIptashirasApi te || 85||
bhujiShyatA bodhisukhaM tvadguNApachitiH shamaH |
prApyate tvanmatAt sarvamidaM bhadrachatuShTayam || 86||
trAsanaM sarvatIrthyAnAM namucherupatApanam |
AshvAsanaM nR^idevAnAM tavedaM vIra shAsanam || 87||
traidhAtukamahAbhaumamasa~Ngamanavagraham |
shAsanena tavAkrAntamantakasyApi shAsanam || 88||
tvachChAsananayaj~no hi tiShThet kalpamapIchChayA |
prayAti tatra tu svairI yatra mR^ityoragocharaH || 89||
AgamasyArthachintAyA bhAvanopAsanasya cha |
kAlatrayavibhAgo.asti nAnyatra tava shAsanAt || 90||
evaM kalyANakalilaM tavedaM R^iShipu~Ngava |
shAsanaM nAdriyante yat kiM vaishasataraM tataH || 91||

shAsanastavo nAmAShTamaH parichChedaH |

\section{9\. praNidhistavaH}
shravaNaM tarpayati te prasAdayati darshanam |
vachanaM hlAdayati te vimochayati shAsanam || 92||
prasUtirharShayati te vR^iddhirnandayati prajAH |
pravR^ittiranugR^ihNAti nivR^ittirupahanti cha || 93||
kIrtanaM kilbiShaharaM smaraNaM te pramodanam |
anveShaNaM matikaraM parij~nAnaM vishodhanam || 94||
shrIkaraM te.abhigamanaM sevanaM dhIkaraM param |
bhajanaM nirbhayakaraM sha~NkaraM paryupAsanam || 95||
shIlopasampadA shuddhaH prasanno dhyAnasampadA |
tvaM praj~nAsampadAkShobhyo hradaH puNyamayo mahAn || 96||
rUpaM draShTavyaratnaM te shravyaratnaM subhAShitam |
dharmo vichAraNAratnaM guNaratnAkaro hyasi || 97||
tvamoghairuhyamAnAnAM dvIpastrANaM kShatAtmanAm |
sharaNaM bhavabhIrUNAM mumukShUNAM parAyaNam || 98||
satpAtraM shuddhavR^ittatvAt satkShetraM phalasampadA |
sanmitraM hitakAritvAt sarvaprANabhR^itAmasi || 99||
priyastvamupakAritvAt suratatvAnmanoharaH |
ekAntakAntaH saumyatvAt sarvairbahumato guNaiH || 100||
hR^idyo.asi niravadyatvAdramyo vAgrUpasauShThavAt |
dhanyaH sarvArthasiddhatvAnma~Ngalyo guNasaMshrayAt || 101||

praNidhistavo nAma navamaH parichChedaH |

\section{10\. mArgAvatArastavaH}
sthAyinAM tvaM parikSheptA viniyantApahAriNAm |
samAdhAtA vijihmAnAM prerako mandagAminAm || 102||
niyoktA dhuri dAntAnAM khaTu~NkAnAmupekShakaH |
ato.asi naradamyAnAM satsArathiranuttaraH || 103||
ApanneShvanukampA te prasvastheShvarthakAmatA |
vyasanastheShu kAruNyaM sarveShu hitakAmatA || 104||
viruddheShvapi vAtsalyaM pravR^ittiH patiteShvapi |
raudreShvapi kR^ipAlutvaM kA nAmeyaM tavAryatA || 105||
gurutvamupakAritvAnmAtApitroryadIShyate |
kedAnImastu gurutA tvayyatyantopakAriNi || 106||
svakAryanirapekShANAM viruddhAnAmivAtmanAm |
tvaM prapAtataTasthAnAM prAkAratvamupAgataH || 107||
lokadvayopakArAya lokAtikramaNAya cha |
tamobhUteShu lokeShu praj~nAlokaH kR^itastvayA || 108||
bhinnA devamanuShyANAmupabhogeShu vR^ittayaH |
dharmasambhogasAmAnyAt tvayyasambhedamAgatAH || 109||
upapattivayovarNadeshakAlaniratyayam |
tvayA hi bhagavandharmasarvAtithyamidaM kR^itam || 110||
avismitAnvismitavat spR^ihayanto gataspR^ihAn |
upAsate prA~njalayaH shrAvakAnapi te surAH || 111||
aho saMsAramaNDasya buddhotpAdasya dIptatA |
mAnuShyaM yatra devAnAM spR^ihaNIyatvamAgatam || 112||

mArgAvatArastavo nAma dashamaH parichChedaH |

\section{11\. duShkarastavaH}
khedaH shamasukhajyAnirasajjanasamAgamaH |
dvandvAnyAkIrNatA cheti doShAnguNavadudvahan || 113||
jagaddhitArthaM ghaTase yadasa~Ngena chetasA |
kA nAmAsau bhagavatI buddhAnAM buddhadharmatA || 114||
kadannAnyapi bhuktAni kva chit kShudadhivAsitA |
panthAno viShamAH kShuNNAH suptaM gokaNTakeShvapi || 115||
prAptAH kShepAvR^itAH sevA veShabhAShAntaraM kR^itam |
nAtha vaineyavAtsalyAt prabhuNApi satA tvayA || 116||
prabhutvamapi te nAtha sadA nAtmani vidyate |
vaktavya iva sarvairhi svairaM svArthe niyujyase || 117||
yena kena chideva tvaM yatra tatra yathA tathA |
choditaH svAM pratipadaM kalyANIM nAtivartase || 118||
nopakArapare.apyevamupakAraparo janaH |
apakArapare.api tvamupakAraparo yathA || 119||
ahitAvahite shatrau tvaM hitAvahitaH suhR^it |
doShAnveShaNanitye.api guNAnveShaNatatparaH || 120||
yato nimantraNaM te.abhUt saviShaM sahutAshanam |
tatrAbhUdabhisaMyAnaM sadayaM sAmR^itaM cha te || 121||
AkroShTAro jitAH kShAntyA drugdhAH svastyayanena cha |
satyena chApavaktArastvayA maitryA jighAMsavaH || 122||
anAdikAlaprahatA bahvyaH prakR^itayo nR^iNAm |
tvayA vibhAvitApAyAH kShaNena parivartitAH || 123||

duShkarastavo nAmaikAdashaH parichChedaH |

\section{12\. kaushalastavaH}
yat sauratyaM gatAstIkShNAH kadaryAshcha vadAnyatAm |
krUrAH peshalatAM yAtAstat tavopAyakaushalam || 124||
indriyopashamo nande mAnastabdhe cha sannatiH |
kShamitvaM chA~NgulImAle kaM na vismayamAnayet || 125||
bahavastR^iNashayyAsu hitvA shayyAM hiraNmayIm |
asherata sukhaM dhIrAstR^iptA dharmarasasya te || 126||
pR^iShTenApi kva chinnoktamupetyApi kathA kR^itA |
tarShayitvA paratroktaM kAlAshayavidA tvayA || 127||
pUrvaM dAnakathAdyAbhishchetasyutpAdya sauShThavam |
tato dharmo gatamale vastre ra~Nga ivArpitaH || 128||
na so.astyupAyaH shaktirvA yena na vyAyataM tava |
ghorAt saMsArapAtAlAduddhartuM kR^ipaNaM jagat || 129||
bahUni bahurUpANi vachAMsi charitAni cha |
vineyAshayabhedena tatra tatra gatAni te || 130||
vishuddhAnyaviruddhAni pUjitAnyarchitAni cha |
sarvANyeva nR^idevAnAM hitAni mahitAni cha || 131||
na hi vaktuM cha kartuM cha bahu sAdhu cha shakyate |
anyathAnanyathAvAdindR^iShTaM tadubhayaM tvayi || 132||
kevalAtmavishud.hdhyaiva tvayA pUtaM jagadbhavet |
yasmAnnaivaMvidhaM kShetraM triShu lokeShu vidyate || 133||
prAgevAtyantanaShTAnAmanAdau bhavasa~NkaTe |
hitAya sarvasattvAnAM yastvamevaM samudyataH || 134||

kaushalastavo nAma dvAdashaH parichChedaH |

\section{13\. AnR^iNyastavaH}
na tAM pratipadaM vedmi syAdyayApachitistava |
api ye parinirvAnti te.api te nAnR^iNA janAH || 135||
tava te.avasthitA dharme svArthameva tu kurvate |
yaH shramastannimittaM tu tava kA tasya niShkR^itiH || 136||
tvaM hi jAgarShi suptAnAM santAnAnyavalokayan |
apramattaH pramattAnAM sattvAnAM bhadrabAndhavaH || 137||
kleshAnAM vadha AkhyAto mAramAyA vighATitA |
uktaM saMsAradaurAtmyamabhayA digvidarshitA || 138||
kimanyadarthakAmena sattvAnAM karuNAyatA |
karaNIyaM bhavedyatra na dattAnunayo bhavAn || 139||
yadi sa~nchAriNo dharmAH syurime niyataM tvayA |
devadattamupAdAya sarvatra syurniveshitAH || 140||
ata eva jagannAtha nehAnyo.anyasya kArakaH |
iti tvamuktavAnbhUtaM jagat sa.nj~napayann iva || 141||
chirAya bhuvi saddharmaM prerya lokAnukampayA |
bahUnutpAdya sachChiShyAMstrailokyAnugrahakShamAn || 142||
sAkShAdvineyavargIyAnsubhadrAntAnvinIya cha |
R^iNasheShaM kimadyApi sattveShu yadabhUt tava || 143||
yastvaM samAdhivajreNa tilasho.asthIni chUrNayan |
atiduShkarakAritvamante.api na vimuktavAn || 144||
parArthAveva me dharmarUpakAyAviti tvayA |
duShkuhasyAsya lokasya nirvANe.api vidarshitam || 145||
tathA hi satsu sa~NkrAmya dharmakAyamasheShataH |
tilasho rUpakAyaM cha bhittvAsi parinirvR^itaH || 146||
aho sthitiraho vR^ittamaho rUpamaho guNAH |
na nAma buddhadharmANAmasti kiM chidanadbhutam || 147||
upakAriNi chakShuShye shAntavAkkAyakarmaNi |
tvayyapi pratihanyante pashya mohasya raudratAm || 148||
puNyodadhiM ratnanidhiM dharmarAshiM guNAkaram |
ye tvAM sattvA namasyanti tebhyo.api sukR^itaM namaH || 149||
akShayAste guNA nAtha shaktistu kShayiNI mama |
ataH prasa~NgabhIrutvAt sthIyate na vitR^iptitaH || 150||
aprameyamasa~Nkhyeyamachintyamanidarshanam |
svayamevAtmanAtmAnaM tvameva j~nAtumarhasi || 151||
na te guNAMshAvayavo.api kIrtitaH
     parA cha nastuShTiravasthitA hR^idi |
akarshanenaiva mahAhradAmbhasAM
     janasya tarShAH prashamaM vrajanti ha || 152||
phalodayenAsya shubhasya karmaNo
     muniprasAdapratibhodbhavasya me |
asadvitarkAkulamAruteritaM
     prayAtu chittaM jagatAM vidheyatAm || 153||

AnR^iNyastavo nAma trayodashamaH parichChedaH |

adhyardhashatakaM samAptam | kR^itirAcAryamAtR^icheTasya ||

iti mAtR^icheTavirachitaM adhyardhashatakaM
athavA prasAdapratibhodhava shatapa~nchAshatakaM cha sampUrNam |
##

adhyarddhashataka, Hymn of One Hundred-fifty Verses
is a famous work by the poet Matricheta, an
elder contemporary of king Kanishka (78 A.D.).  Its simplicity,
good choice of words, and easy and graceful style has made it
popular among Buddhist literature.  It serves the purpose of
a manual of BuddhisM for the novices.

In some places like the shlokas 12, 13, 17 and 18, jAtaka
stories are pointed out; the shlokas 89, 111, 115 and 125
point to some events found in the suttapiTaka.

\medskip\hrule\obeylines

Please send corrections to sanskrit@cheerful.com
Last updated \today
https://sanskritdocuments.org

\end{document}